03 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೧೦.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೧೦.👊


ಇದಾದ ಬೆನ್ನಿಗೆ ಒತ್ತಾಯಕ್ಕೆ ಬಲಿಯಾಗಿ ಮತಾಂತರಿತವಾಗಿದ್ದರೂ ಕೇವಲ ಅಂದಾಜು ಹಾಗೂ ಅನುಮಾನದ ಆಧಾರದ ಮೇಲೆ ಮಾತ್ರ ನಡೆಸಲಾದ ಇಂಕ್ವಿಜಿ಼ಷನ್ನುಗಳಂತಹ ಧಾರ್ಮಿಕ ನ್ಯಾಯಾಲಯಗಳ ಪೈಶಾಚಿಕತೆ ಮಿತಿಮೀರಿದಾಗ ನವ ಕ್ಯಾಥೋಲಿಕರಾಗಿದ್ದ ಅದೆ ಹಿಂದೂ ಸಾರಸ್ವತ ಮತ್ತಿತರರ ಎರಡು ಮೂರು ತಲೆಮಾರು ಹಿಂದಿನ ರಕ್ತ ಸಂಬಂಧಿಗಳಾಗಿದ್ದ ಗೋವನ್ನರೂ ಅವರನ್ನ ಅಲ್ಲಿಯವರೆಗೂ ಹಿಂಬಾಲಿಸಿದ್ದಾರೆ. ಎರಡು ವಿಭಿನ್ನ ಕಾಲಘಟ್ಟಗಳಲ್ಲಿ ನಡೆದಿದ್ದ ಈ ಸಾಮೂಹಿಕ ವಲಸೆಗಳಲ್ಲಿ ಕೆಲಕಾಲ ತುಳುನಾಡಲ್ಲಿ ತತ್ಕಾಲಿಕ ನೆಲೆ ಕಂಡುಕೊಂಡಿದ್ದ ಈ ಎರಡೂ ವರ್ಗದ ವಲಸಿಗರೂ ಸಹ ತಮ್ಮೊಂದಿಗೆ ಕೊಂಕಣಿ - ತುಳು ಸಂಸ್ಕೃತಿಗಳನ್ನ ಅಲ್ಲಿಯವರೆಗೂ ಕೊಂಡೊಯ್ದು ಪಸರಿಸಿದ್ದಾರೆ. ಹೀಗಾಗಿ ದಕ್ಷಿಣ ಕನ್ನಡದ ಸಂಸ್ಕೃತಿಯನ್ನು ದಕ್ಷಿಣ ಕೇರಳದ ಭಾಗಗಳಿಗೂ ಹರಡುವಲ್ಲಿ ಇವರ ಕೊಡುಗೆಯೂ ಇದೆ.

*****

ಇತ್ತೀಚೆಗೆ ಕೇರಳದಿಂದ ತುಳುನಾಡಿಗೆ ಅಷ್ಟಮಂಗಳ ಪ್ರಶ್ನೆ ಹಾಗೂ ತಾಂಬೂಲ ಪ್ರಶ್ನೆಗಳನ್ನ ಇಡಿಸುವ ಅನಾಚಾರ ಆರಂಭವಾಗಿವೆ. ಕೇರಳಕ್ಕೆ ಸಂಸ್ಕಾರಯುತ ತುಳುನಾಡು ಸಾಂಸ್ಕೃತಿಕ ಹಾಗೂ ಧಾರ್ಮಿಕವಾಗಿ ದೀವಿಟಿಗೆಯೆ ಹೊರತುˌ ಮಾಟ ಮಂತ್ರ ವಾಮಾಚಾರದಂತಹ ದುರ್ವಿದ್ಯಗಳಿಗೆ ತವರೂರಾದ ಕೇರಳದಿಂದ ದುಶ್ಚಟಗಳನ್ನ ತುಳುವರು ಕಲಿತು ಅವನ್ನೆ ಪವಿತ್ರ ಕ್ರಮಗಳಂತೆ ಪ್ರಚಲಿತಗೊಳಿಸುವುದು ಹಾಸ್ಯಾಸ್ಪದ. ಅದರಲ್ಲೂ ಈ ಸಂಘ ಪರಿವಾರದ ಕಮಂಗಿಗಳ ಪುಸಲಾವಣೆಯಿಂದ ಅಷ್ಟಮಂಗಗಳ ಕೊಸ್ನೆˌ ಪಾನ್ ಬೀಡಾ ಪ್ರಶ್ನೆ ಮುಂತಾದ ಮುಂಡಾಮೋಚುವ ಯಾವೊಂದು ಶಾಸ್ತ್ರಾಧಾರಗಳಿಲ್ಲದ ಕೇವಲ ಊಹಾತ್ಮಕವಾದ ಕೌನ್ ಬನೇಗ ಕರೋಡ್ಪತಿ ಶೈಲಿಯ ಕವಡೆ ಶಾಸ್ತ್ರ ಹೇಳಿ ಈ ಮಂಗಗಳು ಕರೆದು ತರುವ ಕೇರಳದ ನಂಬೂದರಿ ನಾಯರಿ ಪಣಿಕ್ಕರ ನಾಯನಾರ ನಾಮಾಂಕಿತ ಸೋಗಿನ ಪೊದುವಾಳರು ಬಂದು ಬಾಯ್ತುಂಬಾ ಬಂಡಲ್ ಬಿಟ್ಟು ನೋಟಿನ ಬಂಡಲ್ ಬಂಡಲ್ಗಳನ್ನೆ ಎಣಿಸಿಕೊಂಡು ತುಳುವರಲ್ಲಿ ಅರಳಿದ ಮೌಢ್ಯದ ಆಸರೆಯಲ್ಲಿ ತಾವು ಬಿಟ್ಟಿ ಬೊಜ್ಜು ಬೆಳೆಸಿಕೊಳ್ಳುತ್ತಾ ಕರೋಡಪತಿಗಳಾಗುತ್ತಿದ್ದಾರೆ ಅನ್ನೋದೆ ಪ್ರತಿಯೊಬ್ಬ ತಥಾಕಥಿತ ಬುದ್ಧಿವಂತರ ಜಿಲ್ಲೆಯ ಬುದ್ಧಿಗೇಡಿ ತುಳುವನೂ ಅವಮಾನದಿಂದ ತಲೆತಗ್ಗಿಸಬೇಕಾದ ವಿಚಾರ.

ಹಾಗಂತˌ ಕೇರಳಕ್ಕೆ ಸ್ವಂತಿಕೆ ಚೂರೂ ಇಲ್ಲ ಅಂತೇನಿಲ್ಲ. ಅಳತೆ ಮೀರಿದ ಜಾತಿಪದ್ಧತಿಯ ಕಟ್ಟಳೆಗಳುˌ ಅನಿರೀಕ್ಷಿತವಾದ ಒತ್ತಾಯದ ಸಾಮೂಹಿಕ ಮತಾಂತರಗಳು ರಾತ್ರೋರಾತ್ರಿ ಸ್ಥಳಿಯ ಧಾರ್ಮಿಕ ಜನಸಂಖ್ಯೆಯ ಅನುಪಾತದಲ್ಲಿ ತಂದಿರುವ ಮಾರ್ಪಾಡು ಒಂಥರಾ ಅಲ್ಲಿನ ಸಮಾಜಕ್ಕೆ ಸಾಮಾಜಿಕ ಶಾಪವಾಗಿ ಪರಿಣಮಿಸಿದ ಕಾರಣ ಧಾರ್ಮಿಕ ಹಾಗೂ ಸಾಮಾಜಿಕವಾಗಿ ಕೇರಳ ದಿಕ್ಕುದೆಸೆ ಕಳೆದುಕೊಂಡು ಅನಾಥವಾಯಿತು ಅನ್ನೋದನ್ನ ಬಿಟ್ಟರೆ ಅದೊಂತರಾ ವಿಶಿಷ್ಟವಾದ ಪ್ರಪಂಚ. ಲಿಂಗಾತೀತವಾಗಿ ಮಲಯಾಳಿಗಳು ಧರಿಸುವ ಧಿರಿಸು ಮುಂಡು. ಸ್ತ್ರೀಯರು ಒಂದು ಮುಂಡನ್ನ ಮೊದಲು  ಗಂಡಸರು ಪಂಚೆ ಸುತ್ತಿಕೊಂಡಂತೆ ಕೇವಲ ಸೊಂಟದ ಸುತ್ತ ಸುತ್ತಿಕೊಳ್ಳುತ್ತಿದ್ದವರು ಈಗ ಮತ್ತೊಂದು ಮುಂಡನ್ನ ಸೆರಗಿನಂತೆ ಹೊದ್ದುಕೊಳ್ಳುತ್ತಾರೆ ಅನ್ನೋದಷ್ಟೆ ಇತ್ತೀಚಿನ ದಿನಮಾನಗಳಲ್ಲಾಗಿರುವ ಸಣ್ಣಪುಟ್ಟ ಬದಲಾವಣೆ. ಕುಬುಸ ತೊಡುವ ಪದ್ಧತಿ ಮೊದಲಿರಲಿಲ್ಲˌ ಆದರೆ ಈಗಿದೆ. 


ಮೊದಲೆಲ್ಲಾ ಉದ್ದ ಕೂದಲು ಬೆಳೆಸಿಕೊಳ್ಳುತ್ತಿದ್ದ ಮಲಯಾಳಿಗಳು ವಿಶಿಷ್ಠವಾಗಿ ತಮ್ಮ ತಲೆಯ ಬಲಭಾಗಕ್ಕೆ ಅದನ್ನ ಮುಡಿ ಕಟ್ಟಿಕೊಳ್ಳುತ್ತಿದ್ದ ಶೈಲಿ ಕೇರಳಕ್ಕೆ ವಿಶಿಷ್ಟವಾದುದು. ಇತ್ತೀಚೆಗೆ ಕ್ರಾಪು ಮಾಡಿಸಿಕೊಳ್ಳುವ ಗಂಡಸರು ಹಾಗೂ ಕೂದಲನ್ನ ಕಟ್ಟದೆ ಬೆನ್ನಹಿಂದೆ ಬಿಡಿಸಿ ಹರಡಿಕೊಳ್ಳುವ ಹೆಂಗಸರು ಆ ವಿಭಿನ್ನ ಬಗೆಯಲ್ಲಿ ಮುಡಿ ಕಟ್ಟಿಕೊಳ್ಳುವ ಸಂಸ್ಕೃತಿ ಮರೆಯತ್ತಿದ್ದಾರೆ ಅಷ್ಟೆ. ಕೊಂಚ ಭರತನಾಟ್ಯದ ನಕಲೆನಿಸಿದರೂ ಕೇರಳಿಗರಿಗೆ ಅವರದ್ದೆ ಆದ ಮೋಹಿನಿಯಾಟ್ಟಂ ನೃತ್ಯ ಶೈಲಿಯಿದೆ. ನಮ್ಮ ಸಣ್ಣಾಟದಂತೆ ಏಕವ್ಯಕ್ತಿ ಪ್ರದರ್ಶನದ ಕೂಡಾಟ್ಟಂನ್ನ ಸೀಮಿತ ಪರಿಕರಗಳ ಸಹಿತ ಕನಿಷ್ಠ ಅಲಂಕಾರಗಳನ್ನ ಮಾಡಿಕೊಂಡು ಆಡುವ ಪ್ರವೃತ್ತಿ ಇಲ್ಲಿನ ಸಾಂಸ್ಕೃತಿಕ ವಲಯದಲ್ಲಿದೆ. ಹಿಂದೂಗಳ ರಾಮಾಯಣ ಕೃಷ್ಣ ಕಥೆ ಮಹಾಭಾರತಗಳಂತೆ ಜನಮಾನಸದಲ್ಲಿ ಮುಸಲ್ಮಾನರ ಮಾಪಿಳ್ಳೆ ಪಾಟ್ಟು ಸಹ ಅಚ್ಚೊತ್ತಿದೆ.


ಆಹಾರ ಕ್ರಮದಲ್ಲೂ ಅಷ್ಟೆ. ಸಕ್ಕರೆಯ ಬಳಕೆ ಅತಿ ಕಡಿಮೆಯಿರುವ ಮಲಯಾಳಿಗಳು ಬೆಲ್ಲಕ್ಕೆ ಹೆಚ್ಚು ಪ್ರಾಮಖ್ಯತೆ ಕೊಡುತ್ತಾರೆ. ಹಾಗೆ ನೋಡಿದರೆ ಕಳ್ಳು ಇಳಿಸಲು ಹಾಗೂ ಬೆಲ್ಲ ಮಾಡಲು ಆಕರವಾಗಿರುವ ಈಚಲ ಮರ ಅವರ ಪಾಲಿನ ಕಲ್ಪವೃಕ್ಷ. ಇದೆ ಕಳ್ಳು ಬಳಸಿ ಅಪ್ಪಂ ತಯಾರಿಸುತ್ತಾರೆ. ಬಾಳೆಹಣ್ಣೂ ಸಹ ಇಲ್ಲಿ ಬಹುಪಯೋಗಿ. ತರಕಾರಿಯಾಗಿ ಕಾಯಿˌ ಪಣಂಪೂರಿಯಾಗಿ ಹಣ್ಣುˌ ಹಬೆಯಲ್ಲಿ ಬೇಯಿಸಿದ ಅರೆಕಾಯಿˌ ಅದರಿಂದ ಮಾಡಿದ ಶ್ಯಾವಿಗೆ ಇಡಿಯಪ್ಪಂ ಜನರ ಉಪಹಾರ. ಸಿಹಿಭಕ್ಷ್ಯಕ್ಕೆ ಬಾಳೆಎಲೆಯಲ್ಲಿ ಸುತ್ತಿ ಹಬೆಯಲ್ಲಿ ಬೇಯಿಸಿದ ಅಡೈ ಇದೆ. ಬಾಳೆ ದಿಂಡಿನ ಪಲ್ಯˌ ಬಾಳೆ ಹೂವಿನ ಸಾರು ಇಲ್ಲಿ ಜನಪ್ರಿಯ. ಮೀನೊಂಥರಾ ಸಾರ್ವತ್ರಿಕ ಆಹಾರ. 

ಸಾಂಪ್ರದಾಯಿಕವಾಗಿ ಒಂಟಿ ತೂತು ಕೊರೆದ ತೆಂಗಿನ ಗರಟೆಯಲ್ಲಿ ಪದರ ಪದರವಾಗಿ ತುಂಬಿದ ಅಕ್ಕಿ ಹಿಟ್ಟು ಹಾಗೂ ತೆಂಗಿನ ತುರಿಯ ಮಿಶ್ರಣವನ್ನ ಹದವಾಗಿ ಹಬೆಯಲ್ಲಿ ಬೇಯಿಸಿದ ಪುಟ್ಟು ಹಾಗೂ ಕಡಲ ಕರಿ ಅಥವಾ ಮೀನ್ ಕೊಳಂಬು ಇಲ್ಲಿನವರ ಪಾರಂಪಾರಿಕ ಖಾದ್ಯ. ಕಞಿ ಅಥವಾ ಪಾಲಞಿ ಅನ್ನಲಾಗುವ ಅನ್ನದ ಗಂಜಿ ಹಾಗೂ ತೆಂಗಿನ ಹಾಲು ಬೆರೆಸಿ ಬೇಯಿಸಿದ ಅಕ್ಕಿಯ ಗಂಜಿˌ ಹುದುಗು ಬರಿಸಿದ ಅಕ್ಕಿ ಹಿಟ್ಟಿನ ಓಡಪ್ಪಂ ಇಲ್ಲಿ ಜನಪ್ರಿಯ. ಪಾಲ್ ಪಾಯಸಂˌ ದೇವಸ್ಥಾನಗಳಲ್ಲಿ ನೈವೇದ್ಯಕ್ಕಿಡುವ ಕೇವಲ ಅಕ್ಕಿ ಹಾಲು ಬೆಲ್ಲ ಹಾಗೂ ತುಪ್ಪ ಬೆರೆಸಿ ಬೇಯಿಸಿದ ಅರವಣ ಪಾಯಸಂ ಮಲಯಾಳಿಗಳ ಮೆಚ್ಚಿನ ಸಿಹಿ ಖಾದ್ಯಗಳು. 

ಬಹುತೇಕ ಮಾಂಸಾಹಾರಿಗಳಿರುವ ಇವರಲ್ಲಿ ದನದ ಮಾಂಸ ವರ್ಜ್ಯವಲ್ಲ. ಕೊಚ್ಚಿ ವಲಯದಲ್ಲಿ ಬಾತುಕೋಳಿ ಹಾಗೂ ಹಂದಿಮಾಂಸಕ್ಕೆ ಹೆಚ್ಚು ಬೇಡಿಕೆಯಿದೆ. ಹಾಗೆ ನೋಡಿದರೆ ಸ್ಥಳಿಯವಲ್ಲದ ಇಡ್ಲಿˌ ದೋಸೆˌ ಚಟ್ನಿˌ ಸಾಂಬಾರು ತುಳುವರು ಹಾಗೂ ತಮಿಳರಿಂದ ಇವರ ಹೊಟ್ಟೆಯ ಮೇಲಾಗಿರುವ ಪರದೇಸಿ ಖಾದ್ಯಗಳ ಹೇರಿಕೆ. ಇಂದಿಗೂ ಕೆಸುವಿನ ಗೆಡ್ಡೆ ಹಾಗೂ ಹಾಲುಗೆಣಸಿನಿಂದ ಮಾಡಲಾಗುವ ಆಹಾರ ವೈವಿಧ್ಯಗಳು ಈ ಮಲಯಾಳಿಗಳ "ಪ್ರಿಯಂಪೆಟ್ಟ" ತಿನಿಸುಗಳು.

ನಿಜ ಹೇಳಬೇಕೆಂದರೆ ಕೇರಳದ ಸಂಸ್ಕೃತಿಗೆ ಅತಿಹೆಚ್ಚು ಕೊಡಮಾಡಿರುವ ತುಳುನಾಡು ಮಲಯಾಳಿಗಳಿಂದ ಸಾಂಸ್ಕೃತಿಕವಾಗಿ ಪಡಕೊಂಡದ್ದು ಮಾತ್ರ ಅತಿ ಕಡಿಮೆ. ಜನಸಂಖ್ಯೆ ಕಿರು ಕರಾವಳಿ ಪ್ರದೇಶದಲ್ಲಿ ಸಾಂದ್ರವಾಗಿರವ ಕಾರಣ ಊರಿನ ಮೇರೆ ಗುರುತಿಸಲು ಕಷ್ಟವಾಗುವಂತೆ ಊರೂರು ಬೆಸೆದುಕೊಂಡು ಇಡಿ ಕೇರಳವೆ ಉಪನಗರಗಳ ಸರಣಿಯ ಜೇಡರಬಲೆಯಂತೆ ಭಾಸವಾಗುತ್ತದೆ. ಊರೂರ ನಡುವಿನ ಹಸಿರು ವಲಯದ ಗಡಿ ಬೆಟ್ಟಗುಡ್ಡಗಳಿರುವ ನಾಲ್ಕೈದು ಮಲೆನಾಡ ಜಿಲ್ಲೆಗಳ ಹೊರತು ಬಹುತೇಕ ಇಲ್ಲಿ ನಾಪತ್ತೆ. ಇದೊಂತರಾ ಇಡಿ ರಾಜ್ಯವೆ ವಿಶಾಲ ನಗರವಾಗಿ ಬದಲಾದಂತಿರುವ ತಮ್ಮದೆ ವೈಶಿಷ್ಟ್ಯಗಳನ್ನ ಇಟ್ಟುಕೊಂಡಿರುವ ಜನರು ನೆಲೆಸಿರುವ ಸಣ್ಣ ರಾಜ್ಯ.

