16 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೪.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೪.👊


ಹೇಳಿ ಕೇಳಿ ಅದು ಡಿಸ್ಕೋ ಸಂಗೀತದ ಜನಪ್ರಿಯತೆ ಮಗಿಲು ಮುಟ್ಚಿದ್ದ ಕಾಲ ಅದು. ಎಲ್ಲೆಲ್ಲೂ ಒಂದೊಂದು ಹೊಸ ಸಿನೆಮಾದಲ್ಲೂ ಹಿಂದೆಂದೂ ಕೇಳಿರದ ಧಾಟಿಯ ಬೀಟ್ ಮೇಲೆ ಬೀಟ್ ಸಿಡಿಸುತ್ತಿದ್ದ ಬಪ್ಪಿ ಲಾಹಿರಿ ಹಾಗೂ ಚಿತ್ರ-ವಿಚಿತ್ರ ವಾದ್ಯದಿಂದೆಲ್ಲಾ ನಾದ ಹೊರಡಿಸುತ್ತಾ ಕೇಳುಗರೂ ಸಹ ಅದರಿಂದ ಪ್ರಚೋದಿತರಾಗಿ ಕೂತ ಕೂತಲ್ಲೆ ಮೇಜುˌ ನೆಲˌ ಗೋಡೆ ಹೀಗೆ ಸಿಕ್ಕ ಸಾಮಾನು ಸರಂಜಾಮುಗಳ ಮೇಲೆಲ್ಲಾ ಕೈ ಕಾಲುಗಳ ಬೆರಳುಗಳಿಂದಲೆ ತಾಳ ಕುಟ್ಟುವಂತೆ ಮಾಡುತ್ತಿದ್ದ ಆರ್ ಡಿ ಬರ್ಮನ್ರದ್ದೆ ಹವಾ. 


ಅಂತಹ ತಾಳಕ್ಕೆ ತಕ್ಕಂತೆ ಕುಣಿಸುವ ಸಂಗೀತ ದಿಗ್ಗಜರೆ ಅಂದಿನ ಯುವ ಪೀಳಿಗೆಯ ಆರಾಧ್ಯ ದೈವವಾಗಿದ್ದ ಸಮಯವದು. ತೆರೆಯ ಮೇಲೆ ಈ ಹಾಡುಗಳಿಗೆ ಮೈ ಚಳಿ ಬಿಟ್ಟು ತಮ್ಮ ತಮ್ಮ ನಾಯಕಿಯರ ಸೊಂಟ ಹಿಡಿದು ನುಲಿಯತ್ತಾˌ ಮಧ್ಯ ಮಧ್ಯ ಸಾಧ್ಯವಾದಾಗಲೆಲ್ಲಾ ಮೆಲ್ಲಗೆ ಬೆರಳುಗಳಿಂದ ಅವರ ತೆರೆದ ಹೊಟ್ಟೆಯ ಹೊಕ್ಕುಳ ಗುಳಿಗೊಂದು ಚನ್ನೇಟನ್ನ ಹೊಡೆದು ಅವರೊಂದಿಗೆ ಜೋಡಿಯಾಗಿ ಥರೇವಾರಿ ಡಿಸ್ಕೋ ಸ್ಟೆಪ್ಪುಗಳನ್ನ ಹಾಕಿಕೊಂಡು ಮಿಣಿಮಿಣಿ ಮಿಂಚುವ ವಸ್ತ್ರಾಲಂಕಾರ ಮಾಡಿಕೊಂಡು ಥಕ ಥೈ ಎಂದು ಕುಣಿಯುತ್ತಿದ್ದ ಮಿಥುನ್ ಚಕ್ರವರ್ತಿˌ ವಿಷ್ಣುವರ್ಧನ್ˌ ಜಿತೇಂದ್ರˌ ಅಮಿತಾಭ್ ಬಚ್ಚನ್ˌ ಚಿರಂಜೀವಿ ಮುಂತಾದವರೆ ಆಗ ಅವರ ಪಾಲಿಗೆ ಆದರ್ಶ ಪುರುಷರು. 


ಅಂದು ತಯಾರಾಗಿದ್ದ ಯಾವ ಭಾಷೆಯ ಯಾವುದೆ ಸಿನೆಮಾವನ್ನ ಬೇಕಾದರೂ ಇವತ್ತು ಹಾಕಿಕೊಂಡು ನೋಡಿˌ ಹೆಚ್ಚು-ಕಡಿಮೆ ಒಂದೆ ಧಾಟಿಯ ಏರಿಳತವಿಲ್ಲದ ಕಥಾ ನಿರೂಪಣೆ. ನಾಯಕ ಒಂದೋ ಹುಟ್ಟು ಬಡವˌ ಇಲ್ಲದಿದ್ದರೆ ಮಧ್ಯಮವರ್ಗದ ನಿರುದ್ಯೋಗಿˌ ಅದೂ ಅಲ್ಲಂತಾದರೆ ಫೊಟೋಗ್ರಾಫರ್ˌ ಕ್ಲಬ್ ಡ್ಯಾನ್ಸರ್ ಥರದ ಆದಾಯದ ಅನಿಶ್ಚಿತತೆ ಇರುವ ಎಂಥದೋ ಒಂದು ಉದ್ಯೋಗ ಹಿಡಿದವ. ಅದೂ ಇಲ್ಲ ಅಂತಾದರೆˌ ಇನ್ನೇನು ಮುಚ್ಚಿ ಹೋಗಲು ತಯಾರಾಗಿಟ್ಟಿರುವ ಭಯಂಕರ ಜಂಬದ ಕೋಳಿ ನಾಯಕಿಯ ಅಪ್ಪನ ಮಾಲಕತ್ವದಲ್ಲಿರುವ ಯಾವ ಉತ್ಪನ್ನ ತಯಾರಾಗುತ್ತದೆ ಅಲ್ಲಿ ಅಂತನೆ ಕೊನೆವರೆಗೂ ನೋಡುಗರಿಗೆ ಗೊತ್ತೆ ಆಗದ ಅದೆಂತದೋ ಬಗೆಯ ಕಾರ್ಖಾನೆಯಲ್ಲಿ ಖಾಕಿ ತೊಟ್ಟು ಸುಮ್ಮನೆ ಒಂದು ಕಟಿಂಗ್ ಪ್ಲೆಯರ್ ಹಾಗೂ ಸ್ಕ್ರೂ ಡ್ರೈವರ್ ಹಿಡಿದೆ ಬೆವರುತ್ತಾ ನಿಂತ ಯೂನಿಯನ್ ಲೀಡರ್. ಇದೆಲ್ಲ ಬೇಡ ಅಂತಾದರೆ ಒಬ್ಬ ಸಾಮಾನ್ಯ ಕೂಲಿ. ಇದರಲ್ಲಿ ಯಾವುದಾದರೂ ಒಂದಾಗಿರುತ್ತಿದ್ದ. ಒಟ್ಟಾರೆ ಉಢಾಳ ಅಷ್ಟೆ. 



ಚಿತ್ರದ ಮೊದಲರ್ಧ ಬರಿ ನಾಯಕನ ಬಡತನˌ ಬಡವನಾದ ನಾಯಕನನ್ನ ಎಲ್ಲರೂ ನಾಲಾಯಕ ಅಂತ ಹೀಯಾಳಿಸುವ ದೃಶ್ಯಗಳುˌ ಕಾಲೇಜು ಕನ್ಯೆಯಾಗಿರುವ ಅಥವಾ ಆಗಿನ್ನೂ ವಿದೇಶದಿಂದ ಮರಳಿ ಬಂದ ಸಿಕ್ಕಾಪಟ್ಟೆ ಪೊಗರಿನ ನಾಯಕಿಯ ಸೊಕ್ಕಿನ ನಡುವಳಿಕೆಯ ದರ್ಶನˌ ಅದರ ಮೂಲಕ ನಾಯಕ ನಾಯಕಿ ನಡುವೆ ಹುಟ್ಟುವ ತಿಕ್ಕಾಟˌ ಬಹಿರಂಗವಾಗಿ ನಾಯಕಿಯ ಕೊಬ್ಬಿಳಿಸಿ ಚಪ್ಪಾಳೆ ಗಿಟ್ಟಿಸುವ ನಾಯಕˌ ಅಂತಹ ಶರಂಪರ ಕಿತ್ತಾಟದ ಮಧ್ಯ ಮಧ್ಯ ಇದ್ದ ಬದ್ದ ಕೆಲಸಗಳನ್ನೆಲ್ಲ ಅಲ್ಲಲ್ಲೆ ಬಿಟ್ಟು ಧಡೀರನೆ ಊಟಿ ಅಥವಾ ಶಿಮ್ಲಾದ ಲೋಕೇಶನ್ನುಗಳಲ್ಲಿ ದೃಶ್ಯಕ್ಕೊಂದು ಧಿರಿಸು ತೊಟ್ಟು ಈ ಹಾಡುಗಳಿಗೆ ನಕ್ಕು ನಲಿಯುವ ಆ ನಾಯಕ ನಾಯಕಿಯ ಜೋಡಿ. ಅವರೊಂದಿಗೆ ಅಲ್ಲಲ್ಲೆ ಅರಳಿದ ಹೂವುಗಳಂತೆ ಕೋರಸ್ ಹಾಡಿಕೊಂಡು ರಂಗುರಂಗಿನ ಬಟ್ಟೆ ತೊಟ್ಟು ಕುಣಿದರೂ ಚೂರೂ ಅವರ ಖಾಸಗಿತನಕ್ಕೆ ಧಕ್ಕೆ ತಾರದ ನೃತ್ಯಗಾತಿಯರ ಗುಂಪು. ಆ ಹಾಡು ಹಾಡಲ್ಲೆ ಅವರಿಬ್ಬರ ಮಧ್ಯೆ ಪ್ರೀತಿ ಅರಳಿˌ ಅದು ಉತ್ಕಟ ಒಲವಾಗಿ ಕೆರಳಿˌ ಹುಟ್ಟಾ ಸೊಕ್ಕಿನ ನಡುವಳಿಕೆಯ ನಾಯಕಿಯ ಸೊಕ್ಕಡಗಿˌ ಅವಳು ಅವನ ಮಗುವಿಗೆ ತಾಯಿಯಾಗ್ತಿದೀನಿ ಅನ್ನೋ ಸಂಭಾಷಣೆ ಬರುವ ಹೊತ್ತಿಗೆ ಪ್ರೇಕ್ಷಕ ಪ್ರಭುಗಳಿಗೆ ಚುರಮುರಿ ತಿಂದು ಸೋಡ ಕುಡಿದು ಬೀಡಿ ಸೇಯ್ದು ಉಚ್ಛೆ ಹೊಯ್ದು ಬರಲು ಕೊಡುವ ಮಧ್ಯಂತರ! 


ಅನಂತರ ಕಾರ್ಖಾನೆಯಲ್ಲೂ ಜಗಳ ತೆಗೆದು ಮುಷ್ಕರ ಹೂಡಿರುವ ಯೂನಿಯನ್ ಲೀಡರ್ ಆಗಿರುವ ನಾಯಕˌ ಗಾಯದ ಮೇಲೆ ಉಪ್ಪು ಸುರಿವಂತೆ ತನ್ನ ಮುದ್ದಿನ ಮಗಳನ್ನೂ ಪಟಾಯಿಸಿದ ಸಿಟ್ಟಿನಲ್ಲಿ ಕುದಿಯುವ ಅವಳಪ್ಪ ಹಾಗೂ ನಾಯಕನ ನಡುವಿನ ಘನಘೋರ ತಿಕ್ಕಾಟ. ಇದಕ್ಕೆ ತುಪ್ಪ ಸುರಿವ ವಿಲನ್ಗಳಾದ ನಾಯಕಿಯ ಸಹೋದರ ಮಾವ ಅಥವಾ ಅವಳ ಅತೃಪ್ತ ಪ್ರೇಮಿ. ಪದೆ ಪದೆ ನಾಯಕನ ಸ್ವಾಭಿಮಾನ ಕೆಣಕುವ ಅವರ ಪ್ರಚೋದನೆ. ನಾಯಕನ ಪೌರುಷ ಹೊರ ಹಾಕಿಸುವಂತಹ ಅವರ ನಡುವಿನ ಗುದ್ದಾಟ. ಇದಕ್ಕೆಲ್ಲ ಕಳಶವಿಟ್ಟಂತೆ ಸ್ವಭಾವತಃ ದುಷ್ಟನಾದ ಖಳನಾಯಕನಿಗೊಬ್ಬಳು ವ್ಯಾಂಪ್ ಗೆಳತಿ. 


ನಾಯಕನ ಜೊತೆಗಿನ ಫೈಟಿಂಗಿನಲ್ಲಿ ಒದೆ ತಿಂದು ಬರುವ ವಿಲನ್ನಿನ ಮನ ತಣಿಸಲು ಕನಿಷ್ಠ ಒಂದಾದರೂ ಡಿಸ್ಕೋ ಶಾಂತಿ - ಜಯಮಾಲಿನಿ - ಹೆಲನ್ - ಹಲಂ - ಸಿಲ್ಕ್ ಸ್ಮಿತಾ ಕರ್ಚೀಫಿಗಿಂತ ಕಿರಿದಾದ ಬಟ್ಟೆಯಲ್ಲಿ ಹೊಲಿಸಿದ "ಕಾಸ್ಟ್ಯೂಮು" ತೊಟ್ಟುಕೊಂಡು ಅಂಡು ತೊಡೆ ಎದೆ ತುಟಿ ಕುಣಿಸಿ ಪ್ರೇಕ್ಷಕರನ್ನ ಉನ್ಮತ್ತರನ್ನಾಗಿಸಲು ಮಾಡುವ ಕ್ಲಬ್ ಡ್ಯಾನ್ಸ್ ಅಥವಾ ಕ್ಯಾಬರೆˌ ಎರಡು ರೇಪ್ˌ ನಾಲ್ಕು ಫೈಟ್ˌ ಎಂಟು ಹಾಡು. ಕಡೆಗೊಮ್ಮೆ ಎಲ್ಲ ದುಷ್ಟರ ಮನಪರಿವರ್ತನೆಯಾಗಿ ಒಂದಾದ ಮೇಲೆ ಶುಭಂ. ಇಷ್ಟೆ ಕಥಾ ಹಂದರ. ಎಂಬತ್ತರ ದಶಕದ ಬಹುತೇಕ ಚಿತ್ರಗಳದ್ದು ಇದೆ ಹಣೆಬರಹ. 


ಇದನ್ನೆ ಎರಡೂವರೆ ತಾಸು ಎಳೆದೆಳೆದು ತೋರಿಸುವ ಕಸರತ್ತಿನ ಮುಖ್ಯಾಂಶವೆ ಈ ಸಂಗೀತ. ಅದರ ಮೋಡಿಗೆ ಯುವಜನರು ಸಹಜವಾಗಿ ತಲೆದೂಗಿ ಸನ್ಮೋಹಕ್ಕೆ ಒಳಗಾಗುತ್ತಿದ್ದರು. ಇದೆ ಕಥಾ ಹಂದರವನ್ನ ತಿರುವಿ ಮುರುವಿ ಮತ್ತೊಂದು "ಹೊಚ್ಚ ಹೊಸ ಸಿನೆಮಾ ಸ್ಕೋಪ್" ಚಿತ್ರ ಮಾಡಿ ತೆರೆಗೆ ತಂದು ರಾಚುತ್ತಿದ್ದರು. ಪ್ರೇಕ್ಷಕರೂ ಒಗ್ಗರಣೆ ಹಾಕಿರೋ ಅದೆ ಹಳೆಯ ತಂಗಳನ್ನದ ಹೊಸ "ಚಿತ್ರಾ"ನ್ನ ಸವೆಯಲು ಕಾತರರಾಗಿರುತ್ತಿದ್ದರು. ಕ್ರಮೇಣ ಈ ಹಳಸಲು ಚಿತ್ರಾನ್ನದಲ್ಲೂ ಅನ್ನದ ಅಗುಳುಗಳು ಕಡಿಮೆಯಾಗುತ್ತಾ ಬಂದುˌ ಪದೆ ಪದೆ ಸೇರಿಸಲಾಗುತ್ತಿದ್ದ ಒಗ್ಗರಣೆಯ ಜಿಗುಟೆ ಅತಿಯಾಗಿ ಅದನ್ನ ತಿನ್ನಲು ವಾಕರಿಕೆ ಬರುತ್ತಿದ್ದ ಪ್ರೇಕ್ಷಕ ಬದಲಾವಣೆಗೆ ಒಳಗೊಳಗೆ ಕಾತರಿಸಲಾರಂಭಿಸಿದ್ದ.


ಆಂತಹ ವಿಷಮ ವಾತಾವರಣದಲ್ಲಿಯೂ ಸಿನೆಮಾವನ್ನ ಒಂದು ಮಟ್ಟಿಗೆ ಎತ್ತಿ ಹಿಡಿದು ತಥಾಥಿತ ನಿರೂಪಣೆಯಿದ್ದರೂ ಚಿತ್ರಕ್ಕೆ ಜೀವದಾನ ನೀಡುತ್ತಿದ್ದುದು ಅದರ ಸಂಗೀತ. ಚಿತ್ರದ ಬಿಡುಗಡೆಗೂ ಅರ್ಧ ವರ್ಷ ಮೊದಲೆ ಬಿಡುಗಡೆಯಾಗುತ್ತಿದ್ದ ಚಿತ್ರದ ಹಾಡುಗಳ ಕ್ಯಾಸೆಟ್ಟುಗಳಿಗೆ ಭಾರಿ ಬೇಡಿಕೆ ಇದ್ದ ಕಾಲ ಬೇರೆ. ಹೆಚ್ಎಂವಿˌ ಸಂಗೀತಾˌ ವೀನಸ್ˌ ಲಹರಿ ಹೀಗೆ ಹೊಸ ಹಳೆಯ ಕಂಪನಿಗಳ ಲೇಬಲ್ ಹೊತ್ತ ಕ್ಯಾಸೆಟ್ಟುಗಳನ್ನ ಎಲ್ಲಾ ಸಂಗೀತಪ್ರೇಮಿ ಯುವಕರಂತೆ ಇವನ ಮಾವನೂ ಗೋರಿ ಗೋರಿ ಗುಡ್ಡೆ ಹಾಕಿಕೊಂಡಿದ್ದ. ಈ ಮೂಲಕ ಹಾಡುಗಳನ್ನ ಕೇಳುವ ವ್ಯಸನ ಇವನಿಗೂ ಸಣ್ಣಂದಿನಿಂದಲೆ ಅಂಟಿಕೊಂಡಿತು. ಆದರೆ ಕೇಳುವ ಹಾಡುಗಳೆಲ್ಲವೂ ಇಷ್ಟವಾಗುತ್ತಿರಲಿಲ್ಲ. ಮಾಧುರ್ಯಕ್ಕೆ ಮಾರು ಹೋಗಿದ್ದ ಅವನನ್ನ ಆವರಿಸಿ ಬುಟ್ಟಿಗೆ ಹಾಕಿಕೊಳ್ಳಲು ಮದನ್ ಮೋಹನ ಸಾಬರ ಹಾಗೂ ಇಳಯರಾಜರ ಸಂಯೋಜನೆಯ ಹಾಡುಗಳಿಗೆ ಹೆಚ್ಚು ಕಷ್ಟವಾಗಲಿಲ್ಲ.

