22 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೩೧.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೩೧.👊

ಇಷ್ಟಲ್ಲದಿದ್ದರೆ ಇಡಿ ದೇಶವನ್ನೆ ಅದೂ ಹತ್ತು ಹದಿನೈದು ವರ್ಷಗಳಿಂದ ಕೇವಲ ತನ್ನ ಪ್ರಭಾವಳಿಯನ್ನ ಹೆಚ್ಚಿಸಿಕೊಳ್ಳುವ ಪುಂಖಾನುಪುಂಖವಾದ ಹುಸಿ ವದಂತಿಗಳನ್ನ ಹಬ್ಬಿಸಿಯೆ ನಿರಂತರವಾಗಿ ಏಮಾರಿಸಲು ಗಡ್ಡಬಿಟ್ಟ ಒಬ್ಬ ಮಡ್ಡನಿಗೆ ಸಾಧ್ಯವಾಗುತ್ತಿತ್ತಾ ಅಂತ ಯೋಚಿಸಿದವನಿಗೆ ನಗು ಬಂತು.

ನಮ್ಮ ದೇಶದಲ್ಲಿ ಬಾಯಿ ಬಡಾಯಿಕೋರರಿಗೆ ಹಾಗೂ ಛದ್ಮವೇಶಧಾರಿಗಳಿಗೆ ಸಿಗುವಷ್ಟು ಮರ್ಯಾದೆ ಬಹುಶಃ ಇನ್ಯಾವ ಸಭ್ಯಸ್ಥ ಸರಳ ಬದುಕಿನ ನೇರ ನಡೆ ನುಡಿ ಹೊಂದಿರುವವರಿಗೆ ಸಿಗುವುದಿಲ್ಲ ಅನ್ನೋದು ಕರಾಳ ವಾಸ್ತವ. ದೇಶದ ಅಧೋಗತಿಗೂ ಬಹುತೇಕ ಅದೆ ಕಾರಣವೆನ್ನುವ ಸತ್ಯಾಂಶ ಕಣ್ಣಿಗೆ ರಾಚುವಂತೆ ಗೋಚರಿಸುತ್ತಿದ್ದರೂ ಅಯೋಗ್ಯರ ವ್ಯಕ್ತಿಪೂಜೆಗಿಳಿವ ಅತಿಬುದ್ಧಿವಂತರು ತಮ್ಮ ಹುಟ್ಟು ಚಾಳಿಯನ್ನ ಸುಟ್ಟರೂ ಬಿಡಲೊಲ್ಲರು.

ನಿತ್ಯಾನಂದರೇನು ಸಾಂಪ್ರದಾಯಿಕ ಶಿಕ್ಷಣ ಪಡೆದಿದ್ದವರಲ್ಲ. ಹಾಗಂತ ಅನಕ್ಷರಸ್ಥರೂ ಆಗಿರಲಿಲ್ಲ. ಮಾತೃಭಾಷೆ ಮಲಯಾಳಂ ಜೊತೆಗೆ ಕನ್ನಡˌ ಸ್ವಲ್ಪ ಮಟ್ಟಿಗೆ ಹಿಂದಿ ಹಾಗೂ ಇಂಗ್ಲಿಷ್ ಎರಡನ್ನೂ ಓದಿ ಬರೆಯವಷ್ಟು ಅಕ್ಷರ ಜ್ಞಾನ ಅವರಿಗಿತ್ತು. ಮನೆಭಾಷೆ ಮಲಬಾರಿ ಮಲಯಾಳಂ ಜೊತೆಗೆ ಸರಾಗವಾಗಿ ತುಳುˌ ತುಳುನಾಡಿನ ಧಾಟಿಯ ಕನ್ನಡˌ ಗೋವನಿ ಕೊಂಕಣಿˌ ಗಾಂವಟಿ ಮರಾಠಿˌ ಮುಂಬೈಯಾ ಹಿಂದಿ ಹಾಗೂ ತಕ್ಕ ಮಟ್ಟಿಗೆ ಇಂಗ್ಲೀಷಿನಲ್ಲೂ ಸಂವಹಿಸಲು ಅವರಿಗೆ ಸಾಧ್ಯವಿತ್ತು.

ಇಂದಿನ ಸ್ವಯಂಘೋಷಿತ ದೇವಮಾನವರಂತೆ ಅವರು ಭಕ್ತಾದಿಗಳಲ್ಲಿ ಬೇಧವೆಣಿಸಲಿಲ್ಲˌ ಹೆಸರೆ ಹೇಳಲಂಜುವ ಕಾಙಂನಗಾಡಿನ ಕೊರಗನಿಂದ ಹಿಡಿದುˌ ಮುಂಬೈಯ ಹೊಟೇಲುದ್ಯಮಿˌ ಸೂರತಿನ ಸಿಂಧಿ ವಜ್ರೋದ್ಯಮಿˌ ಆ ಕಾಲದ ದೊಡ್ಡ ಸಾಹುಕಾರ ಲಕ್ಷ್ಮಣ ಸಾ ಖೋಡೆಯವರೆಗೆ ಅವರಿಗೆ ಎಲ್ಲರೂ ಸರಿಸಮಾನರು. ಯಾವುದೆ ತೋರಿಕೆಯ ಆಡಂಬರದಿಂದ ದೂರವಿದ್ದ ಅವರದ್ದು ಕೌಪಿನವೊಂದೆ ಶಾಶ್ವತ ಧಿರಿಸು. ಸುಗಂಧ ಪೂಸಿಕೊಂಡು ಸೌಂದರ್ಯ ಪ್ರಸಾದನಗಳನ್ನ ಬಳಸಿಕೊಂಡು ದೊಡ್ಡಾಟವಾಡುವ ಕಳ್ಳಗುರುಗಳೆಲ್ಲ ಅವರಿಗೆ ಈಡಲ್ಲ. ವಾಸ್ತವದ ಅಧ್ಯಾತ್ಮಿಕತೆಯ ಜಿಜ್ಞಾಸುಗಳು ಹಿಂಬಾಲಿಸಬೇಕಿರೋದು ಅಸಲಿ ಭಗವಾನ್ ನಿತ್ಯಾನಂದರನ್ನೆ ಹೊರತು ಇಂದಿನ ನಕಲಿ ಭಗ"ವಾನರ" ನಿತ್ಯ ಆನಂದಿಗಳನ್ನಂತೂ ಅಲ್ಲವೆ ಅಲ್ಲ.

ತೋರಿಕೆಗೆ ಅವರೆಂದೂ ಢೋಂಗಿ ಇಂದ್ರಜಾಲದ ಕಣ್ಕಟ್ಟು ತೋರಿಸಿ ಜನರನ್ನ ವಂಚಿಸಲಿಲ್ಲ. ನೂರೆಂಟು ಸ್ಕೀಮುಗಳನ್ನ ಹೇಳಿಕೊಂಡು ಬಂದು ಸಂಗ್ರಹಿಸಿದ ದೇಣಿಗೆಯಲ್ಲಿ ಈ ಕಾಲದ ಸತ್ತಕುರುಗಳಂತೆ ಬಿಎಂಡಬ್ಲೂ ಬೈಕು ಖರೀದಿಸಿ ಫೋಸು ಕೊಡಲಿಲ್ಲˌ ಕ್ಯಾರವಾನ್ ಕಾರು ಖರೀದಿಸಿ ಭಾರತದ ಮಣ್ಣು ಉಳಿಸಲು ಅಮೇರಿಕಾದ ಮಣ್ಣಿನಲ್ಲಿ ಜಾಲಿಟ್ರಿಪ್ಪು ಹೊಡೆಯಲಿಲ್ಲ. ಕರಡಿಯಂತೆ ಕೆದರಿದ ಕೂದಲು ಬಿಟ್ಟುಕೊಂಡು ದಿನಕ್ಕೊಂದು ರಂಗುರಂಗಿನ ನೈಟಿ ಹಾಕಿಕೊಂಡು ಬೀದಿ ಬದಿಯ ದೊಂಬರಂತೆ ಅಗ್ಗದ ಜಾದೂ ಮಾಡಿಕೊಂಡು ಜನರ ಮೇಲೆ ಮಂಕು'ಬೂದಿ' ಎರಚಲಿಲ್ಲ. ಮೈಕು ಸಿಕ್ಕ ಕೂಡಲೆ ಲೌಡಿಕದ್ದೆಯ ಕುರುಕುರು ಛೀಗಳಂತೆ ಕನಿಷ್ಠ ಪಕ್ಷ "ಒಂದೆ"ಗೂ "ವಂದೆ"ಗೂ ವ್ಯತ್ಯಾಸವನ್ನರಿಯದೆ ಉದ್ದುದ್ದ ಭಾಷಣ ಚೂಡಿ ಜನರನ್ನ ಏಮಾರಿಸಲಿಲ್ಲ.

ಅದೆಲ್ಲ ಹೋಗಲಿ ತನ್ನನ್ನ ತಾನು ಗುರುವೆಂದೆ ಎಂದೂ ಬೋರ್ಡು ಹಾಕಿಕೊಂಡು ತಿರುಗಲಿಲ್ಲ. ವಾಸ್ತವದಲ್ಲಿ ಜನರಿಂದ ದೂರಕ್ಕೆ ಉಳಿದು ಅಗತ್ಯ ಬಿದ್ದಾಗ ಮಾತ್ರ ಹತ್ತಿರ ಕರೆದು ಅವರ ಸಮಸ್ಯೆಗಳನ್ನ ಆಲಿಸಿದರು. ತನ್ನಿಂದಾಗುವ ಪರಿಹಾರ ಸೂತ್ರವನ್ನ ಬೋಧಿಸಿದರು. ನಿಜವಾದ ಆ ಭಗವಂತ ಈ ಭೂಮಿಯ ಮೇಲೆ ನಡೆದರೆ ಹೇಗಿರಬಹುದೋ ಹಾಗೆ ಬಾಳಿ ತೋರಿಸಿದರು. ಶಿರಡಿಯ ಸಾಯಿಬಾಬಾˌ ಮುಕುಂದೂರು ಸ್ವಾಮಿಗಳುˌ ಹುಬ್ಬಳ್ಳಿಯ ಸಿದ್ಧಾರೂಢರುˌˌ ಶ್ರೀಧರ ಸ್ವಾಮಿಗಳಷ್ಟೆ ಸರಳರು ಪೂಜ್ಯರು ಆಗಿದ್ದವರೆ ಈ ಅವನ ಪಾಲಿನ "ಅಜ್ಜ" ನಿತ್ಯಾನಂದರು.