ವರ್ಷದ ಎಲ್ಲಾ ಹಂಗಾಮಿನಲ್ಲೂ ಅನಿರೀಕ್ಷಿತವಾಗಿ ಸುರಿಯವ ಅತಿ ಮಳೆಯ ಕಾರಣ ಅಡ್ಡಮಾಡು ಇಳಿಸಿದ ಕಿರುಗೋಡೆಗಳ ಮನೆಗಳೆ ಸಾಂಪ್ರದಾಯಿಕವಾಗಿ ಕಟ್ಟಲಾಗುತ್ತಿತ್ತು. ಅಡ್ಡಮಾಡುˌ ಮರಗಳ ರೀಪು ಪಕ್ಕಾಸಿಗಳೆ ಮುಖ್ಯವಾಗಿರುವ ಕಮಾನಾಕೃತಿ ಹಾಗೂ ಮಂಗಳೂರ ಹಂಚು ಹೊದೆಸಿದ ಮಣ್ಣಿನ ಗೋಡೆಯ ಮನೆಗಳಷ್ಟೆ ಅಲ್ಲ ಅರಮನೆಗಳನ್ನೂ ಅರಾಮಾಗಿ ಕಾಣಬಹುದಾದ ನಾಡೆ ಈ ಮಲಯಾಳಿಗಳ "ಸ್ವಂತಂ" ಕೇರಳ. 

ಮೂಲತಃ ಮಲಯಾಳಿ ಶ್ರಮಜೀವಿ. ಹುಟ್ಟು ನಾಡು ಕಿರಿದಾಗಿರುವ ಕಾರಣ ವಲಸೆ ಅವನ ಹುಟ್ಟಿಗಂಟಿರುವ ಶಾಪ. ಆನೆಗಳನ್ನ ಪಳಗಿಸಿ ತಂದು ಅದರಿಂದ ಕಡಿದು ಒಟ್ಟಿದ ಮರದ ದಿಮ್ಮಿಗಳನ್ನ ಎಳೆಸುವುದರಲ್ಲಿ ನಿಷ್ಣಾತ. ಮರದ ಮಾರಣಹೋಮ ಮಲಯಾಳಿಗಳ ಮೆಚ್ಚಿನ ಕಸುಬು!

( ಇನ್ನೂ ಇದೆ.)



https://youtu.be/u7ryjJhlb2w

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೯. 👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೯. 👊



ಜಾತಿ ಪದ್ಧತಿಯ ಉಸುಬಿನಲ್ಲಿ ಕಂಠಮಟ್ಟದವರೆಗೆ ಚಿಂತಾಜನಕವಾಗಿ ಸಿಕ್ಕಿ ನರಳಾಡುತ್ತಿದ್ದ ಹದಿನೆಂಟನೆ ಶತಮಾನದ ಕೇರಳದಲ್ಲಿ ಸಾಮಾಜಿಕ ಬದಲಾವಣೆಗಾಗಿ ಶ್ರಮಿಸಿದ ಕೇರಳದ ಧಾರ್ಮಿಕ ಕ್ರಾಂತಿಯ ಹರಿಕಾರ ಮೂರ್ತೆ ಕುಲದ ಶ್ರೀನಾರಾಯಣ ಗುರುಗಳು ಸ್ಥಾಪಿಸಿರುವ ಕೆಲವು ದೇವಸ್ಥಾನಗಳ ಹೊರತು ಬಾಕಿ ಇನ್ನೆಲ್ಲಾ ರಾಜಾಳ್ವಿಕೆ ಕಾಲದಿಂದ ಊರ್ಜಿತದಲ್ಲಿರುವ ಪುರಾತನ ದೇವಸ್ಥಾನಗಳಲ್ಲಿ ಇಂದಿಗೂ ಶಿವಳ್ಳಿ ಬ್ರಾಹ್ಮಣರದ್ದೆ ಪಾರುಪತ್ಯ. ಕೊಚ್ಚಿ ದೈವಸ್ವಂ ಬೋರ್ಡು ಹಾಗೂ ತ್ರಾವಂಕೂರು ದೈವಸ್ವಂ ಬೋರ್ಡುಗಳ ಸ್ಠಾಪನೆಯಾದ ನಂತರ ಸ್ಥಳಿಯ ಮಲಯಾಳಿಗಳು ಈ ದೇವಸ್ಥಾನಗಳ ಆಡಳಿತದ ಪಾರುಪತ್ಯದಲ್ಲಿ ಮೂಗು ತೂರಿಸುವಂತಾಗಿದ್ದರೂ ಸಹ ಇನ್ನೂ ಪೋಟ್ಟಿಗಳೆಂದು ಕರೆಯಲಾಗುವ ಶಿವಳ್ಳಿ ಬ್ರಾಹ್ಮಣ ಪುರೋಹಿತರ ಪ್ರಭಾವಲಯ ಯಾವ ಪುಣ್ಯಕ್ಷೇತ್ರಗಳಲ್ಲೂ ಇನಿತೂ ತಗ್ಗಿಲ್ಲ. 


ಕಾಲಾಂತರದಲ್ಲಿ ಈ ಶಿವಳ್ಳಿ ಪಂಗಡದವರ ನಾಲ್ಕಾರು ತಲೆಮಾರುಗಳು ಅಲ್ಲಿಯೆ ಶಾಶ್ವತವಾಗಿ ನೆಲೆಯಾಗಿರುವ ಕಾರಣ ಅವರೆಲ್ಲರ ತುಳುನಾಡಿನಲ್ಲಿದ್ದ ತಮ್ಮ ಮೂಲದ ನೆಂಟಸ್ತಿಕೆ - ಬೇರಿನ ಬಂಧಾನುಬಂಧ ಕಡಿದು ಹೋಗಿದೆ. ಆರೇಳು ತಲೆಮಾರಿನಿಂದ ಅಲ್ಲಿಯೆ ನೆಲೆ ನಿಂತಿರುವ ಕಾರಣ ಸಹಜವಾಗಿ ಅವರ ಈಗಿನ ಪೀಳಿಗೆಯವರಿಗೆ ತುಳುನಾಡು ಹಾಗೂ ಅಲ್ಲಿನ ಮೂಲಬೇರು ಚೂರುಪಾರು ನೆನಪಿನಲ್ಲಿರುವ ಅಂಶಗಳು ಮಾತ್ರ. ಆದರೆ ಇಂದಿಗೂ ಸಾಮಾಜಿಕ ಬದುಕಿನಲ್ಲಿ ಮಲಯಾಳಂನ ಗಾಢ ಪ್ರಭಾವದ ಮಧ್ಯೆಯೂ ಮಾತೃಭಾಷೆ ತುಳು ಅವರ ಮನೆಭಾಷೆಯಾಗಿ ಉಳಿದೆ ಇದೆ. ಮನೆಯಲ್ಲಿನ ಸಂಸ್ಕೃತಿ ತುಳುನಾಡಿನ ಪದ್ಧತಿಗಳನ್ನಷ್ಟೆ ಆಧರಿಸಿರುತ್ತದೆ.


*****


ಉಡುಗೆ ತೊಡುಗೆಯಲ್ಲೂ ಸಹ ತುಳು ಪ್ರಭಾವ ಇಲ್ಲಿ ದಟ್ಟವಾಗಿದೆ. ಲಿಂಗಾತೀತವಾಗಿ ಮುಂಡು ಸುತ್ತಿಕೊಳ್ಳುವ ಇಲ್ಲಿ ತುಳುನಾಡ ಶೆಟ್ಟಿಗಾರರ ನೇಯ್ಗೆಯ ಉಡುಪಿ ಸೀರೆ ಶ್ರೇಷ್ಠ ಎಂಬ ಭಾವನೆಯಿದೆ. ಉಡುಪಿ ಸುತ್ತಮುತ್ತಲಿನ ಹೆಜಮಾಡಿˌ ಕಾಪುˌ ಮುಲ್ಕಿˌ ಪಡುಬಿದ್ರಿಗಳ ಈ ಮಗ್ಗದ ಸೀರೆಗಳಿಗೆ ಇಂದಿಗೂ ಬಲು ಆದರ ಕೇರಳದಲ್ಲಿದೆ. ಗಂಡಸರು ಹೆಂಗಸರೆನ್ನದೆ ಮುಂಡು ಉಟ್ಟು ಸೊಂಟದಿಂದ ಮೇಲೆ ಬರಿಮೈಯಲ್ಲಿರುವ ಸಂಸ್ಕೃತಿಯ ಕೇರಳದಲ್ಲಿ ಹೆಂಗಸರ ಎದೆ ಮುಚ್ಚುವ ಸೀರೆಯುಡುವ ಪದ್ಧತಿ ಶ್ರೇಷ್ಠವನ್ನಿಸಿದ್ದು ಸಹಜ. ಕೇರಳದ ಕವಿಪುಂಗವರು ಈಗಲೂ ತಮ್ಮ ಕಥೆ ಕವಿತೆ ಕಾವ್ಯಗಳಲ್ಲಿ ನಾಯಕನಿಂದ ತನ್ನ ನಾಯಕಿಗೆ "ತುಳುನಾಡನ್ ಪೂಂಪಟ್ಟು"ವನ್ನೆ ಉಡುಗೊರೆ ಕೊಡಿಸುತ್ತಾರೆ! ಅಷ್ಟು ಅಮೂಲ್ಯ ಅನ್ನುವ ಮಾನ್ಯತೆ ತುಳುನಾಡಿನ ಮಗ್ಗಗಳು ನೇಯ್ದ ಸೀರೆಗೆ ಕೇರಳದ ಜನಮಾನಸದಲ್ಲಿದೆ ಅನ್ನೋದಕ್ಕೆ ಇದೆ ನೇರ ಸಾಕ್ಷಿ. 


ಇನ್ನು ಹೊರದೇಶದಿಂದ ಬರುತ್ತಿದ್ದ ಅರಬ್ಬ ಮುಸಲ್ಮಾನ ವ್ಯಾಪಾರಿಗಳ ಪ್ರಭಾವದಿಂದ ಮಲಬಾರಿನಿಂದ ಪ್ರಾರಂಭವಾಗಿ ಕ್ರೈಸ್ತ ದಟ್ಟಣೆ ಹೆಚ್ಚಿರುವ ಕೊಚ್ಚಿ ಸಂಸ್ಥಾನ ವಲಯಕ್ಕೂ ಹರಡಿ ಕಡೆಗೆ ಹಿಂದೂ ಪ್ರಾಬಲ್ಯದ ತಿರುವಾಂಕೂರು ಸಂಸ್ಥಾನದಲ್ಲೂ ಕಾಲಾಂತರದಲ್ಲಿ ಸಾರ್ವತ್ರಿಕವಾಗಿರುವ ಗೋಮಾಂಸ ಭಕ್ಷಣೆಯ ಆಹಾರ ಪದ್ಧತಿಯ ಕಾರಣ ಪ್ರತಿ ನೂರರಲ್ಲಿ ತೊಂಬತ್ತೈದು ಹೊಟೆಲ್ಲಿನ ಮೆನುವಿನಲ್ಲಿ ಧರ್ಮಾತೀತವಾಗಿ ಗೋ ಮಾಂಸದ ಖಾದ್ಯ ವೈವಿಧ್ಯಗಳು ಲಭ್ಯವಿರುತ್ತವೆ. ಅಂತಹ ವಾತಾವರಣದಲ್ಲಿ ಸಂಪೂರ್ಣ ಸಸ್ಯಾಹಾರಿ ಅಥವಾ ಗೋ ಮಾಂಸ ಭಕ್ಷಣೆ ಒಲ್ಲದವರಿಗೆ ಒದಗಿ ಬರೋದು ಸಮಸ್ತ ಕೇರಳದಾದ್ಯಂತ ಆವರಿಸಿಕೊಂಡಿರುವ "ಉಡುಪ್ಪಿ ಹೊಟ್ಟೆಲ್"ಗಳು ಮಾತ್ರ! ಉಡುಪಿಯನ್ನ ಜನ್ಮದಲ್ಲಿ ಕಂಡಿರದ ಮಲಯಾಳಿಯೂ ಸಹ ತಾನು ಆರಂಭಿಸುವ ಸಸ್ಯಾಹಾರಿ ಫಲಹಾರ ಮಂದಿರಕ್ಕೆ ಉಡುಪ್ಪಿ ಹೊಟ್ಟೆಲು ಎನ್ನುವ ಬೋರ್ಡನ್ನ ತಲೆ ಕೆಡಿಸಿಕೊಳ್ಳದೆ ಹಾಕಿಕೊಳ್ಳುತ್ತಾನೆ! ಮಲಯಾಳಿಗಳ ಪ್ರಕಾರ ಸಸ್ಯಾಹಾರಕ್ಕೆ ಪರ್ಯಾಯ ಪದ ಈ "ಉಡುಪ್ಪಿ". 


ಇದಿಷ್ಚೆ ಅಲ್ಲˌ ವರ್ಷದಲ್ಲಿ ಮೂರು ಸಾರಿ ಉಳಿದೆಲ್ಲ ರಾಜ್ಯದವರೂ ಮಾಲೆಧಾರಿಗಳಾಗಿ ಶಬರಿಮಲೆಗೆ ಇರುಮುಡಿ ಕಟ್ಟಿಕೊಂಡು ಹೋಗುವ ಪದ್ಧತಿ ಜನಪ್ರಿಯವಾಗಿದ್ದರೆˌ ಕೇರಳದ ಸರಾಸರಿ ಮಲಯಾಳಿ ಇದಕ್ಕೆ ತದ್ವಿರುದ್ಧ. ಇಂದಿನ ಕೇರಳದ ದಕ್ಷಿಣದ ತುತ್ತತುದಿಯ ಹಳ್ಳಿ ವೆಳ್ಳದರˌ ಪಾರಶಾಲಾಗಳಿಂದಷ್ಟೆ ಅಲ್ಲ ಅಂದಿನ ಕೇರಳದ ಭಾಗಗಳೆ ಆಗಿದ್ದ ಕನ್ಯಾಕುಮಾರಿ ಜಿಲ್ಲೆಯ ಪಶ್ಚಿಮದಂಚಿನ ಮಾರ್ತಾಂಡಂ ಮಾತ್ರವಲ್ಲ ಪೂರ್ವದಂಚಿನ ಶಚೀದ್ರಂವರೆಗೂ ಅಂದಿಗೂ ಇಂದಿಗೂ ಎಂದಿಗೂ ತೀರ್ಥಯಾತ್ರೆ ಎಂದರೆ ಅದು ಕರ್ನಾಟಕದ ಮೂಕಾಂಬಿಕೆಯ ಸನ್ನಿಧಿ ಕೊಲ್ಲೂರುˌ ಅಲ್ಲಿನ ಕೊಡಚಾದ್ರಿಯ ಸರ್ವಜ್ಞ ಪೀಠ ಹಾಗೂ ಶೃಂಗೇರಿಯ ಶಾರದಾ ಪೀಠ. ಎಳೆ ಮಕ್ಕಳ ಅನ್ನ ಪ್ರಾಶನವಿರಲಿˌ ಮುಂಡನವಿರಲಿˌ ಅಕ್ಷರಾಭ್ಯಾಸದ ಆರಂಭವಾಗಿರಲಿ ಈ ಎರಡರಲ್ಲೊಂದು ಕ್ಷೇತ್ರಗಳಲ್ಲಿ ಆದರೆ ಅದು ಶ್ರೇಷ್ಠತೆಯ ಲಕ್ಷಣ ಎನ್ನುವ ಭಾವನೆ ಮಲೆಯಾಳಿಗಳ ಮನದಲ್ಲಿ ತಲೆತಲಾಂತರದಿಂದ ಅಚ್ಚೊತ್ತಿದೆ. ಮತೀಯವಾದ ಮಾನಸಿಕ ವ್ಯಾಧಿಯಾಗಿ ಪರಿವರ್ತಿತವಾಗಿಲ್ಲದ ಇತ್ತೀಚಿನ ಕೆಲವು ದಶಕಗಳ ಹಿಂದೆಯೂ ಸಹ ಕೇವಲ ಹಿಂದೂ ಮಲಯಾಳಿಗಳಷ್ಟೆ ಅಲ್ಲದೆ ಮುಸಲ್ಮಾನ ಹಾಗೂ ಕ್ರೈಸ್ತ ಮಲಯಾಳಿಗಳೂ ಈ ಆರಂಭಿಕ ಶಿಶು ಸಂಸ್ಕಾರಗಳನ್ನ ಇಲ್ಲಿಗೆ ಬಂದು ಪಾಲಿಸಿಕೊಂಡು ಹೋಗುತ್ತಿದ್ದ ದಾಖಲೆಗಳಿವೆ.


ಮಾಟ ಮಂತ್ರ ತಂತ್ರಶಾಸ್ತ್ರಕ್ಕೆ ಮಾತ್ರ ಒಂದು ಕಾಲದಲ್ಲಿ ಪ್ರಾಮುಖ್ಯತೆಯಿದ್ದ ಇದೆ ಕೇರಳದಲ್ಲಿ ಕಾಲಾಂತರದಲ್ಲಿ ಸ್ಥಾಪನೆಯಾಗಿರುವ ತೃಶೂರಿನ ವಡಕ್ಕುನಾಥನ ಸನ್ನಿಧಿಯೆ ಇರಲಿˌ ಹರಿಪಾದಿನ ಮನ್ನಾರಶಾಲಾದ ನಾಗರಾಜ ದೇವಸ್ಥಾನವೆ ಆಗಿರಲಿˌ ತಳಿಪರಂಬದ ರಾಜರಾಜೇಶ್ವರ ಕ್ಷೇತ್ರವೆ ಇದ್ದಿರಲಿˌ ಕೊಡಂಗಲ್ಲೂರಿನ ಭಗವತಿ ಕ್ಷೇತ್ರದ ಕಥೆಯಾಗಿರಲಿ ಅಥವಾ ಜಗತ್ತಿನ ಸಿರಿವಂತ ದೇವಸ್ಥಾನ ತಿರುವನಂತಪುರದ ಅನಂತಪದ್ಮನಾಭಸ್ವಾಮಿಯೆ ಆಗಿರಲಿ ಅವೆಲ್ಲ ದೇವಸ್ಥಾನದ ಮೂಲಕ್ಷೇತ್ರಗಳು ತುಳುನಾಡಿನಲ್ಲಿವೆ. ಅಲ್ಲಿಂದ ಬಂದ ಭಗವಂತ ಇಲ್ಲಿನ ದೊಡ್ಡ ದೊಡ್ಡ ಸುಪ್ರಸಿದ್ಧ ದೇವಸ್ಥಾನಗಳಲ್ಲಿ ಒಲಿದು ನಿಂತು ನೆಲೆಸಿದ್ದಾನೆ ಎನ್ನುವ ನಂಬಿಕೆ ಮಲಯಾಳಿಗಳಲ್ಲಿದೆ.


