12 March 2013

ಹೆಚ್ಚು ಸಮಾನರು....



( ಯಾರೋ ಇಟ್ಟ "ಪ್ರಸಾದ" ತಿನ್ನಲು ನಾಲಗೆ ಚಾಚಿದ "ಶಿವ" ಲೀಲೆ.)



ನಮ್ಮ ಸಾಮಾಜಿಕ ವ್ಯವಸ್ಥೆಯೆ ಹಾಗೆ. ಇಲ್ಲಿ ಉಳ್ಳವನ ತಪ್ಪು ತಪ್ಪಲ್ಲ. ಇಲ್ಲದ ಪರದೇಶಿ ನೆಟ್ಟಗಿದ್ದರೂ ಕಾಣುವವರ "ವಂಡರ್"ಕಣ್ಣಿಗೆ ಎಲ್ಲವೂ ಕಾಣೋದು ಸೊಟ್ಟ ಸೊಟ್ಟವಾಗಿ. ಜಾತಿ, ಅಂತಸ್ತು ಹಾಗೂ ಪ್ರಭಾವ ಬೀರುವ ಸಾಮರ್ಥ್ಯ ಇವೆಲ್ಲ ಇಂದಿನ ಅನುಕೂಲ ಸಿಂಧು ಪ್ರಪಂಚದಲ್ಲಿ ಒಬ್ಬ ವ್ಯಕ್ತಿಯ ಮೌಲ್ಯವನ್ನ ನಿರ್ಧರಿಸುವ ಅಂಶಗಳು. ಆದರ್ಶಗಳು ಇಲ್ಲಿ ಪ್ರದರ್ಶನಕ್ಕಿವೆ. ಸತ್ಪಥದ ಭೋದನೆ ಬಿಕರಿಗಿದೆ. ಬಹುತೇಕರ ಪಾಲಿಗೆ ಅವರು ಮಾತ್ರ ಸಾಚ, ಊರಲ್ಲಿ ಇನ್ನುಳಿದವರೆಲ್ಲ ಕಳ್ಳರು. ನುಡಿದಂತೆ ನಡೆವಲ್ಲಿ ಕನಿಷ್ಠ ಪ್ರಾಮಾಣಿಕ ಪ್ರಯತ್ನವೂ ಮಾಡದ ಪ್ರಕರಣವೊಂದಕ್ಕೆ ಹೀನ ಸಾಕ್ಷಿ "ನಕಲಿ ರಹದಾರಿ ಪತ್ರ ಹಗರಣ" ಸಿಕ್ಕಿಕೊಂಡ ಕಿರುತೆರೆಯ ವಾರ್ತಾ "ಹೆಗ್ಗಣ" ಟಿ ಆರ್ ಶಿವಪ್ರಸಾದನದ್ದು,


ಕಂಡವರ ಬೆಡ್'ರೂಮಿನ ಬಂಡವಾಳಗಳನ್ನೆಲ್ಲ ದೊಡ್ಡ ದೊಂಡೆಯಲ್ಲಿ ಅದೊಂದು ಮನುಕುಲಕ್ಕೆ ಬಂದ ಮಹಾ ವಿಪತ್ತೇನೋ ಎನ್ನುವಂತೆ ಭಿಡೆಯಿಲ್ಲದೆ ಬಟಾಬಯಲು ಮಾಡಿ ತನ್ನ ಕೂಳಿನ ಚೀಲ ತುಂಬಿಸಿಕೊಳ್ಳುವ "ಅಧಿಕೃತ" ಹೀನ ಕಸುಬಿಯಾಗಿದ್ದ ಶಿವ ನಕಲಿ ಪಾಸ್'ಪೋರ್ಟ್ ದಂಧೆಯಲ್ಲಿ ತಿಂದ, ತಿನ್ನಿಸಿದ ಪ್ರಸಾದದ ಲೆಕ್ಖ ಕೋಟಿಗಳಲ್ಲಿದ್ದು ಅದರ ಬಗ್ಗೆ ಆತನ ಸಹುದ್ಯೋಗಿ ವಾರ್ತಾವಾಹಿನಿಗಳದ್ದು ಎಂದೂ ಇಲ್ಲದ ಅಸಹಜ ಗಾಢ ಮೌನ. ತೂತು ತಮ್ಮಲ್ಲೆ ಇರುವಾಗ ಬಾಯಿಗೆ ಬೆಣೆ ಇಟ್ಟುಕೊಂಡು ಕೂತು ಕಟ್ಟುನಿಟ್ಟಾಗಿ "ಕೆಟ್ಟದ್ದನ್ನು ನೋಡಬೇಡ! ಕೆಟ್ಟದ್ದನ್ನು ಆಡಬೇಡ!! ಕೆಟ್ಟದ್ದನ್ನು ಕೇಳಲೆ ಬೇಡ!!!" ಎನ್ನುವ ಗಾಂಧಿ ತತ್ವವನ್ನು ಚಾಚೂ ತಪ್ಪದೆ ಪಾಲಿಸುತ್ತಿರುವ ಈ ಕಮಂಗಿಗಳಿಗೆ ಈಗಿನ ಅಂತರ್ಜಾಲ ಯುಗದಲ್ಲಿ  ಕಟ್ಟಿಕೊಳ್ಳಲಾಗದೆ ಬಿಟ್ಟ ಹೂಸಿನ ವಾಸನೆಯನ್ನ ಹಾಗೆಲ್ಲ ಮುಚ್ಚಿಡಲಾಗುವುದಿಲ್ಲ ಎನ್ನುವ ಸರಳ ಸತ್ಯ ಅರ್ಥವಾಗದಿರುವುದು ಹಾಸ್ಯಾಸ್ಪದ.



ಈ "ಶಿವ"ಲೀಲೆ ಲೀಕಾಗಿ ನೆನ್ನೆಯ ಶಿವರಾತ್ರಿಗೆ ಸರಿಯಾಗಿ ಒಂದು ವಾರ. ಆದರೆ ಕನ್ನಡದ ಅರ್ಧ ಡಝನ್ ವಾರ್ತಾವಾಹಿನಿಗಳಲ್ಲಿ ಒಂದರಲ್ಲಾದರೂ ಈ ಬಗ್ಗೆ ತುಣುಕು ಸುದ್ದಿಯಾದರೂ ಪ್ರಸಾರವಾಗಿದ್ದರೆ ಕೇಳಿ! ಒಂದಕ್ಕಾದರೂ ಮಾನ-ಮರ್ಯಾದೆ, ಇದ್ದದ್ದನ್ನ ಇದ್ದ ಹಾಗೆ ಹೇಳುವ ಪ್ರಾಮಾಣಿಕ ನೈತಿಕತೆ ಇದೆಯ ನೋಡಿ? ಇವರದ್ದೆಲ್ಲ ಕೇವಲ "ಕಥೆ" ಅನ್ನುವುದು ಮತ್ತೆ ಸಾಬೀತಾಯ್ತಲ್ಲ? ಇಂತಹ ಅನೇಕ ಕ್ಷುಲ್ಲಕ ಪ್ರಕರಣಗಳ ಪೋಸ್ಟ್'ಮಾರ್ಟಂನ್ನ ಸ್ವತಃ ಇದೆ ಶಿವಪ್ರಸಾದ ಎಲ್ಲಾ ಬಲ್ಲ ಸರ್ವಜ್ಞನ ಸೋಗಿನಲ್ಲಿ ಅನಗತ್ಯ ವ್ಯಂಗ್ಯೋಕ್ತಿಗಳ ಸಹಿತ ಕೆಲಕಾಲ "ಸಮಯ"ಸಾಧಕನಾಗಿಯೂ ಕೆಲವೊಮ್ಮೆ ಖುದ್ದು "ಟಿವಿ೯"ರಲ್ಲಿ ತಾನೂ ಒಬ್ಬ ಒಂಬತ್ತಾಗಿಯೂ ತನ್ನೆಲ್ಲ ಅರಿವಿನ ಪರಿಮತಿಯೊಳಗೆ ಬಹಳ ಪ್ರಜ್ಞಾಪೂರ್ವಕವಾಗಿಯೆ ಮಾಡಿ ಕಂಡವರ ಮನೆ-ಮನ ಮುರಿದಿದ್ದಾನೆ. "ನಿತ್ಯ" ಅಸಂಬದ್ಧವಾಗಿ ಕಂಡವನ "ಆನಂದ"ವನ್ನ ಕೆಣಕುತ್ತಾ ಅಲ್ಲಿ ಇಲಿ ಹೋದರೆ ಹುಲಿ ಹೋಯಿತು ಎಂಬಂತೆ ಬಿಂಬಿಸಿ ವಿಕಾರವಾಗಿ ವಾರವಿಡಿ ಅರ್ಜೆಂಟ್ "ಚರ್ಚಾಪಟು"ಗಳನ್ನ, ರಾಜಕೀಯವಾಗಿ ಮೂಲೆಗುಂಪಾದ ಧೂಳು ಹಿಡಿದ ಕೂಗುಮಾರಿಗಳನ್ನ ತಮ್ಮ ಕ್ಯಾಮರಾಗಳ ಮೂಲಕ ನಮ್ಮ ನಿಮ್ಮೆಲ್ಲರ ಮನೆಯ ಟಿವಿ ಪರದೆಯ ಮೇಲೆ ಛೂ ಬಿಟ್ಟು  ಅದನ್ನೆ ಪ್ರಜ್ಞಾವಂತ ಪತ್ರಿಕೋದ್ಯಮವೆಂದು ನಂಬಿಸಿ, ನಿಮಗೆ ಬೇಕಿಲ್ಲದಿದ್ದರೂ ಸಹ "ನಿತ್ಯ" ನಿಮ್ಮ ಸಾಮಾನ್ಯಜ್ಞಾನ ಹೆಚ್ಚಿಸುವ ಈ ಎಲ್ಲಾ ಕಳ್ಳ ಭಡವರು ತಮ್ಮೊಳಗೊಬ್ಬ ಪ್ರಸಾದ ಬಾಲಲೀಲೆಯಾಡಿದಾಗ ಮಾತ್ರ ಅದೊಂದನ್ನ  "ಶಿವಾಆಆಆಆಆ" ಅಂತ ಮರೆತು, ಕುರುಡು ನಟಿಸಿ "ಆ ಸುದ್ದಿಯ" ಮೇಲೆ ಚಾಪೆಯೆಳೆದು ಭದ್ರವಾಗಿ ಅದರ ಮೇಲೆಯೆ ತಮ್ಮ ನಾರುವ ಅಂಡೂರಿ ಕುಳಿತು ಹೊಸ ಪ್ಯಾನಲ್ ಚರ್ಚೆಗಾಗಿ ಇನ್ಯಾರದಾದರೂ ಒಡೆದ ಮನೆಯ ತೂತು ಕಂಡೀತ ಅನ್ನುವ ಹುಡುಕಾಟಕ್ಕಿಳಿದು ವಿಪರೀತ ಬ್ಯುಸಿಯಾಗಿದ್ದಾರೆ. ಇಂತಹ ಮಣ್ಣು ತಿನ್ನುವ ವಿಷಯದಲ್ಲಿ ಮಾತ್ರ ಒಗ್ಗಟ್ಟಾಗಿ ಈ ಸಂಗತಿಯನ್ನ ಚಿಗುರಿನಲ್ಲಿಯೆ ಚಿವುಟಿ ಹೂತು ಹಾಕುವ ವಿಫಲ ಯತ್ನಕ್ಕಿಳಿದು ದೊಂಬರಂತೆ ಗೋಚರಿಸಿ ಹಾಸ್ಯಾಸ್ಪದರಾಗಿದ್ದಾರೆ.