ಆದರೂ ಅವರಿದ್ದಾಗಲಾಗಲಿˌ ಹೋದ ಮೇಲಾಗಲಿ ಅವರ ಭಕ್ತಾದಿಗಳಾದವರಿಗೆ ಬರವಿಲ್ಲ. ಯಾವುದೆ ಚಿಲ್ಲರೆ ಶೋಕಿ ಮಾಡದೆˌ ಕೇವಲ ಕೌಪೀನ ಮಾತ್ರ ಧರಿಸಿಕೊಂಡಿದ್ದುˌ ಯಾರ ಊಹೆಗೂ ಎಟುಕದೆˌ ನಿತ್ಯ ಪರಿವ್ರಾಜಕರಾಗಿದ್ದುಕೊಂಡು ದೀನ-ದಲಿತರ ಸೇವೆಗೆ ಸಮಾಜವನ್ನ ಹುರಿದುಂಬಿಸಿಕೊಂಡಿದ್ದ ಅವರೆಂದೂ ಇಂದಿನ ತಥಾಕಥಿತ ಗುರೂಜಿಗಳಂತೆ ಧರ್ಮದ ವ್ಯಾಪಾರಕ್ಕೆ ಅಂಗಡಿ ತೆರೆದು ಕೂರಲಿಲ್ಲ.

ಆದರೂˌ ಅವರ ಅಪಾರ ಹಿಂಬಾಲಕರು ಅವರ ಕರ್ಮಭೂಮಿ ಕಾಙಂನಗಾಡಿನಲ್ಲೂˌ ಕೊನೆಯ ಕಾಲ ಕಳೆದ ಸಮಾಧಿ ಸ್ಥಳ ಗಣೇಶಪುರಿಯಲ್ಲೂ ಅವರ ಸ್ಮಾರಕ ಆಶ್ರಮ ತೆರೆದು ಅವರ ಆದರ್ಶದ ಆಶಯಗಳನ್ನ ಅನುಗಾಲವೂ ಜೀವಂತವಾಗಿರಿಸಲು ಶ್ರಮಿಸುತ್ತಿದ್ದಾರೆ. ಕಾಙಂನಗಾಡಿನಲ್ಲಿ ಅವರ ಹೆಸರಿನಲ್ಲಿ ಶಾಲೆ ಹಾಗೂ ಪಾಲಿಟೆಕ್ನಿಕ್ ಕಾಲೇಜೊಂದು ನಡೆಯುತ್ತಿದೆ. ಅದರ ಆದಾಯದಿಂದಲೆ ಆಶ್ರಮದ ಖರ್ಚು ನಿರ್ವಹಿಸುತ್ತಾರೆ. ಇಲ್ಲಿಗೆ ಭೇಟಿ ಕೊಡುವ ಭಕ್ತಾದಿಗಳಿಗೆ ಊಟ - ವಸತಿ ಉಚಿತ. ಯಾರೂ ಯಾವ ಕಾರಣಕ್ಕೂ ಹಣಕ್ಕಾಗಿ ಒತ್ತಾಯಿಸರು. ಭಕ್ತರೆ ತಾವಾಗಿ ದೇಣಿಗೆ ನೀಡಿದರೆ ಮಾತ್ರ ಸ್ವೀಕರಿಸುತ್ತಾರೆ. ಅನ್ನದಾನ ಮಾಡಿಸಿದರೆ ಅದಕ್ಕೆ ಪ್ರೋತ್ಸಾಹಿಸುತ್ತಾರೆ. ಉಳಿದಂತೆ ನಿತ್ಯದ ಪೂಜೆ-ಪುನಸ್ಕಾರಗಳು ಅನೂಚಾನಾಗಿ ನಡೆಯುತ್ತವೆ.

ಗುರುವನ ಸಹ ನಿತ್ಯಾನಂದರದ್ದೆ ಸೃಷ್ಟಿ. ಬಹುಶಃ ಕರಾವಳಿ ಮುಗಿದು ದಕ್ಷಿಣ ಕೊಡಗಿನಂಚಿನ ಮಲೆಸೀಮೆ ಆರಂಭವಾಗುವ ಪಶ್ಚಿಮಘಟ್ಟದ ಪಾದದಲ್ಲಿ ಅದಿದೆ. ಸ್ವಚ್ಛ ಸುಂದರ ಪರಿಸರವಿರುವ ಅಲ್ಲಿ ಆಶ್ರಮವಾಸಿಗಳ ವಸತಿ ಹಾಗೂ  ನಿತ್ಯಾನಂದರ ದೇವಸ್ಥಾನವಿದೆ. ಸದಾ ಎಡಬಿಡದೆ ಸುರಿಯುವ ದೇವಗಂಗೆಯೆಂದೆ ನಂಬಲಾಗಿರುವ ಮಲೆನಾಡಿನಿಂದ ಬೆಟ್ಟದ ಒಡಲು ಸೀಳಿ ಉಕ್ಕಿ ಬರುವ ಅನಂತ ಜಲ ತೀರ್ಥವಿದೆ. ಅದರ ಔಷಧೀಯ ಗುಣಗಳ ಬಗ್ಗೆ ದಂತಕಥೆಗಳಿವೆ. ಮೌನವನ್ನೆ ಹೊದ್ದುಕೊಂಡಂತೆ ಇರುವ ಕೇವಲ ಪ್ರಾಕೃತಿಕ ನಿನಾದಗಳಿಗೆ ಕಿವಿಯಾಗಲು ಹೇಳಿ ಮಾಡಿಸಿದ ಹಸಿರ ಕಣಿವೆಯಂತಹ ಆ ಸ್ಥಳಕ್ಕೆ ಭಕ್ತಾದಿಗಳು ಹಗಲಿನಲ್ಲಿ ಮಾತ್ರ ಭೇಟಿ ಕೊಡಬಹುದು. ಆತ್ಮದ ಅವಲೋಕನಕ್ಕೆ ತಕ್ಕದಾಗಿರುವ ಆ ಜಾಗದಲ್ಲಿ ಊಟದ ವ್ಯವಸ್ಥೆ ಇರುವುದಿಲ್ಲ. ಅವನ ಈ ಕಾಙಂನಗಾಡಿನ "ಅಜ್ಜನ ಮನೆ"ಯ ಭೇಟಿ ಯಾವುದೆ ನಿರ್ದಿಷ್ಟ ಯೋಜನೆಗಳನ್ನೆ ಹಾಕಿಕೊಳ್ಳದೆ ಹೊರಟಿದ್ದ ಪ್ರವಾಸವನ್ನ ಚಿರಸ್ಮರಣೀಯವಾಗಿಸಿತ್ತು. ಇಂದಿನಿಂದ ಬೇಸರವಾದಾಗಲೆಲ್ಲ ಹೋಗಿದ್ದು ಬರಲೊಂದು ಅಜ್ಜನ ಮನೆ ತನಗೂ ಇದೆ ಅನ್ನುವ ವಿಷಯ ಅವನಿಗೆ ಖಚಿತವಾಯ್ತು.

*****

ಮಲಯಾಳಿಗಳ ಸಾಂಸ್ಕೃತಿಕ ಹಾಗೂ ಧಾರ್ಮಿಕ ಗೊಂದಲ ಅವನಿಗೆ ಆಶ್ಚರ್ಯ ಹುಟ್ಟಿಸುತ್ತದೆ. ಥೇಟ್ ತುಳುನಾಡಿಗರಂತೆ ಅಸುರ ಕುಲ ತಿಲಕ ಬಲಿ ಚಕ್ರವರ್ತಿ ಅಥವಾ ಮಹಾಬಲಿ ತಮ್ಮ ನಾಡನ್ನ ಪೌರಾಣಿಕ ಕಾಲದಲ್ಲಿ ಆಳುತ್ತಿದ್ದ ಅಂತ ಬಲವಾಗಿ ನಂಬುವ ಅವರೆಲ್ಲ ಇಂದಿಗೂ ಅವನ ಸಲುವಾಗಿಯೆ ವರ್ಷಕ್ಕೊಮ್ಮೆ ಓಣಂ ಹಬ್ಬವನ್ನ ಜಾತ್ಯತೀತವಾಗಿ - ಮತಾತೀತವಾಗಿ ಆಚರಿಸುತ್ತಾರೆ. ನಮ್ಮ ತುಳುನಾಡಿನಲ್ಲಿ ಬಲಿಯ ಆಗಮನ ಸಾರಿ ದುಷ್ಟಶಕ್ತಿಗಳ ನಿವಾರಣೆಗೆ ಆಟಿ ಕಳಿಂಙ ತುಳುವರ ಮನೆ ಮನೆಗೂ ಭೇಟಿ ಕೊಡುವ ಹಾಗೆˌ ಕೇರಳದಲ್ಲಿ ಅದೆ ಕೆಲಸವನ್ನ 'ಓಣ ಪೊಟ್ಟಾನ್' ಮನೆ ಮನೆಗೆ ಆಗಮಿಸಿ ಮಾಡುತ್ತಾನೆ. ಅವನನ್ನ ಸಂಭ್ರಮಾದರ ಭಯ ಭಕ್ತಿಯಿಂದ ಎದುರುಗೊಳ್ಳುವ ಅದೆ ಜನ ಮಹಾಬಲಿಯ ದುರ್ದೆಸೆಗೆ ಕಾರಣನಾದವನನ್ನೆ ಪರಮದೈವವಾಗಿಸಿ ಇಂದು ಆರಾಧಿಸುತ್ತಿರೋದು ಹಾಗೂ ತಮ್ಮ ಪೂರ್ತಿ ರಾಜ್ಯವನ್ನೆ ತಿರುವಾಂಕೂರಿನ ರಾಜರು ಅವನಿಗೆ ಅರ್ಪಿಸಿರುವುದು ವಿಸ್ಮಯ.

ಮಹಾಬಲಿಯನ್ನ ಮೂರಡಿ ಜಾಗ ಕೇಳಿದ ವಾಮನ ಪಾತಾಳಕ್ಕೆ ತುಳಿದ ಜಾಗ ಮಾವೇಲಿಕ್ಕರದಲ್ಲಿರುವ ಮಹಾದೇವ ದೇವಸ್ಥಾನದಲ್ಲೆ ಅನ್ನುವ ಐತಿಹ್ಯವನ್ನೂ ಇಟ್ಟುಕೊಂಡಿದ್ದಾರೆ. ಆದರೆ ಈಗ ಅವರ ಆರಾಧ್ಯದೈವಗಳಲ್ಲೆ ಅಗ್ರಗಣ್ಯನಾಗಿರುವುದು ಶ್ರೀಅನಂತಪದ್ಮನಾಭ ಹಾಗೂ ಗುರುವಾಯೂರಪ್ಪನ ರೂಪದಲ್ಲಿರುವ ಬಲಿಯ ಹಗೆ ಮಹಾವಿಷ್ಣು! ಒಂಥರಾ ತಮ್ಮವನನ್ನ ತುಳಿದವನನ್ನೆ ಆರಾಧಿಸುವ "ಸ್ಟಾಕ್ ಹೋಂ ಸಿಂಡ್ರೋಮ್" ಬಲಿಪಶುಗಳವರು.

