ಹೇಳೇ ಬಿಡಲಾ?

ಹೌದು.. ಇದೆಲ್ಲ ನಾನು ನಿನಗೇ ಏಕೆ ಹೇಳ್ಬೇಕು? ನೀನು ಏಕೆ ಇದ್ನೆಲ್ಲ ಕೇಳ್ಬೇಕು? ಅಂತ ನಿನಗನ್ನಿಸ್ಬಹುದು.ಉತ್ತರ ಇಷ್ಟೇ..ಏಕೆಂದರೆ ''ಈ ನನ್ನ ಕನಸಿನ ರಾಜಕುಮಾರಿ ಬೇರೆ ಯಾರೂ ಅಲ್ಲ; ಅದು ನೀನೆ" ತೀರಾ ಭಾವುಕವಾಗಿ ಪ್ರೀತೀನ ನಿನ್ ಮುಂದೆ ಹೇಳಿಕೊಳ್ ಬೇಕು ಅಂತ ನನ್ನೊಳಗಿನ ಭಂಡ ಧೈರ್ಯ ನನ್ನ ಪುಸಲಾಯಿಸುತ್ತಿರೋದೇನೋ ನಿಜ.ಆದ್ರೆ ಬದುಕು ಕೇವಲ ಭಾವುಕತೆಯಲ್ಲ.ಇಲ್ಲಿ ವಾಸ್ತವನೂ ಇದೆ.ಆ ವಾಸ್ತವದ ತಳಹದಿಯ ಮೇಲೆ ನಾನು ನನ್ನ ಸ್ವಪ್ನಸೌಧವನ್ನ ಕಟ್ಟಬೇಕು ಅನ್ಕೊಂಡಿದೀನಿ.ಅದಾಗ ಬೇಕಿದ್ದರೆ ನಾನು,ನನ್ನ ಬಗ್ಗೆ,ನನಗೆ ಗೊತ್ತಿರೋ ಎಲ್ಲ ಸತ್ಯಗಳನ್ನೂ ನಿನ್ನ ಮುಂದೆ ಹೇಳಲೇ ಬೇಕು.ಇದರಲ್ಲೇನು ಸುಳ್ಳು-ಮೋಸ ಇರಕೂಡದು.ನಿನ್ನ ದೃಷ್ಟಿಯಲ್ಲಿರುವ ನನ್ನ ಇಮೇಜ್ ಅಥವಾ ವ್ಯಕ್ತಿತ್ವವನ್ನ ಪ್ರಾಮಾಣಿಕವಾದ ನನ್ನ ಕಾನ್ಫೆಶನ್ ಜೊತೆ ಹೋಲಿಸಿ ನೋಡು.ನಿನಗೂ ಈ ಪ್ರೀತಿಯ ಪರಿಶುದ್ದತೆ ಅರಿವಾಗಬಹುದು.ನಾನೂ ನಿನ್ನ ಪ್ರೀತಿಗೆ ಪಾತ್ರವಾಗಬಹುದು.ಕೇಳುತ್ತೀಯಲ್ವ?