"ತಾನು ತಿಂದರೆ ಔಷಧಿಗಾಗಿ, ನೀನು ಮಾತ್ರ ಹಸಿವಾಗಿಯೆ ಹೇಸಿಗೆ ತಿಂದಿರೋದು!" ಎನ್ನುವ ಹುಟ್ಟು ಜಾಯಮಾನದ ಮಾನಗೆಟ್ಟ ಪತ್ರಿಕೋದ್ಯಮದ ಕೂಸು ಈ ಶಿವಪ್ರಸಾದ . ಶಿವಮೊಗ್ಗ ಜಿಲ್ಲೆಯ ಶಿರಾಳಕೊಪ್ಪ ಈತನ ಊರು. ಮಾಜಿ ಮುಖ್ಯ"ಕಂತ್ರಿ" ಬೂಸಿಯರ ಪರಮಾಪ್ತ ರಾಜಶೇಖರ್'ರ ಸುಪುತ್ರ. ಶಿಕಾರಿಪುರ ವಿಧಾನ ಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿರುವ ಶಿರಾಳಕೊಪ್ಪದಲ್ಲಿಯೆ ಓಡಾಡಿಕೊಂಡಿದ್ದ ಶಿವಪ್ರಸಾದ್ ಪತ್ರಿಕೋದ್ಯಮಕ್ಕೆ ಧುಮುಕಿದ್ದು ಅಕ್ರಮ ಸಂಪಾದನೆಯನ್ನೆ ಮೂಲಕಸುಬು ಮಾಡಿಕೊಂಡಿರುವ ಪತ್ರಿಕೋದ್ಯಮದ ಮತ್ತೊಬ್ಬ ಅಡ್ಡ ಕಸುಬಿ ವಿಶ್ಶಿಶ್ಶಿ ಭಟ್ಟನ ಸಕ್ರಮ "ಸಂಪಾದನೆ"ಯ ರಾಜರಸ್ತೆಯಾಗಿದ್ದ ಆಗಿನ "ವಿಜಯ ಕರ್ನಾಟಕ"ದಲ್ಲಿ. ಆರಂಭದಲ್ಲಿ ಪತ್ರಿಕೆಯ ದಾವಣಗೆರೆ ಆವೃತ್ತಿಯಲ್ಲಿ ಉಪ ಸಂಪಾದಕನಾಗಿದ್ದ ಮನುಷ್ಯ "ತನ್ನಂತೆ ಪರರು!" ಎಂದು ಅಪ್ರಾಮಾಣಿಕವಾಗಿಯಾದರೂ ನಂಬಿದ್ದ ವಿಷ್ಪರ್ ಭಟ್ಟನ ಕೃಪಾ ಕಟಾಕ್ಷಕ್ಕೆ ಪಾತ್ರನಾಗಿ ಚಾಮರಾಜಪೇಟೆಯಲ್ಲಿರುವ ಪತ್ರಿಕೆಯ ಮುಖ್ಯ ಕಛೇರಿಯ ಉಪ ಸಂಪಾದಕನ ಈಝಿ ಛೇರಿಗೆ ಜಿಗಿದೆ ಬಿಟ್ಟ. ಪ್ರತಿ ಸೋಮವಾರ ಶಿವಪ್ರಸಾದನ ಬಿಟ್ಟಿ ಆದರ್ಶ ಭೋದನೆಯ ಭೋಂಗು ಬಿಡುವ ಅಂಕಣವೊಂದು "ವಿಜಯ ಕರ್ನಾಟಕ"ದ ಸಂಪಾದಕೀಯ ಪುಟದಲ್ಲಿ ರಾರಾಜಿಸ ತೊಡಗಿ ಸಮಸ್ತ ಕರ್ನಾಟಕದ ವಾಚಕರ ಮನದಲ್ಲಿ ಈ ಶಿವಪ್ರಸಾದನೆಂಬ ಇಸಮು ಆದರ್ಶದ ಅಪರಾವತಾರ ಎನ್ನುವ ಭ್ರಮೆಯನ್ನ ಯಶಸ್ವಿಯಾಗಿ ಬಿತ್ತಿ ಆತನದ್ದೊಂದು ಹುಸಿ ವ್ಯಕ್ತಿ ಚಿತ್ರ ಮೂಡಿಸುವಲ್ಲಿ ಯಶಸ್ವಿಯಾಯಿತು.


ಬಂತಲ್ಲ ಆಗಲೆ ಈತನ ಏಸಿ ಕೋಣೆಯಲ್ಲಿಯೆ ಕುಳಿತು ರಚಿಸಿದ "ಸಂ"ಶೋಧನಾ ಗ್ರಂಥ "ಸುಭಾಶ್ ಸಾವಿನ ಸತ್ಯಗಳು!". ಖುದ್ದು ಘಟನೆ ನಡೆದಿರುವ ಸ್ಥಳದಲ್ಲಿ ತಾನೂ ಇದ್ದಂತೆ ಬರೆಯುವ ಕನ್ನಡದ ಅನೇಕ ಕರಿ ಮುಸುಡಿಯ ಕರಪತ್ರಿಕೆಯ ಸಂಪಾದಕರ ಶೈಲಿಯಲ್ಲಿ ನೇತಾಜಿಯ ಸಾವಿಗೆ ಶಿವಪ್ರಸಾದ ವ್ಯಾಖ್ಯೆ ಬರೆದೆ ಬರೆದ. ಅಷ್ಟು ಹೊತ್ತಿಗಾಗಲೆ ಆತನ ಕುರುಡು ಅಭಿಮಾನಿಗಳಾಗಿದ್ದ ಓದುಗರನೇಕರು ಅವನ್ನ ಕೊಂಡು ಓದಿ ಅದರಲ್ಲಿ ಬರೆಯಲಾಗಿರುವುದೆಲ್ಲ ನಿಜವೆಂದೆ ನಂಬಿದ್ದರು. ಅಂತಹ ಪರಮಮೂರ್ಖರಲ್ಲಿ ನಾನು ಸಹ ಒಬ್ಬನಾಗಿದ್ದೆ. ನಾನು ಇದೆ ವಿಷಯದ ಬಗ್ಗೆ ಗಂಭೀರವಾಗಿ ಇತ್ತೀಚೆಗೆ ನಾಲ್ಕು ವರ್ಷಗಳಿಂದ ಸಂಶೋಧನೆಗಿಳಿದು ಸಿಂಗಾಪುರದಿಂದ ಅಫ್ಘನಿಸ್ಥಾನ, ಉಜ್ಬೇಕಿಸ್ತಾನ, ಕಝಾಕಿಸ್ಥಾನ ಹಾಗೂ ಜರ್ಮನಿ ಮಾರ್ಗವಾಗಿ ವಿಯನ್ನಾವರೆಗೆ ಸಾಗುವ ಯೋಜನೆ ರೂಪಿಸಿ ಅಂಡಮಾನ್ ಸೇರಿ ಇದರಲ್ಲಿ ಅರ್ಧದಷ್ಟು ಜಾಗಗಳಿಗೆ ಖುದ್ದು ಭೇಟಿ ಕೊಟ್ಟು ನೇತಾಜಿಯ ಮಗಳನ್ನೂ ಮುಖತಃ ಭೇಟಿಯಾಗಿ ಮಾಹಿತಿ ಸಂಗ್ರಹಿಸಿದ ನಂತರವಷ್ಟೆ ಸರ್ವಜ್ಞ ಶಿವಪ್ರಸಾದನ ಎಡವಟ್ಟು ಬರವಣಿಗೆಯ ಬಂಡವಾಳದ ಮಿತಿ ನನಗೆ ಅರ್ಥವಾದದ್ದು. ಹೀಗಿದ್ದ ಶಿವಪ್ರಸಾದನ ಭಾಗ್ಯದ ಬಾಗಿಲು ಮತ್ತೆ ದೊಡ್ಡದಾಗಿ ತೆರೆದುಕೊಂಡದ್ದು ತೆಲುಗಿನ ಟಿವಿ ೯ ತನ್ನ ತಡೆ ರಹಿತ ಸುದ್ದಿವಾಹಿನಿಯನ್ನ ಕರುನಾಡಿಗೂ ವಿಸ್ತರಿಸಿದಾಗ.


ಅಲ್ಲಿಯವರೆಗೆ ಈ ಟಿವಿಯ ವಾರ್ತಾವಾಚಕರಾಗಿ ಹೈದರಾಬಾದಿನ ರಾಮೋಜಿ ಫಿಲಂ ಸಿಟಿಯ ಸೆಖೆಯಲ್ಲಿ ಬೆಂದು ಬೆಂಡಾಗಿ ಇನ್ನಾದರೂ ಟಿವಿ ೯ನ್ನ ಸೇರಿ ಬೆಂಗಳೂರು ಪಾಲಾಗೋಣ, ಅಲ್ಲಿನ ಸುಖವಾದ ರಾಜಧಾನಿಯ ಪ್ರಭಾವಲಯದಲ್ಲಿ ತಂಪಾಗಿರೋಣ ಅಂತಂದುಕೊಂಡು ಅಲ್ಲಿಗೆ ದೌಡಾಯಿಸಿದ ಹಮೀದ್ ಪಾಳ್ಯ, ರಂಗನಾಥ ಭಾರದ್ವಜ, ಗೌರೀಶ್ ಅಕ್ಕಿಯ ಜೊತೆ "ವಿಜಯ ಕರ್ನಾಟಕ"ದಂತಹ ಮುದ್ರಣ ಮಾಧ್ಯಮದಿಂದ ಮತಾಂತರವಾಗಿ ಟಿವಿ ವಾರ್ತಾ ಲೋಕಕ್ಕೆ ಬಂದಿದ್ದವ ಶಿವಪ್ರಸಾದ. ಆಗ ಸತೀಶ್ ಚಪ್ಪರಿಕೆ ಟಿವಿ ೯ರ ಕನ್ನಡ ವಾಹಿನಿಯ ಮುಖ್ಯ ಸಂಪಾದಕರಾಗಿದ್ದರು.



ಟಿವಿ ೯ರ ಉಪ ಸಂಪಾದಕನಾಗಿ ದೃಶ್ಯ ಮಾಧ್ಯಮಕ್ಕೆ ಬಂದ ಶಿವಪ್ರಸಾದನಿಗೆ ಕಿರುತೆರೆಯಲ್ಲಿ "ವಾಂಟೆಡ್" ಕಾರ್ಯಕ್ರಮ ನಿರೂಪಕನಾಗಿ ಸಿಕ್ಕ ಅರಂಗೆಟ್ರಂ. ಅನಂತರ ಕೆಲಕಾಲ ಅದೆ ವಾಹಿನಿಯ ದೆಹಲಿ ಬಾತ್ಮಿದಾರನಾಗಿ ನಿಯೋಜನೆಗೊಂಡು ರಾಷ್ಟ್ರದ ರಾಜಧಾನಿಯಲ್ಲಿ ಠಿಕಾಣಿ ಹೂಡಿದ್ದ. ಆಮೇಲೆ ಕರ್ನಾಟಕದ ಮಟ್ಟಗೆ ದೃಶ್ಯಮಾಧ್ಯಮಗಳ ಹವಾಮಾನ ಕೊಂಚ ಏರುಪೇರಾಯಿತು. ಇದ್ದೂ ಇಲ್ಲದಂತಿದ್ದ ಹಳೆ ಮುದುಕಿ "ಉದಯ ವಾರ್ತೆ"ಗಳ ಮುಂದೆ ಊರಿಗೊಬ್ಬಳೆ ಗೌಡತಿಯಾಗಿ ಮೆರೆಯುತ್ತಿದ್ದ ಟಿವಿ ೯ಕ್ಕೂ ಪ್ರತಿಸ್ಪರ್ಧಿಗಳು ಹುಟ್ಟಿಕೊಂಡರು. ಆಗ ಆದ "ಆಪರೇಷನ್ ಸುವರ್ಣ"ಕ್ಕಕ್ಕೆ ಬಲಿಯಾಗಿ ಹಮೀದ್, ಗೌರೀಶ್, ರಂಗನಾಥ ಭಾರದ್ವಜ್ ಅಲ್ಲಿಗೆ ಮಂಗಗಳಂತೆ ಹಾರಿದರೆ, ಅರವಿಂದ್ ಶಶಿಧರ ಭಟ್ಟರ ಸಂಪಾದಕತ್ವದಲ್ಲಿ ಶುರುವಾಗಿದ್ದ "ಸಮಯ"ದ ಪರಿಪಾಲಕರಾದರು. ಹೀಗಾಗಿ ಅಳಿದುಳಿದ ಲಕ್ಷ್ಮಣ್, ರೆಹಮಾನ್ ಹಾಗೂ ಈ ಶಿವಪ್ರಸಾದ್ ಅಲ್ಲಿಯೆ ಉಳಿದುಕೊಂಡು ಹೆಚ್ಚಿನ ಜವಾಬ್ದಾರಿಗಳಿಗೆ ತಲೆಕೊಟ್ಟರು. ಅದೆ ಕಾಲಕ್ಕೆ ಗಮಾರಸ್ವಾಮಿ ಬೂಸಿ ಬಿಟ್ಟ ಕಾರಣ ಬೆಂಬಲ ವಾಪಾಸ್ ಪಡೆದ ಕಮಲ ಪಕ್ಷದ ಆ ಕಾಲದ ನಾಯಕ ಬೂಸಿಯ "ವಚನ ಭ್ರಷ್ಟ" ರಾಗದ ಆಲಾಪ ಊಳಿಡಲು ಆರಂಭಿಸಿದಾಗ ತನ್ನ ಉಪ ಸಂಪಾದಕತ್ವವನ್ನೆ ಉಪ ಸಂಪಾದನೆಯ ಮಾರ್ಗವನ್ನಾಗಿಸಿಕೊಂಡು ಫೀಲ್ಡಿಗಿಳಿದ ಶಿವ ತಾನು ಮಾಡಿದ ಉಪಕಾರಕ್ಕೆ ಮುಂದೆ ಅಧಿಕಾರದ ಗದ್ದುಗೆ ಹಿಡಿದ ಬೂಸಿಯರಿಂದ ಬೇಕು ಬೇಕಾದಾಗಲೆಲ್ಲ ಅಕ್ರಮವಾಗಿ "ಪ್ರಸಾದ" ಪಡೆದ. ಹೀಗೆ ಪಡೆದದ್ದರಲ್ಲಿ ಬಹುಪಾಲು ಮಾಂಸವನ್ನ ತಾನೆ ಕಬಳಿಸಿ ಚೂರುಪಾರು ಮೂಳೆಗಳನ್ನ ಧಾರಾಳವಾಗಿ ತನ್ನ ಸಹ ಪಾತಕಿಗಳಿಗೂ ಹಂಚಿ ಪುನೀತನಾದ.