*****

ಅರಿವು ಅನ್ನುವ ಪ್ರಭೆ ಇವನ ಮಡ್ಡ ಮಂಡೆಯೊಳಗೂ ಮೂಡಿˌ ಮೇಲೆ ಕಾಣುತ್ತಿರುವಷ್ಟೇನೂ ಸರಳವಲ್ಲ ಈ ಪ್ರಪಂಚ ಅನ್ನುವ ವಾಸ್ತವದ ಬೋಧೆ ಆಗುವ ಹೊತ್ತಿಗೆ ಸಿನೆಮಾರಂಗದಲ್ಲಿ ಬೆಲ್ ಬಾಟಮ್ ಪ್ಯಾಂಟಿನ ಯುಗ ಮರೆಯಾಗಿ ಬ್ಯಾಗಿ ಪ್ಯಾಂಟಿನ ಅಬ್ಬರ ಆರಂಭವಾಗಿತ್ತು. ಹಳೆಯ ಹಳಸಲು ಮುಖದ ಮುದಿ ನಾಯಕ ನಾಯಕಿಯರ ಜಾಗಕ್ಕೆ ಎಳೆಯ ಕುಡಿ ಮೀಸೆಯ ತರುಣರು ಹಾಗೂ ಬಳುಕುವ ಬಳ್ಳಿಯಂತಹ ನವ ತರುಣಿಯರು ಆಗಮಿಸಿದ್ದರು. ಅಬ್ಬರದ ಡಿಸ್ಕೋ ಜಮಾನ ಕ್ರಮೇಣ ಮರೆಯಾಗಲಾರಂಭಿಸಿ ಬ್ರೇಕ್ ಡ್ಯಾನ್ಸ್ ಆ ಕಾಲದ ಯುವಕರ ಮೆಚ್ಚುಗೆ ಗಿಟ್ಟಿಸುವ ಕಾಲ ಕಣ್ತೆರೆದಿತ್ತು.

ಸಿನೆಮಾ ಸಂಗೀತವೂ ಸಹ ಕಾಲದ ಅಗತ್ಯಕ್ಕೆ ತಕ್ಕಂತೆ ಬದಲಾವಣೆಯಾಗ ತೊಡಗಿತು. ನವಯುಗದ ಸಂಯೋಜಕರ ಸ್ಪೂರ್ತಿ ಬದಲಾಗ ತೊಡಗಿತು.


( ಇನ್ನೂ ಇದೆ.)



https://youtu.be/xeoTaRQsls0

15 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೩.👊


"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೩.👊


"ಹೇ ರಾತ್ ಇಸ್ ವಕ್ತ್ ಆಂಚಲ್ ಮೈ ತೇರೇ
ಜಿತನೇ ಭೀ ಹೈಂ ಯಹಂ ಸಿತಾರೇಂ.
ಜೋ ದೇ ದೇ ತೋ ಮುಝಕೋ
ತೋ ಫಿರ್ ಮೈ ಲುಟಾದೂಂ
ಕಿಸೀಕೀ ನಜ಼ರ್ ಪೇ ಯಹಂ ಸಾರೇ./
ಕಹೋ ಕೇ ಯಹಂ ರಂಗೀನ್ ಸಪ್ನೇ ಸಜಾ ಕೇ ಮಿಠಾ ಥೋ ನಾ ದೋಗೇ?
ಅಗರ್ ಹಮ್ ಯಹಂ ಪೂಛೇಂ ಕೀ ದಿಲ್ ಮೈ 
ಬಸಾ ಕೇ ಭುಲಾ ಥೋ ನಾ ದೋಗೇ?!//"

ತಿಂಡಿ ತಿಂದು ಕೋಣೆಗೆ ಮರಳಿದವನ ಕಿವಿಗೆ ಮದನ್ ಮೋಹನ ಸಾಬ್ ಸೃಜಿಸಿದ್ದ ಮತ್ತೊಂದು ರತ್ನದಂತಹ ಸಂಯೋಜನೆಯೊಂದು ಮೆಲುವಾಗಿ ಬಿತ್ತು. ಮಹಮದ್ ರಫಿಯವರ ಮನಮೋಹಕ ಧ್ವನಿಗೆ ಮೋಡಿ ಬೆರೆಸುವಂತೆ ಆಶಾ ಭೋಂಸ್ಲೆ ಯುಗಳ ಸ್ವರದಲ್ಲಿ ಉಲಿಯುತ್ತಿದ್ದರು. ಅಲ್ಲಾˌ ಕವಿ ರಾಜೇಂದ್ರಕೃಷ್ಣರಿಗೆ ಆಗಿನ್ನೂ ಅಸ್ತಿತ್ವವೆ ಇದ್ದಿರದ ತನ್ನಂತ ಉತ್ಕಟ ಪ್ರೇಮಿಯ ಮನೋಭಿಲಾಶೆ ಹೇಗೆ ಹೊಳೆಯಿತು ಅಂತ ಅದೆಷ್ಟನೆಯದೋ ಸಲ ಅಚ್ಚರಿಗೊಂಡ.

ಶಾಸ್ತ್ರೀಯವಾಗೇನೂ ಸಂಗೀತ ಕಲಿತವನವನಲ್ಲ. ಸಣ್ಣಂದಿನಲ್ಲಿ ಮನೆಯಲ್ಲಿ ಭಕ್ತಿಗೀತೆಗಳನ್ನˌ ಅರೆ ಶಾಸ್ತ್ರೀಯ ಕೃತಿಗಳನ್ನ ಕ್ಯಾಸೆಟ್ಟುಗಳಲ್ಲಿ ಕೇಳಿ ಬರುತ್ತಿದ್ದಾಗ ಪದೆ ಪದೆ ಕೇಳುತ್ತಿದ್ದದ್ದೆಷ್ಟೋ ಅಷ್ಟೆ. ಅವರ ಮನೆಯಲ್ಲಿ ತಲೆಮಾರಿಗೆ ಒಬ್ಬರಿಗೆ ಈ ಸಂಗಾತಾಸಕ್ತಿಯ ಸೋಂಕು ಗಾಢವಾಗಿ ತಗಲುವುದಿದೆˌ ಅವನಜ್ಜ ಹಾಗೂ ಅವನ ಕಿರಿಯ ಮಾವನಿಗೆ ಚೂರುಪಾರು ಸಂಗೀತದ ಹುಚ್ಚಿದ್ದದ್ದು ಅನುವಂಶಿಕವಾಗಿ ಅವನಿಗೂ ಈಗದು ದಾಟಿಬಂದಂತಿತ್ತು ಅಷ್ಟೆ.

ಬೆಂಗಳೂರಿನಲ್ಲಿ ಅವರ ಸಹೋದರ ಮಾವ ಇಟ್ಟಿದ್ದ ಹೊಟೇಲಿನಲ್ಲಿ ಕೆಲಸವನ್ನೂ ಮಾಡಿಕೊಂಡು ಜೊತೆಜೊತೆಗೆ ಸಂಜೆ ಕಾಲೇಜಿನಲ್ಲಿ ಕಾನೂನು ವ್ಯಾಸಾಂಗವನ್ನೂ ಮಾಡಿಕೊಂಡಿದ್ದ ಅವನ ಸಹೋದರ ಮಾವ ಎಂಬತ್ತರ ದಶಕದ ಕೊನೆಗೆ ತನ್ನ ಸಂಬಳದ ದುಡ್ಡಿನಲ್ಲಿ ಅಜ್ಜನಿಗೊಂದು ಶಾರ್ಪ್ ಕಂಪನಿಯ ಎರಡು ಡೆಕ್ಕುಗಳಿರುವ ಕಡುಕಪ್ಪಿನ ಟೂ ಇನ್ ವನ್ ತಂದು ಕೊಟ್ಟಿದ್ಧ. ಅದೂವರೆಗೂ ಹೊರಗೆ ಬಲೆಬಲೆ ಆಂಟೆನಾ ನೇತು ಹಾಕಿ ಅದರಿಂದ ಸಿಗ್ನಲ್ ಪಡೆಯುತ್ತಿದ್ದ ದೊಡ್ಡ ಡೋಲಿನಂತಹ ರೇಡಿಯೋವನ್ನ ಮಾತ್ರ ಮನೆಯಲ್ಲಿ ಕಂಡು ಗೊತ್ತಿದ್ದ ಪ್ರಸಾದಪುರದಂತಹ ಪುಟ್ಟ ಊರಿನವನಾಗಿದ್ದ ಅವನಿಗೆ ಇದೆ ವಿಸ್ಮಯ. ಬಯಸಿದಾಗ ಧ್ವನಿ ಪೆಟ್ಟಿಗೆಗಳೆರಡನ್ನೂ ನಯವಾಗಿ ಸರಿಸಿ ರಿಕಾರ್ಡರಿನ ಮುಖ್ಯಭಾಗದಿಂದ ಬೇರ್ಪಡಿಸಬಹುದಾಗಿದ್ದ ಆ ಟೂ ಇನ್ ವನ್ ಅವನಂತಹ ಹಳ್ಳಿಮುಕ್ಕನ ಪಾಲಿಗೆ ಒಂದು ಪರಮಾಶ್ಚರ್ಯದ ಮಾಂತ್ರಿಕ ವಸ್ತುವೆ ಆಗಿತ್ತು. 


ಯಕ್ಷಗಾನವೆಂದರೆ ರಾತ್ರಿಯಿಡಿ ನಿದ್ದೆಗೆಟ್ಟು ನೋಡುವ ಚಪಲಚನ್ನಿಗರಾಯರಾಗಿದ್ದ ಅವರಜ್ಜನಿಗೆ ಈ ರೆಕಾರ್ಡರಿನ ಆಗಮನ ಮನೆಗಾದ ನಂತರ ಆಗಷ್ಟೆ ಸಂಪೂರ್ಣ ಯಕ್ಷಗಾನ ಕಥಾ ಪ್ರಸಂಗ ಕ್ಯಾಸೆಟ್ಟಿನಲ್ಲಿ ಲಭ್ಯವಾಗುತ್ತಿದ್ದುದು ಸೇರಿ ಎರಡೆರಡು ಬಂಪರ್ ಲಾಟರಿ ಒಂದೆ ಸಲ ಹೊಡೆದಂತಾಗಿ ಯಕ್ಷಗಾನದ ಕ್ಯಾಸೆಟ್ಟುಗಳನ್ನ ಖರೀದಿಸಿದ್ದೂ ಖರೀದಿಸಿದ್ದೆ. ಬಿಡುವಿನ ವೇಳೆಯಲ್ಲಿ ತಿರುಗಿಸಿ ಮುರುಗಿಸಿ ಕೇಳಿದ್ದೇ ಕೇಳಿದ್ದು. 


ಯಕ್ಷಗಾನದ ಹಿಂದೆ ಹಿಂದೆಯೆ ವೆಂಕಟೇಶ ಸುಪ್ರಭಾತ ಹಾಗೂ ಸ್ತೋತ್ರದ ಎಂ ಎಸ್ ಸುಬ್ಬಲಕ್ಷ್ಮಿ "ಮಹಾ ಗಣಪತಿಂ" ಸರಾಗವಾಗಿ ನುಡಿಸಿ ವಯಲಿನ್ನಿನಲ್ಲೆ ಮೋಡಿ ಹಾಕುತ್ತಿದ್ದ ಕುನ್ನೈಕುಡಿ ವೈದ್ಯನಾಥನ್ˌ ಗಂಡುವಾದ್ಯದಲ್ಲೆ ಅಗ್ರಗಣ್ಯವಾಗಿರುವ ಸಾಕ್ಸೋಫೋನಿನಲ್ಲಿ ಮೆಲುವಾಗಿ "ವಾತಾಪಿ ಗಣಪತಿಂ ಭಜೇಹಂ" ಮೂಡಿಸುತ್ತಿದ್ದ ಕದ್ರಿ ಗೋಪಾಲನಾಥ್ˌ ಯಾವುದೆ ದೇವರನಾಮವನ್ನಾದರೂ ಮನಮುಟ್ಟುವಂತೆ ಹಾಡುತ್ತಿದ್ದ ಮಂಗಳಂಪಲ್ಲಿ ಬಾಲಮುರಳಿಕೃಷ್ಣˌ ಅದ್ಯಾವುದೋ ಅವ್ಯಕ್ತ ರಾಗದಲ್ಲಿ ಹಾಡಿ ಮನಸನಾವರಿಸುತ್ತಿದ್ದ ಭೀಮಸೇನ ಜೋಷಿˌ ಪಂಡಿತ ಮಲ್ಲಿಕಾರ್ಜುನ ಮನ್ಸೂರˌ ಗಂಗೂಬಾಯಿ ಹಾನಗಲ್ಲˌ ಬಡೇ ಗುಲಾಂ ಅಲಿ ಖಾನ್ˌ ಜಲತರಂಗ ಹೊತ್ತ ಶಿವಕುಮಾರ ಶರ್ಮˌ ಸಿತಾರದ ಅವತಾರ ಪುರುಷ ರವಿಶಂಕರ್ˌ ಪುರಂದರದಾಸರ ಕೀರ್ತನೆಗಳ ಆಗಿನ್ನೂ ಸ್ವಾಮಿಗಳಾಗಿದ್ದ ವಿದ್ಯಾಭೂಷಣರುˌ ಕನಕದಾಸರ ಭಜನೆಗಳ ಡಾ ರಾಜಕುಮಾರ್ˌ ಆರ್ ಎನ್ ಜಯಗೋಪಾಲ - ವಿಜಯನಾರಸಿಂಹ - ಚಿ ಉದಯಶಂಕರರು ಕೊಲ್ಲೂರು ಧರ್ಮಸ್ಥಳ ಉಡುಪಿ ಶೃಂಗೇರಿ ಹೊರನಾಡು ಹಾಗೂ ತಿರುಪತಿಯ ದೇವಾನುದೇವತೆಗಳ ಮಹಿಮಾವಳಿಗಳನ್ನೆಲ್ಲಾ ಬಣ್ಣಿಸಿ ಬರೆದಿದ್ದ ಉಪೇಂದ್ರಕುಮಾರ್ ಎಂ ರಂಗರಾವ್ ಗೋಪಾಲಂ ವೈದ್ಯನಾಥನ್ ಹಾಗೂ ಇಳಯರಾಜಾ ರಾಗ ಸಂಯೋಜಿಸಿ; ಘಂಟಸಾಲಾˌ ಪಿ ಬಿ ಶ್ರೀನಿವಾಸರಿಂದ ಹಿಡಿದು ಎ ಎಂ ರಾಜಾˌ ಸೌಂದರರಾಜನ್ˌ ಎಸ್ ಪಿ ಬಾಲಸುಬ್ರಮಣ್ಯಂˌ ಎಸ್ ಜಾನಕಿˌ ಪಿ ಲೀಲಾˌ ಪಿ ಸುಶೀಲಾˌ ಬಿ ಕೆ ಸುಮಿತ್ರಾˌ ಬೆಂಗಳೂರು ಲತಾˌ ಶೈಲಜಾˌ ಕಸ್ತೂರಿ ಶಂಕರ್ˌ ವಾಣಿ ಜಯರಾಂˌ ಬಿ ಆರ್ ಛಾಯಾˌ ಮನುˌ ಕೆ ಜೆ ಏಸುದಾಸ್ˌ ರಾಜಕುಮಾರ ಭಾರತಿˌ ಜಯಚಂದ್ರನ್ˌ ಡಾ ರಾಜಕುಮಾರ್ ಹೀಗೆ ಥರೇವಾರಿ ಕಂಠಗಳು ಮಧುರಾತಿ ಮಧುರವಾಗಿ ತನ್ಮಯತೆಯಿಂದ ಉಲಿದ ಭಕ್ತಿಗೀತೆಗಳ ಕ್ಯಾಸೆಟ್ಟುಗಳ ಮುಖಾಂತರ ಒಬ್ಬೊಬ್ಬರಾಗಿ ಪುಂಖಾನುಪುಂಖವಾಗಿ ಬಂದು ಅವರ ಮನೆಯ ಕಬೋರ್ಡು ತುಂಬ ತೊಡಗಿದರು.

ಇಷ್ಟೆ ಸಾಲದು ಅನ್ನುವಂತೆ "ಮುದುಕನ ಮದುವೆ" "ಪೊಲೀಸನ ಮಗಳು" ತರಹದ ಕೆಲವು ಅರೆಪೋಲಿ ಉತ್ತರ ಕರ್ನಾಟಕದ ಶೈಲಿಯ ನಾಟಕಗಳ ಧ್ವನಿ ಸುರುಳಿಗಳೂ ಅವರನ್ನ ಸೆಳೆದುˌ ಅದಕ್ಕೂ ಮಿಗಿಲಾಗಿ ಗುರುರಾಜ ಹೊಸಕೋಟಿಯ "ಮಗಾ ಹುಟ್ಯನವ್ವ" ತರದ ವ್ಯಂಗ್ಯಶೈಲಿಯ ಗೀತೆಗಳಿಂದಲೂ ಆಕರ್ಷಿತರಾಗಿ ಅವರ ಕ್ಯಾಸೆಟ್ಚುಗಳ ಆಸ್ತಿ ದಿನದಿಂದ ದಿನಕ್ಕೆ ಹೆಚ್ಚುತ್ತಲೆ ಹೋದವು.