( ಇನ್ನೂ ಇದೆ.)

https://youtu.be/NGjaYHqBAaw

21 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೩೦.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೩೦.👊



ಪ್ರತಿದಿನ ಮೂರು ಸಲ ನಿತ್ಯಾನಂದಾಶ್ರಮದ ಗುಹೆಗಳ ಮೇಲಿರುವ ಭಗವಾನ್ ನಿತ್ಯಾನಂದರ ಮೂರ್ತಿಗೆ ಆರತಿ ಎತ್ತಲಾಗುತ್ತದೆ. ಅವನು ಹಿಂದಿನ ದಿನ ಬೆಳಗ್ಗಿನ ಆರತಿಗೆ ಹೋಗಿದ್ದಾಗ ಒಂದು ವಿಚಿತ್ರ ಅವನಲ್ಲಿ ಘಟಿಸಿತು. ಮೆಟ್ಟಲುಗಳ ಹತ್ತಿ ಆ ಪುಟ್ಟ ಬೆಟ್ಟವನ್ನೇರುವವರೆಗೂ ಸರಿಯಾಗಿದ್ದ ಅವನಿಗೆ ಗುಡಿಯ ಮುಂದೆ ಮೂರ್ತಿಗೆ ಕೈಮುಗಿದು ನಿಂತುಕೊಂಡಾಗ ತೀರಾ ನೀಶ್ಯಕ್ತನಾದ ಹಾಗನಿಸಿ ಕಣ್ಣಿಗೆ ಕತ್ತಲೆ ಕವಿದಂತಾಯಿತು. ಆ ಬೆಳಗಿನ ಚಳಿಯಲ್ಲೂ ಮೈ ಬೆವರಿ ಒದ್ದೆಮದ್ದೆಯಾದ ಹಾಗಾದವನಿಗೆ ಹೀಗೆಯೆ ನಿಂತುಕೊಂಡೆ ಇದ್ದರೆ ಕುಸಿದುಬಿದ್ದೇನು ಅನಿಸಿತುˌ ಘಂಟೆˌ ಜಾಗಟೆಗಳ ಗದ್ದಲದ ಮಧ್ಯೆ ಮಂಗಳಾರತಿ ಮಾಡುತ್ತಿದ್ದರು. ಅಲ್ಲಿ ನೆರೆದಿರುವ ಎಲ್ಲರೂ ನಿಂತುಕೊಂಡಿರುವಾಗ ತಾನೊಬ್ಬನೆ ಕೂತರೆ ಸರಿಯಲ್ಲ ಅನ್ನಿಸಿ ಮೆಲ್ಲ ಮೆಲ್ಲನೆ ಹಿಂದಕ್ಕೆ ಸರಿದು ಬೇಲಿ ಗೋಡೆಗೆ ಒರಗಿ ನಿಂತು ಸುಧಾರಿಸಿಕೊಂಡ. ಪೂಜೆ ಮುಗಿದು ಪ್ರಸಾದ ಪಡೆದುˌ ಕೆಳಗಿಳಿದು ಬಂದು ತಿಂಡಿಯನ್ನೂ ತಿಂದಾದ ಮೇಲೂ ಸುಸ್ತಿತ್ತು. 

ಕೋಣೆಗೆ ಹೋಗಿ ಬಳಲಿಕೆಯಿಂದ ಮಲಗಿದ್ದಷ್ಟೆ ಗೊತ್ತುˌ ಎದ್ದಾಗ ಘಂಟೆ ಒಂದಾಗಿತ್ತು. ಮೈಮನ ಹಗೂರಾದ ಭಾವ ಆವರಿಸಿತ್ತು. ಸಣ್ಣಂದಿನಿಂದ ಸರಿಯಾದ ಭಂಗಿಯಲ್ಲಿ ನಡೆಯಲು ಕಲಿಯದ ಕಾರಣಕ್ಕೇನೋ ಬಹುಶಃˌ ಅಥವಾ ದಿನಕ್ಕೆ ಕನಿಷ್ಠ ಇಪ್ಪತ್ತು ಕಿಲೋಮೀಟರು ಹಟಯೋಗಿಯಂತೆ ನಡೆದೆ ಸವೆಸುವ ಕಾರಣಕ್ಕೂ ಇರಬಹುದು ಚೂರು ಉದ್ದವಾಗಿಯೆ ಇರುವ ಅವನಿಗೆ ನಿಧಾನವಾಗಿ ಬೆನ್ನುನೋವಿನ ಬಾಧೆ ಆವರಿಸಿಕೊಳ್ಳಲಾರಂಭಿಸಿತ್ತು. ಈ ಪ್ರಕರಣದ ನಂತರ ಬೆನ್ನುನೋವಿನ ಸೆಳೆತ ತುಂಬಾ ಕಡಿಮೆಯಾಗಿತ್ತು. ಇದು ಆ ಸ್ಥಳದ ಮಹಿಮೆಯೋˌ ಇವನ ಮನಭ್ರಾಂತಿಯೋ ಏನೋ ಒಂದು. ಆದರೆ ಮೊದಲಿದ್ದ ಮಹಾಬಾಧೆ ತುಂಬಾ ಇಳಿದಿತ್ತು ಅನ್ನೋದಂತೂ ಸತ್ಯˌ

ವಾಸ್ತವವಾಗಿˌ ಅವಿಭಜಿತ ದಕ್ಷಿಣ ಕನ್ನಡ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳ ಜನರಿಗೆ ಭಗವಾನ್ ನಿತ್ಯಾನಂದರು ಅಪರಿಚಿತರೇನಲ್ಲ. ಇಲ್ಲಿನ ಬಹುತೇಕ ಮಂದಿ ಒಂದಿಲ್ಲೊಂದು ಬಗೆಯಲ್ಲಿ ನಿತ್ಯಾನಂದರ ಆರಾಧಕರೆ. ಈ ಎರಡೂ ಜಿಲ್ಲೆಗಳ ಬಹಳಷ್ಟು ಊರುಗಳಲ್ಲಿ ನಿತ್ಯಾನಂದಾಶ್ರಮಗಳಿವೆ. ಅಲ್ಲೆಲ್ಲಾ ಸ್ವತಃ ನಿತ್ಯಾನಂದರೆ ಭೇಟಿಕೊಟ್ಟು ಕೆಲಕಾಲ ಇದ್ದು ಹೋಗಿರುವ ಐತಿಹ್ಯ ಇದೆ. ಈಗ ಹಣ್ಹಣ್ಣು ಮುದುಕರಾಗಿರುವ ಅನೇಕರು ತಮ್ಮ ಬಾಲ್ಯದಲ್ಲೋ ಅಥವಾ ತಾರುಣ್ಯದಲ್ಲೋ ನಿತ್ಯಾನಂದರನ್ನ ಕಂಡಿದ್ದಾರೆ ಹಾಗೂ ಅವರ ಪ್ರಭಾವಕ್ಕೆ ಒಳಗಾಗಿದ್ದಾರೆ. 


ಕೋಳಿಕ್ಕೋಡಿನ ಕೊಯಿಲಾಂಡಿಯಲ್ಲಿ ಹುಟ್ಟಿ ಕಾಙಂನಗಾಡಿನಲ್ಲಿ ಸಂತರಾಗಿ ಬದುಕಿ ಭಾರತದಾದ್ಯಂತ ಪರಿವ್ರಾಜಕರಾಗಿ ಸಂಚರಿಸಿ ಕೊನೆಗೆ ಮಹಾರಾಷ್ಟ್ರದ ಠಾಣೆ ಜಿಲ್ಲೆಯಲ್ಲಿರುವ ಗಣೇಶಪುರಿಯಲ್ಲಿ ಇಹ ಜೀವನ ಮುಗಿಸಿದ ನಿತ್ಯಾನಂದರೆಂದರೆ ಕರಾವಳಿಯ ಮಂದಿಗೆ ಭಯ-ಭಕ್ತಿ ಎರಡೂ ಢಾಳವಾಗಿದೆ. ಇದೆ ಕಾರಣದಿಂದಲೇನೋ ಇವರ ಮನೆಯ ದೇವರ ಕೋಣೆಯಲ್ಲೂ ನಿತ್ಯಾನಂದರ ಭಾವಚಿತ್ರವೊಂದಿತ್ತು. ಸಣ್ಣಂದಿನಲ್ಲಿ ಬೆಳಗ್ಯೆ ಮಿಂದು ಮಣಮಣ ಮಂತ್ರಗಳನ್ನ ಹೇಳುತ್ತಾ ಅಲ್ಲಿರುವ ದೇವಾನುದೇವತೆಗಳನ್ನ ಸ್ತುತಿಸುವಾಗˌ ಸಂಜೆ ಶಾಲೆಯಿಂದ ಬಂದಾದ ಮೇಲೆ ಕೈಕಾಲು ತೊಳೆದು ಭಜನೆ ಕಿರುಚುವಾಗ ಆ ಫೊಟೋದಲ್ಲಿದ್ದ ಕೇವಲ ಲಂಗೋಟಿ ಮಾತ್ರ ಧರಿಸಿ ಅಸಡ್ಡಾಳ ಭಂಗಿಯಲ್ಲಿ ಕೂತಿರುವ ವ್ಯಕ್ತಿ ಯಾರು? ಅವರ ಅಕ್ಕಪಕ್ಕದಲ್ಲಿರುವ ರಾಜಾ ರವಿವರ್ಮ ಸೃಷ್ಟಿಯ ದೇವಾನುದೇವತೆಗಳಂತೆ ಅಪಾರ ಆಭರಣ ತೊಟ್ಟು - ರೇಷ್ಮೆ ವಸ್ತ್ರ ಧರಿಸಿ - ದೊಡ್ಡ ಕಿರೀಟ ಹೊತ್ತು - ಚಿತ್ರವಿಚಿತ್ರ ಆಯುಧ ಪಾಣಿಗಳಾಗಿ ತಲೆಯ ಹಿಂದೆ ಒಂದು ಪ್ರಭಾವಲಯ ಬೀರಿಕೊಂಡು ಅದ್ಯಾವುದೋ ಪ್ರಾಣಿಯನ್ನ ತಮ್ಮ ತಮ್ಮ ವಾಹನವನ್ನಾಗಿ ಇರಿಸಿಕೊಂಡು ಗಡದ್ದಾಗಿ ಮಿಂಚುತ್ತಿರದೆ ಇದ್ಯಾರಪ್ಪ ಹೀಗೆ ಕಡುಗಪ್ಪು ಮೈಯಲ್ಲಿ ಬೋಳು ಮಂಡೆಯೊಂದಿಗೆ ಕೋಮಣ ಮಾತ್ರ ತೊಟ್ಟು ಕೂತುಕೊಂಡಿರೋದು ಅನ್ನುವ ವಿಸ್ಮಯ ಅವನಿಗಾಗುತ್ತಿತ್ತು. 