ಈ ನಡುವೆ ಕಾಲಚಕ್ರದ ಇನ್ನೊಂದು ಸುತ್ತು ಕನ್ನಡ ವಾರ್ತಾವಾಹಿನಿಗಳ ಪಾಲಿಗೆ ಸುತ್ತಿಯಾಗಿತ್ತು. ಕಸ್ತೂರಿ ವಾಹಿನಿ ಒಂದು ನಿರಂತರ ಸುದ್ದಿ ಛಾನಲ್ ಮರಿ ಹಾಕಿದ್ದರೆ. ಮಾಡ ಬಾರದ್ದನ್ನ ಅಡಿಗಡಿಗೆ ಮಾಡಿದ್ದರಿಂದ ಗಡಿಪಾರಾಗಿದ್ದ ಇನ್ನೊಬ್ಬ ಮಂಗಣ್ಣ ಪತ್ರಿಕೆಯೊಂದನ್ನ ಆರಂಭಿಸುವ ವಿಫಲ ಪ್ರಯತ್ನ ನಡೆಸಿ ಹತಾಶನಾಗಿ ಹೊಸ "ಲಹರಿ"ಯೊಂದನ್ನು ಕಂಡುಕೊಳ್ಳುವ ಯತ್ನದಲ್ಲಿದ್ದವರಿಂದ "ಪಬ್ಲಿಕ್" ಆಗಿ ಸಹಾಯ ಪಡೆದು ಹೊಸ ವಟವಟಕ್ಕೆ ಶುರು ಹಚ್ಚಿಕೊಂಡ. ಶಶಿಧರ್ ಭಟ್ಟರು ಆಗಷ್ಟೆ ಯಡ್ಡಿಯ ಬೇನಾಮಿಯಾಗಿದ್ದ ನಿರಾಣಿ ಕೊಂಡ "ಸಮಯ"ದಿಂದ ಹೊರ ನಡೆದಿದ್ದರು. ಹೀಗಾಗಿ ತಮ್ಮ ಪುಂಗಿಗೆ ತಲೆಯಾಡಿಸುವ ತಮ್ಮ ಛೇಲಾನ ಪುತ್ರರತ್ನ ಶಿವಪ್ರಸಾದನನ್ನ ಹೊಸ ಸಂಪಾದಕನಾಗಿ ಭಡ್ತಿ ಕೊಟ್ಟು "ಸಮಯ"ಸಾಧಕನಾಗಿಸಲಾಯಿತು. ಆದರೆ ಯಡ್ಡಿ ಕೆಜೆಪಿಯನ್ನ ಕನವರಿಸುವ ಹೊತ್ತಿನಲ್ಲಿ  ಮತ್ತೆ ಋಣಸಂದಾಯಕ್ಕೆ "ಸಮಯ"ಕ್ಕೆ ಹೋಲಿಸಿದರೆ ಟಿವಿ೯ತ್ತೆ ಪ್ರಚಾರದ ದೃಷ್ಟಿಯಿಂದ ಸೂಕ್ತ ವೇದಿಕೆ ಎಂದರಿತು ಹಳೆ ಗಂಡನ ಪಾದವೆ ಗತಿಯೆಂದು "ಮರಳಿ ಹಳೆ ಮನೆ"ಗೆ ಶಿವಪ್ರಸಾದ್ ಬಂದ. ಆದರೆ ಮೊದಲಿನ ಸಂಬಳ ಸವಲತ್ತು ಈ ಬಾರಿ ಸಿಗದೆ ಹೋಗಿ, ಸಿಕ್ಕಷ್ಟಕ್ಕೆ ತೃಪ್ತಿ ಪಟ್ಟುಕೊಂಡವ ಮತ್ತೆ ಅವೆ ಹಳೆಯ ಪ್ಯಾನಲ್ ಚರ್ಚೆ ಹೆಸರಿನ ಮನೆಮುರುಕ ಕಾರ್ಯಕ್ರಮಗಳನ್ನ ಯಶಸ್ವಿಯಾಗಿ ರೂಪಿಸಿದ. ಹಳೆಯ ಸ್ಥಾನಮಾನ ಅಧಿಕೃತವಾಗಿ ಸಿಗದಿದ್ದರೂ ಅದಾಗಲೆ ಸಾಕಷ್ಟು ಹಡಬೆ ದುಡ್ಡು ಮಾಡಿಕೊಂಡಿದ್ದ ಶಿವಪ್ರಸಾದನಿಗೆ ಅದೊಂದು ಮಿತಿಯೆನ್ನಿಸಿರಲಿಕ್ಕೂ ಇಲ್ಲ. ಇದು ಶಿವಪ್ರಸಾದ್ ಟಿವಿ ೯ಕ್ಕೆ "ಹೋದೆಯ ಪಿಶಾಚಿ ಎಂದರೆ, ಬಂದೆ ಗವಾಕ್ಷಿಯಲ್ಲಿ" ಎನ್ನುತ್ತಾ ಮರಳಿ ಬಂದ ಕಥೆ.


ಈ ನಡುವೆ ನಮ್ಮ ಮಾಜಿ ಮುಖ್ಯಮಂತ್ರಿ ಮದ್ದೂರಿನ  "ವಿಗ್"ನೇಶ್ವರ  ದೇಶದ ವಿದೇಶಾಂಗ ಖಾತೆಯ ಹೊಣೆ ಹೊತ್ತಿದ್ದಾಗ ಪಕ್ಕದ ಪಾಕಿಸ್ತಾನ ಹಾಗೂ ಇನ್ನೂ ಒಂದೆರಡು ಪರದೇಶಗಳಿಗೆ ಸರಕಾರಿ ಖರ್ಚಿನ. ಟಿಎ-ಡಿಎಯನ್ನೂ ಕೊಡಲಾಗಿದ್ದ ಪುಕ್ಕಟೆ ಓಸಿ ಟ್ರಿಪ್ಪನ್ನ ಮಜ ಉಡಾಯಿಸಿ ಬಂದ ಶಿವಪ್ರಸಾದ ತಾನು ಈಗ ಬಹಳ ಹಿರಿಯ ಪತ್ರಕರ್ತನಾದೆ ಎನ್ನುವ ಸ್ವ ಭ್ರಮೆಗೆ ಬಿದ್ದು ಹಿರಿಯೋ ಪತರಕರ್ತತನಕ್ಕೆ ಸ್ವಯಂ ಚಾಲನೆ ಕೊಟ್ಟ. ಆಗ ಘಟಿಸಿದ ಅಹಂಕಾರದ ಪರಮಾವಧಿಯೆ ಈ "ನಕಲಿ ಪಾಸ್"ಪೋರ್ಟ್ ಹಗರಣ". ಚಿಕ್ಕಬಳ್ಳಾಪುರ ಮೂಲದ ಮೌಲ್ವಿಯೊಬ್ಬ ಪಾಸ್'ಪೋರ್ಟ್ ವಿತರಿಸಲು ಮಾಡ ಬೇಕಾದ ಪೊಲೀಸ್ ತನಿಖೆಯನ್ನ ತಪ್ಪಿಸುವ ಕಾನೂನಿನ ಅನ್ವಯ ಅನುಮತಿಯಿರುವ ವಿನಾಯತಿಯನ್ನ ಬಳಸಿಕೊಳ್ಳಲು ಹಿರಿಯ ಅಧಿಕಾರಿಗಳ ಲೆಟರ್'ಹೆಡ್ ದುರ್ಬಳಕೆ ಮಾಡಿಕೊಳ್ಳುತ್ತಿದ್ದುದನ್ನು ಪತ್ತೆ ಹಚ್ಚಿದ ಪ್ರಾದೇಶಿಕ ಪಾಸ್'ಪೋರ್ಟ್ ಆಯುಕ್ತರು ಈ ಬಗ್ಗೆ ರಾಜ್ಯದ ಮುಖ್ಯ ಕಾರ್ಯದರ್ಶಿಗಳಿಗೆ ಸಂಶಯ ವ್ಯಕ್ತ ಪಡಿಸಿ ದೂರು ನೀಡಿದ್ದಾರೆ. ಅವರು ಇದನ್ನ ಲೋಕಾಯುಕ್ತರಿಗೂ, ನಗರ ಪೊಲೀಸ್ ಆಯುಕ್ತರಿಗೂ ರವಾನಿಸಿ ಸೂಕ್ತ ತನಿಖೆಗೆ ಮನವಿ ಮಾಡಿಕೊಂಡಿದ್ದಾರೆ.


ಈ ನಡುವೆ ಅದೆ ಸಂಗತಿಯ ಕುರಿತು ಟಿವಿ ೯ ರಹಸ್ಯ ಕುಟುಕು ಕಾರ್ಯಾಚರಣೆ ನಡೆಸಿದೆ. ಅದು ಹೇಗೋ ಈ ಗೌಪ್ಯ ಸಂಗತಿ ಶಿವಪ್ರಸಾದನ ಗಮನಕ್ಕೆ ಬಂದು ಆ ಕೊಂಡಿಯಲ್ಲಿ ಮುಖ್ಯ ಹೆಸರಾಗಿರುವ ಪ್ರಾದೇಶಿಕ ಪಾಸ್'ಪೋರ್ಟ್ ಕಛೇರಿಯಲ್ಲಿ ಅಧಿಕಾರಿಯಾಗಿರುವ ತನ್ನ ಚಿಕ್ಕಪ್ಪನನ್ನ ಬಚಾಯಿಸುವ ಹೀನತನಕ್ಕಾತ ಇಳಿದಿದ್ದಾನೆ. ಆ ಕಾರ್ಯಕ್ರಮ ಪ್ರಸಾರವಾಗದಂತೆ ಟಿವಿ ೯ರ ಹಿರಿ ಕಿರಿ ತಲೆಗಳಿಗೆಲ್ಲ ಧಮಕಿ ಹಾಕಿದ್ದಾನೆ, ಒಂದು ವೇಳೆ ಹಾಗೊಮ್ಮೆ ಪ್ರಸಾರಿಸಿದ್ದೆ ಹೌದಾದರೆ ತಾನು ಅವರಿಗೆ ಬೂಸಿಯ ಅಧಿಕಾರವಧಿಯಲ್ಲಿ ಮಾಡಿಕೊಟ್ಟ ಹರಾಮಿ ಕಮಾಯಿಯನ್ನ ಜಗಜ್ಜಾಹೀರಾಗಿಸುವ ಬೆದರಿಕೆಯನ್ನೂ ಒಡ್ಡಿದ್ದಾನೆ. ಬಹುಶಃ ಇಷ್ಟಕ್ಕೆ ಸುಮ್ಮನಾಗಿದ್ದರೆ ಎಲ್ಲವೂ ಕಾಲಗರ್ಭದಲ್ಲಿ ಹೂತು ಹೋಗುತ್ತಿತ್ತೇನೋ. ಆದರೆ ಶಾಣ್ಯಾ ಶಿವಪ್ರಸಾದ್ ಈ ಉಚ್ಚೆಯಲ್ಲೂ ಮೀನು ಹಿಡಿಯ ಹೊರಟ! ಸದರಿ ಹಗರಣದ ರೂವಾರಿಗಳಿಗೆ ಕಾರ್ಯಕ್ರಮ ನಿರೂಪಿಸಿದವರ ಬಗ್ಗೆ ಮಾಹಿತಿ ಸೋರಿಕೆ ಮಾಡಿದ್ದೆ ಅಲ್ಲದೆ ಅದು ಪ್ರಸಾರವಾಗದಂತೆ ತಡೆಯಲಿಕ್ಕೆ ಮೇಲಿನಿಂದ ಕೆಳಗಿನ ವರೆಗೆ(?) "ಎಲ್ಲರ ಬಾಯಿ ಮುಚ್ಚಿಸುವ" ಸತ್ಕಾರ್ಯಕ್ಕಾಗಿ ಕೋಟಿಗಟ್ಟಲೆ ಲಂಚದ ಹಣಕ್ಕಾಗಿ ಬೇಡಿಕೆ ಮುಂದಿಟ್ಟ. ಈ ಲಂಚವನ್ನ ಇನ್ನೆಲ್ಲ ಬೆದರುಬೊಂಬೆಗಳನ್ನ ಖದೀಮರಿಗೆ ತೋರಿಸಿ, ಭಯ ಹುಟ್ಟಿಸಿ ತಾನೊಬ್ಬನೆ ನುಂಗಿ ಜೀರ್ಣ ಮಾಡಿಕೊಳ್ಳುವ ಹಂಚಿಕೆ ಅವನದ್ದಾಗಿತ್ತಾದರೂ ವಿಧಿ ಬೇರೆಯದನ್ನೆ ಬಗೆದಿತ್ತು. ಹೀಗಾಗಿ ತಿನ್ನುವ ಮೊದಲೆ ಅಜೀರ್ಣವಾಗಿ ಎಲ್ಲಾ ಬೇಧಿಯಾಗಿ ಹೋಗಿದೆ!


