ನಿನ್ನದೇ ಪಿಸುದನಿ...

ಹೇಳದೆ ಕೇಳದೆ ಕಣ್ ತೊಯಿಸೋ ಕಂಬನಿ,

ಮನಸಿನ ಪುಟದಲಿ ಸಹಿ ಗೀಚಿದೆ ಇಬ್ಬನಿ/

ಯಾರಲೂ ತಿಳಿಸದ ವಿಸ್ಮಯ ಈ ವೇದನೆ...

ಹಿತವಿದೆ ನೋವಲು ನಿನ್ನೊಲವಿಗೆ ನಾ ಸೋತೆನೆ?

ಅದ್ಯಾತಕೋ ಕಾಣದ ಸಂಭ್ರಮ ಎದೆಯಲಿ,

ಮೋಹದ ಮೋಡಿಗೆ ಮರುಳಾದೆನೆ....ಹೇಳು ನೀನೆ//

ದುಂಬಿಯ ತುಟಿಯಂಚಲಿ ಅಂಟಿದ ಮಕರಂದಕೆ

ಹೂಗಳ ಪಿಸುಮಾತಲೂ ತುಸು ಪಾಲಿದೆ...

ಹಸುರಿನ ಮೋಹದ ಪರಿ ಹಕ್ಕಿಯ ಕೊರಳ ಸಿರಿ...ಹೆಚ್ಚಿಸಿ ಹುರಿದುಂಬಿಸಿ ಬಳಿ ಸೆಳೆದಿದೆ ಬಿಗಿದಪ್ಪಿದೆ/

ಹೇಳುವ ಆತುರ ಮನಸಲಿ ಕಾತರ

ತಿಳಿಯದು ಉಸುರುವ ಬಗೆ....ನಿನ್ನುಸಿರಲೇ ನನ್ನುಸಿರಿದೆ//

ಅದ್ಯಾತಕೋ ಕಾಣದ ಸಂಭ್ರಮ ಎದೆಯಲಿ,

ಮೋಹದ ಮೋಡಿಗೆ ಮರುಳಾದೆನೆ? ಹೇಳು ನೀನೆ//

ತೀರವ ಸೋಕುವ ತೆರೆ

ಉಕ್ಕಿಸಿ ಖುಷಿಯ ನೊರೆ

ಸ್ಪರ್ಶಕೆ ತುಸು ನಾಚುತ ಅನುಭವಿಸಿದೆ ರೋಮಾಂಚನ/

ಭೂಮಿಗೆ ಸಾಗರ ಮುತ್ತಿಡೋ ಸಡಗರ

ನನ್ನೆದೆ ಹಾಡಲು....ನಿನ್ನ ಸಾಲನ್ನೇ ತುಂಬಿದೆ//

ಅದ್ಯಾತಕೋ ಕಾಣದ ಸಂಭ್ರಮ ಎದೆಯಲಿ,
ಮೋಹದ ಮೋಡಿಗೆ ಮರುಳಾದೆನೆ? ಹೇಳು ನೀನೆ//