ಅತ್ತ ಅವನಜ್ಜನ ಕ್ಯಾಸೆಟ್ ರಾಶಿ ಏರುತ್ತಿದ್ದಂತೆ ತನ್ನ ವಯಸ್ಸಿಗೆ ತಕ್ಕಂತೆ ಆ ಕಾಲದ ಚಾಲ್ತಿಯ ಉತ್ತುಂಗದಲ್ಲಿದ್ದˌ ಒಂದರ್ಥದಲ್ಲಿ ಆ ಕಾಲದ ಎ ಆರ್ ರಹಮಾನ್ ಆಗಿದ್ದ ಬಪ್ಪಿಲಾಹಿರಿಯ ಹಿಪ್ಪಿ ಭಕ್ತನಾಗಿದ್ದ ಡಬಲ್ ಪಾಕೆಟ್ ಬೆಡ್ ಶೀಟು ಬಟ್ಟೆಯ ಶರ್ಟು ಹಾಗೂ ಎಲಿಫೆಂಟ್ ಲೆಗ್ ಬೆಲ್ ಬಾಟಂ ಪ್ಯಾಂಟಿನಲ್ಲಿ ಕಂಗೊಳಿಸುತ್ತಿದ್ದ ಇವನ ಅದೆ ಟೇಪ್ ರೆಕಾರ್ಡರ್ ತಂದಿದ್ದ ಮಾವ ತನ್ನ ಆರಾಧ್ಯ ದೈವಗಳಾಗಿದ್ದ ಬಪ್ಪಿ ದಾˌ ಆರ್ ಡಿ ಬರ್ಮನ್ˌ ಲಕ್ಷ್ಮಿಕಾಂತ - ಪ್ಯಾರೇಲಾಲ್ˌ ವಿಜು ಶಾˌ ಕಲ್ಯಾಣಜೀ - ಆನಂದಜೀಯವರ ಸ್ವರ ಸಂಯೋಜನೆಯ ಸಿನೆಮಾ ಧ್ವನಿ ಸುರುಳಿಗಳನ್ನೂˌ "ಹವಾ ಹವಾ ಏ ಹವಾ"ದ ಹಸನ್ ಜಂಗಿˌ "ರಂಭ ಹೋ ಹೋ"ದ ಉಷಾ ಉತ್ತುಪ್ˌ "ಬೂಂ ಬೂಂ"ನ ನಾಝಿ಼ಯಾ ಹಸನ್ˌ ವಿಜಯ ಬೆನಡಿಕ್ಟ್ˌ ಆಲಿಷಾ ಚಿನಾಯ್ˌ ಬಿಡ್ಡುˌ ಶರೋನ್ ಪ್ರಭಾಕರ್ ಹೀಗೆ ತನ್ನ ಪಡ್ಡೆ ವಯಸ್ಸಿಗೆ ಅತ್ಯಾಕರ್ಷಕ ಅನಿಸಿದವರನ್ನೆಲ್ಲ ಕಾಸು ಕೊಟ್ಟು ಕ್ಯಾಸೆಟ್ಟು ಖರೀದಿಸಿ ಮನೆ ಮನ ತುಂಬಿಸಿಕೊಂಡ.


ಅಪ್ಪ ಮತ್ತು ಅಣ್ಣನ ಹವ್ಯಾಸ ಕಂಡು ಇವನ ಚಿಕ್ಕಮ್ಮಂದಿರು ಈ ವಿಷಯದಲ್ಲಿ ಹಿಂದುಳಿಯಲುಂಟೆ? ಬೆಳಗಿನ ಧಾರವಾಡ ಕೇಂದ್ರದ ಚಿತ್ರಗೀತೆಗಳ ನಂತರ ಬೆಳಗಿನ ಎಂಟೂಕಾಲರಿಂದ ಒಂಬತ್ತರತನಕ ದಿನನಿತ್ಯ ಮುಂಬೈ ವಿವಿಧ ಭಾರತಿಯಿಂದ ಪ್ರಸಾರವಾಗುತ್ತಿದ್ದ ನೂತನ ಚಿತ್ರಗೀತೆಗಳನ್ನ ಕೇಳುವ ಗೀಳಿಗೆ ಬಿದ್ದ ಅವರುˌ ಅದಾಗಲಷ್ಟೆ ಚಲನಚಿತ್ರ ಧ್ವನಿವಾಹಿನಿಗಳೂ ಕ್ಯಾಸೆಟ್ಟು ರೂಪದಲ್ಲಿ ದೊರೆಯುತ್ತಿದ್ದು ಅದನ್ನ ದಂಡಿಯಾಗಿ ತಂದು ಕೂಡಿಟ್ಟು ತಮ್ಮ ತಮ್ಮ ಕ್ಯಾಸೆಟ್ ಆಸ್ತಿಯನ್ನೂ ಆಗಾಗ ಇಮ್ಮಡಿಸಿಕೊಳ್ಳತೊಡಗಿದರು. ಅಜ್ಜಿಗಂತೂ ಹೊಲಿಗೆ ಯಂತ್ರ ಮೆಟ್ಟುತ್ತಾ ಮಧ್ಯಾಹ್ನದ ಊಟದ ಹೊತ್ತಲ್ಲಿ ಸಿಲೋನು ಕೇಂದ್ರದೆಡೆ ತಿರುಗಿಸಿˌ ಸಂಜೆ ಕಾಫಿಯ ಹೊತ್ತಲ್ಲಿ ಭದ್ರಾವತಿಯತ್ತ ತಿರುಗಿಸಿ ಹಾಡುಗಳನ್ನಾಲಿಸುವ ಖಯಾಲಿ ಇತ್ತು. ಆಗೀಗ ಇವುಗಳ ಮಧ್ಯೆ ವಿವಿಧ ಕನ್ನಡದ ಗಾಯಕರು ಹಾಡಿದ್ದ ಕವಿಗಳ ಕಾವ್ಯದ ಭಾವಗೀತೆಗಳ ಹಾಗೂ ಜನಪದ ಗೀತೆಗಳ ಕ್ಯಾಸೆಟ್ಟುಗಳೂ ಸೇರಿ ಒಂಥರಾ ಸಂಗೀತದ ಮಿಸಳುಬಾಜಿಯ ಆಸ್ವಾದಿಸುತ್ತಲೆ ಮಧ್ಯೆ ಬೆಳೆದಿದ್ದ ಅವನಿಗೆ ಮೊದಲಿಗೆ ಮನಸಿಗಾಪ್ತವಾಗಿದ್ದೆ ಮದನ ಮೋಹನ ಹಾಗೂ ಇಳಯರಾಜಾ ಸಂಯೋಜನೆಯ ಗೀತೆಗಳು. ಅವರ ಹೆಸರು ಕೇಳರಿಯದ ಕಾಲದಿಂದಲೂ ಅವನವರ ಭಕ್ತೋತ್ತಮ. ಇವತ್ತಿಗೂ ಸಹ ಇದು ಒಂಚೂರು ಬದಲಾಗಿಲ್ಲ. ಹೀಗೆ ಸಂಗೀತ ಪ್ರೀತಿ ಅವನಿಗೆ ಅನುವಂಶಿಕ.

( ಇನ್ನೂ ಇದೆ.)


https://youtu.be/blZBUpgiN_0

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೨.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೨.👊


ಎಲ್ಲರೂ ಅರ್ಥೈಸುವಂತೆ ಭಾರತಕ್ಕೆ ವಿದೇಶಿ ವ್ಯಾಪಾರಿ ವರ್ಗದ ಆಗಮನ ವಸಾಹಾತುಶಾಹಿ ಕಾಲದಿಂದಷ್ಟೆ ಆರಂಭವಾದದ್ದೇನಲ್ಲ. ಅದಕ್ಕೂ ಬಹಳ ಹಿಂದಿನಿಂದಲೆ ಕೇರಳ - ಸೌರಾಷ್ಟ್ರ - ಗೋಮಾಂತಕ - ತುಳುನಾಡು - ಪಾಂಡ್ಯರಾಜ್ಯ ವಿಫುಲ ವ್ಯಾಪಾರಿ ಸಂಬಂಧಗಳನ್ನ ವಿದೇಶಿ ವ್ಯಾಪಾರಿಗಳೊಡನೆ ಹಾಗೂ ಅವರ ದಳ್ಳಾಳಿಗಳೊಡನೆ ಹೊಂದಿತ್ತು. ಇದು ಇಸ್ಲಾಂ ಅನ್ನುವ ಧರ್ಮ ಹುಟ್ಟುವ ಮುಂಚಿನಿಂದಲೂˌ ಅಷ್ಟೆ ಏಕೆ? ಕ್ರೈಸ್ತ ಧರ್ಮ ಆರಂಭವಾಗಿ ಸಂಪೂರ್ಣ ಯುರೋಪನ್ನ ರೋಮನ್ ಸಾಮ್ರಾಜ್ಯದ ರಾಜಧರ್ಮವಾದ ನಂತರ ಇಂದಿನ ಇಟಲಿಯಿಂದ ಆರಂಭಿಸಿ ಸಂಪೂರ್ಣ ಯುರೋಪನ್ನೆ ಅದು ತನ್ನ ತೆಕ್ಕೆಗೆ ತೆಗೆದುಕೊಳ್ಳುವುದಕ್ಕಿಂತಲೂ ಮೊದಲೆ ಆಗಿತ್ತು. 

ಕೇವಲ ಆಗಿನ ವ್ಯವಸ್ಥೆಯಲ್ಲಿ ಧಾರ್ಮಿಕ ದೃಷ್ಟಿಕೋನವಿಟ್ಟುಕೊಂಡು ನೋಡುವುದಾದರೆ ಬಹುತೇಕ ಕ್ಯಾಪ್ಟಿಕ್ ಕ್ರೈಸ್ತರೋˌ ಮೂರ್ತಿ ಪೂಜಕ ಬುಡಕಟ್ಟಿನವರೋ ಅಥವಾ ಯಹೂದ್ಯರೋ ಆಗಿದ್ದ ಇಂದಿನ ಇಸ್ಲಾಮಿಕ್ ಮಧ್ಯಪ್ರಾಚ್ಯದ ಅರಬಿಯನ್ ದಳ್ಳಾಳಿಗಳು ಇಲ್ಲಿಂದ ಸರಕು ಸರಂಜಾಮುಗಳನ್ನ ಖರೀದಿಸಿ ಕೊಂಡು ಹೋಗಿ ಅಂದು ಕಾನ್ಸ್ಟೆಂಟಿನೋಪೋಲ್ ಎಂದೆ ಬೆಜಂಟೈನ್ ಗ್ರೀಕ್ ಹಾಗೂ ರೋಮನ್ನರಿಂದ ಕರೆಯಲ್ಪಡುತ್ತಿದ್ದ ಇಂದಿನ ಇಸ್ತಾಂಬುಲ್ಲಿನಲ್ಲಿ ಮುಂದಿನ ಗ್ರಾಹಕರಿಗೆ ಅದನ್ನ ಮುಟ್ಟಿಸುವ ಕಕೇಶಿಯನ್ ಯುರೋಪಿಯನ್ ವ್ಯಾಪಾರಿಗಳಿಗೆ ಅದನ್ನ ವಿಕ್ರಯಿಸುತ್ತಿದ್ದರು. ಯಾವುದೆ ಉತ್ಖನನಗಳು ಅವನ ಅಸ್ತಿತ್ವವನ್ನು ಸಾಬೀತು ಪಡಿಸಿರದಿದ್ದರೂˌ ಮುಸಲ್ಮಾನರು ಇದ್ದಾನೆಂದೆ ಶ್ರದ್ಧೆಯಿಟ್ಟು ನಂಬುವ ಸ್ವತಃ ಇಸ್ಲಾಮಿನ ಸ್ವಘೋಷಿತ ಪ್ರವಾದಿ ಮಹಮದ್ ಹುಟ್ಟು ಯಹೂದ್ಯ ಹಾಗೂ ಮೂರ್ತಿಪೂಜಕ ಬುಡಕಟ್ಟು ಆಚರಣೆ ಎರಡೂ ಅನುಸರಿಸುತ್ತಿದ್ದ ಹಾಶಿಂ ಕುಲದ ಖುರೈಷಿ ಬುಡಕಟ್ಟಿನಲ್ಲಿ ಜನಿಸಿದ್ದ. ಅವನನ್ನ ಮೆಚ್ಚಿ ಮದುವೆಯಾಗಿದ್ದ ಪ್ರಭಾವಿ ವ್ಯಾಪಾರಿ ಮಹಿಳೆ ಖದೀಜಾ ಕ್ಯಾಪ್ಟ್ ಕ್ರೈಸ್ತಧರ್ಮೀಯಳಾಗಿದ್ದಳು. ಸುಮಾರು ಶತಮಾನಗಳವರೆಗೆ ಈ ವ್ಯಾಪಾರಿ ವ್ಯವಸ್ಥೆ ನಿರಾತಂಕವಾಗಿ ನಡೆದಿತ್ತು.

ಆದರೆˌ ಅರಬ್ಬರ ಹಾಗೂ ಯುರೋಪಿಯನ್ನರ ಮಧ್ಯೆ ಲಾಭಾಂಶಕ್ಕಾಗಿ ಎದ್ದ ತಕರಾರು ಅನಂತರ ವಿಕೋಪಕ್ಕೆ ಹೋಗಿ ನಾನ? ನೀನ? ಅನ್ನುವ ಮೇಲಾಟ ಮೊದಲಾಗಿˌ ಅದಕ್ಕೆ ಅವಾಗಷ್ಟೆ ಹುಟ್ಟಿ ಬಲಿಯಲಾರಂಭಿಸಿದ್ದ ಇಸ್ಲಾಂ ಧರ್ಮದ ಜೊತೆಗೆ ಕ್ರೈಸ್ತರ ತಿಕ್ಕಾಟ ಧರ್ಮಯುದ್ಧದ ರೂಪದಲ್ಲೂ ಹಿಂಸಾತ್ಮಕವಾಗಿ ಆರಂಭವಾದ ಕಾಲಘಟ್ಟದಲ್ಲಿ ಮೊದಲಿನ ವ್ಯಾಪಾರಿ ಸಮೀಕರಣಗಳೆಲ್ಲ ಏಕಾಏಕಿ ಬದಲಾದವು. ಅರಬ್ಬರು ನೇರ ಮಾರ್ಗವಾಗಿ ಬಿಳಿಯರು ಸಾಂಪ್ರದಾಯಿಕ ಭೂಮಾರ್ಗವನ್ನ ಬಳಸಿಯೆ ಭಾರತಕ್ಕೆ ಹೋಗಿ ವ್ಯಾಪಾರ ಮಾಡದಂತೆ ತಡೆದ ಕಾರಣ ಬಿಳಿಯ ಕ್ರೈಸ್ತರು ಭಾರತಕ್ಕೆ ನೆಲಮಾರ್ಗದಿಂದಲ್ಲದಿದ್ದರೆ ಜಲಮಾರ್ಗವನ್ನ ಅನ್ವೇಷಿಸಿಯಾದರೂ ಸರಿ ಮಧ್ಯವರ್ತಿಗಳ ಹಂಗಿಲ್ಲದೆ ನೇರ ವ್ಯಾಪಾರ ನಡೆಸುವ ಪಣ ತೊಟ್ಟರು. ಈ ಮೂಲಕ ಭಾರತದ ಇತಿಹಾಸ ಶಾಶ್ವತವಾಗಿ ಬದಲಾಗುತ್ತಾ ಹೋಯಿತು. ಇದರಲ್ಲಿ ಕೇರಳ ಸಹ ಪ್ರಮುಖ ಪಾತ್ರವನ್ನ ವಹಿಸಿತು.

ಇಂದು ಕೊಡಂಗಲ್ಲೂರು ಎಂದು ಕರೆಯಲಾಗುವ ತೃಶೂರು ಜಿಲ್ಲೆಯಲ್ಲಿರುವ ತೀರ ಪ್ರದೇಶದಲ್ಲಿರುವ ಅಂದಿನ ಚೇರ ಸಾಮ್ರಾಜ್ಯದ ರಾಜಧಾನಿಯಾಗಿದ್ದ "ಮಚ್ಚೇರಿ ಪಟ್ಟಣ"ದ ರೇವಿನಲ್ಲಿ ವಿವಿಧ ದೇಶಗಳ ವ್ಯಾಪಾರಿ ಹಡಗುಗಳು ಇಸ್ಲಾಮಿಕ್ ಪೂರ್ವ ಕಾಲದ ವಿದೇಶಿ ವಾಣಿಜ್ಯ ವ್ಯವಹಾರ ಉಛ್ರಾಯದಲ್ಲಿದ್ದ ಕಾಲದಲ್ಲಿ ಲಂಗರು ಹಾಕುತ್ತಿದ್ದವು. ಇಲ್ಲಿಗೆ ಅಪರೂಪವಾದ ಚೀನಾದ ರೇಷಿಮೆˌ ಮದ್ಯˌ ಅಫೀಮುˌ ಕುದುರೆˌ ಕತ್ತೆˌ ಹೊಗೆಸೊಪ್ಪುˌ ಒಣಹಣ್ಣುಗಳನ್ನ ಇಲ್ಲಿಗೂˌ ಸಾಂಬಾರˌ ಮೋಪುˌ ದಂತˌ ಹತ್ತಿಬಟ್ಟೆಗಳುˌ ಖಾದ್ಯತೈಲˌ ರತ್ನˌ ಬಂಗಾರˌ ಬೆಳ್ಳಿˌ ಕೆತ್ತಿದ ವಜ್ರˌ ತಾಮ್ರˌ ಕಬ್ಬಿಣ ಸಹಿತ ಹಲವು ಲೋಹದ ಸಲಕರಣೆಗಳು ಹಾಗೂ ಅಕ್ಕಿಗಳನ್ನ ಮಧ್ಯವರ್ತಿ ಅರಬರು ಇಲ್ಲಿಂದಲ್ಲಿಗೂ ಸಾಗಿಸಿ ಅಪಾರ ಲಾಭಾಂಶವನ್ನ ಕೊಳ್ಳೆ ಹೊಡೆಯುತ್ತಿದ್ದರು. 

*****

ತುಂಬಿದ ಹಡಗೊಂದು ಇಲ್ಲಿಂದ ಯುರೋಪಿಗೆ ಹೊರಟರೆ ಮಧ್ಯದ ಜಲ ಹಾಗೂ ನೆಲಮಾರ್ಗದ ಸುಂಕದ ಕಟ್ಟೆಗಳಲ್ಲೆಲ್ಲಾ ಕೇವಲ ಸರಕುಗಳಲ್ಲೊಂದಾಗಿದ್ದ ಕಾಳುಮೆಣಸನ್ನೆ ಅಷ್ಟಿಷ್ಟು ಪ್ರಮಾಣದಲ್ಲಿ ಕರವಾಗಿ ಪಾವತಿಸಿ ಮುಂದುವರೆದರೂ ಅಂತಿಮವಾಗಿ ಯುರೋಪಿನ ಮಾರುಕಟ್ಟೆ ತಲುಪಿ ಅಲ್ಲಿನ ಗ್ರಾಹಕರಿಗೆ ಅಳಿದುಳಿದ ಕಾಳುಮೆಣಸಿನ ದಾಸ್ತಾನನ್ನ ಮಾರಿದರೂ ಸಾಕುˌ ಇಲ್ಲಿಂದ ಅಲ್ಲಿ ಹೋಗುವಾಗ ಹತ್ತಾರು ಪಟ್ಟು ಹೆಚ್ಚಿಗೆ ಆಗಿರುತ್ತಿದ್ದ ಅದೊಂದರ ಮೌಲ್ಯದಿಂದಲೆ ಸಕಲ ಸುಂಕದಕಟ್ಟೆಗಳಲ್ಲಾದ ನಷ್ಟವೂ ಕಳೆದು ಲಾಭದ ಹೊಳೆ ಹರಿದು ಬರತ್ತಿದ್ದ ಕಾಲ ಅದಾಗಿದ್ದರಿಂದ ಸಹಜವಾಗಿ ಭಾರತದ ಈ ದಕ್ಷಿಣ ಭಾಗದ ಕಡಲ ತೀರ ವಿದೇಶಿ ವ್ಯಾಪಾರಿಗಳ ನೆಚ್ಚಿನ ಮಾರುಕಟ್ಟೆಗಳಲ್ಲಿ ಒಂದಾಗಿತ್ತು.