ತನ್ನಂತೆ ಲೋಕಾಯುಕ್ತ ಹಾಗೂ ಕೇಂದ್ರ ಅಪರಾಧ ದಳವೂ ಈ ವಿಷಯದಲ್ಲಿ ವಿಪರೀತ ಆಸಕ್ತವಾಗಿವೆ ಎನ್ನುವುದರ ಅರಿವಿಲ್ಲದೆ. ಹಗರಣದ ಕಿಂಗ್'ಪಿನ್ ಮೌಲ್ವಿಗೆ ದಿನಕ್ಕೆ ಹತ್ತಾರು ಬಾರಿ ಹಣಕ್ಕಾಗಿ ಒತ್ತಾಯಿಸಿ ದೂರವಾಣಿ ಕರೆ ಮಾಡಿಯೆ ಮಾಡಿದ ಈ ಶಿವಪ್ರಸಾದ, ಈತನಿಂದ ಕಾರ್ಯಕ್ರಮವನ್ನ ತಯಾರಿಸಿದವರ ಮಾಹಿತಿ ಪಡೆದಿದ್ದ ನಕಲಿ ದಂಧೆಯ ಕೊರಮರು ಹಗರಣವನ್ನ ಬಯಲಿಗೆಳೆದ ವರದಿಗಾರರಿಗೆ ಕೊಲೆ ಬೆದರಿಕೆ ಒಡ್ಡಲು ಆರಂಭಿಸಿದಾಗ ಎಲ್ಲಾ ಎಡವಟ್ಟಾಗಿ ಹೋಯಿತು. ಇನ್ನೇನು ಸದ್ಯದಲ್ಲೆ ಹಮೀದ್ ಪಾಳ್ಯ ಸಂಪಾದಕತ್ವದಲ್ಲಿ ಹೊಸ ವಾರ್ತಾವಾಹಿನಿ "ರಾಜ್ ನ್ಯೂಸ್" ಕಿರುತೆರೆಗೆ ಅಪ್ಪಳಿಸಲಿದೆ. ಇನ್ನೊಂದು ಹಂತದ ಸಾಮೂಹಿಕ ರಾಜಿನಾಮೆ ಹಾಗೂ "ಆಪರೇಷನ್ ರಾಜ್"ಗೆ ಹೆದರಿದ್ದ ಟಿವಿ ೯ರ ಸಂಪಾದಕ ಮಿಶ್ರಾ ತಮ್ಮ ಕೊಲೆ ಕರೆ ಪೀಡಿತ ಸಿಬ್ಬಂದಿಯಿಂದ ಈ ಕುರಿತು ಪೊಲೀಸ್ ದೂರು ದಾಖಲಿಸಿದರು. ಅದಾಗಲೆ ಒಂದು ಹಂತದ ತನಿಖೆಯನ್ನ ಮುಗಿಸಿ ಅನಾಮಿಕ ಕರೆಯ ಜಾಡು ಹಿಡಿದು ಪೊಲೀಸರು ತಮ್ಮ ಕಳ್ಳಕಿವಿಯನ್ನ ಶಿವಪ್ರಸಾದನ ಪೋನಿನತ್ತ ತಿರುಗಿಸಿಯಾಗಿತ್ತು. ಸಂಶಯಾಸ್ಪದವಾಗಿ ಹಗಲಿನಲ್ಲಿ ಟಿವಿ ೯ರ ಕಛೇರಿಯ ಬಳಿಯೂ ರಾತ್ರಿಯಲ್ಲಿ ಹೈಗ್ರೌಂಡ್ಸ್ ಬಳಿಯ ಏಳು ಮಂತ್ರಿಗಳ ಬಂಗಲೆ ಬಳಿಯೂ ಈ ಸಂಖ್ಯೆ ಸಂಪರ್ಕಕ್ಕೆ ಬರುತ್ತಿದೆ ಅಂದಾಗವರ ಸಂಶಯ ಇನ್ನಷ್ಟು ಹೆಚ್ಚಿ ಕೂಲಂಕಷವಾಗಿ ಗಮನಿಸಿದಾಗ ಗೊತ್ತಾದ ಸತ್ಯ ಮಾತ್ರ ಭೀಕರ.


ಯಡ್ಡಿ ಗಾದಿಯಿಳಿದು ಎರಡು ವರ್ಷವಾದರೂ ಸಹ ಇನ್ನೂ ಸರಕಾರಿ ಬಂಗಲೆಯಲ್ಲೆ ಬೇನಾಮಿ ಹೆಸರಿನಲ್ಲಿ ಠಿಕಾಣಿ ಹೂಡಿರುವ ಶಿವಪ್ರಸಾದನ ಅಪ್ಪನ ಜೊತೆಯೆ ಈ ಸತ್ಪುತ್ರನದ್ದೂ ವಾಸ. ಸದರಿ ಸರಕಾರಿ ಬಂಗಲೆ ಅಂದಿನ ಲೋಕೋಪಯೋಗಿ ಸಚಿವ ಸಿ ಎಂ ಉದಾಸಿಯವರ ಪಾಲಿಗೆ ಅಲಾಟ್ ಆದದ್ದು. ಎಷ್ಟೊಂದು "ಲೋಕೋಪಯೋಗ" ಆಗುತ್ತಿದೆ ನೋಡಿ ಸರಕಾರಿ ಸ್ವತ್ತಿನಿಂದ. ಹೀಗಾಗಿ ಇರುಳಲ್ಲಿ ಸರಕಾರಿ ಬಂಗಲೆ ಹಗಲಲ್ಲಿ ತನ್ನ ಕಟ್ಟೆ ಪಂಚಾಯ್ತಿಯ ಕಾರಸ್ಥಾನ ಟಿವಿ ೯ರ ಬಳಿಯೆ ಈ ಸಂಖ್ಯೆಯ ಜಾಡು ಸಿಗುತ್ತಿತ್ತು. ಕೊನೆಗೂ ಅವನನ್ನ ವಶಕ್ಕೆ ಪಡೆದು ಹೆಚ್'ಏಎಲ್ ಪೊಲೀಸ್ ಠಾಣೆಯಲ್ಲಿ ವಿಚಾರಣೆ ನಡೆಸಿ ಸದ್ಯಕ್ಕೆ ಬಿಟ್ಟು ಕಳಿಸಲಾಗಿದೆ. ಈ ಪ್ರಕರಣದಲ್ಲಿ ಶಿವಪ್ರಸಾದನ ಕರಾಮತ್ತು ಖಚಿತವಾಗುತ್ತಲೆ ಟಿವಿ ೯ರ ಮಿಶ್ರಾ ಶಿವಪ್ರಸಾದನಿಗೆ ಅಲ್ಲಿಂದ ಶಾಶ್ವತವಾಗಿ ಗೇಟ್'ಪಾಸ್ ಸಹಿತ ಬೀಳ್ಕೊಟ್ಟಿದ್ದಾರೆ.


ಬೂಸಿಯ ಪ್ರಭಾವವನ್ನ ಬಳಸಿ ರಾಜಶೇಖರ್ ಸದರಿ ಪ್ರಕರಣದಲ್ಲಿ ಶತಾಯಗತಾಯ ತಮ್ಮ ಮಗನ ಹೆಸರು ಮಾತ್ರ ಸೇರದಂತೆ ಮಾಡಲು ಹರಸಾಹಸ ಮಾಡುತ್ತಿದ್ದರೆ. ಮತ್ತೆ ಜೀವ ಬಂದಿರುವ "ಬೇಲೆಕೇರಿ ಅದಿರು ನಾಪತ್ತೆ ಪ್ರಕರಣ"ದಲ್ಲಿ ಆರೋಪಿಯಾಗಿ ಸದ್ಯ ಸಿಬಿಐ ವಶದಲ್ಲಿರುವ ಖಾರಪುಡಿ ಮಹೇಶನ ಹೇಳಿಕೆಗೆ ಬಲ ಬಂದರೆ ಜೈಲು ಪಾಲಾಗ ಬೇಕಿರುವ ವಿಷ್ಪರ್ ಭಟ್ಟ ಮತ್ತವನ ಚಾಂಡಾಳ ಶಿಷ್ಯಂದಿರು ಇದನ್ನ ಹಳ್ಳ ಹಿಡಿಸಲು ತಮ್ಮ ಕೈಲಾದ ಮೌನ ಸೇವೆಯನ್ನ ಸಲ್ಲಿಸಿ ಕೃತಾರ್ಥರಾಗುತ್ತಿದ್ದಾರೆ. ಕಡೆಗೂ ಪೊಲೀಸರು ತಯಾರಿಸಿದ ಪ್ರಥಮ ಮಾಹಿತಿ ವರದಿಯಲ್ಲಿ ಶಿವಪ್ರಸಾದನ ಹೆಸರು ಸೇರ್ಪಡೆಯಾಗಿಲ್ಲ!


ಆದರೆ ಈ ನೆಲದ ಕಾನೂನು ಎಲ್ಲರಿಗೂ ಒಂದೆ ಸಮಾನ. ಮುಂದೊಮ್ಮೆ ಅದೆಲ್ಲಾದರೂ ಮೈಕೊಡವಿ ಎದ್ದರೆ ಸದ್ಯದಲ್ಲೆ "ಸುವರ್ಣ"ಕ್ಕನ ಚುಕ್ಕಾಣಿ ಹಿಡಿದು ಕಂಡವರೆನೆಲ್ಲ ಹೆರೆಯುತ್ತಿರುವ ಚೋರಗುರು ವಿಶ್ಶಿಶ್ಶಿ ಭಟ್ಟ ತನ್ನ ಚಾಂಡಾಳ ಶಿಷ್ಯ ಪಡೆಯೊಂದಿಗೆ ಕಂಬಿಯ ಹಿಂದೆ ಬಂದೆ ಬರುತ್ತಾನೆ. ಲೋಕಾಯುಕ್ತರ ಸುಪರ್ದಿಯಲ್ಲಿರುವ ಸ್ವಸ್ತಿಕ್ ನಾಗರಾಜನ ಡೈರಿಗೆ ಸದ್ಯದಲ್ಲಿಯೆ ಬಾಯಿ ಬರುವ ಸೂಚನೆಗಳು ದಟ್ಟವಾಗಿವೆ. ಸಿಬಿಐನವರ ಐ ಅದರ ಮೇಲೆ ಬಿದ್ದರೆ ಬಹಳಷ್ಟು ಸೋಗಿನ ಮಾಧ್ಯಮ ಕ್ಷೇತ್ರದ ಸುಭಗರು ಕಂಬಿಯೆಣಿಸ ಹೊರಡಬೇಕಾಗುತ್ತದೆ. ಆಗ ಬೇಕಿದ್ದರೆ ಸದರಿ "ನಕಲಿ ಪಾಸ್'ಪೋರ್ಟ್ ಹಗರಣ"ದ ಮುಂದಿನ ತನಿಖೆಯ ಹೊತ್ತಿಗೆ ಬಂಧನದ ಭೀತಿಯಿರುವ, ಇವರೊಂದಿಗೆ ಕಂಬಿ ಎಣಿಸಲಿಕ್ಕೆ ಬರ ಬಹುದಾದ ಶಿವಪ್ರಸಾದನೂ ಸೇರಿ ಅಲ್ಲಿಯೆ ಒಳಗಡೆ ಒಂದು ೧೪*೭ ಕಳ್ಳ ಕೊರಮರ ವಾರ್ತಾವಾಹಿನಿಯನ್ನ ಆರಂಭಿಸಿ "ನೀವು ಹೇಳಿದ್ದು, ನಾವ್ ಕೇಳಿದ್ದು" ಮೆಲುಕು ಹಾಕುತ್ತಾ "ತಲೆಹರಟೆ" ಮಾಡಿಕೊಂಡು ಕಾಲ ಹಾಕಬಹುದು.

