ನಾನು...ನನ್ನ ಮನಸು

ಬತ್ತಿದ ಭಾವಗಳಿಗೆಲ್ಲ ನೀಗದ ನೀರಡಿಕೆ,
ಸಾಯುತಿರುವ ಕನಸುಗಳ ಕಣ್ಣಲ್ಲೂ ನಿನ್ನದೆ ಕನವರಿಕೆ/
ಮತ್ತೇರಿಸ ಬೇಕಾದ ನಿಶ್ಚಲ ಹೊತ್ತಲಿ...
ಮುತ್ತುತ್ತಿರುವ ನೆನಪುಗಳ ಮುತ್ತಿಗೆಯಿಂದ ಜರ್ಜರಿತ,
ನಾನು...ನನ್ನ ಮನಸು//

ತೊಟ್ಟಿಕ್ಕುತ್ತಿವೆ

ಒದ್ದೆ ಮನಸಿನ ಭಾವಗಳೆಲ್ಲ,
ನಿನ್ನೊಂದಿಗೆ ಕಂಡಿದ್ದ ಕನಸುಗಳ ಭಾರಕ್ಕೆ ಮಂಜಾಗಿ ತೊಟ್ಟಿಕ್ಕುತ್ತಿವೆ/
ಕಂಡವರು ಇದನ್ನು ಕಣ್ಣೀರ್ ಎಂದರು,
ನಾನೂ...ಇದನ್ನೆ ನನ್ನ ಒಲವೆನ್ನುತ್ತೇನೆ//

ನಿನ್ನವೇ ನೆನಪುಗಳು

ಏಕಾಂತವೂ ನನ್ನ ನಸೀಬಿನಲ್ಲಿಲ್ಲ...
ಎದೆಯೊಳಗೆ ಉಮ್ಮಳಿಸಿ ಬರುವ ನೆನಪಿನ ಅಲೆಗಳ ಸರಣಿ ಮನಸಿನ ದಡದ ಉಸುಕಿನ ದಂಡೆಯನ್ನು ಕರಗಿಸುತಲೆ ಇದೆ...
ನನ್ನೊಳಗಿನ ವಿಷಾದವೆಲ್ಲ ಹರಳುಗಟ್ಟುವ ಮೊದಲೆ ಹರಿದು ನೀರಾಗುತ್ತಿದೆ...
ಈಗಲೂ ಇದನ್ನು ಬರೆಯುತಿರುವುದು ನಾನಲ್ಲ...
ಕೈ ಓಡುತಿದೆ,ನಿನ್ನವೇ ನೆನಪುಗಳು ನನ್ನಿಂದ ಇವೆಲ್ಲವನ್ನೂ ಅಕ್ಷರಗಳಾಗಿ ಹೊರ ಬರಿಸುತಿವೆ..

ನನ್ನ ಬಳಿ ನೀನೀಗಿಲ್ಲ...

ಬೆಳಕಿಲ್ಲದ ಹಾದಿಯ ಜೊತೆಗೆ ಕನಸೂಗಳೂ ಇಲ್ಲದ ಹಾದಿಯಲ್ಲಿ ತಡವರಿಸುತ್ತಾ ಸಾಗುತ್ತಿದ್ದೇನೆ,
ಎಡವಿ ಬಿದ್ದರೆ ಕೈ ಹಿಡಿದೆತ್ತಲು ನಿನ್ನಾಸರೆಯಿಲ್ಲ/
ಬದುಕಿನ ಈ ದೀರ್ಘಯಾನದಲಿ ಸೋತು ಸೊರಗಿ ಹೋದರೆ,
ತಲೆಯಾನಿಸಿ ಆಸರೆ ಪಡೆಯಲು ನಿನ್ನ ಹೆಗಲ ಮೆತ್ತೆಯಿಲ್ಲ//

ಬದುಕಿದ್ದೇನೆ ಕೇವಲ ಸತ್ತಂತೆ.
ಮಾತೀಗ ಮಿತ ಎಲ್ಲರೊಂದಿಗೆ...
ನೀನಿಲ್ಲದೆ ಜೊತೆ ತುಂಬಿದ ಸಂತೆಯಲಿ ಮಗುವೊಂದು ಒಂಟಿಯಾದಂತೆ/
ಬೆದರಿ ಬೆಚ್ಚಿ ದಿಕ್ಕುಗಾಣದ ಮನಸಿನ ವೇದನೆಗೆ ಕೊನೆಯೆ ಇಲ್ಲ,
ನಾನು ನಿಜವಾಗಿಯೂ ಒಂಟಿ ನನ್ನ ಬಳಿ ನೀನೀಗಿಲ್ಲ//

ನೀನಿಲ್ಲದೆ ಏನೂ ಇಲ್ಲ..

