ನಿನ್ನದೊಂದೇ ಒಂದು ನೆನಪು....

ಪಡುವಣ ಕಡಲಿಂದ ಬೀಸುವ ಗಾಳಿಯ ತುಂಬಾ
ಮಳೆಯ ಪಿಸುದನಿ,
ಮೋಡದ ತಾಳಕ್ಕೆ...
ನಾಚಿ ನೀರಾದ ನೆಲದ ಎದೆಯೊಳಗೂ ಮಳೆಯ ಇನಿದನಿ/
ಸಣ್ಣ ಕನವರಿಕೆಗೂ ಬೆಚ್ಚಿಬೀಳುತ್ತಾ
ಕುಮಟಿ ಬೆದರಿದ ನನ್ನ ಮುಗ್ಧ ಮನಸಿಗೆ,
ನಿನ್ನ ಕನಸು ಬಂದು ತಬ್ಬಿದಾಗ ಸ್ವಲ್ಪ ನೆಮ್ಮದಿ//



ಮಳೆ ಮೂಡಿಸಿದ ಗಾನದ ಆಲೆಗಳಲ್ಲಿ
ಮಿಂದ ನನ್ನ ಮನಸು ಮೌನಕ್ಕೆ ಶರಣಾಗಿ,
ನಿನ್ನ ನೆನಪಲ್ಲಿ ತೇಲುತ್ತ....
ನನ್ನವೆರಡು ಕಣ್ಣ ಹನಿಗಳ ಆ ಧಾರೆಗೆ ಸೇರಿಸಿದೆ/
ಸಂತಸದ ಪರಿಚಯವೆ ಮರೆತು ಹೋದ
ನನ್ನವೆರಡು ಕಂಗಳಲ್ಲಿ....
ಎಂದಾದರೊಮ್ಮೆ ಅಪರೂಪಕ್ಕೆ ಚೂರು ಮಿಂಚು ತುಂಬೋದು,
ನಿನ್ನದೊಂದೇ ಒಂದು ನೆನಪು//



ಸಂಜೆ ಸುರಿದ ಸೋನೆ ಮಳೆ...
ನನ್ನ ಬರಡು ಮನಸ ಮೇಲೆ,
ನಾಲ್ಕು ಹನಿಯ ಹನಿಸಿ...
ಸವಿ ನೆನಪುಗಳ ಬೀಜಗಳನ್ನೆಲ್ಲ
ಮತ್ತೆ ಮೊಳಕೆಯೊಡೆಸಿವೆ/
ಕೊನೆಯಾಗಲಾರದ ಗುರಿಸೇರಲಾರದ
ಕಡೆಯವರೆಗೂ ಹಸುರಾಗಿಯೇ ಇರುವ...
ಮಧುರ ಒಗಟು,
ಅದೇ ನಿನ್ನೆಡೆಗಿನ ನನ್ನ ಪ್ರೀತಿ//