11 March 2013

ತುಳುಗಾದೆ-೪೧






"ಏರ್ ಲಾ ಇಜ್ಯಂದಾಂಡ ಮಾಮಿ ಮಗಲ್ ಆವೋಲಿಗೆ!"


{ ಸೋದರಿಕೆಯ ಸಂಬಂಧದ ಮೂಲಕ ವಿವಾಹ ಸಂಬಂಧ ಕುದುರಿಸುವುದು ಇನ್ನುಳಿದ ಎಲ್ಲೆಡೆಯಂತೆ ತುಳುನಾಡಿನ ಜನಪದರಲ್ಲಿಯೂ ರೂಢಿಯಲ್ಲಿತ್ತು. ಕಾಲಕ್ರಮೇಣ ಮತಾಂತರಕ್ಕೆ ಒಳಗಾದ ಇಲ್ಲಿನ ಕೆಲವರು ಇಸ್ಲಾಂ-ಕ್ರೈಸ್ತ ಮತಾನುಚಾರಣೆಯ ಅನುಸಾರ ಇದನ್ನ ತಾಯಿಯ ಒಡಹುಟ್ಟಿದ ಸಹೋದರರ, ತಂದೆಯ ಒಡ ಹುಟ್ಟಿದ ಸಹೋದರಿಯರ ಬದಲಾಗಿ ತಾಯಿಯ ಒಡ ಹುಟ್ಟಿದ ಸಹೋದರಿಯರ ಹಾಗೂ ತಂದೆಯ ಒಡ ಹುಟ್ಟಿದ ಸಹೋದರರ ಜೊತೆಗಿನ ವೈವಾಹಿಕ ಸಂಬಂಧವಾಗಿ ಬದಲಾದ ಆಚರಣೆಗ ಬದಲಿಸಿಕೊಂಡರೆ ವಿನಃ ಸಹೋದರಿಕೆಯ ವೈವಾಹಿಕ ಸಂಬಂಧಗಳು ರೂಢಿಯಿಂದ ತಪ್ಪಿಯಂತೂ ಹೋಗಲಿಲ್ಲ ಅನ್ನುವುದು ವಾಸ್ತವ. ಈ ರೀತಿಯ ವಿವಾಹಗಳು ಹಕ್ಕಿನವು ಎಂದೆ ಭಾವಿಸುತ್ತಿದ್ದ ಕಾಲವೂ ಒಂದಿತ್ತು, ಅದರ ಪಳಯುಳಿಕೆಗಳನ್ನ ಆಗಾಗ ನಾವು ಅಲ್ಲಲ್ಲಿ ಕಾಣುತ್ತೇವೆ ಸಹ. ಅದೇನೆ ಇದ್ದರೂ ಮೊದಲಿನ ಜನಪ್ರಿಯತೆ ಈ ಸಹೋದರಿಕೆಯ ಮದುವೆಗಳಿಗೆ ಉಳಿದಿಲ್ಲ.


ಒಬ್ಬ ಹುಡುಗ ತನ್ನ ಅತ್ತೆಯ ಮಗಳು ತನಗಾಗಿ ಬಾಲ್ಯದಲ್ಲಿಯೆ ಭವಿಷ್ಯದ ಮಡದಿಯಾಗಿ ಗೊತ್ತಾಗಿ ಮೌಕಿಕವಾಗಿ ಹಿರಿಯರ ಸಮ್ಮತಿ ಗಿಟ್ಟಿಸಿದ್ದರೂ ಬೇರೊಬ್ಬ ಹೆಣ್ಣಿನ ಮೋಹಕ್ಕೆ ಬಿದ್ದನಂತೆ. ಕ್ರಮೇಣ ಆ ಹೆಣ್ಣಿನ ಸುತ್ತ ಸುತ್ತಿ ಆಕೆಯ ಒಲವನ್ನ ಗಿಟ್ಟಿಸಿ ಕೊಂಡನಾದರೂ ಕಾರಣಾಂತರಗಳಿಂದ ಆ ಸಂಬಂಧ ಕೂಡಿ ಬರಲಿಲ್ಲ. ಜಾತಿ, ಅಂತಸ್ತು, ಮತ ಅಥವಾ ಇನ್ಯಾವುದೋ ಸಾಮಾಜಿಕ ಅನಿಷ್ಟದ ಕಾರಣಗಳಿಂದ ಈೊಲವು ಮದುವೆಯ ಮಟ್ಟಕ್ಕೆ ಏರುವ ಮೊದಲೆ ಅಸಾಧ್ಯವಾಗಿ ಕುಸಿದು ಬಿತ್ತು. ಅಂತಹದರಲ್ಲಿ ನಿರಾಶನಾದರೂ ಆ ಗಂಡು ಕುಸ್ತಿ ಕಳದಲ್ಲಿ ಚಿತ್ತಾಗಿ ಬಿದ್ದರೂ ಮೀಸೆ ಮಣ್ಣಾಗಿಲ್ಲ ಎಂದು ಬೀಗಿದ ಜಗಜಟ್ಟಿಯಂತೆ ಇವಳು ತಪ್ಪಿ ಹೋದರೇಂತೆ! ಇದ್ದಾಳಲ್ಲ ಅವಳು ಅತ್ತೆಯ ಮಗಳು ತನ್ನನ್ನೆ ನಂಬಿಕೊಂಡು ಎಂದು ಹುಸಿ ಬೀಗಿ ಸಮಾಧಾನ ಪಟ್ಟುಕೊಂಡನಂತೆ!


ಮಾತೃ ಮೂಲದ ಸಂಸ್ಕೃತಿಯೆ ಆವರಿಸಿಕೊಂಡಿರುವ ತುಳುನಾಡಿನಲ್ಲಿ ಈ ಗಾದೆಯ ಲಿಂಗಾಂತರ ವಾಗಬೇಕಿತ್ತಲ್ಲ ಅಂತ ನನಗನ್ನಿಸಿತು. "ಯಾರೂ ಇಲ್ಲದಿದ್ದರೆ ಅತ್ತೆಯ ಮಗಳೆ ಆದೀತು" ಅನ್ನುವುದಕ್ಕಿಂತ "ಏರ್ಲಾ ಇಜ್ಯಂದಾಂಡ ಅರ್ವತ್ತೆನೆ ಆವೊಲಿಗೆ!" ಅಂದರೆ "ಯಾರೂ ಇಲ್ಲದಿದ್ದರೆ ಮಾವನ ಮಗನೆ ಆಗಬಹುದಂತೆ!" ಅಂತಾಗ ಬೇಕಿತ್ತಲ್ಲ! ಅನ್ನುವ ಜಿಜ್ಞಾಸೆ ಮೂಡಿದ್ದೂ ಇದೆ. ಅದೇನೆ ಇದ್ದರೂ ಬಾಲ್ಯ ವಿವಾಹಗಳು ವ್ಯಾಪಕವಾಗಿದ್ದ ದಿನಗಳಲ್ಲಿ ಸದರಿ ಗಾದೆ ಹುಟ್ಟಿಕೊಂಡಿರಬಹುದೇನೋ. ಇತ್ತೀಚಿನ ದಿನಗಳಲ್ಲಿ ಜನಾಂಗ-ಭಾಷೆ-ದೇಶಗಳ ಎಲ್ಲೆ ದಾಟಿ ವೈವಾಹಿಕ ಸಂಬಂಧಗಳು ಕುದುರುತ್ತಿರುವಾಗ ಈ ಗಾದೆಗೆ ಅಷ್ಟೊಂದು ಮಹತ್ವವಿಲ್ಲ. ಒಂದು ವೇಳೆ ಅಷ್ಟಿಷ್ಟು ಇದ್ದರೂ ಸಹ ಲಿಂಗಾನುಪಾತದಲ್ಲಿ ಹೆಮ್ಮಕ್ಕಳ ಸಂಖ್ಯೆ ತೀವ್ರವಾಗಿ ಕುಸಿಯುತ್ತಿರುವ ಕಾಲದಲ್ಲಿ ಹುಡುಗರಿಗಿಂತ ಹುಡುಗಿಯರಿಗೆ ಹೆಚ್ಚು ಬೇಡಿಕೆ ಹುಟ್ಟಿ ಹೀಗೆ ಕೊನೆಯ ಆಯ್ಕೆಯಾಗಿ ಉಳಿದು ಕಾಯುವ ಕರ್ಮದ ಅನಿವಾರ್ಯತೆ ಹುಡುಗರಷ್ಟು ಅವರಿಗಿಲ್ಲವಾಗಿ ಈ ಗಾದೆಯೆ ಅರ್ಥಹೀನವೆನ್ನಿಸಿ ಬಿಟ್ಟಿದೆ.}


( ಏರ್ ಲಾ ಇಜ್ಯಂದಾಂಡ ಮಾಮಿ ಮಗಲ್ ಆವೋಲಿಗೆ! = ಯಾರೂ ಇಲ್ಲಂತಾದರೆ ಅತ್ತೆ ಮಗಳು ಆದೀತಂತೆ!.)

10 March 2013

ತುಳುಗಾದೆ-೪೦







"ಗೆಜ್ಜೆ ಕಟ್ಟಿನೈಡ್ದ್ ಬೊಕ್ಕ ಲಜ್ಜೆ ನನ ದಾಯೆ?"


{ ಹಿಂದೆಲ್ಲ ಗೆಜ್ಜೆ ಕಟ್ಟಿ ಕುಣಿಯುವುದು ದೇವಸ್ಥಾನಗಳಿಗೆ ಮಾತ್ರ ಸೀಮಿತವಾಗಿತ್ತು. ದೇವರ ಸೇವೆ ಅನ್ನುವ ಹೆಸರಿನಲ್ಲಿ ಗೆಜ್ಜೆ ಕಟ್ಟಿ ಕುಣಿವ ಅದರಲ್ಲೂ ವಿಶೇಷವಾಗಿ ಹೀಗೆ ಬಹಿರಂಗವಾಗಿ ಹೆಂಗಸರ ಶೀಲದ ಬಗ್ಗೆ ಅಡ್ಡ ಮಾತನಾಡುವವರು ಬೀದಿ ತುಂಬ ಧಾರಾಳ ಸಿಗುತ್ತಿದ್ದರು. ತಮ್ಮೊಳಗಿರುವ ಕಲೆಯ ಅಭಿವ್ಯಕ್ತಿಗಾಗಿ ತವಕ ಪಡುತ್ತಿದ್ದ ಇಂತಹ ಕಲಾವಿದರನ್ನ ತಾನೆ ದೇವರ ಅಂಶವೆಂದು ನಂಬಿಸಿ ದೈಹಿಕವಾಗಿ ಕಬಳಿಸಿ ನುಂಗಿ ನೊಣೆಯುತ್ತಿದ್ದ ಅರ್ಚಕನೆ ಈ ಪುಕಾರನ್ನ ಬಹಿರಂಗದಲ್ಲಿ ಮೆಲ್ಲನೆ ಹರಿಯ ಬಿಡುತ್ತಿದ್ದ. ಒಟ್ಟಿನಲ್ಲಿ ಗೆಜ್ಜೆ ಕಟ್ಟುವ ಹಂಬಲವಿದ್ದರೆ ಖಡ್ಡಾಯವಾಗಿ ಇಂತಹ ಅಪವಾದಗಳಿಗೆ ಬಲಿಯಾಗಲು ತಯಾರಾಗಿದ್ದು ಅಂತರಂಗದ ಲಜ್ಜೆಗೆ ಎಳ್ಳು-ನೀರು ಬಿಟ್ಟೆ ಮುಂದಡಿಯಿಡ ಬೇಕಿತ್ತು.


ಯಾವುದಾದರೂ ಕೆಲಸವನ್ನ ಅದೆಷ್ಟೆ ಮಂದಿಗೆ ಅಪಥ್ಯ ಅನ್ನಿಸುವಂತಹದ್ದು ಅದಾಗಿದ್ದರೂ ಮಾಡಲು ಉದ್ಯುಕ್ತವಾಗ್ಬೇಕಾದ ಪರಿಸ್ಥಿತಿಯಲ್ಲಿರುವ ಮಂದಿಯನ್ನ ಪ್ರೋತ್ಸಾಹಿಸಲು. ಅವರಲ್ಲಿರ ಬಹುದಾದ ಆತಂಕ, ಮಾನಸಿಕ ಕ್ಲೇಷ ಹುಟ್ಟಿಸುವಂತಹ ಸಂಶಯವನ್ನ ಹೊಡೆದೋಡಿಸಿ ಧೈರ್ಯ ತುಂಬಲಿಕ್ಕೆ ಈ ಗಾದೆಯ ಆಸರೆ ಪಡೆಯಲಾಗುತ್ತಿತ್ತು. ಆ ಮೂಲಕ ಅವರಲ್ಲಿದ್ದ ಅಳುಕನ್ನ ಹೋಗಲಾಡಿಸಿ ಹುಮ್ಮಸ್ಸು ತುಂಬುವ ಕಿರು ಪ್ರಯತ್ನ ಮಾಡಲಾಗುತ್ತಿತ್ತು. ಗೆಜ್ಜೆಯನ್ನ ಕಟ್ಟಿದ ಮೇಲೆ ಲಜ್ಜೆ ಇನ್ನೇಕೆ? ಅನ್ನುತ್ತದೆ ಈ ಗಾದೆಯ ವಾಚ್ಯಾರ್ಥ.