ಭಜನೆ ಮಾಡುವಾಗ ಆ ಚಿತ್ರದಲ್ಲಿರುವವರು ತನ್ನನ್ನ ಕಂಡು ಕಣ್ಣು ಮಿಟುಕಿಸಿದಂತೆ ಅನ್ನಿಸುತ್ತಿತ್ತವನಿಗೆ. ಕುತೂಹಲ ತಾಳಲಾರದೆ ಶ್ರದ್ಧಾ ಭಕ್ತಿಯಿಂದ ಅವರ ಚಿತ್ರಕ್ಕೆ ನಮಿಸುತ್ತಿದ್ದ ಅಜ್ಜನಿಗೆ ಯಾರಜ್ಜ ಅದು? ಅಂದ. ಉತ್ತರವಾಗಿ ಅವರು "ಅಜ್ಜ" ಅಂದರು. ಓಹೋ ಬಹುಶಃ ನಮ್ಮಜ್ಜನ ಅಜ್ಜ ಇರಬೇಕು! ಅಂದುಕೊಂಡಿದ್ದ. ಹೈಸ್ಕೂಲು ದಾಟುವವರೆಗೂ ಅವರು ನಮ್ಮ ಕುಟುಂಬಸ್ಥರೆ. ನಮ್ಮಜ್ಜನ ಅಜ್ಜ ಅನ್ನುವ ಭಾವ ಅವನಲ್ಲಿತ್ತು. ಆದರೆ ಬೇರೆಯವರ ಅಂಗಡಿ - ಹೊಟೆಲ್ಲುಗಳ ಗಲ್ಲಾಪೆಟ್ಟಿಗೆ ಹಾಗೂ ಬಸ್ಸುಗಳ ಬಾನೆಟ್ ಮೇಲೆ ತೂಗು ಬಿಟ್ಟ ಚಿತ್ರಗಳಲ್ಲೂ ಅವರನ್ನ ಕಂಡಾಗ ಮಾತ್ರ ಚೂರು ಕಕ್ಕಾಬಿಕ್ಕಿಯಾದ. ನಮ್ಮಜ್ಜನ ಅಜ್ಜನ ಫೊಟೋ ನೀವ್ಯಾಕೆ ಹಾಕಿಕೊಂಡಿರೋದು ಅಂತ ಒಂದಿಬ್ಬರನ್ನ ಕೇಳಿ ಗೇಲಿಗೊಳಗಾದ ಮೇಲೆ ಅವರ್ಯಾರು ಅವರ ಹೆಸರೇನು ಅನ್ನುವ ಮರ್ಮ ಮೊದಲಸಲ ಅವನಿಗರಿವಾದದ್ದು. ಆದರೆ ಅವನ ಪಾಲಿಗೆ ಮಾತ್ರ ನಿತ್ಯಾನಂದರು ಯಾವತ್ತಿದ್ದರೂ ಅಜ್ಜನ ಅಜ್ಜ ಕೋಲಜ್ಜನೆ. ಅವರನ್ನ ಅವ ಅಜ್ಜ ಅಂತಲೆ ಕರೆಯೋದು.

ಅವರ ಪರಮ ಭಕ್ತರಾಗಿದ್ದ ಅವನಜ್ಜ ಕಾಙಂನಗಾಡಿನ ಈ ನಿತ್ಯಾನಂದರ ಕರ್ಮಭೂಮಿಗೆ ಬಂದಿರಲಾರರು. ಅವರ ಪರವಾಗಿ ಅವರ ಆಸೆ ಈಡೇರಿಸಲು ಮೊಮ್ಮಗನಾಗಿ ಅವ ಅಲ್ಲಿಗೆ ಬಂದಿದ್ದ. ಒಂಥರಾ ಅಜ್ಜನ ಮನೆಗೆ ಬಂದ ಮನಸ್ಥಿತಿಯಲ್ಲೆ ಇದ್ದ. ಎಲ್ಲರೂ ಬೆಟ್ಟ ಇಳಿದು ಹೋದ ಮೇಲೆ ದೇವಸ್ಥಾನದ ಮೆಟ್ಟಿಲ ಮೇಲೆ ಕೂತು ನಿರ್ಜನವಾಗಿದ್ದ ಗುಡಿಯ ಗರ್ಭಗುಡಿಯಲ್ಲಿದ್ದ ನಿತ್ಯಾನಂದರ ಮೂರ್ತಿಯ ಜೊತೆ ಜೀವಂತ ವ್ಯಕ್ತಿಯೊಬ್ಬರೊಂದಿಗೆ ಸಂಭಾಷಿಸುವಂತೆಯೆ ತುಂಬಾ ಹೊತ್ತು ಮಾತನಾಡಿದ. ತನ್ನ ಕಥೆ ವ್ಯಥೆ ತೋಡಿಕೊಂಡು ಹಗುರಾದ. ನಿಮ್ಮನ್ನ ಕಾಣಲು ಬಂದಿರೋದು ನಾನಾದರೂ ಇದು ಸತ್ತಿರೋ ನನ್ನಜ್ಜನ ಆಸೆ ಈಡೇರಿಸಲು. ಇದರಿಂದೇನಾದರೂ ಪುಣ್ಯ ಸಂಚಯವಾಗೋದಾದರೆ ಅದವರಿಗೆ ಆಗಬೇಕು ಅಂತ ನಿತ್ಯಾನಂದರಿಗೆ ತಾಕೀತು ಮಾಡಿದ. ತನಗೂ ಅವರಿಗೂ ಮರುಜನ್ಮ ಬೇಡ ಮುಕ್ತಿ ಸಾಕು ಅಂತ ಬೇಡಿದ. ಅದೂ ಇದೂ ಕಷ್ಟ ಸುಖ ಹೇಳಿಕೊಂಡ. ಮನಸಿಗೆ ಆಪ್ತರಾದವರೆಲ್ಲರನ್ನೂ ನೆನೆಸಿಕೊಂಡು ಅವರಿಗೆ ಶುಭವಾಗಲಿ ಅಂತ ಹಾರೈಸಿದ. ಒಂಥರಾ ಸ್ವಂತ ಅಜ್ಜನ ಎದುರು ಕೂತು ಮನದಾಳದ ನುಡಿಗಳನ್ನೆಲ್ಲಾ ಹಂಚಿಕೊಳ್ಳುವ ಮೊಮ್ಮಗನ ವರ್ತನೆಯಂತೆಯೆ ಸನ್ನಿವೇಶವಿತ್ತು. ಇದೇನು ತೋರಿಕೆಯ ಭಕ್ತಿಭಾವದಿಂದಾದದ್ದಲ್ಲ ಮನಸಿನಾಳದಿಂದಲೆ ಅವರನ್ನ ಅಜ್ಜ ಅಂತಲೆ ನಂಬಿಕೊಂಡು ಬೆಳೆದಿದ್ದವನಿಗೆ ಈಗ ಏಕಾಏಕಿ ಅಸಹಜ ಭಕ್ತಿ ತೋರಲು ಅಸಾಧ್ಯವಾಗಿತ್ತು. ಅವನ ಹಾಗೂ ಅವರ ಮಧ್ಯ ಮೂಡಬಹುದಾಗಿದ್ದು ಕೇವಲ ವಾತ್ಸಲ್ಯಭರಿತ ಪ್ರೀತಿ ಮಾತ್ರ ಬಿಟ್ಟರೆ ಮತ್ತಿನ್ನೇನೂ ಅಲ್ಲ.


*****

ಸಾಮಾನ್ಯವಾಗಿ ಆತ ಯಾವುದೆ ಸ್ವಯಂಘೋಷಿತ ಢೋಂಗಿ ಸಿದ್ಧಪುರುಷರನ್ನ ಬಡಪಟ್ಟಿಗೆ ನಂಬ. ಇತ್ತೀಚೆಗಂತೂ ತಾನು ಪರಮಹಂಸ ಎಂದು ಬೋರ್ಡು ಹಾಕಿಕೊಳ್ಳುವ ಪರಮಹಿಂಸರˌ ಅವಧೂತತನದ ಓನಾಮ ಗೊತ್ತಿಲ್ಲದಿದ್ದರೂ ಅಲ್ಲಷ್ಟು ಇಲ್ಲಷ್ಟು ಓದಿ ತಿಳಿದ ಸರಕುಗಳನ್ನೆ ಮಾರಿಕೊಂಡು ತನ್ನನ್ನ ತಾನು "ಅವಧೂತ" ಅಂತ ಕರೆದುಕೊಳ್ಳುವ ಖದೀಮ ಅವಭೂತಗಳನ್ನ ಕತ್ತಿನ ಪಟ್ಟಿ ಹಿಡಿದು "ಬಡ್ಡಿಮಗನೆ ಮೊದಲು ಸರಿಯಾಗಿ 'ಅವಧೂತ' ಅಂತ ತಪ್ಪಿಲ್ಲದೆ ಉಚ್ಛರಣೆ ಕಲಿˌ ಆ ಮೇಲೆ ಈ ಅವಧೂರ್ತತನದ ನೌಟಂಕಿ ಮಾಡುವಿಯಂತೆ!" ಅಂತ ತರಡಿಗೆ ಎರಡು ತದುಕಿ ಹೇಳಬೇಕು ಅಂತ ಅವನಿಗೆ ಅನಿಸುವುದಿದೆ. 


ಧರ್ಮ ಅನ್ನುವುದು ಒಂದು ಪ್ರಬಲ ನಶೆ ಅನ್ನುವುದನ್ನ ಅರಿತಿರುವ ಈ ಅತಿಬುದ್ಧಿವಂತರು ಹೀಗೆಲ್ಲಾ ತಾರಾತಿಗಡಿ ಮಾಡಿ ಸಮಾಜಕ್ಕೆ ಮಕಮಲ್ಲಿನ ಟೋಪಿ ತೊಡಿಸಿ ತಮ್ಮ ಹೊಟ್ಟೆ ಹೊರೆದುಕೊಳ್ಳುತ್ತಿರೋದು ಮಾತ್ರ ದುರಂತ. ನಿಜವಾಗಿ ಒದೆಯಬೇಕಿರೋದು ಅಂತಹ ಸದಾರಮೆ ನಾಟಕದ ಕಳ್ಳರನ್ನಲ್ಲˌ ಬದಲಿಗೆ ಅಂತಹ ಕಿಲಾಡಿ ಖದೀಮರನ್ನ ನಂಬುವ ಮಡ್ಡಮಂಡೆಯ ಮಳ್ಳರನ್ನ. ಇವರಿಗೆ ಗತಿಯಿಲ್ಲ ಅವರಿಗೆ ಮತಿಯಿಲ್ಲ. ಸರಿಯಾದ ಜೋಡಿ.