ಕೇವಲ ಬೆರಳೆಣಿಕೆಯ ರಾಜಧಾನಿ - ಗರೀಬ ರಥದಂತಹ ಮೇಲುದರ್ಜೆಯ ಬಂಡಿಗಳ ಹೊರತು ತಿರುವನಂತಪುರಂನಿಂದ ಆರಂಭವಾಗಿ ಎರಣಾಕುಳಂˌ ಕೊಲ್ಲಂˌ ಕೊಟ್ಟಾಯಂˌ ಶೊರನೂರುˌ ಪಾಲ್ಘಾಟುಗಳಿಂದ ಮಂಗಳಾಪುರಂ ದಿಕ್ಕಾಗಿ ಉತ್ತರದ ಊರುಗಳತ್ತ ಸಾಗುವ ರೈಲುಗಳೆಲ್ಲ ಹೀಗೆ ತೀರ್ಥಯಾತ್ರೆಗೆ ಬಂದು ಹೋಗುವ ಮಲಯಾಳಿಗಳ ಅನುಕೂಲಗೋಸ್ಕರ "ಮುಕಾಂಬಿಕ ರಸ್ತೆ" ನಿಲ್ದಾಣದಲ್ಲಿ ಒಂದು ನಿಮಿಷ ನಿಲುಗಡೆ ನೀಡುತ್ತವೆ. ಇಡುಕ್ಕಿ - ಪಟ್ಟಣಂತಿಟ್ಟದಿಂದ ಹಿಡಿದು ವಯನಾಡಿನ ಕೆಳಪೇಟೆ - ಕಣ್ಣೂರಿನಂತಹ ಜಿಲ್ಲಾ ತಾಲೂಕು ಕೇಂದ್ರಗಳೆಲ್ಲವಿಂದ ಕೇರಳ ರಾಜ್ಯ ರಸ್ತೆ ಸಾರಿಗೆಯ ಬಸ್ಸುಗಳು ನಿತ್ಯದ ಸಾರಿಗೆ ಸಂಪರ್ಕವನ್ನ ಕೊಲ್ಲೂರಿಗೆ ಕಲ್ಪಿಸುತ್ತವೆ. ಈ ಮಟ್ಟಿಗೆ ಕೇರಳದ ಮೇಲೆ ತುಳುನಾಡು ತನ್ನ "ಮೃದು ಸಾಂಸ್ಕೃತಿಕ ಪ್ರಭಾವ"ವನ್ನ ಇವತ್ತಿಗೂ ದಟ್ಟವಾಗಿಯೆ ಉಳಿಸಿಕೊಂಡಿದೆ. ಕೇರಳದಲ್ಲಿ ಚಿಗುರೊಡೆದಿರುವ ಯಾವ ರಾಜಕೀಯ ಪ್ರೇರಿತ ಕಮ್ಯುನಿಸ್ಟ್ ಕ್ರಾಂತಿಗೂ ಈ ನೆಲದ ವಾಸ್ತವವನ್ನ ಬದಲಿಸಲು ಸಾಧ್ಯವಾಗಿಲ್ಲ. "ದೇವರ ಸ್ವಂತ ನಾಡು" ತನ್ನ ದೇವರನ್ನ ತುಳುನಾಡಿನಲ್ಲಿ ಅರಸುವುದು ತಮಾಷೆಯಾದರೂ ಸತ್ಯ.


*****

ತುಳುನಾಡಿನ ಸಂಸ್ಕೃತಿ ಹಾಗೂ ಆಹಾರ ಪದ್ಧತಿಯನ್ನ ಕೇರಳದ ಜನ ಮಾನಸದಲ್ಲಿ ವಿಸ್ತರಿಸಿರುವ ವಿಷಯದಲ್ಲಿ ಗೋವನ್ನರ ಪಾಲು ಸಹ ಅಪಾರವಾಗಿದೆ. ಐದು ಶತಮಾನಗಳ ಹಿಂದೆ ತಮ್ಮ ತಾಯ್ನೆಲವನ್ನ ಆಕ್ರಮಿಸಿ ಕಡೆಗೆ ತಮಗೇನೆ ಪೀಡೆಯಾಗಿ ಪರಿಣಮಿಸದ್ದ ಪೋರ್ತುಗೀಝರ ಮತಾಂತರ ಪ್ರೇರಿತ ವಿಧ ವಿಧದ ಕಿರುಕುಳಗಳಿಂದ ಬೇಸತ್ತು ಉಟ್ಟ ಬಟ್ಟೆಯಲ್ಲೆ ದೇಶಭ್ರಷ್ಟರಾಗಿ ಅನಿವಾರ್ಯವಾಗಿ ದಕ್ಷಿಣದ ದಿಕ್ಕಿನತ್ತ ನೆಮ್ಮದಿಯ ಬದುಕಿನ ಹುಡುಕಾಟದಲ್ಲಿ ದೇಶಾಂತರ ಹೊರಟಿದ್ದ ಸಾರಸ್ವತ ಸಹಿತರಾದ ಹಿಂದೂ ಕೊಂಕಣಿಗರು ತಿರುವನಂತಪುರದವರೆಗೂ ಹೋಗಿ ನೆಲೆ ನಿಂತಿದ್ದಾರೆ. 

( ಇನ್ನೂ ಇದೆ.)



https://youtu.be/V_2c8hJyqV0

02 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೮ 👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೮ 👊


ಈ ಲೋಕದಲ್ಲಿ ನಂಬುವಂತೆ ಜಗದ ಆಗುಹೋಗುಗಳನ್ನ ನಿರ್ಧರಿಸುವˌ ಇಲ್ಲಿನ ದಿನಚರಿಯನ್ನ ನಿಗವಿಟ್ಟು ಹರಸುವ ಧೃಗೋಚರವಲ್ಲದ ಶಕ್ತಿಗಳು ವಾಸ್ತವದಲ್ಲಿ ಇದ್ದಾವೋ? ಇಲ್ಲವೋ? ಅವನಿಗೆ ಅರಿವಿಲ್ಲ. ಆಸ್ತಿಕರ ವಾದ ನಾಸ್ತಿಕರ ವಿವಾದ ಎರಡಕ್ಕೂ ಹಾಗೆ ನೋಡಿದರೆ ಹೆಚ್ಚಿನ ಮೂಲಭೂತ ವ್ಯತ್ಯಾಸಗಳಿಲ್ಲ. ಇತ್ತಂಡಗಳೂ ತಮ್ಮ ತಮ್ಮ ಆವೃತ್ತಿಗಳನ್ನ ಪ್ರತಿಪಾದಿಸಲು ಕೊಡುವ ಸಕಲೆಂಟು ಅಂಶಗಳಲ್ಲಿ ದೇವರು ದೈವ ದೆವ್ವ ಯಾವುದನ್ನೂ ಪ್ರತ್ಯಕ್ಷವಾಗಿ ಕಂಡ ಬಗ್ಗೆ ಪುರಾವೆ ಒದಗಿಸಲು ಅಶಕ್ತರು! ಕೇಳಿ ನೋಡಿದರೆˌ ಸಲಹುವ ಇಲ್ಲವೆ ಕೊಲ್ಲುವ ಅದೃಶ್ಯ ಶಕ್ತಿಗಳನ್ನ ಕಂಡಿದ್ದೇನೆ ಅನ್ನುವುದಕ್ಕಿಂತ ಅದರ ಉಪಸ್ಥಿತಿಯ ಭಾವವನ್ನ ಅನುಭವಿಸಿದೆ ಅನ್ನುವವರೆ ಬಹುತೇಕ ಎಲ್ಲರೂ. ಇದೊಂಥರಾ ಅವರದೆ ಮೆದುಳಿನ ರಸಚೋದಕಗಳ ಸೃಷ್ಟಿ ಅಲ್ಲದೆ ಮತ್ತಿನ್ನೇನೂ ಇಲ್ಲ. 

ಸತ್ತ ನಂತರ ಮುಂದೇನು? ಅನ್ನುವುದನ್ನ ಈವರೆಗೂ  ಯಾರಿಂದಲೂ ಪೂರಕ ಪುರಾವೆಗಳನ್ನ ಒದಗಿಸಿ ಇದಮಿಥ್ಥಂ ಅಂತ ವಿವರಿಸಲು ಸಾಧ್ಯವಾಗಿಲ್ಲ. ಆದರೆ ಮತಾತೀತವಾಗಿ ಕೇವಲ ಪುರಾಣ ಶಾಸ್ತ್ರಗಳ ಕಥೆಗಳ ಕಂತೆಯನ್ನ ಮುಂದಿಟ್ಟುಕೊಂಡು ತಮ್ಮ ಮೂಗಿನ ನೇರಕ್ಕೆ ಉದ್ದುದ್ದ ಕೊರೆದಾರು ಅಷ್ಟೇ. ಅವರವರ ಧಾರ್ಮಿಕ ನಂಬುಗೆಗಳ ಕಗ್ಗದ ವಿವರಣೆಯಲ್ಲಿ ಸಕಲರೂ ನಿಪುಣರೆ ಹೊರತು ಸ್ವಾನುಭವ ಯಾರದ್ದೂ ಇಲ್ಲ ಈ ವಿಷಯದಲ್ಲಿ. ಸತ್ತವರ್ಯಾರೂ ತಿರುಗಿ ಬಂದು ಇದರ ಬಗ್ಗೆ ಸ್ಪಷ್ಟನೆ ಕೊಟ್ಟಿಲ್ಲ. ಆದರೂ ಸಹ ಅಮಾನುಶ ಶಕ್ತಿಗಳ ಬಗ್ಗೆˌ ಅವುಗಳ ಪ್ರಭಾವ ತಮ್ಮ ದೈನಂದಿನ ಬದುಕನ್ನ ನಿರ್ದೇಶಿಸುವ ಬಗ್ಗೆ ಶ್ರೀಸಾಮಾನ್ಯರಲ್ಲಿ ಅಪಾರವಾದ ನಂಬಿಕೆಯಂತೂ ಇದೆ. 
ಬಹುಶಃ ಸಾಂಸ್ಕೃತಿಕ ನಡೆಯಾಗಿ ಆರಂಭವಾಗಿದ್ದ ಇಂತಹ ಆರಾಧನಾ ಪದ್ಧತಿಗಳು ಇಂದು ಸಂಸ್ಕಾರಕ್ಕಿಂತ ಹೆಚ್ಚಾಗಿ ಧಾರ್ಮಿಕ ನಡಾವಳಿಗಳಾಗಿ ಹೆಚ್ಚು ಪ್ರಚಲಿತದಲ್ಲಿವೆ. ಮತ್ತಿವು ಆಯಾ ಪ್ರದೇಶದ ನಂಬಿಕೆಗಳ ಅನುಸಾರ ಅಲ್ಲಲ್ಲಿನ ಜನಮಾನಸವನ್ನು ಪ್ರಭಾವಿಸುತ್ತವೆ. ಈ ಕೋಲˌ ತಂಬಿಲˌ ನೇಮˌ ಮಚ್ಚಿˌ ನಡಾವಳಿˌ ಮಹಾ ನಡಾವಳಿಗಳೂ ಕೂಡ ಇಂತವೆ. ಕರಾವಳಿ ಕರ್ನಾಟಕದ ವಿಶಿಷ್ಟ ಸಾಂಸ್ಕೃತಿಕ ಅನನ್ಯತೆಯಲ್ಲೊಂದಾಗಿರುವ ಭೂತಾರಾಧನೆಗೆ ಇವೆಲ್ಲಾ ಸಂಬಂಧಪಟ್ಟಿವೆ. ಸ್ಥೂಲವಾಗಿ ಇಂದಿನ ಭಾಷಾವಾರು ರಾಜ್ಯಗಳ ಲೆಕ್ಖದಲ್ಲಿ ಎರಡು ರಾಜ್ಯಗಳ ತಲಾ ಒಂದೂವರೆ ಜಿಲ್ಲೆಗಳಲ್ಲಿ ಈ ಆರಾಧನಾ ಕ್ರಮ ಪ್ರಚಲಿತದಲ್ಲಿದೆ. ಕರಾವಳಿಯ ಭೂತಗಳೆಂದರೆ ಘಟ್ಟದವರ ಕಲ್ಪನೆಯ ದೆವ್ವ ಪಿಶಾಚಿಗಳಲ್ಲ. ಇವು ಸ್ಥಳಿಯರ ಪಾಲಿಗೆ ಪಿತೃ ದೇವತೆಗಳು. ತಮ್ಮನ್ನ ಕಷ್ಟ ನಷ್ಟದಿಂದ ಪಾರು ಮಾಡುವ ಹಾಗೂ ಸತ್ಯದ ದೀವಿಟಿಗೆಯ ಬೆಳಕಲ್ಲಿ ಕಾಯುವ ಮಮತೆಯ ದೈವಗಳು. ತಮಾಷೆಯೆಂದರೆ ಇಲ್ಲಿನ ಬಹುತೇಕ ದೈವಗಳೆ ಸ್ಥಳಿಯವಲ್ಲ. ಕೊಜಿಲುˌ ಅಜ್ಜಿˌ ಕೊರಗಜ್ಜನಂತಹ ಸ್ಥಳಿಯ ಬುಡಕಟ್ಟಿನ ಕೆಲವೆ ಕೆಲವು ದೈವಗಳನ್ನ ಬಿಟ್ಟು ರಾಜನ್ ದೈವಗಳಿಂದ ಹಿಡಿದು ಅವುಗಳ ಪರಿವಾರ ದೈವಗಳವರೆಗೆ ಹಳೆಯ ದೈವಗಳೆಲ್ಲ ಘಟ್ಟವನ್ನಿಳಿದೆ ಕರಾವಳಿಗೆ ಬಂದು ನೆಲೆಯಾದವು. ಅವುಗಳ ಪಾಡ್ದನಗಳ ಆರಂಭದಲ್ಲೆ ಈ ವಿವರಣೆ ಬರುತ್ತದೆ. ಗಮನವಿಟ್ಟು ಪಾಡ್ದನ ಆಲಿಸುವ ತುಳು ಭಾಷೆ ಬರುವ ಎಲ್ಲರಿಗೂ ಇದು ಅರ್ಥವಾಗುತ್ತದೆ. 

ಅನಂತರದ ಘಟನಾವಳಿಗಳಲ್ಲಿ ದೈವತ್ವಕ್ಕೇರಿದವರಲ್ಲಿ ಇರುವವರೆಲ್ಲಾ ಒಂದಾ ಪರದೇಶಿ ಪರಮತೀಯರು ಇಲ್ಲವೆ ಆಯಾ ಕಾಲಘಟ್ಟದ ಸಾಮಾಜಿಕ ಅಸಮಾನತೆಗಳ ಜಾತಿ ಮೇಲು ಕೀಳಿನ ಕಟ್ಟಳೆಗಳ ವಿರುದ್ಧ ಬಂಡಾಯದ ಧ್ವನಿ ಎತ್ತಿ ಅಂದಿನ ಪ್ರಬಲರ ಅಧಿಕಾರಕ್ಕೆ ಸಂಚು ತರುವ ಭೀತಿ ಎಬ್ಬಿಸಿ ಆ ಆಳುವ ವರ್ಗದ ಮಸಲತ್ತಿಗೆ ಬಲಿಯಾಗಿ ದುರಂತ ಅಂತ್ಯವನ್ನ ಕಂಡ ಆ ಕಾಲದ ಕ್ರಾಂತಿಕಾರಿಗಳು. ಉದಾಹರಣೆಗೆ ಇತ್ತೀಚೆಗೆ ಚಾಲ್ತಿಯಲ್ಲಿ ಸಿಕ್ಕಾಪಟ್ಟೆ ಪ್ರಸಿದ್ಧಿ ಗಿಟ್ಟಿಸಿರುವ ಕೊರಗಜ್ಜನನ್ನೆ ತೆಗೆದುಕೊಳ್ಳಿ. ವಾಸ್ತವವಾಗಿ ಇವನೇನೂ ಅಜ್ಜನಲ್ಲ. ಕೊರಗ ತನಿಯ ಅನ್ನುವ ಯುವಕ. ಹಸಿದ ಹೊಟ್ಟೆಯನ್ನ ತಣಿಸಿಕೊಳ್ಳಲು ಕದ್ರಿಯ ಮಂಜುನಾಥೇಶ್ವರ ಸ್ವಾಮಿಯ ದೇವಸ್ಥಾನದ ಹೊರಾವರಣದ ಮಾಡನ್ನ ಏರಿ ಹಣ್ಣು ಕಿತ್ತು ತಿಂದ  ಅಪರಾಧಕ್ಕೆ ಪಟ್ಟಭದ್ರರ ಕೆಂಗಣ್ಣಿಗೆ ಗುರಿಯಾಗಿ ಕೊಲೆಯಾಗಿ ಹೋಗಿದ್ದ ಅಸಹಾಯಕ ಯುವಕ. ಸತ್ತ ಮೇಲೆ ಕೊಂದವರೆ ಭಯ ಭೀತಿಯಿಂದ ಅವನನ್ನ "ಕೊರಗಜ್ಜ"ನನ್ನಾಗಿಸಿ ಆರಾಧನೆಯ ಸಾಲಿನವರಲ್ಲಿ ಸೇರಿಸಿಬಿಟ್ಟರು.

ಹೀಗೆ ಅನ್ಯಾಯ ಸಂಚು ಮೋಸದಂತಹ ಹತ್ತು ಹಲವಾರು ಕಾರಣಗಳಿಂದ ಅಪಮೃತ್ಯುಗೀಡಾದ ಆ ಕಾಲದ ಅಕಾಲ ಮರಣಕ್ಕೆ ಒಳಗಾಗಿ ಅನಂತರ ಭೂತಗಳಾಗಿ ಆರಾಧಿಸಲ್ಪಡುವ ಕೆಳವರ್ಗದವರ ಉದ್ದ ಪಟ್ಟಿಯನ್ನೆ ಕೊಡಬಹುದು. ಅಂದು ಸತ್ತು ಇಂದು ದೈವವಾಗಿರುವವರ ಬಗ್ಗೆ ಬಹುತೇಕ ತುಳುನಾಡಿನ ಎಲ್ಲರಿಗೂ ಭಯಭಕ್ತಿಯ ಭಾವವಿದ್ದೆ ಇದೆ.

