11 October 2014

ಪ್ರಧಾನಿಯವರ ಬಡಾಯಿಯೂ, ನಮ್ಮ ನಿಮ್ಮಂತವರ ಉತ್ತಮ ನಾಳೆಗಳಿಗಾಗಿನ ನಿರಂತರ ಲಡಾಯಿಯೂ......




.

( ಗೆಳೆಯ ಗಣಪತಿ ನನ್ನ ಹಿಂದಿನ ಲೇಖನವೊಂದಕ್ಕೆ ಎತ್ತಿದ್ದ ಆಕ್ಷೇಪಗಳಿಗೆ ನನ್ನ ಗ್ರಹಿಕೆಯ ಮಿತಿಯಲ್ಲಿ ಕೊಟ್ಟ ಉತ್ತರ.)

ಗಣಪತಿ, ನಿಮ್ಮ ಪ್ರತಿಕ್ರಿಯೆಗೆ ಇಷ್ಟು ತಡವಾಗಿ ಉತ್ತರ ಹೇಳುತ್ತಿರೋದಕ್ಕೆ ಮೊದಲಿಗೆ ವಿಷಾದ ವ್ಯಕ್ತ ಪಡಿಸುತ್ತಿದ್ದೇನೆ. ನೀವು ಎತ್ತಿರುವ ಆಕ್ಷೇಪದ ಹರಿವು ವಿಶಾಲವಾಗಿ ಉತ್ತರಿಸುವಷ್ಟಿದ್ದರೂ ಸಹ ನಾನು ಆ ಗೋಜಿಗೆ ಹೋಗದೆ ನಿಮ್ಮ ಹಾಗೆ ಕ್ರಮಾಂಕಗಳಲ್ಲಿ ಕೇಳಿದಷ್ಟಕ್ಕೆ ಮಾತ್ರ ನನ್ನ ಕೈಲಾದಷ್ಟು ಚುಟುಕಾಗಿ ಉತ್ತರಿಸಲು ಪ್ರಯತ್ನಿಸಿದ್ದೇನೆ.

೧) ನೀವು ಮೊದಲೆ ಅಂದಂತೆ ನಿಮಗೆ ನನ್ನ ಬರಹದಲ್ಲಿನ ಕೆಲವು ಉಪಮೆಗಳ ಬಗ್ಗೆ ಆಕ್ಷೇಪವಿದೆ. ಒಪ್ಪಿದೆ, ಅನಗತ್ಯವಾಗಿ ಅವಹೇಳನಕಾರಿ ಪದದ ಬಳಕೆ ಶಿಷ್ಟ ಪತ್ರಿಕೋದ್ಯಮದ ಕ್ರಮವಲ್ಲ ಹಾಗೂ ಅದು ಮೂಲದಲ್ಲಿ ಪತ್ರಿಕಾ ಧರ್ಮವೂ ಅಲ್ಲ. ಆದರೆ ವಿವೇಚನೆ ಇಲ್ಲದೆ ಕೂಗುಮಾರಿಗಳಂತೆ ವರ್ತಿಸುತ್ತಾ ೨೪*೭ ಪೀಡೆಗಳಾಗಿರುವ ವಾರ್ತಾವಾಹಿನಿಗಳ ಬಗ್ಗೆ, ಅದರಲ್ಲೂ ಕನ್ನಡ ವಾರ್ತಾವಾಹಿನಿಗಳೆಂಬ ಸುದ್ದಿಯನ್ನ ಬಿಕರಿಗಿಟ್ಟಿರುವವರ ಅಡ್ಡೆಗಳ ಬಗ್ಗೆ ಅಂದು ಬರೆದಾಗ ನಿಮ್ಮ ಆಕ್ಷೇಪ ಎದ್ದಿರುವ 'ಬಿಕನಾಸಿ' ತರಹದ ಪದಗಳ ಬಳಕೆ ಮಾಡಿದ ಬಗ್ಗೆ ನನಗೂ ಬೇಸರವಿದೆ. ಏಕೆಂದರೆ ಅದಕ್ಕಿಂತ ಕೆಳ ಮಟ್ಟದ ಪದವನ್ನ ನಾನು ನ್ಯಾಯವಾಗಿ ಬಳಸಬೇಕಿತ್ತು. ಆದರೆ ಆ ಕ್ಷಣಕ್ಕೆ ನನಗೆ ಅಂತಹವ್ಯಾವುವೂ ಹೊಳೆಯಲಿಲ್ಲ ಎನ್ನುವುದಕ್ಕೆ ನಾಚಿಕೆ ಪಡುತ್ತೇನೆ! ನನ್ನ ಈ ಸಿಟ್ಟಿಗೆ ಅನೇಕ ಸಕಾರಣಗಳಿವೆ. ಅವನ್ನೆಲ್ಲಾ ಬದಿಗಿಟ್ಟು ಇತ್ತೀಚೆಗೆ ಘಟಿಸಿದ ಎರಡು ಘಟನೆಗಳು ಹಾಗೂ ಅವುಗಳನ್ನ ತೋರಿಸುವ ನೆಪದಲ್ಲಿ ವಾರ್ತಾವಾಹಿನಿಗಳೆಂಬ ಸುಟ್ಟ ಮಂದಿಯ ಜಾಲ ಅದು ಹೇಗೆ ಅಗ್ಗವಾಗಿ ವರ್ತಿಸಿತು ಎನ್ನುವ ಉದಾಹರಣೆ ಕೊಟ್ಟು ವಿವರಿಸುತ್ತೇನೆ, ಆಗ ಬಹುಷಃ ನಿಮಗೂ ಅರ್ಥವಾಗುತ್ತದೆ.

ಮೊದಲನೆಯದಾಗಿ ಮೊನ್ನೆ ಪಕ್ಕದ ನಾಡಿನ ಭ್ರಷ್ಟ ನಾಯಕಿಯೊಬ್ಬಳಿಗೆ ನಮ್ಮ ಉಚ್ಛ ನ್ಯಾಯಾಲಯ ಜಾಮೀನು ನೀಡುವ ಪ್ರಕರಣದ ಕುರಿತದ್ದು. ಅಂದು ಇನ್ನೂ ವಿಚಾರಣೆ ಮುಗಿದಿಲ್ಲದಿದ್ದರೂ, ನ್ಯಾಯಾಧೀಶರು ತಮ್ಮ ತೀರ್ಪನ್ನ ಪ್ರಕಟಿಸಲು ಸಾಕಷ್ಟು ಸಮಯ ಬಾಕಿ ಉಳಿದಿದ್ದರೂ ಸಹ ಈ ಅವಸರಕ್ಕೆ ಬಸಿರಾದವರು ಸರಕಾರಿ ಅಭಿಯುಕ್ತರ ಆಕ್ಷೇಪವೇನೂ ಜಾಮೀನಿಗೆ ಇಲ್ಲ ಎಂತಂದ ಕೂಡಲೆ ಆ ಹೆಂಗಸಿಗೆ ಜಾಮೀನು ಸಿಕ್ಕಿತು ಅಂತಲೆ ಊರೆಲ್ಲ ಬಿಡುವಿಲ್ಲದೆ ಟಾಂ ಟಾಂ ಹೊಡೆದೆ ಹೊಡೆದರು. ವಾಸ್ತವದಲ್ಲಿ ಅವರು ಹೀಗೆ ಘೋಷಿಸಿದ ಇಪ್ಪತ್ತು ನಿಮಿಷದ ನಂತರ ಜಾಮೀನು ನಿರಾಕರಣೆಯ ತೀರ್ಪು ಹೊರಬಂತು! ಒಂದು ವೇಳೆ ಜಾಮೀನು ಸಿಕ್ಕಿಯೆ ಬಿಟ್ಟಿತು ಎಂಬ ಆನಂದತಿರೇಕದಲ್ಲಿ ಓಲಾಡುತ್ತಿದ್ದ ಆ ಪುಢಾರಿಯ ಅಭಿಮಾನಿ ದೆವ್ವಗಳು ಈ ಅಘಾತಕಾರಿ ಮರು ಸುದ್ದಿ ಕೇಳಿ ಸಿಟ್ಟಿನಿಂದ ತಪ್ತರಾಗಿ ಉದ್ರಿಕ್ತರೂ ಆಗಿ ಹೋಗಿ ಸಾರ್ವಜನಿಕವಾಗಿ ದಾಂಧಲೆಗಿಳಿದಿದ್ದರೆ ಈ ಅಪದ್ಧವನ್ನ ಮೊದಲಿಗೆ ಹರಡಿದ ಈ ಸುದ್ದಿಮನೆಗಳೆ ನೇರ ಹೊಣೆಯಾಗುತ್ತಿದ್ದವು.

ಹಿಂದೆಯೂ ಇಂತಹ ಸಂದರ್ಭಗಳಲ್ಲಿ ಈ ಅಧಿನಾಯಕಿಯ ಅನು'ನಾಯಿ'ಗಳು ಹೀಗೆಯೆ ಹುಚ್ಚಂಪಟ್ಟೆ ವರ್ತಿಸಿದ ಉದಾಹರಣೆಗಳಿವೆ. ಇಂತಹದ್ದೆ ಪರಿಸ್ಥಿತಿ ತಮ್ಮ ನಾಯಕಿಗೆ ಒದಗಿ ಬಂದಿದ್ದಾಗ ಧರ್ಮಪುರಿಯಲ್ಲಿ ಅವರು ಶಾಲಾ ಬಸ್ಸೊಂದಕ್ಕೆ ಬೆಂಕಿ ಇಟ್ಟು ಮೂವರು ವಿದ್ಯಾರ್ಥಿನಿಯರನ್ನ ಸಜೀವವಾಗಿ ದಹಿಸಿದ್ದು ನಿಮಗೂ ನೆನಪಿರಬಹುದು. ಇಲ್ಲೂ ಅಂತದ್ದೇನಾದರೂ ಆಗಿದ್ದರೆ ತಾವೆ ಬೀದಿಗೆ ಹಚ್ಚಿದ ಬೆಂಕಿಯಲ್ಲಿ ದಿನವಿಡಿ ಗಳ ಹಿಡಿದು ಚಳಿ ಕಾಸಿಕೊಳ್ಳಲಿಕ್ಕೆ ಯಾವ ವಾರ್ತಾವಾಹಿನಿಗಳ ೨೪*೭ ದಂಡಪಿಂಡಗಳೂ ಕಿಂಚಿತ್ತೂ ಹೇಸುತ್ತಿರಲಿಲ್ಲ ಅನ್ನೋದು ತಮ್ಮ ಗಮನಕ್ಕೆ. ಇಂತಹ ಮುಟ್ಠಾಳರನ್ನ ಬಯ್ಯದೆ ಏನು ತಬ್ಬಿ ಮುತ್ತಿಡಬೇಕಿತ್ತ?

ಎರಡನೆಯದಾಗಿ ಮೊನ್ನೆ ಮೊನ್ನೆ ಸುರಿದ ಭಾರಿ ಮಳೆಗೆ ಎಳೆ ಪ್ರಾಯದ ಹೆಣ್ಣು ಮಗುವೊಂದು ಬನ್ನೇರುಘಟ್ಟ ರಸ್ತೆಯಲ್ಲಿ ಚರಂಡಿ ಪಾಲಾಗಿತ್ತು. ಎಡೆಬಿಡದೆ ಸುರಿಯುತ್ತಿದ್ದ ಜೋರು ಮಳೆಯ ನಡುವೆ ಅವೇಳೆಯ ಕಡುಗತ್ತಲಿನಲ್ಲಿ ರಕ್ಷಣಾ ಕಾರ್ಯಾಚರಣೆಗೆ ಧಾವಿಸಿ ಬಂದು ಸ್ಥಳದಲ್ಲಿ ತರಾತುರಿಯಿಂದ ತಮ್ಮ ಕರ್ತವ್ಯ ನಿರ್ವಹಿಸಲು ಹವಣಿಸುತ್ತಿದ್ದ ರಕ್ಷಣಾ ತಂಡವನ್ನ ಮಾಹಿತಿ ಸಂಗ್ರಹದ ನೆಪದಲ್ಲಿ ತಡೆದು ಅನಗತ್ಯವಾಗಿ

'ಮಗು ಯಾವ ಬಣ್ಣದ ಫ್ರಾಕ್ ಧರಿಸಿದ್ದಳು? ( ಅವಳ ಫ್ರಾಕಿನ ರಂಗು ಅದೇನೆ ಆಗಿದ್ದರೂ ಕೆಸರು ಮೆತ್ತಿ ಈಗ ಗುರುತಿಸಲಿಕ್ಕೆ ಖಂಡಿತಾ ಅಸಾಧ್ಯವೆಂಬ ಅರಿವಿಲ್ಲವ ಈ ಅವಿವೇಕಿಗಳಿಗೆ?.)

ಊಟ ಮಾಡಿ ಮನೆ ಬಿಟ್ಟಿದ್ದಳ? ( ಊಟ ಮಾಡಿದ್ದರೆ ತಾನೆ ಸಾವು ಸುಖಮಯವಾಗುತ್ತಿತ್ತ?.)

ನೀರಿಗೆ ಬಿದ್ದಾಗ ಆಕೆಯ ಪ್ರತಿಕ್ರಿಯೆ ಹೇಗಿತ್ತು? ( ಆಪತ್ತಿನಲ್ಲಿ ಇನ್ನು ಹೇಗಿರಲಿಕ್ಕೆ ಸಾಧ್ಯ!)

ಕಿರುಚಿ ಕೊಂಡಳಾ? ( ಕಿರುಚಿಕೊಳ್ಳದೆ ಮತ್ತೆ ಅಂತಹ ವಿಪತ್ತಿನಲ್ಲಿ ಎಸ್ಪಿಬಿ - ಎಸ್ ಜಾನಕಿಯಮ್ಮನ ಯಾವುದಾದರೂ ಮಧುರವಾದ ಜನಪ್ರಿಯ ಡ್ಯೂಯೆಟ್ ಹಾಡು ಹಾಡಿಕೊಳ್ಳಲು ಸಾಧ್ಯವೆ?)

ಕಿರುಚಿ ಕೊಂಡಿದ್ದರೆ ಅದ್ಯಾವ ಭಾಷೆಯಲ್ಲಿ ಕಿರುಚಿದಳು? ( ಅದನ್ನ ಕಟ್ಟಿಕೊಂಡು ಈಗ ಈ ಹಡಬೆಗಳಿಗೇನಾಗಬೇಕು?)

ಕಿರುಚಿದ್ದು ಕನ್ನಡದಲ್ಲ ಇಲ್ಲಾ ತಮಿಳಿನಲ್ಲ? ( ಇದೀಗ ತತಕ್ಷಣದ ಕಾರ್ಯಾಚರಣೆಗೆ ಅತಿ ಮುಖ್ಯ!.)

ಏನಂತ ಕಿರುಚಿದಳು? ( 'ಎಲ್ಲಾ ಲೈವ್ ಟಿವಿ ಖದೀಮರ ಕ್ಯಾಮರ ಬರುವವರೆಗೆ ಇಲ್ಲೆ ಕಾದಿರುತ್ತೇನೆ' ಅಂತ ಮಾತ್ರ ಕಿರುಚಿರಲಿಕ್ಕಿಲ್ಲ.)

ಈ ತರಹದ ತಲೆಹರಟೆ ಪ್ರಶ್ನೆ ಕೇಳುತ್ತಾ ತನಿಖಾ ಪತ್ರಿಕೋದ್ಯಮದ ಗೆಟಪ್ಪಿನಲ್ಲಿ ಒಟ್ಟಾರೆ ಕಾರ್ಯಾಚರಣೆಗೆ ಕಂಟಕವಾಗಿದ್ದ ವಿವಿಧ ವಾಹಿನಿಗಳ ಮೈಕಾಸುರರನ್ನ ಮೆಟ್ಟಿನಲ್ಲಿ ಹೊಡೆದು ಮೊದಲು ಅಲ್ಲಿಂದ ಆಚೆಗೆ ಅಟ್ಟುವ ವಾಸ್ತವ ಪ್ರಜ್ಞೆಯನ್ನ ಯಾರಾದರೂ ಅಲ್ಲಿ ನೆರೆದ ಪ್ರಜ್ಞಾವಂತರು ಒಂದೊಮ್ಮೆ ಮೆರೆದಿದ್ದರೆ, ಸರಾಗ ಕಾರ್ಯಾಚರಣೆ ನಡೆದು ಕಷ್ಟದಲ್ಲಾದರೂ ಬಹುಷಃ ಆ ಮಗು ಜೀವಂತ ಸಿಗುವ ಸಣ್ಣ ಸಂಭವವಾದರೂ ಇದ್ದೇ ಇತ್ತು ಅನ್ನೋದು ನನ್ನ ಅಭಿಪ್ರಾಯ.

ಇಂತಹ ನಾಲಾಯಕರನ್ನ ಅಂದು ಅಷ್ಟು ಸೌಮ್ಯ ಪದದಲ್ಲಿ ಬೈದೆನಲ್ಲ ಅನ್ನುವ ನೋವು ನನಗೆ ಖಂಡಿತ ಕಾಡಲಿಕ್ಕಿದೆ!

೨) ಎರಡನೆಯದಾಗಿ ನಿಮ್ಮ ಆಕ್ಷೇಪವಿರುವುದು ಸಕಾರಾತ್ಮಕವಾಗಿ ಪ್ರಧಾನಿಗಳು ಇರಿಸಿರುವ ಹೆಜ್ಜೆಗಳನ್ನ ಅವಜ್ಞೆಗೆ ಒಳಪಡಿಸಿ ಕೇವಲ ನಕಾರಾತ್ಮಕವಾದ ಅಂಶಗಳನ್ನೆ ಪ್ರಸ್ತಾವಿಸಲಾಗಿದೆ ಅನ್ನುವುದರ ಬಗ್ಗೆ. ನೋಡಿ ಗಣಪತಿ, ಟೀಕೆ ಸಕಾರಾತ್ಮಕವಾಗಿದ್ದರೆ ಅದು ಭೋಪರಾಕ್ ಅನ್ನಿಸಿಕೊಂಡು ಕೇವಲ ಟಿಪ್ಪಣಿಯಾಗಿ ಮಾತ್ರ ಉಳಿದು ಹೋಗುತ್ತದೆ. ಹೌದು, ಸಮಯ ಪಾಲನೆಯ ವಿಷಯದಲ್ಲಿ ಪ್ರಧಾನಿಗಳು ಅನುಕರಣೀಯರಾಗಿರೋದು ಹಾಗೂ ಆ ಸಂಗತಿಯಲ್ಲಿ ಜೋಭದ್ರರಾದ ರಾಜಧಾನಿಯ ಸರಕಾರಿ ನೌಕರರ ಚಳಿಜ್ವರವನ್ನ ಅವರು ಬಿಡಿಸಿರುವುದು ಶ್ಲಾಘನೀಯ. ಅದರ ಬಗ್ಗೆ ನನಗೂ ಮೆಚ್ಚುಗೆ ಇದೆ ಆದರೆ ದುರಾದೃಷ್ಟವಶಾತ್ ನೀವು ಪ್ರಸ್ತಾವಿಸಿದ ಇನ್ನುಳಿದ ಅಂಶಗಳೆಲ್ಲ ಕೇವಲ ಬೂಟಾಟಿಕೆ ಹಾಗೂ ಅವುಗಳಲ್ಲಿ ಹೊಸತೇನೂ ಇಲ್ಲ ಅನ್ನುವುದನ್ನ ನಿಮಗೆ ತಿಳಿಸಲು ಇಚ್ಛಿಸುತ್ತೇನೆ. ಒಂದೊಂದಾಗಿ ಅವುಗಳನ್ನ ವಿಶ್ಲೇಷಿಸುವ.

ಮೊದಲನೆಯದಾಗಿ 'ಜನ ಧನ' ಯೋಜನೆ. ಬ್ಯಾಂಕ್ ಅನ್ನುವ ಸಂಸ್ಥೆ ಸೂಟು ಬೂಟು ಹಾಕಿ ಟೈ ಕಟ್ಟಿದವರಿಗಷ್ಟೇ ಸೀಮಿತ, ಅದರ ಒಳ ಹೊಕ್ಕುವುದು ಅತ್ತಲಾಗಿರಲಿ ಆವರಣದ ಹತ್ತಿರ ಸುಳಿಯುವುದೂ ಮಹಾ ಅಪರಾಧ ಎನ್ನುವ ಭ್ರಮೆಯಲ್ಲಿದ್ದ ಶ್ರೀಸಾಮಾನ್ಯ ಭಾರತೀಯರನ್ನ ನಿರ್ಭಿಡೆಯಾಗಿ ನೇರ ವ್ಯವಸ್ಥಾಪಕರ ಕೊಠಡಿಯೊಳಗೆ ಅಳುಕಿಲ್ಲದೆ ಹೊಕ್ಕು ಸರಳ ನಿಬಂಧನೆಗಳನ್ನ ಸ್ಥಳದಲ್ಲಿಯೆ ಪೂರೈಸಿ "ಧನ"ವನ್ನ ಸಾಮಾನ್ಯ "ಜನ"ರೂ ತಮ್ಮ ಅಗತ್ಯಗಳಿಗೆ ಬಳಸುವಂತೆ ಮೊದಲು ಪ್ರೋತ್ಸಾಹಿಸಿ 'ಸಾಲಮೇಳ'ದಂತಹ ದಿಟ್ಟ ಯೋಜನೆಯೊಂದನ್ನ ಆರಂಭಿಸಿ ಇಂದಿಗೆ ಕಾಲು ಶತಮಾನಕ್ಕೆ ಹಿಂದೆಯೆ ಬಡ ಭಾರತೀಯರ ಎದೆಯಲ್ಲೂ ಕೆಚ್ಚನ್ನ ತುಂಬಿದ್ದು ನಮ್ಮದೆ ಊರಿನ ವಾಚಾಳಿ ರಾಜಕಾರಣಿ ಜನಾರ್ಧನ ಪೂಜಾರಿ. ಅವರು ಆಗ ರಕ್ತ ಮಾಂಸ ತುಂಬಿ ಜಾಗೃತಗೊಳಿಸಿದ ಜನಪ್ರಿಯ ಯೋಜನೆಗೆ ಮತ್ತೆ ಸುಣ್ಣ ಬಣ್ಣ ಹೊಡೆದು ಇಂದಿನ ಪ್ರಧಾನಿಗಳು ತಮ್ಮ ಕಿರೀಟಕ್ಕೊಂದು ಗರಿಯಂತೆ ಸಿಕ್ಕಿಸಿಕೊಳ್ಳುತ್ತಿದ್ದಾರೆ ಅನ್ನುವುದು ನಿಮ್ಮ ಗಮನಕ್ಕೆ. 'ಓಡಿ'ಯಂತಹ ಹೆಚ್ಚುವರಿ ಸೌಲಭ್ಯಗಳ ತುರಾಯಿಯನ್ನ ಹಳೆಯ ಯೋಜನೆಗಳೊಂದಿಗೆ ಅಡಕ ಮಾಡಿದ ಕ್ಷಣ ಅದು ಹೊಸತಾಗುವುದಿಲ್ಲ. ಇದರಲ್ಲಿ ನಮ್ಮ ಹಾಲಿ ಪ್ರಧಾನಿಗಳ ಹೆಚ್ಚುಗಾರಿಕೆ ಅಷ್ಟೇನೂ ಇಲ್ಲ.

ಇನ್ನು ಎರಡನೆಯದಾಗಿ 'ಮೇಕ್ ಇನ್ ಇಂಡಿಯಾ' ಅಭಿಯಾನ. ನಿಮ್ಮ ಮಾಹಿತಿಗಾಗಿ ಒಂದು ವಿಷಯವನ್ನ ನಾನು ಪ್ರಸ್ತಾವಿಸಬಯಸುತ್ತೇನೆ. ಅತಿ ಸೂಕ್ಷ್ಮ ಜೋಡಣೆಗಳಿರುವ ಎಲೆಕ್ಟ್ರಾನಿಕ್ ಉಪಕರಣಗಳ ಹೊರತು ಇಂದು ನಮ್ಮ ದೈನಂದಿನ ಅಗತ್ಯಗಳಿಗೆ ಪೂರಕವಾಗಿರುವ ಸಾಧನ ಸಲಕರಣೆಗಳನ್ನೆಲ್ಲ ನಾವೆ ನಮ್ಮ ನೆಲದಲ್ಲಿಯೆ ಉತ್ಪಾದಿಸುತ್ತಿದ್ದೇವೆ. ಇವು ಇಲ್ಲಿನ ಅಗತ್ಯಗಳಿಗೆ ತಕರಾರಿಲ್ಲದೆ ಒದಗಿ ಬರುತ್ತಿರೋದು ಸತ್ಯವೆ ಆಗಿದ್ದರೆ ಪರ ದೇಶದ ರಫ್ತಿಗೂ ಇವುಗಳು ಲಾಯಕ್ಕಾಗಿಯೆ ಇರುತ್ತವೆ. ಆಹಾರ ಹಾಗೂ ಕ್ಶೀರೋತ್ಪಾದನೆಯಲ್ಲೂ ನಾವು ಭಾರತೀಯರು ಸ್ವಾವಲಂಬಿಗಳಾಗಿದ್ದೇವೆ, ಔಷಧೋತ್ಪಾದನೆಯಲ್ಲೂ ನಾವೀಗ ಅದ್ವಿತೀಯರು. ಆರೋಗ್ಯ ಕ್ಷೇತ್ರದಲ್ಲಿ ಅಮೇರಿಕೆಯ ಗುಣ ಮಟ್ಟದ ಕ್ಲಿಷ್ಟಕರ ಚಿಕಿತ್ಸೆಗಳು ನಮ್ಮಲ್ಲಿ ಅಲ್ಲಿನ ದರದ ಹತ್ತನೆ ಒಂದು ಭಾಗಕ್ಕೆ ಇಂದು ಲಭ್ಯ. ಅಂಗಾಂಗಳ ಜೋಡಣೆಯಲ್ಲಿ ನಾವು ಪ್ರಪಂಚದ ಇನ್ಯಾವುದೆ ದೇಶದ ತಜ್ಞ ವೈದ್ಯರಿಗೂ ಸೆಡ್ಡು ಹೊಡೆಯುವ ಮಟ್ಟಕ್ಕೆ ಬೆಳೆದಿದ್ದೇವೆ. ವಾಹನ ಹಾಗೂ ಅವುಗಳ ಬಿಡಿ ಭಾಗಗಳ ಉತ್ಪಾದನೆಯಲ್ಲೂ ಕ್ಷಮತೆಯನ್ನ ಕಳೆದ ಕಾಲು ಶತಮಾನಗಳಲ್ಲಿ ನಾವು ಸಾಧಿಸಿ ತೋರಿ ಆಗಿದೆ. ಇನ್ನೆಂತಾ ಮೇಕ್ ಇನ್ ಇಂಡಿಯಾ ಸ್ವಾಮಿ?

ಇನ್ನೇನಿದ್ದರೂ 'ಮೇಕ್ ಇನ್ ಇಂಡಿಯಾ'ದ ಹೆಸರಿನಲ್ಲಿ ಅಮೇರಿಕೆಯಿಂದ ಕಡೆಗೆ ನಾಳೆ ನಾವೆ ಕೊಳ್ಳಬೇಕಿರುವ ಶಸ್ತ್ರಾಸ್ತ್ರಗಳು, ಅಲ್ಲಿ ಗುಜುರಿಗೆ ಬಿದ್ದ ಇಲ್ಲಿ ಹೊಸತಾಗಿ ಬಳಕೆಯಾಗಬಹುದಾದ ಬೋಯಿಂಗ್ ಗುಜುರಿ ವಿಮಾನಗಳ ಮರು ದುರಸ್ತಿ ಹಾಗೂ ಆಧುನಿಕ ಕೃಷಿಯ ಹೆಸರಿನಲ್ಲಿ ಕೃಷಿಗೆ ಮಾರಕವಾದ ರಾಸಾಯನಿಕ ಕೀಟ ನಾಶಕ, ಗೊಬ್ಬರ ಹಾಗೂ ತಳಿ ಸಂವರ್ಧನೆಯ ಸೋಗಿನಲ್ಲಿ Bio Modified ಆಹಾರೋತ್ಪನ್ನಗಳ ವಿಕಾರಿ ಬೀಜಗಳನ್ನ, ಈಗಾಗಲೆ ಅಲ್ಲಿನವರಿಗೆ ಬೇಡವಾದ ಒಡೆದು ಗುಜುರಿಗೆ ಹಾಕಲು ಲಾಯಕ್ಕಾದ ಹಾಳಾದ ಹಡಗುಗಳನ್ನ ನಮ್ಮಲ್ಲಿಯೆ ನೌಕಾ ಪಡೆಗೆ ಮಾರಲು ಮೇಕ್'ಅಪ್ ಮಾಡುವ ನೆಪದಲ್ಲಿ ಇಲ್ಲಿಗೆ ಸಾಗ ಹಾಕಿ 'ಮೇಕ್ ಇನ್ ಇಂಡಿಯಾ' ಮಾಡಿ ಆಯ್ತು ಅಂತ ಹಲ್ಲು ಕಿರಿಯಬಹುದು. ಇದೆ ನೆಪದಲ್ಲಿ ಹೊಸತಾದ ಈ ಕೈಗಾರಿಕೆಗಳ ಗುಮ್ಮವನ್ನೆ ತೋರಿಸಿ, ರೈತರ ಭೂಮಿಯನ್ನ ಬಲವಂತವಾಗಿ ಹೊಸ ಯೋಜನೆಗಳಿಗೆ ಹಂಚುವ ಹೆಸರಿನಲ್ಲಿ ವಶ ಪಡಿಸಿಕೊಳ್ಳಬಹುದು.

