26 July 2010

ಕನಸು ನಿಜವಲ್ಲ...

ಗಾಜಿನ ಕನಸುಗಳಿವು...ಒಡೆದು ಚೂರಾದರೆ ಕಾಣುವ ಕಣ್ಣಿಗೆ ಚುಚ್ಚೀತು,
ರೇಶಿಮೆ ದಾರದಷ್ಟು ನವಿರು ಒಲವ ಭಾವಗಳು...
ಬಿಗಿಯಾದರೆ ಉಸಿರುಗಟ್ಟಿಸಿ ಕೊಂದೀತು/
ಸಾಲು ಸಾಲು ಸೋಲುಗಳ ನಡುವೆ ಗೆಲುವು ತರುವುದು ನಿನ್ನೊಂದು ನಗು,
ಬಂದೊಮ್ಮೆ ನನ್ನ ಅಪ್ಪಲಾರೆಯ ನಡುವೆ ಗಾಳಿಯೂ ಆಡದಷ್ಟು ಬಿಗು?//


ಕಣ್ಣ ಕಾಲುದೀಪದಲ್ಲಿ ಕನಸ ಎಣ್ಣೆ ಆರುವ ಮೊದಲು,
ಮನದಂಗಳದ ಮರದಲಿ ಅರಳಿರುವ ಪಾರಿಜಾತದ ಹೂವು ಬಾಡುವ ಮೊದಲು/
ಕೊನೆಯ ಉಸಿರು ನನ್ನೆದೆಯಿಂದ ಕೈಜಾರುವ ಮೊದಲು,
ಒಂದೇ ಒಂದು ಬಾರಿ ಮರಳಿಬಂದು ಮುತ್ತಿಡಲಾರೆಯ?...
ನಿನ್ನುಸಿರ ನನ್ನೆದೆಯಲಿ ತುಂಬಲಾರೆಯ?//

ಮನದ ಚಾವಡಿಯಲ್ಲಿ ಕೈದೀಪ ಹಿಡಿದು ನೀನು ಬಂದಂತೆ ಕನಸು,
ಬರಡುಗೆಟ್ಟ ಬಾಳಲ್ಲಿ ಕನಸಲ್ಲಾದರೂ ಬಂದು ಖುಷಿ ಮಲ್ಲಿಗೆಯ ಸುರಿಸು/
ಬಿಸಿಲಲಿ ಸುರಿವ ತುಂತುರಿವಿನಂತೆ,
ಒಳಗಿನ ಬೇಗೆ ಅದೆಷ್ಟಿದ್ದರೂ...ಇದರ ತಂಪಲಿ ತುಸು ತೇಲುತ್ತೇನೆ//

1 comment:

"ನಾಗರಾಜ್ .ಕೆ" (NRK) said...

prati saalu chennaagide, full viraha