ಈ ಲೋಕದಲ್ಲಿ ನಿಜವಾಗಿಯೂ ದೈವಿಕ ಶಕ್ತಿಗಳಿವೆಯೋ ಇಲ್ಲವೋ ಅನ್ನುವ ಅಂಶ ಅರಿವಿಲ್ಲದಿದ್ದರೂ ಸಹ ಇಲ್ಲಿನ ಶೋಚನೀಯ ಪರಿಸ್ಥಿತಿಯನ್ನ ನೋಡುವಾಗ ಅಂತಹ ದೇವರ ಅಥವಾ ದೈವದ ಅತ್ಯಗತ್ಯ ಈ ಬರಗೆಟ್ಟ ಜಗತ್ತಿಗಂತೂ ಇದ್ದೆ ಇದೆ ಅಂತ ಅವನಿಗೆ ಆಗಾಗ ಎಲ್ಲೆಲ್ಲೂ ಅನಾಚಾರ ಅನ್ಯಾಯ ಕಾಣುವಾಗ ಅನ್ನಿಸೋದಿದೆ. ಏನೋ ಸುಭಾಶನ ಅನಿರೀಕ್ಷಿತ ಆಹ್ವಾನದ ಪ್ರತಿಫಲವಾಗಿ ಅವನಿಗೆ ಕೋಲದ ಸಾಂಸ್ಕೃತಿಕ ಆಚರಣೆಯಲ್ಲಿ ಭಾಗಿಯಾಗುವ ಸದಾವಕಾಶ ಸಿಕ್ಕಿತ್ತು. ಅದರಿಂದ ಅವನೊಳಗಿನ ಅತೃಪ್ತ ಅನ್ವೇಷಕನಿಗೆ ಒಂಚೂರು ತೃಪ್ತಿಯಾಗತ್ತು.

*******

ಥಯ್ಯಂ ಅನ್ನುವ ಮಲಬಾರಿನ ಆಚರಣೆ ಹಾಗೆ ನೋಡಿದರೆ ಕೇರಳದ ಮಲೆಯಾಳಿಗಳ ಮೇಲೆ ಆಗಿರುವ ಸಾಂಸ್ಕೃತಿಕ ಪ್ರಭಾವಗಳಲ್ಲೊಂದು. ಇವತ್ತು ರಾಜಕೀಯವಾಗಿ ತುಳುನಾಡಿಗಿಂತ ಅದೆಷ್ಟೆ ಬಲಿಷ್ಠವಾಗಿ ಬೆಳೆದಿರಬಹುದುˌ ಆದರೆ ತುಳುನಾಡು ಹಾಗೂ ಅಲ್ಲಿನ ಸಾಂಸ್ಕೃತಿಕ ಅನನ್ಯತೆಗಳ ಬಗ್ಗೆ ಕೇರಳದ ಸಾಮಾಜಿಕ ಬದುಕಲ್ಲಿ ಮೊದಲಿನಿಂದಲೂ ಒಂದು ಗೌರವಯುತ ಸ್ಥಾನಮಾನವಿದೆ. ಮಲಯಾಳಿಗಳ ಸುಶಪ್ತಿಯಲ್ಲಿ ಹುದುಗಿರುವ ತೌಳುವ ಶ್ರೇಷ್ಠತೆಯ ಭಾವನೆಯೆ ಇದಕ್ಕೆ ಮೂಲಕಾರಣ. ಪ್ರಮುಖವಾಗಿ ಇಂದಿನ ಕೇರಳದಲ್ಲಿ ಚಾಲ್ತಿಯಲ್ಲಿರುವ ಲಿಪಿˌ ಭೂತಾರಾಧನೆಯ ನಕಲು ಥಯ್ಯಂˌ ಯಕ್ಷಗಾನದ ಎರವಲು ಕಥಕ್ಕಳಿˌ ಚಂಡೆ - ಕೊಂಬು ಕಹಳೆಯ ಬಳಕೆ ಹಾಗೂ ಕಳರಿ ಪಯಟ್ಟು ಎನ್ನುವ ತುಳುನಾಡಿನ ಗೆರೋಡಿಗಳಲ್ಲಿ ಕಲಿತು ಹೋಗಿರುವ ಸಮರ ಕಲೆ ಇವೆಲ್ಲಾ ತುಳುವರಿಂದ ಮಲೆಯಾಳಿಗಳಿಗೆ ಪಾರಂಪರಿಕವಾಗಿ ಉಡುಗೊರೆಯಾಗಿ ಸಿಕ್ಕಿರುವ ಸಾಂಸ್ಕೃತಿಕ ಅನನ್ಯತೆಯ ಅಂಶಗಳು.

ಸತ್ತ ತಾಯಿಯ ಸಂಸ್ಕಾರ ಮಾಡಲು ಬೆಂಕಿಯ ಸೊಡರು ಕೊಡದೆ ಶಂಕರಾಚಾರ್ಯರ ಕೆಂಗಣ್ಣಿಗೆ ಮಲಯಾಳಿಗಳು ತುತ್ತಾದರು ಎನ್ನಲಾಗುತ್ತದೆ. ಹೀಗಾಗಿ ಅವರ ಕಠೋರ ಶಾಪಕ್ಕೆ ಮಲಯಾಳಿ ಮೇಲ್ವರ್ಗ ಗುರಿಯಾಗಬೇಕಾಯಿತು. ಅದರ ಫಲವಾಗಿಯೆ ಯಾರಾದರೂ ಸತ್ತರೆ ಮನೆಯ ಹಿಂಬದಿಯ ಆವರಣದಲ್ಲಿಯೆ ದಹನ ಸಂಸ್ಕಾರ ನಡೆಸಬೇಕು ಅನ್ನುವ ಪದ್ಧತಿ ಮೇಲ್ವರ್ಗದ ಹಿಂದೂ ಮಲಯಾಳಿಗಳಲ್ಲಿದೆ. ಇದೆ ಕಾರಣಕ್ಕೆ ಅಲ್ಲಿನ ದೇವಸ್ಥಾನಗಳಲ್ಲಿ ಅರ್ಚನೆಗೆ ಹಾಗೂ ಪುರೋಹಿತಿಗೆಗೆ ಅಲ್ಲಿನ ಬ್ರಾಹ್ಮಣ ವರ್ಗ ಅನರ್ಹರು. ಹೀಗಾಗಿ ಮಲಬಾರಿನ ಕಣ್ಣೂರಿನಿಂದ ಹಿಡಿದು ಕೇರಳದ್ದೆ ಅನನ್ಯ ಭಾಗವಾಗಿದ್ದ ಕನ್ಯಾಕುಮಾರಿಗೂ ಮೂಡುದಿಕ್ಕಿನ ಶಚೀಂದ್ರಂವರೆಗಿನ ಕೈರಳೀಯ ಸಂಸ್ಕೃತಿಯ ದೇವಸ್ಥಾನಗಳಲ್ಲೆಲ್ಲಾ ಪೂಜೆ ಪುನಸ್ಕಾರ ಸಲ್ಲಿಸುವ ಅಧಿಕಾರ ಹಾಗೂ ಅವಕಾಶವಿರೋದು ಅದೆ ಶಂಕರಾಚಾರ್ಯರು ತುಳುನಾಡಿನಿಂದ ಕರೆತಂದು ನೆಲೆ ನಿಲ್ಲಿಸಿದ್ದಾರೆ ಎಂದೆ ನಂಬಲಾಗಿರುವ ತೌಳುವ ಹಿನ್ನೆಲೆಯ ತುಳು ಭಾಷಿಗ ಶಿವಳ್ಳಿ ಬ್ರಾಹ್ಮಣರಿಗೆ ಮಾತ್ರ. 


ಒಟ್ಟಿನಲ್ಲಿ ಸಾಂಸ್ಕೃತಿಕ ಕೇರಳ ನಯವಾಗಿ ಹೇಳಬೇಕೆಂದರೆ ಪುರಾತನ ತುಳನಾಡ ಪಡಿಯಚ್ಚು. ಸ್ವಲ್ಪ ಒರಟಾಗಿ ಹೇಳುವುದಾದರೆ ಸ್ವಂತಿಕೆಯಿಲ್ಲದ ತುಳುವ ಎರವಲು ಸಂಸ್ಕೃತಿಯ ಕೆಟ್ಟ ನಕಲು. ಕೇರಳದ ಮೇಲಿನ ತುಳುನಾಡಿನ ಸಾಂಸ್ಕೃತಿಕ ಪ್ರಭಾವ ಒಂಥರಾ ಸಾಫ್ಟ್ ಪವರ್ ತರದ್ದು. ಇಂದಿಗೂ ಇದೆ ಹಾಗೂ ಎದ್ದು ಕಾಣುತ್ತೆ.

( ಇನ್ನೂ ಇದೆ.)


https://youtu.be/cKOPJowJypg

01 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೭ 👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೭ 👊



"ಬನ್ನಿ ಬಿಸ ಬಿಸ ಹೋಗುವˌ ಕೋಲ ಮುಗಿಬಹುದು ಇಲ್ಂದ್ರೆ" ಅಂತ ಅವಸರವಸರವಾಗಿ ಹೆಜ್ಜೆ ಹಾಕುತ್ತಾ ಓಡೋಡುವನಂತೆ ಅವ ಮುಂದುವರೆದ. "ನಿಲ್ಲೋ ಮಾರಾಯ! ನನಗೆ ದಾರಿ ಗೊತ್ತಿಲ್ಲ ಬೇರೆ. ನಿಂಗೆ ಪಟ ಬೇಕ ಬೇಡ್ವಾ" ಅಂತ ಬ್ರಹ್ಮಾಸ್ತ್ರ ಪ್ರಯೋಗಿಸಿ ಗದರಿದ ಇವನ ಧ್ವನಿ ಕೇಳಿ ಅವನ ನಡುಗೆ ನಿಧಾನಿಸಿತುˌ. ಅವನ ಕೈಲಿದ್ದ ಚೀಲದಲ್ಲೇನೋ ಮಿಸುಕಾಡಿದಂತಾಯಿತು. "ಎಂತದ ಅದು ಚೀಲದಲ್ಲಿ?" ಅಂದರೆ "ಓ ಅದಾ ಪರಕೆ ಕೋಳಿ. ಕಳೆದ ಸಾರಿ ಕೊರೋನಾ ಹೇಳಿ ಕೋಲ ಇರಲಿಲ್ಲ. ಅಪ್ಪನಿಗೆ ಕಾಯಿಲೆಯಾದಾಗ ಹೇಳಿದ್ದ ಹರಕೆ ಇದು. ಅಮ್ಮ ಕೊಟ್ಟು ಕಳಿಸಿದಾರೆ." ಅಂತು ಮಗು.

ಅಯ್ಯೋ ವಿಧಿಯೆˌ ಹೇಳಿದ ಹರಕೆ ಪೂರೈಸಲು ಕೋಳಿ ಕಳಿಸಿದಾರೆ. ಆ ಹೊತ್ತ ಹರಕೆ ಫಲಿಸದೆ ಆಗಲೆ ಒಂದು ಜೀವ ಬಲಿಯಾಗಿ ಹೋಗಿಯಾಗಿದೆ. ಈಗ ಮತ್ತೆ ಧರ್ಮಕ್ಕೆ ಕೋಳಿಯೊಂದರ ಕುತ್ತಿಗೆಗೆ ಕುತ್ತು ಬರಲಿಕ್ಕಿದೆ. ಒಟ್ಟಿನಲ್ಲಿ ಬೇಡಿದ್ದನ್ನ ದಯಪಾಲಿಸಿರದಿದ್ರೂ ಮುತ್ತಪ್ಪನಿಗೆ ಲಾಟರಿ ಹೊಡೆದಿದೆ ಅಂತ ಅನಿಸಿ ಮುಗುಳ್ನಕ್ಕ. ತನ್ನ ಚೀಲದಲ್ಲಿ ಕೋಳಿ ಇರೋದಕ್ಕೂˌ ಈ ಬೆಂಗಳೂರಣ್ಣ ಮುಗುಳ್ನಗಕ್ಕೂ ಸಂಬಂಧ ಅರಿವಾಗದೆ ಸುಭಾಶ ಇವನ ಮುಖವನ್ನೆ ನೋಡಿ ನಡುಗೆ ಮುಂದುವರೆಸಿದ. ದೂರದಿಂದ ಚಂಡೆಯ ನಾದಸ್ವರದ ನಾದ ಕತ್ತಲೆಯ ಮೌನವನ್ನ ಸೀಳಿಕೊಂಡು ಮೆಲುವಾಗಿ ಇವರ ಕರ್ಣಪಟಲ ಮುಟ್ಟುತ್ತಿತ್ತು. ಇಬ್ಬರೂ ನಡುಗೆ ಮುಂದುವರೆಸಿದರು.

ಹಾದಿ ಸಾಗಲು ಮಾತು ಆರಂಭಿಸಿ "ಅಲ್ಲನ ನಿಮ್ಮ ಮುತ್ತಪ್ಪನ ಕೋಲ ನೋಡಕ್ಕೆ ಬೇರೆ ಊರಿನ ಜನ ಬಂದ್ರೆ ಅಡ್ಡಿಲ್ವ" ಅಂದ. "ಯೇ ಹಂಗೆತನೂ ಇಲ್ಲಯˌ ಯಾರು ಸಾ ಬರಬಹುದು. ಮುತ್ತಪ್ಪ ಭೂತ ಬರಿ ಪಾಪದ ಜನಯ!" ಅಂದನವನು. ಎಲಾ ಎಲಾ! ಪಾಪದ ಜನ ಭೂತವ ಇಲ್ಲ ಭೂತ ಕಟ್ಟುವ ನಲಿಕೆಯವನ? ಅಂದುಕೊಂಡು ನಗುವಿನ ಪ್ರತಿಕ್ರಿಯೆ ನೀಡಿದನಿವ. "ಅಲ್ಲಾ ಮತ್ತೆ ನಿಮಗೆ ಮಲಯಾಳ ಬರ್ತದ? ಮುತ್ತಪ್ಪ ಭೂತ ಮಲಯಾಳದಲ್ಲೆ ಮಾತಾಡದು ಮತ್ತೆ! ಹೂವು ಗಂಧ ಪ್ರಸಾದ ಕೊಡುವಾಗ್ಲೂ ಮಲಯಾಳನೆ." ಅಂದ ಸುಭಾಶ. "ಹಾಂˌ ಹಾಗಿದ್ರೆ ಪಡ್ಚ ಆಯ್ತಲ ಮಾರಾಯ. ನಂಗೆ ಮಲಯಾಳ ಗೊತ್ತಿಲಲ! ಈಗ ಈ ವಿಷಯ ಗೊತ್ತಾಗಿ ಮುತ್ತಪ್ಪ ನನ್ನ ಅಲ್ಲಿಂದ ಓಡಿಸಿದ್ರೆ ಎಂಥ ಮಾಡದ!" ಅಂತ ಇವ ಚುಡಾಯಿಸಿದ. ಆದರೆ ಈ ಸಾರಿ ತಮಾಷೆ ಕಿರಿಯನ ಮಂಡೆಗೆ ಅರ್ಥ ಆಗಲಿಲ್ಲ. ಅವನಿಗೂ ಇಂತಹ ಬಿಕ್ಕಟ್ಟು ಬಹುಶಃ ಹೊಸತು. ಅವನೂ ಗಂಭೀರ ಧ್ವನಿಯಲ್ಲಿ "ಹೌದಲ! ಎಂತ ಮಾಡದಿಯ? ಮಲಯಾಳ ಬರದವರಿಗೆ ಮುತ್ತಪ್ಪ ಮಾತಾಡ್ಸುದು ಹೂವು ಕೊಡದು ಮಾಡದಿದ್ರೆ ಎಂತ ಮಾಡದಪ್ಪ ದೇವೆರೆ!" ಅಂತ ದೈವದ ಸಂಭವನೀಯ ತಕರಾರಿನ ವಿರುದ್ಧ ನ್ಯಾಯ ಪಂಚಾಯತಿಕೆಗೆ ದೇವರನ್ನ ಎಳೆದು ತಂದ. ಇದ್ಯಾಕೋ ತನಗೆ ತಿರುಗಿ ಬಾರಿಸುವ ಸೂಚನೆ ಸಿಕ್ಕ ಕೂಡಲೆ "ಹೇ ಪರವಾಗಿಲ್ಲನˌ ನೀನಿದಿಯಲ್ಲ ಮಾರಾಯ. ನಿನಗೆ ಮಲಯಾಳ ಕನ್ನಡ ಎಲ್ಲಾ ಬರ್ತದಲ. ನಾನು ಕನ್ನಡದಲ್ಲಿ ಮಾತನಾಡಿದ್ದನ್ನ ಮುತ್ತಪ್ಪನಿಗೆ ನೀನೆ ಮಲಯಾಳದಲ್ಲಿ ಹೇಳು. ಮುತ್ತಪ್ಪ ಮಲಯಾಳದಲ್ಲಿ ಕೊಡುವ ಪ್ರಸಾದನ ನನಗೆ ನೀನೆ ಕನ್ನಡದಲ್ಲಿ ಕೊಡು ಆಯ್ತ. ಅಲ್ಲಿಗೆ ಸಮಸ್ಯೆ ಮುಗಿತ್ ಬಿಡು." ಅಂತ ಪರಿಸ್ಥಿತಿಯನ್ನ ತಿಳಿಗೊಳಿಸಲು ಒಂದು ಪಟ್ಟು ಹಾಕಿ ಅವನ ಹೆಗಲ ಮೇಲಿದ್ದ ಕೈ ಸರಿಸಿ ಮೆಲ್ಲಗೆ ಎರಡು ಸಲ ಬೆನ್ನು ತಟ್ಟಿದ. ಬಹುಭಾಷಾ ಕೋವಿದ ಅಂತ ತನ್ನನ್ನ ಹೊಗಳಿದಕ್ಕೆ ಚೂರು ಉಬ್ಬಿದ ಕಿರಿಯ "ಆಯ್ತಾಯ್ತು ಹಂಗಿದ್ರೆ ಚಿಂತೆ ಇಲ್ಲಯ." ಅಂತ ಮಹತ್ತರ ಜವಬ್ದಾರಿ ತನ್ನ ಹೆಗಲಿಗೇರಿದ ಧ್ವನಿಯಲ್ಲಿ ಉತ್ತರಿಸುತ್ತಾ ಇದ್ದಂತೆ ಕೋಲ ನಡೆಯುತ್ತಿದ್ದ ಕೆಳಬೆಟ್ಟು ತರವಾಡಿನ ಅಂಗಳಕ್ಕೆ ಅವರಿಬ್ಬರೂ ಸಮೀಪಿಸಿದರು. ಇವರು ದಣಪೆಯಿದ್ದ ಅಡ್ಡದಾರಿ ಹಿಡಿದು ಬಂದ ಕಾರಣ ದಣಪೆ ಹತ್ತಿಳಿದು ದಾಟಿ ಅಂಗಳ ಸೇರಬೇಕಾಯಿತು.

