ನನ್ನ ಕಾತರದ ಕಣ್ಣಿಗೆ....ಕಾಣೋದು ಬರಿ ನೀನೆ....

ಈ ಸಂಕಟಕ್ಕೆ ಕೊನೆಯಿಲ್ಲ...
ಒಡೆದ ಮನಸುಗಳ ಚೂರುಗಳನ್ನು ಮತ್ತೆ ಅಂಟಿಸುವ ಯಾವ ಬೆಸುಗೆಯೂ ಇಲ್ಲವಲ್ಲ!/
ಮೌನದ ಚಿಪ್ಪಲ್ಲಿ ಹುದುಗಿದ್ದರೂ ಮನಸೆಲ್ಲ ಖಾಲಿ ಖಾಲಿ,
ಇಂತಹ ಒಂದು ದುರ್ದಿನದ ನಿರೀಕ್ಷೆ ಖಂಡಿತ ನನಗಿರಲಿಲ್ಲ//


ಬೀಸುವ ಗಾಳಿಯಲ್ಲಿ ನಿನ್ನ ಬಿಸಿಯುಸಿರು.....
ಸಾಗುವ ಹಾದಿಯುದ್ದ ನಿನ್ನವೆ ಹೆಜ್ಜೆಗುರುತು,
ಬಾಳ ಪಯಣವೆಲ್ಲ ನಿನ್ನದೆ ಜೊತೆಯನ್ನು....
ನೀನಿಲ್ಲದಿದ್ದರೂ ಭ್ರಮಿಸುತ್ತೀನಲ್ಲ! ನಾನೆಂತ ಮರುಳ?/
ಸರಿದ ಪರದೆ ಇನ್ನಷ್ಟು ಕಾಲ ಹಾಗೆಯೆ ಇದ್ದಿದ್ದರೆ ಚೆನ್ನಾಗಿತ್ತು...
ಹಾಗಂತಾ ನಾನೂ ಏನು ಸುಭಗನಾಗಿಯೇ ಉಳಿಯುತ್ತಿರಲಿಲ್ಲ,
ಕುಡುಕನಾಗುತ್ತಿದ್ದೆ ;ಖಂಡಿತ ನಿದ್ದೆಯನ್ನೆ ಮರೆತು ನೀರವ ರಾತ್ರಿಗಳನ್ನೆಲ್ಲ ನರಕವಾಗಿಸಿಕೊಳ್ಳುತ್ತಿದ್ದೆ......
ಆದರೆ ಇನ್ನೂ ಕೊಂಚ ತಡವಾಗಿ!//


ಸದ್ದಿರದೆ ಸಂಭವಿಸುವ ಸಂಭ್ರಮದ ಸಿಡಿಲಿನಂತೆ....
ನೋವಿನ ಕರಿಯೆಲ್ಲವ ಮರೆಮಾಚುವ ಮಿಂಚಿನಂತೆ,
ನೆನಪಾಗಿ ಕಾಡುತ್ತಿದ್ದರೂ ;ನಿನ್ನಲ್ಲೂ ಒಂದು ಸವಿಯಿದೆ....
ನೀನಿಲ್ಲದ ಕಹಿಗೆ ಇದಕ್ಕಿಂತ ಹಿತವಾದ ಮದ್ದುಬೇಕ?/
ಕನಸಲ್ಲಿ ನಿತ್ಯ ಬಂದು ಕಾಡುವ ನೀನು....
ನನಸಲ್ಲಿ ನನ್ನಿಂದ ಬಲುದೂರ,
ನಿಜದಲ್ಲಿ ನನ್ನ ತಿರಸ್ಕರಿಸುವ ನಿನ್ನ ಮನ.....
ಕಲ್ಪನೆಯಲ್ಲಿ ಮಾತ್ರ ನನ್ನತ್ತ ಎಷ್ಟೊಂದು ಉದಾರ//