( ಇನ್ನೂ ಇದೆ.)


https://youtu.be/FCGj7TEiZEA

20 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೯.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೯.👊


ಮುಂದಿನ ದಿನಮಾನಗಳಲ್ಲಿ ಅಲ್ಲಿಂದಲೂ ಆ ಖೂಳರನ್ನ ಸೋಲಿಸಿ ಅಟ್ಟಾಡಿಸಿದ ಅವರ ಯುರೋಪಿಯನ್ ದಾಯಾದಿಗಳಾದ ಬ್ರಿಟಿಷ್ ಈಸ್ಟ್ ಇಂಡಿಯಾ ಕಂಪನಿಯ ಖದೀಮರುˌ ಕಡೆಗೆ ಡಚ್ಚರು ಇಂಡೋನೇಷ್ಯಾಕ್ಕೆ ಹೋಗಿ ಮುಟ್ಟಿ ಆ ದ್ವೀಪ ಸಮುಚ್ಛಯವನ್ನ ತಮ್ಮ ವಸಾಹತಾಗಿಸಿಕೊಳ್ಳುವುದನ್ನ ಅನಿವಾರ್ಯಗೊಳಿಸಿದರು. ಹಾಗಂತ ಭಾರತವೇನೂ ಯುರೋಪಿಯನ್ ವಸಾಹತುಕರಣದ ಬಲೆಯಿಂದ ಪಾರಾಗಲಿಲ್ಲˌ ಆದರೆ ದುಷ್ಟರಲ್ಲೆ ಅತಿ ಕಡಿಮೆ ದುರುಳತೆಯಿದ್ದ ಬ್ರಿಟಿಷರ ಪಾಲಾಯಿತು ಅಷ್ಟೆ.

ಶಸ್ತ್ರಗಳಲ್ಲಿ ಆಧುನಿಕರೆನಿಸಿದ್ದ ಹಾಗೂ ಶಿಸ್ತಿನ ಯುದ್ಧತಂತ್ರಗಳನ್ನ ಸೇನೆಯಲ್ಲಿ ಅಳವಡಿಸಿಕೊಂಡು ಹೋರಾಡಿ ಎದುರಾಳಿಗಳನ್ನ ಕಕ್ಕಾಬಿಕ್ಕಿಗೊಳಿಸಿಯೆ ಗೆಲುವನ್ನ ಪ್ರತಿಸಾರಿಯೂ ಖಾತ್ರಿ ಪಡಿಸಿಕೊಳ್ಳುತ್ತಿದ್ದ ಬಲಿಷ್ಠ ಯುರೋಪಿಯನ್ ಶಕ್ತಿಯೊಂದನ್ನ ತನ್ನ ಮುಂದೆ ಮಂಡಿಯೂರಿಸಿದ ಮಾರ್ತಾಂಡ ವರ್ಮನ ಈ ಅಭೂತಪೂರ್ವ ಗೆಲುವು ಬಿಳಿಯರ ದಿಗ್ವಿಜಯ ಯಾತ್ರೆಯ ಕಗ್ಗವಾಗಿರುವ ಯುರೋಪಿಯನ್ ಇತಿ"ಹಾಸ್ಯ""ಅಜ್ಞ"ರ ಸಂಶೋಧನೆಗಳಲ್ಲಿ ಕಾಣಿಸಿಕೊಳ್ಳದಿರಲು ಕಾರಣಗಳಿವೆ. ಆದರೆ ಭಾರತೀಯ ಇತಿಹಾಸ ಸಂಗ್ರಹದಲ್ಲೂ ಈ ಬಗ್ಗೆ ಕೇವಲ ಸೀಮಿತ ವಿವರಣೆಗಳಿರೋದು ದುರಾದೃಷ್ಟಕರ.

ಕೊಚ್ಚಿಯಲ್ಲಿ ಅದಾಗಲೆ ವ್ಯಾಪಾರಿ ಕೋಠಿ ಕಟ್ಟಿಕೊಂಡಿದ್ದ ಡಚ್ ಈಸ್ಟ್ ಇಂಡಿಯಾ ಕಂಪನಿ ಕೊಚ್ಚಿ ಸಂಸ್ಥಾನದ ಆಳರಸನನ್ನ ಕ್ರಮೇಣ ಬೆದರಿಸಿ ತೋಳ್ಬಲದಿಂದ ಕೈಗೊಂಬೆ ಮಾಡಿಕೊಂಡರು. ಅದಾದ ಮೇಲೆ ಅವರ ವಕ್ರದೃಷ್ಟಿ ಪಕ್ಕದ ತಿರುವಾಂಕೂರಿನ ಮೇಲೆ ಬಿತ್ತು. ಎಂದಿನ ಪೊಗರಿನಿಂದ ಅವರು ಹೇರಲು ಹೊರಟ ವ್ಯಾಪಾರಿ ನಿಬಂಧನೆಗಳಿಗೆ ನಾಯರ್ ಕುಲದ ಆಡಳಿತದಲ್ಲಿದ್ದ ತಿರುವಾಂಕೂರು ಸಂಸ್ಥಾನದ ಆಳರಸ ಮಾರ್ತಾಂಡ ವರ್ಮ ಸೊಪ್ಪು ಹಾಕದಿದ್ದಾಗ ಕೆರಳಿದ ಡಚ್ ಅಡ್ಮಿರಲ್ ಎಸ್ಟಾಚುಯಿಸ್ಟ್ ಡೆ ಲೆನಾಯ್
ತಿರುವಾಂಕೂರು ಸಾಮ್ರಾಜ್ಯದ ದಕ್ಷಿಣ ಗಡಿಯಾಗಿದ್ದ ಸಾಂಸ್ಕೃತಿಕವಾಗಿ ಕೇರಳದ ಭಾಗವಾಗಿದ್ದರೂ ಈಗ ರಾಜಕೀಯವಾಗಿ ತಮಿಳುನಾಡಿನ ಭೂಪಟವನ್ನ ಸೇರಿ ಹೋಗಿರುವ ಕೊಳಚ್ಚೆಲ್ಲಿನಿಂದ ನೌಕಾಯುದ್ಧ ಸಾರಿದ.

ತಿರುವಾಂಕೂರಿನವರ ನೌಕಾಬಲವನ್ನ ಕೀಳಂದಾಚಿಸಿದ ಲೆನಾಯ್ ಅತಿಯಾದ ಆತ್ಮವಿಶ್ವಾಸದಿಂದ ದಕ್ಷಿಣದಲ್ಲಿ ಯುದ್ಧ ಆರಂಭಿಸಿದಾಗˌ ಅವನನ್ನ ಎದುರಿಸಲು ದಕ್ಷಿಣದಲ್ಲಿ ಡಚ್ ನೌಕಾಪಡೆಯನ್ನ ಎದುರಿಸಲು ತನ್ನ ದಳಪತಿಗಳಾದ ಆರ್ಮುಗಂ ಪಿಳ್ಳೆ ಹಾಗೂ ಥಾನು ಪಿಳ್ಳೆಯನ್ನ ಛೂ ಬಿಟ್ಟವನೆˌ ತಾನು ಕೊಚ್ಚಿನ್ ಸಾಮ್ರಾಜ್ಯದ ಗಡಿಯೊಳಗಿದ್ದ ಡಚ್ ಠಿಕಾಣಿಗಳನ್ನ ಪುಡಿಗಟ್ಟಲು ನೆಚ್ಚಿನ ಬಂಟನಾಗಿದ್ದ ದಳಪತಿ ಚಂಪಕರಾಮನ್ ಮಾರ್ತಾಂಡ ಪಿಳ್ಳೆಯೊಡನೆ ಭೂ ಮಾರ್ಗವಾಗಿ ಮುನ್ನುಗ್ಗಿ ಬಂದ. ಇವರೊಂದಿಗೆ ಒತ್ತಾಸೆಯಾಗಿ ಪೂರ್ವದ ಘಟ್ಟದಿಂದ ಅದೆ ಕಾಲದಲ್ಲಿ ಇಳಿದು ಬಂದ ಪೊನ್ನಾನ್ ಪಾಂಡ್ಯನ್ ದೇವರ್ ನಾಯಕತ್ವದ ಮಾರವ ಪಡೆ ಕೂಡಾ ಜೊತೆಗೂಡಿತು.

ಈ ಕುಶಲ ಯುದ್ಧತಂತ್ರ ಡಚ್ಚರನ್ನ ಕಂಗಾಲಾಗಿಸಿದ್ದಷ್ಟೆ ಅಲ್ಲˌ ಕೊಚ್ಚಿನ್ನಿನಲ್ಲಿದ್ದ ಐದೂ ಕೋಠಿಗಳಿಂದ ಬೇರು ಕಿತ್ತು ಪರಾರಿಯಾಗಿ ಲೆನಾಯಿಯನ್ನ ಕೂಡಿಕೊಳ್ಳಲು ಕೊಳಚ್ಚೆಲ್ಲಿಗೆ ದೌಡಾಯಿಸಲು ಪ್ರಚೋದಿಸಿತು. ಆದರೆ ಅಲ್ಲಿ ನಡೆದಿದ್ದ ಮೂರು ವಾರಗಳ ರಣಭೀಕರ ಕಾಳಗದಲ್ಲಿ ಡಚ್ಚರು ಸೋತು ಮಾರ್ತಾಂಡ ವರ್ಮನ ಮುಂದೆ ಸಂಪೂರ್ಣವಾಗಿ ಶರಣಾಗಿ ಅವನ ಆದೇಶದಂತೆ ಭಾರತದಿಂದಲೆ ಪೇರಿ ಕಿತ್ತರು. ದಳಪತಿ ಅರ್ಮುಗಂ ಪಿಳ್ಳೆ ಡಚ್ಚರಲ್ಲಿ ಹುಟ್ಟಿಸಿದ್ದ ಆತಂಕ ಅವರನ್ನ ಭಾರತದತ್ತ ಮತ್ತೆಂದೂ ತಿರುಗಿ ನೋಡದಂತೆ  ಮಾಡಿತು. ಬಹುಶಃ ಭಾರತೀಯರ ಯುದ್ಧ ಕೌಶಲ್ಯವನ್ನ ಡಚ್ಚರು ತಪ್ಪಾಗಿ ಅಂದಾಜಿಸಿದ್ದರು. ಎರಡೆರಡು ಕಡೆಗಳಿಂದ ಸಂಘಟಿತ ದಾಳಿಯನ್ನ ಅವರು ನಿರೀಕ್ಷಿಸಿರಲಿಕ್ಕಿಲ್ಲ ಅನಿಸುತ್ತೆ. ಕ್ಷಿಪ್ರ ಕಾರ್ಯಾಚರಣೆಯ ಈ ಯದ್ಧತಂತ್ರ ಫಲ ಕೊಟ್ಟು ಅವರನ್ನ ಇಲ್ಲಿಂದ ಒಕ್ಕಲೇಳಿಸಿತು.