ಒಂದು ಯಕಶ್ಚಿತ್ ಭಾಷಾ ಗಲಾಟೆ ಮನುಷ್ಯರನ್ನ ದಾಟಿ ದೈವ ದೇವರು ಭೂತಗಳನ್ನೂ ಬಿಟ್ಟೂ ಬಿಡದಂತೆ ಆವರಿಸಿಕೊಂಡಿರುವ ಶೋಚನೀಯ ಗಡಿ ಗಲಾಟೆಯ ಮತ್ತೊಂದು ಮಗ್ಗುಲಿನ ದರ್ಶನ ಅರಿವಿರದೆ ಅನಿರೀಕ್ಷಿತವಾಗಿ ಮಗುವೊಂದರ ಗೊಂದಲದಿಂದ ಅವನ ಮುಂದೆ ಅನಾವರಣವಾಗಿತ್ತು. ನರ ಮನುಷ್ಯರ ಕ್ಷುಲ್ಲಕ ಕೋಳಿ ಜಗಳಗಳೆಲ್ಲ ಪರಮಾರ್ಥದ ದೈವ ದೇವರಿಗೂ ಸೋಂಕಾಗಿ ಹರಡಿರುವ ಬಗ್ಗೆ ಅವನಿಗೆ ಒಳಗೊಳಗೆ ಖೇದವಾಯಿತು.
ಇವರು ಅಂಗಳಕ್ಕಿಳಿಯುವ ಹೊತ್ತಲ್ಲಿ ಕೋಲ ಉಚ್ಛ ಘಟ್ಟ ಮುಟ್ಟಿ ತಾರಕದಲ್ಲಿ ಮೊಳಗುತ್ತಿದ್ದ ವಾದ್ಯಾಲಾಪಗಳ ಮಧ್ಯೆ ಮುತ್ತಪ್ಪನ ವೇಷಧಾರಿ ನಲಿಕೆಯವ ಆವೇಶದ ಭರದಲ್ಲಿ ನಡುಗುತ್ತಾ ಉಚ್ಛ ಸ್ವರದಲ್ಲಿ ಸ್ಥಳಿಯ ತುಳು ಕನ್ನಡ ಕಲಬೆರಕೆಯಾಗಿರುವ ಕಾಸರಗೋಡಿನ ಪೊಟ್ಟು ಮಲಯಾಳಂ ಭಾಷೆಯಲ್ಲಿ ಊರೊಟ್ಟಿನ ಹತ್ತು ಸಮಸ್ತರ ಸಮಸ್ಯೆಗಳ ಬಗ್ಗೆ ಏನೋ ಪರಿಹಾರ ಕೂಗುತ್ತಿದ್ದ. ಇವನ ಕ್ಯಾಮರಾ ಕಣ್ಣಿಗೆ ಭರಪೂರ ಕೆಲಸ. ನಡುನಡುವೆ ಸುಭಾಶನ ಕೆಲವು ಫೊಟೋಗಳನ್ನೂ ಕ್ಲಿಕ್ಕಿಸುತ್ತಾ ಕೋಲದ ವೈಭವˌ ನೆರೆದ ಮಂದಿಯ ಭಕ್ತಿಯೋನ್ಮಾದˌ ಭೂತಸ್ಥಾನದ ಅಲಂಕಾರˌ ಭೂತ ವೇಷ ಕಟ್ಟಿದವನ ಉನ್ಮಾದˌ ವಾದ್ಯಗೋಷ್ಠಿಯವರ ತನ್ಮಯತೆˌ ಮುಂದಿನ ವಿಷ್ಣುಮೂರ್ತಿ ಕೋಲಕ್ಕೆ ವೇಷಧಾರಿಯ ಸಿದ್ಧತೆ ಇವನ್ನೆಲ್ಲಾ ಸಾಧ್ಯವಾದಷ್ಟು ಹಿಮ್ಮೇಳದ ಗದ್ದಲದ ಮಧ್ಯೆಯೆ ಸೆರೆ ಹಿಡಿದ. ಡಿಎಸ್ಎಲ್ಆರ್ ಕ್ಯಾಮೆರಾ ಆಗಿದ್ದರಿಂದ ಲೆನ್ಸ್ ಪದೆ ಪದೆ ಲೆನ್ಸ್ ಬದಲಾಯಿಸುವ ತಾಪತ್ರಯವಿಲ್ಲದೆ ಕೋಲದ ಕೆಲವು ಪ್ರಮುಖ ಘಟ್ಟಗಳ ವಿಡಿಯೋಗಳನ್ನೂ ಮುದ್ರಿಸಿಕೊಳ್ಳಲು ಸಹಾಯವಾಯ್ತು. ಭೂತ ಕುಣಿಯುವವನ ಸಹಿತ ಯಾರೂ ಯಾವುದಕ್ಕೂ ಅಡ್ಡಿ ಮಾಡದೆˌ ಉಲ್ಟಾ ಇವನ ಕ್ಯಾಮೆರಾ ಕಣ್ಣು ಕಂಡದ್ದೆ ಒಂಥರಾ ಅಪ್ರಚೋದಿತವಾಗಿ ಸ್ವಯಂಸ್ಪೂರ್ತಿಯಿಂದ ಫೋಝು ಕೊಡುತ್ತಿರುವಂತೆ ಅಭಿನಯಿಸಿ ಇವನ ಛಾಯಾಚಿತ್ರಗಾರಿಕೆಗೆ ಅವಕಾಶ ಮಾಡಿಕೊಟ್ಟರು.

ಮುತ್ತಪ್ಪನ ನುಡಿ ಮುಗಿದುˌ ಎಳನೀರು - ಬಾಯಲ್ಲೆ ಕಡಿದ ಕೋಳಿಯ ಕುತ್ತಿಗೆಯಿಂದ ಚಿಮ್ಮಿದ ರಕ್ತ ಬೆರೆತ ಕುಡು ಅರಳು - ಬೊಂಡ ಬಾರಣೆಯಾಗಿ ನೆರೆದ ಭಕ್ತಾದಿಗಳಿಗೆ ಹೂವು ಅರಳು ಪ್ರಸಾದ ವಿತರಣೆಯಾಗಿ ಆ ಕೋಲ ಮುಗಿಯುವಾಗ ಘಂಟೆ ಹನ್ನೊಂದೂವರೆ ದಾಟಿತ್ತು. ಸುಭಾಶನ ಪರಕೆ ಕೋಳಿ ತನ್ನ ಇಹಲೋಕದ ವ್ಯಾಪಾರ ಮುಗಿಸಿ ಅದರ ಮಂಡೆ ಮುತ್ತಪ್ಪನ ಸನ್ನಿಧಾನ ಸೇರಿ ಉಳಿದ ಮುಂಡದ ಕೆಳಗಿನ ಭಾಗ ಮತ್ತೆ ಅವನ ಕೈಚೀಲ ಸೇರಿತ್ತು.

ಊರೊಟ್ಟಿನ ಗೆರೋಡಿಗಳಲ್ಲಿ ಇರುವ ಮತ್ತಪ್ಪ ದೈವಕ್ಕೆ ಖಾಲಿ ಬೊಂಡ ಕುಡು ಪನಿವಾರ ಅಂತೆ ಬಾರಣೆಗೆ. ಆದರೆ ತರವಾಡು ಮನೆಯಲ್ಲಿರೋ ಅದೆ ಮುತ್ತಪ್ಪನಿಗೆ ಮಾತ್ರ ಕೋಳಿಯ ರಕ್ತ ಆಗಲೆ ಬೇಕಂತೆ! ಹಾಗಂತ ಇವನಿಗೆ ವೀಕ್ಷಕ ವಿವರಣೆ ಕೊಡುತ್ತಿದ್ದ ಸುಭಾಶ ಇವನ ಕಿವಿಯಲ್ಲಿ ಉಸರಿದ್ದ. ಕೋಳಿಗಳ ಕುತ್ತಿಗೆ ಕೊಯ್ದ ಮುತ್ತಪ್ಪನ ಕಲ್ಲಿನ ಹತ್ತಿರ ಭಕ್ತಾದಿಗಳು ಶ್ರದ್ಧಾ ಭಕ್ತಿಯಿಂದ ಹರಕೆ ತೀರಿಕೆಗಾಗಿ ತಂದು ಅರ್ಪಿಸಿದ್ದ ಅನೇಕ ಕೋಳಿ ತಲೆಗಳ ಪುಟ್ಟ ರಾಶಿ ಎದ್ದಿತ್ತು. ಕಲ್ಲಿನ ಕೆಳ ಪೀಠದಂತಹ ಹಾಸುಗಲ್ಲಿನ ಮೇಲೆ ಕೆಂಪು ರಕ್ತದ ಕೋಡಿ ಹರಿದು ಅಲ್ಲೆಲ್ಲಾ ಒಂಥರಾ ನೆತ್ತರ ಕಮಟು ವಾಸನೆ ಆವರಿಸಿತ್ತು.

******

ಮುತ್ತಪ್ಪನ ಕೋಲದ ಬೆನ್ನಿಗೇನೆ ಭಾರಿ ಗೌಜಿ ಗದ್ದಲದಿಂದ ಶುರುವಾದ ವಿಷ್ಣುಮೂರ್ತಿಯ ಕೋಲ ಕಳೆ ಕಟ್ಟಿತ್ತು. ಭೂತದ ವೇಷ ಭವ್ಯವಾಗಿ ಕಟ್ಟಿದ್ದರು. ಅದರ ಪ್ರಭಾವಳಿಗಳಂತೂ ಅದ್ಭುತವಾಗಿತ್ತು. ಮೇಳದವರು ಸ್ಥಳಿಯರ ಆಡುಭಾಷೆ ತುಳವಿನಲ್ಲೆ ಪಾಡ್ದನ ಹಾಡುತ್ತಿದ್ದರು. ಭೂತವೂ ಸಹ ತುಳುವಿನಲ್ಲೆ ನುಡಿ ಹೇಳಿ ಅಭಯ ಕೊಟ್ಟು ನ್ಯಾಯ ತೀರ್ಮಾನ ಹೇಳಿ ತರವಾಡಿನ ಯಜಮಾನರನ್ನ ಮುಂದೆ ಕರೆದು ಅವರಿಗೆ ರಕ್ಷಣೆಯ ಭರವಸೆಯಿತ್ತು ಗಂಧ ಪ್ರಸಾದ ಇತ್ತಿತು. ಹೆಸರು ಹಿಂಗಿದ್ದ ಮಾತ್ರಕ್ಕೆ ಈ ದೈವ ವಿಷ್ಣುಮೂರ್ತಿಗೂ ವೈದಿಕರ ದೇವರಾದ ವಿಷ್ಣುವಿಗೂ ಏನೂ ಆಂತರಿಕ ನೆಂಟಸ್ತನ ಏನೇನೂ ಇಲ್ಲ ಅಂತ ಇಟ್ಕಳಿ.

ಊರೊಂದು ಸ್ವಸ್ಥವಾಗಿರಬೇಕಿದ್ದರೆˌ ಊರಿನ ಸಾಮಾಜಿಕ ಆರೋಗ್ಯ ಕೆಡದಂತಿರಲು ಇಂತಹ ಅದೃಶ್ಯ ಶಕ್ತಿಗಳು ಅತ್ಯವಶ್ಯ.

( ಇನ್ನೂ ಇದೆ.)

https://youtu.be/MpTW5fXhtNA

30 November 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೬.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೬.👊


ಒಲಿಯ ಬೇಕಿದ್ದ ಪ್ರಾಯದಲ್ಲಿ ಅವಳು ಒಲಿದು ಜೊತೆಗೆ ಬಂದಿದ್ದರೆ. ಆಗಬೇಕಿದ್ದ ವಯಸ್ಸಿನಲ್ಲಿ ತನ್ನದೂ ಮದುವೆಯಾಗಿದ್ದರೆ ಬಹುಶಃ ಇಷ್ಟೆ ದೊಡ್ಡ ಮಗ ಈಗ ತನಗೂ ಇದ್ದಿರುತ್ತಿದ್ದನಲ್ಲ!ˌ ಅವನೂ ಕೂಡ ಹೀಗೆಯೆ ತರಾವರಿ ಪ್ರಶ್ನಾವಳಿಗಳಿಂದ ತನ್ನನ್ನ ಕಂಗಾಲುಗೊಳಿಸುತ್ತಿದ್ದನಲ್ಲ ಅನ್ನುವ ಆಲೋಚನೆ ಅಚಾನಕ್ಕಾಗಿ ಮನಸೊಳಗೆ ಮೂಡುತ್ತಲೆˌ ವಿಷಾದಕ್ಕೋ ಕುಚೋದ್ಯಕ್ಕೋ ಒಂದು ಮಾಸಲು ನಗುವಿನ ಸೆಲೆಯೊಂದು ಅವನ ಮುಖದ ಮೇಲೆ ಹಾದು ಹೋಯಿತು. 


ಯಾವುದೆ ಒಂದು ಅರೆಬರೆ ಹಳ್ಳಿಯಂತಹ ಪಟ್ಟಣ ಪ್ರದೇಶದಿಂದ ಬರುವ ಸರಾಸರಿ ಮಕ್ಕಳ ಮನದಲ್ಲಿರುವ ಕುತೂಹಲ ಸುಭಾಶನ ಮನಸಲ್ಲೂ ಇತ್ತು. ಇಪ್ಪತ್ತೈದು ವರ್ಷಗಳ ಹಿಂದೆ ಇದ್ದ ತನ್ನನ್ನೆ ತಾನು ಕಾಲಯಾನದ ಕನ್ನಡಿಯಲ್ಲಿ ಸ್ವಲ್ಪ ಹಿಂದೆ ಸರಿದು ಕಾಣುತ್ತಿರುವ ಭ್ರಮೆಗೆ ಬಿದ್ದನವ. 


ಆ ಕಾಲಕ್ಕೂ ಈ ಕಾಲಕ್ಕೂ ಇರುವ ಸಣ್ಣಪುಟ್ಟ ವ್ಯತ್ಯಾಸಗಳೆಂದರೆ ಬಡತನ ಬಹುತೇಕ ಸಾರ್ವತ್ರಿಕವಾಗಿದ್ದ ಆ ಕಾಲದಲ್ಲಿ ಕೆಳ ಮಧ್ಯಮ ವರ್ಗದವರ ಸಂಖ್ಯೆಯೆ ಅಪಾರವಾಗಿತ್ತು. ಇವತ್ತಿನ ಪೀಳಿಗೆ ಸಹಜವಾಗಿ ಬದುಕಿನ ಅಂಗಗಳೆಂದೆ ಪರಿಗಣಿಸುವ ಟಿವಿˌ ಫ್ಯಾನುˌ ಮಿಕ್ಸರುˌ ಅಡುಗೆ ಅನಿಲದ ಬಳಕೆಯೂ ಸಹ ಐಶಾರಾಮದ ಸಾಲಿನಲ್ಲಿ ಅಂದಿತ್ತು. ಖಾಸಗಿಯಾಗಿ ವಾಹನಗಳನ್ನ ಕೊಂಡುಕೊಳ್ಳುವ ಸಾಮರ್ಥ್ಯ ಇದ್ದವರು ಆಗೆಲ್ಲ ವಿರಳಾತಿ ವಿರಳ. ಹೀಗಾಗಿ ಸಮೂಹ ಸಾರಿಗೆಗಳಿಗೆ ಬಹಳ ಬೇಡಿಕೆ ಹಾಗೂ ಮರ್ಯಾದೆ ಇತ್ತು. ಹೇಗಾದರೂ ಬೆಳೆದು ದುಡ್ಡು ಮಾಡಬೇಕು ಅನ್ನೋ ಮನಸ್ಥಿತಿಯ ಮಂದಿ ಕನಿಷ್ಠ ಗ್ರಾಮೀಣ ಭಾರತದಲ್ಲಾದರೂ ಕಡಿಮೆ ಸಂಖ್ಯೆಯಲ್ಲಿದ್ಢರುˌ ಹೀಗಾಗಿ ಹಣವಂತಿಗೆಗಿಂತ ನೈತಿಕತೆಗೆ ಜನ ಗೌರವಕೊಡುವ ಕಾಲ ಅದಾಗಿತ್ತು. 


ಸಿನೆಮಾ ಆಗಿನ್ನೂ ಬೀದಿಗೆ ಬಂದಿಲ್ಲದ ಕಾರಣ ಸಿನೆಮಾ ತಯಾರಕರು ಹಾಗೂ ನಟಿಸುವವರು ನಿಜವಾಗಿಯೂ ಕೈಗೆಟುಕದ ನಕ್ಷತ್ರಗಳೆ ಆಗಿರುತ್ತಿದ್ಢರುˌ ಈಗಿನ ಬೀದಿಗೆ ಬಿದ್ದು ಗಠಾರ ಸೇರಿರುವ ತಾರೆಗಳ ಕಥೆ ಬಿಡಿ. ಮಾರುತಿ ಕಾರುಗಳು ಆಗಷ್ಟೆ ಮಾರುಕಟ್ಟೆಗೆ ಲಗ್ಗೆ ಇಡಲಾರಂಭಿಸಿದ್ದರೂ ಸಹ ಅಂಬಾಸಡರ್ ಇನ್ನೂ ತನ್ನ ಪಟ್ಟ ಕಳೆದುಕೊಳ್ಳದೆ ನಗರವಷ್ಟೆ ಅಲ್ಲದೆ ಗ್ರಾಮೀಣ ಭಾರತದ ರಸ್ತೆಗಳಲ್ಲೂ ಅಧಿಪತಿಯಾಗಿಯೆ ಮೆರೆಯುತ್ತಿತ್ತು. ಪತ್ರಿಕೆಗಳಲ್ಲಿ ಪ್ರಕಟವಾದ ಸುದ್ದಿಗಳೆಲ್ಲ ನಿಜವೆಂದೆ ಜನ ನಂಬುತ್ತಿದ್ದರು ಹಾಗೂ ಬಹುತೇಕ ಅದು ಸತ್ಯಸಂಗತಿಯೂ ಆಗಿತ್ತುˌ ಇವತ್ತಿನ ಬಿಕರಿಗಿಟ್ಟಿರುವ ಬರಗೆಟ್ಟ ಪತ್ರಿಕೋದ್ಯಮದ ಬಗ್ಗೆ ಮಾತಾಡೋದು ಬೇಡ ಬಿಡಿ. ಇನ್ನೂ ಜನ ಪರಸ್ಪರರ ಕ್ಷೇಮ ವಿಚಾರಣೆಗೆ ಪತ್ರ ಬರೆಯುವ ತಾಳ್ಮೆ ಇಟ್ಟುಕೊಂಡಿದ್ದರು. ಕಳಿಸಿರುವ ಕಾರಣವದೇನೆ ಇದ್ದರೂ ಕೂಡ ತಂತಿ ಬಂತೆಂದರೆ ಎಲ್ಲರೂ ಆತಂಕಿತರಾಗುತ್ತಿದ್ದರು! ಮನೆಯೂಟಕ್ಕೆ ಮಹತ್ವವಿತ್ತು. ಕೂಡು ಕುಟುಂಬಗಳು ಹೇರಳವಾಗಿದ್ದವು. ತಮ್ಮ ಮನೆಯ ರೇಡಿಯೋದಿಂದಲೋ ಅಥವಾ ಅಕ್ಕಪಕ್ಕದ ಮನೆಯವರದಲಿಂದಲೋ ಬಹುತೇಕ ಎಲ್ಲರ ಕಿವಿಗೂ ಪ್ರದೇಶ ಸಮಾಚಾರˌ ಚಿತ್ರಗೀತೆಗಳು ಹಾಗೂ ಕೃಷಿ ವಾಣಿ ಎಲ್ಲರ ಕಿವಿಗೂ ಬೀಳುತ್ತಿತ್ತು. ಸಿನೆಮಾಗಳನ್ನ ಚಿತ್ರಮಂದಿರಗಳಿಗೆ ಹೋಗಿಯೆ ನೋಡುವ ಸಂಸ್ಕೃತಿ ಆಗಿನ್ನೂ ಇತ್ತು ಹಾಗೂ ಹಾಗೆ ಹೋಗುವ ದಿನ ದಿಬ್ಬಣ ಹೊರಟ ಕಳೆ ಹೋಗುವವರ ಮನೆಯಲ್ಲಿರುತ್ತಿತ್ತು. ಹಬ್ಬ ಹರಿದಿನಗಳಿಗೆ ಮಾತ್ರ ಹೊಸ ಬಟ್ಟೆ ಹಣೆಬರಹದಲ್ಲಿ ಬರೆದಿರುತ್ತಿತ್ತು. ಶಾಲೆಗೆ ಮಕ್ಕಳು ಪಾಠಿ ಚೀಲದಲ್ಲಿ ಸ್ಲೇಟು ಬಳಪ ಕೊಂಡೊಯ್ಯುವ ಕ್ರಮವಿತ್ತು. 