ಗಣಪತಿ, ನಿಮಗೆ ನೆನಪಿದ್ದರೆ ಒಬಾಮಾ ತನ್ನ ವ್ಯಾಪಾರಿ ನಿಯೋಗದ ಜೊತೆ ಈ ಹಿಂದೆ ಅಧಿಕೃತವಾಗಿ ಭಾರತದ ಪ್ರವಾಸ ಕೈಗೊಂಡಾಗ ದೆಹಲಿಯಲ್ಲಿ Auto Expo ನಡೆಯುತ್ತಿತ್ತು. ಅಲ್ಲಿ ವಿಶ್ವದ ಅತಿ ಅಗ್ಗದ ಕಾರು ಟಾಟಾ ನ್ಯಾನೋ ಸವಾರಿ ಮಾಡಿ ಮೆಚ್ಚುಗೆ ಹಾಗೂ ಅಚ್ಚರಿಯನ್ನ ಅಮೇರಿಕೆಯ ಅಧ್ಯಕ್ಷರು ವ್ಯಕ್ತ ಪಡಿಸಿದ್ದರು. ಆದರೆ ಅದರಿಂದ ಭಾರತದ ವಾಹನೋದ್ಯಮಕ್ಕೆ ಆದ ಲಾಭವಾದರೂ ಏನು? ಅದಾಗಿ ವರ್ಷದ ಮೇಲಾಯ್ತು ನಮ್ಮ ನಾಡಿನಲ್ಲೂ ಹೊಸ ಸರಕಾರ ಅಸ್ತಿತ್ವಕ್ಕೆ ಬಂತು. ನಮ್ಮ ಪ್ರಧಾನಿಗಳ ಸವಾರಿಯೂ ಅಲ್ಲಿಗೆ ಹೋಗಿ ಬಂತು. 'ದ್ವಿ ಪಕ್ಷೀಯ' ಒಡಂಬಡಿಕೆಯ ಬುಡಬುಡಿಕೆ ಹೊಡೆಯುವ ಅಮೇರಿಕೆಯ ರಸ್ತೆಯನ್ನ ನಮ್ಮ ಒಂದಾದರೂ ನ್ಯಾನೋ ಕಾರು ಮುಟ್ಟಿತಾ?

ಅಷ್ಟು ದೂರ ಬೇಡ, ಇಂದು ಎಲ್ಲಾ ಬಹುರಾಷ್ಟ್ರೀಯ ವಾಹನೋದ್ಯಮಗಳ ದೈತ್ಯರು ಭಾರತದ ನೆಲದಲ್ಲಿಯೆ ಉತ್ಪಾದನೆಯನ್ನ ಆರಂಭಿಸಿದ್ದಾರೆ. ನಮ್ಮ ಸ್ಥಳಿಯ ಸರಕಾರಗಳೂ ಪೂರಕ ಪ್ರೋತ್ಸಾಹವನ್ನ ಅವಕ್ಕೆ ನೀಡಿವೆ. ಆದರೆ ದುರಂತದ ಪರಮಾವಧಿ ಎಂದರೆ ನಮ್ಮ ನೆರೆಯ ನೇಪಾಳ, ಬಾಂಗ್ಲಾ, ಪಾಕ್, ಮಾಲ್ಡೀವ್ಸ್ ಹಾಗೂ ಶ್ರೀಲಂಕಾದಲ್ಲಿ ಭಾರತದಲ್ಲಿ ಉತ್ಪಾದನೆಯಾದ ವಾಹನಗಳು ಅವು ಬಹುರಾಷ್ಟ್ರೀಯ ಕಂಪನಿಗಳ ಠಸ್ಸೆ ಹೊಂದಿದ್ದರೂ ಸಹ ಕಳಪೆ ಹಾಗೂ ದ್ವಿತಿಯ ದರ್ಜೆಯದು ಎನ್ನುವ ಭಾವ ದಟ್ಟವಾಗಿದೆ. ಪಾಕ್ ಹೊರತು ಪಡಿಸಿ ಇನ್ನುಳಿದ ನೆರೆಯ ದೇಶಗಳಲ್ಲಿ ಸುತ್ತುವಾಗ ಸ್ಥಳಿಯರ ಮಾತುಗಳಲ್ಲಿ ನಾನು ಇದನ್ನ ಗ್ರಹಿಸಿದ್ದೇನೆ. ಸುತ್ತಲ ಊರು ಗೆಲ್ಲದೆ ಅಮೇರಿಕೆಯ ಮಾರು ಗೆಲ್ಲಲು ಹೊರಟಿದ್ದ ನಮ್ಮ ಪ್ರಧಾನಿಯವರು ಅಲ್ಲಿಗೆ ಹೋಗಿ 'ಮೇಕ್ ಇನ್ ಇಂಡಿಯಾ'ದ ಮಂತ್ರ ಜಪಿಸಿದ ಕೂಡಲೆ ಅಲ್ಲಿ ನಮ್ಮವರ ಹೂಡಿಕೆಯ ಮಾವಿನ ಕಾಯಿ ಉದುರಲು ಸಾಧ್ಯವಿಲ್ಲ. ಮೊದಲೆ ಹೇಳಿದಂತೆ ನಮ್ಮವರ ಅಲ್ಲಿನ ಹೂಡಿಕೆಯ ಬಗ್ಗೆ ಆಗಿರುವ ಒಪ್ಪಂದದಲ್ಲಿಯೇ ಸ್ಪಷ್ಟತೆಯಿಲ್ಲ. ಸಾಲದ್ದಕ್ಕೆ ಮೇಕ್ ಇನ್ ಇಂಡಿಯಾ ಅಲ್ಲ ಈಗ ಬೇಕಾಗಿರೋದು ಈಗಾಗಲೆ ಮೇಡ್ ಇನ್ ಇಂಡಿಯಾದ ಮೊಹರು ಹೊತ್ತ ಮಾಲುಗಳಿಗೆ ಹೋದಲ್ಲಿಯೂ ಮಾರುಕಟ್ಟೆ ಸೃಷ್ಟಿಸಬೇಕಾಗಿರುವುದು ಇಂದಿನ ಜರೂರತ್ತು. ಈ ವಿಷಯದಲ್ಲಿ ಪ್ರಧಾನಿಯವರು ಸಾಧಿಸಿದ್ದೇನಾದರೂ ನಿಮಗೆ ಗೋಚರವಾಗಿದ್ದರೆ ದಯವಿಟ್ಟು ನಮಗೂ ಅದನ್ನ ತಿಳಿಸಿ.

ನಾವು ಸಕಲೆಂಟು ಉತ್ಪನ್ನಗಳ ರಫ್ತಿಗೆ ಸಮರ್ಥರಾಗಿದ್ದರೂ ಒಪ್ಪಂದಗಳ ಹೆಸರಿನಲ್ಲಿ ನಮ್ಮ ಕೈ ಕಟ್ಟಿ ಹಾಕಲಾಗಿದೆ ಅನ್ನುವುದು ನಿಮ್ಮ ಗಮನಕ್ಕೆ. ನಮ್ಮ ಆಹಾರೋತ್ಪನ್ನಗಳನ್ನ ಅಂತರ್ರಾಷ್ಟ್ರೀಯ ಮಾನದಂಡದ ಶುದ್ಧತೆ ಹಾಗೂ ಗುಣಮಟ್ಟದ ಜರಡಿಯಲ್ಲಿ ಸೋಸಿ ತಿರಸ್ಕರಿಸಲಾಗುತ್ತದೆ. ಹೀಗಾಗಿ ಅವಕ್ಕೆ ಅಮೇರಿಕೆಯಲ್ಲಿ ಮಾರಾಟವಾಗುವ ಭಾಗ್ಯವಿಲ್ಲ. ನಮ್ಮ ತಯಾರಿಯ ವಾಹನಗಳನ್ನ ಕಳಪೆ ಗುಣಮಟ್ಟದ ಹಣೆಪಟ್ಟಿ ಹಚ್ಚಿ ರಫ್ತಿಗೆ ತಡೆಯೊಡ್ಡಲಾಗುತ್ತಿದೆ ಹಾಗೂ ಇದರೆಲ್ಲದರ ಹಿಂದೆ ಅಮೇರಿಕನ್ ವ್ಯಾಪಾರಿ ಹಿತಾಸಕ್ತಿಗಳ ಪಿತೂರಿಯಿದೆ. ಇದನ್ನೆಲ್ಲ ಅರಿತೂ ಸಹ ನೀವು ಪ್ರಧಾನಿಯವರ ನಡೆಯನ್ನ ಸಮರ್ಥಿಸುವಿರಾದರೆ ಅದು ನಿಮ್ಮ ಆಲೋಚನೆಯ ಮಿತಿ ಅಷ್ಟೆ.

೪) ಇನ್ನು ಕಡೆಯದಾಗಿ ನೀವೆ ಹೇಳಿರುವಂತೆ ಆಶಾವಾದದ ನಿರಂತರತೆಯೊಂದು ನಮ್ಮೊಳಗೂ ಇದ್ದೇ ಇದೆ. ಪ್ರತಿಯೊಬ್ಬ ಆಳುವ ನರಿಯಿಂದಲೂ ನಮ್ಮಂತಹ ಆಳಿಸಿಕೊಳ್ಳುವ ಕುರಿಗಳು ಉತ್ತಮ ನಾಳೆಗಳ ನಿರೀಕ್ಷೆಯನ್ನೆ ಇಟ್ಟುಕೊಂಡಿರುತ್ತೇವೆ. ಆದರೆ 'ಬಾಯಲ್ಲಿ ಭಗವದ್ಗೀತೆ, ಬಗಲಲ್ಲಿ ದೊಣ್ಣೆಯೂ ಐತೆ' ಅನ್ನುವ ಮಾನ್ಯ ಪ್ರಧಾನಿಗಳ ನುಣ್ಣನೆಯ ಮಾತಿನ ನಟನೆ 'ದ್ವಿ ಪಕ್ಷೀಯ' ಬಾಂಧವ್ಯದ ಹೆಸರಿನಲ್ಲಿ ಅವರ ಆಪ್ತ ವಲಯದ ಕೆಲವೆ ಕೆಲವು ಕಡು ವ್ಯಾಪಾರಿ ಸಿರಿವಂತರ ಆಸ್ತಿಯ ನೂರಾರು ಕೋಟಿಗಳನ್ನ ಸಾವಿರಾರು ಕೋಟಿಗಳಾಗಿಸಬಹುದು ಅಷ್ಟೆ. ಸಂದೇಹದ ಬೆನ್ನು ಹತ್ತಿ ಕನಿಷ್ಠ ಮುಂಬರುವ ದುರಂತದ ಅರಿವಾದಾಗಲೂ ಬಾಯಿ ಹೊಲೆದುಕೊಂಡು ಕೂತಿದ್ದರೆ ನಾವು ನಮ್ಮಂತವರು ಕೋತಿಗಳಾಗಬಹುದು. ನಮ್ಮ ನಿಮ್ಮ ಭವ್ಯ ಭವಿಷ್ಯ ಇಷ್ಟೆ.


ಮಾನ್ಯ ಪ್ರಧಾನಿಯವರ ಖಾಸಗಿಕರಣದ ಮಂತ್ರದ ದಾಳಿಗೆ ನಾವೆಲ್ಲ ತುತ್ತಾಗಲು ಹೆಚ್ಚು ಕಾಲ ಬೇಕಿಲ್ಲ. ಅದರ ದುರಂತದ ಮುನ್ಸೂಚನೆಯನ್ನಷ್ಟೆ ನಾನಿಲ್ಲಿ ಕೊಡುವ ಪ್ರಯತ್ನ ಮಾಡಿದ್ದೇನೆ. ಒಪ್ಪುವುದು ಬಿಡುವುದು ನಿಮಗೆ ಬಿಟ್ಟ ವಿಚಾರ.

05 October 2014

ಮೊದಲು KFC ಕೊಳೆತ ಕೋಳಿ ತಿನ್ನಿ, ಆಮೇಲೆ ನಾರುವ ಹೊಟ್ಟೆಯನ್ನ COKE ಹಾಕಿ ತೊಳೆಯಿರಿ. ಆಗ ಭಾರತ ಸ್ವಚ್ಛ...........








ಅದೆಂದೋ ಅಮೇರಿಕಾದಲ್ಲಿ ಕೊಳೆತ ಕೋಳಿ ಮಾಂಸ ಭಾರತದ ಬೀದಿಗಳಲ್ಲಿ ಎಗ್ಗಿಲ್ಲದೆ KFC ಖದೀಮರು ಮೇಕಪ್ ಮಾಡಿ ಮಾರುತ್ತಲೇ ಔರೆ, ಗತಿಗೆಟ್ಟ ನಮ್ಮವರು ಅವರ ಅಡ್ಡೆಗಳಿಗೆ ಎಡತಾಕಿ ಅವನ್ನ ಮುಕ್ಕಿ ಮಹದಾನಂದದಿಂದ ಜೇಬು ಹಗೂರ ಮಾಡಿ ಕೊಳ್ಳುತಾರೆ. ಇದು ಅಹಂಕಾರಿ ಅಮೇರಿಕಾದ ಜೊತೆ ನಾವು ಮಾಡಿಕೊಂಡ ದ್ವಿ ಪಕ್ಷೀಯ ಒಪ್ಪಂದದ ಚಂದ. ತಮಗೆ ಬೇಡದ ಕಸವನ್ನ ಅವರು ನಮಗೆ ಮಾರ್ತಾರೆ, ಮತಿಗೆಟ್ಟ ನಾವದನ್ನ ಕೊಳ್ತೇವೆ.

"ಸ್ವಚ್ಛ ಭಾರತ ಅಭಿಯಾನ"ದಲ್ಲಿ ಮೊದಲು ಸ್ವಚ್ಛ ಮಾಡಬೇಕಾದದ್ದು ಅಲ್ಲಿ ಹೋಗಿ ಅವರನ್ನ ತಾರಾಮಾರ ಹೊಗಳಿ ಅವರ ಜೊತೆ ಒಪ್ಪಂದ ಮಾಡಿಕೊಂಡು ತನ್ನ ಚುನಾವಣೆಯ ಖರ್ಚು ಭರಿಸಿದ ಕಾಸಪ್ಪಗಳ ತಿಜೋರಿ ತುಂಬುವ ವ್ಯವಸ್ಥೆ ಮಾಡಿ ಬಂದ ಆಳುವ ಅತಿ ಬುದ್ಧಿವಂತನ ದೇಶವನ್ನೇ ಮಾರುವ ಕೊಳೆತ ಕುತಂತ್ರಿ ಮಂಡೆಯನ್ನ.

ಇಂತವರ ಬೀದಿ ಗುಡಿಸುವ ನಾಟಕಗಳೂ, ಅವನ್ನೆಲ್ಲಾ ನಿಜ ಅಂತ ತಾವೂ ನಂಬಿ ಇತರರನ್ನೂ ನಂಬಿಸುವ ಭಂಡತನಕ್ಕೆ ಇಳಿದಿರುವ ಹೊಗಳಿ ಹಾಡುವ ಬೆರ್ಚಪ್ಪಗಳೂ. ಥೂ.... ಗಲೀಜು. ಇಂತವರ ಯೋಗ್ಯತೆಗಷ್ಟು ಬೆಂಕಿ ಹಾಕ. ಸ್ಥಳಿಯ ಉತ್ಪಾದಕರ ಕಡೆಯಿಂದ KFC ಹಾಗೂ McDonalds ಕೋಳಿ ಮಾಂಸ ಖರೀದಿಸೋದಿಲ್ಲ. ಸುಗುಣ, ವೆಂಕೋಬ್ ನಂತಹ ಸಗಟು ಉತ್ಪಾದಕರಿಂದಲೂ ಅವರು ಮಾಂಸ ಖರೀದಿಸೋದಿಲ್ಲ ಅನ್ನೋದನ್ನ ಹಿಂದೆ "ಮಂಗಳ"ಕ್ಕೆ ಈ ಕುರಿತ ಒಂದು ಲೇಖನ ಬರೆಯುವಾಗ ಸದರಿ ಕಂಪನಿಗಳ help line ಸಂಪರ್ಕಿಸಿದಾಗ ಮೊದಲಿಗೆ ಈ ವಿಷಯ ಅರಿವಿಗೆ ಬಂತು.

ನಂತರ ಈ ವಿಷಯವನ್ನ googleಲಿಸಿದಾಗ ಕೆಲವು ದಿಗಿಲು ಹುಟ್ಟಿಸುವ ವಿಷಯಗಳು ಅರಿವಿಗೆ ಬಂತು. ಆಸ್ಟ್ರೇಲಿಯನ್ ಮೂಲದ ಆದರೆ ಅಮೇರಿಕದಲ್ಲಿ ಸದೃಢ ನೆಲೆ ಹೊಂದಿರುವ KFC ಅರ್ಥಾತ್ ಕೆಂಟುಕಿ ಫ್ರೈಡ್ ಚಿಕನ್ ಇಂದು ಜಗತ್ತಿನಾದ್ಯಂತ ತನ್ನ ಕಬಂಧ ಬಾಹುಗಳನ್ನ ಚಾಚಿರುವ ದೈತ್ಯ ಸಂಸ್ಥೆ. ಕೊಳ್ಳುಬಾಕ ಸಂಸ್ಕೃತಿಯ ಪರಾಕೇಷ್ಠೆಯಲ್ಲಿರುವ ಅಮೇರಿಕಾದ caned foodಗಳಲ್ಲಿ ಎಲುಬು ರಹಿತ ಮೃದುಲ ಕೋಳಿಯ ಎದೆ ಭಾಗದ ಮಾಂಸ ಬಳಕೆ ಆಗುತ್ತದೆ. ಇನ್ನುಳಿದಂತೆ ಇತರ ಅಂಗಾಂಗಗಳು ಅಮೇರಿಕೆಯಲ್ಲಿಯೇ ಇರುವ ಈ ಎರಡೂ ಅಂಗಡಿಗಳಲ್ಲಿ ಮಾರಾಟವಾಗುತ್ತವೆ.

ಆದಾಗ್ಯೂ ಉತ್ಪಾದನೆ ಅಲ್ಲಿನ ಬೇಡಿಕೆಗಿಂತ ಹೆಚ್ಚಾಗಿರುವಾಗ ಹುಟ್ಟಾ ವ್ಯಾಪಾರಿ ಮನೋಭಾವದ ಅಮೇರಿಕನ್ ಕಂಪನಿಗಳೆರಡು ಉಳಿಕೆ ಪಳಿಕೆಯನ್ನೆಲ್ಲ ಅತಿ ಶೈತ್ಯೀಕರಿಸಿ ಹಡಗುಗಳ ಮೂಲಕ ದಕ್ಷಿಣ ಏಷ್ಯಾ ಹಾಗೂ ಆಫ್ರಿಕಾದ ಬಡ ದೇಶಗಳಲ್ಲಿರುವ ತನ್ನ ಫ್ರಾಂಚೈಸಿಗಳಿಗೆ ರವಾನಿಸಿ ಕಾಸೆಣಿಸಿ ಕೊಳ್ಳುತ್ತವೆ.

ಹೀಗೆ ಕಳಿಸಿದ ಹಳಸಲು ಮಾಂಸ ಕೆಲವೊಮ್ಮೆ ಮೂರು ನಾಲ್ಕು ವರ್ಷ ಶೈತ್ಯದಲ್ಲಿದ್ದು ಅನಂತರ ಇಲ್ಲಿನ ಗ್ರಾಹಕರ ಹೊಟ್ಟೆ ಸೇರುವುದು ಮಾಮೂಲು.

ಜನಸಂಖ್ಯೆ ವಿಪರೀತವಾಗಿರುವ ಭಾರತ, ಬಾಂಗ್ಲಾ ಹಾಗೂ ಚೀನಾದ ಯುವ ಗ್ರಾಹಕರೆ ಸಾಮಾನ್ಯವಾಗಿ ಈ ಕಂಪನಿಗಳ ಉದ್ದೇಶಿತ ಗುರಿ. ಅಪರೂಪಕ್ಕೆ ಸದರಿ ಹುಳವಾಗಿ ಮಿಜಿಗುಟ್ಟುವ ಪ್ರಕರಣಗಳು ಮೇಲಿನ ಶಾಂಘೈ ಉದಾಹರಣೆಯಂತೆ ಬೆಳಕಿಗೆ ಬರುತ್ತವೆ. ಹುರಿದ KFC ಕೋಳಿ ಕಾಲಿನ ಸುಟ್ಟ ಪದರವನ್ನ ತಿನ್ನುವ ಮೊದಲೊಮ್ಮೆ ತೆಗೆದು ನೋಡಿದರೆ ನಿತ್ಯ ನಮ್ಮಲ್ಲೂ ಇಂತಹ ನೂರು ಪ್ರಕರಣಗಳು ಬೆಳಕು ಕಂಡಾವು.

ಇದು ಕೋಳಿ ಮಾಂಸದ ಕಥೆಯಾಯಿತು. ಇನ್ನು Metro cash and carry ಹಾಗೂ Totel mallಗಳಲ್ಲಿ ಬಿಕರಿಯಾಗುವ ಮಂಜುಗಟ್ಟಿದ ಕುರಿ ಹಾಗೂ ದನದ ಮಾಂಸಗಳದ್ದೂ ಅದೇ ಕಥೆ.

ಅಮೇರಿಕಾದಲ್ಲಿ ತ್ಯಾಜ್ಯವಾದ ಅವು ಇಲ್ಲಿ ರಾಜಾರೋಷದಿಂದ ಬಿಕರಿಯಾಗುತ್ತವೆ. ಎಷ್ಟೆಂದರೂ ನಮ್ಮ ಮಂದಿಯ ಜೀವ ಅಷ್ಟೊಂದು ಅಗ್ಗ ನೋಡಿ.

ಅಂತರಂಗದ ಕಪಟವೂ ಬಾಹ್ಯದ ಬೃಹನ್ನಾಟಕವೂ.... ಹೀಗೆ ಆದರೆ ಭಾರತ ಖಂಡಿತ ಸ್ವಚ್ಛವಾಗುತ್ತದೆ ಆದರೆ ಆರ್ಥಿಕವಾಗಿ ಹಾಗೂ ವೈಚಾರಿಕವಾಗಿ!

ಯಾವುದೆ ಒಂದು ಸಂಗತಿ ಅಥವಾ ವ್ಯಕ್ತಿಯ ಬಗ್ಗೆ ಸಹಜವಾಗಿ ಮೂಡುವ ನೈಜ ಅಭಿಪ್ರಾಯ ಅಥವಾ ಅವರ ಬಗ್ಗೆ ಅಭಿಪ್ರಾಯ ರೂಪಿಸುವುದರ ನಡುವೆ ಅಗಾಧವಾದ ವ್ಯತ್ಯಾಸವಿದೆ. ಈಗ ದೃಶ್ಯ ಮಾಧ್ಯಮಗಳ ಅಟ್ಟಹಾಸ ಮಿತಿ ಮೀರಿರುವ ದಿನಮಾನದಲ್ಲಿ ನಮ್ಮ ಮಾನ್ಯ ಪ್ರಧಾನಿಗಳ ಪ್ರಭಾವಳಿಯನ್ನ ತಾರಾಮಾರ ಹೆಚ್ಚಿಸುವುದರಲ್ಲಿ 'ಕಾಸಿಗಾಗಿ ಸುದ್ದಿ ಮಾರುವ' ಬಹುತೇಕ ಟಿವಿ ವಾಹಿನಿಗಳು ನಿರತವಾಗಿರೋದು ಬಹಿರಂಗ ಸತ್ಯ. ಅವರ ಪ್ರಭಾವ ಹೆಚ್ಚಿದಷ್ಟೂ ಅದರ ಮೇಲೆ ಬಂಡವಾಳ ಹೂಡಿರುವ ಭಂಡರ ತಿಜೋರಿ ಮುಂದೆ ತುಂಬಿಯೆ ತುಂಬುತ್ತದೆ.


ಈ ನಡುವೆ ಪ್ರಧಾನಿಯ ಅಧಿಕೃತ ಪ್ರವಾಸಗಳನ್ನ ಜನತೆಗೆ ಮುಟ್ಟಿಸುವ ಮಾಧ್ಯಮಗಳ ಮಂದಿಯನ್ನ ಸರಕಾರಿ ವೆಚ್ಚದಲ್ಲಿ ನಿಗದಿತ ದೇಶಗಳಿಗೆ ಕರೆದೊಯ್ಯುವ ಪದ್ದತಿಯನ್ನ ನೂತನ ಪ್ರಧಾನಿಗಳು ಅಧಿಕಾರಕ್ಕೆ ಏರಿದ ನಂತರ ಕೇಂದ್ರ ಸರಕಾರ ಕೈ ಬಿಟ್ಟಿದೆ. ಹಾಗಂತ ಪತ್ರಕರ್ತರು ಅಲ್ಲಿಗೆ ಹೋಗಲಿಲ್ಲವ? ಹೋದರು ಬಾರಿ ಬಾರಿಗೂ ಹೋದರು. ಭೂತಾನ್ ಹಾಗೂ ನೇಪಾಳಕ್ಕೆ ಅದಾನಿ ಕಂಪನಿ ಪ್ರಾಯೋಜಿಸಿದ ವಿಮಾನ ಹಾಗೂ ವಸತಿಯ ಹಂಗಿನಲ್ಲಿ, ಬ್ರಿಕ್ಸ್, ಜಪಾನ್ ಹಾಗೂ ಅಮೇರಿಕೆಗೆ ರಿಲಯನ್ಸ್ ಕಂಪನಿಯ ಪ್ರಾಯೋಜಕತ್ವದಲ್ಲಿ! ಅವರ ಆತಿಥ್ಯ ಹಾಗೂ ಉಡುಗೊರೆಯ ಹಂಗಿನಲ್ಲಿ ಬಿದ್ದವರು ಅದಿನ್ನೆಂತಾ ವರದಿಗಾರಿಕೆ ಮಾಡಿಯಾರು ಎನ್ನುವುದು ಅವರ ವರದಿಯನ್ನ ಅನುಸರಿಸಿದವರ ಗ್ರಹಿಕೆಗೆ ಬಿಟ್ಟ ವಿಚಾರ. ಪ್ರಧಾನಿಯವರ ಯೋಚನೆ ಬಹಳ ಸರಳ ಅತ್ತ 'ನೋಡಿ ನಾವು ಸರಕಾರದ ಹಣ ಉಳಿಸಿದೆವು!' ಅಂತ ಬೀಗುವುದು. ಇತ್ತ ಅವರನ್ನ ಮೆರೆಸುತ್ತಿರುವವರ ಎಂಜಲು ತಿಂದ ಇವರು ಪತ್ರಕರ್ತರು ಎಂಬ ಆರೋಪ ಹೊತ್ತ ಬಿಕನಾಸಿಗಳು ದ್ವಿಪಕ್ಷೀಯ ಒಪ್ಪಂದದ ಹೆಸರಿನಲ್ಲಿ ಆದ ಅನಾಹುತಗಳನ್ನೆಲ್ಲ ತಿಪ್ಪೆ ಸಾರಿಸಿ ಸುಮ್ಮನಾಗುವುದು. ಒಂದೆ ಕಲ್ಲಿಗೆ ಎರಡು ಹಕ್ಕಿಯನ್ನ ಹೊಡೆದಂತಾಯ್ತು.