ಹೀಗಾಗಿ ಕೇರಳಕ್ಕೆ ವಿದೇಶಿಯರಾಗಲಿˌ ವಿದೇಶಿಯರಿಗೆ ಕೇರಳವಾಗಲಿ ಯಾವತ್ತಿಗೂ ಪರಸ್ಪರ ಅಪರಿಚಿತವಾಗಿರಲೆ ಇಲ್ಲ. ಅದರ ಪರಿಣಾಮವಾಗಿಯೆ ಯಹೂದ್ಯವಾಗಿರಲಿˌ ಬಹಾಯಿಯಾಗಿರಲಿˌ ಜೊರಾಸ್ಟ್ರಯನ್ ಆಗಿರಲಿˌ ಕ್ರೈಸ್ತವಾಗಿರಲಿ ಇಲ್ಲಾ ಇಸ್ಲಾಮೆ ಆಗಿರಲಿ ಮಧ್ಯಪ್ರಾಚ್ಯದಲ್ಲಿ ಆರಂಭವಾದ ಪ್ರತಿಯೊಂದು ಹೊಸ ಧರ್ಮಗಳ ಮೊತ್ತಮೊದಲ ಮತಾಂತರಿತ ಭಾರತೀಯ ಮಲಯಾಳಿಯೆ ಆಗಿರೋದು ಹಾಗೂ ಅವೆಲ್ಲ ಧರ್ಮದ ಪ್ರಪ್ರಥಮ ಭಾರತೀಯ ನೆಲದಲ್ಲಿ ಆರಂಭವಾದ ಆರಾಧನಾಲಯಗಳು ಕೇರಳದಲ್ಲೆ ಕಣ್ತೆರೆದಿರುವದು ಕೇವಲ ಆಕಸ್ಮಿಕದಿಂದ ಘಟಿಸಿದ ವಿದ್ಯಮಾನವೇನಲ್ಲ. 


ವ್ಯಾಪಾರದ ನಿಮಿತ್ತ ಬಹುಕಾಲ ಭಾರತದಲ್ಲೆ ನೆಲೆಸಬೇಕಾದ ಅನಿವಾರ್ಯತೆ ಇದ್ದ ಅರಬ್ಬರು ಮೊದಮೊದಲು ತಮ್ಮ ತಮ್ಮ ವಯಕ್ತಿಕ ಧಾರ್ಮಿಕ ಅಗತ್ಯಗಳನ್ನ ತಮ್ಮ ತಮ್ಮ ಬಿಡಾರಗಳಲ್ಲೆ ಪೂರೈಸಿಕೊಳ್ಳುತ್ತಿದ್ದರೇನೋ. ಆದರೆ ಬರುಬರುತ್ತಾ ಅಂತಹ ವ್ಯವಹಾರಸ್ಥರ ಭೇಟಿ ಅಧಿಕವಾದಂತೆ - ತಮ್ಮ ಲೈಂಗಿಕ ಅಗತ್ಯಗಳ ಪೂರೈಕೆಗಾಗಿ ಸ್ಥಳಿಯ ಅದರಲ್ಲೂ ಮುಖ್ಯವಾಗಿ ಕೆಳ ಜಾತಿಯ ಹೆಣ್ಣುಗಳನ್ನ ತಮ್ಮ ತತ್ಕಾಲಿಕ ಉಪ ಸಂಸಾರವನ್ನಾಗಿ ಅವರು ಕಟ್ಟಿಕೊಳ್ಳಲು ಆರಂಭಿಸಿದ ಅನಂತರದ ಕಾಲದಲ್ಲಿ ಅವರಿಗೂ ಸ್ಥಳಿಯ ಮಹಿಳೆಯರಿಗೂ ಹುಟ್ಟಿದ ಸಂತಾನಗಳು ತಂದೆಯ ಧರ್ಮದಲ್ಲೆ ಮುಂದುವರೆದು ಆ ಭಾರತಕ್ಕೆ ಪರಧರ್ಮವನಿಸಿದ್ದ ಧಾರ್ಮಿಕ ಅಸ್ಥೆಯನ್ನ ಅವರು ಒಪ್ಪಿಕೊಂಡಾಗ ಅವರಿಗೂ ಸ್ಥಳಿಯವಾಗಿ ತಮ್ಮ ಆರಾಧನಾಲಯಗಳನ್ನ ಕಟ್ಟಿಕೊಳ್ಳುವುದು ಅನಿವಾರ್ಯವಾಯಿತು. ಇದಕ್ಕೆ ಪೂರಕವಾಗಿ ಕಳೆದ ಶತಮಾನದ ಎರಡನೆ ದಶಕದ ಅಂತ್ಯದಲ್ಲಾಗಿದ್ದ ಮಾಪಿಳ್ಳಾ ದಂಗೆ ಅನ್ನುವ ಬರ್ಬರತೆಯೂ ತನ್ನ ಪಾಲಿನ ಕಾಣಿಕೆ ನೀಡಿˌ ಇದ್ದಕ್ಕಿದ್ದಂತೆ ಮಲಬಾರಿನ ಧಾರ್ಮಿಕ ಜನಸಂಖ್ಯೆಯ ಸಮೀಕರಣವೆ ಬದಲಾದಾಗ ಇನ್ನಷ್ಟು ಮಸೀದಿˌ ಚರ್ಚು ಹಾಗೂ ಸಿನಿಗಾಗುಗಳು ಕೇರಳದಾದ್ಯಂತ ಕಣ್ತೆರೆದವು. 


ಅನಂತರ ಸುಮಾರು ಐನೂರಾ ಇಪ್ಪತ್ತೈದು ವರ್ಷಗಳ ಹಿಂದೆ ಪೋರ್ತುಗೀಜ಼ ವಾಸ್ಕೋ-ಡ-ಗಾಮ ಮಲಬಾರು  ತೀರದ ಕೊಯಿಲಾಂಡಿಯಲ್ಲಿರುವ ಕಪ್ಪಡ ಕಡಲ ತೀರಕ್ಕೆ ೧೪೯೮ರಲ್ಲಿ ಬಂದಿಳಿದದ್ದು. ನಾಯರ್ ಆಳ್ವಿಕೆಯಲ್ಲಿದ್ದ ಸ್ಥಳಿಯ ಜ಼ಮೋರಿನ್ ರಾಜವಂಶದ ಜೊತೆ ವ್ಯಾಪಾರಿ ಹಿತಾಸಕ್ತಿ ಸಾಧಿಸಿ ಅವರನ್ನ ಸಾಮೂದರಿಗಳೆಂದು ಕರೆದದ್ದುˌ ಅನಂತರ ಅವರಿಗೇನೆ ವ್ಯವಹಾರದಲ್ಲಿ ತಿರುಮಂತ್ರ ಹಾಕಿದ್ದು. ಪೋರ್ತುಗೀಜ಼ರ ಹೆಜ್ಜೆಗುರುತನ್ನ ಅನುಸರಿಸಿ ಮೊದಲಿಗೆ ಡಚ್ಚರು ಬಂದು ತಿರುವನಂತಪುರದ ವರ್ಮನ್ಗಳ ಜೊತೆ ಆರಂಭವಾದ ಅವರ ವ್ಯವಹಾರವೂ ಕೊನೆಗೆ ಇಂತಹ ಕಚ್ಚಾಟದಲ್ಲೆ ಕೊನೆಯಾದದ್ದು. ಇವರನ್ನ ಅನುಸರಿಸಿಕೊಂಡೆ ಬಂದಿದ್ದ ಫ್ರಂಚರು ಮಲಬಾರಿನ ಮಾಹೆಯಲ್ಲಿ ಶಾಶ್ವತ ಠಿಕಾಣಿ ಹೂಡಿದ್ದುˌ ಅವರ ನಂತರ ಒಕ್ಕರಿಸಿದ ಬ್ರಿಟಿಷರು ಇಡಿ ಭಾರತವನ್ನೆ ನುಂಗಿ ನೊಣೆದು ಅಪೋಷನ ತೆಗೆದುಕೊಂಡಿದ್ದು ಇವೆಲ್ಲಾ ಇಂದು ನಮಗೆಲ್ಲರಿಗೂ ಅರಿವಿರುವ ಅಳಿಸಿ ಬದಲಿಸಲಾಗದ ಇತಿಹಾಸ.


ಕಾಲಾಂತರದಲ್ಲಿ ಆಗಿರುವ ಈ ಎಲ್ಲಾ ಬದಲಾವಣೆಗಳಿಂದ ಕೇರಳದ ಅದೃಷ್ಟವೂ ಬದಲಾಗಿದೆ.


( ಇನ್ನೂ ಇದೆ.)



https://youtu.be/zNdphmQo1CQ

13 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೧.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೧.👊



"ಪಾಸ್ ಆಈಏ ಕೇ ಹಮ್ ನಹೀಂ ಆಏಂಗೇ ಬಾರ್ ಬಾರ್ˌ
ಬಾಹೇಂ ಗಲೇಂ ಮೈ ಡಾಲ್ ಕೇ
ಹಮ್ ರೋಲೇಂ ಜಾ಼ರ್ ಜಾ಼ರ್./
ಆಂಖೋಂ ಸೇ ಫಿರ್ ಯಹಂ ಪ್ಯಾರ್ ಕೀ ಬರಸಾತ್ ಹೋ ನಾ ಹೋˌ
ಶಾಯದ್ ಫಿರ್ ಇಸ್ ಜನಂ ಮೈ
ಮುಲಾಕಾತ್ ಹೋ ನಾ ಹೋ.//"

ಇನ್ನೇನು ಬೆಳಕು ಹರಿಯಲು ಬಾಕಿಯಿದ್ದದ್ದು ಒಂದೆರಡು ಘಳಿಗೆಯಷ್ಟೆ. ಕೋಲ ನೋಡಿ ಮುಗಿಸಿ ಅರೆನಿದ್ರೆಯಲ್ಲಿ ಹೆಜ್ಜೆ ಹಾಕುತ್ತಿದ್ದ ಹುಡುಗನನ್ನು ಅವನ ಮನೆಗೆ ಮುಟ್ಟಿಸಿˌ ಮತ್ತಷ್ಟೆ ದೂರದ ಮರು ಹಾದಿಯನ್ನ ಅನಿವಾರ್ಯವಾಗಿ ಸವೆಸಿ ಕೋಣೆಗೆ ಮರಳಿದವನಿಗೆ ಅಷ್ಟು ದೂರ ನಡೆದದ್ದಕ್ಕೋ ಏನೋ ಈ ನಸು ಚಳಿಯ ವಾತಾವರಣದಲ್ಲೂ ತಾನು ತುಸು ಬೆವರಿರುವುದು ಅರಿವಾಯಿತು. ಮೈ ಅಂಟಂಟಾಗಿದೆ ಅನ್ನಿಸಿ ಅರೆಬೆಚ್ಚಗೆ ಗೀಸರಿನಾಚೆ ಚಿಮ್ಮಿದ ನೀರಲ್ಲಿ ಹಿತವೆನಿಸುವಷ್ಟು ಮಿಂದ. ಮೊಬೈಲಿನಿಂದ ಆಲಿಂಡಿಯಾ ರೇಡಿಯೋದ ಯಾವುದೋ ಕೇಂದ್ರವೊಂದು ಆ ಹೊತ್ತಿನಲ್ಲೂ "ಲಗ್ ಜಾ ಗಲೇ" ಉಲಿಯುತ್ತಿತ್ತು. ಕೇಳುತ್ತಿದ್ದಂತೆ ಮನಸಿಗೆ ಅನಿರೀಕ್ಷಿತ ಮುದದ ಗಾಳಿ ಸೋಕಿದಂತಾಗಿ ತಾನೂ ಸಹ ಜೊತೆಜೊತೆಗೆ ಗುನುಗಿಕೊಳ್ಳ ತೊಡಗಿದ.

ಬಹಳ ದಿನಗಳ ನಂತರ ಭಾವಗಳ ದಭದಭೆ ಮನಸಿನೊಳಗಿಂದ ಧುಮುಕಲಾರಂಭಿಸಿ ಅವಕ್ಕೆಲ್ಲಾ ಅಕ್ಷರಗಳ ಅಂಗಿ ತೊಡಿಸಿ ಉಕ್ಕುತ್ತಿರುವ ಮನೋಲಹರಿಯನ್ನ ಬರೆದಿಡಲು ಕೂತ. ಈ ಹೊತ್ತಲ್ಲಿ ಪ್ರಪಂಚದ ಆ ಭಾಗದಲ್ಲಿ ಎಷ್ಟು ಹೊತ್ತಾಗಿರಬಹುದು? ಅವಳಲ್ಲಿ ಈ ಹೊತ್ತು ಏನು ಮಾಡುತ್ತಿರಬಹುದು? ಪದೆ ಪದೆ ನನಗಾಗುವಂತೆ ಬಿಟ್ಟು ಹೋಗಿರೋ ಜೀವಕ್ಕೂ ಇಷ್ಟೆ ತೀವೃವಾಗಿ ನನ್ನ ನೆನಪಾಗುತ್ತದೆಯೆ? ಅಥವಾ ನನ್ನ ನೆನಪುಗಳ ಜಾತ್ರೆಯಲ್ಲಿ ನಾನೊಬ್ಬನೆ ಅಂಡಲೆಯುತ್ತಿದ್ದೇನೆಯೆ! ಹೀಗೆಲ್ಲ ಅನಿಸಿ ಹಿಡಿತ ಮೀರಿ ಕಣ್ಣು ತುಂಬಿ ಬಂತು. ಬಹುಶಃ ಅವಳ ನೆನ್ನೆಗಳಲ್ಲಷ್ಟೆ ಹಾಜರಿದ್ದ ನನ್ನ ಉಪಸ್ಥಿತಿ ಅವಳದ್ದೆ ಬದಲಾಗಿರುವ ಇಂದಿನಲ್ಲಿಲ್ಲ ಅನ್ನುವ ವಾಸ್ತವ ಎದುರಾದಾಗಲೆಲ್ಲಾ ಮನಸು ಹಿಂಡಿದಂತಾಗುತ್ತದೆ. ಪ್ರಪಂಚದಲ್ಲಿ ಅತ್ಯಂತ ಹೇಯ ವೇದನೆ ತರುವ ಭಾವವೊಂದೆ. ತನಗಿಂತಲೂ ಹೆಚ್ಚಾಗಿ ತಾನು ಪ್ರೀತಿಸಿದ್ದ ಜೀವದ ಇಂತಹ ನಿರ್ದಯ ನಡುವಳಿಕೆ ಹಾಗೂ ಶಾಶ್ವತ ತಿರಸ್ಕಾರ. ಅವನ ಪಾಲಿನ ಕಠೋರ ಸತ್ಯ ಅದೆ ತಾನೆ? ಅಂತ ಸಮಯದಲ್ಲೆಲ್ಲಾ ಆಗುವಂತೆ ಅವಳ ಉಪಸ್ಥಿತಿಯನ್ನ ಪರಿಭಾವಿಸಿಕೊಂಡು ಮನದಾಳದ ದುಗುಡಗಳೆನ್ನೆಲ್ಲಾ ನಿವೇದಿಸಿಕೊಳ್ಳುವಂತೆ ಮಾತಾಡ ತೊಡಗಿದ. ಪಕ್ಕದಲ್ಲೆ ಅವಳಿದ್ದಾಳೆ ಹಾಗೂ ಅವೆಲ್ಲವನ್ನೂ ತನ್ಮಯಳಾಗಿ ಕಿವಿಗೊಟ್ಟು ಕೇಳಿಸಿಕೊಳ್ಳುತ್ತಿದ್ದಾಳೆ ಅನ್ನುವ ಹಾಗಿತ್ತು ಆ ಮಾತುಕಥೆಯ ಧಾಟಿ. ಅತಿ ಭಾವುಕನಾದಾಗ ಒಬ್ಬೊಬ್ಬನೆ ಇಬ್ಬರಿರುವೆವೆಂದೆ ಭಾವಿಸಿಕೊಂಡು ಮಾತನಾಡುವುದು ಅವನ ಮನೋವೈಕಲ್ಯ. ಹಾಗೆ ಮಾತನಾಡಿಯಾದರೂ ಮನದ ಭಾರಗಳನ್ನ ಇಳಿಸಿಕೊಳ್ಳದೆ ಒಳಗೊಳಗೆ ಅದುಮಿಟ್ಟರೆˌ ಅವನ ಮಾನಸಿಕ ಸ್ವಾಸ್ಥ್ಯ ಕೆಡುವ ಅಪಾಯವಿತ್ತು.

ಹೊರಗಡೆ ಹಕ್ಕಿಗಳ ದಿನದಾರಂಭದ ಚಿಲಿಪಿಲಿ ನಿನಾದ ಶುರುವಾಗ ತೊಡಗಿದಂತೆ ಕತ್ತಲ ಕಸ ಗುಡಿಸುತ್ತಾ ಸೂರ್ಯ ರಶ್ಮಿ ನೆಲವನ್ನೆಲ್ಲಾ ಆವರಿಸಿಕೊಂಡು ಬರಲಾರಂಭಿಸಿತು. ಈಗ ಸ್ಪಲ್ಪ ಚಳಿಯ ಅನುಭವವಾಯಿತು ಅವನಿಗೆ. ಕೆಳಗಡೆ ನಾಯರ್ ಕ್ಯಾಂಟೀನ್ ತೆರೆದಿರಬಹುದುˌ ಹೋಗಿ ಒಂದು ಪ್ಲೇಟ್ ಅಪ್ಪ ಮೊಟ್ಟೆಕರಿ ತಿಂದುˌ ಸಕ್ಕರೆಯ ರಾಶಿ ಸುರಿದರೇನೆ ಅದು "ಸ್ಟ್ರಾಂಗ್ ಚಾಯ" ಅಂತ ಬಲವಾಗಿ ನಂಬಿರುವ ನಾಯರನಿಗೆ ಮತ್ತೆ ಮತ್ತೆ "ನಾಯರೆ ಮಧುರಂ ಕೊರಚ್ಚಿ" ಅಂತ ಒತ್ತಿ ಹೇಳಿ ಮಾಡಿಸುವ ಚಹಾ ಹೀರಿ ಬಂದು ಮಧ್ಯಾಹ್ನದ ತನಕ ಹಾಸಿಗೆ ಮೇಲೆ ಬಿದ್ದುಕೊಂಡು ಸುಧಾರಿಸಿಕೊಳ್ಳಬೇಕೆಂದು ನಿರ್ಧರಿಸಿದ. ರಾತ್ರಿಯಿಡಿ ನಿಶಾಚರನಾಗಿ ಎದ್ದಿದ್ದರಿಂದ ಹಗಲಲ್ಲಿ ಮಲಗಿ ಏಳದೆ ವಿಧಿಯಿರಲಿಲ್ಲ.