ನಾಲ್ಕನೆ ತರಗತಿಯವರೆಗೆ ಪೆನ್ನು ಬಳಸಲು ನಿರ್ಬಂಧವಿತ್ತು. ಕೆಲವೊಂದು ಕಡೆಗಳಲ್ಲಂತೂ ಐದರಿಂದ ಏಳರವರಗೆ ಇಂಕು ಹಾಕುವ ಮಸಿ ಪೆನ್ನುಗಳನ್ನೆ ಬಳಸಬೇಕಿತ್ತು. ಜನರಲ್ಲಿ ಲೋಲುಪತೆ ಈಗಿನಷ್ಟಿರಲಿಲ್ಲ. ದುಡ್ಡಿಗೆ ನಿಜವಾಗಲೂ ಬೆಲೆಯಿತ್ತು. ಕೊಳ್ಳುಬಾಕತನ ಅಷ್ಟಾಗಿ ಸಾಂಕ್ರಾಮಿಕವಾಗಿರಲಿಲ್ಲ. ಎಲ್ಲಕ್ಕಿಂತ ಮುಖ್ಯವಾಗಿ ಭೂಮಿ  ಇನ್ನೂ ಹೆಚ್ಚು ಹಸುರ್ಹಸಿರಾಗಿತ್ತು. ಜಲ ನೆಲ ಹಾಗೂ ಗಾಳಿಯಲ್ಲಿ ಮಾಲಿನ್ಯದ ಪ್ರಮಾಣ ಇಂದಿಗಿಂತ ತುಂಬಾ ಕಡಿಮೆಯಿತ್ತು. 


ಒಟ್ಟಿನಲ್ಲಿ ಆಗಿನ ಕಾಲದಲ್ಲಿ ಒಳಗೂ ಹೊರಗೂ ಸ್ವಚ್ಛತೆಗೆ ಆದ್ಯತೆ ಮುಗ್ಧತೆಗೆ ಮಾನ್ಯತೆ ಹಾಗೂ ಎಲ್ಲಕ್ಕಿಂತ ಮುಖ್ಯವಾಗಿ ಯೋಗ್ಯತೆಗೆ ಗೌರವ ಇವೆಲ್ಲಾ ಇತ್ತು. ರಾಜಕೀಯದ ಕ್ರಿಮಿಗಳು ಆಗಷ್ಟೆ ಜಾತಿ ಧರ್ಮಗಳ ಹೆಸರಲ್ಲಿ ಜನರ ಮನಸೊಳಗೆ ವಿಷದ ಬೀಜ ಬಿತ್ತಲು ಆರಂಭಿಸಿದ್ದ ಕಾರಣˌ ಸಾಮಾಜಿಕ ಸ್ವಾಸ್ಥ್ಯ ಇಂದಿನಷ್ಟು  ಹದಗೆಟ್ಟಿರಲಿಲ್ಲ. ಸುಭಾಶನಂತಹ ಈ ಕಾಲದ ಮಕ್ಕಳಿಗೆ ಎಳೆಯ ಪ್ರಾಯದಲ್ಲಿ ಇವನ್ನೆಲ್ಲ ಬರಿ ಮಾತುಗಳಲ್ಲಷ್ಟೆ ಹೇಳಿ ಮನದಟ್ಟು ಮಾಡಿಸುವುದು ಕಷ್ಟ. ಅವರೆ ಬೆಳೆದ ನಂತರ ಮುಂದೆ ಕುತೂಹಲವಿದ್ದರೆ ಇದನ್ನ ಅರಸಿ ಅರಿತುಕೊಂಡಾರು ಅಂದುಕೊಂಡ.


*******

ಸುಭಾಶ ಇವತ್ತು ಸ್ವಲ್ಪ ಬೇಗ ಮನೆಗೆ ಮರಳುವ ತವಕದಲ್ಲಿದ್ದಂತೆ ಕಂಡ. "ಯಾಕೋ ಅವಸರ?" ಅಂದರೆ "ಮತ್ತೆಂತಸಾ ಇಲ್ಲˌ ಇವತ್ತು ಕೆಳಬೆಟ್ಟಿನ ತರವಾಡಿನಲ್ಲಿ ಮುತ್ತಪ್ಪ ಮತ್ತೆ ವಿಷ್ಣುಮೂರ್ತಿಯ ಕೋಲ ಉಂಟು! ನನ್ಗೆ ಹೋಗಿ ಕೋಲ ನೋಡ್ಲಿಕ್ಕುಂಟು." ಅಂದ. ಕೋಲ ಅಂದ ಕೂಡಲೆ ಇವನ ಕುತೂಹಲ ಗರಿಗೆದರಿತು. "ಅದೆಲ್ಲಿನ ಕೆಳಬೆಟ್ಟು?" ಅಂದ. "ನೀವು ಸಾ ಬರ್ತಿರ್ಯಾ! ನಿಮ್ಮ ಈ ಕ್ಯಾಮರಾದಿಂದ ಫೋಟೊ ತೆಗಿತಿರಾದ್ರೆ ಕರ್ಕೊಂಡು ಹೋಗ್ತೆ! ನನ್ದೂ ಚೆಂದಗೆ ಫೋಟೋ ತೆಗಿಬೇಕು ಮತ್ತೆ?!" ಅನ್ನುವ ಕಂಡಿಷನ್ನನ್ನ ಅವನೆ ಹಾಕಿ ಕೇಳುವ ಮೊದಲೆ ಅವನೆ ಇವನಿಗೆ ಆಹ್ವಾನವಿತ್ತ. "ಆಯ್ತು ಮಾರಾಯ! ಆದ್ರೆ ನನ್ಗೆ ಸ್ವಲ್ಪ ರೂಮಿಗೆ ಹೋಗಿ ಬರ್ಲಿಕ್ಕುಂಟ. ಆಮೇಲೆ ಬರ್ತಿನಿ ಆದಿತಲ್ಲ?" ಅಂದ. 


"ಆಯ್ತಾಯ್ತುˌ ನೀವು ನಿಮ್ಮ ಹೊಟೆಲಿನ ಕೋಣೆಗೆ ಹೋಗಿ ಬನ್ನಿ ಅಡ್ಡಿಲ್ಲ. ಕೋಲ ಊಟ ಮಾಡಿ ಹೋದ ನಂತರ. ನೀವು ಊಟ ಮಾಡಿ ಆಮೇಲೆ ಆ ಮೇಲ್ಕಾವು ಭಗವತಿ ಕ್ಷೇತ್ರದ ಹತ್ರ ಬನ್ನಿ ಆಯ್ತˌ ನಾವು ಕೋಲ ನೋಡಕ್ಕೆ ಹೋಗುವ. ಕ್ಯಾಮೆರಾ ಮರಿಬೇಡಿ ಮತ್ತೆ ಆಯ್ತ? ಫೋಟೋ ತೆಗಿ ಬೇಕಲ್ಲ!" ಅಂತ ಒತ್ತಿ ಒತ್ತಿ ಸ್ವಕಾರ್ಯವನ್ನ ನೆನಪಿಸಿದ. "ಆಯ್ತೋ ಮಾರಾಯ ಯಾವುದು ಮರೆತರೂ ಕ್ಯಾಮರಾ ಮರೆಯಲ್ಲ ಬಿಡು! ನಿನ್ನ ಫೋಟೋ ತೆಗಿದಿದ್ರೆ ಮುತ್ತಪ್ಪನಿಗೆ ಸಿಟ್ಟು ಬಂದು ಶಾಪ ಗೀಪ ಕೊಡ್ತಾನೇನೋ!" ಅಂದರೆ ಮಗು ಕಿಸಿಕಿಸಿ ಸದ್ದು ಹೊರಡಿಸುತ್ತಾ ಹಲ್ಲು ಬಿಟ್ಟು ನಕ್ಕಿತು. ಪರವಾಗಿಲ್ಲ! ಜೋಕು ಇವನಿಗೂ ಅರ್ಥವಾಗುತ್ತದೆ ಅಂದುಕೊಂಡ ಇವನ ಮುಖದಲ್ಲೂ ತುಂಟನಗು ಅರಳಿತು.

*******


ಬ್ಯಾಂಡು ಚೆಂಡೆ ತ್ರಾಸೆ ಗಂಟೆಮಣಿ ದುಡಿ ನಾದಸ್ವರ ಕೊಳಲು ಹೀಗೆ ಅಲ್ಲಿ ಹಲವಾರು ವಾದ್ಯಗಳ ಸಂತೆಯೆ ನೆರೆದಂತಿತ್ತು. ಮುತ್ತಪ್ಪನ ಕೋಲ ಬಹುತೇಕ ಸಂಜೆ ಸೂರ್ಯ ಕಂತುವಾಗಲೆ ಆರಂಭವಾಗಿ ಎರಡು ಹಂತಗಳಲ್ಲಿ ಸಾಗಿ ರಾತ್ರಿ ಮಾಗುವ ಹೊತ್ತಿಗೆ ಮುಗಿಯುತ್ತದಂತೆ. ಮುತ್ತಪ್ಪ ಭೂತಕ್ಕೆ ವೇಷ ಕಟ್ಟುವವರ ವೇಷವೂ ಸಹ ಅಷ್ಟೇನೂ ವಿಶೇಷ ಅಲಂಕಾರ ಇಲ್ಲದ ಸಾಕಷ್ಟು ಸರಳ ವೇಷಗಾರಿಕೆ ಅಷ್ಟೆ. ಇವನು ರೂಮಿಗೆ ಮರಳಿ ಮಿಂದುˌ ಕೆಳಗಿನ ನಾಯರನ ಕ್ಯಾಂಟೀನಿನಲ್ಲಿ ಮೀನೂಟ ಮಾಡಿ ಮೇಲ್ಕಾವಿಗೆ ಬರುವಾಗಲೆ ಘಂಟೆ ಎಂಟೂವರೆಯಾಗಿತ್ತು. 


ಕ್ಯಾಮರಾ ತಂದು ಫೊಟೋ ತೆಗೆಯುವ ಮಾತು ಕೊಟ್ಟ ಈ ಬೆಂಗಳೂರಣ್ಣ ಕೈಕೊಟ್ಟನೇನೋ ಎನ್ನುವ ಆತಂಕ ಹೊತ್ತ ಮುಖದಲ್ಲಿ ಚಡ್ಡಿ ಪೈಲ್ವಾನ ಸುಭಾಶ ಆಗಲೆ ಬಂದು ಚಡಪಡಿಸುತ್ತಾ ಇವನ ಬರುವನ್ನೆ ಕಾಯುತ್ತಾ ನಿಂತಿದ್ದ. ಅನಿರೀಕ್ಷಿತವಾಗಿ ಒದಗಿ ಬಂದ ಕೋಲದ ಸಾಂಸ್ಕೃತಿಕ ಪ್ರದರ್ಶನ ನೋಡುವ ಸದಾವಕಾಶ ತಪ್ಪಿಸಿಕೊಳ್ಳಲು ಇವನೇನು ಮೂರ್ಖನೆ? ಇವನ ತಲೆ ಕಂಡದ್ದೆ ದೊಡ್ಡ ಯಜಮಾನನಂತೆ ಮಂಡೆಗೆ ಉಲ್ಲಾನಿನ ಟೊಪ್ಪಿ ಏರಿಸಿಕೊಂಡು ಮಫ್ಲರ್ ಕುತ್ತಿಗೆಗೆ ಸುತ್ತಿಕೊಂಡು ಒಂದು ಕೈಯಲ್ಲಿ ಮಿಣುಕು ಬ್ಯಾಟರಿ ಹಿಡಿದುಕೊಂಡು ಮತ್ತೊಂದರಲ್ಲಿ ಚೀಲವೊಂದನ್ನ ಹಿಡಿದುಕೊಂಡು ಕಾಯುತ್ತಾ ನಿಂತಿದ್ದ ಸುಭಾಶನ ಮುಖದಲ್ಲೊಂದು ಗೆಲುವಿನ ನಗೆ ಮೂಡಿತು.


( ಇನ್ನೂ ಇದೆ.)


https://youtu.be/RLl01d6tRcc

29 November 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೫ 👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೫ 👊
 


ಊರ ಪ್ರಮುಖ ನೀರು ಸರಬರಾಜು ತೊಟ್ಟಿಯಲ್ಲಿ ನಾಲ್ಕಾರು ತಿಂಗಳ ಹಿಂದೆ ಜಾರಿಬಿದ್ದ ಗಡವ ಮಂಗವೊಂದು ಅಲ್ಲೆ ಮುಳುಗಿ ಸತ್ತು ಕೊಳೆತು ನಾರಿ ಅದೆ ನೀರನ್ನ ನಿತ್ಯ ಸೇವಿಸಿದ ಎಲ್ಲರಿಗೂ ಕಾಯಿಲೆ ಆಗಿದೆ ಅನ್ನುವ ಪುಕಾರೆಬ್ಬಿಸಿದರು ಕೆಲವರು. ಇಲ್ಲಾˌ ಊರಿನ ನೀರು ಸರಬರಾಜು ಕೇಂದ್ರದ ಪ್ರಮುಖ ಸಂಗ್ರಹ ತೊಟ್ಟಿ ದಶಕಗಳಿಂದ ಸ್ವಚ್ಛತೆ ಕಾಣದೆ ಹೂಳು ಕೆಸರು ಪಾಚಿ ಕಟ್ಟಿಕೊಂಡು ನಾರುತ್ತಿದೆ. ಸದ್ಯದ ಕಾಯಿಲೆ ಹುಟ್ಟಿನ ಮೂಲ ಅದೆ. ಮಂಗನ ಕಥೆಯಲ್ಲಾ ಸುಳ್ಳು ಅಂತ ಒಂದಷ್ಟು ಜನ ಗುಲ್ಲೆಬ್ಬಿಸಿದರು. 

ಮಂಗನ ಹೆಣವೋ ಇಲ್ಲಾ ಕೊಳೆತ ಕೆಸರಿನ ಪಾಚಿಯ ಋಣವೋ ಊರಿಗೆ ಊರೆ ವಾಂತಿ ಬೇಧಿಗೆ ಬಲಿಯಾದದ್ದು ಮಾತ್ರ ವಾಸ್ತವ ಹಾಗೂ ದುರಂತ. ಈ ಇಬ್ಬದಿಯ ವಿತಂಡವಾದದ ಪುಕಾರುಗಳೆಲ್ಲ ರಾಜಕೀಯ ಪ್ರೇರಿತ ಅನ್ನೋದು ಖಚಿತವಾಯ್ತು. ಪುರಸಭೆಯಲ್ಲಿ ಈ ಬಾಬ್ತು ಅನುದಾನವನ್ನ ದಾಖಲೆಗಳಲ್ಲಿ ಮಾತ್ರ ತೋರಿಸಿ ಆ ಹಣವನ್ನೆಲ್ಲಾ ನುಂಗಿ ನೀರು ಕುಡಿದಿದ್ದ ಸರದಿ ಪ್ರಕಾರ ಅಧಿಕಾರ ಅನುಭವಿಸಿದ್ದ ರಾಜಕೀಯ ಪಕ್ಷಗಳ ಪುಢಾರಿಗಳು ತಮ್ಮ ನೀಚತನವನ್ನ ಮರೆಮಾಚಲು ಹೀಗೆ ಕೆಸರೆರಚಾಟಕ್ಕಿಳಿದು ಊರಿನ ನಾಗರೀಕರನ್ನಂತೂ ಮಂಗ ಮಾಡಿದ್ದರು ಅನ್ನೋದು ಮಾತ್ರ ಕಣ್ಣಿಗೆ ರಾಚುತ್ತಿದ್ದ ಸತ್ಯ. 

ಅಂತಹ ವಿಷಮ ಪರಿಸ್ಥಿತಿಯಲ್ಲೂ ಸಹ ಸೋಂಕಿಗೆ ಬಲಿಯಾಗಿರದಿದ್ದ ಊರಿನ ಕೆಲವೆ ಗಟ್ಟಿ ಪಿಂಡಗಳ ಪೈಕಿ ಅವನೂ ಒಬ್ಬನಾಗಿದ್ದ.

*****

ಇವನ ತಾಯಿ ಊರಿನ ಖಾಸಗಿ ನರ್ಸಿಂಗ್ ಹೋಂ ಒಂದರಲ್ಲಿ ಆಯ ಆಗಿದ್ದ ಕಾಲ ಅದು. ಬಹುತೇಕರು ರೋಗಿಗಳೆ ಆಗಿದ್ದು ಆರೋಗ್ಯವಂತರು ಅಲ್ಲೊಬ್ಬರು ಇಲ್ಲೊಬ್ಬರು ಮಾತ್ರˌ ಅವರಲ್ಲೂ ಬಹುಪಾಲು ಸಂಕ್ರಮಣಕ್ಕೆ ಹೆದರಿ ಇಂತಹ ವಿಷಮ ಹೊತ್ತಲ್ಲಿ ಬೆನ್ನು ತಿರುಗಿಸಿ ತಲೆಮರೆಸಿಕೊಂಡು ಪರಾರಿಯಾಗಲು ಹವಣಿಸುತ್ತಿದ್ದ ಹೊತ್ತಲ್ಲಿˌ ಇವನಂತಹ ಸ್ವಯಂ ಸೇವಕರ ತುರ್ತು ಅಗತ್ಯ ಆಸ್ಪತ್ರೆಗೂ ಇತ್ತು ಹಾಗೂ ಚಿಂತಾಜನಕ ಸ್ಥಿತಿ ತಲುಪಿದ್ದ ಊರಿಗೂ ಇವನಂತವರ ಅಗತ್ಯವಿತ್ತು. 