ಇನ್ನು ಅಮೇರಿಕಾದ ಜೊತೆಗಿನ ದ್ವಿಪಕ್ಷೀಯ ವ್ಯಾಪಾರಿ ಒಪ್ಪಂದಗಳ ಕುರಿತ ವಿಷಯದ ಬಗ್ಗೆ, ಇದು ನಿಜಾರ್ಥದಲ್ಲಿ "ದ್ವಿಪಕ್ಷೀಯ" ಹೂಡಿಕೆ ಆಗಬೇಕೆ ಹೊರತು ಈ ಕೊಡು-ಕೊಳ್ಳುವಿಕೆಯಲ್ಲಿ ಅವರು ಮಾತ್ರ ಕೊಟ್ಟು ನಾವು ಕೊಳ್ಳುವ ಈರಭದ್ರರಾಗುವ ಅಗತ್ಯವಿರಲಿಲ್ಲ. ದುರಾದೃಷ್ಟಕ್ಕೆ ಈಗ ಆಗುತ್ತಿರೋದು ಅದೆ. ಸದ್ಯದ ಅಮೇರಿಕಾ ಭೇಟಿಯಲ್ಲಿ ಪ್ರಧಾನಿ ಎಸಗಿ ಬಂದ ದೊಡ್ಡ ಪ್ರಮಾದವೊಂದರ ಬೆಲೆಯನ್ನ ಸದ್ಯದಲ್ಲಿಯೆ ಬಡ ಭಾರತೀಯರು ಹೊರಲಿದ್ದಾರೆ. ಜೆನೆರಿಕ್ ಔಷಧಿಗಳ ಅನ್ವೇಷಣೆ ಹಾಗೂ ಉತ್ಪಾದನೆಯಲ್ಲಿ ಭಾರೆತೀಯ ಪೇಟೆಂಟ್'ಗಳಿಗೆ ಈ ಒಪ್ಪಂದದ ಪ್ರಕಾರ ಇನ್ನು ಮುಂದೆ ಯಾವುದೆ ಅವಕಾಶವಿರುವುದಿಲ್ಲ. ಇದರ ಅರ್ಥ ಔಷಧಿ ಉತ್ಪಾದನೆಯ ಹಕ್ಕುಸಾಮ್ಯ ಭಾರತೀಯ ಮಾರುಕಟ್ಟೆಗಳ ಪಾಲಿಗೆ ಅಮೇರಿಕನ್ ಮರ್ಜಿಯನ್ನ ಅನುಸರಿಸಬೇಕಾಗುತ್ತದೆ. ಅನಗತ್ಯವಾದ ಈ ಬೌದ್ಧಿಕ ಗುಲಾಮಗಿರಿ ಹಾಗೂ ಕೊಳ್ಳುವ ಅವಲಂಬನೆ ಭಾರತೀಯ ಮೂಲದ ಕೆಲವೆ ಕೆಲವು ಅಮೇರಿಕನ್ ಕಂಪನಿಗಳ ತಿಜೋರಿ ತುಂಬಿಸುತ್ತವೆ. ಅಗ್ಗದ ಉತ್ಪಾದನೆಯ ಔಷಧಿಗಳನ್ನ ತನ್ನ ನೆಲದಲ್ಲಿಯೆ ಉತ್ಪಾದಿಸಲು ಅವಕಾಶವಿದ್ದರೂ ಅನ್ವೇಷಣೆಗೆ ಮೂಲದಲ್ಲಿಯೆ ಭಾರತದ ಹರಿವ ನೀರಿಗೆ ಅಮೇರಿಕನ್ ದೊಣೆ ನಾಯಕರ ಒಪ್ಪಿಗೆ ಖಡ್ಡಾಯವಾಗುವುದರಿಂದ ನಿರ್ಬಂಧ ಬೀಳುವ ಕಾರಣ ಭಾರತೀಯ ಗ್ರಾಹಕರು ಅತಿ ಹೆಚ್ಚಿನ ಬೆಲೆಗೆ ಅವನ್ನ ಖರೀದಿಸಿ ದಿವಾಳಿ ಏಳಬೇಕಾಗುತ್ತದೆ. ಇದರ ದೂರಗಾಮಿ ಪರಿಣಾಮಗಳಂತೂ ಇನ್ನೂ ಭೀಕರ.


ಇನ್ನು ಸದರಿ ಪ್ರವಾಸದಲ್ಲಿ ನಮ್ಮ ದೇಶದಲ್ಲಿ ಅಮೇರಿಕನ್ ಹೂಡಿಕೆಗಳನ್ನ ಮುಕ್ತವಾಗಿರಸಲಾಗಿದೆಯೆ ಹೊರತು ಅವರ ನೆಲದಲ್ಲಿ ನಮ್ಮ ಹೂಡಿಕೆಯ ಬಗ್ಗೆ ಯಾವುದೆ ಸುಳಿವಿಲ್ಲ. ಆದ ಒಪ್ಪಂದದ ನಿಗೂಢತೆಯನ್ನ ಪರಿಶೀಲಿಸಿದಾಗ ಇದು ಶೇಕಡ ಇಪ್ಪತ್ತನ್ನೂ ಮೀರಿಲ್ಲ ಅನ್ನುವುದೊಂದು ದುರಂತ. ನಮ್ಮ ಆಹಾರೋತ್ಪನ್ನಗಳು ( ಬಹುತೇಕ ಭಾರತೀಯ ಅಮೇರಿಕನ್ನರೆ ಅವುಗಳಿಗೆ ಅಲ್ಲಿ ಗ್ರಾಹಕರು.), ಭಾರತೀಯ ವಸ್ತ್ರಗಳು ಹಾಗೂ ಕೆಲವು ಆಯುರ್ವೇದಿಕ್ ಔಷಧಿಗಳನ್ನ ಇದು ಒಳಗೊಂಡಿದೆ ಅಷ್ಟೆ ಆದರೆ ಇದರ ರಫ್ತು ನೀತಿ ನಿಯಮಾವಳಿಗಳು ಅತ್ಯಂತ ಕಠಿಣವಾಗಿವೆ. ಈ ಒಪ್ಪಂದದ ಪ್ರಕಾರ ಬಾಕಿ ಎಂಬತ್ತರಷ್ಟು ಹೂಡಿಕೆ ಅಮೇರಿಕಾದಿಂದ ಆಗುತ್ತಿದೆ ಹಾಗೂ ಈ ಹೂಡಿಕೆಯಿಂದಾಗುವ ಅಮದಿನ ಮೇಲೆ ಯಾವುದೆ ಕಠಿಣ ನಿಯಮಗಳನ್ನ ಅನ್ವಯಿಸಿಯೆ ಇಲ್ಲ!


ಭಾರತದ ರಕ್ಷಣಾ ಕ್ಷೇತ್ರದ ಮೇಲೆ ಅಮೇರಿಕನ್ ಸಮರೋತ್ಪನ್ನಗಳ ಏಕಸಾಮ್ಯವಾಗುವಂತೆ ನಿಯಮಗಳನ್ನ ರೂಪಿಸಲಾಗಿದೆ. ಏಕ ಪಕ್ಷೀಯವಾಗಿ ಹೇರಿಕೆಯಾದಂತಿರುವ ಇದರನ್ವಯ ದೇಶೀಯವಾಗಿ ನಾವು ಇದೂವರೆಗೂ ತಯಾರಿಸುತ್ತಿದ್ದ ಅನೇಕ ಸ್ಥಳಿಯ ಆಯುಧಗಳನ್ನ ಇನ್ನು ಮುಂದೆ ಖಡ್ಡಾಯವಾಗಿ ಉತ್ಪಾದಿಸುವಂತಿಲ್ಲ! ನಮ್ಮ ಯುದ್ದೋಪಕರಣಗಳ ಬೇಡಿಕೆಯನ್ನ ಪೂರೈಸುವ ಜವಾಬ್ದಾರಿ ಅಮೇರಿಕಾ ವಹಿಸಿಕೊಂಡಾಗಿದೆ. ತಮಾಷೆ ಎಂದರೆ ಇದೆ ಅಮೇರಿಕಾ ಸೌದಿಗೆ ಇವೆ ಯುದ್ದೋಪಕರಣಗಳನ್ನ ಮಾರುತ್ತದೆ. ಪಾಕಿಸ್ತಾನಕ್ಕೆ ಹಣದ ಅನುದಾನ ಕೊಟ್ಟಂತೆ ಮಾಡಿ ಅವರು ಅದೆ ಹಣದಿಂದ ತನ್ನ ಯುದ್ದೋಪಕರಣಗಳನ್ನ ಖರೀದಿಸುವಂತೆ ಒಡಂಬಡಿಕೆ ಮಾಡಿಕೊಳ್ಳುತ್ತದೆ. ಇವೆರಡೂ ದೇಶಗಳು ಅಮೇರಿಕಾದಿಂದ ಖರೀದಿಸಿದ ಶಸ್ತ್ರಾಸ್ತ್ರಗಳು ಉಗ್ರಗಾಮಿಗಳಿಗೆ ಎಟುಕುತ್ತವೆ. ಗಡಿಯಲ್ಲಿ ಜಪ್ತಾಗುವ ಎಲ್ಲಾ ಕಲೆಶ್ನಿಕೋವ್ ಹಾಗೂ ಗ್ರನೇಡುಗಳ ಮೇಲೆ "ಇದು ಅಮೇರಿಕನ್ ಸೈನ್ಯದ ಆಸ್ತಿ!" ಎನ್ನುವ ಠಸ್ಸೆಯನ್ನ ಇದುವರೆಗೂ ನೋಡುತ್ತಾ ಇದ್ದ ನಮ್ಮ ಸೈನಿಕರು ಅವುಗಳಿಗೆ ಎದುರು ಜವಾಬು ಕೊಡುತ್ತಾ ತಮ್ಮ ಎದೆಯೊಡ್ಡುತ್ತಿದ್ದವರು, ಇನ್ನು ಮುಂದೆ ಅದೆ ಅಮೇರಿಕನ್ ಶಸ್ತ್ರಾಸ್ತ್ರಗಳನ್ನ ಹೊತ್ತು ಅವರೊಂದಿಗೆ ಕಾದಾಡಬೇಕಂತೆ!


ಇನ್ನು ಅಮೇರಿಕೆಗೆ ಸಾಗುವ ಮೊದಲೆ ಮಾನ್ಯ ಪ್ರಧಾನಿಗಳು ಮಾಡಿಕೊಂಡ ವಿದೇಶಾಂಗ ನೀತಿಯ ಎಡವಟ್ಟುಗಳು ಅನೇಕ. ಬಲಾಢ್ಯ ಚೀನಾವನ್ನ ಅನಗತ್ಯವಾಗಿ ಜಪಾನಿನಲ್ಲಿ ಕೆಣಕಿದ್ದು ಪ್ರಮಾದ. ಅವರಷ್ಟೆ ಕುತಂತ್ರದಿಂದ ಅವರನ್ನ ಎದುರಿಸಬೇಕಿತ್ತೆ ಹೊರತು ಅವರನ್ನ ಬಹಿರಂಗವಾಗಿ ಪ್ರಚೋದಿಸಿ ಅಲ್ಲ. ಅಷ್ಟಕ್ಕೂ ವಿದೇಶಾಂಗ ಸಚಿವೆಯನ್ನ ತನ್ನೊಂದಿಗೆ ಕರೆದೊಯ್ಯದೆ ತಮಗಿಂತ ಮೊದಲೆ ಅಲ್ಲಿಗೆ ಅಟ್ಟಿ ತನಗಿಂತ ಮೊದಲು ಆಕೆ ಇಲ್ಲಿಗೆ ಮರಳಿ ಬಂದು ತಮ್ಮನ್ನ ಆಹ್ವಾನಿಸುವಂತೆ ಮಾಡಿದ್ದು ಸರ್ವಾಧಿಕಾರದ ಲಕ್ಷಣ. ದೇಶದ ಆಂತರಿಕ ಹುಳುಕನ್ನ ಜಾಗತಿಕವಾಗಿ ಅಲ್ಲಿ ಪ್ರದರ್ಶಿಸಿದಂತಾದದ್ದು ಮಾತ್ರ ದುರಂತ. ಇದೆ ಚಾಳಿಯನ್ನ ಪ್ರಧಾನಿಗಳು ನೇಪಾಳ ಹಾಗೂ ಭೂತಾನಿನಲ್ಲೂ ಅನುಸರಿಸಿದ್ದರು.


ಇನ್ನು "ಸ್ವಚ್ಛ ಭಾರತ ಅಭಿಯಾನ" ಎಂಬ ಹಾಸ್ಯಾಸ್ಪದ ಪ್ರಹಸನದ ಕುರಿತು ಹೇಳುವುದೆ ವ್ಯರ್ಥ. ಇಂತಹ ಯಾವುದೆ ಕರೆ ತೋರಿಕೆಗಿಂತ ಹೆಚ್ಚು ಆತ್ಮಗತವಾಗಬೇಕು ಹಾಗೂ ಈ ಆತ್ಮ ಸಮರ್ಪಣೆ ಯಾವತ್ತೂ ಖರ್ಚಿಲ್ಲದ ಸೇವೆಯಾಗಿರ ಬೇಕಾದದ್ದು ಅಪೇಕ್ಷಣೀಯ. ಒಪ್ಪೊತ್ತಿನ ಶಾಸ್ತ್ರೀಜಿಯವರ ಕರೆ ಅಂತಹದ್ದು. ಅಲ್ಲಿ ಸರಕಾರ ನಯಾಪೈಸೆ ಖರ್ಚು ಮಾಡಿರಲಿಲ್ಲ. ಕೇವಲ ಅವರ ಬಹಿರಂಗ ಕರೆ ಮಾತ್ರ ಹೊರಟಿತ್ತು, ದೇಶ ಅದಕ್ಕೆ ಸಕಾರಾತ್ಮಕವಾಗಿ ಸ್ಪಂದಿಸಿತ್ತು. ಆದರೆ ಇಂದಿನ ಅಭಿಯಾನಕ್ಕೆ ಘನ ಸರಕಾರ ಅಧಿಕೃತವಾಗಿಯೆ ೧೬೭ ಕೋಟಿ ರೂಪಾಯಿಗಳನ್ನ ಪ್ರಚಾರಾಂದೋಲನದ ನೆಪದಲ್ಲಿ ಸುರಿದಿದೆ! ದೇಶದಾದ್ಯಂತ ಟಿವಿ ಹಾಗೂ ಸಿನೆಮಾ ಮಂದಿರಗಳ ಸೈಡ್ ರೀಲ್'ಗಳಲ್ಲಿ ತೋರಿಸುತ್ತಿರುವ ಇದರ ಜಾಹಿರಾತಿನ ಖರ್ಚು ಪ್ರತ್ಯೇಕ ಅದರ ಅನುದಾನ ಇನ್ನಷ್ಟೆ ಅಂದಾಜಿಸಬೇಕಾಗಿದೆ!.


ಹಾಗಂತ ಈ ಕರೆ ಸಾರ್ಥಕವಾಯಿತ? ಇಲ್ಲ. ಮೂಲಭೂತ ಸಿದ್ಧತೆಗಳಾದ ಬೀದಿಗೊಂದು ಕಸದ ತೊಟ್ಟಿ ಅಳವಡಿಕೆ, ಅಗತ್ಯ ಸಂಖ್ಯೆಯ ಪೌರಕಾರ್ಮಿಕರ ನೇರ ನೇಮಕ, ಸಂಗ್ರಹಿತ ಕಸದ ಸುಧಾರಿತ ವಿಲೇವಾರಿಯ ಕುರಿತು ಯಾವುದೆ ಖಚಿತ ಯೋಜನೆಯನ್ನೆ ರೂಪಿಸದೆ ಕೇವಲ ಮೇಕಪ್ ಹಚ್ಚಿಕೊಂಡು ಹತ್ತು ನಿಮಿಷ ರಸ್ತೆ ಗುಡಿಸಿದ ನಾಟಕವಾಡಿದ ಪ್ರಧಾನಿ ಅದೇನನ್ನ ಸಾಧಿಸಿದರೋ ಮೆದುಳಿದ್ದವರಿಗೆ ಅರ್ಥವಾಗಿರಲಾರದು. ಪೂರ್ವ ಸಿದ್ಧತೆಯೆ ಇಲ್ಲದ ಈ ಅಗ್ಗದ ನಾಟಕಗಳಿಂದ, ಅದಕ್ಕೆ ಅಂಧರಂತೆ ಭೋಪರಾಕು ಹಾಕುವುದರಿಂದ ಭಾರತ ಖಂಡಿತ ಸ್ವಚ್ಛವಾಗಲಾರದು.


ನಿರಾಧಾರವಾದ 'ಆಧಾರ್ ಕಾರ್ಡ್'ನ್ನ ವಿರೋಧಿಸಿಕೊಂಡೆ ಗದ್ದುಗೆಗೇರಿದ ಎಕ್ಕಡದ ನಾಲಗೆಯ ಈ ಆಳುವ ಸರಕಾರ ಈಗ ಅದೆ ದುಷ್ಟ ಯೋಜನೆಯನ್ನ ಆಲಂಗಿಸಿ ನಮ್ಮೆಲ್ಲರ ವಯಕ್ತಿಕ ಮಾಹಿತಿಗಳನ್ನ ಅಮೇರಿಕೆಯ ಆಡಳಿತಕ್ಕೆ ಅಲ್ಲಿನ ವ್ಯಾಪಾರಿ ಹಿತಾಸಕ್ತಿಗಳಿಗೆ ಅಡ ಹಾಕ ಹೊರಟಿದೆ. ಮುಂದೆ ಇದರ ವಿಶ್ಲೇಷಣೆಗೆ ಇಳಿಯುವ ಅಲ್ಲಿನ ಸರಕಾರ ಹಾಗೂ ವ್ಯಾಪಾರಿ ಕಂಪನಿಗಳು ಹೀಗೆ ಮುಂದುವರೆದಲ್ಲಿ ನಾವು ಉಣ್ಣುವ ಊಟ, ತೊಡುವ ದಿರಿಸು ಹಾಗೂ ನೋಡುವ ನೋಟಗಳನ್ನೂ ನಿರ್ದೇಶಿಸಲಿಕ್ಕಿವೆ. ಅಲ್ಲಿಗೆ ಈಗಾಗಲೆ ಬೆಳೆಬೆಳೆಯುತ್ತಾ ಅರೆ ಅಮೇರಿಕನ್ನರಾಗಿರುವ ನಮ್ಮ ಭಾರತೀಯ ಕೂಸುಗಳು ಪೂರ್ತಿ ಅಮೇರಿಕನ್ ಗುಲಾಮಗಿರಿಗೆ ಹಂತ ಹಂತವಾಗಿ ಇಳಿಯುವುದು ನಿಸ್ಸಂಶಯ.


ಹಾಗಂತ ಪ್ರಧಾನಿಯವರು ಏನನ್ನು ಸಾಧಿಸಲೆ ಇಲ್ಲವ? ಎಂದರೆ ಉತ್ತರ ಇಲ್ಲ, ಸಾಧಿಸಿದ್ದಾರೆ. ದಶಕಗಳಿಂದ ಬೀಡು ಬಿಟ್ಟಿದ್ದ "ಅಂತರ್ರಾಷ್ಟ್ರೀಯ ಕಾಶ್ಮೀರ ಶಾಂತಿ ಪರಿಪಾಲನ ನಿಗಾ ಸಮಿತಿ" ಎಂಬ ಬಿಳಿ ಆನೆಯನ್ನ ನಿಷ್ಠುರವಾಗಿ ದೆಹಲಿಯಿಂದ ಗಂಟು ಮೂಟೆ ಕಟ್ಟಿಸಿದ್ದಾರೆ. ಪೆಟ್ರೋಲ್ ಅಮದಿಗಾಗಿ ಇದ್ದ ಕೆಲವೆ ದೇಶಗಳ ಮೇಲಿನ ಅವಲಂಬನೆಯನ್ನ ಒತ್ತಡಗಳ ನಡುವೆಯೂ ಇನ್ನಿತರ ದೇಶಗಳಿಗೆ ವರ್ಗಾಯಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ಮೂಲಕ ತೈಲ ಬೆಲೆಗಳು ಸಣ್ಣ ಮಟ್ಟದಲ್ಲಾದರೂ ದೇಶೀಯವಾಗಿ ತಗ್ಗಿವೆ.



01 October 2014

ಜೀವಂತವಿರುವವರ ನೋವಿಗೆ ಕಿವಿಯಾಗದೆ ಕಲ್ಲ ಪೂಜಿಸುವ ಮೂಢ ಸರಕಾರ....



ಖಾದಿ ಹಾಗೂ ಗಾಂಧಿ ತಮ್ಮ ಮನೆಯ ಸ್ವಂತ ಆಸ್ತಿ ಎನ್ನುವಂತೆ ವರ್ತಿಸುವ ಕಾಂಗ್ರೆಸ್ ಸರಕಾರ ನಾಳೆ ಕಲ್ಲು ಹೃದಯದ ಆಳುವ ಮಂದಿ ಕೂತುಕೊಂಡು ದರ್ಬಾರು ನಡೆಸುವ ವಿಧಾನ ಸೌಧ ಹಾಗೂ ವಿಕಾಸ ಸೌಧದ ನಡುವೆ ತಾವೆ ಗೋರಿ ತೋಡಿ ಹೂತ ಗಾಂಧಿ ತತ್ವಗಳಿಗೆ ಅದೆ ಮೋಹನದಾಸ ಕರಮಚಂದ ಗಾಂಧಿಯವರ ಕಲ್ಲಿನ ವಿಗ್ರಹ ಕೂರಿಸಿ ಸಮಾಧಿ ಉದ್ಘಾಟಿಸಲಿದೆ. ತಾನು ನಿತ್ಯ ಗಾಂಧಿತತ್ವವನ್ನ ಮಣ್ಣಾಗಿಸುತ್ತಿರೋದನ್ನ ಸಾಂಕೇತಿಕವಾಗಿ ಈ ಮೂಲಕ ಸರಕಾರ ಸಾರ ಹೊರಟಿದೆ.

ಅದೆ ಕಳೆದ ಇಪ್ಪತ್ತ ಐದು ದಿನಗಳಿಂದ ಬೆಂಗಳೂರು ನಗರದ ಪುರಭವನದ ಮುಂದೆ 'ಅಕ್ರಮ ಸರಕಾರಿ ಭೂ ಕಬಳಿಕೆ"ಯ ವಿರುದ್ಧ 'ಆಮ್ ಆದ್ಮಿ' ಪಕ್ಷ ಸಂಘಟಿಸುತ್ತಿರುವ ಉಪವಾಸ ಸತ್ಯಾಗ್ರಹದಲ್ಲಿ ತಪ್ಪದೆ ನಿತ್ಯವೂ ಬೆಳಗಿನಿಂದ ಇಳಿ ಸಂಜೆಯವರೆಗೂ ಪಾಲ್ಗೊಳ್ಳುತ್ತಿರುವ ಹಿರಿಯ ಗಾಂಧಿವಾದಿ ವಯೋವೃದ್ಧ ತೊಂಬತ್ತೇಳರ ಪ್ರಾಯದ ಹೆಚ್ ಎಸ್ ದೊರೆಸ್ವಾಮಿಯವರನ್ನ 'ಏನು ನಿಮ್ಮ ಸಮಸ್ಯೆ?' ಎಂದು ಕೇಳುವ ವ್ಯವಧಾನ ಆಳುವ ಮಂದಿಗ್ಯಾರಿಗೂ ಇದ್ದ ಹಂಗಿಲ್ಲ. ಈ ನಡುವೆ ಬೆಂಗಳೂರಿನಲ್ಲಿ ಭಾರಿ ಮಳೆ ಬಿದ್ದು ರಾಡಿಯಾಗಿ ಹೋಗಿತ್ತು. ಇದೆಲ್ಲವನ್ನೂ ಲೆಕ್ಕಿಸದೆ ಈ ಹಿರಿಯ ಗಾಂಧಿವಾದಿ ಜೀವ ತಪ್ಪದೆ ಪ್ರತಿಭಟನೆಗೆ ನಿತ್ಯವೂ ಹಾಜರಾಗಿದೆ.

ರಾಜ್ಯ ರೈತ ಸಂಘದ ಪ್ರಮುಖರು, ಭೂ ಕಬಳಿಕೆಯ ವಿರುದ್ಧ ಸರಕಾರಕ್ಕೆ ವರದಿ ಕೊಟ್ಟ ಎ ಟಿ ರಾಮಸ್ವಾಮಿ ಎಲ್ಲರೂ ಅಲ್ಲಿಗೆ ಬಂದು ಹೋಗಿದ್ದಾಗಿದೆ. ಆದರೆ ಅದರ ಬಗ್ಗೆ ಪ್ಯಾನಲ್ ಚರ್ಚೆ ಮಾಡುವುದು ಅತ್ತಲಾಗಿರಲಿ ಕನಿಷ್ಠ ದಿನಕ್ಕೊಮ್ಮೆ ವರದಿ ಮಾಡುವುದಕ್ಕೂ ಕಾಸಿಗಾಗಿ ಸುದ್ದಿ ಮಾರುವ ಯಾವುದೆ 'ಒಂಬತ್ತನೆ' ನಂಬರಿನ 'ಸುವರ್ಣ'ಕ್ಕನಿಗಾಗಲಿ, ಕರುನಾಡ 'ಜನಶ್ರಿ'ಗೆ ಮೂರು ಕಾಸಿನ ಉಪಯೋಗವಾಗದ ಸುದ್ದಿಗಳನ್ನೆ 'ಕಸ್ತೂರಿ' ಕನ್ನಡದಲ್ಲಿ ನಿತ್ಯ 'ಪಬ್ಲಿಕ್ಕಾ'ಗಿ ಊಳಿಡುವ, 'ಬಿಟಿ'(ವಿ)ಯಾಗಿ ಏನೊಂದನ್ನೂ ಪ್ರಸಾರ ಮಾಡುವ ಅಭ್ಯಾಸವೆ ಇಲ್ಲದೆ 'ರಾಜ್'ಆರೋಷವಾಗಿ 'ಉದಯ'ಕಾಲದಿಂದಲೆ ವಸೂಲಿಗೆ ಇಳಿವ ಚಟಸ್ಥರೆ ವಿರಾಜಮಾನರಾಗಿರುವ ಯಾವೊಂದು 'ಸಮಯ'ಸಾಧಕ ಸುದ್ದಿವಾಹಿನಿಗಳೂ ಸಹ ಆಸಕ್ತಿ ವಹಿಸಿಲ್ಲ.

ನಾಳೆ ಖಾದಿ ಕುರ್ತಾ ಗಾಂಧಿ ಟೋಪಿ ಛದ್ಮವೇಷದಲ್ಲಿ ಕಂಗೊಳಿಸಸುವ ರಾಜಕಾರಣಿಗಳಿಗೂ, 'ನಿತ್ಯಾ' ಕಂಡವರ 'ಮೈತ್ರಿಯ' 'ಕಾರ್ತಿಕ' ಪ್ರಣಯ ಲೀಲೆಗಳನ್ನೆ ಚಪ್ಪರಿಸುವಲ್ಲಿ ವ್ಯಸ್ತವಾಗುವ ಮೂರು ಕಾಸಿನ ಸುದ್ದಿ ಶೂರರಿಗೂ ಏನು ತಾನೆ ವ್ಯತ್ಯಾಸ? ವಾಸ್ತವದಲ್ಲಿ ಗಾಂಧಿ ತತ್ವಗಳನ್ನ ಗೋರಿಗಿಳಿಸಿ ಢೋಂಗಿ ಗಾಂಧಿ ತತ್ವದ ಪ್ರದರ್ಶನಕ್ಕಷ್ಟೆ ಇವರ ದೊಂಬರಾಟಗಳು ಸೀಮಿತಗೊಳ್ಳುತ್ತವೆ ಎನ್ನುವುದಕ್ಕೆ ಈ ಪ್ರಕರಣಕ್ಕಿಂತ ಒಳ್ಳೆಯ ಉದಾಹರಣೆ ಬೇಕಿಲ್ಲ. ಇದೊಂಥರಾ ನಿಜದ ನಾಗರವ ಕೊಂದು ಕಲ್ಲು ನಾಗನಿಗೆ ಹಾಲೆರೆವ ಕೆಲಸದಂತಹದು. ಅಷ್ಟಕ್ಕೂ ಅಕ್ರಮವಾಗಿ ಸರಕಾರಿ ಭೂಮಿಗಳಿಗೆ ಬೇಲಿ ಸುತ್ತಿ ಸ್ವಂತವಾಗಿಸಿಕೊಂಡವರೆ ತಾನೆ ಇವತ್ತು ನಮ್ಮನ್ನ ಆಳುತ್ತಿರೋದು?!

