ಕಳೆದ ಆ ಕ್ಷಣಗಳು...

ಮನೆಯ ಮಾಡಿನ ಮೇಲೆ ಮಳೆಯ ಹನಿ ಸುರಿಯುತಿರುವಾಗ,
ಇತ್ತ ಮನದ ಗೂಡಿನ ಒಳಗೂ ನಿನ್ನ ನೆನಪಿನ ದನಿ ಮಾರ್ದನಿಸುತಿದೆ/
ಮಗ್ಗುಲು ಬದಲಿಸುತ್ತಿರುವ ಹಳೆಯ ಸವಿ ಕ್ಷಣಗಳ ಬಿಸುಪಿಗೆ...
ನಾನು ಕರಗಿ ಹೋಗುತ್ತಿದ್ದರೂ,
ನೀ ಜೊತೆಗಿಲ್ಲದ ಕೊರಗು ಪುನಃ ಕಾಡಿಸುತಿದೆ//


ಎಲ್ಲವ ಬಿಟ್ಟು ಎಲ್ಲರನೂ ಮರೆತು ಅಜ್ಞಾತನಂತೆ ಮರೆಯಾಗಿ....
ಅನಾಮಿಕತೆಯ ಗುಹೆಯಲ್ಲಿದ್ದು ಬಿಡುವ ಕಾಮನೆ,
ಮನದ ಮೂಲೆಯಲ್ಲೆಲ್ಲೊ ಕಾಮನೆಯ ಬೀಜ ಬಿತ್ತುತ್ತಿದ್ದರೂ/
ಬಿಡದೆ ಬೆನ್ನಟ್ಟುವ ನಿನ್ನ ನೆನಪುಗಳಿಂದ ಪಾರಾಗಿ ಹೋಗುವ ಮಾರ್ಗ ಮಾತ್ರ...
ಇನ್ನೂ ತೋಚದೆ,
ನಾ ಬಯಸುವ ಎಕಾಂತವಿನ್ನೂ ಮರೀಚಿಕೆಯಾಗಿಯೆ ಉಳಿದಿದೆ//