*****

ಈ ಮಲಯಾಳಿಗಳ ಬಂಪರ್ ಬೆಳೆ ತೆಗೆಯುವ ತಿಕ್ಕಲಾಟದಿಂದ ಅವರದ್ದೆ ಕಾಲುಬುಡಕ್ಕೆ ಅವರವರವೆ ಕೊಡಲಿಯ ಪೆಟ್ಟು ಬಲವಾಗಿ ಬಿದ್ದಿದೆ. ಇದು ಅರಿವಾಗುವಾಗ ಮಾತ್ರ ತಡವಾಗಿರುವುದು ದುರಂತ.

ಇವತ್ತು ತಲಾವಾರು ಜನಸಂಖ್ಯೆಯ ದೃಷ್ಟಿಯಿಂದ ಅತ್ಯಂತ ಹೆಚ್ಚು ಅರ್ಬುದ ರೋಗಿಗಳಿರೋ ದಕ್ಷಿಣದ ಅಗ್ರಗಣ್ಯ ರಾಜ್ಯ ಕೇರಳ! ಪೂರ್ತಿ ಭಾರತದ ಲೆಕ್ಖ ಹಿಡಿದರೆ ಪಂಜಾಬಿಗಳಷ್ಟೆ ಇವರಿಗೆ ಈ ವಿಷಯದಲ್ಲಿ ಪೈಪೋಟಿ ಕೊಡುವ ಸಾಮರ್ಥ್ಯ ಹೊಂದಿರುವವರು. ಪಂಜಾಬಿಗೆ ಕ್ಯಾನ್ಸರಿನ ಶಾಪ ತಗುಲಿಸಿದ್ದು ಹಸಿರು ಕ್ರಾಂತಿಯೆನ್ನುವ ಸರಕಾರಿ ಭ್ರಾಂತಿಯ ಹಿನ್ನೆಲೆಯಲ್ಲಿ ಸುರಿಯಲಾದ ರಾಸಾಯನಿಕಗಳ ರಾಶಿ. ಅದೆ ಕೇರಳದ ವಿಷಯಕ್ಕೆ ಬಂದರೆ ಇಲ್ಲೂ ಹೆಚ್ಚು ಕಡಿಮೆ ಅದೆ ಕಥೆˌ ಆದರೆ ಇಲ್ಲಿ ಸರಕಾರದ್ದೇನಿದ್ದರೂ ಕೇವಲ ಕೆಡಲು ಪರೋಕ್ಷ ಕುಮ್ಮಕ್ಕು ಮಾತ್ರ ಇದ್ದದ್ದು. ಪ್ರತ್ಯಕ್ಷವಾಗಿ ಹಾಳಾಗಲು ಕಾತರಿಸಿ ಹಗಲು ಕಂಡ ಹೊಂಡಕ್ಕೆ ಹೋಗಿ ಹಗಲೆ ಬಿದ್ದು ಅಸು ನೀಗುತ್ತಿರುವ ಅತಿಬುದ್ಧಿವಂತ ಪ್ರಾಣಿಗಳು ಇದೆ ಮಲಯಾಳಿಗಳು.

ಎರಡೂ ರಾಜ್ಯಗಳಲ್ಲಿ ಸರಿಸಮಾನವಾಗಿ ಕ್ಯಾನ್ಸರಿನ ಅನಿಷ್ಟ ಹೊತ್ತು ತಂದ ಕ್ಷೇತ್ರ ಕೃಷಿಗೆ ಸಂಬಂಧಿಸಿದ್ದು ಅನ್ನೋದು ಮಾತ್ರ ಇಲ್ಲಿ ಗಮನಾರ್ಹ ಹಾಗೂ ಸಮಾನ ಅಂಶ. ಮತ್ತಿದು ಆತಂಕಕಾರಿ ವಿಷಯ ಸಹ. ನ್ಯಾಯವಾಗಿ ನೋಡಿದರೆˌ ಯಾವುದೋ ಒಂದನ್ನ ಸಾಧಿಸುವ ಭರದಲ್ಲಿ ಮತ್ಯಾವುದೋ ಅಮೂಲ್ಯವಾದ ಇನ್ನೊಂದನ್ನ ಕಳೆದುಕೊಂಡು ನರಳುವುದು ಜಾಣತನವ? ಅನ್ನುವ ಆತ್ಮಾವಲೋಕನಕ್ಕೆ ಇದು ಮಲಯಾಳಿಗಳನ್ನ ನೂಕಬೇಕಿತ್ತು. ಆದರೆ ಇಂದಿಗೂ ಇಲ್ಲಾಗುತ್ತಿರುವುದು ಮಾತ್ರ ಇದಕ್ಕೆ ತದ್ವಿರುದ್ಧ! ಮಲಯಾಳಿಗಳಿಗೆ ಆಗಿರುವ ಅನಾಹುತಗಳಿಂದ ಇನ್ನೂ ಬುದ್ಧಿ ಬಂದ ಹಾಗಿಲ್ಲ.

ಅರಿತೂ ಅರಿತೂ ಹೀಗೆ ಹಾಳಾಗಲು ತಮ್ಮ ವಿರುದ್ಧ ತಾವೆ ಹಿಕಮತ್ತು ಮಾಡುವವರ ಹಿತ ಕಾಯಲು ಬಹುಶಃ ಯಾವ ಮುತ್ತಪ್ಪನಿಂದಲೂ ಸಾಧ್ಯವಿಲ್ಲ. ಅದಿನ್ಯಾವ ಪಿಲಿಚಾಮುಂಡಿˌ ವಿಷ್ಣುಮೂರ್ತಿˌ ತಂಬುರಾನ್ˌ ಕುಟ್ಟಿಚ್ಚಾತ್ತಾನ್ ಬಂದರೂ ಇಂತಹ ಆತ್ಮಘಾತುಕ ಸಮುದಾಯವನ್ನ ವಿನಾಶದಿಂದ ಕಾಪಾಡಿ ಉಳಿಸಲು ಸಾಧ್ಯವಾಗುವುದಿಲ್ಲ. ಮಲಯಾಳಿಗಳ ಭವಿಷ್ಯ ಅವರ ಬುದ್ಧಿವಂತಿಕೆಯಲ್ಲೆ ಅಡಗಿದೆ ಬೇರೆ ಇನ್ನೆಲ್ಲೂ ಇಲ್ಲ.

*****

ಕೇರಳದ ಭೌಗೋಳಿಕ ಸ್ಥಾನಮಾನ ಅದರ ಸಾಮಾಜಿಕ ಸ್ಥಿತ್ಯಂತರದಲ್ಲಿ ಪ್ರಮುಖ ಪಾತ್ರವನ್ನ ಸಹಜವಾಗಿ ಕಾಲಕಾಲಕ್ಕೆ ರೂಪಿಸಿದೆ. ಈಗಲೂ ಸಹ ಭೌಗೋಳಿಕತೆಯ ಪ್ರಾಮುಖ್ಯತೆಯೆ ಅದರ ಹಣೆಬರಹವನ್ನು ನಿರ್ದೇಶಿಸುತ್ತಲೂ ಇದೆ. ಇದರಲ್ಲಿ ಮಲಯಾಳಿಗಳಿಗೆ ಲಾಭವಾದಷ್ಟೆ ನಷ್ಟವೂ ಆಗಿರುವುದು ಸುಸ್ಪಷ್ಟ.

ನೈಋತ್ಯ ಭಾರತದ ಹೆಬ್ಬಾಗಿಲಾಗಿರುವ ಕೇರಳದ ವಿಶಾಲ ಕರಾವಳಿ ತೀರಗಳನ್ನ ಬಳಸಿಕೊಂಡೆ ವ್ಯಾಪಾರಿ ನೌಕೆಗಳು ಪೂರ್ವ ಏಷ್ಯಾದ ನಾಡುಗಳ ಹಾಗೂ ಯುರೋಪು - ಆಫ್ರಿಕಾಗಳ ನಡುವಿನ ವಾಣಿಜ್ಯ ವ್ಯವಹಾರ ನಡೆಸಬೇಕಿತ್ತು. ಸಹಜವಾಗಿ ಅವು ಕೇರಳದ ರೇವು ಪಟ್ಟಣಗಳಲ್ಲಿ ಹಲವಾರು ಕಾರಣಗಳಿಂದ ಲಂಗರು ಹಾಕುವುದು ಪದ್ಧತಿಯಾಗಿತ್ತು. ಅಷ್ಟಲ್ಲದೆˌ ಪಶ್ಚಿಮ ದೇಶಗಳಲ್ಲಿ ಅಪಾರ ಬೇಡಿಕೆಯಿದ್ದ ಆದರೆ ಅಲ್ಲಿ ಬೆಳೆಯಲಾಗದ ಅಕ್ಕಿಯಂತಹ ಆಹಾರ ಧಾನ್ಯಗಳುˌ ದಾಲ್ಚಿನ್ನಿˌ ಏಲಕ್ಕಿˌ ಲವಂಗˌ ಕಾಳುಮೆಣಸಿನಂತಹ ಸಾಂಬಾರ ಪದಾರ್ಥಗಳು - ಶ್ರೀಗಂಧˌ ಚಂದನˌ ದಂತದಂತಹ ಆಲಂಕಾರಿಕ ಐಶಾರಾಮಿ ಉತ್ಪನ್ನಗಳು ಧಾರಾಳವಾಗಿ ಸಿಗುತ್ತಿದ್ದ ಕೇರಳ ಈ ವ್ಯಾಪಾರಿ ಸಮುದಾಯದ ಗಮನ ಸೆಳೆಯಲು ಅದೊಂದೆ ಕಾರಣ ಸಾಕಿತ್ತಲ್ಲ. ಹೀಗಾಗಿ ಅದರ ಅಸಲು ಗ್ರಾಹಕರಾಗಿದ್ದ ಯುರೋಪಿನ ಬಿಳಿಯರು ಹಾಗೂ ಅವರ ಮಾರುಕಟ್ಟೆಗೆ ಇಲ್ಲಿಂದ ಇದನ್ನ ಖರೀದಿಸಿ ಸಾಗಿಸಿ ಮಾರುತ್ತಿದ್ದ ಮಧ್ಯವರ್ತಿ ಪಾತ್ರದ ಅರಬ್ಬರಿಗೆ ಕೇರಳ ಅನ್ನುವ ಅಕ್ಷಯ ಪಾತ್ರೆ ಲಾಭದ ಗಣಿಯಾಗಿ ಗೋಚರಿಸಿದ್ದು ಸಹಜ ಪ್ರಕ್ರಿಯೆ.

ಇದರಿಂದಲೆ ಆ ಕಾಲದಿಂದಲೂ ಕರಿ ಬಿಳಿ ಕಂದು ಬಣ್ಣದ ವಿದೇಶಿಯರ ಭೇಟಿ ಇಲ್ಲಿ ಸಹಜವಾಗಿ ಹೆಚ್ಚಿತ್ತು. ಮಲಬಾರು ತೀರಗಳಿಂದ ಹಿಡಿದು ಕನ್ಯಾಕುಮಾರಿಯವರೆಗೆ ಸ್ಥಳಿಯವಾಗಿ ಲಭ್ಯವಿರುತ್ತಿದ್ದ ಸರಕು ಸರಂಜಾಮುಗಳ ಪೂರೈಕೆಗೆ ಪೈಪೋಟಿಯಿತ್ತು.

( ಇನ್ನೂ ಇದೆ.)

https://youtu.be/nfzctlRLFsU

12 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೦.👊


"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೦.👊


ಅಲ್ಲಿ ನೆರೆದಿದ್ದ ಪ್ರಾಯದಲ್ಲೋ ಗಾತ್ರದಲ್ಲೋ ದೊಡ್ಡ ದೊಡ್ಜದಾಗಿ ಕಂಗೊಳಿಸುತ್ತಿದ್ದ ಕುಂಟೆ ಕೋಣಂದಿರಿಗೆಲ್ಲ ಚಹಾ ಹಂಚುತ್ತಿದ್ದವರಿಗೆ ಬಹುಶಃ ಸುಭಾಶನ ಪ್ರಾಯದ ಮಕ್ಕಳಿಗೂ ಹೊಟ್ಟೆ ಅನ್ನುವುದೊಂದಿದೆ ಅನ್ನೋದೆ ಮರೆತು ಹೋದಂತಿತ್ತು. ಹೇಳಿ ಕೇಳಿ ಆ ಎಳೆಯ ತನ್ನ ಮಾರ್ಗದರ್ಶಕ. ಇಂದಿನ ಈ ಅಪೂರ್ವ ಪ್ರದರ್ಶನಕ್ಕೆ ಕರೆದು ಬಂದಿದ್ದವ. ಅವನ ಬಿಟ್ಟು ಚಹಾ ಕುಡಿಯುವುದೆ? ರಾತ್ರಿ ಊಟದ ನಂತರ ಅವನ ಹೊಟ್ಟೆಗೂ ಏನೂ ಬಿದ್ದಿರುವ ಸಾಧ್ಯತೆಯಂತೂ ಇಲ್ಲ. ಅಲ್ಲದೆ ಹವಾಯಿ ಚಪ್ಪಲಿ ಸಾಧಾರಣ ದರ್ಜೆಯ ಅಂಗಿ ತೊಟ್ಟ ಚಡ್ಡಿ ಪೈಲ್ವಾನ ಚಹಾ ಕುಡಿಯವಷ್ಟು ವಯಸ್ಕ ಅಂತ ಅವರಲ್ಲಿ ಯಾರೊಬ್ಬರ ಪೊಟ್ಟು ದೃಷ್ಟಿಯೂ ಪರಿಗಣಿಸಿರಲಿಲ್ಲವೋ? ಏನೋ? ಗೊತ್ತಿಲ್ಲ. ಆದರೆ ಇವನು ಕರೆಸಿ ಕುಡಿಸದಿದ್ಧರೆ ಅಲ್ಲೆ ಅವನು ಕಂಭಕ್ಕೊರಗಿ ಕಂಡವರು ಸೊರಪರ ಚಹಾ ಹೀರುವ ಶಬ್ದ ಕೇಳುತ್ತಲೆ ತೃಪ್ತಿ ಪಡಬೇಕಿತ್ತೇನೋ.

ಮುತ್ತಪ್ಪನ ದೈವಸ್ಥಾನದ ಕಲ್ಲಿಗೆ ಅಗೆಲು ಬಡಿಸಿ ಕೋಲ ಮುಗಿದ ನಂತರ ಅಲ್ಲಿದ್ದ ಕಿರಿ ವಯಸ್ಸಿನ ಮಕ್ಕಳಿಗೆ ಅದರಲ್ಲಿ ಬಹುಪಾಲು ಕೋಳಿ ಗಸಿ - ಅಡ್ಯೆಯಿದ್ದ ಎಲೆಗಳನ್ನ ಹಂಚಿದ್ದರು. ಅದೆಲ್ಲ ಅವನ ಕ್ಯಾಮರಾದ ಕಣ್ಣಲ್ಲಿ ಸೆರೆಯಾಗಿತ್ತು. ಸುಭಾಶನೂ ಆ ಮಕ್ಕಳ ಗುಂಪಿನಲ್ಲಿದ್ದರಬಹುದು ಅಂತ ತಪ್ಪಾಗಿ ಭಾವಿಸಿದ್ದ. ಇವ ನೋಡಿದರೆ ನಿದ್ರೆಯ ಸೆಳೆತ ತಾಳಲಾರದೆ ಅಂತಹ ಗಲಭೆ ಗದ್ದಲದ ಮಧ್ಯೆಯೂ ಕಂಭಕ್ಕೊರಗಿ ಕುಗುರುತ್ತಾ ನಿಂತಿದ್ದಾನೆ! ವಿಷ್ಣುಮೂರ್ತಿ ಕೋಲದ ಅಗೆಲು ಬಡಿಸುವಾಗ ಇವನನ್ನ ಎಬ್ಬಿಸಿ ಪ್ರಸಾದದ ಅಡ್ಯೆ - ಹರಕೆ ಕೋಳಿಮಾಂಸದ ಪುಳಿಮುಂಚಿ ತಿನ್ನಲು ಮುಂದೆ ತಳ್ಳಬೇಕೆಂದು ನಿರ್ಧರಿಸಿದ. ನಿಧಾನವಾಗಿ ವಾದ್ಯಗಳಾಲಾಪ ರಂಗೇರ ತೊಡಗಿತ್ತು. ವಿಷ್ಣುಮೂರ್ತಿ ಕೋಲದ ಸರದಿ ಆರಂಭದ ಘಟ್ಟದಲ್ಲಿತ್ತು.


*****

ಕೇರಳದ ಕೆಲವು ಖಾಸಾ ವಿಶೇಷತೆಗಳು ಆ ರಾಜ್ಯಕ್ಕಷ್ಟೆ ಅನನ್ಯ. ಅರಣ್ಮುಳ ಕನ್ನಾಡಿ ಅನ್ನಲಾಗುವ ಪಂಚಲೋಹವಿರುವ ಕಂಚಿನ ಕನ್ನಡಿ ಅಂತಹ ಅದ್ಭುತಗಳಲ್ಲೊಂದು. ದಕ್ಷಿಣ ಕೇರಳದ ಪಟ್ಟಣಂತಿಟ್ಟ ಮೂಲದ ಆ ಕಲಾಗಾರಿಕೆಯಲ್ಲಿ ಕೇವಲ ಲೋಹದ ಮೇಲ್ಮೈಯನ್ನೆ ತಿಕ್ಕಿ ತಿಕ್ಕಿ ಹೊಳಪು ತಂದು ಸಪಾಟುಗೊಳಿಸಿ ಅದರಲ್ಲಿ ಥೇಟು ಗಾಜಿನ ಕನ್ನಡಿಯಲ್ಲಿ ಮೂಡುವಂತೆಯೆ ಪ್ರತಿಬಿಂಬ ಮೂಡುವಂತೆ ಮಾಡಲಾಗುತ್ತದೆ. ಆ ಕನ್ನಡಿಗೆ ಕಂಚಿನ ಫ್ರೇಮು ಇರುವ ಕೆತ್ತನೆ ಸಹಿತದ ಕೈ ಹಿಡಿಯನ್ನೂ ಕೂಡಿಸಿ ಇನ್ನಷ್ಟು ಆಕರ್ಷಕಗೊಳಿಸಲಾಗುತ್ತೆ. ಕೇರಳದ ಹೆಂಗೆಳೆಯರಿಗೆ ಈ ಅರುಣ್ಮುಳ ಕನ್ನಾಡಿ ಅಂದರೆ ಅಚ್ಚುಮೆಚ್ಚು. ಯಾರಾದರೂ ತಿಳಿಸಿ ಹೇಳದ ಹೊರತು ಅದೊಂದು ಸಂಪೂರ್ಣ ಲೋಹದ ಕರಕುಶಲದ ಕೆಲಸ ಅನ್ನೋದೆ ಅರಿವಾಗದಷ್ಟು ತನ್ಮಯತೆಯಿಂದ ಅದನ್ನ ತಯಾರಿಸಿರುತ್ತಾರೆ.