30 September 2014

ಪುಸ್ತಕದೊಳಗೆ - ೧೯




"ಅನರ್ಥ ಕೋಶ"

ಲೇಖಕರು; ನಾರಾಯಣ ಕಸ್ತೂರಿ,
ಪ್ರಕಾಶಕರು; ಸಮಾಜ ಪುಸ್ತಕಾಲಯ ( ಮೊದಲ ಐದು ಮುದ್ರಣ.)

ಪ್ರಕಟಣೆ; ೧೯೭೦.


ಅಂಕಿತ ಪುಸ್ತಕ ( ಹೊಸ ಆವೃತ್ತಿ ಎರಡು ಬಾರಿ.)


ಪ್ರಕಟಣೆ; ೨೦೦೭,

ಕ್ರಯ; ರೂಪಾಯಿ ನಲವತ್ತು.



"ಅತ್ತೆ - ಈಕೆಗೆ ಮೀಸೆ ಬಂದರೆ, ಚಿಕ್ಕಪ್ಪ ಎಂದು ಕರೆಯಬಹುದು - ಮರೆಯಲ್ಲಿ.

ಅಶ್ವಶಕ್ತಿ - ಎರಡೂವರೆ ಸೇರು ಹುರಳಿ.

ಆಟಿಗೆ - ವಿರಾಮ ಸಿಕ್ಕಿದಾಗ, ನಾವು ಆಡುವುದಕ್ಕಾಗಿ, ಮಕ್ಕಳ ಹೆಸರು ಹೇಳಿ, ನಾವು ಕೊಂಡು ತಂದು ಇರಿಸಿರುವ ಆಟದ ಸಾಮಾನುಗಳು.

ಆಣೆ - ಬಹಳ ಅಗ್ಗವಾದ ಒಂದು ವಸ್ತು.

ಆತ್ಮಕಥೆ - ಬೇರೆ ಯಾರಾದರೂ ತಮಗಾಗದವರು ಬರೆದು ಬಿಟ್ಟಾರು ಎಂಬ ಭೀತಿಯಿಂದ ಬುದ್ಧಿವಂತರಾದ ದೊಡ್ಡವರನೇಕರು ತಮ್ಮ ಜೀವನ ಚರಿತ್ರೆಯನ್ನು ತಾವೆ ತಯಾರಿಸಿ ತಿದ್ದಿಸಿ ಪ್ರಕಟಿಸಿ ಬಿಡುತ್ತಾರೆ.

ಆತ್ಮಹತ್ಯೆ - ಸಂಸಾರವೆಂಬ ಆಟಕ್ಕೆ ಇದೆ ತುರುಫ್, ನೂರು ಸಲ ಹೇಳ ಬಹುದು. ಆದರೆ ಮಾಡಲು ಒಂದೆ ಸಲ ಮಾತ್ರ ಸಾಧ್ಯ. ಇದನ್ನು ಸಮರ್ಪಕವಾಗಿ ಮಾಡದಿದ್ದರೆ ಸರ್ಕಾರದವರು ಹಿಡಿದು ಶಿಕ್ಷಿಸುತ್ತಾರೆ. ಆದ್ದರಿಂದ ಮಿಕ್ಕ ಕೆಲಸಗಿಲಸ ಚಾಕರಿಗಳಂತಲ್ಲ.

ಆತಿಥ್ಯ - ಬಂದವನನ್ನು ಮರುದಿನವೆ ಮನೆಯಿಂದ ಹೊರಡಿಸುವ ಪಿತೂರಿ.

ಆನೆ ಹಾಲು - ಇದನ್ನು ಸೇವಿಸಿದರೆ ವಾರವೊಂದಕ್ಕೆ ಮೈಯಭಾರ ಇಪ್ಪತೈದು ಪೌಂಡಿನಂತೆ ಹೆಚ್ಚುತ್ತಾ ಹೋಗುವುದಂತೆ, ಆನೆ ಮರಿಗೆ.

ಇತ್ಯಾದಿ - ಮುಂದಕ್ಕೆ ಬರೆಯಲು ಬುಧ್ಧಿ ಓಡದಿದ್ದರೆ, ಈ ಪದವನ್ನುಪಯೋಗಿಸಿ ಬಚಾವಾಗಬಹುದು.

ಉದರ - ಉದರನಿಮಿತ್ತಮ್ ಬಹುಕೃತ ರೇಷನ್.

ಊಳಿಡುವುದು - ರಾತ್ರಿ ಹೊತ್ತು ನಾಯಿ ಊಳಿಟ್ಟರೆ, ಸಾವಿನ ಸೂಚನೆ ಅನ್ನುತ್ತಾರೆ. ಏಕೆಂದರೆ, ಆ ನಾಯಿಯನ್ನು ಎದುರು ಮನೆಯವರು ಕಲ್ಲು ಹೊಡೆದು ಸಾಯಿಸುವ ಸಂಭವ ಇದೆ.

ಕಲಿಯುಗ - ವಿದ್ಯಾರ್ಥಿ ದೆಸೆ, ಕಲಿಯುವ ಕಾಲ.

ಕವರು - ಬಿಲ್ಲುಗಳನ್ನಿರಿಸುವ ಬತ್ತಳಿಕೆ.

ಕಾಮಗಾರಿ - ವಿಟಲೀಲೆ.

ಕೆಸರು - ಹೆಸರು ಕೆಡಿಸಲು ಉಪಯೋಗವಾಗುವ ಪದಾರ್ಥ.

ಕೌಮಾರ - ಹಸುವನ್ನು ಕೊಲ್ಲುವವ.

ಗಲ್ಲಿ - ಕ್ರಿಕೆಟ್ ಆಟಗಾರರಲ್ಲಿ ಹಲವಾರು ಓಡಾಡುವ ಜಾಗ.

ಗೋಡೆ - ಅಶ್ಲೀಲ ಸಾಹಿತ್ಯದ ಪ್ರಚಾರ ಕೇಂದ್ರ, ಸಿನಿ ಪ್ರಚಾರದ ಆಧಾರ, ಪರಸ್ಪರ ದೂಷಣೆಗಳಿಗೂ , ಪಕ್ಷ ಪ್ರತಿಪಕ್ಷಗಳ ಘೋಷಣೆಗಳಿಗೂ ಒದಗುವಂತೆ ಕಟ್ಟಿ ತಯಾರಿಸಿದ ಜಾಹಿರಾತು ಜಾಗ.

ಗೋದಾನ - ಒಂದು ಬಗೆಯ ಕ್ಷೌರ.

ಗೋಲಿ - ಸಣ್ಣ ಹುಡುಗರೂ ದೊಡ್ಡ ಯೋಧರೂ ಆಟಕ್ಕಾಗಿ ಉಪಯೋಗಿಸುವ ಪದಾರ್ಥ.

ಗ್ರಂಥಕರ್ತ - ಈತ ಗಮನಿಸಬೇಕಾದದ್ದು ಮೂರು, ಹೆಸರು - ಸಮರ್ಪಣ - ಮುನ್ನುಡಿ. ಉಳಿದದ್ದು ಹೇಗಾದರೂ ಇರಲಿ.

ಚಿತ್ರಹಿಂಸೆ - ಸಿನಿಮಾ ನೋಡುವವರಿಗಾಗುವ ಹಿಂಸೆ.

ಚಿರಋಣಿ - ಸಾಲವನ್ನು ಕೊಟ್ಟು ತೀರಿಸದವನು.

ಜಗಲಿ - ಜಗಳಗಳ ಉಗಮ ಸ್ಥಾನ.

ಜಗಳ - ಗಂಡ ಹೆಂಡಿರ ಜಗಳ, ಗಂಡ ಕೊಂಡು ಕೊಡುವ ತನಕ.

ಜನಪ್ರಿಯ ಗೀತೆ - ಇದನ್ನು ಕೆಲವರು ಹಾಡುವ ಮೊದಲು ಜನಪ್ರಿಯ ಎನಿಸಿರುತ್ತದೆ.

ಟೀಚರ್ - ನಪುಂಸಕ ಲಿಂಗ, ಅಂದರೆ ಮಾಸ್ಟರೂ ಆಗಬಹುದು, ಮೇಡಂಮ್ಮೂ ಆಗಬಹುದು.

ಟ್ರೂಮನ್ - ಹೆಸರಿನಲ್ಲೇನಿದೆ ಅನ್ನುವುದಕ್ಕೆ ಒಳ್ಳೆಯ ಉದಾಹರಣೆ.


ಟೆಲಿಫೋನ್ - ಯಾರುಯಾರೋ ಪರಸ್ಪರ ಮಾತನಾಡುವುದನೆಲ್ಲ ಗುಪ್ತವಾಗಿ ಕೇಳಲಿಕ್ಕೆ ಇದೊಂದು ಉಪಾಯ.

ಟೋಪಿ - ಇದನ್ನು ಮೊದಲು ನಮಗೆ ಹಾಕಿದವರು ಪರಂಗಿಯವರು.

ಟೋಲ್'ಗೇಟ್ - ಇಲ್ಲಿಗೆ ಬಂದಾಗ ಲಾರಿಗಳಿಗೆ ಸ್ಪೀಡ್ ಲಿಮಿಟ್ ಎಂಬುದೇ ಇಲ್ಲ.

ತಕ್ಕಡಿ - ವ್ಯಾಪಾರಗಾರರು ಗಿರಾಕಿಗಳಿಗೆ ಮೋಸ ಮಾಡಲು ಉಪಯೋಗಿಸುವ ಒಂದು ಸಾಧನ, ಅನೇಕ ಸಂಸಾರಗಳಲ್ಲಿ ತಕ್ಕಡಿ ಏಳುವುದೇ ಇಲ್ಲವಂತೆ, ತಕ್ಕಡಿಗೇನು ಗೊತ್ತು ಸಕ್ಕರೆಯ ಬೆಲೆ?

ತಿಗಣೆ - ಹಾಸಿಗೆ ಇದ್ದಷ್ಟು ತಿಗಣೆ ಕಾಟ ( ಗಾದೆ.) ಮನುಷ್ಯನೊಂದಿಗೆ ತನ್ನ ರಕ್ತ ಸಂಬಂಧವನ್ನು ಉಳಿಸಿಕೊಂಡಿರುವ ಪ್ರಾಣಿ.

ತಟಸ್ಥ - ನದೀಸ್ನಾನಕ್ಕೆ ಬಂದು ನೀರಿಗೆ ಇಳಿಯಲೋ ಬೇಡವೋ ಎಂದು ಅನುಮಾನಿಸುವವ.

ಬೊಜ್ಜು - ಇದನ್ನ ಕಂಡಲ್ಲಿ ಕರಗಿಸೋಣ ಎನ್ನಿಸುತ್ತದೆ.

ಬೋಂಡ - ಇದನ್ನ ಕರಿಯುವ ಎಣ್ಣೆ ಹೊಲಸಾಗಿರುವುದರಿಂದ ಇದರ ಗಾತ್ರ ಚಿಕ್ಕದಾದಷ್ಟೂ ಉತ್ತಮ.

ಬ್ಯಾಂಕು - ಹಣವಂತರಿಗೆ ಹಣ ಒದಗಿಸುವ ಸಂಸ್ಥೆ, ಬಿಸಿಲಿದ್ದಾಗ ಕೊಡೆ ಸಾಲ ಕೊಟ್ಟು ಮಳೆ ಬಂದ ಕೂಡಲೆ ಹಿಂದಕ್ಕೆ ಕೇಳುವ ಸಂಸ್ಥೆ.

ಬ್ರಹ್ಮಚಾರಿ - ತಲೆಯೊಳಗೆ ಮೆದುಳಿದೆ ಎಂದು ತೋರುವ ಧೀರ, ಯಾರನ್ನು ಮದುವೆಯಾಗಲಿ ಎಂದು ತೀರ್ಮಾನಿಸಲು ಅಶಕ್ತನಾಗಿ ತೊಳಲಾಡುವವ, ಒಂದು ಹೆಣ್ಣು ಜೀವವನ್ನು ಉಳಿಸಿದವ, ತನ್ನ ಪೀಳಿಗೆಯನ್ನು ಬೆಳೆಸಲೆ ಬೇಕಾಗಿಲ್ಲವೆಂಬ ಸತ್ ಸಂಕಲ್ಪವನ್ನು ಮಾಡಿದವ.

ಬಂದರು - ಸಮುದ್ರದ ಮೇಲೆ ಹೋಗಿದ್ದವರು ಬಂದರು ಎನ್ನಿಸುವ ಜಾಗ.

ಭಾವಜೀವಿ - ಅಕ್ಕನ ಮನೆಯಲ್ಲಿದ್ದು ಕಾಲೇಜು ವ್ಯಾಸಂಗ ನಡೆಸುವ ಹುಡುಗ.

ಮಂತ್ರಿ - ನಾವು ಇನ್ನೂ ಚನ್ನಾಗಿ ಮಾಡಬಲ್ಲ ಕೆಲಸ ಕಾರ್ಯಗಳನ್ನು, ನಮಗಿಂತ ಅಸಮರ್ಪಕವಾಗಿ ಮಾಡಲು, ನಾವು ಚುನಾಯಿಸುವ ವ್ಯಕ್ತಿ.

ಮಹಾತ್ಮರು - ಮಹಾತ್ಮರು ಯಾವ ದೇಶದಲ್ಲೂ ಇದುವರೆಗೂ ಹುಟ್ಟಿಲ್ಲ; ಹುಟ್ಟುವುದೆಲ್ಲಾ ಶಿಶುಗಳೇ.

ಮೀನ ಮೇಷ - ಮೀನು ತಿನ್ನಲೋ, ಮೇಷ ತಿನ್ನಲೋ, ಎಂಬ ಚರ್ಚೆ.

ಮೋಸ - ಇತರರಿಗೆ ನಾವು ಮಾಡಿದರೆ ಜಾಣತನ, ಅವರು ನಮಗೆ ಮಾಡಿದರೆ ದ್ರೋಹ.. ಪತ್ತೆಯಾದರೆ ಪೆಚ್ಚು ಇಲ್ಲದಿದ್ದರೆ ಕೆಚ್ಚು, ದುರ್ಭಿಕ್ಷದಲ್ಲಿ ಅಧಿಕ ಮೋಸ.

ವಸಂತ - ಕವಿಗಳಿಗೆ ಹುಚ್ಚು ಬರುವ ಕಾಲ.

ವಾಕರಿಕೆ - ಕೆಲವರ ವಾಕ್ ಕೇಳುವಾಗ ಆಗುವ ಪ್ರತಿಕ್ರಿಯೆ.

ಶನೀಶ್ವರ - ರಾಮೇಶ್ವರಕ್ಕೆ ಹೋದಾಗ, ಅಲ್ಲೂ ನಮ್ಮನ್ನು ಪೀಡಿಸುವ ಪೂಜಾರಿಗಳು.

ಸಮಯಸ್ಪೂರ್ತಿ - ಸ್ನಾನದ ಮನೆಯೊಳಗೆ ನುಗ್ಗಿದಾಗ, ಅಲ್ಲಿದ್ದ ಮಹಿಳೆಯನ್ನು ಕಾಣುತ್ತಲೂ, ಹೊರಕ್ಕೆ ಧಾವಿಸುತ್ತ, ಕ್ಷಮಿಸಿ ರಾಯರೆ, ಎಂದು ಹೇಳುವುದು.

ಸೂಟು - ಸೂಟಾಗದಿದ್ದರೂ ಅನೇಕರು ಧರಿಸಿ ಮೆರೆಯುವ ವಸ್ತ್ರ ವಿಶೇಷ.

ಸ್ವಗತ - ನಾಟಕದಲ್ಲಿ ಒಬ್ಬರನ್ನುಳಿದು ಮಿಕ್ಕೆಲ್ಲರಿಗೂ ಕೇಳಿಸುವಂತೆ ಕೂಗಬೇಕಾದ ಮಾತು.

ಹರಿಹರ - ಒಬ್ಬ ಕನ್ನಡ ಕವಿ, ತುಂಬಾ ರಗಳೆ ಮಾಡಿದವನು."

- ನಾರಾಯಣ ಕಸ್ತೂರಿ


ನಾ ಕಸ್ತೂರಿಯೆಂದೆ ಪ್ರಸಿದ್ಧರಾಗಿರುವ ನಾರಾಯಣ ಕಸ್ತೂರಿ ಕನ್ನಡ, ಮಲಯಾಳಂ ಹಾಗೂ ಆಂಗ್ಲಭಾಷಾ ನಿಪುಣ ಲೇಖಕ. ಶಿಶು ಸಾಹಿತ್ಯ, ಕಾದಂಬರಿ, ಅನುವಾದ, ಹಾಸ್ಯ ಬರಹ, ಜೀವನ ಚರಿತ್ರೆ ಹಾಗೂ ಅಧ್ಯಾತ್ಮ ಇವರ ಬರಹದ ವಿವಿರ ಪ್ರಕಾರಗಳಾಗಿದ್ದವು. ಅಂದಿನ ತಿರುವಾಂಕೂರು ಸಂಸ್ಥಾನದ ಮಾರ್ತಾಂಡಂನಲ್ಲಿ ೧೮೯೭ರ ಅಗೋಸ್ತು ೧೪ನೆ ತೇದಿಯಲ್ಲಿ ಹುಟ್ಟಿ ಮಲಾಯಾಳಂ ಮಾಧ್ಯಮದಲ್ಲಿಯೆ ವಿದ್ಯಾಭ್ಯಾಸ ಪೂರೈಸಿ ತನ್ನ ಇಪ್ಪತೊಂದನೆ ವಯಸ್ಸು ಪ್ರಾಯಕ್ಕೆ ಉದರ ನಿಮಿತ್ತವಾಗಿ ಮೈಸೂರಿಗೆ ಶಿಕ್ಷಕ ವೃತ್ತಿ ಕೈಗೊಳ್ಲಲು ಬಂದ ನಾ ಕಸ್ತೂರಿ ಆನಂತರ ತಮ್ಮ ಕಲಿಕೆಯ ಶ್ರದ್ಧೆಯಿಂದ ಕನ್ನಡವನ್ನು "ಉಟ್ಟು ಖನ್ನಡ ಓರಾಟಗಾರರೂ" ನಾಚುವಂತೆ ಆಳವಾಗಿ ಕಲಿತು ಕನ್ನಡ ಬರಹ ಪ್ರಪಂಚದಲ್ಲಿ ಢಾಳವಾಗಿ ತಮ್ಮ ಹೆಸರು ಉಳಿಸಿ ಹೋದ ಪ್ರತಿಭಾವಂತ.

ಡಾ ರಾಶಿಯವರ ಸಂಪಾದಕತ್ವದಲ್ಲಿ ಪ್ರಕಟವಾಗುತ್ತಿದ್ದ ಆ ಕಾಲದಲ್ಲಿಯೆ ಸುಮಾರು ಎರಡು ಲಕ್ಷ ಪ್ರಸಾರ ಸಂಖ್ಯೆ ಹೊಂದಿದ್ದ "ಕೊರವಂಜಿ" ಹಾಸ್ಯ ಮಾಸ ಪತ್ರಿಕೆಗೆ ಅಂಕಣಕಾರರಾಗಿ ಕೇಫ, ಟಿ ಸುನಂದಮ್ಮ, ಆರಾಸೆ ಹಾಗೂ ಗಿರಣಿ ರಾಮಸ್ವಾಮಿಯಂತಹ ಲೇಖಕರೊಂದಿಗೆ ಸೇರಿ ಸುಮಾರು ಸಾವಿರಕ್ಕೂ ಮೀರಿದ ಹಾಸ್ಯ ಲೇಖನಗಳನ್ನು ಬರೆದಿದ್ದರೆ. 'ಆನರ್ಥ ಕೋಶ' ಒಂದು ವಿಶಿಷ್ಟ ಹಾಸ್ಯ ಪ್ರಯೋಗ. ಕನ್ನಡದ ಆಡುಭಾಷೆಯಲ್ಲಿ ಸೇರಿ ಹೋಗಿದ್ದ ಪರಭಾಷಾ ಪದಗಳನ್ನೂ ದಯ ತೋರಿ ಬಿಟ್ಟು ಬಿಡದೆ ದರದರನೆ ಎಳೆದುಕೊಂಡು ಬಂದು ಮುಂದೆ ಹಣಕಾಸಿನ ಮುಗ್ಗಟ್ಟಿನಿಂದ 'ಕೊರವಂಜಿ' ಶಾಶ್ವತವಾಗಿ ಹಾಸ್ಯದ ಕಣಿ ಹೇಳುವುದನ್ನ ನಿಲ್ಲಿಸುವವರೆಗೂ ನಾ ಕಸ್ತೂರಿ ನಿಯಮಿತವಾಗಿ ಬರೆದು ಕನ್ನಡಿಗರನ್ನ ರಂಜಿಸಿದ ಈ ಹಾಸ್ಯ ಅರ್ಥದ ಅಂಕಣ ಭಾರತೀಯ ಭಾಷೆಗಳನ್ನ ಬಿಡಿ ಪ್ರಪಂಚದ ಯಾವುದೇ ಭಾಷೆಯಲ್ಲಿಯೂ ಕಾಣ ಸಿಗಲಿಕ್ಕಿಲ್ಲ. ಬರವಣಿಗೆಯಲ್ಲಿ ಕನ್ನಡ ಅವರಿಗೆ ಸಿದ್ಧಿಸಿದ್ದರೂ ಸಹ ಉಚ್ಛಾರಣೆಯ ಹಂತದಲ್ಲಿ ಅವರ ಮಲಯಾಳಿ ಶೈಲಿ ಮರೆಯಾಗಿರಲಿಲ್ಲವಂತೆ, ಸಾಲದ್ದಕ್ಕೆ ಮೂಗಿನಲ್ಲಿ ಬೇರೆ ಮಾತಾಡುತ್ತಿದ್ದರಂತೆ ಅವರು. ಇದನ್ನೆ ಪ್ರಸಿದ್ಧ ಕಥೆಗಾರ ಸೀತಾರಾಂ ( ಆನಂದ.) ಈ ಬಗ್ಗೆ ಜಿ ಪಿ ರಾಜರತ್ನಂರಲ್ಲಿ 'ನರ್ಕಕ್ಕಿಳ್ಸಿ ನಾಲಗೆ ಸೀಳಿಸದ್ದಿದ್ದರೂನು "ಣಾ ಕಸ್ತೂರಿ" ಣಿತ್ಯ ಕನ್ನಡದಲ್ಲಿಯೆ ಮಾತಾಡ್ತಾರೆ!" ಅಂತ ಹಾಸ್ಯ ಮಾಡುತ್ತಿದ್ದರಂತೆ.

ತಾನು ಕನ್ನಡ ಕಲಿತ ಬಗೆಯನ್ನ ನಾ ಕಸ್ತೂರಿಯವರೆ ಹೀಗೆ ತಮಾಷೆಯಾಗಿ ಕೆಳಗಿನಂತೆ ವರ್ಣಿಸಿದ್ದಾರೆ.

" ಶ್ರೀಮಾನ್ ಟಿ ಎಸ್ ವೆಂಕಣ್ಣಯ್ಯನವರು ನನ್ನ ಕನ್ನಡ ಗುರುಗಳಲ್ಲೊಬ್ಬರು. ಅವರನ್ನು ನಾನು ಎಂದೆಂದಿಗೂ ಮರೆಯುವಂತಿಲ್ಲ. ಅವರ ಸಹವಾಸ ಭಾಗ್ಯ ನನಗೆ ದೊರೆತಾಗ ನಾನು ಇನ್ನೂ 'ಆಟ' 'ಊಟ' ಓಟ'ಗಳನ್ನ ತಟಾಯಿಸಿ 'ಮುಂದೆ ಬಂದರೆ ಹಾಯಬೇಡಿ, ಹಿಂದೆ ಬಂದರೆ ಒದೆಯಬೇಡಿ' ಎಂದು ಒದರುತ್ತಿದ್ದ ಆರು ವರ್ಷದ ಕನ್ನಡ 'ಮಾಣಿ'. ಅವರು ನನ್ನನ್ನು ಹುರಿದುಂಬಿಸಿದರು. ಅಡಿ ಇಡಿಸಿ ನಡೆಯಿಸಿದರು. ತ್ರಿಪದಿ ಗುಡ್ಡಗಳನ್ನೂ, ವಚನ ಸರೋವರಗಳನ್ನೂ, ಕುಮಾರವ್ಯಾಸ ಭಾರತದ ಗೇರುಸೊಪ್ಪೆಯನ್ನೂ, ಪಂಪ ಸಹ್ಯಾದ್ರಿಯನ್ನೂ, ತೋರಿಸಿ ಉತ್ಸಾಹ ತುಂಬಿದರು ಪ್ರಬುದ್ಧ ಕರ್ಣಾಟಕಕ್ಕಾಗಿ ನನ್ನಿಂದ ಹಲವಾರು ಲೇಖನಗಳನ್ನು ಬರೆಯಿಸಿದರು. ನಾನೆ ಸ್ಪೂರ್ತಿಗೊಂಡು ರಚಿಸಿದ ಒಂದು ಕವನವನ್ನು ಮೆಚ್ಚಿ ಅದರಲ್ಲಿ ಅಚ್ಚು ಹಾಕಿಸಿದರು. ಬೂದಿಯನ್ನೂ ಊದಿ ಬೆಳಗಿಸುವ ಕಾವು ಇತ್ತು ಅವರ ಉಸಿರಲ್ಲಿ. ಅವರ ಸ್ಮಾರಕವಾಗಿ ಒಂದು ಗ್ರಂಥಮಾಲೆಯನ್ನು ಅವಿಚ್ಛಿನ್ನವಾಗಿ ಹೊರಡಿಸುವ ಹೊಣೆಗಾರಿಕೆಯನ್ನು ಅವರ ಮಿತ್ರರು ಹಾಗೂ ಶಿಷ್ಯವೃಂದದ ಪರವಾಗಿ ಅವರ ತಮ್ಮಂದಿರಾದ ತ ಸು ಶಾಮರಾವ್ ಅವರು ಹೊತ್ತುಕೊಂಡಿದ್ದಾರೆ.

ಶ್ರೀ ಶಾಮರಾವ್ ಇಂಟರ್ ಬಿ ಎ ತರಗತಿಗಳಲ್ಲಿ ನನ್ನ ವಿದ್ಯಾರ್ಥಿ. ನನ್ನ ಗುರುಚರಣದಲ್ಲಿ ಪುಸ್ತಕವೊಂದನ್ನರ್ಪಿಸಬೇಕೆಂದು ನನ್ನ ಶಿಷ್ಯ ಸೂಚನೆ ಕೊಟ್ಟಾಗ ನನಗೆ ಅತ್ಯಾನಂದವಾಯಿತು. ಹಲವಾರು ವರ್ಷಗಳಿಂದ ನಾನು ಗುರುತು ಹಾಕಿರಿಸಿದ್ದಈ 'ಅನರ್ಥ ಕೋಶ'ವನ್ನು ಕಳಿಸಿದೆ. 'ಕನ್ನಡಂ ಕಾತ್ತುರಿಯಲ್ತೆ' ಎಂದು ನನ್ನನ್ನು ಪ್ರೀತಿಯಿಂದ ಬರ ಮಾಡಿಕೊಂಡ ಕನ್ನಡ ತಾಯಿಗೆ ಇದು ಒಂದು ಕುಹಕದ ಕಾಣಿಕೆ! ಅಳಿಲು ಸೇವೆ. ಹೊಕ್ಕ ಮನೆಯನ್ನು ಚೊಕ್ಕ ಮಾಡಲು ನಾನು ಕುಕ್ಕು ಮಾಡಿದ ಒಂದು ಬುಕ್ಕು! ಇದೀಗ ಇದು ಧಾರವಾಡದ ಸಮಾಜ ಪುಸ್ತಕಾಲಯದಿಂದ ದ್ವಿತೀಯ ಮುದ್ರಣ ಕಾಣುತ್ತಿರುವುದು ನನಗೆ ಸಂತೋಷ ತಂದಿದೆ.