ಸರಕಾರಿ ಆಸ್ಪತ್ರೆಯ ಮೂಲಕ ಇವರ ಖಾಸಗಿ ಆಸ್ಪತ್ರೆಗೆ ನಿಗದಿಯಾಗಿರುತ್ತಿದ್ದ ಸಲೈನ್ ಬಾಟಲಿಗಳನ್ನ ಹೊತ್ತು ತರೋದುˌ ಒಳರೋಗಿಗಳಿಗೆ ಎಳನೀರು ಕೆತ್ತಿಸಿ ತಂದು ಕುಡಿಸೋದುˌ ಡ್ರಿಪ್ ಹಾಕೋದು - ಖಾಲಿ ಡ್ರಿಪ್ ಬಾಟಲಿಗಳನ್ನ ತೆಗೆಯೋದು. ಆಸ್ಪತ್ರೆಯ ಶೌಚಾಲಯ ತೊಳೆಯೋದು ಹೀಗೆ ಅದೂ ಇದು ಮೇಲು ಕೀಳು ಅಂತ ಪರಿಗಣಿಸದೆ ಎಲ್ಲಾ ಕೆಲಸಗಳಲ್ಲೂ ಅವನು ತೊಡಗಿಕೊಂಡಿದ್ದ ಕಾಲ ಅದು. ಹೀಗಾಗಿ ಅವನ ಆಸ್ಪತ್ರೆಯ ಒಡನಾಡ ಓಡಾಟ ಸಹಜವಾಗಿಯೆ ಹೆಚ್ಚಿತ್ತು.

ಸರಿಸುಮಾರು ಎರಡೂವರೆ ದಶಕದ ಹಿಂದಿನ ಕಥೆ ಇದು. ಆ ದಿನಮಾನಗಳಲ್ಲಿ ನಡೆದಿದ್ದ ಘಟನೆಯೊಂದು ಅವರ ಮನೆಯ ಮಂಕಾದ ವಾತಾವರಣದಲ್ಲಿ ಮತ್ತೆ ಮಿಣುಕು ದೀಪ ಹೊತ್ತಿಸಿತ್ತು. ಅವರೂರಿಂದ ಕರಾವಳಿಗೆ ಸಾಗುವ ರಾಜರಸ್ತೆಯ ಪಕ್ಕದಲ್ಲಿರುವ ಹಳ್ಳಿಯೊಂದರ ಹೆಸರು ಬೆಟ್ಟದಕೇರಿ. ಕಾಲೇಜಿನಲ್ಲಿ ಓದುತ್ತಿದ್ದ ಅಲ್ಲಿನ ಸಿರಿವಂತ ಒಕ್ಕಲಿಗರ ಮನೆಯ ಹುಡುಗಿಯೊಂದು ಪ್ರೀತಿ ಪ್ರೇಮದ ಅಮಲಿಗೆ ಬಲಿಯಾಗಿ ತನ್ನ ಬ್ರಾಹ್ಮಣ ಪ್ರಿಯಕರನ ಪಿಂಡ ಹೊತ್ತು ಗರ್ಭಿಣಿಯಾಗಿ ನಿಂತಳು. ಆರಂಭದಲ್ಲಿ ಗರ್ಭ ಜಾರಿಸಲು ಲಭ್ಯವಿದ್ದ ಎಲ್ಲಾ ಔಷಧಿ ಮಾಡಿಯೂ ಈ ಗಟ್ಟಿಪಿಂಡ ಜಾರದೆ ಭದ್ರವಾಗಿ ಉಳಿದಾಗ ಚಿಂತಾಕ್ರಾಂತವಾದ ಅವಿವಾಹಿತ ಬಸುರಿ ಹುಡುಗಿಯ ಕುಟುಂಬ ಸಣ್ಣ ಪುಟ್ಟದಕ್ಕೂ ತಾವು ಧಾವಿಸಿ ಬಂದು ಚಿಕಿತ್ಸೆ ಪಡಿಯುತ್ತಿದ್ದ ವೈದ್ಯರ ಮೊರೆಬಂತು. ಅಂತೂ ಅಲ್ಲೆ ಇರಿಸಿ ಹುಡುಗಿಗೆ ಹೆರಿಗೆ ಮಾಡಿಸುವ ಏರ್ಪಾಡಾಯಿತು. ಏಳು ತಿಂಗಳಿಗೆ ಪ್ರಸವಪೂರ್ವ ದಿನದಲ್ಲಿ ಹುಟ್ಟಿದ ಮಗುವಿನ ಮುಖ ಸಹ ನೋಡದೆ ಹೆತ್ತವಳಿಗೂ ನೋಡಗೊಡದೆ ಸಿರಿವಂತ ಸಾಹುಕಾರರು ನೋಟಿನ ಕಂತೆಗಳೊಂದಿಷ್ಟನ್ನ ವೈದ್ಯರ ಕೈಗೆ ತುರುಕಿ ತಾವು ಬಾಣಂತಿ ಮಗಳನ್ನ ಕಾರಿಗೆ ಒಟ್ಟಿ ಸುಖವಾಗಿ ಊರಿನ ಹಾದಿ ಹಿಡಿದರು. 


ಎರಡು ತಿಂಗಳು ಆಸ್ಪತ್ರೆಯ ಆರೈಕೆಯಲ್ಲೆ ಉಳಿದಿದ್ದ ಅನಾಥ ಮಗುವಿಗೆ ಒಂದು ಮನೆ ಹುಡುಕುವುದು ಅನಿವಾರ್ಯವಾಗಿತ್ತು. ಹೇಳಿ ಕೇಳಿ ಕಳ್ಳ ಬಸುರಿನ ಕಥೆ. ಸರಕಾರಿ ಆಶ್ರಯಕ್ಕೆ ಕಳಿಸುವಂತೆಯೂ ಇರಲಿಲ್ಲ! ಹೀಗಾಗಿ ಇವನ ಆಯಾ ತಾಯಿಯ ಮನವಿಗೆ ಮಣಿದ ವೈದ್ಯರು ಮಗುವನ್ನ ಇವನ ಅತ್ತೆಗೆ ದಯಪಾಲಿಸಿ ಕೈತೊಳೆದುಕೊಂಡರು. ಎರಡೆರಡು ಎಳೆ ಮಕ್ಕಳ ಸಾವಿನಿಂದ ಕೆಂಗೆಟ್ಟಿದ್ದ ಇವನ ಅತ್ತೆ ಈ ಎಳೆಬೊಮ್ಮಟೆ ಮಡಿಲು ತುಂಬುತ್ತಲೆ ನಾಟಕೀಯವಾಗಿ ಚೇತರಿಸಿಕೊಂಡಳು. ಯಾರೂ ಇಲ್ಲ ಅನ್ನುವಂತಿದ್ದ ಕೂಸಿಗೆ ಎಲ್ಲರೂ ಇರುವ ಒಂದು ಮನೆ ಹಣೆಬರಹದಲ್ಲಿತ್ತು ಅಂತ ಕಾಣ್ತದೆ. ಸ್ವಸ್ತಿಕ ಅನ್ನೋ ಹೆಸರಿಡಿಸಿಕೊಂಡು ಇವನತ್ತೆಯ ಮಗಳಾಗಿ ಆ ಮಗು ಇವರ ಮನೆಯವರಲ್ಲೆ ಒಬ್ಬಳಾಗಿ ಸೇರಿ ಹೋಯಿತು.


*****

ಬಹುಶಃ ಕಾಙಂನಗಾಡಿನಲ್ಲಿ ಅದವನ ಮೂರನೆ ದಿನ. ಆ ಸಂಜೆ ಹಾಗೆ ಅಡ್ಡಾಡುತ್ತಾ ಕುಶಾಲನಗರದ ಕಡಲ ತಡಿ ಹೋಗಿ ನಿತ್ಯ ಕೂರುವ ಮರಳ ದಿಬ್ಬದ ಮೇಲೆ ಕೂತ. ಇನ್ನೂ ಸಂಜೆ ಐದರ ಆಸುಪಾಸು. ಸೂರ್ಯ ಇನ್ನೇನು ಮುಳುಗುವ ತಯಾರಿಯಲ್ಲಿದ್ದ. ಝಳ ಕಡಿಮೆಯಾಗಿದ್ದರೂ ಬಿಸಿಲಿನ್ನೂ ಪೂರ್ತಿ ಇಳಿದಿರಲಿಲ್ಲ. ಇನ್ನೇನು ಅರ್ಧ ತಾಸಿನೊಳಗೆ ನಾಟಕೀಯವಾಗಿ ರವಿ ಜಾರಿ ಕತ್ತಲು ಸುತ್ತಲೂ ಸಾರಿ ಪರಿಸರದ ಚಹರೆಪಟ್ಟಿಯೆ ಬದಲಾಗಲಿತ್ತು. ಚಳಿಗಾಲದಲ್ಲಿ ಹಗಲಿಗೆ ಆಯುಷ್ಯ ಕಡಿಮೆ. ಇರುಳಿನದ್ದೆ ಅಧಿಪತ್ಯ ಇರುವ ಕಾಲ ಅದು.

ಒಬ್ಬ ಸಣ್ಣ ಹುಡುಗ ಹತ್ತಿರ ಬರಲೋ ಬೇಡವೋ ಅನ್ನುವ ಅನುಮಾನದಿಂದ ಇವನ ಬಳಿ ಬಂದ. ಅಪರಿಚಿತನನ್ನ ಕಾಣವಾಗಿನ ಭಯ ಮಾತನಾಡಿಸುವಾಗಿನ ಹಿಂಜರಿತದ ನಾಚಿಕೆ ಸಹಜವಾಗಿದ್ದ ಎಳೆಯನ ದ್ವಂದ್ವ ಇವನಿಗೆ ಅರ್ಥವಾಗಿ ಇವನೆ ಮುಂದಾಗಿ ಅವನನ್ನ ಮಾತನಾಡಿಸಿದ. ಇವನ ಬಾಯಿಯಿಂದ ಉದುರಿದ ಕನ್ನಡ ಆ ಮಗುವಿನ ಮಖ ಮೊರದಗಲವಾಗಿಸಿತು. "ನೀವು ಕನ್ನಡ ಮಾತಾಡುದ!" ಅಂದ ಅವ. "ಹೌದು ನೀನು?". "ನಾನೂ ಸಾ ಕನ್ನಡವೆ" ಅಂದವನ ಧ್ವನಿಯಲ್ಲಿ ಅದೊಂತರಾ ಆಪ್ತಭಾವ ಕೇಳಿದಂತಾಯಿತು.

ಹೀಗೆ ಅವರ ಸ್ನೇಹ ಆರಂಭವಾಯಿತು. ಸುಭಾಶ ಸ್ಥಳಿಯ ಕನ್ನಡ ಶಾಲೆಯಲ್ಲಿ ಐದನೆ ತರಗತಿಯ ವಿದ್ಯಾರ್ಥಿ. ಮಂಗಳೂರು ಮಹಾನಗರವನ್ನ ಮೊನ್ನೆ ಶಾಲಾ ಪ್ರವಾಸದಲ್ಲಿ ಕಂಡು ಬೆರಗಾಗಿ ಬಂದಿದ್ದಾನೆ. ಬೆಂಗಳೂರಿನ ಬಗ್ಗೆ ಅವರಿವರಿಂದ ಕೇಳಿದ್ದಾನೆ. ಇವನು ಬೆಂಗಳೂರಿಂದಲೆ ಬಂದಿರೋದು ಅಂತ ತಿಳಿದ ಮೇಲೆ ಆ ಊರಿನ ಬಗ್ಗೆ ಕೇಳಲು ಅವನ ಕುತೂಹಲದ ಮನಸಲ್ಲಿ ಸಾವಿರ ಪ್ರಶ್ನೆಗಳಿವೆ. ಎಲ್ಲರೂ ಎಲ್ಲರನ್ನ ಆಂಟಿ ಅಂಕಲ್ ಅಂತನೆ ಸಂಬೋಧಿಸಿ ಮಾತನಾಡುವ ವಿಪರೀತ ಕಾಲದಲ್ಲಿ ಮುಗ್ಧತೆ ಇನ್ನೂ ಮರೆಯಾಗದಿರುವ ಧ್ವನಿಯಲ್ಲಿ ಮಾತು ಮಾತಿಗೂ ಅಣ್ಣ ಅಂತ ಕರೆಯುತ್ತಾ ಸಂವಹಿಸುತ್ತಾನೆ.

ದೊಡ್ಡ ಪ್ರಾಯದವರೇನಾದರೂ ಹೀಗೆ ಒಟಗುಟ್ಟಲಾರಂಭಿಸಿದರೆ ಕಿರಿಕಿರಿ ಅಂತ ಎದ್ದು ಹೋಗುತ್ತಿದ್ದನೇನೋ. ಆದರೆ ಪುಟ್ಟ ಪ್ರಾಯದ ಈ ಪೋರನ ಅಮಾಯಕತೆಗೆ ಮಾರು ಹೋಗಿ ಅವನ ಸಕಲೆಂಟು ಕುತೂಹಲದ ಕಣ್ಗಳ ಪ್ರಶ್ನಾವಳಿಗಳಿಗೆ ಸಾಧ್ಯವಾದಷ್ಟು ಸಮಧಾನಕರ ಉತ್ತರ ಕೊಡುತ್ತಾ ಕೂತ.

ಅಮ್ಮ ಇದಾಳೆˌ ಅಪ್ಪ ಇಲ್ಲ. ಮರದ ಕೆಲಸ ಮಾಡ್ತಿದ್ದವ ಕುಡಿದು ಕುಡಿದೆ ಎಲುಬಿನ ಹಂದರವಾಗಿದ್ದ. ಕೊರೋನದ ಮಾರಿ ಅವನ ಉಳಿದಿದ್ದ ಜೀವದ ಪಸೆ ನೆಕ್ಕಿಕೊಂಡು ಹೋಯಿತು. ಈಗ ಇಲ್ಲೆ ಕಡಲ ತಡಿಯ ಸ್ವಂತ ಮನೆಯಲ್ಲಿ ಅಮ್ಮ ಪುಟ್ಟ ತಂಗಿಯ ಜೊತೆ ಸುಭಾಶ ಇದಾನೆ. ಕಡಲ ತಡಿಯಲ್ಲಿ ಬಿದ್ದಿರೋ ಕಾಯಿˌ ಮಡಲು ಆರಿಸಿಕೊಳ್ಳಲು ಪ್ರತಿ ಸಂಜೆ ಶಾಲೆ ಮುಗಿಸಿ ಬಂದಾದ ಮೇಲೆ ಬರುವ ಅವ ಇವನನ್ನ ಕಳೆದೆರಡು ಮೂರು ದಿನಗಳಿಂದ ಗಮನಿಸಿದ್ದಾನೆ. ಅಪರಿಚಿತ. ಪರದೇಸಿ ಅನ್ನುವ ಅನುಮಾನ ಮೂಡಿದೆ. ಮನೆಯಲ್ಯಾರೂ ಅವನ ಮಾತುಗಳಿಗೆ ಕಿವಿಯಾಗುವವರಿಲ್ಲ. ಧೈರ್ಯ ಮಾಡಿ ಇವನ ಜೊತೆ ಮಾತನಾಡಲು ಹವಣಿಸಿದ್ದಾನೆ. ಅದರಲ್ಲಿ ಯಶಸ್ವಿಯೂ ಆಗಿದ್ದಾನೆ. ಅಪರಿಚಿತ ಪರಿಸರದಲ್ಲಿ ಹೀಗೆ ಯಾವುದೆ ಉದ್ದೇಶಗಳೆ ಇದ್ದಿರದ ಸ್ನೇಹವೊಂದರ ಅಗತ್ಯ ಇವನಿಗೂ ಇತ್ತು.

( ಇನ್ನೂ ಇದೆ.)


https://youtu.be/ZsAGtBje3k0

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೪ 👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೪ 👊



ವಾಹನ ಅದ್ಯಾವುದೆ ಇರಲಿ ಅದರ ಚಾಲನೆ ಕಲಿಯುವ ಹಾಗೂ ಸ್ವಯಂ ಚಾಲಕನಾಗಿ ಅದನ್ನ ನಡೆಸುವ ಚಪಲ ಅವನಿಗೆ ವಿಪರೀತ. ನೆಲದ ಮೇಲಷ್ಟೆ ಅಲ್ಲˌ ನೀರಿನ ಮೇಲೆ ನಡೆಸುವ ವಾಹನ ಚಾಲನೆಯನ್ನೂ ಕಲಿತಿದ್ದಾನೆ. ಗಾಳಿಯಲ್ಲಿ ಹಾರುವ ವಾಹನ ಚಾಲನೆ ಕಲಿಯುವ ಆಸೆಯನ್ನ ಜೀವಂತವಾಗಿರಿಸಿಕೊಂಡಿದ್ದಾನೆ. ಈ ಮೂರು ಚಟಗಳನ್ನ ಬಿಟ್ಟರೆ ಇನ್ನುಳಿದಂತೆ ಚಟ ಮುಕ್ತ ಜೀವನ ಈತನದ್ದು. ಉತ್ಕಟವಾಗಿ ಪ್ರೀತಿಸದವರ ಹೊರತು ಮತ್ಯಾರೊಂದಿಗೂ ಲೈಂಗಿಕವಾಗಿ ಆಕರ್ಷಿತನಾಗಲಾರದ ಗುಣˌ ಹೀಗಾಗಿ ಕಚ್ಚೆಹರುಕನಲ್ಲ.