ಕೇರಳದ ಉದ್ದಗಲ ಇರುವ ವಾಸ್ತುಶಿಲ್ಪದ ಮೂಲ ಸಹ ತುಳುನಾಡೆ. ಮರ ಹಾಗೂ ಓಡು ಹೆಂಚಿನ ಇಳಿಸಿದ ಮಾಡೆ ಮುಖ್ಯವಾಗಿರುವ ಅಲ್ಲಿನ ಮನೆಗಳಾಗಲಿˌ ದೇವಾಲಯಗಳಾಗಲಿ ಅಥವಾ ಸಮುದಾಯ ಭವನದಂತಹ ಕಟ್ಟಟಗಳೆ ಆಗಲಿ ಕರಾವಳಿ ಹಾಗೂ ಮಲೆನಾಡಿನ ಅವ್ಯಾಹತ ಮಳೆಗೆ ಸವಾಲೊಡ್ಡಿ ನಿಲ್ಲಲು ಅನುಕೂಲವಾಗುವಂತೆ ನಿರ್ಮಿಸಲಾಗುತ್ತದೆ. ಕಾಲಾಂತರದಲ್ಲಿ ಕೈ ಹಂಚು ಅಥವಾ ಓಡು ಹಂಚಿನ ಜಾಗಕ್ಕೆ ಮಾಟವಾದ ಮಂಗಳೂರು ಹಂಚು ಹಾಕುವ ಪದ್ಧತಿ ಆರಂಭವಾಗಿದೆ. ಗಾಜಿನ ಹಂಚೊಂದನ್ನ ನಡುನಡುವೆ ಸೇರಿಸಿ ಸೂರ್ಯನ ಬೆಳಕು ಕಟ್ಟಡದ ಒಳಗೂ ಚೆಲ್ಲುವಂತೆ ವ್ಯವಸ್ಥೆ ಮಾಡುವ ಅನುಕೂಲತೆ ಈ ಹೊಸ ಕಾರ್ಖಾನೆ ನಿರ್ಮಿತ ಹಂಚುಗಳಲ್ಲಿರುವುದೊಂದು ಧನಾತ್ಮಕ ಅಂಶ. ಮಲಯಾಳಿಗಳ ಮಧ್ಯೆ "ನಾಲಕೆಟ್ಟು" ವಾಸ್ತು ಶೈಲಿಯೆಂದೆ ಇದು ಜನಪ್ರಿಯ. ದೇವಸ್ಥಾನಗಳಲ್ಲಿ ಸಾಮಾನ್ಯವಾಗಿ ನಾಗರ ಶೈಲಿ ಅನುಸರಿಸಲಾಗುತ್ತದೆ.


ಯಾವುದೆ ಕಟ್ಟಡವಾದರೂ ಸರಿˌ ಕಟ್ಟಡವಿರುವ ಜಾಗದಲ್ಲಿನ ಅನುಕೂಲಕ್ಕೆ ತಕ್ಕಂತೆ ನಲವತ್ತೈದರಿಂದ ಅರವತ್ತು ಡಿಗ್ರಿ ಬಾಗಿಸಿದಂತೆ ರಚಿಸಲಾಗುವ ಮರದ ದಳಿಗಳಿಗೆ ಈಚಲ ಪರದೆಗಳನ್ನ ಇಳಿಬಿಡುವ ಸಂಪ್ರದಾಯವಿದ್ದುˌ ಕಾಲಮಾನಕ್ಕೆ ತಕ್ಕಂತೆ ಅವನ್ನ ಎತ್ತಿ ಮೇಲೆ ಕಟ್ಟಿಯೋˌ ಇಲ್ಲಾ ಇಳಿಬಿಟ್ಟೋ ಕಟ್ಟಡದೊಳಗಿನ ವಾತಾವರಣದಲ್ಲಿ ಗಾಳಿಯ ಹರಿವನ್ನ ನಿಯಂತ್ರಿಸಬಹುದು. ಅಡ್ಡಮಳೆ ಹೊಡೆಯುವ ಸಾಧ್ಯತೆ ವಿಫುಲವಾಗಿರುವ ಕೇರಳದಲ್ಲಿ ಬಾಗಿದ ತೆರೆದ ಕಿಟಕಿಯ ದಾರಂದಗಳು ಮಳೆಯ ಇರಚಲು ಮನೆಯೊಳಗೆ ರಾಚದಂತೆ ತಡೆಯುತ್ತದೆ. ತುಳುನಾಡಿನ ಕಟ್ಟಡಗಳ ಪಡಿಯಚ್ಚಿನಂತೆ ಇಲ್ಲಿಯೂ ಸಹ ಕಟ್ಟಡದ ಹೊರ ಹಜಾರಕ್ಕೆ ಹೊರಗೋಡೆ ಕಟ್ಟಿ ಮರೆ ಮಾಡುವ ಪದ್ಧತಿ ಇದ್ದಿರಲಿಲ್ಲ. ಹೀಗಾಗಿ ಚಾವಡಿ ಅಥವಾ ಜಗಲಿ ಸದಾ ತೆರೆದ ಸ್ಥಿತಿಯಲ್ಲೆ ಇರುತ್ತಿತ್ತು. ಸಾಮಾನ್ಯವಾಗಿ ಹೆಬ್ಬಾಗಿಲಿನಿಂದ ಹಿಡಿದು ಹಿಂಬಾಗಿಲ ತನಕ ಬಾಗಿಲುಗಳೆಲ್ಲ ನಾಲ್ಕರಿಂದ ಐದಡಿಯ ಒಳಗೆ ಇರುತ್ತವೆ. ಹೀಗಾಗಿ ಎತ್ತರದಲ್ಲಿ ಕಡಿಮೆ ಇರುವವರೂ ಸಹ ತಗ್ಗಿಬಗ್ಗಿಯೆ ಮನೆಯೊಳಗೂ ಹೊರಗೂ ಹೋಗಬೇಕು. ಮರದ ದಾರಂದಗಳು ಮಾತ್ರ ಕೆತ್ತನೆಗಳನ್ನ ಹೊಂದಿರುತ್ತವೆ. ಉಳಿದಂತೆ ದಳಿಗಳೆಲ್ಲ ಸಾದಾಸೀದ ಅಷ್ಟೆ. ಮನೆಯ ಮುಂದಾದರೆ ತುಳಸಿಕಟ್ಟೆ ಕಟ್ಟಿರುತ್ತಾರೆ. ದೇವಸ್ಥಾನವಾದರೆ ದೊಡ್ಡ ದೀಪಸ್ಥಂಭವಿರುತ್ತದೆ ಅನ್ನುವುದಷ್ಟೆ ಇವೆರಡರ ನಡುವಿನ ಮೂಲಭೂತ ವ್ಯತ್ಯಾಸ. ಇತ್ತೀಚೆಗೆ ಇಂತಹ ಪಾರಂಪರಿಕ ಶೈಲಿಯ ಮನೆಗಳು ಮರೆಯಾಗುತ್ತಿದ್ದುˌ ಸಿಮೆಂಟಿನ ಕಟ್ಟಡಗಳನ್ನ ಬಾಕಿ ಇನ್ನುಳಿದ ಊರುಗಳಂತೆಯೆ ಕಟ್ಟುವ ಹಾಗೂ ಅಲಂಕಾರಕ್ಕೆ ಮಾತ್ರ ಒಂದೋ ಮಹಡಿಯ ವರಾಂಡದಲ್ಲೋ ಇಲ್ಲಾ ನೆಲಮಹಡಿಯ ಹಜಾರದಲ್ಲೋ ಹಳೆಯ ಶೈಲಿಯ ಕಿಡಕಿಯನ್ನ ತೋರಿಕೆಗಾಗಿ ಆಲಂಕಾರಿಕವಾಗಿ ಮಾತ್ರ ಇಡಿಸುವ ಹೊಸ ಚಾಳಿ ಆರಂಭವಾಗಿದೆ.

ಮತ ಪರಿವರ್ತಿತನಾಗಿ ಮುಸಲ್ಮಾನ ಅಥವಾ ಕ್ರೈಸ್ತನಾಗಿದ್ದರೂ ಮಲಯಾಳಿ ತನ್ನ ಒಡೆತನದ ಜಾಗದಲ್ಲಿರುವ ಆದಿಯ ಕಲ್ಲುˌ ನಾಗರಕಲ್ಲುˌ ಭೂತದ ಕಲ್ಲು ಇವೆಲ್ಲವನ್ನೂ ತೆರವುಗೊಳಿಸದೆ ಉಳಿಸಿಕೊಂಡಿದ್ದರೆ ಅದವನ ದೈವಿಕ ಪ್ರಜ್ಞೆಗಿಂತ ಹೆಚ್ಚಾಗಿ ಪರಂಪರೆಯ ಪ್ರೇರಣೆಯ ಕುಮ್ಮಕ್ಕಿನಿಂದ ಆಗಿರುತ್ತದೆ. ಆ ಜಾಗವನ್ನ ಮಾರಿದ್ದರೂ ಮೂಲ ಮಾಲಿಕರು ಆಗಾಗ ವಿಶೇಷ ದಿನಮಾನಗಳಲ್ಲಿ ತಮ್ಮ ಭೂತ ಹಾಗೂ ನಾಗನನ್ನ ನೆನಪಿಸಿಕೊಂಡು ಬಂದು ಅಗೆಲು ಬಡಿಸಿ ಕೈ ಮುಗಿಯುವುದಿದೆ. ಇದಂತೂ ಅಪ್ಪಟ ತುಳುನಾಡಿನ ಪದ್ಧತಿಗಳಲ್ಲೊಂದು. ಜಾತಿ ಮತ ಯಾವುದಾಗಿದ್ದರೂ ಸಹ ಸ್ಥಳದ ಸದ್ಯದ ಒಡೆತನ ಹೊಂದಿರುವವರು ಇದಕ್ಕೆಲ್ಲ ಅಡ್ಡಿ ಪಡಿಸುವುದಿಲ್ಲ.

*****

ಬಹು ಕಾಳಿದಾಸ ಸಿದ್ಧಾಂತವೊಂದಿದ್ದರೂ ಸಾಹಿತ್ಯ ಕ್ಷೇತ್ರದಲ್ಲಿ ದಿಗ್ಗಜನಾಗಿದ್ದ ಕಾವ್ಯ ಚತುರ ಕಾಳಿದಾಸ ತಮ್ಮವನಾಗಿದ್ದ ಅನ್ನುವ ಹೆಮ್ಮೆ ಮಲಯಾಳಿಗಳಿಗಿದೆ. ಮೇಘದೂತ ಬರೆದಿದ್ದ ಭೋಜರಾಜನ ಆಸ್ಥಾನ ಕವಿಯಾಗಿದ್ದವ ಆತನೆ ಅಂತ ಈ ಮಲಯಾಳಿಗಳು ನಂಬುತ್ತಾರೆ. ಇನ್ನು ತೃಶೂರಿನ ಕಾಲಡಿಯಲ್ಲಿ ಹುಟ್ಟಿ ಸನಾತನ ಧರ್ಮದ ಪುನರುತ್ಥಾನ ಮಾಡಿದ - ಅದಕ್ಕಾಗಿ ಭಾರತ ಭೂಮಿಯ ಉದ್ದಗಲ ಬರಿ ಕಾಲ್ನಡಿಗೆಯಲ್ಲೆˌ ಅದೂ ಇಂದಿನಂತೆ ಯಾವೊಂದು ಸುಖ ಸೌಲಭ್ಯಗಳಿಲ್ಲದ ಕಾಲದಲ್ಲಿ ಮಾಡಿರುವ ಖ್ಯಾತಿಯಿರುವ ಶ್ರೀಶಂಕರಾಚಾರ್ಯರ ಬಗ್ಗೆ ತಿಳಿದಿರದವರಾದರೂ ಯಾರಿದ್ದಾರು?

ಶಂಕರಾಚಾರ್ಯರು ಸಹ ತತ್ವ ಮೀಮಾಂಸೆಯನ್ನˌ ಭಾರತೀಯ ತತ್ವಶಾಸ್ತ್ರದ ಬಗ್ಗೆ ಜಿಜ್ಞಾಸುವಾಗಿ ರಚಿಸಿರುವ ಟೀಕೆ ಟಿಪ್ಪಣಿಗಳ ಭಾಷ್ಯಗಳನ್ನ ಹಾಗೂ ಸ್ತುತಿಗಳಾಗಿರುವ ಅನೇಕ ಕೃತಿಗಳನ್ನ ರಚಿಸಿದ್ದಾರೆ. ಆ ದೃಷ್ಟಿಯಿಂದ ಅವರೂ ಸಾಹಿತಿಯೆ. ಆದರೆ ಶಂಕರಾಚಾರ್ಯರಾಗಲಿ ಅಥವಾ ಕಾಳಿದಾಸನೆ ಆಗಿರಲಿ ತಮ್ಮ ಯಾವೊಂದು ಕೃತಿಯನ್ನೂ ಸಹ ಮಾತೃಭಾಷೆ ಮಲಯಾಳಂನಲ್ಲಿ ರಚಿಸಿಲ್ಲ ಅನ್ನುವುದು ಗಮನಾರ್ಹ ಅಂಶ. ಅವರಿಬ್ಬರೂ ಸಹ ಸಂಸ್ಕೃತವನ್ನೆ ತಮ್ಮ ವಿದ್ವತ್ತಿನ ಅಭಿವ್ಯಕ್ತಿಗೆ ಭಾಷಾ ಮಾಧ್ಯಮವಾಗಿ ಆಯ್ದುಕೊಂಡಿದ್ದರು. ಅವರ ಕಾಲದಲ್ಲಿ ಕೇವಲ ಆಡುಭಾಷೆಯಾಗಿದ್ದ ಮಲಯಾಳಂಗೆ ಇನ್ನೂ ಲಿಪಿ ಹೊಂದುವ ಭಾಗ್ಯವಿಲ್ಲದಿದ್ದದ್ದು ಇದಕ್ಕೆ ಕಾರಣವಾಗಿದ್ದೀತು.




( ಇನ್ನೂ ಇದೆ.)


https://youtu.be/VVLfeKIHpj4

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೧೯.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೧೯.👊

ಇದಿಷ್ಟೆ ವಿಶೇಷ ಸಾಲದೇನೋ ಅನ್ನುವ ಹಾಗೆ ವಿನ್ಸೆಂಟ್ ಕುರಿಯಕ್ಕೋಸ್ ಪಾಲತ್ತಿಲ್ ಹಾಗೂ ಜಾರ್ಜ್ ಅಂಬ್ರಸ್ ಚೆಲ್ಲಚ್ಚೇರಿ ಅನ್ನುವ ಪರ್ಬುಗಳ ಜೋಡಿಯೂ ಅವನಿಗೆ ಶರಣು ಬಂದಿದ್ದ ವಿಚಾರ ಅವನಿಗೆ ತಿಳಿದು ಬಂದದ್ದೆ ಮುತ್ತಪ್ಪ ದೈವ ದೊಡ್ಡ ದೊಂಡೆಯಲ್ಲಿ ಅಭಯದಾನ ನೀಡುವ ಹೊತ್ತಲ್ಲಿ ಅವರೆಲ್ಲರ ಹೆಸರನ್ನ ಅಡಿಗಡಿಗೆ ಗಟ್ಟಿ ಧ್ವನಿಯಲ್ಲಿ ಉಚ್ಛರಿಸದಾಗಲೆ. ವ್ಯಾಪಾರವೊಂದರಲ್ಲಿ ಕೈ ಹಾಕಿ ಅಪಾರ ನಷ್ಟ ಎದುರಿಸಿದ್ದ ಅವರಿಬ್ಬರೂ ಮುತ್ತಪ್ಪನ ಮಹಿಮೆಯನ್ನ ಸಣ್ಣಂದಿಲಿನಿಂದ ಕಾಣುತ್ತಾ ಬೆಳೆದಿದ್ದವರೆ. ಇಂದು ಸಂಕಟ ಬಂದಾಗ ಈ ಮುತ್ತಪ್ಪನೆನ್ನುವ ವೆಂಕಟರಮಣನ ಪಾದವೆ ಗತಿ ಅಂತ ಒಂದೆ ಬಾಬ್ತಿನ ವ್ಯವಹಾರದಲ್ಲಿ ಪರಸ್ಪರ ಪಾಲುದಾರರಾಗಿದ್ದ ಇಬ್ಬರೂ "ಅನ್ಯಥಾ ಶರಣಂ ನಾಸ್ತಿ" ಎನ್ನುವ ಮುಖಭಾವ ಹೊತ್ತುಕೊಂಡು ಕಾಣದ ದೇವರಿಗೆ ಹರಕೆ ಹೊರುವುದಕ್ಕಿಂತ ಕಾಣುವ ದೈವ ಮುತ್ತಪ್ಪನ ಅಡಿಗೆರಗುವುದೆ ವಾಸಿ ಅಂತ ಮಣಿದು ಬಂದಿದ್ದರು.

ಅಂತೂ ಈ ಭೂತದ ಕೋಲˌ ಅದರ ಅನುಕರಣೆಯ ಥಯ್ಯಂ ಅಥವಾ ತಿರಯಾಟ್ಟಂ ಇವೆಲ್ಲ ಈ ಮಣ್ಣಿಗೆ ಸಂಬಂಧಿಸಿದ ದೈವಾರಾಧನೆಯ ಆಚರಣೆಗಳು. ಇದೆ ನಾಡಿನವರ ಯಾವ ಮತ ಪರಿವರ್ತನೆಯೂ - ನವ ಧರ್ಮಗಳ ನಂಬುಗೆಯ ಬೇಲಿಯೂ ಸಹ ಸ್ಥಳಿಯ ಸಂಸ್ಕೃತಿಯ ಜೊತೆ ನೆಲದ ಮಣ್ಣಿನ ಮಕ್ಕಳು ಹೊಂದಿರುವ ಅನುಗಾಲದ ಅನುಬಂಧವನ್ನು ಅಳಿಸಿ ಹಾಕಲಾರವು ಎನ್ನುವ ಸತ್ಯ ಮತ್ತೊಮ್ಮೆ ಅವನ ಮುಂದೆ ಈ ರೂಪದಲ್ಲಿ ಸಾಕ್ಷಾತ್ಕಾರಗೊಂಡಿತ್ತು ಅಷ್ಟೆ.