ನಮ್ಮ ನಡೆ ನುಡಿ ನಮ್ಮಂತೆ ಇನ್ನಿತರಿಗೂ ಸಹನೀಯವೆ ಆಗಿರ ಬೇಕೆಂದೇನಿಲ್ಲ. ಸಂವೇದನೆ ಸಹಿತ ಸರಳ ನಡುವಳಿಕೆಯನ್ನೂ ಸಹ ಸಂಶಯದ ದೃಷ್ಟಿಯಿಂದ ದಿಟ್ಟಿಸಿ ಾದಕ್ಕೊಂದು ವಿಶೇಷ ರಂಗು ಹಚ್ಚಿ ಅದರಿಂದ ಹಿತ ಕಾಣದೆ ಆಂತರಿಕವಾಗಿ ನರಳುವವರು ನೂರು ಮಂದಿಯಿದ್ದರು. ಆದರೆ ಒಂದು ಕೆಲಸವನ್ನ ನಿರ್ವಸಿಸುವ ಹೊಣೆಯನ್ನ ಹೊತ್ತ ಮೇಲೆ ಅದನ್ನೆಂದೂ ಅರ್ಧಕ್ಕೆ ನಿಲ್ಲಿಸದೆ ತಾರ್ಕಿಕ ಅಂತ್ಯವೊಂದನ್ನ ಮುಟ್ಟಿಸುವ ತನಕ ತಣಿಯದೆ, ನಿರೀಕ್ಷಿತವೆ ಆದ ಲಘು ಟೀಕೆ ಟಿಪ್ಪಣಿಗಳಿಗೆ ತಲೆಕೆಡಿಸಿ ಕೊಳ್ಳದೆ, ಅಸಹನೆಯ ನುಡಿಗಳಿಗೆ ಪ್ರಾಮುಖ್ಯತೆ ಕೊಡದೆ ನಮ್ಮ ಪ್ರಾಮಾಣಿಕ ಪ್ರಯತ್ನವನ್ನ ಜಾರಿಯಲ್ಲಿಡ ಬೇಕು ಅನ್ನುವುದು ಈ ಗಾದೆಯ ಆಶಯ.}



( ಗೆಜ್ಜೆ ಕಟ್ಟಿನೈಡ್ದ್ ಬೊಕ್ಕ ಲಜ್ಜೆ ನನ ದಾಯೆ? = ಗೆಜ್ಜೆ ಕಟ್ಟಿಯಾದ ಮೇಲೆ ಲಜ್ಜೆ ಇನ್ನೇಕೆ? )

09 March 2013

ತುಳುಗಾದೆ-೩೯







"ಎನ್ನ ಕೋಕಯಿಡ್ ಪತ್ತುನಾತೆ ಕೊಡಪ್ವೊಡು"


{ ನಮ್ಮ ಮಿತಿಯ ಅರಿವನ್ನ ಸಾಧ್ಯವಾದಷ್ಟು ಶೀಘ್ರ ನಾವು ಮಾಡಿಕೊಂಡಷ್ಟು ನಮ್ಮ ಶ್ರೇಯೋಭಿವೃದ್ಧಿಗೆ ಅನುಕೂಲ. ಇದು ಪ್ರಾಯದ ಮಿತಿ, ಆರ್ಥಿಕ ಮಿತಿ, ಸಾಮಾಜಿಕ ಮಿತಿ ಹಾಗೂ ಬೌದ್ಧಿಕ ಮಿತಿ ಎಲ್ಲದಕ್ಕೂ ಸರಿ ಸಮವಾಗಿ ಅನ್ವಯಿಸುತ್ತದೆ. ಇನ್ನೊಬ್ಬರು ನಮ್ಮನ್ನ ತುಚ್ಛೀಕರಿಸಿ ನೋಡುವ ಮೊದಲೆ ನಾವು ಅದಕ್ಕೆ ಅವಕಾಶ ಕೊಡದಂತೆ ಗಂಭೀರವಾಗಿ ನಮ್ಮ ಶಕ್ತ್ಯಾನುಸಾರ  ಮಾತ್ರ ಸ್ವಂತಿಕೆಯನ್ನ ಪ್ರದರ್ಶಿಸ ಹೊರಟರೆ ಖಂಡಿತ ಮೆಚ್ಚುಗೆಯನ್ನ ಸಂಪಾದಿಸಬಹುದು. ನಮ್ಮ ಮಿತಿಯನ್ನ ಮೀರಿ ಮಾಡುವ ಅಧಿಕ ಪ್ರಸಂಗಗಳು ಇನ್ನಿತರ ಮುಂದೆ ನಮ್ಮ ವ್ಯಕ್ತಿತ್ವವನ್ನ ಹಾಸ್ಯಾಸ್ಪದವಾಗಿಸುವುದು ನಿಸ್ಸಂಶಯ.


ತನ್ನ ಕೊಕ್ಕಿನಲ್ಲಿ ಹಿಡಿಸುವಷ್ಟಕ್ಕೇನೆ ತೃಪ್ತಿ ಪಡದ ಚಿಕ್ಕ ಹಕ್ಕಿಯೋ, ಹಕ್ಕಿ ಮರಿಯೋ ಸಿಕ್ಕಿದ್ದೆ ಸದಾವಕಾಶವೆನ್ನುವ ದುರಾಸೆಗೆ ಬಿದ್ದು ತನ್ನ ತೂಕ, ಹೊತ್ತು ಹಾರುವ ಸಾಮರ್ಥ್ಯವನ್ನ ನಿರ್ಲಕ್ಷಿಸಿ ಹೆಚ್ಚಿನ ಹೊರೆಯ ಕೊಳ್ಳೆಯನ್ನ ಕೊಕ್ಕಿನಲ್ಲಿ ಮನಸೋ ಇಚ್ಛೆ ಕುಕ್ಕಿ ಕಚ್ಚಿಕೊಂಡು ಹಾರಲು ತೊಡಗಿತಂತೆ. ಅದರ ದುರಾದೃಷ್ಟಕ್ಕೆ ಹಾರುವುದು ಅತಿಕಷ್ಟವಾಗಿ ಜೋಲಿ ಹೊಡೆದು ಆಯತಪ್ಪಿ ಎತ್ತರದಿಂದ ನೆಲಕ್ಕೆ ಅಪ್ಪಳಿಸುವಂತಾಯಿತು. ಬೀಳುವಾಗ ಕೊಂಚ ಯಾಮಾರಿದ್ದರೂ ತನ್ನಿಂದ ಗಾತ್ರದಲ್ಲಿ ದೊಡ್ಡವಾಗಿದ್ದ ಹಿಂಸ್ರ ಪಕ್ಷಿಗಳಿಗೆ ಸುಲಭದ ತುತ್ತಾಗಿ ಬೇಟೆಗೆ ಬಲಿಯಾಗುವ ಸಂಭವ ಇದ್ದೇ ಇತ್ತು. ಕೊಂಚ ವಿವೇಕವನ್ನ ಉಪಯೋಗಿಸಿದ್ದರೆ ಅದು ತನಗಾಗುವಷ್ಟು ಉಣಿಸನ್ನ ಯಶಸ್ವಿಯಾಗಿ ಹೊತ್ತು ಗೂಡನ್ನ ಮುಟ್ಟಬಹುದಿತ್ತು.

ಎಳೆಯ ಮಕ್ಕಳು ತಮ್ಮ ಪ್ರಾಯದ ಮಿತಿ ಮೀರಿ ದೊಡ್ಡ ದೊಡ್ಡ ಮಾತುಗಳನ್ನ ಆಡುವಾಗ, ಗಂಜಿಗೆ ಗತಿಯಿಲ್ಲದವನೊಬ್ಬ ಕೋಟೆ ಕಟ್ಟುವ ಗುತ್ತಿಗೆ ಹಿಡಿವ ಹಾರಾಟ ನಡೆಸುವಾಗ, ತನ್ನ ಗಡಿಯನ್ನ ಮೀರಿ ಅಬ್ಬರಿಸುವ ಪಾಳೆಗಾರರ ಪೊಗರನ್ನ ಕಾಣುವ ಅವಕಾಶ ಸಿಕ್ಕಾಗ ಈ ಬಗೆಯ ಎಚ್ಚರಿಸುವ ಗಾದೆಯನ್ನ ಹಿರಿಯರು ಹುಟ್ಟು ಹಾಕಿರಲಿಕ್ಕೂ ಸಾಕು. ತುಂಬ ಅಧಿಕ ಪ್ರಸಂಗ ಮಾತನಾಡುವ ಮಗುವನ್ನ ಹಿರಿಯರು "ಕೋಕಯ್ ಮಾತಾಡಬೇಡ!" ಅಂತ ಗದರುವುದು ತುಳುನಾಡಿನಲ್ಲಿ ಸಾಮಾನ್ಯವಾಗಿ ಕೇಳಿ ಬರುವ ಬೈಗುಳ. ತೀರ ಇದನ್ನ ನೂರಕ್ಕೆ ನೂರರಷ್ಟು ಬೆಂಬಲಿಸದಿದ್ದರೂ ಸಹ "ಹಾಸಿಗೆಯಿದ್ದಷ್ಟೆ ಕಾಲು ಚಾಚು" ಎನ್ನುವ ಕನ್ನಡದ ಗಾದೆಯನ್ನ ಈ ಸಾಲಿಗೆ ಸೇರಿಸ ಬಹುದು.}



( ಎನ್ನ ಕೋಕಯಿಡ್ ಪತ್ತುನಾತೆ ಕೊಡಪ್ವೊಡು = ತನ್ನ ಕೊಕ್ಕಿನಲ್ಲಿ ಹಿಡಿಯುವಷ್ಟನ್ನೆ ಕುಕ್ಕಬೇಕು.)


08 March 2013

ಮಾಸದ ನೆನಪಿನ ಮಾಸವೆ ಇದೆ ಸಂವತ್ಸರದುದ್ದ....




ನಿನ್ನೊಂದಿಗೆ ಹೊಸೆದ ಕನಸುಗಳಿಗೆಲ್ಲ
ನಿನ್ನದೆ ಹೆಸರು ಹಚ್ಚಿ.....
ನಿನ್ನೆದೆಯ ವಿಳಾಸಕ್ಕೆ ನಿತ್ಯ ಕಣ್ಣಂಚೆಯಲ್ಲಿ ಕಳಿಸಿ ಕನವರಿಸುತಿರುತೀನಿ
ನಿನಗವೆಲ್ಲ ಖಾತ್ರಿಯಾಗಿ ಮುಟ್ಟಿವೆಯಲ್ಲವಾ?,
ಸಾತ್ವಿಕ ಮನಸಲ್ಲಿ ಹುಟ್ಟಿದ್ದ ನಿರ್ಮಲ ಪ್ರೀತಿ
ಒಲವ ಕಾಲುವೆಯಲ್ಲಿ ಜೀವಜಲವಾಗಿ ಹರಿಯುವ.....
ಮುನ್ನವೆ ಬತ್ತಿ ಬರಿದಾಗಿ ಹೋಗಿದೆ/
ಸತ್ತ ಕನಸುಗಳ ಅಂತ್ಯ ಸಂಸ್ಕಾರಕ್ಕಾದರೂ
ನಾಲ್ಕು ಹನಿ ನಿನ್ನ ಕಣ್ಣೀರು ದಕ್ಕಿದರೆ ನನ್ನ ಸುಪ್ತ ಒಲವು ಧನ್ಯ.......
ಮನೆಯ ಕಿಟಕಿಯಾಚೆ ಆರ್ತವಾಗಿ ಕಿಚಗುಡುತ್ತಿರುವ ಹಕ್ಕಿಗೂ
ಯಾರದೋ ಒಲವಿನ ಹಕ್ಕಿಗಾಗಿ ನಿರೀಕ್ಷೆಯಿರಬಹುದ?,
ಕೆಲವೊಮ್ಮೆ ಸುಮ್ಮನೆ ಕೂತು
ನನ್ನೊಳಗೆ ನಾನು ಯೋಚಿಸುತ್ತೀನಿ.....
ನಿನ್ನ ನೆನಪಲ್ಲಿ ನಿತ್ಯ ನವೆಯುವುದು ಎಷ್ಟು ಸಾಧು?
ಉತ್ತರವೂ ಕೂಡಲೆ ಹೊಳೆಯುತ್ತೆ
ಮೀಸಲಾಗಿರುವಾಗ ಬಾಳು ನಿನಗಾಗಿ ಕನವರಿಸಬಲ್ಲೆ ಹೀಗೆಯೆ ಕಾದು,,,,
ಅಷ್ಟಕ್ಕೂ ನೀನೆ ತಾನೆ ನನ್ನ ಆತ್ಮದ ಬಂಧು//