ಸಂಪಗೆಗಿಂತಲೂ ತಂಪಗೆ ಎಂದರೆ ಇಂಪಾಗುವುದು ಕೇಳ್ವರಿಗೆ ಎಂದು ಕುವೆಂಪು ಅವರು ಮೂವತ್ತೆಂಟು ವರ್ಷಗಳ ಹಿಂದೆಯೆ ಸಾರಿದರು. ಈ ಕವನವನ್ನು ಅವರು ಬರೆದು ಮುಗಿಸಿದ ಕೂಡಲೆ ನನಗೆ ಅದನ್ನು ಓದಿ ತೋರಿಸಿದ ನೆನಪಿದೆ. ಬಹುಷಃ ಅಂದೆ ಆ ಘಳಿಗೆಯಲ್ಲಿಯೆ ಈ ಅನರ್ಥ ಕೋಶದ ಕಲ್ಪನೆ ನನ್ನಲ್ಲಿ ಮೂಡಿರಬೇಕು ಅನ್ನಿಸುತ್ತಿದೆ. ಅನಂತರ ಕುವೆಂಪು ಅವರೆ ನನ್ನನ್ನು 'ಆಲಿಸ್ ಇನ್ ವಂಡರ್'ಲ್ಯಾಂಡ್' ಎಂಬ ಸ್ವಪ್ನ ಕಥಾನಕವನ್ನು ಕನ್ನಡಿಕರಿಸುವಂತೆ ಪ್ರೇರೇಪಿಸಿದರು. ಅದರ ಗ್ರಂಥಕರ್ತನ ಚಮತ್ಕಾರಗಳ ಪೈಕಿ ಆತನ ಹೊಸ ಪದ ಪ್ರಯೋಗಗಳೂ ಬೆಸುಗೆ ಮಾತುಗಳೂ ನನ್ನೊಳಗೆ ಮನೆ ಮಾಡಿದವು. ಅಲ್ಲಿಂದೀಚೆಗೆ ನಾನು ಬರೆದ ಕಥೆ, ಕಾದಂಬರಿ, ಹರಟೆ, ಅಣುಕು, ಮಿಣುಕು ಇವುಗಳಲ್ಲೆಲ್ಲ ನನ್ನ ಲೇಖನಿಯಿಂದ ಜಾರಿದ ಇಂಥ ಅನೇಕ ಹೊಸ ಪ್ರಯೋಗಗಳು ಸೇರಿಕೊಂಡಿವೆ. ಶ್ರೀ ವಿ ಕೃ ಗೋಕಾಕರು, ಶ್ರೀ ದ ರಾ ಬೇಂದ್ರೆಯವರು 'ಚಕ್ರದೃಷ್ಟಿ' 'ಗಾಳಿಗೋಪುರ'ಗಳ ಮುನ್ನುಡಿಯಲ್ಲಿ ನನ್ನ ಈ ಚಾಳಿಯನ್ನ ಮೆಚ್ಚಿದ್ದಾರೆ. ಶ್ರೀ ಡಿವಿಜಿಯವರಂತೂ ನನ್ನ ಬುರುಡೆಗೆ ಮಸಿ ತುಂಬುತ್ತಲೇ ಬಂದಿದ್ದಾರೆ.


'ಜನ ಮೆಚ್ಚಿ ಹುಚ್ಚನ್' ಎಂಬಂತೆ ನಾನು 'ಖಾರಂತ' ಎನ್ನುವ ಅಣಕು ಹೆಸರಿನಲ್ಲಿ ಕಾರಂತರು 'ಅರ್ಥಕೋಶ'ವನ್ನ ಬರೆದಂತೆ ಕೊರವಂಜಿಯ ಪುಟಗಳ ಮೂಲಕ ಒಂದು ಅರಥಕೋಶವನ್ನೆ ಆರಂಭಿಸಿದೆ. ಆಗಾಗ ಹರುಕುಮುರುಕಾಗಿ ಹೊರಬಂದ ಈ ಕೃತಿಯ ಮೂಲ ಸ್ವರೂಪವೆ ಅದು. ಹಳೆಯ ಮಾತುಗಳು ಅನೇಕ ಈಗ ಮರದಡಿಯ ಸೀತೆಯಂತೆ ಅರ್ಥ ಮರೆತು ಗೋಳಿಡುತ್ತಿವೆ. ಹೊಸ ಅರ್ಥವನ್ನೂ, ಹಲವು ವೇಳೆ ವಿಪರೀತಾರ್ಥವನ್ನೂ ತೊಟ್ಟು ತಲೆ ತಗ್ಗಿಸಿವೆ. ಹೊಸ ಮಾತುಗಳನ್ನ ರಚಿಸಿ ನಾವು ನಮ್ಮ ಬಾಳನ್ನ ಹಸನಾಗಿಸಬೇಕೆಂದು ದಿ ಗೋವಿಂದ ಪೈಗಳೂ ಕೂಡ ಒತ್ತಿ ಹೇಳಿ ಕನ್ನಡ ನಾಡಿನ ಮೇಧಾವಿಗಳನ್ನೂ, ಕೀಧಾವಿಗಳನ್ನೂ ಅದಕ್ಕಾಗಿ ಕರೆದರು. ಹೊಸಲು ದಾಟಿದರೆ ಹೊಸ ಅಯ್ಯ ಎನ್ನುತ್ತಾರೆ. ಹಾಗೆಯೆ ಸಂಸ್ಕೃಅತದಿಂದ ಕನ್ನಡಕ್ಕೂ ಇತರ ಭಾಷೆಗಳಿಂದ ನಮ್ಮ ಭಾಷೆಗೂ ಶತಮಾನದಿಂದ ಶತಮಾನಕ್ಕೂ ಹೊಸಲು ದಾಟಿದಾಗಲೆಲ್ಲ ಅವು ಹೊಸ ಅರ್ಥ ತಾಳಿ ಅವು ಹೊಸ ಅಯ್ಯ ಗಳಾಗುತ್ತವೆ. ಅಂತವು ಅನೇಕ ಈ ಗ್ರಂಥದಲ್ಲಿಯೂ ಇವೆ.

ಇಂಗ್ಲೀಷಿನಲ್ಲಿ ಂಒಃಖಔSಇ ಃIಇಖಅಇ ಎಂಬುವವರ ಆeviಟs ಆiಛಿಣioಟಿಚಿಡಿಥಿ ಇದೆ. ಅomiಛಿ ಆiಛಿಣioಟಿಚಿಡಿಥಿ ಎಂಬ ಅಮೇರಿಕನ್ ಗ್ರಂಥವನ್ನೂ ನಾನು ನೋಡಿದ್ದೇನೆ. ಆದರೆ ಅವೆರಡರಲ್ಲೂ ಗ್ರಂಥಕರ್ತರು ಹೊಸ ಪದ ಪ್ರಯೋಗ ನಿರ್ಮಾಣಕ್ಕೆ ಹೊರಟಿಲ್ಲ. ನನ್ನ ಅಭಿಪ್ರಾಯದಲ್ಲಿ ಇಂತಹ ಒಂದು 'ಶಬ್ದ ಕೋಶ' ಹೊರದೇಶಗಳ ಯಾವ ಭಾಷೆಯಲ್ಲಿಯೂ ಇಲ್ಲ, ಭರತಖಂಡದ ಭಾಷೆಗಳಲ್ಲಂತೂ ಇದು ನವನವೀನ. ಆದರೊಂದು ಮಾತು 'ನವೀನಮಿತ್ಯೇವ ನ ಸಾಧು ಸರ್ವಂ' ಅಲ್ಲಲ್ಲಿ ಕೆಲವು ಹಲವು ಅಸಾಧು ಇರಬಹುದು. ಅನಿವಾರ್ಯವಾದ ಅನರ್ಥಗಳೂ ಅವುಗಳಲ್ಲಿ ಸೇರಿ ಹೋಗಿವೆ!

ಸದ್ಯಕ್ಕೆ ನನ್ನದು ಒಂದೆ ಒಂದು ಬಿನ್ನಹ. ಇದನ್ನು ಒಟ್ಟಿಗೆ ಒಂದೆ ಕೂರಿನಲ್ಲಿ 'ಪುಟಪುಟ'ನೆ ಓದಬೇಡಿ. ಗ್ರಂಥವನ್ನು ಕೊಂಡು ಕೈಗೆ ಎಟುಕುವಷ್ಟು ದೂರದಲ್ಲಿ ಇರಿಸಿಕೊಳ್ಳಿ. ಕಣ್ಣಲ್ಲೇನೋ ಬಂದು, ತುಟಿಯಲ್ಲೇನೋ ನಿಂತಾಗ ಸರಕ್ಕನ್ನೆಳೆದು ನಾಲ್ಕೈದು ಮಾತುಗಳನ್ನ ಅವುಗಳ ಅರ್ಥವನ್ನೂ ಓದಿ. ಥಟಕ್ಕನೆ ರುಚಿ ಗೊತ್ತಾಗದಿದ್ದರೆ ಎರಡು ಬಾರಿ ಆಕಳಿಸಿ ಗ್ರಂಥವನ್ನು ಇನ್ನೂ ಕೊಂಚ ದೂರದಲ್ಲಿರಿಸಿ ಸಮಾಧಾನವಾಗಿರಿ!"

- ನಾ ಕಸ್ತೂರಿ.



ದಾವಣಗೆರೆಯ ಸರಕಾರಿ ಕಾಲೇಜಿನ ಪ್ರಾಂಶುಪಾಲರಾಗಿ ನಿವೃತ್ತರಾದ ನಾ ಕಸ್ತೂರಿ ಅಪಾರ ಅಧ್ಯಾತ್ಮಿಕ ಸೆಳೆತಕ್ಕೆ ಒಳಗಾಗಿದ್ದವರು. ಕೆಲಕಾಲ ಮೈಸೂರಿನ ಶ್ರೀರಾಮಕೃಷ್ಣ ಮಠದ ಕಾರ್ಯದರ್ಶಿಯಾಗಿಯೂ ಸೇವೆ ಸಲ್ಲಿಸಿದ್ದ ಅವರು ಕೊನೆಗಾಲದಲ್ಲಿ ಶಿರಡಿಯ ಸಾಯಿಬಾಬರ ಅವತಾರ ತಾನೆಂದು ಹೇಳಿಕೊಳ್ಳುತ್ತಿದ್ದ ಪುಟ್ಟಪರ್ತಿಯ ಕರಡಿ ಸಾಯಿಬಾಬರ ಭಕ್ತಾಗ್ರೇಣಿಯಾಗಿ ಹೋದರು. ಸಾಯಿ ಆತ್ಮ ಕಥೆಯಿಂದ ಹಿಡಿದು ಅವರ ಮಹಿಮೆ ಸಾರುವ ಅನೇಕ ಭಕ್ತಿಭಾವದ ಗ್ರಂಥಗಳನ್ನ ರಚಿಸಿದ ನಾ ಕಸ್ತೂರಿ ಮಲಯಾಳಂನ ಪ್ರಸಿದ್ಧ ಕಾದಂಬರಿ ತಕಳಿ ಶಿವಶಂಕರ ಪಿಳ್ಳೆಯವರ "ಚೆಮ್ಮೀನ್"ನನ್ನ ಕನ್ನಡಕ್ಕೆ ಅನುವಾದಿಸಿ ಗಳಿಸಿದ್ದ ಖ್ಯಾತಿಯ ನಂತರ ಸಾಯಿ ಭಕ್ತಿ ಪರವಶತೆಯಿಂದ ಹಾಸ್ಯಾಸ್ಪದರೂ ಆದರು. ಅದೇನೆ ಇದ್ದರೂ ಪರಭಾಷಿಗನಾಗಿದ್ದೂ ಕನ್ನಡವನ್ನ ಕಲಿತು ಬೆಳೆಸಿದ ಕೀರ್ತಿ ಇವರದ್ದು. ಅದಕ್ಕಾಗಿ ಅವರು ಸದಾ ಸ್ಮರಣೀಯರು. ಅವರ ಕಾಲಾತೀತ ಹಾಸ್ಯ ಇಂದಿಗೂ ಪ್ರಸ್ತುತವಾಗಿಯೆ ಉಳಿದಿದೆ. ಈ ಕಾಲದ ಕೋಡಂಗಿಗಳಂತಹ ಟಿವಿ ಹಾಸ್ಯ ಸಾಹಿತಿಗಳನೇಕರ ಬಂಡವಾಳವಿಲ್ಲದ ಬಡಾಯಿಗೆ ಕಳ್ಳಸಾಗಣೆ ಮಾಡುವ ಹಾಸ್ಯದ ಆಕರ ಗ್ರಂಥವಾಗಿಯೆ ಅವರ ಬರಹಗಳು ಉಳಿದಿವೆ.  

28 September 2014

ಪುಸ್ತಕದೊಳಗೆ - ೧೮





"ನನ್ನ ಮಗ ಗುರುದತ್ತ"

ಲೇಖಕರು; ವಾಸಂತಿ ಪಡುಕೋಣೆ,
ಪ್ರಕಾಶಕರು; ಮನೋಹರ ಗ್ರಂಥಮಾಲಾ.
ಪ್ರಕಟಣೆ; ೧೯೭೬,
ಕ್ರಯ; ರೂಪಾಯಿ ಇಪ್ಪತ್ತು.


" ೧೯೫೩, ಮೆ ತಿಂಗಳಲ್ಲಿ ಗುರುದತ್ತನ ಮದುವೆಯಾಯಿತು. ಗೀತಾರಾಯ್'ಳನ್ನು ಅವಳ ಹಣಕ್ಕೋಸ್ಕರ ಗುರುದತ್ತ ಮದುವೆ ಮಾಡಿಕೊಂಡಿರುವನೆಂದೂ, ಇಲ್ಲದಿದ್ದರೆ ಆತನಿಗು ಆಕೆಗೂ ಎಲ್ಲಿಂದೆಲ್ಲಿಗೆ ಎಂದೂ 'ಟೈಮ್ಸ್' ಪತ್ರಿಕೆಯವರು ತುಂಬಾ ಅವಹೇಳನ ಮಾಡಿ ಬರೆದಿದ್ದರು. ಗುರುದತ್ತನಿಗೆ ವಾಸ್ತವದಲ್ಲಿ ಎಂದೂ ಹಣದ ಮೇಲೆ ಆಸೆ ಇರಲಿಲ್ಲ. ಹಾಗೆ ಇದ್ದದ್ದೇ ಆಗಿದ್ದರೆ ಆಕೆಯ ಹಣವನ್ನೆಲ್ಲ ದೋಚಿಕೊಂಡು ಆಕೆಯನ್ನಾತ ಕೈಬಿಡಬಹುದಾಗಿತ್ತು. ಆತ ದುಡಿದಿದ್ದು ಸ್ವತಃ ದುಡಿದು, ಅದರ ಒಂದು ಕಾಸನ್ನೂ ಇಟ್ಟುಕೊಳ್ಳದೆ ಬಂದದ್ದನೆಲ್ಲ ಪರೋಪಕಾರಕ್ಕಾಗಿ, ದಾನಕ್ಕಾಗಿ ಖರ್ಚು ಮಾಡುವ ಎದೆ ಅವನಿಗಿತ್ತು. ಇಷ್ಟಾಗಿ ಮಾಡಿದ್ದನ್ನು ಹೇಳಿಕೊಳ್ಳುವ ಚಟವೂ ಅವನಿಗಿರಲಿಲ್ಲ. ಈ ಚಿತ್ರಪಟದ ವ್ಯವಸಾಯವೆ ಹೆಚ್ಚಾಗಿ ಆತ್ಮಸ್ತುತಿ ಮಾಡಿಕೊಳ್ಳುವುದಕ್ಕೆ ಹಿರಿದು. ಇನ್ನೊಬ್ಬರು ತಮ್ಮನ್ನು ಮೆಚ್ಚಿ ಮಾತನಾಡುತ್ತಾರೋ ಇಲ್ಲವೋ? ಎಂಬ ಅನುಮಾನವಿದ್ದವರು ಸ್ವತಃ ಆತ್ಮಸ್ತುತಿ ಮಾಡಿಕೊಳ್ಳುತ್ತಿರಬಹುದು. ಗುರುದತ್ತನಿಗೆ ಯಾರ ಹೊಗಳಿಕೆಯಾಗಲಿ ಅಥವಾ ತೆಗಳಿಕೆಯಾಗಲಿ ಅತ್ತ ಲಕ್ಷ್ಯವೆ ಇರುತ್ತಿರಲಿಲ್ಲ. ತಾನಾಯಿತು, ತನ್ನ ಕೆಲಸವಾಯಿತು.ಹೀಗಾಗಿ ಅವನ ಸದ್ಗುಣಗಳು ಯಾರಿಗೂ ತಿಳಿಯದೆ ಹೋದವು. ಬಾಯಿಬಿಚ್ಚಿ ತನ್ನ ಸುಖ ದುಃಖಗಳನ್ನು ಹೇಳದ್ದರಿಂದ ಅವು ಯಾರಿಗೂ ತಿಳಿಯದೆ ಹೋದವು. ಸದಾ ಹಣದ ತಾಪತ್ರಯವಂತೂ ಇದ್ದೇ ಇತ್ತು. ಅಂದರೂ ಒಮ್ಮೆ ಕೈಯಲ್ಲಿ ತೆಗೆದುಕೊಂಡ ಕೆಲಸವನ್ನು ಆತ ಎಂದೂ ಕೈಬಿಡಲಿಲ್ಲ, ಇನ್ನೊಬ್ಬರ ಮುಂದೆ ಹೋಗಿ 'ದೇಹಿ' ಎಂದು ಕೈ ಒಡ್ಡಲಿಲ್ಲ.


'ಬಾಝ್' ನಂತರ 'ಆರ್ ಪಾರ್' ಫಿಲ್ಮಿನಲ್ಲಿ ಶ್ಯಾಮಾ ಎಂಬುವಳನ್ನು ನಾಯಕಿಯನ್ನಾಗಿ ಮಾಡಿ ತಾನು ನಾಯಕನಾಗಿ ಕೆಲಸ ಮಾಡಹತ್ತಿದನು. ಶ್ರಮಜೀವಿಗಳ ಬದುಕನ್ನ ತೋರಿಸುವ ಆ ಫಿಲ್ಮು ತುಂಬಾ ನಡೆದು ಹೆಸರನ್ನ ತಂದಿತು ಜೊತೆಗೆ ಹಣವನ್ನೂ ಸಹ. ಈ ನಡುವೆ ಮನೆಯ ವಾತಾವರಣವೆ ಬದಲಾಗಿದ್ದರಿಂದ ದೇವಿದಾಸನೂ, ವಿಜಯನೂ  ಓದು ಬರಹದಲ್ಲಿ ಮನಸ್ಸು ಹಾಕುತ್ತಿರಲಿಲ್ಲ. ದೇವಿದಾಸನನ್ನು ಒಂದು ಬೋರ್ಡಿಂಗಿಗೆ ಸೇರಿಸುವ ಸಲಹೆ ನಾನು ಗುರುದತ್ತನಿಗೆ ಕೊಟ್ಟೆನು. ಅವನಿಗೆ ಆಗ ಅದು ಸಾಧ್ಯವಾಗಲಿಲ್ಲ. ಆದರೂ ನನ್ನ ಮಾತಿಗೆ ಒಪ್ಪಿ ದೇವಿದಾಸನನ್ನು SSP ಶಾಲೆಗೆ ಸೇರಿಸಿದನು.೧೯೫೩ ನವಂಬರದಲ್ಲಿ ಆತ್ಮಾರಾಮಾ, ನಾಗರತ್ನಾ ಇವರ ಮದುವೆಯೂ ಆಯಿತು.

ಗೀತ ಮದುವೆಯಾದ ನಂತರ ಹಿಂದಿನಂತಿರಲಿಲ್ಲ. ಆಕೆಯ ಸ್ವಭಾವವೆ ಬದಲಾಯಿಸಿತ್ತು. ಮದುವೆಯನಂತರ ಸುಖವಾಗಿ ಆನಂದದಲ್ಲಿರುವುದರ ಬದಲಿಗೆ ಗುರುದತ್ತ - ಗೀತಾ ಇಬ್ಬರಲ್ಲೂ ಸದಾ ಜಗಳವೆ ಹೆಚ್ಚಾಗಿ ಕಂಡುಬರುತ್ತಿತ್ತು. ಗೀತಾ ಒಳ್ಳೆಯ ಹುಡುಗಿ ಹೌದು, ಆದರೂ ಏಕೋ ಏನೋ ಆ ಮದುವೆ ಸುಖಕರವಾಗಲಾರದೆಂದು ನನ್ನ ಒಳ ಮನಸ್ಸಿಗೆ ಕಾಣುತ್ತಿತ್ತು. ಗುರುದತ್ತನೂ ನನ್ನಲ್ಲಿ ಸಲುಗೆಯಿಂದಿದ್ದಾಗ ನನಗೆ ಅನಿಸಿದ್ದರ ಸೂಚನೆಯನ್ನೂ ಅವನಿಗೆ ಕೊಟ್ಟಿದ್ದೆ. ಆತನಿಗೂ ಒಮ್ಮೊಮ್ಮೆ ಹಾಗೆಯೆ ಕಾಣುತ್ತಿತ್ತೇನೋ ಆದರೆ ಕೊಟ್ಟ ಮಾತಿಗೆ ಎಂದೂ ಆತ ತಪ್ಪುತ್ತಿರಲಿಲ್ಲ. 'ಅಮ್ಮಾ, ನಾನು ಏನೆ ಆದರೂ ಗೀತಾಳನ್ನ ಪ್ರೀತಿಸುತ್ತೇನೆ. ಅದೂ ಅಲ್ಲದೆ ಅವಳನ್ನೆ ವರಿಸುವೆನೆಂದು ನಾನು ಮಾತು ಕೊಟ್ಟಿರುವುದನ್ನು ಹೇಗೆ ತಾನೆ ಒಪ್ಪಿ ತಪ್ಪಿಸಲಿ? ಸಾಧ್ಯವಿಲ್ಲ ಎಂದೂ ಸಾಧ್ಯವಿಲ್ಲ. ಅದೃಷ್ಟದಲ್ಲಿ ಇದ್ದಂತಾಗಲಿ. ನೀನು ಸುಮ್ಮನೆ ಚಿಂತಿಸಿ ಹಣ್ಣಾಗಬೇಡಮ್ಮ' ಎಂದೊಮ್ಮೆ ನನಗೆ ಹೇಳಿದ್ದನು. ಅವನೆ ಹೀಗೆ ಹೇಳುತ್ತಿರುವಾಗ, ಅವನೆ ನಮ್ಮ ಕುಟುಂಬಕ್ಕೂ ಆಧಾರವಾಗಿರುವಾಗ ನಾನಾದರೂ ಬಲವಂತ ಹೇಗೆ ಮಾಡಲಿ? ನಾನು ಮಾಡಿದರೂ ಅವನು ಕೇಳುವವನಲ್ಲ. ದೇವರೆ ಗತಿ ಅಂದುಕೊಂಡು ಸುಮ್ಮನಾದೆ.

೧೯೫೪ ಜುಲೈ ತಿಂಗಳ ಒಂಬತ್ತಕ್ಕೆ ಗುರುದತ್ತನ ಚೊಚ್ಚಲ ಮಗು ತರುಣನ ಜನನವಾಯಿತು. ಅದೆ ವರ್ಷ ಮೆ ೩೧ಕೆ ಮಗಳು ಲಲಿತೆಗೂ ಹೆಣ್ಣು ಮಗು ಹುಟ್ಟಿತು. ಗುರುದತ್ತನಿಗೆ ತನ್ನ ಮಗನಿಗಿಂತ ಲಲಿತೆಯ ಮಗಳ ಮೇಲೆಯೆ ಹೆಚ್ಚು ಮಮತೆ. ಮೊದಲು ಕೂಸು ನೋಡಿದವನೆ ಅವನು. ಹುಟ್ಟಿದ ಮೂರನೆ ದಿನಕ್ಕೆ ಅದರ ಎಷ್ಟೋ ಫೋಟೋಗಳನ್ನ ತೆಗೆದಿದ್ದನು. ಅದೆಷ್ಟೋ ವರ್ಷಗಳವರೆಗೆ ಸಣ್ಣ ಮಕ್ಕಳಿಲ್ಲದೆ ಇದ್ದ ಮನೆ ಈಗ ತುಂಬಿದಂತಾಯಿತು. ಇಬ್ಬರು ಮೊಮ್ಮಕ್ಕಳಿಗೂ ಹನ್ನೆರಡನೆ ದಿನ ಹೆಸರಿಡುವ ಸಂಭ್ರಮ ನಡೆಯಿತು. ಮಗಳ ಮಗುವಿಗೆ ಕಲ್ಪನಾ ಎಂದು ಹೆಸರಿಟ್ಟದ್ದಾಯಿತು. ಮಗ ಹುಟ್ಟಿದ ಮೇಲೆ ಗುರುದತ್ತ - ಗೀತ ತಕ್ಕ ಮಟ್ಟಿಗೆ ಸಂತೋಷವಾಗಿ ಅನ್ಯೋನ್ಯವಾಗಿಯೇ ಇದ್ದರು. ಮಗನಿಗಾಗಿ ಒಬ್ಬ ಆಯಾಳನ್ನು ಗೊತ್ತು ಮಾಡಿದರು. ನಾನು ಹೆಚ್ಛಾಗಿ ಮಗಳ ಮನೆಯಲ್ಲಿಯೆ ಇರುತ್ತಿದ್ದೆ. ಏಕೆಂದರೆ ಆಕೆಗೆ ಆಯ ಇಡುವ ಮನಸ್ಸೂ ಇರಲಿಲ್ಲ ಅನುಕೂಲತೆಯೂ ಇರಲಿಲ್ಲ.


ಒಂದು ವರ್ಷದಲ್ಲಿ ಗೀತಾ ಅತಿರೇಕದ ಸಿಡುಕಿನಿಂದ ಅನೇಕ ಬಾರಿ ಮನೆಬಿಟ್ಟು ಹೋಗಿದ್ದಳು. ಮದುವೆಯಾದ ನಂತರವಂತೂ ಆಕೆ ಸಂಪೂರ್ಣ ಸ್ವಾತಂತ್ರ್ಯ ತೆಗೆದು ಕೊಂಡಿದ್ದಳು. ಆದರೆ ಗಂಡ ಇದ್ದಾನೆಂಬ ನೆಪದಿಂದ ಇನ್ನೂ ಹೆಚ್ಚು ಸ್ವೇಚ್ಛಾಚಾರಿಯಾಗಿರಲಿಲ್ಲ ಅಷ್ಟೆ. ಅವಳ ಸಂಪಾದನೆಯೆಲ್ಲ ಅವಳ ಕೈಯಲ್ಲಿ. ಗುರುದತ್ತ ಅತ್ತ ಎಂದೂ ಲಕ್ಷ್ಯ ಹಾಕಲಿಲ್ಲ. ಅದು ಎಷ್ಟು ಎಂದೂ ಸಹ ಕೇಳುತ್ತಿರಲಿಲ್ಲ. ಹಾಗಾಗಿ ಅವಳ ದುಂದುವೆಚ್ಚಕ್ಕೆ ಹಾದಿಯಾಗಿತ್ತು. ಅಲ್ಲದೆ ಅನೇಕ ಸ್ನೇಹಿತರೂ ಇದಕ್ಕೆ ಕೂಡಿಕೊಂಡರು. ಅವರೊಡನೆ ಮನಸ್ಸು ಬಂದ ಕಡೆ ತಿರುಗುವುದು ಹೆಚ್ಚಾಯಿತು. ಕ್ರಮೇಣ ಸ್ವೇಚ್ಛಾಚಾರ ಮಿತಿಮೀರಲು ಆರಂಭಿಸಿತು. ಆಗಲೆ ಗುರುದತ್ತ ಒಂದಷ್ಟು ದಿಟ್ಟತನದಿಂದ ಲಗಾಮು ಜಗ್ಗಿ ತಡೆ ಹಿಡಿದಿದ್ದರೆ ಕುದುರೆ ಸರಳ ಹಾದಿ ಹಿಡಿಯುತ್ತಿತ್ತೋ ಏನೋ? ಸಡಿಲು ಬಿಟ್ಟು ತಪ್ಪು ಮಾಡಿದ.

........