ಇದೆ ಆಕ್ರಮಣದ ಹೊತ್ತಿಗೆ ಡಚ್ಚರಿಗೆ ಆರಂಭಿಕ ಆಶ್ರಯ ಕೊಟ್ಟು ಕಡೆಗೆ ಅವರದ್ದೆ ಕೈಗೊಂಬೆಯಾಗಿದ್ದ ಪೇಲವ ರಾಜನ ಆಳ್ವಿಕೆಯಲ್ಲಿದ್ದ ಪೂರ್ತಿ ಕೊಚ್ಚಿ ಸಾಮ್ರಾಜ್ಯವನ್ನ ಕಬಳಿಸಿ ಅದನ್ನ ತಿರುವಾಂಕೂರಿನಲ್ಲಿ ವಿಲೀನಗೊಳಿಸಿಕೊಳ್ಳುವ ಆರಂಭಿಕ ಯೋಜನೆಯನ್ನ ಮಾರ್ತಾಂಡ ವರ್ಮ ಹಾಕಿಕೊಂಡಿದ್ದರೂ ಸಹ ಕಡೆಗೆ ಡಚ್ ಶರಣಾಗತಿ ಹಾಗೂ ಅವರ ಶಾಶ್ವತ ಸ್ಥಳಾಂತರದ ನಂತರ ಅದನ್ನ ಅನಗತ್ಯವೆಂದು ಬಗೆದು ಭೂ ಯುದ್ಧದಿಂದ ತನ್ನ ಪಡೆಯನ್ನ ಹಿಂದೆ ಕರೆಸಿಕೊಂಡ. ವಾಸ್ತವವಾಗಿˌ ಕೇರಳದ ಮುಂದಿನ ರಾಜಕೀಯ ಸ್ಥಿತ್ಯಂತರಗಳನ್ನ ಇಂದು ಅವಲೋಖಿಸಿದಾಗ ಇದೊಂದು ತಪ್ಪು ನಿರ್ಣಯವಾಗಿತ್ತು ಅನಿಸುತ್ತದೆ.

ಅಂದು ಬಯಸದೆ ತನ್ನನ್ನ ಆವರಿಸಿದ ಕಾಳಗದಿಂದಾದ ರಕ್ತಪಾತದಿಂದ ನೊಂದ ಮಾರ್ತಾಂಡ ವರ್ಮ ಅಧಿಕಾರ ತ್ಯಜಿಸಲು ನಿರ್ಧರಿಸಿದ! ತನ್ನ ಸೊತ್ತೆಲ್ಲವನ್ನೂ ಸಾಮ್ರಾಜ್ಯದ ಸಹಿತ ತಿರುವನಂತಪುರದ ಶ್ರೀಅನಂತಪದ್ಮನಾಭಸ್ವಾಮಿಗೆ ಅರ್ಪಿಸಿದ. ಅದ ನಂತರ ತಾನು ಕೇವಲ "ಅನಂತಪದ್ಮನಾಭ ದಾಸ"ನೆಂದು ಕರೆಸಿಕೊಂಡು ಮಲಗಿದ ಭಂಗಿಯಲ್ಲಿರುವ ಆ ಮಹಾವಿಷ್ಣುವಿನ ಪ್ರತಿನಿಧಿಯಾಗಿ ಮಾತ್ರ ತನ್ನನ್ನ ಗುರುತಿಸಿಕೊಂಡುˌ ಭಗವಂತನ ರಾಜ್ಯವಾದ ಆ ತಿರುವಾಂಕೂರು ಸಂಸ್ಥಾನವನ್ನ ದೇವರ ಪರವಾಗಿ ಆಳಲು ಆರಂಭಿಸಿದ. ಅವನ ಮುಂದಿನ ಪೀಳಿಗೆಯವರೂ ನಿಯತ್ತಿನಿಂದ ಇದೆ ನೀತಿಯನ್ನ ಪಾಲಿಸಿ ಪಟ್ಟಾಭಿಷೇಕದ ಬದಲು ಹಿರಣ್ಯಗರ್ಭ ಸಂಸ್ಕಾರದ ವಿಧಿಯನ್ನ ಅನುಸರಿಸುತ್ತಾ ಸದಾಕಾಲಕ್ಕೂ ಸಹ ತಲೆಮಾರುಗಳವರೆಗೂ ಈಗಲೂ "ಪದ್ಮನಾಭದಾಸ"ರಾಗಿಯೆ ಉಳಿದಿದ್ದಾರೆ.

*****

ವಾಸ್ಕೊ-ಡ-ಗಾಮ ಭಾರತದಲ್ಲಿ ತನ್ನ ಮೊದಲ ಹೆಜ್ಜೆಯೂರಿದ್ದ ಕೊಯಿಲಾಂಡಿಯಲ್ಲೆ ಸ್ವತಂತ್ರ್ಯ ಪೂರ್ವದ ೧೮೯೭ರಲ್ಲಿ ಹುಟ್ಟಿದ್ದ ಅನಾಥ ಶಿಶುವೆ ಭಗವಾನ್ ನಿತ್ಯಾನಂದರು. ಹೆತ್ತ ತಂದೆ ತಾಯಿ ಯಾರೆಂದೆ ಗೊತ್ತಿಲ್ಲದ ಆ ಮಗುವನ್ನ ರೈತಾಪಿ ದಂಪತಿಗಳಾಗಿದ್ದ ಉಣ್ಣಿಯಮ್ಮ ಹಾಗೂ ಚಾತು ನಾಯರ್ ದಂಪತಿ ತಮ್ಮ ದತ್ತು ಪುತ್ರನನ್ನಾಗಿ ಸ್ವೀಕರಿಸಿದರು. ಅದಾಗಲೆ ಮನೆ ತುಂಬಾ ಮಕ್ಕಳಿದ್ದರೂ ಇವರನ್ನೂ ಸ್ವಂತ ಮಗನಾಗಿಯೆ ಪರಿಗಣಿಸಿ ರಾಮನ್ ಅನ್ನುವ ಹೆಸರಿಟ್ಟು ಪಾಲಿಸಿದರು. ದುರದೃಷ್ಟವಶಾತ್ ಆರಂಭದಲ್ಲಿ ಇನ್ನೂ ಮೂರುವರ್ಷಗಳ ಪ್ರಾಯವಾಗಿದ್ದಾಗಲೆ ತಮ್ಮ ಸಾಕು ತಂದೆಯನ್ನೂ ಹಾಗೂ ಆರರ ಪ್ರಾಯದಲ್ಲಿ ತಾಯಿಯನ್ನೂ ಕಳೆದುಕೊಂಡು ರಾಮನ್ ಮತ್ತೊಮ್ಮೆ ಅನಾಥನಾದ. ಸಾಯುವ ಮುನ್ನ ಉಣ್ಣಿಯಮ್ಮ ತಾವು ಗೇಣಿಗೆ ಗದ್ದೆಯನ್ನ ಹಿಡಿದಿದ್ದ ವಕೀಲ ಈಶ್ವರ ಅಯ್ಯರ್ರ ಮಡಿಲಿಗೆ ಈ ನತದೃಷ್ಟ ಮಗುವಿನ ಲಾಲನೆ ಪಾಲನೆಯ ಹೊಣೆಯನ್ನೊಪ್ಪಿಸಿ ಕಣ್ಮುಚ್ಚಿದ್ದರಂತೆ.

ಬೆಳೆಯುತ್ತಿದ್ದಂತೆ ಅಧ್ಯಾತ್ಮದತ್ತ ಹೊರಳಿದ ರಾಮನ್ ತನ್ನ ಹದಿಹರೆಯದಲ್ಲೆ ಕೇವಲ ಕೌಪಿನವೊಂದನ್ನಷ್ಟೆ ಉಟ್ಟು ದೇಶಾಂತರ ಹೊರಟ. ಹಿಮಾಲಯದವರೆಗೂ ಅಂಡಲೆದು ಪಡೆದ ಅಧ್ಯಾತ್ಮಿಕ ಸಾಧನೆಯ ನಂತರ ಕಾಙಂನಗಾಡಿನ ಹೊಸದುರ್ಗ ಕೋಟೆಯ ಪರಿಸರದಲ್ಲಿ ನೆಲೆ ನಿಂತ. ಅಲ್ಲಿ ಸ್ವತಃ ತಾನೆ ಮೇಲೆ ಗುಳಿಗನ ನೆಲೆಯಿದ್ಧ ಪುಟ್ಚ ಬೆಟ್ಚವೊಂದರ ಒಡಲಾಳದಲ್ಲಿದ್ದ ಮುರಕ್ಕಲ್ಲುಗಳಲ್ಲಿ ನಲವತ್ತಮೂರು ಗುಹೆಗಳನ್ನ ಕೊರೆದ. ಅದೆ ಇಂದು ಅಲ್ಲಿರುವ ಶ್ರೀನಿತ್ಯಾನಂದಾಶ್ರಮ. ಆ ಗುಹೆಗಳೆ ಧ್ಯಾನಸ್ಥಾನ.