ನಿನ್ನ ಭರವಸೆಯ ಬೆಳಕಿಲ್ಲದ ಮನಸಿಗೆ ಎಂಥಾ ದೀಪಾವಳಿ?,
ನೀ ಜೋತೆಯಿಲ್ಲದ ತೀರದ ನೋವಿನ ಜೊತೆ ಇನ್ನೆಂಥಾ ದಸರ?/
ಕಾಡುವ ಹಳೆಯ ನೆನಪುಗಳ ನಿರಂತರ ಹಾವಳಿ,
ಚೂರಾದರೂ ಹಿಮ್ಮೆಟ್ಟಿಸುತಿದೆ ನೀ ನನ್ನೊಂದಿಗಿಲ್ಲದ ಅನಂತ ಬೇಸರ//

ಕೊನೆ ಉಸಿರಿನವರೆಗೂ ನಿನ್ನ ಹಾದಿ ಕಾಯುವ ವಾಯಿದೆ,
ನನಗೆ ನಾನೆ ಕೊಟ್ಟುಕೊಂಡಾಗಿರುವ ವೇಳೆ/
ಒಂದೊಮ್ಮೆ ನೀ ಮರಳಿ ಬಂದರೂ ಸರಿ,
ಬಾರದಿದ್ದರೂ...ನನ್ನ ಕೊನೆಗಾಣದ ನಿರೀಕ್ಷೆ ನಿರರ್ಥಕವಲ್ಲ//

ಮರೆಯೋದು ಹೇಗೆ?

ಮತ್ತೆ ಮರಳಿ ಬೀಳೊ ಕನಸು,

ಪುನಃ ನಾ ಮನಸೊಳಗೆ ಗುನುಗುವ ಹಾಡು/

ನಿನ್ನಲೆ ನೆಟ್ಟಿರುವಾಗ ನನ್ನ ಮನಸು,

ಅದರ ಕನ್ನಡಿಯಲಿ ಮೂಡಿರುವ ಬಿಂಬ ನಿನ್ನದೇನ?

ನೀನೆ ಬಂದಿಲ್ಲೊಮ್ಮೆ ನೋಡು//


ನೀ ಸಾಲ ಕೊಟ್ಟಿರುವ ನಸುನಗೆ ಜಾಲದಲಿ ಸಿಲುಕಿದ ಮನಸಿಗೆ,

ಕಾಲದ ಪರಿವೆಯಿಲ್ಲದೆ ಹಗಲಲೂ ನಾ ಕಾಣುವ ನಿನ್ನದೆ ಕನಸಿಗೆ/

ಬಲಿಯಾದ ನಾನು ನಿನ್ನೊಳಗೆ ಲೀನವಾಗಿ ಹೋದರೆ,

ಈಗಲೇ ಹೇಳಿ ಬಿಡುತ್ತೇನೆ ಕೇಳು...
ಅದಕ್ಕೆ ನಾನಂತೂ ಹೊಣೆಯಲ್ಲ//

ನನ್ನೊಂದೆ ಒಂದು ಪ್ರಶ್ನೆ...

ನಿನ್ನ ಮೈಗಂಧ ನನಗಿಷ್ಟವೆಂದು,
ಸುಳಿಗಾಳಿಗೆ ಸುಳಿವು ಕೊಟ್ಟವರ್ಯಾರು?/
ನಿನ್ನನೆ ಪ್ರತಿಬಿಂಬಿಸುವ ಮಳೆಹನಿಯೊಂದನು,
ನೀಲಿ ಬಾನಂಚಿನ ಮಳೆಮೋಡದಲಿ ತಂದಿಟ್ಟವರ್ಯಾರು?//

ನಿನ್ನ ನಗುವನೆ ಅನುಕರಿಸುವ ಕಲೆಯನು,
ಅರಳಿ ನಗುವ ಹೂಗಳಿಗೆ ಕಲಿಸಿಕೊಟ್ಟವರ್ಯಾರು?/
ನನಗೆ ಹುಚ್ಚು ಹಿಡಿಸುವ ನಿನ್ನ ಕಂಗಳ ಕಾಂತಿಯನೆ,
ಇರುಳಾಗಸದ ತಾರೆಗಳಿಗೂ ಸಾಲವಿತ್ತವರ್ಯಾರು?//