೧೯೫೫ರಲ್ಲಿ ಗುರುದತ್ತನು ಖಾರಿನ ೧೨ನೆ ರಸ್ತೆಯಿಂದ ೧೯ನೆ ರಸ್ತೆಯಲಿಯ ಒಂದು ದೊಡ್ಡ ಮನೆ ಬಾಡಿಗೆ ಹಿಡಿದು ಅಲ್ಲಿಗೆ ಹೋದನು. ಆಗ ಗುರುದತ್ತನ ಸ್ಟೂಡಿಯೋ ತಾಡ್'ದೇವ್'ದಲ್ಲಿತ್ತು. ಈ ಸಲ ಹಾಸ್ಯ ಪ್ರಧಾನವಾದ ಚಿತ್ರಪಟವೊಂದನ್ನು ತಯಾರಿಸುವ ಇಚ್ಛೆಯಿಂದ ಆತನು ಮಧುಬಾಲಾಳಿಗೆ ನಾಯಕಿ ಪಾತ್ರ ಕೊಟ್ಟು ತಾನು ನಾಯಕನ ಪಾತ್ರ ವಹಿಸಿದನು. ಇದೂ ಅತ್ಯಂತ ಭರಪೂರ ನಡೆಯಿತು, ಕೈಯಲ್ಲಿ ಹಣ ಓಡಾಡ ಹತ್ತಿತು. ತರುಣನ ವರ್ಷದ ಹುಟ್ಟುಹಬ್ಬ ವಿಜೃಂಭಣೆಯಿಂದ ನಡೆಯಿತು. ಹುಟ್ಟು ಹಬ್ಬದ ಆಮಂತ್ರಣದ ಕಾರ್ಡುಗಳನ್ನ ಲಲಿತೆ ತಾನೆ ಮಾಡಿದ್ದಳೂ. ಗುರುದತ್ತಾ - ಗೀತಾ ಕೂಡಿಕೊಂಡು ಅನೇಕ ಸಲ ಮುಂಬೈಯನ್ನೆಲ್ಲಾ ಇಬ್ಬರೆ ಸುತ್ತಾಡಿಬಂದರು. ಮೊದಲನೆ ಸಲ ಲಂಡನ್ನಿಗೂ ಹೋಗಿ ಬಂದರು. ಇದೆ ವರ್ಷ ನಮ್ಮ ಯಜಮಾನರೂ ರಿಟೈರ್ ಆದರು. ನಾನೂ ಅವರೊಂದಿಗೆ ದೆಲ್ಲಿ, ಜಯಪುರ, ಕಾಶ್ಮೀರ, ಹರಿದ್ವಾರ, ಋಷಿಕೇಶ ಮುಂತಾದ ಸ್ಥಳಗಳನ್ನೆಲ್ಲ ನೋಡಿಬಂದು ನನ್ನ ಅನೇಕ ದಿನದ ಬಯಕೆ ತೀರಿಸಿಕೊಂಡೆನು. ನನ್ನ ತಾಯಿಯನ್ನು ಲಲಿತೆಯ ಮನೆಯಲ್ಲಿ ಇರುವಂತೆ ಒಪ್ಪಿಸಿದೆನು. ನಮ್ಮ ಯಜಮಾನರು ಇಬ್ಬರು ಮಕ್ಕಳಲ್ಲಿಯೂ ಸ್ವಲ್ಪ ಸ್ವಲ್ಪ ದಿನ ಇರಲಾರಂಭಿಸಿದರು. ನಾನು ಮುಂಬೈ ಬಿಡುವಾಗಲೆ ಸ್ವಲ್ಪ ಜ್ವರವಿತ್ತು. ಆದರೆ ನಾನು ಯಾರಿಗೂ ಹೇಳಲಿಲ್ಲ. ಒಮ್ಮೆ ಮುಂಬೈ ಬಿಟ್ಟರೆ ಸಾಕಾಗಿತ್ತು. ನಮ್ಮ ಸಂಸಾರವೋ ಬಡತನದ್ದು. ಸದಾ ದುಡ್ಡಿನ ಚಿಂತೆ. ಬರುವುದು ಕಡಿಮೆ ಹೋಗುವುದು ಹೆಚ್ಚು. ನಮಗಲ್ಲದೆ ನಮ್ಮಿಂದ ನಮ್ಮ ಮಕ್ಕಳಿಗೂ ಅವರ ಪಾಡು ದುಃಖಕ್ಕೀಡಾಗುವುದು. ಆಗ ಯಾರನ್ನವರು ಸಂಭಾಳಿಸಬೇಕು? ಮಾತಿಗೊಮ್ಮೆ ಸಿಡಿದೇಳುವ ತಮ್ಮ ಹೆಂಡತಿಯನ್ನೆ? ಮುಸು ಮುಸು ಮಾಡುವ ತಂದೆ ತಾಯಂದಿರನ್ನೆ? ಈ ಅನುಭವ ನಮಗಷ್ಟೆ ಕಾಯ್ದಿರಿಸಿದ್ದಲ್ಲ. ಇಡಿ ಜಗತ್ತಿನ ಅನುಭವವೆ ಇದು.

ಗುರುದತ್ತ ನನ್ನಿಂದ ದೂರವಾಗಿದ್ದೇನೋ ನಿಜ ಆದರೆ ನನ್ನ ಬೇಕು ಬೇಡಗಳನ್ನು ಅವನು ಯಾವಾಗಲೂ ಪೂರೈಸುತ್ತಿದ್ದನು. ನನಗೆ ಎಲ್ಲಿಗೆ ಬೇಕೋ ಅಲ್ಲಿಗೆ ಕಳಿಸಿಕೊಡುವನು. ಚಿಕ್ಕಂದಿನಿಂದಲೂ ದೊಡ್ಡೂರುಗಳನ್ನೂ, ಪ್ರಕೃತಿ ಸೌಂದರ್ಯವನ್ನೂ ನೋಡಬೇಕೆಂಬ ನನ್ನ ಹುಚ್ಚು ಕುತೂಹಲವನ್ನೂ ಡಾರ್ಜಲಿಂಗ್, ಕಾಶ್ಮೀರಗಳಂತಹ ರಮ್ಯ ಪ್ರದೇಶಗಳಿಗೆ ಕಳಿಸಿಕೊಟ್ಟು ತೃಪ್ತಿ ಪಡಿಸಿದನು. ನಾನೂ ಅವನ ಮಾತಿಗೆ ವಿರುದ್ಧ ಹೋಗುತ್ತಿರಲಿಲ್ಲ. ಅವನ ವೈವಾಹಿಕ ಜೀವನದಲ್ಲಾಗಲಿ, ವ್ಯಾವಹಾರಿಕ ಜೀವನದಲ್ಲಾಗಲಿ ನಾನು ಕೈ ಹಾಕುತ್ತಿರಲಿಲ್ಲ. ನನ್ನಿಂದ ಏನೂ ತೊಂದರೆಯಾಗದಂತೆ ನೋಡಿಕೊಳ್ಳುತ್ತಿದ್ದೆ. ಆದರೂ ಇನ್ನೊಬ್ಬರಿಗೆ ತಗ್ಗಿ ಇದ್ದು ತನ್ನ ಜೀವಮಾನವನ್ನು ಇನ್ನು ಕಳೆಯುವ ಸಮಯ ಬಂತಲ್ಲಾ ಎಂದು ಒಳಗೊಳಗೆ ಬೇಯುತ್ತಿದ್ದೆ.

ಗುರುದತ್ತ ಮುಂಗೋಪಿಯೂ ಹೌದು, ಆದರೆ ಆತನ ಮನಸ್ಸು ಸ್ಪಟಿಕದಂತೆ ಸ್ವಚ್ಛವಾಗಿತ್ತು. ಪರನಿಂದೆ ಆತನಿಗೆ ಸಹಿಸುತ್ತಿರಲಿಲ್ಲ. ಆತನ ನಿರ್ಮಲವಾದ ಸ್ವಭಾವವೆ ಆತನನ್ನ ಕುತ್ತಿಗೆ ಗುರಿ ಮಾಡುತ್ತಿತ್ತು. ಅವನ ಹಿತಶತ್ರುಗಳು ಅವನನ್ನ ಹೊಗಳಿದಂತೆ ಮಾಡಿ ಮೋಸ ಮಾಡುತ್ತಿದ್ದರು. ಏನೆ ಆದರೂ ಪರೋಪಕಾರ, ಬಡ ವಿದ್ಯಾರ್ಥಿಗಳಿಗೆ ಮನೆಯಲ್ಲಿ ಊಟ ಹಾಕುವುದು ಅವರಿಗೆ ಪಾಠ ಶಾಲೆಯ ಖರ್ಚು ಕೊಡುವುದು ಮಾಡುವುದನ್ನ ಆತ ಬಿಡುತ್ತಿರಲಿಲ್ಲ. ಅದರೆ ಪ್ರತಿಫಲ ಬಯಸುತ್ತಿರಲಿಲ್ಲ. ತಾನು ಹೀಗೆ ಮಾಡಿದೆ ಎಂದೂ ಹೇಳಿಕೊಳ್ಲುತ್ತಿರಲಿಲ್ಲ. ಇದನ್ನೆ ಒಳಮುಚುಗ ಸ್ವಭಾವವೆಂದು ಕರೆದು ಆತನನ್ನು ಅಹಂಕಾರಿ ಎಂದು ಜರೆದವರೂ ಉಂಟು. ಆತನನ್ನು ಆತನ ಜೀವಮಾನದುದ್ದಕ್ಕೂ ಯಾರೊಬ್ಬರೂ ಸರಿಯಾಗಿ ತಿಳಿದುಕೊಳ್ಳಲಿಲ್ಲ. ಪದವಿಧರನಲ್ಲದಿದ್ದರೂ ಆತನಿಗೆ ಓದುವ ಹುಚ್ಚು ಬಹಳ. ಶೇಕ್ಸ್ಪಿಯರ್ಸ್, ಬರ್ನಾರ್ಡ್ ಷಾ, ಎಮಿಲ್ ಝೂಲಾ, ವುಡ್'ಹೌಸ್, ಟಾಲ್'ಸ್ಟಾಯ್, ಸ್ಟೆನ್'ಬೆಕ್ ಮೊದಲಾದವರ ಕೃತಿಗಳನ್ನ ಆತ ಅದೆಷ್ಟು ಬಾರಿ ಓದಿದ್ದನೋ ತಿಳಿಯದು. ಅಷ್ಟೊಂದು ನಂಬಿಕೆ ಇಲ್ಲದಿದ್ದರೂ ಖುರ್ಹಾನ್, ಬೈಬಲ್'ಗಳನ್ನೂ ಓದುತ್ತಿದ್ದನು. ತನಗೆ ತಿಳಿದಷ್ಟನ್ನು ತಿಳಿದ ಮಟ್ಟಿಗೆ ಜೀವನದಲ್ಲಿ ಅಚರಣೆಗೆ ತರಲು ಪ್ರಯತ್ನಿಸಿದನು. ಹಗಲು ರಾತ್ರಿ ಮನಸಿನಲ್ಲಿ ತನ್ನ ಚಿತ್ರಪಟದ ಬಗ್ಗೆಯೆ ತುಂಬಿಕೊಂಡಿರುತ್ತಿದ್ದನು. ಎದುರಿಗಿದ್ದವರನ್ನು ಮರೆತು ಇಇನ್ನೆಲ್ಲೋ ಧೇನಿಸುತ್ತಿರುವಂತೆ ಅವನ ಕಣ್ಣುಗಳು ಶೂನ್ಯ ದೃಷ್ಟಿಯನ್ನು ತೋರಿಸುತ್ತಿದ್ದವು. ಗೀತಾಳ ಸ್ವಭಾವ ಇದಕ್ಕೆ ವಿರುದ್ಧವಾಗಿತ್ತು. ಆಕೆ ತನ್ನ ಸುತ್ತಲೂ ಮಾಯಾಜಾಲವನ್ನು ಬೀಸಿ ತನ್ನನ್ನು ಥೈ ಥೈ ಕುಣಿಸುವ ವಂಚಕ ಸ್ನೇಹಿತರ ಬೆನ್ನು ಹತ್ತಿದ್ದಳು. ತೃಷ್ಣೆಯ ಶಮನಕ್ಕಾಗಿ ಮೃಗಜಲಕ್ಕೆ ಕೈ ಒಡ್ದಿ ನಡೆದಿದ್ದಳು. ತನ್ನ ಸುಖೋಪಭೋಗಗಳ ಮುಂದೆ ಆಕೆಗೆ ಏನೊಂದೂ ಕಾಣುತ್ತಿರಲಿಲ್ಲ. ದೈವದತ್ತವಾದ ದಿವ್ಯ ಕಂಠವೊಂದು ಅವಳಿಗಿತ್ತು. ಪಾರ್ಶ್ವ ಸಂಗೀತದಲ್ಲಿ ಲತಾ ಮಂಗೇಷ್ಕರಳ ನಂತರ ಇವಳ ಹೆಸರೆ ಪ್ರಸಿದ್ಧವಿತ್ತು. ಆದರೆ ಅದೃಷ್ಟವಿರಲಿಲ್ಲ. ಆಕೆಗೆ ಮನುಷ್ಯ ಸಹಜವಾದ ಅಂತಃಕರಣ ಪ್ರವೃತ್ತಿಯೆ ಇರಲಿಲ್ಲ. ಹೊರಮಿಂಚು, ಡೌಲು ಹಾಗೂ ಸವಿಮಾತು ಇವೆ ಅವಳನ್ನು ಆಕರ್ಷಿಸುತ್ತಿದ್ದವು. ಹೀಗಾಗಿ ಇಬ್ಬರ ಸ್ವಭಾವಗಳೂ ಎಂದೂ ಕೂಡಲೆ ಇಲ್ಲ. ಗುರುದತ್ತನ ಸರಳ ಸ್ವಭಾವ, ನಿರ್ಮಲ ಮನಸ್ಸನ್ನ ಅಕೆ ಎಂದೂ ತಿಳಿದುಕೊಳ್ಳಲೆ ಇಲ್ಲ. ತಿಳಿದು ಕೊಳ್ಳುವುದು ಅವಳ ಆಳವೂ ಅಲ್ಲ. ಹೀಗಿದ್ದೂ ಗುರುದತ್ತ ಅವಳಿಂದ ಏನನ್ನೂ ಮುಚ್ಚಿಡುತ್ತಲಿರಲಿಲ್ಲ. ಆಕೆ ಹತ್ತಿರ ಬಂದರೆ ಸಾಕು ಪ್ರತಿಯೊಂದನ್ನೂ ಆಕೆಗೆ ಹೇಳುತ್ತಿದ್ದನು. ಆಕೆಯ ಅಭಿಪ್ರಾಯ ಕೇಳುತ್ತಿದ್ದನು. ಉಶ್ಶೆಪ್ಪಾ! ಈಗ ಇಬ್ಬರೂ ಅನ್ಯೋನ್ಯತೆಯೊಂದಿರುವರಲ್ಲಾ! ಎಂದು ಉಸಿರು ಬಿಡುವಷ್ಟರಲ್ಲಿಯೆ ಮತ್ತೆ ಜಗಳ ಹುಟ್ಟಿಕೊಂಡಿರುತ್ತಿತ್ತು. ಜಗಳದ ಪರಿಣಾಮವೇನು? ಆಕೆ ತನ್ನ ತವರುಮನೆಗೆ ಹೊರಟು ಹೋಗಿ ಬಿಡುವುದು. ಇಲ್ಲಿದ್ದರೂ ಆಕೆಯ ಊಟ ಯಾವಾಗಲೂ ತಾಯಿಯ ಮನೆಯಿಂದಲೆ ಬರುತ್ತಿತ್ತು. ಈ ಗಂಡ - ಹೆಂಡಿರ ಜೀವನವೆಂದರೆ ನಮಗೊಂದು ಗೂಢವೆ ಆಗಿತ್ತು.


.........


ಒಮ್ಮೆ ಗುರುದತ್ತನು ಹೈದ್ರಾಬಾದಿಗೆ ಒಂದು ಚಿತ್ರಪಟದ ಬಿಡುಗಡೆಗೆ ಹೋದಾಗ ಒಂದು ತೆಲುಗು ಚಿತ್ರವನ್ನು ನೋಡಿದನಂತೆ. 'ರೋಜುಲು ಮರ್ಯಾವು' ಎಂಬುದು ಅದರ ಹೆಸರು. ಅದರಲ್ಲಿ ವಹೀದಾ ರೆಹಮಾನ್ ಎಂಬುವವಳು ನೃತ್ಯ ಮಾಡಿದ್ದುದು ಗುರುದತ್ತನಿಗೆ ತುಂಬಾ ಹಿಡಿಸಿತ್ತಂತೆ, ಕೂಡಲೆ ಅವಳನ್ನು ತನ್ನ ಮುಂದಿನ ಚಿತ್ರಕ್ಕೆ ಕಾಂಟ್ರಾಕ್ಟ್ ಮೂಲಕ ತೆಗೆದುಕೊಳ್ಳಬೇಕೆಂದು ಅನೇಕ ಸಲ ಅವಳ ತಾಯಿಯನ್ನು ಸಮಜಾಯಿಷಿಸಿದರೂ ಆಕೆ ಒಪ್ಪಲಿಲ್ಲವಂತೆ. ಒಮ್ಮೆ ತಲೆಯಲ್ಲಿ ಹೊಕ್ಕಿದ್ದನ್ನು ಸಹಸಾ ಬಿಡುವಂತವನೂ ಗುರುದತ್ತ ಅಲ್ಲ. ನಾನಾ ಉಪಾಯಗಳಿಂದ ತಾಯಿ-ಮಕ್ಕಳನ್ನು ಒಡಂಬಡಿಸಿ ಆಕೆಯ ಅನೇಕ ಕರಾರುಗಳಿಗೆ ಒಪ್ಪಿ, ಕಾಂಟ್ರಾಕ್ಟಿಗೆ ಆಕೆಯಿಂದ ಸಹಿ ಮಾಡಿಸಿಕೊಂಡೆ ಬೊಂಬಾಯಿಗೆ ಹಿಂದಿರುಗಿದನುಇವಳನ್ನು ಕೂಡಿಸಿಕೊಂಡು ತೆಗೆದ ಚಿತ್ರಪಟವೂ ಯಶಸ್ವಿಯಾಯಿತು. ಪ್ರತಿಯೊಬ್ಬರೂ ಮೊದಮೊದಲು ವಹೀದಾಳನ್ನು ತೆಗೆದುಕೊಂಡದ್ದಕ್ಕಾಗಿ ಗುರುದತ್ತನನ್ನು ಹೀಯ್ಯಾಳಿಸಿದ್ದರು. ಗುರುದತ್ತ ಅದಕ್ಕೆ ಕಿವಿಗೊಡಲಿಲ್ಲ. ಹೇಳಿದ ಕೆಲಸವನ್ನು ಶೀಘ್ರ ತಿಳಿದುಕೊಳ್ಳುವ ಬುದ್ಧಿ ಅವಳಿಗಿದೆಯೆಂದು ಹೇಳುತ್ತಿದ್ದ. ಆಗಿನ್ನೂ ಆಕೆಗೆ ಕೇವಲ ಹದಿನಾರು ವರ್ಷ ಪ್ರಾಯ. ಹೆಚ್ಚು ಕಲಿತವಳೂ ಅಲ್ಲ. ತಂದೆ ತೀರಿಕೊಂಡ ನಂತರ ಮನೆಯ ಪರಿಸ್ಥಿತಿ ತೀರಾ ಶೋಚನೀಯವಾಗಿತ್ತು. ಆಗ ಯಾರಿಂದಲೋ ಈ ಫಿಲ್ಮು ಜಗತ್ತು ಸೇರಿದಳು. ಗುರುದತ್ತ ಅವಳನ್ನು ಚಿತ್ರಪಟದಲ್ಲಿ ತಂದ ಬಳಿಕ ಚಿತ್ರಪಟ ವ್ಯವಸಾಯದಲ್ಲಿ ಗುರುದತ್ತನಲ್ಲಿದ್ದ ಜಾಣ್ಮೆ, ದಿಗ್ಧರ್ಶನ ಮಾಡುವ ಕಲೆ ಜನರ ಕಣ್ಣಿಗೆ ಹೊಡೆಯಿತು. ಆ ಫಿಲ್ಮು ತಂದ ಹಣದಿಂದ ತನ್ನ ಆಫೀಸಿನ ಎಲ್ಲಾ ಕೆಲಸಗಾರರಿಗೂ, ಮನೆಯಲ್ಲಿರುವ ಎಲ್ಲಾ ಆಳುಗಳಿಗೂ ಮೂರು ಮೂರು ತಿಂಗಳ ಬೋನಸ್ ಕೊಟ್ಟನು. ಯಾವಾಗಾದರೂ ಮೊದಲಿಗೆ ಸ್ಟೂಡಿಯೋದಲ್ಲಿರುವವರಿಗೆ ಸಂಬಳ ಕೊಟ್ಟು೭ ಕಡೆಗೆ ತನ್ನ ಮನೆಯ ಖರ್ಚಿಗೆ ಕೊಡುತ್ತಿದ್ದನು. ಷೂಟಿಂಗ್ ನಡೆಯುತ್ತಿರುವಾಗ ನಿಶ್ಯಬ್ಧತೆ ಇರಬೇಕು. ಸ್ವಲ್ಪ ಶಬ್ಧ ಅಥವಾ ಕೆಲಸದಲ್ಲಿ ಸ್ವಲ್ಪ ತಪ್ಪಾದರೆ ಸಾಕು ಹುಲಿಯಂತೆ ಗರ್ಜಿಸುವನು. ಎಲ್ಲರೂ ಇವನಿಗೆ ಹೆದರಿ ಸಾಯುತ್ತಿದ್ದರು. ಆದರೆ ಕೆಲಸ ತೀರಿದ ಬಳಿಕ ಗುರುದತ್ತ ಅವರ ಪರಮ ಮಿತ್ರ. ಅವರ ಸುಖ ದುಃಖ ಎಲ್ಲಾ ಕೇಳೀಕೊಳ್ಳುವನು. ಅವರಿಗೆ ಏನು ಬೇಕೋ ಅದನ್ನು ಒದಗಿಸುವನು. ಹೀಗಾಗಿ ಮೂರುನೂರು ಮಂದಿ ಕೆಲಸಗಾರರೂ ಆಫೀಸಿನ ಸಿಬ್ಬಂದಿಗಳೂ ಗುರುದತ್ತನನ್ನು ಅಷ್ಟೊಂದು ಶ್ರದ್ಧೆ ವಿಶ್ವಾಸಗಳಿಂದ ನೋಡಿಕೊಳ್ಳುತ್ತಿದ್ದರು. ಅವನಿಗೊಂದಷ್ಟು ತಲೆಶೂಲೆಯಿದ್ದರೆ ತಾವು ದೇವರಿಗೆ ಬೇಡಿಕೊಳ್ಳುವರು. ಪ್ರತಿ ವರ್ಷ ಒಬ್ಬ ಶಿಲ್ಪಿಯು ಗಣೇಶನ ಹಬ್ಬಕ್ಕೆ ಗಣಪತಿಯ ವಿಗ್ರಹ ಮಾಡಿ ತಂದುಕೊಟ್ಟು ತನ್ನ ಸಂಭಾವನೆ ಪಡೆಯುತ್ತಿದ್ದನು. ಆತನು ೧೯೬೩ರಲ್ಲಿ ತೀರಿಕೊಂಡದ್ದರಿಂದ ಅದೂ ನಿಂತು ಹೋಯಿತು.

ಗುರುದತ್ತನಿಗೆ ಚಿಕ್ಕ ಮಕ್ಕಳು ಎಂದರೆ ತೀರಿತು, ಬಹಳ ಪ್ರೀತಿ. ತನ್ನ ಹಿರಿಯ ಮಗ ತರುಣನ ಮೇಲಂತೂ ವಿಶೇಷ. ಏನೂ ಅವಕಾಶವಿಲ್ಲದಷ್ಟು ದುಡಿತವಿರುವ ತನ್ನ ಹೊತ್ತಿನಲ್ಲಿಯೆ ಒಂದಷ್ಟನ್ನು ಹೇಗಾದರೂ ಮಾಡಿ ಸ್ಮಯ ದೊರಕಿಸಿ ಅವನನ್ನು ಎತ್ತಿ ಆಡಿಸುವನು. ಅವನ ಮೇಲೆ ತನ್ನ ಪ್ರೀತಿಯ ಧಾರೆ ಸುರಿಸುವನು. ಅವನು ಆಗ ತಯಾರಿಸಿದ 'ಪ್ಯಾಸಾ' ಫಿಲ್ಮು ಅತ್ಯಂತ ಪ್ರಸಿದ್ಧಿ ಪಡೆಯಿತು. ಐಶ್ವರ್ಯ, ಹೆಸರು, ಜನ ಹೊಗಳಿಕೆ ಎಲ್ಲವನ್ನೂ ಅದು ತಂದಿತು.

ಲೋಣಾವಳಾದಲ್ಲಿ ಕೆಲವು ಎಕರೆ ಹೊಲ ಕೊಂಡು ಮೂರು ರೂಮನ್ನು ಅಲ್ಲಿ ಕಟ್ಟಿಸಿದ. ತನಗೆ ಬೇಸರವಾದಾಗ, ಪಿಚ್ಚರಿಗೋಸ್ಕರ ಏನಾದರೂ ಬರೆಯಬೇಕಾದಾಗ ಅಲ್ಲಿ ಹೋಗಿ ಇರುವನು. ತಾನೆ ಅಡುಗೆ ಮಾಡಿಕೊಳ್ಳುವನು. ನೋಡಿಕೊಳ್ಳಲು ಇಟ್ಟವರ ಜೊತೆ ಹೊಲದಲ್ಲಿ ದುಡಿಯುವನು.  ಅವರಿಂದ ಜೋಳದ ರೊಟ್ಟಿ ಅಥವಾ ಸಜ್ಜೆಯ ರೊಟ್ಟಿ ಇಸಕೊಂಡು ತಿನ್ನುವನು. ಅಲ್ಲಿ ತಾನೆ ತೋಡಿಸಿದ ಬಾವಿಯ ನೀರನ್ನು ತಾನೆ ಜಗ್ಗುವನು. ಅಕ್ಕಪಕ್ಕದ ಕೂಲಿ ಕುಂಬಳಿಯವರು ಬಂದರೆ ಅವರಿಗೂ ಹನಿಸುವನು. ಆ ಬಾವಿ ಅಲ್ಲಿಯವರಿಗೆಲ್ಲ ಪುಣ್ಯ ತೀರ್ಥದಂತಾಗಿತ್ತು. ಎಲ್ಲರೂ ನೀರು ಒಯ್ಯುವವರೆ. ಆ ಭೂಮಿಯಲ್ಲಿ ಬೆಳೆದು ಬಂದ ದವಸ ಧಾನ್ಯವನ್ನು ತಂಗಿ - ತಮ್ಮಂದರಿಗೂ ಹಂಚಿ ಉಳಿದಿದ್ದನ್ನು ಮನೆಗೆ ಕಳಿಸುವನು. ಇದೆಲ್ಲದರಿಂದ ಲೋಣಾವಾಳ ಗುರುದತ್ತನಿಗೆ ಪ್ರಾಣವಾಯಿತು.