ಅಲ್ಲಿಂದ ಘಟ್ಟದ ದಿಕ್ಕಿನಲ್ಲಿ ಐದು ಕಿಲೋಮೀಟರುಗಳಾಚೆ ಆಗ ಅಲ್ಲಿ ವಾಸವಿದ್ದ ಕೊರಗರ ಮನ ಒಲಿಸಿ ಪಡೆದ ಜಾಗದಲ್ಲಿ ಪ್ರಕೃತಿಯ ಮಡಿಲ ಮಧ್ಯೆ ಅವರೆ ನಿರ್ಮಿಸಿರುವ ಗುರುವನ ಆ ಊರಿನಲ್ಲಿರುವ ಮತ್ತೊಂದು ಅದ್ಭುತ. ದೇವಗಂಗೆಯನ್ನೆ ಅಲ್ಲಿಗೆ ಗುರುಗಳು ಇಳಿಸಿದ್ದಾರೆ ಎಂದು ನಂಬಲಾಗುವ ಗೋಮುಖ ತೀರ್ಥವೊಂದಲ್ಲಿದೆ. ಮಲೆಯ ಆಳದಿಂದ ಉಕ್ಕಿಬರುವ ಆ ನೀರಿನಲ್ಲೇನೋ ಸೊಗಸಿದೆ. ಆ ನೀರಲ್ಲಿ ಮಿಂದರೆ ಮೈ ಮನ ಹಗುರಾಗುವ ಭಾವ ಆವರಿಸುತ್ತದೆ. ಮಿಂದವರಿಗೆ ಹೊಸ ಸುಗಂಧ ಹೊತ್ತ ಅನುಭವವಾಗುತ್ತದೆ. ಇವನೂ ಅಲ್ಲಿಗೆ ಹೋದಾಗ ಆ ಅಕ್ಷಯ ಜಲದಲ್ಲಿ ಮಿಂದು ಉಲ್ಲಸಿತನಾದ. ಆ ಪರಿಸರದ ಹಸಿರು ಆಹ್ಲಾದಕರವಾಗಿತ್ತು.

( ಇನ್ನೂ ಇದೆ.)

https://youtu.be/nqiAwAlP1NM

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೮.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೮.👊







"ವೀರ್ - ಝಾರಾ" ಮೂಲಕ ಯಶ್ ಛೋಪ್ರಾ ಸಿನೆಮಾ ಬಳಗದಲ್ಲಿ ಮೊದಲಿನಿಂದಲೂ ಇದ್ದ ಮದನ್ ಮೋಹನಸಾಬರ ಮಗ ಸಂಜೀವ ಕೋಹ್ಲಿ ಯಶಸ್ವಿಯಾಗಿ ಅವರಪ್ಪನ ಆ ಅಮೂಲ್ಯ ರತ್ನದಂತಹ ಹಾಡುಗಳನ್ನ ಹೊಸತಾಗಿ ಸಿನೆಮಾವೊಂದರಲ್ಲಿ ಅಳವಡಿಸಿ ಗೆದ್ದಿದ್ದರು. ಅದೂ ಸಹ ಸರಿಸುಮಾರು ಸಂಯೋಜನೆಯಾದ ದಿನಕ್ಕಿಂತ ಮೂವತ್ತು ವರ್ಷಗಳ ನಂತರ. ಇದಕ್ಕಿಂತ ಒಳ್ಳೆಯ ಸಕಾಲಿಕ ಉದಾಹರಣೆಯನ್ನ ಕೊಟ್ಟು ಅವರ ಸಂಗೀತದ ಸಮೃದ್ಧಿಯನ್ನ ವಿವರಿಸಲು ಅವನಿಂದಂತೂ ಸಾಧ್ಯವಿಲ್ಲ. ಅಷ್ಟು ಕಾಲಾತೀತ ಹಾಡುಗಳವರವು.


ಎಲ್ಲಿಯ ಅರವತ್ತರ ದಶಕದ ಮದನ ಮೋಹನ್ ಗೀತೆಗಳು? ಅದೆಲ್ಲಿಯ ತೊಂಬತ್ತರ ದಶಕದಲ್ಲಿ ನಿಧಾನವಾಗಿ ಹೊರ ಪ್ರಪಂಚಕ್ಕೆ ಕಣ್ತೆರೆಯತ್ತಿದ್ದ ಪ್ರಸಾದಪುರವೆನ್ನುವ ಪುಟ್ಟ ಊರಿನ ಯಕಶ್ಚಿತ್ ಇವನು? ಒಟ್ಟಿನಲ್ಲಿ ತನ್ನ ಪ್ರಾಯಕ್ಕಿಂತ ಕನಿಷ್ಠ ಕಾಲು ಶತಮಾನ ಹಿಂದಿನ ಹಿಂದಿ ಹಾಡುಗಳ ಮನಮೋಹಕತೆಗೆ ಮದನ್ ಮೋಹನ್ ಸಾಬರ ಮಾಧುರ್ಯಭರಿತ ಹಾಡುಗಳ ಮೂಲಕ ಇವನ ಅರಿವಿನ ಕಣ್ಣುಗಳು ಮೆಲ್ಲಗೆ ತೆರೆದುಕೊಳ್ಳಲಾರಂಭಿಸಿತ್ತು. ದೇಹ ಹೊಸತಾಗಿದ್ದರೂ ಮನಸು ಮಾತ್ರ ಪುರಾತನ ಕಾಲದಲ್ಲಿದ್ದ ವಿಚಿತ್ರ ಮನಸ್ಥಿತಿಯಲ್ಲಿ ಅಂದೂ ಇದ್ದˌ ಇಂದೂ ಇದ್ದಾನೆ.


ಕೆ ಪಿ ಸೈಗಲ್ˌ ಸರ್ದಾರ್ ಮಲಿಕ್ˌ ಹೇಮಂತಕುಮಾರ್ˌ ಚಿತ್ರಗುಪ್ತˌ ಸಿ ರಾಮಚಂದ್ರˌ ಖಯ್ಯಾಂˌ ರವಿˌ ಜೈದೇವ್ˌ ವಸಂತ ದೇಸಾಯಿˌ ಸಚಿನದೇವ ಬರ್ಮನ್ˌ ನೌಷಾದ್ˌ ಶಂಕರ್ - ಜೈಕಿಶನ್ˌ ರವೀಂದ್ರ ಜೈನ್ˌ ಒ ಪಿ ನಯ್ಯರ್ˌ ಮದನಮೋಹನ ಸಾಬ್ ಇವರದ್ದೆಲ್ಲಾ ಸಹ ಬೇರೆಯೆ ಕೌಶಲ್ಯದ ಸಂಗೀತ. ಒಬ್ಬೊಬ್ಬರದೂ ವಿಭಿನ್ನ ಶೈಲಿ. ಅದನ್ನ ನಿರಂತರವಾಗಿ ಕೇಳುವ ಹವ್ಯಾಸವಿಲ್ಲದಿದ್ದರೆ ಗ್ರಹಿಸೋದು ಕಷ್ಟ. ಗ್ರಹಿಕೆಯ ಪರಿಧಿ ವಿಸ್ತರಿಸಿದ ಮದನಮೋಹನ ಸಾಬರ ಹಾಡುಗಳಿಗೆ ಅವನು ಎಷ್ಟು ಋಣಿಯಾಗಿದ್ದರೂ ಸಾಲದು. ಸಿನೆಮಾ ಸಂಗೀತದ ವಿಷಯದಲ್ಲಿ ಅವನ ಆಸಕ್ತಿ ಇನ್ನಷ್ಟು ಆಳವಾಗಿಸಿದ್ದು ಅವರ ಗೀತೆಗಳ ಲಾಲಿತ್ಯವಲ್ಲದೆ ಮತ್ತಿನ್ನೇನೂ ಅಲ್ಲ.

ಬೆಳೆದು ನಿಂತ ಮೇಲೆ ಇಷ್ಟವಾಗಬೇಕಿದ್ದ ಹಾಡುಗಳು ಎಳವೆಯಲ್ಲೆ ಆಪ್ತವೆನಿಸೋದು ಒಂದು ವಿಶೇಷ ಗುಣವೋ ಇಲ್ಲಾ ಅದೊಂದು ಮಾನಸಿಕ ಊನವೋ ಅವನಿಗೆ ಖಚಿತವಿಲ್ಲ. ಆದರೆ ಅವನ ಸಮಕಾಲೀನವಲ್ಲದ ಆ ಹಳೆಯ ಸೊಗಡಿನ ಅರ್ಥಗರ್ಭಿತ ಹಾಡುಗಳನ್ನ ಆಲಿಸುವಾಗಲೆಲ್ಲಾ ಪೂರ್ವಜನ್ಮದ ಪ್ರತಿಧ್ವನಿಯೊಂದು ಮನಸಿನಾಳದಿಂದ ಅನುರಣಿಸಿ ಬರುವ ಭಾವದಲ್ಲಿ ಹುದುಗಿ ಹೋಗುತ್ತಿದ್ದ. ಅವುಗಳ ಭಾವ ಲಹರಿಗೆ ಸಹಜವಾಗಿ ಅವನ ಮನದ ಭಾವತರಂಗಗಳು ಅನುರಣಿಸುತ್ತಿದ್ದವು. ಒಂಥರಾ ಮಧುರ ಪ್ರಚೋದನೆಯನ್ನ ಮೌನದಲ್ಲವು ಅವನೊಳಗೆ ಹುಟ್ಟಿಸುತ್ತಿದ್ದವು.