ಬೀಡಿಯ ಕಟ್ಟು ಕಟ್ಟುಗಳನ್ನೆ ಸೇದಿ ಸೇದಿ ಬೂದಿಯ ಬೆಟ್ಟ ಎಬ್ಬಿಸುತ್ತಿದ್ದ ಅಪ್ಪನ ಮಗ. ಅಂಕೆ ಮೀರಿದ ಕುಡಿತಕ್ಕೆ ದಾಸನಾಗಿ ಕುಡಿದ ಮೇಲೆ ಮೃಗದಂತೆ ವರ್ತಿಸುತ್ತಿದ್ದ ಅಪ್ಪನ ರೌದ್ರವತಾರ - ಅಮ್ಮನ ಜೊತೆ ಮತ್ತಿನಲ್ಲಿರುತ್ತಿದ್ದ ಅಪ್ಪನ ಮುಷ್ಠಿಯುದ್ಧ ನೋಡಿ ನೋಡಿ ಭಯ ಭೀತ ಬಾಲ್ಯ ಕಳೆದಿದ್ದ ಕಾರಣ ಧೂಮಪಾನ - ಮದ್ಯಪಾನ ಎರಡರ ಬಗ್ಗೆಯೂ ತೀರದ ಹೇವರಿಕೆ. ರಸಿಕಗ್ರೇಸರನಾಗಿದ್ದ ಅಪ್ಪನಿಗೆ ಗೆಳತಿಯರಿಗೂ ಬರವಿರಲಿಲ್ಲ ಅನ್ನುವ ಸತ್ಯದ ಅರಿವೂ ಅವನಿಗಿತ್ತು. ಲೈಂಗಿಕ ಲೋಲುಪತೆಯೆ ಇರಲಿˌ ಕುಡಿತˌ ಧೂಮಪಾನವೆ ಆಗಿರಲಿ ತನ್ನ ಪಾಲಿನ ಕೋಟಾವನ್ನೂ ತನ್ನಪ್ಪನೆ ಖಾಲಿ ಮಾಡಿ ತನಗೇನೂ ಹೊಸತಾಗಿ ಮಾಡಲು ಉಳಿಸಿಲ್ಲ ಅಂತ ಆಗಾಗ ಅಂತರಂಗದ ಗೆಳೆಯರ ಮುಂದೆ ಚಟಾಕಿ ಸಿಡಿಸುತ್ತಿದ್ದ.


ಇನ್ನು ಪಟ್ಟಣ ಸೇರಿ ಕೆಡಲು ಕಾರಣ ಹಲವಿದ್ದರೂ ಮಾದಕದ್ರವ್ಯಗಳ ಗೀಳಿಗೆ ಬೀಳದ ಸ್ವಯಂ ಆತ್ಮ ನಿಯಂತ್ರಣ ಯಾವುದೆ ದುಶ್ಚಟಗಳಿಂದ ಅವನನ್ನ ದೂರ ಇರಿಸಿತ್ತು. ಪಕ್ಕದ ದೇಶವೊಂದಕ್ಕೆ ಹೋಗಿದ್ದಾಗˌ ಅದೂ ಹದಿನೇಳು ವರ್ಷಗಳ ಹಿಂದೆ ಒತ್ತಾಯ ಹಾಗೂ ಕುತೂಹಲ ಎರಡಕ್ಕೂ ಬಲಿಯಾಗಿ ಅದೇನೋ ಮಜ್ಜಿಗೆಯಂತಿದ್ದ ಜಿಂಜರ್ ಬೀರನ್ನ ಹೀರಿ ಮುಖ ಹಿಂಡಿಕೊಂಡಿದ್ದ ಅನ್ನೋದನ್ನ ಹೊರತುಪಡಿಸಿ ಜೀವನದಲ್ಲವನು ಶರಾಬು ಕುಡಿದಿಲ್ಲ ಅಂದರೆ ಯಾರೂ ನಂಬೋದಿಲ್ಲ. ಬರಿ ನಾಟಕ ಅಂತ ತೀರ್ಪು ಹೇಳಿ ಷರಾ ಬರೆದು ಬಿಡುತ್ತಾರೆ. ಆದರೆ ಅದೆ ಸತ್ಯ. ಏಕೆಂದರೆ ಅವನ ಪಾಲಿಗಿದು ಕಥೆಯಲ್ಲˌ ಆತ್ಮನಿವೇದನೆ. ಮತ್ತವ ಆತ್ಮವಂಚಕನಲ್ಲ!


********

ಹಾಗೆ ನೋಡಿದರೆ ಬದುಕೇನೂ ಕ್ಲಿಷ್ಟವಲ್ಲ. ಹಾಗಂತ ಅಂದುಕೊಂಡಷ್ಟು ಸರಳವೂ ಆಗಿರಲ್ಲ. ಆಗಬೇಕಾದ ಪ್ರಾಯದಲ್ಲಿ ಆಗಬೇಕಾದದ್ದೆಲ್ಲ ಆಗುತ್ತಾ ಹೋದರೆˌ ಸಿಗಬೇಕಿದ್ದ ಸಮಯದಲ್ಲಿ ಸಿಗಲೆಬೇಕಿದ್ದವರು ಸಿಕ್ಕಿದರೆ ಏರಿಳಿತದ ತಗ್ಗು ಗುಂಡಿಗಳ ಹಾದಿಗೆ ಬಿದ್ದ ಬದುಕಿನ ಬಂಡಿ ಅದು ಹೇಗೋ ಸರಾಗವಾಗಿ ಹರಿದು ಹೋಗಿ ಪ್ರಯಾಣದ ಆಯಾಸ ಅರಿವಿಗೆ ಬರುವ ಹೊತ್ತಿಗೆ ದೇಹ ಅನ್ನೋ ಜನರೇಟರಿಗೆ ಮುಪ್ಪಡರಿ ತಮ್ಮ "ಕಾಲ" ಇನ್ನು ಮುಗಿಯಿತುˌ ಲೋಕದ ಜವಬ್ದಾರಿ ವಹಿಸಿಕೊಳ್ಳಲು ಹೊಸ ಪೀಳಿಗೆಯೊಂದು ತನ್ನಂತವರ ಏಕತಾನತೆಯ ಬಾಳ ಲಹರಿಯಲ್ಲೆ ಅರಿವಿಲ್ಲದೆ ಸೃಷ್ಟಿಯಾಗಿ ತಯಾರಾಗಿ ಬೆಳೆದು ನಿಂತಿದೆ. ತಾನು ತನ್ನಂತವರೇನಿದ್ದರೂ ನಿರ್ವಹಣೆಯ ಹೊಣೆ ದಾಟಿಸಿ ಆಗುವ ಬದಲಾವಣೆಗಳಿಗೆ ಮೂಕ ಸಾಕ್ಷಿಯಾಗಿ ಉಳಿಯಬೇಕಿದೆ. ಒಂದು ವೇಳೆ ಕೇಳಿದರೆ ಮಾತ್ರ ತನ್ನ ಅನುಭವದ ಮೂಸೆಯಲ್ಲರಳಿದ ಹಿತನುಡಿಗಳ ಸಲಹೆ ಮಾತ್ರ ಕೊಡಲಷ್ಟೆ ತಾನು ಸೀಮಿತ ಅನ್ನುವ ಅರಿವು ಮೂಡುತ್ತದೆ. ಇದರಲ್ಲಿ ಹೆಚ್ಚು ಕಿರಿಕಿರಿ ಅನ್ನುವಂತದ್ದೇನಿಲ್ಲ. ಎದುರಿಗೆ ಕಾಣುತ್ತಿರುವುದು ಹಾಗೂ ಸುತ್ತಮುತ್ತ ಆಗುತ್ತಿರುವುದು ಕಸಿವಿಸಿ ಹುಟ್ಟಿಸುತ್ತಿದ್ದರೆˌ ಕನಿಷ್ಠ ಕಣ್ಣುಮುಚ್ಚಿಕೊಂಡಾದರೂ ಸ್ವಸ್ಥ ಇದ್ದಿರಬಹುದು.


ಆದರೆ ಸಮಸ್ಯೆಯಿರುವುದು ಯಾವ ಯಾವ ಪ್ರಾಯದಲ್ಲೋ ತಿರುವು ಮುರುವಿನ ಹೊಣೆಗಾರಿಕೆ ಹೆಗಲಿಗೇರಿದವರಿಗೆ ಮಾತ್ರ. ತಮ್ಮ ಪ್ರಾಯಕ್ಕೆ ಮೀರಿದ ಜವಬ್ದಾರಿಗಳು ಸಣ್ಣ ಪ್ರಾಯದಲ್ಲೆ ಬೆನ್ನೇರಿ ಬಾಲ್ಯವನ್ನೆ ಕಳೆದುಕೊಂಡಿದ್ದರಂತೂ ಪರಿಸ್ಥಿತಿ ಮತ್ತೂ ಭೀಕರ. ಅವರ ಸಮಪ್ರಾಯದವರೆಲ್ಲ ಮದುವೆಯಾಗಿ ಮಡದಿ ಗಂಡ ಮಕ್ಕಳು ಮೊಮ್ಮಕ್ಕಳು ಅಂತ ಅವರವರದೆ ನಾಲ್ಕು ಗೋಡೆಗಳೊಳಗಿನ ಖಾಸಗಿ ಪ್ರಪಂಚದ ಉಸುಬಿನಲ್ಲಿ ಮೂಗು ಮಟ್ಟದವರೆಗೆ ಹೂತು ಹೋಗಿರುತ್ತಾರೆ. ಇಂತವರಲ್ಲಿ ಬಹುತೇಕರಿಗೆ ಸೂಕ್ತ ಪ್ರಾಯದಲ್ಲಿ ಜೀವನ ಸಂಗಾತಿ ಸಿಕ್ಕಿರುವುದಿಲ್ಲ ಅಥವಾ ಸಿಕ್ಕಂತವರು ಇನ್ಯಾವ್ಯಾವುದೋ ಆಕರ್ಷಣೆಗಳ ಬೆನ್ನು ಹತ್ತಿ ಅವರ ಪಯಣದ ದಿಕ್ಕು ದೆಸೆ ಬದಲಾಯಿಸಿಕೊಂಡಿರುತ್ತಾರೆ. ಯಥಾಪ್ರಕಾರ ಇಂತವರ ಶಾಶ್ವತ ಸಂಗಾತಿ ಒಂಟಿತನ ಮತ್ತೆ ಮತ್ತೆ ಜೊತೆಯಾಗಿ ಅವರ ಯೋಗ್ಯತೆಯನ್ನ ಅವರಿಗೇನೆ ನೆನಪಿಸುತ್ತಾ ಅವರನ್ನ ಮತ್ತಷ್ಟು ಒಳಗೊಳಗೆ ಹಂಗಿಸಿ ಮಾನಸಿಕವಾಗಿ ಕುಗ್ಗಿಸುತ್ತಿರುತ್ತದೆ. ದೈಹಿಕ ಸಾಂಗತ್ಯವೂ ಇಲ್ಲದ ಜೊತೆಗೆ ಮಾನಸಿಕ ಜೊತೆಗಾರಿಗೂ ಸಲ್ಲದಂತಹ ಸ್ಥಿತಿಯಲ್ಲಿ ನರಳುವ ಇಂತವರ ಆಂತರಿಕ ತುಮುಲಗಳಿಗೆ ಅಂತ್ಯವೆನ್ನುವುದು ಬಹುತೇಕ ಇರಲ್ಲ.


ಇವನು ಇನ್ನೂ ಹದಿನಾಲ್ಕು ವರ್ಷ ಪ್ರಾಯವಿದ್ದ ಸಮಯದಲ್ಲಿ ಇವರ ಮನೆಯಲ್ಲೂˌ ಊರಲ್ಲೂ ಎರಡು ದುರ್ಘಟನೆಗಳು ನಡೆದವು. ಮೊದಲನೆಯದಾಗಿˌ ಕ್ರಿಕೆಟ್ ಆಡುತ್ತಿದ್ದ ದೊಡ್ಡವರ ಆಟ ನೋಡುತ್ತಾ ಕುಳಿತಿದ್ದ ಅತ್ತೆಯ ಪುಟ್ಟ ಪ್ರಾಯದ ಹಿರಿಮಗ ಅದ್ಯಾರೋ ಬ್ಯಾಟು ಬೀಸಿ ವೇಗವಾಗಿ ಎಗರಿ ಬಂದ ಚೆಂಡು ಹೊಟ್ಚೆಗೆ ಅಪ್ಪಳಿಸಿ ಆಂತರಿಕ ರಕ್ತಸ್ರಾವವಾಗಿ ನರಳತ್ತಾ ತೀರಿ ಹೋದ. ಅದಾಗಿ ಎರಡು ವರ್ಷಕ್ಕೆ ಅದೆ ಮನೆಯಲ್ಲಿ ಎರಡನೆ ಮಗು ತೀರಿ ಹೋಯಿತು. ಈ ಸಲ ಅಪ್ಪನ ಕಿರಿತಮ್ಮನ ಹಿರಿಮಗಳ ಸರದಿ. ಹುಟ್ಟಿನಿಂದಲೆ ಮಂದಬುದ್ಧಿಯ ಮಗು ಅದು. ಮಗ ಸತ್ತ ದುಃಖದಲ್ಲಿದ್ದ ಅತ್ತೆಗೆ ಅಂಟಿಕೊಂಡು ಬೆಳೆಯುತ್ತಿದ್ದಳು. ಮನೆಯಲ್ಲಿದ್ದ ಎಲ್ಲರಿಗೂ ಇನ್ನೂ ಮುಗ್ಧತೆ ಸೂಸುವ ದೇಹದ ಬೆಳವಣಿಗೆಗೆ ತಕ್ಕಂತೆ ಬುದ್ಧಿ ಬಲಿತಿರದ ಆ ಮಗುವೆಂದರೆ ಮುದ್ದು ಮುಚ್ಚಟೆ. ಅದೊಂದು ದಿನ ಅವಳ ದೊಡ್ಡಪ್ಫ ಅಕ್ಕಿ ಮಾಡಿಸಲು ಊರಿನಿಂದ ಎತ್ತಿನ ಗಾಡಿಗೆ ಆ ಹಂಗಾಮಿನ ಭತ್ತ ಹೇರಿಕೊಂಡು ಅದಕ್ಕೊಂದು ಪ್ಲಾಸ್ಟಿಕ್ಕಿನ ಶೀಟು ಹೊದೆಸಿ ಗಾಡಿ ಹೊಡಕೊಂಡು ಹೊರಟಿದ್ದ. ಹಿಂದಿಂದ ತಾನೂ ಬರಲು ಹಟ ಹಿಡಿದು ಓಡಿ ಬಂದ ಮಗು ಅದರ ಧ್ವನಿ ಅವನ ಕಿವಿಗೆ ಗಾಡಿಯ ಗಲಾಟೆಯ ಮಧ್ಯೆ ಬಿದ್ದೆ ಇಲ್ಲ. ಆ ಮಗು ಪಟ್ಟು ಬಿಡದೆ ಚಲಿಸುವ ಗಾಡಿ ಏರಲು ಹೋಗಿ ಪ್ಲಾಸ್ಟಿಕ್ ಪರದೆಯ ಮೇಲಿಟ್ಟ ಅದರ ಪುಟ್ಟಕಾಲು ಜಾರಿ ನೇರ ಗಾಡಿಯಡಿಗೆ ಬಿದ್ದಿದೆ. ಅದರ ಹೊಟ್ಟೆಯ ಮೇಲೆಯೆ ತುಂಬಿದ ಗಾಡಿಯ ಭಾರ ಸಹಿತ ಚಕ್ರ ಏರಿಳಿದಿದೆ. ಆಗಿದ್ದ ಅನಾಹುತ ಗೊತ್ತಾಗುವಾಗ ಹೊತ್ತಾಗಿತ್ತು. ನೋವು ನೋವಂತ ನರಳುತ್ತಿದ್ದ ಮಗು ಕಡೆ ಕ್ಷಣದಲ್ಲೂ ಮಂಕು ನಗುವೊಂದನ್ನ ಬೀರುತ್ತಲೆ ಕಣ್ಮರೆಯಾಗಿಹೋಯಿತು. ಎರಡೆರಡು ಮಕ್ಕಳು ಹೀಗೆ ಸತ್ತ ನೋವು ಅತ್ತೆಯನ್ನ ಅರೆಹುಚ್ಚಿಯನ್ನಾಗಿಸಿತು.


ಅತ್ತ ಇವನಿದ್ದ ಊರಿಂದ ದೂರದ ಹಳ್ಳಿಯಲ್ಲಿ ಹೀಗಾಗಿದ್ದರೆ ಇವನಿದ್ದ ಪಟ್ಟಣಕ್ಕೆ ಇಂತಹದ್ದೆ ಅನ್ನುವ ಹೆಸರಿಡಲಾಗದ ವಾಂತಿ ಬೇಧಿಯ ಸಾಂಕ್ರಾಮಿಕ ರೋಗ ಹರಡಿ ಬೆರಳೆಣಿಕೆಯ ಕೆಲವೆ ಕೆಲವರನ್ನ ಹೊರತುಪಡಿಸಿ ಇನ್ನುಳಿದಂತೆ ಸಣ್ಣ ಜನಸಂಖ್ಯೆಯ ಊರಿಗೂರೆ ಸಂತ್ರಸ್ತವಾಗಿˌ ಊರಿನಲ್ಲಿದ್ದ ಒಂದು ಸರಕಾರಿ ಆಸ್ಪತ್ರೆ ಹಾಗೂ  ಎರಡು ಖಾಸಗಿ ಆಸ್ಪತ್ರೆಗಳು ತುಂಬಿ ತುಳುಕಿ ಹೋದವು. ಒಳರೋಗಿಗಳಾಗಿ ಸೇರಿದವರಿಗೆ ಮಲಗಿಸಲು ಮಂಚಗಳು ಸಾಲದೆˌ ಅವರವರೆ ಅವರವರ ಮನೆಯಿಂದಲೆ ಹೊತ್ತು ತಂದ ಹಾಸಿಗೆಯ ಮೇಲೆ ಡ್ರಿಪ್ಪೇರಿಸಿ ಆಸ್ಪತ್ರೆಯ ಹಜಾರ - ಪಡಸಾಲೆˌ ಕಡೆಗೆ ವಾಹನ ನಿಲುಗಡೆಯ ಜಾಗದಲ್ಲೂ ಅಂತಹ ಸಂಕ್ರಮಿತರನ್ನ ಅಡ್ಮಿಟ್ ಮಾಡಿಕೊಂಡು ಮಲಗಿಸಿ ಚಿಕಿತ್ಸೆ ಆರಂಭಿಸಲಾಯಿತು.

ಒಟ್ಟಿನಲ್ಲಿ ಊರ ಹಲವಾರು ನಾಗರೀಕರನ್ನು ಕಾಡಿ ಹೈರಾಣಾಗಿಸಿದ್ದ ವಾಂತಿ ಬೇಧಿಯ ಹೆಸರಿಡಲಾಗಿರದಿದ್ದ ಮಾರಿ ಊರಿನಿಂದಾಚೆ ನಿರ್ಗಮಿಸುವಾಗ ಅರಿವಿರದ ಆ ರೋಗ ಪೀಡಿತರಲ್ಲಿ ಆರು ಜನ ಬಲಿಯಾಗಿಯಾಗಿತ್ತು. ಅದೆ ಸಮಯದ ಆಜುಬಾಜುವಿನಲ್ಲೆ ಅವರ ಮನೆಯ ವಾತಾವರಣದಲ್ಲೂ ಸಹ ಬದಲಾವಣೆಯ ಗಾಳಿ ಬೀಸಿದ್ದು.

( ಇನ್ನೂ ಇದೆ.)



https://youtu.be/FpYQ0b5i9x0