ಅವತ್ತು ಮುತ್ತಪ್ಪನ ಆರಾಧನೆ ಹರಕೆ ಕೋಳಿಗಳ ಬಲಿಯ ನಂತರ ಮುಗಿದದ್ದೆ ವಿಷ್ಣುಮೂರ್ತಿಯ ಕೋಲವನ್ನ ಕಾಣಲು ಕುತೂಹಲಭರಿತನಾಗಿ ಅವನು ಕಾದ. ಕೋಲದ ಕೊನೆಯ ಹಂತದಲ್ಲಿ ಭೂತ ಕಟ್ಟಿದವರು ಬೆಂಕಿಯಲ್ಲಿ ಬಿದ್ದೇಳುವ ಒತ್ತೆಕೋಲಗಳು ಸಾಮಾನ್ಯವಾಗಿ ನಡುರಾತ್ರಿಯಲ್ಲೆ ನಡೆಯುವುದು ವಾಡಿಕೆ. ಅವನಿಗಿದೇನೂ ಮೊದಲ ಒತ್ತೆಕೋಲದ ಪ್ರದರ್ಶನ ಕಾಣುವ ಕ್ಷಣವೂ ಅಗಿರಲಿಲ್ಲ. ಆದರೆ ಪ್ರತಿ ಹತ್ತಿಪ್ಪತ್ತು ಮೈಲು ಅಂತರದಲ್ಲೂ ಸಹ ಕೋಲದ ಆಚರಣೆಯಲ್ಲಿˌ ಅನುಸರಿಸುವ ಸಂಸ್ಕಾರದಲ್ಲಿ ಅಷ್ಟಿಷ್ಟು ಬದಲಾವಣೆಯ ಅಂಶಗಳಿರೋದು ಅತಿ ಸಹಜ. ಹೀಗಾಗಿ ಅವ ಇಲ್ಲಿನ ಆಚರಣೆಯಲ್ಲಿರಬಹುದಾದ ಆ ಸಣ್ಣಪುಟ್ಟ ವಿಚಾರಗಳನ್ನ ಗಮನಿಸುವ ಹಾಗೂ ಅರಿತುಕೊಳ್ಳುವ ಉಮೇದಿನಲ್ಲಿದ್ದ.

ಗುಳಿಗˌ ಲಕ್ಕೆಸಿರಿಯಂತಹ ಉಗ್ರದೈವಗಳೂ ಸಹ ಕೆಂಡ ಮೀಯುವುದಿದೆ. ಚೆನ್ನಾಗಿ ಉರಿದು ನಿಗಿ ನಿಗಿ ಕೆಂಡವಾಗಿ ಕೆಂಪಗೆ ವೈಡೂರ್ಯದ ರಾಶಿಯಂತೆ ಕಂಗೊಳಿಸುವ ರಕ್ತವರ್ಣದ ಉರಿಯ ಹಾಸಿಗೆಯ ಮೇಲೆ ಅದ್ಯಾವ ಆವೇಶ ಬಿದ್ದು ಹೊಡಕಾಡುವಂತೆ ಮಾಡುತ್ತದೆ! ಅನ್ನುವ ಅಚ್ಚರಿ ಅನುಗಾಲದಿಂದ ಅವನ ಮನಸೊಳಗೆ ಪ್ರಶ್ನೆಯಾಗಿ ಕಾಡುತ್ತಿದೆ. ಮೈಮೇಲೆ ದೈವದ ಆವಾಹನೆ ಆ ಹೊತ್ತಿನಲ್ಲಿ ಆಗಿರೋದು ಹೌದಾದರೂ ಸುಡೋದು ಮಾತ್ರ ಭೂತ ಕಟ್ಟಿದ ನಲಿಕೆಯ ಪಂಬದನ ದೇಹ ತಾನೆ? ನಾಲ್ಕಾರು ಗಟ್ಟಿಮುಟ್ಟಾದ ತರುಣರು ಕೆಂಡದ ಹಾಸಿಗೆಯ ಧಗೆಯನ್ನ ಎದುರಿಸಿ ಕಷ್ಟಪಟ್ಟು ಭೂತವನ್ನ ಸೆಳೆದು ಬೆಂಕಿಯಿಂದ ಹೊರಗೆಳೆದರೂˌ ಅವರ ಬಲಕ್ಕೆ ಸವಾಲು ಹಾಕುವಂತೆ ಮತ್ತೆ ಮತ್ತೆ ಅವರ ಹಿಡಿತ ತಪ್ಪಿಸಿಕೊಂಡು ಕೆಂಡದ ಹಾಸಿಗೆಯ ಮೇಲೆ ಹೊರಳಾಡುವಾಗಿನ ಭೂತ ಕಟ್ಟಿದವನ ಮನಸ್ಥಿತಿಯಾದರೂ ಎಂಥಾದ್ದು! ಅನ್ನುವ ವಿಷಯ ಇನ್ನೂ ಸರಿಯಾಗಿ ಅವನಿಗೆ ಅರ್ಥವಾಗಿರಲಿಲ್ಲ.

ಯಾವುದೆ ತರ್ಕಕ್ಕೆ ತಲೆ ಕೊಡದೆ ಕೇವಲ ಅಪ್ಪ ಹಾಕಿದ ಆಲದ ಮರಕ್ಕೆ ಅದರದೆ ಬಿಳಲುಗಳಲ್ಲಿ ನೇಣು ಹಾಕಿಕೊಳ್ಳುವ ಅಂಧಶ್ರದ್ಧೆಯಿಂದಷ್ಟೆ ಆರಾಧನೆಗೆ ಇಳಿವ ಸಾದಾಸೀದ ಭಕ್ತಾದಿಗಳು ಭೂತ ಕಟ್ಟಿದವನಿಗೆ ಒಂಚೂರೂ ಬೆಂಕಿ ಸೋಕಿ ಅವನ ಮೈ ಕೊಂಚ ಕೂಡ ಸುಟ್ಟಿರದು ಎಂದೆ ನಂಬಿ ದೈವದ ಮಹಿಮೆಗೆ ಬೆರಗಾಗಿ ಸಂಪೂರ್ಣ ಅದರ ಪಾದದಡಿ ಶರಣಾಗುತ್ತಾರೆ. ಆದರೆ ಅದನ್ನೆ ಅವರಿಗೂ ಮಾಡಿ ನೋಡಿ ಅಂದಾಗ ಮಾತ್ರ ಹೌಹಾರುತ್ತಾರೆ. ಆ ಭೂತ ಕಟ್ಟುವವರ ಮನೋಬಲˌ ಅಪಾಯವನ್ನ ಬಹಿರಂಗವಾಗಿ ಆಹ್ವಾನಿಸಿಕೊಳ್ಳುವ ಧೈರ್ಯ ಅದ್ಯಾವ ಪ್ರೇರಣೆಯಿಂದ ಅವರೊಳಗೆ ಹುಟ್ಟುತ್ತದೆ ಅನ್ನುವುದನ್ನೆ ಆತ ಯೋಚಿಸುತ್ತಾ ಅಲ್ಲೆ ಚಪ್ಪರದಡಿಯಲ್ಲಿನ ಕುರ್ಚಿಯೊಂದರಲ್ಲಿ ಕುಸಿದು ಕುಳಿತ. ಯಾರೋ ಎಲ್ಲರಿಗೂ ಚಹಾ ತಂದು ಹಂಚುತಿದ್ದರು. ಆಗೀಗ ಗದ್ದೆ ಕೋಗಿನ ಅಂಚಿನಿಂದ ಬೀಸಿ ಬರುತ್ತಿದ್ದ ನಡುರಾತ್ರಿಯ ಕುಳಿರ್ಗಾಳಿಯ ತಂಪಿಗೆ ಚಹದ ಆ ಬೆಚ್ಚನೆ ಸ್ವಾದ ಮೈಮನಕ್ಕೆ ಹಿತಕಾರಿಯಾಗಿತ್ತು. ಕೋಲದ ಚಂಡೆ ವಾಲಗದವರು ವಿರಾಮ ಪಡೆದದ್ದಕ್ಕೋ ಏನೋ ಸ್ವಲ್ಪ ಹೊತ್ತು ಗಲಾಟೆ ಕಡಿಮೆಯಾಗಿತ್ತು. ದೂರದಲ್ಲಿ ಅದ್ಯಾವುದೋ ಅರಿಯದ ಊರಿನತ್ತ ಏದುಸಿರು ಬಿಡುತ್ತಾ ಓಡಲು ತಯಾರಾಗುತ್ತಿದ್ದ ರೈಲು ಬಂಡಿ ಕಾಂಙನಗಾಡು ನಿಲ್ದಾಣ ಬಿಡುವ ಸೂಚನೆ ನೀಡಲು ಹೊಡೆದ ಸೀಟಿಯ ಸದ್ದು ಅಲೆಯಲೆಯಾಗಿ ಅದೆ ಗಾಳಿಯಲೆಯಲ್ಲಿ ಇವನ ಕರ್ಣಪಟಲದವರೆಗೂ ತೇಲಿ ಬಂತು.

*****

ತಾವೇನೊ ಈ ಜಗತ್ತಿನಲ್ಲಿ ಅಜರಾಮರರೆಂಬಂತೆ ಮನುಷ್ಯ ರೂಪಿ ಮೃಗಗಳು ಪ್ರಪಂಚದ ಎಲ್ಲೆಡೆಯೂ ತೋರುವ ಠಕ್ಕುˌ ವಿನಾಃಕಾರಣದ ದ್ವೇಷˌ ಅನಗತ್ಯ ಹಗೆ ಸಾಧಿಸುವ ಹಟˌ ಸಮಯಸಾಧಕತನಗಳನ್ನೆಲ್ಲ ಕಂಡು ರೋಸಿ ಹೋಗಿರುವ ಅವನಿಗೆ ಈ ಆಶಾಢಭೂತಿ ಸಮಾಜದಲ್ಲಿ ಇನ್ನೂ ಈ ನಯವಂಚನೆಗಳಲ್ಲಿ ಪಳಗಿ ನಿಪುಣರಾಗಿದ್ದಿರದ ಸುಭಾಶನಂತಹ ಎಳೆಯರ ತಲೆ ಕಾಯಲಾದರೂ ಒಂದು ದೈವ ಅಂತ ನಿಜವಾಗಿಯೂ ಸರ್ವಸ್ವವನ್ನೂ ನಿಯಂತ್ರಿಸುವ ಶಕ್ತಿಶಾಲಿಯಾಗಿ ಅಗೋಚರ ನಿಯಾಮಕನೊಬ್ಬ ಇದ್ದಿದ್ದರೆ ಅದೆಷ್ಟೋ ಒಳ್ಳೆಯದಿತ್ತು ಅಂತ ಅನೇಕ ಸಲ ಅನಿಸುತ್ತಿದ್ದದ್ದಿದೆ.

ಅವನನ್ನ ಅವ ನಾಸ್ತಿಕನೆಂದೇನೂ ತಮಟೆ ಹೊಡೆದುಕೊಂಡಿಲ್ಲ ಆದರೆ ಆಸ್ತಿಕನಾಗಿರುವುದು ಅಂದರೆ ತೋರಿಕೆಯ ಆಚರಣೆಗೆ ಕಟ್ಟುಬಿದ್ದು ಇನ್ಯಾರನ್ನೋ ಮೆಚ್ಚಿಸಲು ತಾನು ಛದ್ಮವೇಷ ಹಾಕುವುದು ಅನ್ನುವ ಶೈಲಿಯ ಆಸ್ತಿಕತೆಯಿಂದ ಮಾತ್ರ ಅವನು ದೂರಾದೂರ. ಅನುಭವ ಜನ್ಯವಲ್ಲದ ಯಾವುದನ್ನೂ ಸಹ ಅವ ಆರಾಧಿಸಲರಿಯ. ಒಳಿತೋ ಕೆಡಕೋ ಕಂಡು ಅನುಭವಿಸಿ ಅರಿತಾದ ಮೇಲಷ್ಟೆ ಆ ಬಗ್ಗೆ ಸ್ವಂತ ಅಭಿಪ್ರಾಯ ರೂಪಿಸಿಕೊಳ್ಳಲು ಶಕ್ತನಾಗಿರುವ ಅವನುˌ ಕೇವಲ ಅದೆ ಸಂಗತಿ ಬಗ್ಗೆ ಅನ್ಯರಿಗೆ ಅನಿಸಿದ್ದರ ಆಧಾರದ ಮೇಲೆ ಎಂದಿಗೂ ಒಂದು ನಿಲುವು ತಳೆದವನಲ್ಲ. ಆದರೆˌ ಯಾವುದಾದರೂ ವಿಷಯ ತನಗೆ ವಿಷ ಅಂತನ್ನಿಸಿದರೆˌ ತನ್ನಂತವರ ಪಾಲಿಗೂ ಅದು ವಿಷಕಾರಿಯೆ ಅನ್ನುವ ಸರ್ವ ಸಮಾನತೆಯ ಮನಸ್ಥಿತಿ ಆತನದ್ದು. ತಾನು ಅಮೃತ ಅಂತ ಭಾವಿಸಿದ್ದರ ಸವಿ ಅನ್ಯರಿಗೂ ತಲುಪಲಿ ಅನ್ನುವ ವಿಶಾಲ ಹೃದಯಿ ಸಹ ಹೌದು.

ಆದರೆ ಭಾವನೆಗಳಿಗೂ ಬೆಲೆ ಕಟ್ಟುವ ಕೆಟ್ಟ ಚಾಳಿಗಿಳಿದಿರುವ ಕೆಟ್ಟ ಪ್ರಪಂಚದಲ್ಲಿ ಅನಿವಾರ್ಯವಾಗಿ ಬಾಳುತ್ತಾ ಕಾಲ ಹಾಕಲೆ ಬೇಕಾದ ದುಸ್ಥಿತಿಗೆ ಅವನ ಮೇಲೆ ಅವನಿಗೇನೆ ಪಿಚ್ಚೆನಿಸುತ್ತೆ. ಇಲ್ಲಿರಲು ಇಷ್ಟವಾಗದವರಿಗೆ ಎಲ್ಲಾದರೂ ಅಕ್ಕಪಕ್ಕದ ಗ್ರಹಗಳಲ್ಲಿ ಯಾವುದಕ್ಕಾದರೂ ಶಾಶ್ವತವಾಗಿ ತುರ್ತು ವರ್ಗಾವಣೆ ಬಯಸಿಕೊಂಡು ಏಕಾಂತ ವಾಸ ಅಪೇಕ್ಷಿಸಿ ಹೊರಡಲು ಸಾಧ್ಯವಿರುತ್ತಿದ್ದರೆˌ ಈ ಕ್ಷುಲ್ಲಕ ಪ್ರಾಪಂಚಿಕತೆಯ ಜಂಜಡಗಳಿಂದ ಪಾರಾಗಿ ಅದೆಂದೋ ಇಲ್ಲಿಂದ ತಲೆಮರೆಸಿಕೊಂಡು ಪರಾರಿಯಾಗಿ ಸಲ್ಲದ ಅಸಂಖ್ಯ ಅಪವಾದಗಳಿಂದ ಖಂಡಿತವಾಗಿ ಪಾರಾಗುತ್ತಿದ್ದ.

*****

ಅಲ್ಲೆ ಕಂಭಕ್ಕೆ ಒರಗಿಕೊಂಡು ಒಂದೂವರೆ ಕಾಲಿನಲ್ಲಿ ನಿಂತಿದ್ದ ಸುಭಾಶನನ್ನ ತಟ್ಟಿ ಹತ್ತಿರ ಕರೆದು ಕೂರಿಸಿಕೊಂಡು ಅವನಿಗೂ ಚಹ ಕೊಟ್ಟು ಕುಡಿಯುವಂತೆ ಪುಸಲಾಯಿಸಿದ. ತನ್ನ ಕಳ್ಳನಿದ್ದೆ ರೆಡ್ ಹ್ಯಾಂಡಾಗಿ ಸಿಕ್ಕಿಬಿದ್ದದ್ದಕ್ಕೋ ಏನೋ ಮಗು ತೀರಾ ಮುಜುಗರ ಪಟ್ಟುಕೊಂಡು ಸಂಕೋಚದಿಂದಲೆ ಚಹಾ ಹೀರ ತೊಡಗಿತು. ಅವನ ಅಮಾಯಕತೆಗೋ ಅಥವಾ ವಯೋಸಹಜ ಮುಗ್ಧತೆಗೋ ಇವನಲ್ಲಿ ಅರಿಯದ ಒಂದು ಮೃದು ಭಾವ ಹುಟ್ಟಿತ್ತು. "ರಾತ್ರಿ ಎಂತ ಪದಾರ್ಥವ? ಎಂತ ಊಟ ಮಾಡಿ ಬಂದಿದ್ದೆ?" ಅಂದ. ಮತ್ತಷ್ಟು ಸಂಕೋಚದ ಮುದ್ದೆಯಾಗಿ ಅವ "ಗಂಜಿ ಉಪ್ಪಡು" ಅಂದ. "ಬಿಡು ನಾಳೆ ಗಮ್ಮತ್ತು ಕೋಳಿ ಅಲನ" ಅಂತ ಇವ ಕಾಲೆಳೆದ.

( ಇನ್ನೂ ಇದೆ.)

https://youtu.be/GtTX2TZ19Cg

11 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೧೮.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೧೮.👊


ಸದ್ಯ ಕೇರಳದ ಉತ್ತರದ ಗಡಿ ಪಟ್ಟಣವೆಂದು ಬಿಂಬಿಸಲಾಗುವ ತುಳುನಾಡ ಮಣ್ಣು ಮಂಜೇಶ್ವರದಿಂದ ಮಂಗಳೂರು ನಿಲ್ದಾಣ ಸಂಪರ್ಕಿಸುವ ರೈಲ್ವೆ ಮಾರ್ಗ ಬ್ರಿಟಿಷರು ತಮ್ಮ ನೇರ ಆಡಳಿತದಲ್ಲಿದ್ದ ಮದರಾಸು ಪ್ರಾಂತ್ಯದ ರಾಜಧಾನಿ ಮದರಾಸನ್ನು ಪಶ್ಚಿಮದಲ್ಲಿದ್ದ ಕಾಸರಗೋಡು ತಾಲೂಕನ್ನೂ ಒಳಗೊಂಡ ದಕ್ಷಿಣ ಕನ್ನಡ ಜಿಲ್ಲೆಯ ಮುಖ್ಯ ಪಟ್ಟಣ ಮಂಗಳೂರನ್ನ ಸಂಪರ್ಕಿಸಲು ಇಂದಿನ ತಮಿಳುನಾಡು ಹಾಗೂ ಮಲಬಾರು ಮಾರ್ಗವಾಗಿ ಹಾಸಿದ್ದರು. 


ಈಗ ಆ ಮಾರ್ಗಕ್ಕೆ ಕಳೆದ ಶತಮಾನದ ತೊಂಬತ್ತರ ದಶಕದಲ್ಲಿ ಇದೆ ತುಳುನಾಡು ಮೂಲದ ಜಾರ್ಜ್ ಫೆರ್ನಾಂಡಸ್ ಸಚಿವರಾಗಿ ಹೊಂದಿದ್ದ ದೂರದೃಷ್ಟಿಯ ಫಲವಾಗಿ ಹಾಗೂ ಅದಕ್ಕೆ ಒತ್ತಾಸೆಯಾಗಿ ದುಡಿದ ತಂತ್ರಜ್ಞ ವಿ ಶ್ರೀಧರನ್ ಪರಿಶ್ರಮದ ಪರಿಣಾಮವಾಗಿ ಮಂಗಳೂರನ್ನ ನೇರವಾದ ರೈಲ್ವೆ ಮಾರ್ಗದ ಮೂಲಕ ಬೊಂಬಾಯಿಗೆ ಬೆಸೆಯಲು ಹಾಸಲಾಗಿರುವ ತೋಕೂರು - ರೋಹಾ ನಡುವಿನ ರೈಲು ಹಳಿಯೂ ಸೇರಿ ತುಳುನಾಡಿನೊಂದಿಗೆ ಕೇರಳದ ಪಾಲಿಗೂ ಹೊಸ ಸಾಧ್ಯತೆಯೊಂದರ ಬಾಗಿಲನ್ನ ತೆರೆಯಿತು. ವಾಸ್ತವವಾಗಿ ಇಂದು ಕೊಂಕಣ ರೈಲ್ವೆ ಮಾರ್ಗದ ಗರಿಷ್ಠ ಫಲಾನುಭವಿಗಳೆ ಈ ಚತುರ ನಾಯಕರನ್ನ ಆಯ್ಕೆ ಮಾಡಿ ಸಂಸತ್ತಿಗೆ ಕಳಿಸುವ ಕಿಲಾಡಿ ಮಲಯಾಳಿಗಳು.