ಮೆಲ್ಲಗೆ ಮೈ ಸೋಕುತ್ತಿರುವ
ತಂಪುಗಾಳಿಯ ಅಂತರಾಳದಲ್ಲಿ....
ನಿನ್ನದೆ ಪರಿಮಳದ ಒರತೆ ಉಕ್ಕುತ್ತಿರೋದು
ಕೇವಲ ನನ್ನ ಭ್ರಮೆಯಾಗಿರಲಿಕ್ಕಿಲ್ಲ,
ಹೊಸಲಿನಾಚೆಯ ನೆಲದ ಮೇಲೆ ನಾನೆ ಚಲ್ಲಿದ್ದ
ನೀರ ಮಡುವಿನಲ್ಲಿ ಮೂಡಿದ್ದು ಚಂದ್ರನ ಭ್ರಮೆಯೋ?
ಇಲ್ಲಾ ನಿಜಕ್ಕೂ ಶಶಿ ಇಳೆಯ ಮುತ್ತಿಕ್ಕುತ್ತಿದ್ದದನ್ನ ಕದ್ದು ಕಂಡೆನಾ?/
ಸುಗಂಧ ಕಳೆದುಕೊಂಡು
ಬರಿ ಬಣ್ಣ ಹೊತ್ತ ಸುಮ ನನ್ನ ಮನ....
ಗೊತ್ತಿಲ್ಲ
ನೀನಿಲ್ಲದ ಮುಂದಿನ ಬಾಳ ದಿನಗಳನ್ನ ಅದು ಹೇಗೆ ಕಳೆಯುತ್ತೀನ?,
ಗರಿಬಿಚ್ಚಲಾಗದೆ ಗಾಬರಿಯಿಂದ ಕೂತಿರುವ
ನನ್ನ ಎದೆಗೂಡೊಳಗಿನ ಹೂಮರಿ....
ಒಂದೊಮ್ಮೆ ಮೊದಲಿಗೆ ಹಾರುವಾಗ ಮರಳಿ ಬರುವ ಹಾದಿ ತಪ್ಪಿದರೆ
ನೆನ್ನೆದೆಯ ಗೂಡಲ್ಲಿ ಕ್ಷಣವಾದರೂ ಚೂರು ಜಾಗ ದಯಪಾಲಿಸುತ್ತೀಯ ಅದಕ್ಕೆ?//


ಕುಳಿತು ಆಲೋಚಿಸುತ್ತೇನೆ ಎಲ್ಲಿ ನಾ ತಪ್ಪಿದೆ?
ನಿನ್ನ ಕಣ್ಣಿಗೆ ಗುರತರ ಅಪರಾಧವಾಗಿ ಕಂಡಿರುವ.....
ನನ್ನ ನಡೆಯ ಯಾವುದರಲ್ಲಿ ಅಸಲಿಗೆ ನನ್ನ ತಪ್ಪಿದೆ?,
ಗಾನ ಸರೋವರದಲ್ಲಿ ಸುಮ್ಮನೆ ತೇಲುವ
ಕೆಸರ ಸಾಂಗತ್ಯದ ಕೋಮಲ ತಾವರೆ ಮೊಗ್ಗು ನನ್ನೊಳಗಿನ ಒಲವು...
ಅದು ಬೇರೆ ವಿಷಯ ಅರಳದ ಅದಕ್ಕಿದೆ ನೀ ನಿರಾಕರಿಸಿದ ನೋವು/
ಬಹು ದಿನಗಳಿಂದ ಮರೆಯಾಗಿ
ಕನಸಿನಲ್ಲಿ ಕಾಡಿದ್ದ ಪೂರ್ಣ ಚಂದ್ರನನ್ನ ಕಂಡೊಡನೆ.....
ಸಾಗರದ ಮನ ಒತ್ತಾಯವಾಗಿ
ಬಚ್ಚಿಟ್ಟ ಒಲವ ಒತ್ತಡದಿಂದ ಹುಚ್ಚೇಳುತ್ತದೆ,
ಸಾಗರದ ಎದೆಯ ಮೇಲೆ ಕತ್ತಲಲ್ಲಿ ಹೊಳೆವ ಹಣತೆಗಳಂತೆ
ತೇಲುತ್ತಾ ಸಾಗುವ ನೌಕೆಗಳದ್ದು....
ಕೊನೆಗಾಣದ ನಿರಂತರ ಪಯಣ/
ಕತ್ತಲ ಕಣಕಣದಲ್ಲೂ ಸುಖದ ಹಾದಿ ಹುಡುಕುವ ಇಳೆಯದ್ದು
ಒಂಥರಾ ಮುಚ್ಚಿಟ್ಟ ಕನಸ ಒಳಮನದ ಪುಳಕ....
ಸಂಗತಿ ಅದೇನೆ ಇದ್ದರೂ ಒಂದಂತೂ ಸ್ಪಷ್ಟ
ಮೌನ ನನ್ನದು... ಮಾತೆಲ್ಲ ನಿನ್ನದೆ
ನಲಿವು ನಿನ್ನದೆ.... ನೋವಿನ ಮಡುವಲ್ಲಿ ಸುಳಿಗೆ ಸಿಲುಕಿರೋದು ಮಾತ್ರ ನನ್ನೆದೆ//


ಮಲಗದ ಮನದ ಕಣ್ಣು ಬಳಲಿ
ಸೋತು ಹೋಗಿರುವಾಗಲೂ....
ನಿನ್ನ ನಿರಂತರ ಕನವರಿಕೆ ಮಾತ್ರ ಅದರೊಳಗೆ ಜೀವಂತ,
ಕೌತುಕದ ಅವಧಿ ಕಳೆದು
ಕತ್ತಲು ಕಾಲಿಟ್ಟಿದೆ ನನ್ನೆದೆಯಲ್ಲಿ....
ನಿನ್ನ ನೆನಪಿನ ಕಿರು ಹಣತೆಯಷ್ಟೆ
ಈಗ ನನ್ನ ಬಳಿಯಿರುವ ಬೆಳಕಿನ ಒರತೆ/
ಗಾಯದ ಮೇಲೆ ಸಿಹಿಯಾದ ಸಕ್ಕರೆ ಸವರಿದಂತೆ
ನೆನಪುಗಳು ವಿರಹದ ಬಾಧೆಯ ಮೇಲೆ ಹೊರೆಸಿದ್ದು ಉರಿ ನೋವನ್ನೆ....
ಕರಗದ ಕನಸಿನ ಹನಿಗಳೆಲ್ಲ ಕಣ್ಣಂಚಿನ ಇಬ್ಬನಿಗಳಾಗಿ
ನನ್ನ ನೋಡಿ ನಗುವಾಗ ನಯವಾಗಿ ನಾನೂ ಹುಸಿ ಹಾಸ ಹೊತ್ತು
ಮಾತು ಮರೆಸಿ ಅವಕ್ಕೆ ಇನ್ನೇನೋ ಸೊಗಸಾದ ಸುಳ್ಳು ಕಾರಣವನ್ನ ಹೇಳುತ್ತೇನೆ,
ಹುಸಿ ಸಂತಸದ ತೆರೆಯಾಚೆ
ನಿಜ ನೋವುಗಳನ್ನ ಅಡಗಿಸಿಟ್ಟ ನನ್ನ ಹತಾಶ ಪ್ರಯತ್ನಗಳು....
ಕೆಲವೊಮ್ಮೆ ಹಿಡಿತ ಮೀರಿ ಕಣ್ಣ ಹನಿಗಳಾಗಿ ಸೋಲುವುದುಂಟು//

ನೆನ್ನೆ ನಿನ್ನ ಕನಸಾದ ಕಾರಣ ಬಹುಷಃ ನನ್ನ ಈ ಇಡಿ ದಿನ ಪ್ರಫುಲ್ಲ.....





ಕ್ಷಣವೂ ಕಣ್ಣ ಕದಲಿಸದೆ
ಮರೆತು ಕೂಡ ಅವೆಯಿಕ್ಕದೆ....
ಮನಸು ಕಾಣುವ ಕನಸಿಗೆ ಕೊನೆಯೆಂಬುದಿಲ್ಲ,
ಒಳಗೊಳಗೆ ಕಂಡು ಹೊರ ಹೇಳದೆ ಕಾಪಿಡುವ
ಈ ಕನಸುಗಳೆಲ್ಲ ಆಗಾಗ ಮರಿ ಹಾಕಿ,....
ಮನದ ಮನೆಯೊಳಗೆ ದ್ವಿಗುಣವಾಗುತ್ತಲೆ ಸಾಗುತ್ತವೆ/
ಮುಗಿಯದ ಪಯಣದಲ್ಲೆ ಇರುತ್ತೇನೆ
ನಡುವೆ ಆರಿದ ಮರುಭೂಮಿಯಿದೆ...
ಆರದ ಹಿಮದ ಬೆಟ್ಟವೂ ಸಹ
ನಿನ್ನ ನೆನಪಿನ ಹೊರೆಹೊತ್ತ ಮನಸಿಗೆ ಎರಡೂನು ಒಂದೆ ಅಲ್ಲವಾ?,
ಒಂಟಿ ಹಾದಿಯ ತುಂಬ ಆವರಿಸಿದ ಕತ್ತಲಿತ್ತು
ಸುತ್ತಲೂ ಇರುಳು ಕವಿದಿತ್ತು....
ನನ್ನ ಮನಸೊಳಗೆ ಮಾತ್ರ ನಿನ್ನ ಸ್ವಪ್ನದ ಕಿರು ಹಣತೆ
ಮಂದವಾಗಿಯಾದರೂ ಉರಿಯುತ್ತಾ ಅವುಗಳೊಂದಿಗೆ ಇರುಳಿಡಿ ಸೆಣೆಸುತ್ತಿತ್ತು//


ನಿನ್ನ ಪಾಲಿಗೆ ಗಹನ ವಿಚಾರವಿದಲ್ಲ
ಬಾಳ ಪರಿಧಿ ಇನ್ನೂ ವಿಶಾಲ ನಿಜ....
ಆದರೆ ಇದನ್ನೆ ಬಾಳ್ವೆಯ ಗುರಿಯಾಗಿಸಿಕೊಂಡ ಮನಕ್ಕೆ
ಇದರಿಂದ ಬೇರ್ಪಡೆ ಚಿರನಿದ್ರೆಯಲ್ಲಿ ಮಾತ್ರ,
ನಿರಾಸೆಯ ದಡದಲ್ಲಿ ಕುಳಿತು
ಕಣ್ಣೀರಾಗುವ ಕನಸುಗಳಿಗೆ....
ಆತ್ಮನಿವೇದನೆಗಾಗಿ ಒಂದೆ ಒಂದು ಆತ್ಮೀಯ ಹೆಗಲಿಲ್ಲ
ಇರುಳೆ ತುಂಬಿರುವ ಗೋಳ ಬಾಳಲ್ಲಿ ಬೇಕೆಂದರೂ ಒಂದೂ ಹಗಲಿಲ್ಲ/
ಈ ಖದೀಮ ಲೋಕದಲ್ಲಿ ಕನಸ ಅಪಹರಿಸುವವರೂ ಇದ್ದಾರಂತೆ
ನನ್ನ ಸ್ವಪ್ನಗಳನ್ನೆಲ್ಲ ಅನುಮತಿಯಿಲ್ಲದೆ ಅಪಹರಿಸಲು
ನಿನಗೆ ಮಾತ್ರ ಮುಕ್ತ ಪರವಾನಗಿಯಿದೆ....
ಇನ್ನುಳಿದವರು ಹೇಳಿ ಇದನ್ನೊಯ್ದರೂ ಅದು ಶುದ್ಧ ಕಳ್ಳತನ,
ಕಲಸುಮೆಲೋಗರವಾದ ಕನಸುಗಳನ್ನೆಲ್ಲ
ಗೋರಿ ರಾಶಿ ಹಾಕಿಕೊಂಡು ಕೂತವನಿಗೆ.....
ಔಷದಕ್ಕಾದರೂ ಒಂದು ಒಡೆಯದ ಸುಂದರ ಸ್ವಪ್ನ ದಕ್ಕ ಬಾರದಿತ್ತ?//