ಆದರೆ ಅದೆ ಗೀತಾಳಿಗೆ ಪ್ರತಿರೋಧದ ಭಾವನೆಗೆ ಆಸ್ಪದ ಮಾಡಿಕೊಟ್ಟಿತು. ಹಳ್ಳಿಯ ಜೀವನವೆಂದರೆ ಮೂಗು ಮುರಿಯುವ ಸ್ವಭಾವ ಅವಳದು. ಇಷ್ಟಾಗಿ ಗುರುದತ್ತ ಯಾವುದರಲ್ಲಿ ಉತ್ಸಾಹ ತೋರಿಸುತ್ತಾನೋ ಅದರಲಿ ಅವಳಿಗೆ ನಿರುತ್ಸಾಹ. ಗಂಡ ಹೆಂಡತಿಯ ನಡುವಿನ ಈ ಜಗ್ಗಾಟದಲ್ಲಿಯೆ ತರುಣನ ನಂತರದ ಎರಡನೆಯ ಹುಡುಗ ಅರುಣ ಹುಟ್ಟಿದನು. ಇದು ೧೯೫೬ರಲ್ಲಿ. ಈ ಸಲವಾದರೂ ಹೆಣ್ಣು ಹುಟ್ಟಬಹುದೆಂಬ ಅವರಿಬ್ಬರ ಆಸೆ ಈಡೇರಲಿಲ್ಲ. ಈ ಮಧ್ಯೆ ಗುರುದತ್ತನು 'ಪಾಲಿಹಿಲ್ಸ್'ನಲ್ಲಿ ಒಂದು ನೂರು ವರ್ಷ ಹಳೆಯದಾದ ಬಂಗ್ಲೆಯೊಂದನ್ನು ಕ್ರಯಕ್ಕೆ ಕೊಂಡು ಅದರ ಮೇಲೆ ಸಾವಿರಗಟ್ಟಲೆ ಹಣ ಖರ್ಚು ಮಾಡಿ ತನಗೆ ಬೇಕಾದಂತೆ ಅದನ್ನು ಹೆಚ್ಚು ಕಡಿಮೆ ಮಾಡಿಕೊಂಡನು. ದೊಡ್ಡ ಮನೆಯಲ್ಲಿ ಒಮ್ಮೆ ಇರಬೇಕೆಂಬ ತನ್ನ ಮನೋವಾಂಛಿತವನ್ನು ಪೂರೈಸಿಕೊಂಡನು. ಗುಜರಾತದ ಹಸುಗಳು, ಸಾಯಾಮೀಜ ಬೆಕ್ಕು, ವಿವಿಧ ಜಾತಿಯ ನಾಯಿಗಳು, ಪಕ್ಷಿಗಳು, ಕೋತಿಗಳು, ಮೊಲಗಳು, ಇವೆಲ್ಲವನ್ನೂ ಮೀರಿ ಒಂದು ಹುಲಿಮರಿ! ಎಲ್ಲಾ ಬಂದು ಮನೆ ಸೇರುವಂತೆ ಮಾಡಿದನು. ಸಣ್ಣದೊಂದು ಸರ್ಕಸ್ಸೆ ನೆರೆದಂತಾಯಿತು. ಹುಲಿಮರಿಯು ಒಂದೊಮ್ಮೆ ಅರುಣನನ್ನು ನೆಕ್ಕಿತಂತೆ. ಕೂಡಲೆ ಅದನ್ನು ಯಾರಿಗೋ ಕೊಟ್ಟುಬಿಟ್ಟನು. ಧನ-ಧಾನ್ಯ, ಪಶು-ಪಕ್ಷಿ, ಮನೆ-ಮಕ್ಕಳು, ಸತಿ-ಸುತರು, ಈ ಎಲ್ಲಾ ಸುಖ ಸಮೃದ್ಧಿ ಯಾರಿಗೆ ಹೊಟ್ಟೆಕಿಚ್ಚು ತರುತ್ತಿತ್ತೋ ದೇವರಿಗೆ ಗೊತ್ತು. ಗೀತ ಹಿಂದೆ ಎಷ್ಟು ಸದ್ಗುಣಿಯಾಗಿದ್ದಳೋ ಅಷ್ಟೇ ಈಗ ನಾನಾ ತರಹದ ವ್ಯಸನಾಧೀನಳಾಗಿ ಅಲ್ಲದ ಸ್ನೇಹಿತರ ಕೂಡಿಕೊಂಡು ಬಂಗಾರದಂತಾ ತನ್ನ ಸಂಸಾರ ಸೌಧವನ್ನೆ ಹಾಳುಗೆಡವ ಹತ್ತಿದಳು. ಯಾವಾಗಲೂ ಅವಳ ಸುತ್ತ ವ್ಯಸನಿ ಗೆಳೆಯರು ನೆರೆದಿರುತ್ತಿದ್ದರು, ಹೆಣದ ಸುತ್ತ ಹದ್ದುಗಳು ನೆರೆದಂತೆ!


- ವಾಸಂತಿ ಪಡುಕೋಣೆ.


ಭಾರತೀಯ ಚಿತ್ರರಂಗವಿರಲಿ ಕಳೆದ ಶತಮಾನದ ಐವತ್ತರ ಹಾಗೂ ಅರವತ್ತರ ದಶಕದಲ್ಲಿ ತನ್ನ ನಿರ್ದೇಶನ ನೈಪುಣ್ಯದಿಂದ ಜಾಗತಿಕ ಚಿತ್ರರಂಗವೆ ಭಾರತದತ್ತ ಒಮ್ಮೆ ತಿರುಗಿ ನೋಡುವಂತೆ ಮಾಡಿದ ಖ್ಯಾತಿ ನಮ್ಮ ಪಡುಕೋಣೆಯ ಗುರುದತ್ತರದ್ದು. ಬೆಂಗಳೂರಿನಲ್ಲಿ ಹುಟ್ಟಿ ಕೊಲ್ಕೊತ್ತಾದಲ್ಲಿ ಬೆಳೆದು ಮುಂಬೈನಲ್ಲಿ ಕೀರ್ತಿಯ ಉತ್ತುಂಗಕ್ಕೇರಿ ಲೋಣಾವಳದ ಮಣ್ಣಿನಲ್ಲಿ ಮಣ್ಣಾದ ಅಲ್ಪ ಅವಧಿಯಲ್ಲಿಯೆ ಅತ್ಯುಗ್ರವಾಗಿ ಉರಿದು ನಿಗೂಢ ಕಾರಣದಿಂದ ಆತ್ಮಹತ್ಯೆಗೆ ಶರಣಾಗಿ ಅತಿ ಶೀಘ್ರವಾಗಿ ಇನ್ನಿಲ್ಲವಾದರೂ ಇಂದಿಗೂ ತನ್ನ ಕಲಾ ಜಾಣ್ಮೆಗಾಗಿ ನೆನಪಿಸಲ್ಪಡುವ ಪಡುಕೋಣೆ ಮೂಲದ ಗುರುದತ್ ಚಿತ್ರ ನಿರ್ಮಾಣದ ವಿಷಯಕ್ಕೆ ಬಂದರೆ ತಮ್ಮ ಕಾಲಕ್ಕಿಂತ  ಕನಿಷ್ಠ ಐವತ್ತು ವರ್ಷ ಮುಂದೆ ಇದ್ದವರು.


ದೇಶ ವಿಭಜನೆಯ ನಂತರ ಲಾಹೋರಿನಿಂದ ಮುಂಬೈಗೆ ಸ್ಥಳಾಂತರಗೊಡಿದ್ದ ಹಿಂದಿ ಚಿತ್ರೋದ್ಯಮ ಆಗಿನ್ನೂ ಸ್ವಂತ ಕಾಲಿನ ಮೇಲೆ ನಿಲ್ಲಲು ಪ್ರಯತ್ನಿಸುವ ಶೈಶವಾವಸ್ಥೆಯಲ್ಲಿತ್ತು. ಅನೇಕ ಪ್ರತಿಭಾ ಸಂಪನ್ನರು ಧರ್ಮಾಧರಿತವಾಗಿ ರಚನೆಯಾದ ಪಾಕಿಸ್ತಾಸದಲ್ಲಿ ಇರಲು ಇಷ್ಟ ಪಡದೆ ಧರ್ಮಾತೀತ ಪ್ರಜಾಪ್ರಭುತ್ವ ಭಾರತದ ಕಡೆಗೆ ಮುಖ ಮಾಡಿದ್ದ ಹೊತ್ತದು. ಮುಂಬೈನಲ್ಲಿ ಸ್ಥಿತಗೊಂಡ ಹಿಂದಿ ಚಿತ್ರೋದ್ಯಮಕ್ಕೆ ಮದ್ರಾಸಿನಲ್ಲಿ ನೆಲೆಗೊಂಡು ಬೆಳೆದು ಬಲಿಷ್ಜ್ಠವಾಗಿದ್ದ ದಕ್ಷಿಣ ಭಾರತೀಯ ಚಿತ್ರೋದ್ಯಮ ಒಡ್ಡುತ್ತಿದ್ದ ಸಶಕ್ತ ಪೈಪೋಟಿಯನ್ನ ಎದುರಿಸಿ ತಾನೂ ಬೆಳೆದು ತೋರಿಸಬೇಕಾದ ಅನಿವಾರ್ಯತೆ ಇತ್ತು. ಗುರುದತ್ತ, ದೇವಾನಂದ, ಬಲರಾಜ ಸಹಾನಿ, ಪೃಥ್ವಿರಾಜ ಕಪೂರ್, ಬಿ ಆರ್ ಛೋಪ್ರಾರಂತಹ ಅನೇಕ ಖ್ಯಾತನಾಮರ ಕೊಡುಗೆಯ ಫಲವಾಗಿ ಮುಂಬೈ ಇಂದು ಜಾಗತಿಕ ಚಿತ್ರೋದ್ಯಮದ ಮುಖ್ಯ ಸ್ಥಳಗಳಲ್ಲೊಂದಾಗಿ ಗುರುತಿಸಪಡುತ್ತಿದೆ ಅಂದರೆ ಅದರಲ್ಲಿ ಅತಿಶಯೋಕ್ತಿ ಏನೂ ಇಲ್ಲ.

ಗುರುದತ್ ಜೀವಿತಾವಧಿ ಬರಿ ನಲವತ್ತು ವರ್ಷ ಅದರಲ್ಲಿ ಅರ್ಧಾಂಶ ಮಾತ್ರ ಆತನ ಚಿತ್ರಬಾಳ್ವೆ ಸಾಗಿತ್ತು. ಆರಂಭದಲ್ಲಿ ಟೆಲಿಫೋನ್ ಆಪರೇಟರ್ ಆಗಿ ಕೆಲಕಾಲ ವೃತ್ತಿ ನಿರ್ವಹಿಸಿದ ಗುರುದತ್ ಅನಂತರ ನಟ ಹಾಗೂ ಸಹ ನಿರ್ದೇಶಕನಾಗಿ ಚಿತ್ರೋದ್ಯಮಕ್ಕೆ ಅಡಿಯಿಟ್ಟರು. ಅಂದಿನ ಖ್ಯಾತ ಚಿತ್ರೋದ್ಯಮಿ ವಿ ಶಾಂತಾರಾಮರ ಪ್ರಭಾತ್ ಫಿಲಂಸ್ ಗರಡಿಯಲ್ಲಿ ಪಳಗಿದ ಗುರುದತ್ ಅಲ್ಲಿ ದೇವ್ ಆನಂದ್ ಹಾಗೂ ರೆಹಮಾನ್ ಎಂಬ ಜೊತೆಗಾರರೊಂದಿಗೆ ಸಂಪಾದಿಸಿದ ಸ್ನೇಹ ಮುಂದೆ ದೇವ್ ಆನಂದರ ನವಕೇತನ ಫಿಲಂಸ್'ಕ್ಕಾಗಿ 'ಬಾಝಿ' ನಿರ್ದೇಶಿಸುವುದರೊಂದಿಗೆ ಪರ್ಯಾವಸನಗೊಂಡಿತು. ಆರಂಭದಲ್ಲಿ ಛಾಯಾಗ್ರಹಣದತ್ತ ಒಲವು ತೋರಿದ್ದ ಗುರುದತ್ತರ ಆಸಕ್ತಿ ನಿಧಾನಕ್ಕೆ ನಿರ್ದೇಶನದತ್ತ ಕೇಂದಿತಗೊಂಡಿತು. ಮುಂದೆ ತನ್ನದೆ ನಿರ್ಮಾಣ ಸಂಸ್ಥೆಯನ್ನೂ ಆರಂಭಿಸಿದ ಗುರುದತ್ ಛಾಯಾಗ್ರಾಹಕ ವಿ ಕೆ ಮೂರ್ತಿ, ಅಬ್ರಾರ್ ಆಳ್ವಿ, ರಾಜ್ ಖೋಸ್ಲಾ, ಓ ಪಿ ನಯ್ಯರ್'ರಂತಹ ಪ್ರತಿಭಾವಂತರ ಪಡೆ ಕಟ್ಟಿದರು. ಮುಂದಿನ ದಿನಗಳಲ್ಲಿ ಜಾನಿ ವಾಕರ್, ವಹೀದಾ ರೆಹಮಾನ್'ರಂತಹ ಪ್ರತಿಭಾವಂತ ನಟ ನಟಿಯರನ್ನೂ ತೆರೆಗೆ ಪರಿಚಯಿಸಿದ ಶ್ರೇಯವೂ ಅವರಿಗೆ ಸಲ್ಲುತ್ತದೆ. ಈ ತಂಡದೊಂದಿಗೆ ತಾವೆ ನಿರ್ಮಾಪಕನಾಗಿ ತಯಾರಿಸಿದ ಚಿತ್ರ 'ಸಿಐಡಿ' ಕೂಡಾ ದೇವ್ ನಾಯಕರಾಗಿ ನಟಿಸಿದ್ದ ಚಿತ್ರವಾಗಿತ್ತು.  

ಯಶಸ್ಸು ಹಾಗೂ ಸೋಲು ಆಗಾಗ ವೃತ್ತಿ ಬಾಳಿನುದ್ದ ಎದುರಿಸಿದ ಗುರುದತ್ ತಯಾರಿಸಿದ 'ಪ್ಯಾಸಾ' 'ಜಾಲ್' 'ಸಾಹಿಬ್ ಬೀವಿ ಔರ್ ಗುಲಾಮ್' 'ಕಾಗಜ್ ಕೆ ಫೂಲ್' 'ಆರ್ ಪಾರ್' 'ಸೈಲಾಬ್' ''ಚೌದುವೀಕಾ ಚಾಂದ್' ನಂತಹ ಕೆಲವೆ ಕೆಲವು ಚಿತ್ರಗಳನ್ನ ನಟ ನಿರ್ಮಾಪಕ ನಿರ್ದೇಶಕ ಹೀಗೆ ವಿಭಿನ್ನ ನೆಲೆಯಲ್ಲಿ ಬಿಟ್ಟು ಹೋಗಿದ್ದರೂ ಅವೆಲ್ಲ ಇಂದಿಗೂ ಶ್ರೇಷ್ಠತೆಯ ಮಾನದಂಡದಲ್ಲಿ ಉನ್ನತವಾಗಿ ನಿಲ್ಲುವಂತವೆ. ಹೃಷಿಕೇಶ್ ಮುಖರ್ಜಿ ನಿರ್ದೇಶನದ 'ಸಾಂಜ್ ಅಔರ್ ಸವೇರ' ಗುರುದತ್ ಕೊಟ್ಟಕೊನೆಗೆ ತೆರೆಯ ಮೇಲೆ ಕಾಣಿಸಿಕೊಂಡ ಚಿತರವಾಗಿತ್ತು.

ವಯಕ್ತಿಕ ಬದುಕಿನ ಏರುಪೇರು. ಗೀತಾದತ್ ( ರಾಯ್.) ಜೊತೆಗಿನ ವಿಫಲ ವಿವಾಹ, ವಹೀದಾ ರೆಹಮಾನ್ ಜೊತೆಗಿನ ಸಂಶಯಾಸ್ಪದ ಪ್ರೇಮ ಇವೆಲ್ಲ ಗುರುದತ್ತರಂತಹ ಅಂತರ್ಮುಖಿಯನ್ನ ಸಾವಿನ ಮನೆಗೆ ತಳ್ಳಿದವೇನೋ. ಈ ಬಗ್ಗೆ ಆಶಾ ಭೋಂಸ್ಲೆ ವಿವಿಧಭಾರತಿಯ ಸಂದರ್ಶನವೊಂದರಲ್ಲಿ ಹೇಳಿದ್ದನ್ನ ಕೇಳಿದ್ದೇನೆ. ಮೂಲತಃ ಬರಹಗಾರಳೆ ಅಲ್ಲದ ಗುರುದತ್ ತಾಯಿ ವಾಸಂತಿ ಪಡುಕೋಣೆ ತನ್ನ ಮಗನ ಬಗ್ಗೆ ಆತನ ಸಾವಿನ ನಂತರ ಬರೆತ ನೆನಹುಗಳು 'ನನ್ನ ಮಗ ಗುರುದತ್ತ'ದಲ್ಲಿ ಕಾಣಸಿಗುತ್ತವೆ. ಕನ್ನಡವನ್ನಷ್ಟೆ ಬರೆಯಲು ಅರಿತಿದ್ದ ಅವರ ಈ ಬರಹವನ್ನ ಗಿರೀಶ ಕಾರ್ನಾಡರ ಮುನ್ನುಡಿಯೊಂದಿಗೆ ಮೂವತ್ತೈದು ವರ್ಷಗಳ ಹಿಂದೆ ಧಾರವಾಡದಿಂದ ಮನೋಹರ ಗ್ರಂಥಮಾಲಾ ಪ್ರಕಟಿಸಿತ್ತು. ಸದ್ಯ ಪ್ರತಿಗಳು ಹುಡುಕಿದರೆ ಸಿಕ್ಕಾವು. ಈ ಪುಸ್ತಕ ಮರು ಮುದ್ರಣಗೊಂಡ ಸುಳಿವಿಲ್ಲ. ಗುರುದತ್ತರ ತಂಗಿ ಮಗಳು ಕಲ್ಪನಾ ಲಾಜ್ಮಿ ಇವತ್ತಿಗೆ ಹಿಂದಿ ಚಿತ್ರರಂಗದಲ್ಲಿ ದೊಡ್ಡ ಹೆಸರು.


ನಮ್ಮ ಪಾಣೆ ಮಂಗಳೂರಿನಿಂದ ಹೋಗಿ ಜಾಗತಿಕವಾಗಿ ಮಿನುಗಿದ ಗುರುದತ್ ಕಡೆಯವರೆಗೂ ಪಡುಕೋಣೆಯ ಕನ್ನಡಿಗನಾಗಿಯೆ ಮೆರೆದರೆ ನೆನ್ನೆ ಮೊನ್ನೆ ಕಣ್ಣು ಬಿಟ್ಟ ಲಂಬೂ ನಟಿಮಣಿಯೊಬ್ಬಳು ತನ್ನ ಮೂಲವನ್ನ ಪಡು'ಕೋಣ್?' ಎಂದು ಹಿಂದೀಕರಿಸಿಕೊಳ್ಳುವ ವಿಫಲ ಮಂಗಾಟಕ್ಕೆ ಇಳಿದಿರೋದು ವ್ಯಂಗ್ಯದ ನಗು ಉಕ್ಕಿಸುತ್ತದೆ. ಚಿತ್ರಾಭಿಮಾನಿಗಳಿಗೆ ಇದೊಂದು ಒಳ್ಳೆಯ ಓದು.

24 September 2014

ಪುಸ್ತಕದೊಳಗೆ - ೧೭






"ಗಾನ್ ವಿತ್ ದ ವಿಂಡ್" ( ಆಂಗ್ಲ.)

"ಗಾನ್ ವಿತ್ ದ ವಿಂಡ್" ( ಕನ್ನಡಾನುವಾದ.)

ಲೇಖಕರು; ಮಾರ್ಗರೆಟ್ ಮಿಶೆಲ್ ( ಮೂಲ.),

ಶ್ಯಾಮಲಾ ಮಾಧವ ( ಕನ್ನಡ.)

ಪ್ರಕಾಶಕರು; ಆಂಗ್ಲ, ಪ್ಯಾನ್ ಬುಕ್ಸ್.
ಕನ್ನಡ, ಅಂಕಿತ ಪುಸ್ತಕ.

ಪ್ರಕಟಣೆ; ೧೯೩೬ ( ಆಂಗ್ಲ ಮೊದಲ ಆವೃತ್ತಿ.)
೨೦೦೪ ( ಕನ್ನಡ ಆವೃತ್ತಿ.),

ಕ್ರಯ; ೮.೯೯ ಪೌಂಡ್ ( ಆಂಗ್ಲ.)
ರೂಪಾಯಿ ಇನ್ನೂರೈವತ್ತು ( ಕನ್ನಡ.).




                                    

            "ಅಂದು ರಾತ್ರಿ ಭೋಜನದಲ್ಲಿ ಸ್ಕಾರ್ಲೆಟ್ ತನ್ನ ತಾಯ ಸ್ಥಾನವನ್ನು ನಿರ್ವಹಿಸಿದಳಾದರೂ, ಅವಳ ಮನವೆಲ್ಲ ತಾಯ ಸಾಮೀಪ್ಯಕ್ಕಾಗಿ ಕಾತರಿಸುತ್ತಿತ್ತು. ತನ್ನ ಸಂಕಷ್ಟವನ್ನು ತಾಯೊಡನೆ ನಿವೇದಿಸಿ ಕೊಳ್ಳುವುದು ಅಸಾಧ್ಯವೇ ಇತ್ತಾದರೂ ತಾಯಿಯ ಉಪಸ್ಥಿತಿಯೇ ಅವಳ ಮನವನ್ನು ಹಗುರಾಗಿಸ ಬಹುದಿತ್ತು. ತನ್ನ ಸಮಸ್ಯೆಯನ್ನೇ ಮರೆತು ತಂದೆ ಎಂದಿನಂತೆ ಅಧಿಕಾರ ವಾಣಿಯಿಂದ ಯುಧ್ಧದ ಬಗ್ಗೆ ಘಂಟಾಘೋಷವಾಗಿ  ಮಾತು ಹರಿಸಿದಾಗ ಸ್ಕಾರ್ಲೆಟ್ ಇನ್ನು ಸಹಿಸದಾದಳು. ಅಷ್ಟರಲ್ಲಿಯೇ ಕೇಳಿಸಿದ ಬಂಡಿಯ ದನಿಗೆ ಅವಳು ಒಮ್ಮೆಲೇ ಕುಳಿತಲ್ಲಿಂದ ಎದ್ದು ಬಿಟ್ಟಳು.

              ಬಂಡಿಯು ನೇರವಾಗಿ ಮನೆಯ ಹಿಂಭಾಗಕ್ಕೆ ಹೋದುದರಿಂದ ಸ್ಕಾರ್ಲೆಟ್ ನಿರಾಶಳಾಗಿ ಪುನಃ ಕುಳಿತು ಬಿಟ್ಟಳು. ಹೊರಗೆ ಸಂಭ್ರಮದ ದನಿಗಳೊಡನೆ ಅದೇ ತಾನೇ ಹೊರಗೆ ಹೋದ ಪೋರ್ಕ್‍ನ ದನಿಯೂ ಸೇರಿ ಹೆಜ್ಜೆಗಳು ಊಟದ ಮನೆಯ ಹೊರಗೆ ನಡೆತಂದು ಒಳ ಬಂದ ಪೋರ್ಕ್ 
ಬಿನ್ನವಿಸಿದ;  "ಮಿಸ್ಟರ್ ಜೆರಾಲ್ಡ್, ನಿಮ್ಮ ಹೊಸ ಹೆಣ್ಮಗಳು ಬಂದಿದ್ದಾಳೆ."

            ಮದುಮಗನ ಸಂಭ್ರಮ ಅವನ ಮಾತು, ಮುಖದಲ್ಲಿ ಎದ್ದು ತೋರುತ್ತಿತ್ತು.

              "ಹೊಸ ಹೆಣ್ಣೇ? ನಾನ್ಯಾವ ಹೆಣ್ಣನ್ನೂ ಕೊಂಡಿಲ್ಲ."

              "ಹೌದು ಒಡೆಯಾ, ನೀವು ಕೊಂಡಿದ್ದೀರಿ. ಆಕೆ ಇಲ್ಲಿ ನಿಮ್ಮನ್ನು ಕಂಡು ಮಾತಾಡಲು ಕಾದಿದ್ದಾಳೆ." ಕೈಗಳನ್ನು ಹಿಸುಕುತ್ತಾ ಪೋರ್ಕ್ ನುಡಿದ .
               " ಸರಿ, ಮದುಮಗಳನ್ನು ಒಳಗೆ ಕರೆ ತಾ."

              ಒಳ ಪ್ರವೇಶಿಸಿದ ಡಿಲ್ಸಿಯು  ನೇರ ಮೈಕಟ್ಟು ನಡೆಯ ಗಂಭೀರ ಗತ್ತಿನ ಚಹರೆಯ ಮಹಿಳೆಯಾಗಿದ್ದಳು. ಆಕೆಯ ರೂಪದಲ್ಲಿ ನೀಗ್ರೋ - ಇಂಡಿಯನ್ ಚಹರೆಗಳೆರಡೂ ಮಿಳಿತವಾಗಿದ್ದುವು. ಸ್ಕಾರ್ಲೆಟ್‍ಗೂ ಮಿಸ್ಟರ್ ಒಹಾರಾಗೂ ಅಭಿವಾದಿಸಿದ ಆಕೆ ತನ್ನೊಡನೆ ತನ್ನ ಮಗಳನ್ನೂ ಕೊಂಡ ಒಡೆಯನ ಔದಾರ್ಯವನ್ನು ಹೊಗಳಿ ಕೃತಜ್ಞತೆ ಸಲಿಸಿ ತೊಂದರೆ ಕೊಡುತ್ತಿರುವುದಕ್ಕಾಗಿ ಕ್ಷಮೆ ಯಾಚಿಸಿದಳು. ಕರುಣೆಯ ಕಾಯಕದಲ್ಲಿ ಸಿಕ್ಕಿ ಬಿದ್ದ ಜೆರಾಲ್ಡ್ ಸಂಕೋಚಗೊಂಡ ಡಿಲ್ಸಿ ತನ್ನ ಮಗಳು ಪ್ರಿಸ್ಸಿಯನ್ನು ಸ್ಕಾರ್ಲೆಟ್‍ಗೆ ಆಳಾಗಿ ಕೊಟ್ಟಿರುವುದಾಗಿ ಸಾರಿದಳು. ಹಕ್ಕಿಯಂತೆ ತೆಳ್ಳಗಿದ್ದ ಪ್ರಿಸ್ಸಿಯ ಕೂದಲು ಹಲವಾರು ಪಿಗ್‍ಟೇಲ್‍ಗಳಲ್ಲಿ ಹೆಣೆಯಲ್ಪಟ್ಟಿತ್ತು. ತಾಯ ಸೂಚನೆಯಂತೆ ಪ್ರಿಸ್ಸಿ ಥಟ್ಟನೆ ವಂದಿಸಿ ನಕ್ಕಂತೆ ಹಲ್ಲು ಕಿರಿದಾಗ ಸ್ಕಾರ್ಲೆಟ್‍ಗೂ ನಗದೆ ಇರಲಾಗಲಿಲ್ಲ. 

              ಡಿಲ್ಸಿ ಅನುಮತಿ ಪಡೆದು ಮಗಳೊಡನೆ ಹೊರನಡೆದಳು. ಪೋರ್ಕ್ ಹಿಂಬಾಲಿಸಿದ.

             ಕ್ಯಾರಿನ್ ರಮ್ಯ ಕಾದಂಬರಿಯೊಂದರ ಪ್ರಣಯ ಪ್ರಸಂಗದಲ್ಲಿ ಮುಳುಗಿ ತೇಲುತ್ತಿದ್ದಳು. ಸ್ಯುಲೆನ್ ಮರುದಿನದ ಪಾರ್ಟಿಯಲ್ಲಿ ಸ್ಟ್ಯುವರ್ಟ್‍ನನ್ನು ಸ್ಕಾರ್ಲೆಟ್‍ಳ ಪಕ್ಕದಿಂದ ತನ್ನತ್ತ ತನ್ನ ನಾಜೂಕು ಸ್ತ್ರೀತ್ವದತ್ತ ಆಕರ್ಷಿಸಲು ಸಾಧ್ಯವಾದೀತೋ ಏನೆಂದು ಚಿಂತೆಯಲ್ಲಿ ಮುಳುಗಿದ್ದಳು. ಸ್ಕಾರ್ಲೆಟ ಆಶ್‍ಲಿಯ ಬಗೆಗಿನ ಚಿಂತೆಯುಲ್ಲಿ ಯೋಚನೆಯ ಸುಳಿಯಲ್ಲಿ ಸಿಕ್ಕಿ ಬಿದ್ದಿದ್ದಳು .

             ಅವಳ ಅಂತರಂಗವೆಲ್ಲ ಬುಡಮೇಲಾಗಿದ್ದರೂ ಅವಳ ಈ ಪ್ರೀತಿಯ ಕೋಣೆ ಮಾತ್ರ ಎಂದಿನ ವ್ಯವಸ್ಥೆಯಲ್ಲೇ ಇತ್ತು. ವಿಶಾಲ ಮಹಾಗನಿ ಮೇಜು, ಕಪಾಟುಗಳು, ಬೆಳ್ಳಿಯ ಪರಿಕರಗಳು, ಒರಸು ಬಟ್ಟೆಗಳು ಎಲ್ಲವೂ ಸ್ವಸ್ಥಾನದಲ್ಲೇ ಇದ್ದು ಅವಳ ಸಹನೆಯನ್ನು ಪರೀಕ್ಷಿಸುತ್ತಿದ್ದುವು. ಅಲ್ಲಿಂದ ಹೊರಗೋಡಿ ತಾಯ ಆಫೀಸ್ ಕೋಣೆಯಲ್ಲಿ ಅತ್ತು ಮನವನ್ನು ಹಗುರಾಗಿಸ ಬಯಸಿದ್ದಳು. ಅವಳ ಪರಮ ಪ್ರಿಯ ಕೋಣೆ- ತಾಯಿ ದಿನವೂ ಜಮೀನಿನ ಲೆಕ್ಕಪತ್ರಗಳನ್ನು ಪರಿಶೀಲಿಸುವ ಆ ಕೋಣೆಯಲ್ಲಿ - ತಾಯ ಮಡಿಲಲ್ಲಿ ತಲೆಯಿರಿಸಿ ಅತ್ತು ಮನವನ್ನು ಹಗುರಾಗಿಸ ಬಯಸಿದಳು ಸ್ಕಾರ್ಲೆಟ್.