ಬ್ರಿಟಿಷರ ಕಾಲದಲ್ಲಿಯೆ ಕಳೆದ ಶತಮಾನದ ಆರಂಭದಲ್ಲಿ ತಿರುವಾಂಕೂರಿನ ಮಹಾರಾಜರಾಗಿದ್ದ ಉತ್ತರಮ್ ತಿರುನಾಳ್ ವಹಿಸಿದ ಆಸಕ್ತಿಯ ಫಲವಾಗಿ ಕೊಲ್ಲಂ - ಸೆಂಗೋಟ್ಟೈ - ಮಧುರೈ ಮಾರ್ಗವಾಗಿ ಅವರ ಸಾಮ್ರಾಜ್ಯದ ರಾಜಧಾನಿ ತಿರುವನಂತಪುರಂ ಪಟ್ಟಣವನ್ನ ಮದರಾಸಿನೊಂದಿಗೆ ಬೆಸೆಯುವ ರೈಲು ರಸ್ತೆ ಕಳೆದ ಶತಮಾನದ ಆರಂಭದಲ್ಲಿಯೆ ರಚಿಸಲಾಗಿತ್ತು. ಅನಂತರ ಸ್ವತಂತ್ರ ನಂತರ ಆರಂಭದ ಒಂದೆರಡು ದಶಕದಲ್ಲಿಯೆ ಈ ಮಾರ್ಗವನ್ನ ಉತ್ತರದಲ್ಲಿ ಮಂಗಳೂರು - ಮದರಾಸು ಮಾರ್ಗದ ಜೊತೆ ಬೆಸೆಯಲು ಕೊಲ್ಲಂ - ಶೊರನೂರು ಮಾರ್ಗವಾಗಿಯೂˌ ದಕ್ಷಿಣದಲ್ಲಿ ತಿರುವನಂತಪುರಂನಿಂದ ನಾಗರಕೋಯಿಲ್ - ಕನ್ಯಾಕುಮಾರಿಯವರೆಗೂ ವಿಸ್ತರಿಸಲಾಯಿತು. 


ತೀರ ಇತ್ತೀಚೆಗೆ ಶೊರನೂರಿನಿಂದ ಮಲ್ಲಪುರಂ ಜಿಲ್ಲೆಯ ಮಲೆನಾಡಿನ ಮಡಿಲಲ್ಲಿರುವ ನಿಲಂಬೂರಿಗೂ ಸಹ ಮುಂದೊಮ್ಮೆ ಹೇಗಾದರೂ ಮಾಡಿ ಕರ್ನಾಟಕವನ್ನ ಒತ್ತಾಯದಿಂದಲಾದರೂ ಮಣಿಸಿ ಅದೆ ಮಾರ್ಗವನ್ನ ವಯನಾಡು - ಬಂಡಿಪುರದ ಮಾರ್ಗವಾಗಿ ಮೈಸೂರಿನವರೆಗೂ ಪಶ್ಚಿಮಘಟ್ಟದ ಬೆಟ್ಟಸಾಲಿಗೆ ತೂತು ಕೊರೆದು ಸುರಂಗ ಮಾರ್ಗದ ಮೂಲಕವಾದರೂ ಸರಿ ವಿಸ್ತರಿಸಿಯೆ ತೀರುವ ಹುನ್ನಾರ ಹೊತ್ತೆ ರೈಲು ಸೇವೆ ಒದಗಿಸಲಾಗಿದೆ. ಇದೊಂದೆ ಅನಾಹುತಕಾರಿ ಯೋಜನೆ ಸಾಲದು ಅಂತ ಮಲಬಾರಿನ ಕಣ್ಣೂರು ಜಿಲ್ಲೆಯ ತಲಚ್ಚೇರಿಯಿಂದ ಪಶ್ಚಿಮ ಘಟ್ಟವನ್ನೇರಿ ಕೊಡಗಿನ ಭಾಗಮಂಡಲ - ವಿರಾಜಪೇಟೆ - ಪಿರಿಯಾಪಟ್ಟಣ ಮಾರ್ಗವಾಗಿ ಮೈಸೂರಿಗೆ ರೈಲ್ವೆ ಮಾರ್ಗ ಮಾಡಿಸುವ ಭಯಂಕರ ಅನಾಹುತಕಾರಿ ಯೋಜನೆಯು ಸಹ ಮಲಯಾಳಿಗಳ ಮಂಡೆಯೊಳಗಿದೆ. 


ಇದರೊಂದಿಗೆ ಉತ್ತರದ ಎರಣಾಕುಳಂ ಜಂಕ್ಷನ್ನಿಂದ ಪಶ್ಟಿಮಕ್ಕೆ ಅಲಪ್ಪುಳ - ಹರಿಪಾದ್ - ಅಂಬಲಪುಳ ಮಾರ್ಗವಾಗಿಯೂˌ ಪೂರ್ವಕ್ಕೆ ಚಂಗನ್ನಸ್ಸೇರಿ - ಮಾವೇಲಿಕ್ಕರ - ಕೊಟ್ಟಾಯಂ ಮಾರ್ಗವಾಗಿ ಅಂಡಾಕೃತಿಯಲ್ಲಿ ದಕ್ಷಿಣದ ಕಾಯಾಕುಳಂ ಜಂಕ್ಷನ್ ಸಂಪರ್ಕಿಸುವ ಮಾರ್ಗವೂ ರಚನೆಯಾಗಿದ್ದುˌ ಮಲಯಾಳಿಗಳ ಭಾಗ್ಯಕ್ಕೆ ಎಣೆಯೆ ಇಲ್ಲದಂತಾಗಿದೆ. ಮೊದಲೆ ಹೇಳಿರುವಂತೆ ಇದಕ್ಕೆಲ್ಲ ಮಿಗಿಲಾಗಿ ತನ್ನದೆ ಮಾಲಕತ್ವದಲ್ಲಿ ಕಾಸರಗೋಡಿನಿಂದ - ತಿರುವನಂತಪುರದ ತನಕ ಅತಿವೇಗದ ರೈಲ್ವೆ ಸೇವೆಯನ್ನ ಒದಗಿಸಲು ಹೊಸತಾದ "ಸಿಲ್ವರ್ ಲೈನ್" ರೈಲ್ವೆ ಯೋಜನೆಯನ್ನ ಬೇರೆ ಇಲ್ಲಿನ ರಾಜ್ಯ ಸರಕಾರ ಪ್ರಕಟಿಸಿˌ ಅದರ ಸರ್ವೆ ಕೆಲಸವನ್ನೂ ಸಹ ಈಗಾಗಲೆ ಆರಂಭಿಸಿಯೂ ಆಗಿದೆ.


ಈ ಮೂಲಕ ಮಲೆನಾಡಿನ ಅಂಚಿನ ಉತ್ತರದ ಮಲಬಾರ್ ವಲಯದ ವಯನಾಡು ಹಾಗೂ ದಕ್ಷಿಣದ ಟ್ರಾವಂಕೂರು ವಲಯದ ಇಡುಕ್ಕಿಯ ಹೊರತು ಸಂಪೂರ್ಣ ಕೇರಳದ ಸಣ್ಣಪುಟ್ಟ ಗ್ರಾಮೀಣ ಮೂಲೆ ಮೂಲೆಗೂ ರೈಲು ಸೇವೆಯ ಸಂಪೂರ್ಣ ಲಾಭ ಕಾಲಾಂತರದಲ್ಲಿ ದಕ್ಕಲು ಸಾಧ್ಯವಾಯಿತು. ಅಲ್ಲಿ ಗೆದ್ದು ಬಂದ ಪ್ರತಿಯೊಬ್ದ ಸ್ಥಳಿಯ ಜನಪ್ರತಿನಿಧಿಯೂ ಶ್ರಮಿಸಿದ ಕಾರಣ ಇಂದು ಕೇರಳದ ಉದ್ದಗಲ ರೈಲುಗಳ ಸಂಖ್ಯೆ ವಿಪರೀತ ಅನ್ನುವಷ್ಟು ಹಚ್ಚಿದೆ. ರೈಲ್ವೆ ಸೇವೆಯಲ್ಲಿ ತಾಂತ್ರಿಕ ಗುಣಮಟ್ಟವನ್ನು ಹೆಚ್ಚಿಸುವ ಪ್ರಸ್ತಾವವಿರಲಿ ಅಥವಾ ಹೊಸ ಮಾರ್ಗಗಳಲ್ಲಿ ಪ್ರಯಾಣಿಕರ ಹಾಗೂ ಸರಕು ಸಾಗಣೆಯ ರೈಲುಬಂಡಿಗಳ ಕಾರ್ಯಾಚರಣೆಗೆ ಇಳಿಸುವ ಯೋಜನೆಯೆ ಆಗಿರಲಿ. ಕೇಂದ್ರ ಸರಕಾರ ತನ್ನ ರೈಲ್ವೆ ಇಲಾಖೆಯ ಮೂಲಕ ಪರಿಚಯಿಸುವ ಪ್ರತಿಯೊಂದು ಹೊಚ್ಚ ಹೊಸ ಯೋಜನೆ ಪ್ರಕಟವಾದದ್ದೆ ತಡ ಕೇರಳದ ಸಂಸದರು ಅದರ ಗರಿಷ್ಠ ಪ್ರಯೋಜನವನ್ನು ಮಲಯಾಳಿಗಳಿಗೆ ಮುಟ್ಟಿಸಲು ಸಚಿವಾಲಯವನ್ನ ಎಡೆಬಿಡದೆ ಎಡತಾಕುತ್ತಾನೆ. 


ಇದರ ಪರಿಣಾಮವಾಗಿ ಊರೂರು ನಡುವಿನ ದಟ್ಚ ಕಾಡು ಕಳೆದುಕೊಂಡು ಒಂಥರಾ ಇಡಿ ರಾಜ್ಯವೆ ಅತಿದೊಡ್ಡ ಉಪನಗರವಾಗಿರುವ ಕೇರಳದಾದ್ಯಂತ ಇವತ್ತು ನಗರ ಸಾರಿಗೆಯಂತೆ ರೈಲುಗಳು ಓಡಾಡುತ್ತಿವೆ. ತನ್ನ ಮನೆಯ ಹಿತ್ತಲಲ್ಲೆ ಹಾದು ಹೋಗುವ ರೈಲು ಒಂದು ವೇಳೆ ತಪ್ಪಿ ಹೋದರೆ ಮಾತ್ರ ಮಲಯಾಳಿ ಅನಿವಾರ್ಯವಾಗಿ ಒಲ್ಲದ ಮನಸ್ಸಿನಿಂದ ಬಸ್ಸೇರುತ್ತಾನೆ ಅನ್ನುವ ಜೋಕು ಹೀಗಾಗಿಯೆ ಚಾಲ್ತಿಯಲ್ಲಿದೆ. ಆದ್ದರಿಂದಲೆ ತೆಂಗಿನ ಮರಗಳ ದಟ್ಟ ಸಾಲು ಹೊಂದಿರುವ ಗ್ರಾಮೀಣ ಕೇರಳದ ಹಸುರಿನ ಗದ್ದೆ ಬಯಲಿನ ಕೋಗಿನಲ್ಲಿ ಹರಡಿಕೊಂಡಿರುವ ಹಳಿಗಳ ಮೇಲೆ ಅತ್ತಿಂದಿತ್ತ ಭಾರಿ ಸದ್ದಿನೊಂದಿಗೆ ಓಡುವ ರೈಲುಬಂಡಿಗಳ ಗಡಗಡ ಶಬ್ದಮಾಲಿನ್ಯಕ್ಕೆ ಬೆದರಿದ ಬೆಳ್ಳಕ್ಕಿಗಳ ಸಾಲು ಇದ್ದಕ್ಕಿದ್ದಂತೆ ಮುಗಿಲಿಗೆ ಚಿಮ್ಮಿ ಸಾಮೂಹಿಕವಾಗಿ ಹಾರುವ ದೃಶ್ಯ ವೈಭವವನ್ನು ಕಾಣುವುದಿಲ್ಲಿ ಅಪರೂಪವೇನಲ್ಲ.


*******

ಮುತ್ತಪ್ಪನ ಕೋಲ ಇವರಿಗೆ ಹೆಚ್ಚು ನೋಡಲು ಅವಕಾಶವಾಗಿರಲಿಲ್ಲ. ಸುಭಾಶನೂˌ ಇವನೂ ದಣಪೆ ದಾಟಿ ಕೆಳಬೆಟ್ಟು ತರವಾಡಿನ ಅಂಗಳಕ್ಕೆ ಇಳಿಯುವ ಹೊತ್ತಿಗೆಲ್ಲಾ ಅಲ್ಲಿನ ತರವಾಡು ಮನೆಯ ಎದುರಿನ ವಿಶಾಲ ಅಂಗಳದಲ್ಲಿ ಹಾಕಲಾಗಿದ್ದ ಹಣೆದ ತೆಂಗಿನಗರಿ ಹೊದಿಸಿದ್ದ ಚಪ್ಪರದಡಿ ಬಹುತೇಕ ಮುತ್ತಪ್ಪ ದೈವದ ಕೋಲ ಸಂಪನ್ನವಾಗಿತ್ತು. ಇವರು ಹೋಗಿ ಮುಟ್ಟಿದ್ದ ಹೊತ್ತಿಗಾಗಲೆ ಭೂತ ತನ್ನನ್ನ ನಂಬಿ ಬಂದಿದ್ದ ನೊಂದ ಭಕ್ತಾದಿಗಳಿಗೆ ತನ್ನಿಂದಾದ ಸಾಂತ್ವಾನದ ನುಡಿಗಳನ್ನ ಹೇಳುತ್ತಾ ಅಭಯದಾನ ನೀಡುವ ಪ್ರಕ್ರಿಯೆಯಲ್ಲಿತ್ತು. ಹೀಗಾಗಿ ಅವನಿಗೆ ಮುತ್ತಪ್ಪ ದೈವ ಕೋಲದ ವಿವರವಾದ ಪ್ರಕ್ರಿಯೆಯನ್ನ ಕಣ್ತುಂಬಿಸಿಕೊಳ್ಳುವುದು ಅಸಾಧ್ಯವಾಯ್ತು. ಆದರೂ ಹೋದ ನಂತರ ನಡೆದ ಘಟನಾವಳಿಗಳನ್ನ ಅವನು ಅತಿ ಶ್ರದ್ಧೆಯಿಂದ ತನ್ನ ಕ್ಯಾಮೆರಾ ಕಣ್ಣಿನಲ್ಲಿ ವಿವರವಾಗಿ ಸೆರೆ ಹಿಡಿದ. 


ಅವನು ಮುತ್ತಪ್ಪನ ಕೋಲದಲ್ಲಿ ಗಮನಿಸಿದ್ದ ಮಹತ್ತರ ವಿಷಯವೆಂದರೆˌ ಅಲ್ಲಿ ಮತಾತೀತವಾಗಿ ಮುತ್ತಪ್ಪನ ಭಕ್ತಾದಿಗಳು ನೆರೆದಿದ್ದದ್ದು. ಮುತ್ತಪ್ಪ ಹಿಂದೂಗಳಲ್ಲಷ್ಟೆ ಅಲ್ಲದೆ ಮುಸಲ್ಮಾನ ಹಾಗೂ ಕ್ರೈಸ್ತ ಮತಾವಲಂಭಿಗಳಲ್ಲೂ ಭಕ್ತ ಪಡೆ ಹೊಂದಿರುವುದು ಸ್ಪಷ್ಟವಾಗಿತ್ತು. ಅಂಜುತ್ತಾ ಅಳುಕುತ್ತಾ ಗುಂಪಿನಲ್ಲೊಂದಾಗಿ ಹಿಂದೆಯೆ ನಿಂತು ಕುತ್ತಿಗೆಯುದ್ದ ಮಾಡಿ ತನ್ನ ಅಭಯ ದಾನವನ್ನ ಆಲಿಸುತ್ತಿದ್ದ ಬೂಬಮ್ಮಂದಿರಿಬ್ಬರನ್ನು ಆ ಅರೆಕತ್ತಲಲ್ಲೂ ಗುರುತಿಸಿದ ಮುತ್ತಪ್ಪ ದೈವ ಪಾತ್ರಿಯೆ ಅವರನ್ನ ಮುಂದೆ ಕರೆದು ಅವರ ಮನೋಕ್ಲೇಶವನ್ನ ಗಮನವಿಟ್ಟು ಆಲಿಸಿತು. ಬದುಕಿನ ದುಗುಡ ಹೇಳಿಕೊಳ್ಳುವಾಗ ಚಿಮ್ಮಿದ ಅವರ ಕಣ್ಣೀರನ್ನ ತಾನೆ ಒರೆಸಿ ನೀವೂ ನನ್ನ ಮಕ್ಕಳೆ. ನಾನು ನಿಮ್ಮನ್ನೂ ಸಹ ಕಾಯವ ದೈವ. ಚಿಂತೆ ಬಿಡಿ ನಾನಿದ್ದೇನೆ ಎಲ್ಲಾ ನೋಡಿಕೊಳ್ಳಲು ಅನ್ನುವ ಆಶ್ವಾಸನೆ ಕೊಟ್ಟಿತು. 


ಹೀಗೆಯೆ ನೀರುದೋಸೆ ಟೋಪಿ ಹಾಕಿದ್ದ ಇಬ್ಬರು ಮಾಪಿಳ್ಳೆ ಕಾಕಾಗಳಿಗೂ ಮುತ್ತಪ್ಪ ಕರೆದು ಕೇಪಳದ ಹೂವು - ಗೋಡಡಿಕೆಯ ಪ್ರಸಾದ ನೀಡಿ ಹರಸಿತು. ಅವರ ವಯಕ್ತಿಕ ಸಮಸ್ಯೆಗಳಿಗೂ ಮುತ್ತಪ್ಪನ ಪರಿಹಾರದ ಆಶ್ವಾಸನೆ ಸಿಕ್ಕಿತು.

https://youtu.be/5aqbmtg68dE


( ಇನ್ನೂ ಇದೆ.)