ನೀ ಬಿಟ್ಟು ಹೋದ ನಡು ಹಾದಿಯಲ್ಲಿ
ಗುರುತಿಗಾಗಿ ನನ್ನ ಕನಸೊಂದನ್ನ ಅಲ್ಲಿಯೆ ಬಿಟ್ಟು ಬಂದಿದ್ದೇನೆ....
ಮತ್ತದೆ ಬಾಳ ತಿರುವಿನಲ್ಲಿ ಸಾಗುವಾಗ
ಮರೆಯದೆ ನೀನದನ್ನ ನೇವರಿಸುತ್ತೀಯ ಅನ್ನುವ ಹಂಬಲದಲ್ಲಿ,
ನನಗೆ ನನ್ನ ನೋವುಗಳು ಅವತ್ತೂ ಮುಖ್ಯವಾಗಿರಲಿಲ್ಲ
ಇವತ್ತಿಗೂ ನಿನ್ನ ನಲಿವುಗಳಷ್ಟೆ ನನ್ನ ಸರ್ವಸ್ವ.....
ಈಗೀಗ ಕತ್ತಲು ಭಯ ಹುಟ್ಟಿಸುವುದಿಲ್ಲ
ಇಲ್ಲದ ಭೂತಗಳ ಭಯವೂ ನನಗಿಲ್ಲ....
ಒಂಟಿತನ ಹೊದ್ದ ಅಂತಃರ್'ಪಿಶಾಚಿಯಾಗಿ
ಅಲೆವ ನನ್ನ ಮನಸಿಗೆ ನೀ ಬಿಟ್ಟು ಹೋದ ಮೇಲೆ ಹೆದರಿಕೆಯ ಹಂಗು ಉಳಿದಿಲ್ಲ/
ಕವಿತೆಯಾಗಿ ಹರಿವ ನೋವುಗಳಲ್ಲೆಲ್ಲ
ಕಳೆದುಕೊಂಡ ಏನನ್ನೋ ಅರಸುವ ತಹತಹಿಕೆಯಿರುತ್ತದೆ.....
ಕದ ತಟ್ಟಿ ಬರದ ಕನಸುಗಳು ಯಾವಾಗಲೂ ಅನುಮತಿಗೂ ಕಾಯದೆ
ಹೊತ್ತಲ್ಲದ ಹೊತ್ತಿನಲ್ಲಿ ನನ್ನ ಹಾಯುತ್ತವೆ
ನಾನದರಲ್ಲಿ ಕರಗಿ ಕಣ್ಣೀರಾಗುವುದನ್ನೆ ಕಾದು ಅದರಲ್ಲಿ ತೋಯುತ್ತವೆ,
ತಂತು ಕಡಿದು ಹೋದರೇನು
ಮಾತು ಮೌನವಾದರೂನು....
ಸ್ವಪ್ನ ಸರೋವರದಲ್ಲಿ ತೇಲುತ್ತಿರುವ
ಕಾಗದದ ದೋಣಿ ಇನ್ನೂ ಮುಳುಗಿಲ್ಲ//


ಮನದ ನೊಂದ ಭಾವಗಳಿಗೆಲ್ಲ
ಬೆಚ್ಚನೆ ಚಾದರ ಹೊದೆಸಿ ತಟ್ಟಿ ಮಲಗಿಸುವ.....
ನಿತ್ಯದಿರುಳ ಕಾಯಕಕ್ಕೆ
ನಿನ್ನ ಹೆಸರಿನ ಜೋಗುಳ ಖಡ್ಡಾಯ,
ಜೀವನದ ಪ್ರತಿ ಹೊರಳಲ್ಲೂ ಒಂದೊಂದು ಗಲ್ಲಿಗಳಿವೆ
ಆದರೂ ಕಣ್ಗಳೆರಡು ಕಡೆಯವರೆಗೂ...
ಸಾಂಗತ್ಯ ನೀಡುವ ಒಂದೆ ಒಂದು ಖಾಸಗಿ ಕನಸಿನ ತಹತಹಿಕೆಯಲ್ಲಿದೆ/
ನಿತ್ಯ ನೀರು ಕಣ್ಗಳಿಂದ ಸೋರಿ ಹೋಗುತ್ತಿದೆ ಎನ್ನುವ ವ್ಯಥೆ
ನನಗಾದರೂ ಏಕೆ ಹೇಳು?
ಕಂಡು ಪ್ರೇರೇಪಿತನಾಗುತ್ತೇನೆ.....
ಖಚಿತ ಉದ್ದೇಶವಿಲ್ಲದೆ ಬಾನ ಬಿರಿದು
ನೆಲಕೆ ಸುರಿದು ಮುಗಿಸುದಿಲ್ಲವೆ ಮೋಡ ತನ್ನ ಬಾಳು?,
ಕಾದು ದಣಿದ ಮನಸಿಗೆ ತುಸುವೂ ದಣಿವರಿವಾಗದಂತೆ
ಕನಸಾಗಿ ಮೆಲ್ಲನೆ ನೇವರಿಸುವ ನೆನಪುಗಳಿಗೆ ಬಾಳು ಋಣಿ.....
ಮನಸದೆಷ್ಟೆ ಖಾಲಿ ಖಾಲಿಯಾಗಿ
ಏನೊಂದೂ ತೋಚದ ಕ್ಷಣದಲ್ಲೂ ನನಗೆ ನಿನ್ನದೆ ಧ್ಯಾನ//

ಮೌನದ ಬಣ್ನದಲ್ಲಿ ಚಿತ್ರಿಸಿರುವ ನಿನ್ನನ್ನ ಮಾತಿನ ಮಸಿಯಲ್ಲಿ ಮೈಲಿಗೆಗೊಳಿಸಲಾರೆ....






ಮನ ಬಿಕ್ಕಳಿಸಿದ ಸದ್ದು ಕನಸಿಗೆ ಮಾತ್ರ ಗೊತ್ತು
ಅದರ ಕಣ್ತುಂಬಿ ಬರುವುದು ಕೇವಲ....
ಯಾರಿಗೂ ಕಣ್ಣೀರು ಕಾಣಿಸದ ಕಾರಿರುಳ ಹೊತ್ತು,
ಇರುಳೆ ಹೆಚ್ಚು ಆಪ್ತವೆನಿಸುವುದಕ್ಕೆ
ಒಂಟಿತನ ಆವರಿಸಿದ್ದಾಗಲೆಲ್ಲ ಸುತ್ತಲೂ....
ಕತ್ತಲೆ ಕವಿದಿರುತ್ತಿದ್ದುದೆ ಕಾರಣವಾಗಿರಬಹುದು/
ಮತ್ತೆ ಮನಸೊಳಗೆ ಮಾರ್ದನಿಸುವ
ಅನೇಕ ಕಿರು ರಾಗಗಳು ಹಾಗೆಯೆ...
ಸದ್ದಿಲ್ಲದೆ ಒಳಗಡೆಯೆ ಅಂತರ್ಧನಾಗಿ ಕೊನೆಯಾಗುತ್ತವೆ,
ಕೈಗೆಟುಕದ ಕನಸುಗಳಿಗೆ
ಕದ್ದು ಬಸಿರಾಗುವ ಮಳ್ಳ ಮನ....
ಇನ್ನೂ ಎಳೆತನದ ಕನಸುಗಳನ್ನ ಕೈಬಿಟ್ಟಿಲ್ಲ//


ಕಂಬನಿ ಕವಿದ ಬಾಳ ಬಾನು
ಬಿರು ಬೇಸಿಗೆಯಲ್ಲೂ ಹನಿಯುವ ವಿಸ್ಮಯಕ್ಕೆ....
ಒಲವಲ್ಲಿನ ವೇದನೆ ಎಂದು ಕರೆಯಬಹುದು,
ನಿರೀಕ್ಷೆಯ ದಿಂಬಿಗೆ ಒರಗಿ
ಚಡಪಡಿಕೆಯ ಪಲ್ಲಂಗದ ಮೇಲೆ....
ಕುಳಿತ ಮನಕ್ಕೆ ವೇದನೆಯ ಮುಳ್ಳುಗಳು ನಿತ್ಯ ನಾಟುತ್ತಿವೆ/
ಕ್ಷಣವೂ ಕರಗದ ನಿನ್ನ ಮೌನದೆದುರು
ಅಷ್ಟೆ ಮೌನವಾಗಿ ಕಾದು ಕುಳಿತ ನನಗಿರುವುದು....
ಕೇವಲ ನಿನ್ನೊಂದು ಮುಗುಳ್ನಗೆಯ ನಿರೀಕ್ಷೆ ಮಾತ್ರ,
ನೆರಳಿಲ್ಲದ ಉರಿ ಬಿಸಿಲಿನ
ಬೋಳು ಮುಳ್ಳಿನ ಮರ ಮನ....
ಇದರೊಳಗಿನ ಎಲ್ಲ ತಂಪನ್ನೂ ಕದ್ದು ಹೋದದ್ದು
ಅದು ನೀನೇನ?//


ನಡುಹಗಲೂ ಸಹ ಇರುಳಷ್ಟೆ ಕತ್ತಲೆ ನನಗೆ
ಜೊತೆಗೆ ನಡೆವ ನೀನಿದ್ದಿದ್ದರೆ ವಿಷಯ ಬೇರೆಯಿತ್ತು!....
ಕಳೆಗೆಟ್ಟ ದಿನದ ಮುಖದ ತುಂಬ
ತೀರದ ನಿರೀಕ್ಷೆಯ ಅಸಹ್ಯ ಮೊಡವೆಯ ಕಲೆಗಳು,
ಮನಸಿಗೆ ಕನಸ ಕಸಿಯಾದ ಮೇಲೆ
ಬೆಳೆದು ನಿಂತ ಮಿಶ್ರತಳಿಯ ನಿರೀಕ್ಷೆಗಳಿಗೆ....
ಅಂಕೆಯೆ ಇಲ್ಲವಾಗಿ ಹೋಗಿದೆ/
ಆರಂಭವಾಗುವ ಮೊದಲೆ ಕೊನೆಯ ಪರದೆ ಹಾಕಿ
ಯಾಮಾರಿಸಿದೆ ಈ ಜೀವನ....
ನೀನಿಲ್ಲದೆ ನೊಂದಿದ್ದೇನೆ
ಒಳಗೊಳಗೆ ಬೆಂದಿದ್ದೇನೆ... ಅನೇಕ ಆಕ್ಷಾಂಶೆಗಳನ್ನ
ಕತ್ತು ಹಿಸುಕಿ ನಿರ್ದಾಕ್ಷಿಣ್ಯವಾಗಿ ಹುಟ್ಟುವ ಮೊದಲೆ ಕೊಂದಿದ್ದೇನೆ//


ತುಂಬದ ಎದೆಯ ಖಾಲಿ ಅಂಕಣದ ತುಂಬ
ನಿನ್ನವೆ ಕೆಲವು ನೆನಪುಗಳು
ಕಣ್ಣಾಮುಚ್ಚಾಲೆಯಾಡುತ್ತಾ ಕಾಲ ಹಾಕುತ್ತಿವೆ....
ಉರಿ ಬಿಸಿಲಿನಲ್ಲಿ ತಂಪಿನಸಿಂಚನ
ನಿನ್ನ ನೆನಪುಗಳ ಸವಿ ಹನಿ,
ಸನಿಹವಿಲ್ಲದ ನಿನ್ನ ಸದಾ ನೆನೆವ
ನನ್ನ ಮನಕ್ಕೆ ಬಿಸಿಲಿನಲ್ಲೂ....
ನೆನಪಿನ ಮಳೆಯಲ್ಲಿ ತೋಯುವ ಯೋಗ/
ಕನಿಷ್ಠ ನಿಯತ್ತಿಗೆ ಗರಿಷ್ಠ ಒಲವು ದಕ್ಕುವ
ವಿಪರ್ಯಾಸದ ಯುಗದಲ್ಲಿ
ನಿರ್ಮಲ ಪ್ರೀತಿ ಕೇವಲ ನಗೆಪಾಟಲು,
ಬಿಸಿಲಿಲ್ಲದೆಯೂ ಬೆಚ್ಚಗಾಗುತ್ತಿರುವ ಇರುಳಿನ ಇಡುಗಂಟಿನಲ್ಲಿ
ನನ್ನ ಕೆಲವು ಬೆದರಿದ ಸ್ವಪ್ನಗಳಿವೆ...
ಅವುಗಳಲ್ಲಿ ನಿನ್ನ ಬೆವರ ಸ್ವೇದ ಬಿಂದುಗಳಿವೆ
ನಿನ್ನ ನಾಳೆಗಳಲ್ಲಿ ಕಳೆದು ಹೋದ ನನ್ನ ಇಂದುಗಳಿವೆ//