            ಕೊನೆಗೂ ಬಂಡಿಗಾಲಿಗಳ ಸದ್ದೂ ಎಲೆನ್‍ಳ ಇನಿದನಿಯೂ ಕೇಳಿ ಬಂತು. ಎಲ್ಲ ಕಣ್ಗÀಳೂ ಉತ್ಸುಕತೆಯಿಂದ ಬಾಗಿಲತ್ತ ತಿರುಗಿದುವು.  ಎಲೆನ್ ಒಳ ಹೊಕ್ಕೊಡನೆ ಮಾಯೆಯಿಂದೆಂಬಂತೆ ಜೆರಾಲ್ಡ್‍ನ ಮುಖ ಬೆಳಗಿತು . 

            ಎಮ್ಮಿಯ ಮಗು ತೀರಿತೆಂದು ಎಲೆನ್ ತಿಳಿಸಿದಾಗ ತಾಯಿಯಿರದ ಆ ಮಗು ತೀರಿ ಕೊಂಡುದೇ ಉತ್ತಮವೆಂದು ಜೆರಾಲ್ಡ್ ಅನ್ನುವಾಗ ಎಲೆನ್ ಆ ಮಾತನ್ನಲ್ಲೇ ಹಗುರವಾಗಿ ಕಡಿದಳು. ಎಮ್ಮಿಯ ಮಗುವಿನ ತಂದೆ ಟ್ಯಾರಾದ ಓವರ್ಸಿಯರ್ ಆಗಿದ್ದ ಜೊನಾಸ್ ವಿಲ್ಕರ್‍ಸನ್ ಇರಬಹುದೆಂಬ ಸಂದೇಹ ಸ್ಕಾರ್ಲೆಟ್‍ಗೂ ಬಂದಿತ್ತು. 

              ಪ್ರಾರ್ಥನೆಗೆ ಸಜ್ಜಾದ ಎಲೆನ್‍ಳನ್ನು ಮ್ಯಾಮಿಯ ಧೃಢ ಸ್ವರ ಎಚ್ಚರಿಸಿತು. ಉಪಯೋಗಕ್ಕೆ ಬಾರದ ಕೃತಘ್ನರಾದ ಆ ಬಡ ಬಿಳಿಯರಿಗಾಗಿ ಜೀವ ತೇದು ಊಟ ಬಿಡುವುದರಲ್ಲಿ ಅರ್ಥವಿಲ್ಲವೆಂದು ಕಟುವಾಗಿ ನುಡಿದ ಮ್ಯಾಮಿ ಎಲೆನ್‍ಳ ಊಟವನ್ನು ಸಿಧ್ಧಗೊಳಿಸುವಂತೆ ಪೋರ್ಕ್‍ಗೆ ಆಜ್ಞಾಪಿಸಿದಳು. 

           ಎಲೆನ್ ಕುಳಿತೊಡನೆ ಮಕ್ಕಳ ಅಹವಾಲುಗಳು ಅವಳನ್ನು ಮುತ್ತಿ ಕೊಂಡವು. ನಡುನಡುವೆ ಮಕ್ಕಳನ್ನು ಗದರುತ್ತಾ ಜೆರಾಲ್ಡ್ ಕೂಡ ಪತ್ನಿಯು ತನ್ನ ಮಾತನ್ನೇ ಕೇಳಲೆಂಬ ತನ್ನಿಷ್ಟವನ್ನು ಸಾಧಿಸ ಹೊರಟಿದ್ದ. ಚಾಲ್ರ್ಸ್‍ಟನ್‍ನ ಸಜ್ಜನರ ಬಗ್ಗೆ ಜೆರಾಲ್ಡ್ ನುಡಿದ ಮಾತುಗಳನ್ನು ಒಪ್ಪಿ ಕೊಂಡ ಎಲೆನ್ ಮಕ್ಕಳ ಅಹವಾಲುಗಳಿಗೂ ಸಹನೆಯಿಂದ ಉತ್ತರಿಸಿದಳು.

            ಕರಿಯರನ್ನು ದಾಸ್ಯದಿಂದ ಬಿಡಿಸಿ ಸ್ವತಂತ್ರರಾಗಿಸ ಹೊರಟಿರುವ ಯಾಂಕಿಗಳು ಈ ಬಿಡುಗಡೆಗೆ ಯಾವ ಬೆಲೆಯನ್ನೂ ತೆರಲು ಸಿಧ್ಧರಿರದೆ ಇರುವ ಬಗ್ಗೆ ಜೆರಾಲ್ಡ್ ನುಡಿಯುತ್ತಿದ್ದಾಗ ಎಲೆನ್‍ಳ ಊಟ ಮುಗಿದು ಅವಳು ಎದ್ದು ಬಿಟ್ಟಳು. 

                 "ಪ್ರಾರ್ಥನೆಯೇ ?" ಜೆರಾಲ್ಡ್ ಅರೆಮನದಿಂದ ಕೇಳಿದ. 

                "ಹೌದು ಈಗಾಗಲೇ ಬಹಳ ತಡವಾಗಿದೆ" ಎಲೆನ್ ಉತ್ತರಿಸಿದಳು. 

             ಮೇಜು ಪ್ರಾರ್ಥನೆಗೆ ಸಿಧ್ಧವಾದೊಡನೆ ಎಲೆನ್ ಮೊಣಕಾಲೂರಿ ಧರ್ಮಗ್ರಂಥದ ಮೇಲೆ ಕೈಗಳನ್ನು ಜೋಡಿಸಿ ಆರಂಭಿಸಿದಳು. ತಂದೆ ಮಕ್ಕಳು ತಮ್ಮ ತಮ್ಮ ಸ್ಥಾನದಲ್ಲೂ ಆಳುಗಳು ಬಾಗಿಲ ಬಳಿಯಲ್ಲೂ ಮೊಣಕಾಲೂರಿ ಸಿಧ್ಧವಾದರು. ಮ್ಯಾಮಿ ನರಳುತ್ತಾ ತನ್ನ ಸ್ಥೂಲಕಾಯದ ಭಾರವನ್ನು ತನ್ನ ಮೊಣಕಾಲ್ಗಳ ಮೇಲಿರಿಸಿದರೆ ಪೋರ್ಕ್ ನೆಟ್ಟನೆ ಸರಳಿನಂತೆಯೂ ರೋಸಾ, ಟೀನಾ ಹಾಗೂ ಇತರ ಆಳುಗಳು ತಮ್ಮ ಕ್ಯಾಲಿಕೋ ಉಡುಪನ್ನು ಹರಡುತ್ತಲೂ ನಿದ್ದೆಯಿಂದ ಕಣ್ಣೆಳೆದು ಹೋಗುತ್ತಿದ್ದ ಜ್ಯಾಕ್ ಮ್ಯಾಮಿಯ ಕೈಗೆ ತನ್ನ ಕಿವಿ ಸಿಗದಂತೆ ದೂರದಲ್ಲೂ ಸಿಧ್ಧರಾಗಿ ಉತ್ಸುಕತೆಯಿಂದ ಪ್ರಾರ್ಥನೆಗಾಗಿ ಎದುರು ನೋಡಿದರು. 

              "ಪವಿತ್ರ ಮಾತೆ ಮೇರಿ ನಮಗಾಗಿ ಇಂದೂ ನಮ್ಮ ಅಂತಿಮ ಕ್ಷಣಗಳಲ್ಲೂ ಪ್ರಾರ್ಥನೆಯಿರಲಿ!" ಎಂದು ಸಾಗಿದ ಪ್ರಾರ್ಥನೆಯು ಇಂದೂ ಸ್ಕಾರ್ಲೆಟ್‍ಳ ಮನದ ತುಮುಲವನ್ನಡಗಿಸಿ ಶಾಂತಿ ತುಂಬಿತು. ಎಲೆನ್ ಮಧ್ಯಸ್ಥಿಕೆ ವಹಿಸಿದಾಗ ಸ್ವರ್ಗಕ್ಕೆ ಅವಳ ಕರೆಯು ಖಂಡಿತ ಕೇಳುವುದೆಂದು ಸ್ಕಾರ್ಲೆಟ್‍ಳ ಧೃಢ ನಂಬಿಕೆಯಾಗಿತ್ತು. 

             ಮುಗಿದ ಕೈಗಳ ಮೇಲೂ ತಲೆಬಾಗಿ ಆಶ್‍ಲಿಯ ಚಿಂತೆಯಲ್ಲಿ ಮುಳುಗಿದ್ದ ಸ್ಕಾರ್ಲೆಟ್‍ಗೆ ಇದ್ದಕ್ಕಿದ್ದಂತೆ ಆಶ್‍ಲಿಗೆ ತಾನು ಅವನನ್ನು ಪ್ರೇಮಿಸುತ್ತಿರುವ ಅರಿವೇ ಇಲ್ಲವೆಂಬ ಸತ್ಯ ಗೋಚರವಾಯ್ತು . ಅವನಿಗೆ ಅರಿವಾಗುವಂತೆ ತಾನೆಂದೂ ನಡೆದು ಕೊಂಡಿರಲಿಲ್ಲ. ಅವನ ಕಣ್ಗಳನ್ನು ಆಗಾಗ ಕವಿಯುತ್ತಿದ್ದ ವ್ಯಥೆಯ ಮೋಡಕ್ಕೆ ಇದೇ ಕಾರಣವೆಂದು ಆಕೆ ಅರಿತಳು. ಹೇಗಾದರೂ ತನ್ನ ಪ್ರೇಮವನ್ನು ಅರುಹಿದರೆ ..... ಹೌದು, ಹೇಗಾದರೂ ........

            ತಾಯಿಯ ದೃಷ್ಟಿ ತನ್ನ ಮೇಲಿದ್ದುದು ಅರಿವಾಗಿ, ಪ್ರಾರ್ಥನೆಯ ಸರಣಿಯನ್ನು ಮರೆತಿದ್ದ ಸ್ಕಾರ್ಲೆಟ್ ಎಚ್ಚತ್ತು ತನ್ನ ಭಾಗವನ್ನು ಮುಂದುವರಿಸಿದಳು. ಕನ್ಯೆ ಮೇರಿಯ ಸ್ತುತಿಯನ್ನು ಎಲೆನ್ ಸುಶ್ರಾವ್ಯವಾಗಿ ಮುಂದುವರಿಸಿದಾಗ ಎಂದಿನಂತೆ ಸ್ಕಾರ್ಲೆಟ್‍ಳ ಮನದಲ್ಲಿ ಮಾತೆ ಮೇರಿಯ ಸ್ಥಾನದಲ್ಲಿ ತಾಯಿ ಎಲೆನ್‍ಳ ಚಿತ್ರವೇ ಇತ್ತು. 

                ಪ್ರಾರ್ಥನೆ ಮುಗಿದು ಎದ್ದ ಪೋರ್ಕ್ ಉದ್ದದ ದೀಪದಾನಿಯ ದೀಪ ಬೆಳಗಿ ಹಾಲ್‍ಗೆ ನಡೆದು ಅಲ್ಲಿನ ವಿಶಾಲ ವಾಲ್‍ನಟ್ ಮೇಜಿನ ಮೇಲಿಟಸಂಖ್ಯ ದೀಪ ಮೋಂಬತ್ತಿಗಳಲ್ಲಿ ಒಂದು ದೀಪವನ್ನೂ ಮೂರು ಮೋಂಬತ್ತಿಗಳನ್ನೂ ಬೆಳಗಿಸಿ ರಾಜ-ರಾಣಿಯರನ್ನು ಶಯ್ಯಾಗಾರಕ್ಕೊಯ್ಯುವ ಗತ್ತಿನಲ್ಲಿ ದೀಪಧಾರಿಯಾಗಿ ಮುಂಬರಿದು ಉಪ್ಪರಿಗೆಯೇರಿದನು. ಜೆರಾಲ್ಡ್‍ನ ತೋಳನ್ನಾಧರಿಸಿ ಎಲೆನ್‍ಳೂ ಹಿಂದಿನಿಂದ ತಂತಮ್ಮ ಮೋಂಬತ್ತಿಗಳೊಡನೆ ಮಕ್ಕಳು ಮೂವರೂ ಸಾಗಿದರು. 

              ತನ್ನ ಕೋಣೆಯನ್ನು ತುಂಬಿದ ಮಂದವಾದ ತಿಂಗಳ ಬೆಳಕಲ್ಲಿ ಹಾಸಿಗೆಯ ಮೇಲೆ ಪವಡಿಸಿದ ಸ್ಕಾರ್ಲೆಟ್ ನಾಳೆಯ ದಿನದ ರಂಗುಗಂಗಿನ ಕನಸುಗಳನ್ನು ಹೆಣೆಯ ತೊಡಗಿದಳು. ತನ್ನ ಕಲ್ಪನೆಯ ಚಿತ್ರ ಪೂರ್ಣಗೊಂಡಾಗ ಅವಳು ಶ್ರೀಮತಿ ಆಶ್‍ಲಿ ವಿಲ್ಕ್ಸ್ ಆಗಿದ್ದಳು. ಇಚ್ಛೆ ಹಾಗೂ ಪ್ರಾಪ್ತಿ ಎರಡು ಬೇರೆ ಬೇರೆ ವಿಷಯಗಳೆಂಬ ಸತ್ಯವನ್ನು ಎಲೆನ್ ಆಕೆಗೆ ತಿಳಿ ಹೇಳಿರಲಿಲ್ಲ. ಹದಿಹರೆಯದ ಸೋಲರಿಯದ ಸಂತೃಪ್ತ ಜೀವನವು ವಿಧಿಯನ್ನೂ ಜಯಿಸಬಹುದೆಂದು ತಿಳಿದಿತ್ತು!"



- ಶ್ಯಾಮಲಾ ಮಾಧವ


ಇಲ್ಲಿಯವರೆಗಿನ ಪುಸ್ತಕಗಳ ಮಾರಾಟದಲ್ಲಿ ದಾಖಲೆಯನ್ನೆ ನಿರ್ಮಿಸಿದ ಕಾದಂಬರಿ "ಗಾನ್ ವಿತ್ ದ ವಿಂಡ್' ತನ್ನ ಮೊದಲ ಪ್ರಕಟಣೆಯ ನಂತರದ ಮುಕ್ಕಾಲು ದಶಕಗಳ ನಂತರವೂ ಮೊದಲಿನಷ್ಟೆ ಜನಪ್ರಿಯತೆ ಉಳಿಸಿಕೊಂಡಿರುವ ಈ ಕೃತಿಗಿಂತ ಜಾಗತಿಕವಾಗಿ ವ್ಯಾಪಾರದ ಅಂಕಿ ಸಂಖ್ಯೆಗಳ ತುಲನೆಯಲ್ಲಿ ಅಲ್ಪ ಅಂತರದಲ್ಲಿ ಮುಂದಿರುವ ಇನ್ನೊಂದು ಪುಸ್ತಕವೇನಾದರೂ ಇದ್ದರೆ ಅದು 'ಬೈಬಲ್' ಮಾತ್ರ! ವಿಶ್ವವಿಖ್ಯಾತವಾದ ಮಾರ್ಗರೆಟ್ ಮಿಶಲ್ ರಚಿಸಿದ ಈ ಉನ್ಮತ್ತ ಪ್ರಣಯದ ಕೃತಿಯನ್ನ ಲೇಖಕಿ ಶ್ಯಾಮಲಾ ಮಾಧವರು ಹತ್ತು ವರ್ಷಗಳ ಹಿಂದೆಯೆ ಕನ್ನಡದ ಓದುಗರಿಗೆ ಅನುವಾದದ ಮೂಲಕ ಪರಿಚಯಿಸಿದ್ದಾರೆ.  

'ಗಾನ್ ವಿತ್ ದ ವಿಂಡ್' ಅದರ ನಾಯಕಿ ಸ್ಕಾರ್ಲೆಟ್ಟಳ ಕಥೆ ಅಂತ ಮೇಲ್ನೋಟಕ್ಕೆ ಅನ್ನಿಸಿದರೂ ಇದರ ವಿಸ್ತಾರದ ಹರಿವು ಇನ್ನಷ್ಟು ಆಳವಾಗಿದೆ. ಅಮೇರಿಕಾವನ್ನ ಕಾಡಿದ ಆಂತರಿಕ ನಾಗರೀಕ ಯುದ್ಧ ಅಮೇರಿಕಾವನ್ನು ಹೈರಾಣಾಗಿಸಿದ್ದು. ಸಂಯುಕ್ತ ಸಂಸ್ಥಾನಗಳ ದಕ್ಷಿಣದ ರಾಜ್ಯ ಜಾರ್ಜಿಯದಲ್ಲಿ ಇದರ ಕಿಡಿ ಹೊತ್ತಿಕೊಂಡದ್ದು. ಆಫ್ರಿಕನ್ ಕಪ್ಪು ಅಮೇರಿಕನ್ನರ ಮೇಲಿನ ಅಸ್ಪರ್ಶ್ಯತೆಯ ದೌರ್ಜನ್ಯಕ್ಕೆ ಒಂದು ತಾರ್ಕಿಕ ಅಂತ್ಯ ಕಂಡುಕೊಳ್ಳುವಲ್ಲಿ ಇದರ ಪರಿ ಸಮಾಪ್ತಿಯಾದದ್ದು. ಉತ್ತರ ಹಾಗೂ ದಕ್ಷಿಣದ ಏಳು ರಾಜ್ಯಗಳ ಸ್ವಾತಂತ್ರ್ಯ ಘೋಷಣೆಯ ಹಂತಕ್ಕೆ ಹೇತುವಾದ ಮೂಲ ನಿವಾಸಿಗಳು, ವಲಸಿಗ ಬಿಳಿಯರು ಹಾಗೂ ಆಫ್ರಿಕನ್ ಕರಿಯರ ನಡುವಿನ ದಮನಕಾರಿ ತಾರತಮ್ಯ ನೀತಿಯ ಚಲಾವಣೆ ತನ್ನ ಅಸ್ತಿತ್ವವನ್ನೆ ಕಳೆದುಕೊಂಡು ನಿರುಪಯುಕ್ತವಾದದ್ದು. ಅಬ್ರಾಹಂ ಲಿಂಕನ್ ರಾಷ್ಟ್ರದ ಚುಕ್ಕಾಣಿ ಹಿಡಿದು ಅಧ್ಯಕ್ಷನಾಗಿ ರಾಜಕೀಯ ಸವಾಲುಗಳ ಸರಮಾಲೆಯನ್ನೆ ಎದುರಿಸಬೇಕಾಗಿ ಬಂದುದು ಇವೆಲ್ಲ ಸರಣಿಯಾಗಿ ಓದುಗರ ಮನದ ಭಿತ್ತಿಯನ್ನ ಬಿಡಿ ಬಿಡಿ ಚಿತ್ರಗಳಾಗಿ ಆವರಿಸಿ ಕೂತು ಬಿಡುತ್ತವೆ. ಹಾಗಿದೆ ಮಿಶೆಲ್ ನಿರೂಪಣೆ.

ಕನ್ನಡಕ್ಕೆ ಬಹಳ ಅಸ್ಥೆಯಿಂದ ಇದನ್ನ ಅನುವಾದಿಸಿದ ಶ್ಯಾಮಲಾ ಮಾಧವರು ಈ ಬೃಹತ್ ಕೃತಿಯ ಪ್ರಕಟಣೆಗಾಗಿ ಅನುವಾದದ ನಂತರ ಒಂದು ದಶಕ ಕಾಯಬೇಕಾಯಿತು. ಆದರೆ ಈ ಸುದೀರ್ಘ ನಿರೀಕ್ಷೆ ಹುಸಿ ಹೋಗದ ಹಾಗೆ ಇದರ ಕನ್ನಡಾವತರಣಿಕೆಯೂ ಸಹ ಮೂಲದಷ್ಟೆ ಜನಪ್ರಿಯತೆ ಗಳಿಸಿತು. ಮುಂಬೈ ಕನ್ನಡತಿಯಾದ ಮಂಗಳೂರು ಮೂಲದ ಶ್ಯಾಮಲಾರು ಲೇಖಕಿ ಹಾಗೂ ಅನುವಾದಕಿಯಾಗಿ ಕನ್ನಡದ ಓದುಗರಿಗೆ ಸುಪರಿಚಿತರು. ತಮ್ಮ ಹನ್ನೊಂದರ ಹರೆಯದಲ್ಲಿಯೆ ಕವಯತ್ರಿಯಾಗಿ ಬರಹ ಜಗತ್ತಿಗೆ ಕಾಲಿಟ್ಟಿದ್ದ ಅವರು ೧೯೯೪ರಲ್ಲಿ 'ಆಲಂಪನಾ' ಉರ್ದು ಕೃತಿಯನ್ನ ಅದೆ ಹೆಸರಿನಲ್ಲಿ ಕನ್ನಡಕ್ಕೆ ಅನುವಾದಿಸುವ ಮೂಲಕ ಅನುವಾದಕಿಯಾಗಿಯೂ ಗುರುತಿಸಿಕೊಂಡರು. ಇದುವರೆಗೂ ನಿವೃತ್ತ ಪೊಲಿಸ್ ಅಧಿಕಾರಿ ರಾಮಣ್ಣ ರೈಗಳ ಆಂಗ್ಲ ಕೃತಿ 'ಮೈ ಡೇಸ್ ಇನ್ ಪೊಲೀಸ್' ( 'ಸುಧಾ'ದಲ್ಲಿ ಇದು 'ಪೊಲಿಸ್ ಡೈರಿ'ಯಾಗಿ ಪ್ರಕಟಗೊಂಡಿತು.), ವಿಲ್ಡ್ಯುರಾಂಟರ 'ದ ಸ್ಟೋರಿಸ್ ಆಫ್ ಸಿವಿಲೈಸೇಶನ್' ( ಭಾಗಶಃ.), 'ಎಂ ಆರ್ ಪೈ - ಅನ್ ಕಾಮನ್ ಮ್ಯಾನ್' ಇದರ ಭಾವಾನುವಾದ 'ಎಂ ಆರ್ ಪೈ - ಅಸಮಾನ್ಯ ಮನುಷ್ಯ', ವಿಶ್ವಸಾಹಿತ್ಯದ ಇನ್ನೊಂದು ಖ್ಯಾತ ಕೃತಿ 'ಫ್ರಾಂಕನ್ಸ್ಟೈನ್' ಕೂಡ ಇವರ ಅನುವಾದದ ಮೂಲಕ ಕನ್ನಡಕ್ಕೆ ಬಂದಿದೆ. ಸ್ಪಾರೋಗಾಗಿ ಕನ್ನಡದಿಂದ ಇಂಗ್ಲೀಷಿಗೆ ಅನುವಾದಿಸಿಕೊಟ್ಟ ಬಿ ಟಿ ಲಲಿತಾನಾಯಕರ ಎರಡು ಕಥೆಗಳು, ತುಳಸಿ ವೇಣುಗೋಪಾಲರ 'ಹೊಂಚು' ಕಥೆಯ ಆಂಗ್ಲಾನುವಾದ, ಕುವೆಂಪು ಭಾಷಾಭಾರತಿಗಾಗಿ ಮರಾಠಿಯಿಂದ ಕನ್ನಡಕ್ಕೆ ಅನುವಾದಿಸಿಕೊಟ್ಟ ಡಾ ಬಾಬಾಸಾಹೆಬ್ ಅಂಬೇಡ್ಕರರ ಬರಹ ಮತ್ತು ಭಾಷಣಗಳು ಮುಂತಾದ ಕೃತಿಗಳ ಮೂಲಕ ಅನುವಾದಕ ಖ್ಯಾತರಾಗಿದ್ದಾರೆ.

ಇವಿಷ್ಟು ಅವರ ಪ್ರಕಟಿತ ಕೃತಿಗಳ ಕಥೆಯಾದರೆ. ಇನ್ನು ಆಂಗ್ಲದಿಂದ ಕನ್ನಡಕ್ಕೆ ಅವರು ಅನುವಾದಿಸಿರುವ ಅರುಂಧತಿ ರಾಯ್'ರವರ 'ಗಾಡ್ ಆಫ್ ಸ್ಮಾಲ್ ಥಿಂಗ್ಸ್' ಹಾಗೂ ಶಾಲೆಟ್ ಬ್ರಾಂಟಿಯ 'ಜೇನ್ ಏರ್' ಪ್ರಕಟಣೆಯ ಹೊಸ್ತಿಲಿನಲ್ಲಿವೆ. ಲೇಖಕಿ ಎಂ ಎಂ ಕೆಯವರ 'ಫಾರ್ ಪೆವೆಲಿಯನ್ಸ್' ಸದ್ಯ ಅವರಿಂದ ಕನ್ನಡಾನುವಾದಗೊಳ್ಳುತ್ತಿದೆ. ೨೦೦೪ರಲ್ಲಿ ಅತ್ಯುತ್ತಮ ಅನುವಾದಿತ ಕೃತಿಯೆಂದು ಕರ್ನಾಟಕ ಸಾಹಿತ್ಯ ಅಕಾಡಮಿ 'ಗಾನ್ ವಿತ್ ದ ವಿಂಡ್'ನ್ನ ಪುರಸ್ಕರಿಸಿತ್ತು. ಕೇವಲ ಅನುವಾದ ಕ್ಷೇತ್ರಕ್ಕಷ್ಟೆ ಸೀಮಿತಗೊಳ್ಳದ ಶ್ಯಾಮಲಾರ 'ಆಲೋಕ' ಕಥಾ ಸಂಗ್ರಹ, 'ಬದುಕು ಚಿತ್ತಾರ' ಲೇಖನಗಳ ಸಂಗ್ರಹ. 'ಸತ್ಸಂಚಯ'ವೆಂಬ ಸಂಪಾದಿತ ಕೃತಿಗಳು ಸಹ ಓದುಗರ ಮನ್ನಣೆಯನ್ನ ಗಳಿಸಿವೆ.  

'ಗಾನ್ ವಿತ್ ದ ವಿಂಡ್' ಕೃತಿಯು ಪುಸ್ತಕವಾಗಿ ಪ್ರಕಟಣೆಯಾದ ಎರಡು ವರ್ಷಗಳ ನಂತರ ವಿಕ್ಟರ್ ಫ್ಲೆಮಿಂಗ್ ನಿರ್ದೇಶನದಲ್ಲಿ ಸಿನೆಮಾವಾಗಿ ಬೆಳ್ಳಿತೆರೆಯನ್ನೂ ಏರಿತ್ತು. ೧೯೪೦ರ ಹನ್ನೆರಡನೆ ಅಕಾಡಮಿ ಪ್ರಶಸ್ತಿಗಳಲ್ಲಿ ಹತ್ತು ಪ್ರಶಸ್ತಿಗಳನ್ನ ಪ್ರಬಲ ಪೈಪೋಟಿಯ ನಡುವೆಯೂ ಇದೊಂದೆ ಚಿತ್ರ ದೋಚಿದ್ದೂ ಸಹ ಇದು ವರೆಗಿನ ದೊಡ್ಡ ದಾಖಲೆ. ಲೆಸ್ಲಿ ಹಾರ್ವರ್ಡ್, ಕ್ಲಾರ್ಕ್ ಗ್ಲೇಬ್, ಒಲಿವಿಯಾ ಡೆ ಹೆವ್ವಿಲ್ಯಾಂಡ್ ಹಾಗೂ ವಿವಿಯನ್ ಲೈ ಅಭಿನಯದ ಈ ಚಿತ್ರ ಬಹುತೇಕ ಎಲ್ಲಾ ವಿಭಾಗಗಳಲ್ಲೂ ಆ ಸಾಲಿನ ಪ್ರಶಸ್ತಿಯನ್ನ ತನ್ನದಾಗಿಸಿಕೊಂಡಿತ್ತು. ಇವತ್ತಿಗೂ ಒಂದು ಪುಸ್ತಕವಾಗಿ ಹಾಗೂ ಸಿನೆಮಾವಾಗಿ 'ಗಾನ್ ವಿತ್ ದ ವಿಂಡ್' ಶ್ರೇಷ್ಠವೆಂದೆ ಪರಿಗಣಿತವಾಗುವ ವಿಶ್ವಮಾನ್ಯ ಕೃತಿ.