*****

ಹುಟ್ಟಾ ಪುಂಡನೆಂದೆ ಮನೆ ಮಂದಿಯೆಲ್ಲಾ ತೀರ್ಮಾನಿಸಿದ್ದ ಕಾರಣˌ ಅಷ್ಟೆಲ್ಲಾ ಹಾಡಿನ ಹುಚ್ಚಿದ್ದರೂ ಸಹ ಮನೆಯ ಅಮೂಲ್ಯ ವಸ್ತುಗಳೆಂದೆ ಪರಿಗಣಿತವಾಗಿದ್ದ ರೇಡಿಯೋವನ್ನಾಗಲಿˌ ಕಾಯಿಲ್ ಇರುವ ವಿದ್ಯುತ್ ಸ್ಟವನ್ನಾಗಲಿˌ ಟೂ ಇನ್ ವನ್ನನ್ನಾಗಲಿˌ ಅದರ ಹಿಂದೆ ಹಿಂದೆಯೆ ತರಲಾಗಿದ್ದ ಡಯನೋರಾ ಟಿವಿˌ ಸುಮಿತ್ ಮಿಕ್ಸರ್ˌ ರ್ಯಾಲಿ ಟೇಬಲ್ ಫ್ಯಾನು ಅಥವಾ ಮಾವಂದಿರು ಬಿಟ್ಟು ಹೋಗಿದ್ದ ಹರ್ಕ್ಯುಲಸ್ ಸೈಕಲ್ಲನ್ನಾಗಲಿ ಇದ್ಯಾವುದನ್ನೂ ಮುಟ್ಟಲು ಅಥವಾ ಚಲಾಯಿಸಲು ಅವನಿಗೆ ಅನುಮತಿ ಇರಲಿಲ್ಲ. ಇದರಲ್ಲಿ ಯಾವುದೆ ವಸ್ತುವನ್ನ ಇವನು ಮುಟ್ಟಿದರೆ ಸಾಕು ಅವು ಕೂಡಲೆ ಕೆಟ್ಟು ಬಿಡುತ್ತವೆ ಅಂತ ಮನೆಮಂದಿಯೆಲ್ಲ ಬಲವಾಗಿ ನಂಬಿದ್ದಷ್ಟೆ ಅಲ್ಲದೆ ಇವನನ್ನೂ ನಂಬಿಸಿಬಿಟ್ಟಿದ್ದರು! ಹೀಗಾಗಿ ಕದ್ದುಮುಚ್ಚಿ ಯಾರೂ ನೋಡದ ಹೊತ್ತಲ್ಲಿ ಮಾತ್ರ ವಯೋಸಹಜ ಪ್ರಚೋದನೆಗೊಳಗಾಗಿ ಅವುಗಳನ್ನ ಮುಟ್ಟಿಯೋ ಇಲ್ಲಾ ಸವರಿಯೋ ತೃಪ್ತಿ ಪಟ್ಟುಕೊಳ್ಳೋದಷ್ಟೆ ಅವನಿಗೆ ಸಾಧ್ಯವಾಗುತ್ತಿದ್ದುದು. ಹಾಗೆ ಕಳ್ಳತನದಲ್ಲಿ ಮುಟ್ಟಿದವುಗಳು ಬಹುಶಃ ತನ್ನ ಸ್ಪರ್ಷದಿಂದ ಕೆಟ್ಟು ಹೋಗಿರಬಹುದುˌ ಮನೆಯವರಿಗೆ ಈ ವಿಷಯ ಗೊತ್ತಾದರೆ ತನ್ನ ಪರಿಸ್ಥಿತಿ ಹದಗೆಡಬಹುದು ಅನ್ನುವ ಭೀತಿಯಿಂದಲೆ ಅವುಗಳನ್ನ ಮನೆಯ ಹಿರಿಯರ್ಯಾರಾದರೂ ಮರಳಿ ಚಲಾಯಿಸುವವರೆಗೆ ಮಳ್ಳನಂತೆ ಕಾಯುತ್ತಿದ್ದ. ಯಾವುದೆ ತಕರಾರಿಲ್ಲದೆ ಎಂದಿನಂತೆ ಅವು ಚಾಲನೆಗೊಂಡಾಗ ದೊಡ್ಡ ಗಂಡಾಂತರವೊಂದರಿಂದ ಪಾರಾದ ಒಂದು ನೆಮ್ಮದಿಯ ನಿಟ್ಟುಸಿರು ಅರಿವಿಲ್ಲದಂತೆಯೆ ಅವನಿಂದ ಹೊರಹೊಮ್ಮುತ್ತಿತ್ತು.

ಅವರೆಲ್ಲರ ಆ ಗಟ್ಟಿ ನಿಲುವು ಪೂರ್ತಿ ಸುಳ್ಳೇನೂ ಆಗಿರಲಿಲ್ಲ. ದೀಪಾವಳಿಯ ಒಂದು ದಿನ ಪಟಾಕಿ ಹಚ್ಚಲು ಸುರುಸುರುಬತ್ತಿಯೊಂದನ್ನ ಉರಿಸಿ ತರಲು ವಿದ್ಯುತ್ ಒಲೆ ಹಚ್ಚಿ ಅದರ ಕಾಯಿಲ್ ಕೆಂಡದಂತೆ ಕೆಂಪಾದಾಗ ನೇರವಾಗಿ ಆ ಸುರುಸುರುಬತ್ತಿಯನ್ನ ಅದಕ್ಕಿಟ್ಟಿದ್ದ! ಹೊಡೆದ ವಿದ್ಯುದಘಾತ ಎತ್ತಿ ಅಡುಗೆ ಕೋಣೆಯ ಮತ್ತೊಂದು ಮೂಲೆಗೆ ಹೋಗಿ ಬೀಳುವಂತೆ ಬಿಸಾಡಿತು ನೋಡಿ! ಕೆಟ್ಟ ಮೇಲೆ ಬುದ್ಧಿ ತಾನೆ ತಾನಾಗಿ ಬಂತವನಿಗೆ. ಮುಟ್ಟಬಾರದು ಅಂತ ಹೇಳಿದ ಮೇಲೂ ಕದ್ದುಮುಚ್ಚಿ ಮಾಡಿದ್ದ ಅಪರಾಧ ಅದಾಗಿದ್ದರಿಂದ ಯಾರೊಂದಿಗೂ ಆದ ನೋವನ್ನ ಹೇಳಿಕೊಳ್ಳುವಂತೆಯೂ ಇರಲಿಲ್ಲ. ಅವಡುಗಚ್ಚಿಕೊಂಡು ಆದ ಸಂಕಟವನ್ನ ಕಮಕ್-ಕಿಮಕ್ ಅನ್ನದೆ ಸಹಿಸಿಕೊಂಡ. 

ಆದರೂ ಒಂಥರಾ ಕೈಕಟ್ಟಿದಂತಹ ಈ ಕಠಿಣ ನಿರ್ಬಂಧಗಳು ಅವನಿಗೆ ಚೂರೆಚೂರೂ ಇಷ್ಟವಾಗುತ್ತಿರಲಿಲ್ಲ. ಬೇರೆ ಇನ್ಯಾವ ವಸ್ತುಗಳಲ್ಲೂ ಅವನಿಗೆ ಆಸಕ್ತಿ ಮೊಳೆತಿರಲಿಲ್ಲ. ಆದರೆ ತಾನೂ ರೇಡಿಯೋ ಕಿವಿ ಹಿಂಡಿ ಧಾರವಾಡˌ ಮಂಗಳೂರುˌ ಬೆಂಗಳೂರುˌ ಭದ್ರಾವತಿ ಅಂತ ಅದನ್ನ ಸರ್ಕೀಟು ಹೊರಡಿಸಬೇಕು ಅನ್ನುವ ಆಸೆ ಅವನಿಗೂ ಇತ್ತು. ಆದರೆ ಅದಕ್ಕೆ ಮುಕ್ತ ಅವಕಾಶವಿರಲಿಲ್ಲ ಅಷ್ಟೆ. ಅವನ ಆಸಕ್ತಿಯಿದ್ದದ್ದೂ ಸೀಮಿತ ವಸ್ತುಗಳ ಮೇಲೆ ಮಾತ್ರ. ಮುಖ್ಯವಾಗಿ ರೇಡಿಯೋ ಹಾಗೂ ಸೈಕಲ್. ಅದರಲ್ಲೂ ಉಪಯೋಗಿಸುವವರಿಲ್ಲದೆ ಸೈಕಲ್ ಮಾರಿದ ನಂತರ ಆ ಮನೆಯಲ್ಲಿ ರೇಡಿಯೋ ಒಂದೆ ಅಲ್ಲುಳಿದಿದ್ದ ಅವನ ಪಾಲಿನ ಕಣ್ಮಣಿ. 


ಕದ್ದುಮುಚ್ಚಿಯಷ್ಟೆ ಚೂರುಪಾರು ಮುಟ್ಟಿಯೋ ಸವರಿಯೋ ಆಗಾಗ ಅವಕಾಶ ಸಿಕ್ಕಾಗಲೆಲ್ಲಾ ತನ್ನ ಮನದಾಸೆಯನ್ನ ಈಡೇರಿಸಿಕೊಳ್ಳಲು ಸೆಣೆಸುತ್ತಿದ್ದ. ಅಪ್ಪಿತಪ್ಪಿ ಈ ಕ್ರೈಮು ಅವನ ಚಿಕ್ಕಮ್ಮಂದಿರ ಗೃಧ್ರ ದೃಷ್ಟಿಗೇನಾದರೂ ರೆಡ್ ಹ್ಯಾಂಡಾಗಿ ಸಿಕ್ಕಿ ಹಾಕಿಕೊಂಡು ಬಿಟ್ಟರೆ ದೊಡ್ಡ ಪ್ರಹಸನವೆ ನಡೆದುˌ ಯಾವ ನ್ಯಾಯವಾದ ವಿಚಾರಣೆಯನ್ನೂ ನಡೆಸದೆ ಸರ್ವಾನಮತದಿಂದ ಅಪರಾಧಿಯೆಂದು ತೀರ್ಮಾನಿಸಲಾಗುತ್ತಿದ್ದ ಅವನನ್ನ ಮುಲಾಜಿಲ್ಲದೆ ಮನೆಮಂದಿಯೆಲ್ಲ ತಮ್ಮ ತಮ್ಮ ಮೊನಚು ಮಾತಿನಿಂದಲೆ ಶೂಲಕ್ಕೇರಿಸಿ ತಲೆಯನ್ನ ಮೊಟಕಿ ಮೊಟಕಿಯೆ ಬುದ್ಧಿ ಕಲಿಸಲು ಹವಣಿಸುವುದು ಖಾತ್ರಿಯಿತ್ತು.


*****

ಕಾಲಾಂತರದಲ್ಲಿ ತನ್ನ ಭವಿಷ್ಯ ಬದಲಾದಂತೆಯೆˌ ಕೇರಳ ಜೊತೆಜೊತೆಗೆ ಭಾರತದ ಭವಿಷ್ಯವನ್ನೂ ಸಹ ಬದಲಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಒಂದೊಮ್ಮೆ ಕೇರಳದ ದಕ್ಷಿಣ ತೀರ ಕುಲಚೆಲ್ಲಿನಲ್ಲಿ ಬರೊಬ್ಬರಿ ಇಪ್ಪತ್ತೊಂದು ದಿನ ನಡೆದ ನಿರ್ಣಾಯಕ ಯುದ್ಧದಲ್ಲಿ ಅಂದಿನ ಜಾಗತಿಕ ನೌಕಾದಳಗಳಲ್ಲೆ ಅತ್ಯಾಧುನಿಕವೆನಿಸಿದ್ದ ಡಚ್ ಈಸ್ಟ್ ಇಂಡಿಯಾ ಕಂಪನಿಯ ಸೇನೆಯನ್ನ ಆಗ ತಿರುವಾಂಕೂರನ್ನ ಆಳುತ್ತಿದ್ದ ರಾಜ ಮಾರ್ತಾಂಡ ವರ್ಮ ನಿರ್ಣಾಯಕವಾಗಿ ಮಣಿಸಿ ಕೇರಳದಿಂದ ಶಾಶ್ವತವಾಗಿ ನೆಲೆ ಕಿತ್ತು ಅವರು ಸಿಲೋನಿಗೆ ಪಲಾಯನ ಮಾಡುವಂತೆ ಮಾಡಿರದಿರುತ್ತಿದ್ದರೆ ಬಹುಶಃ ಭಾರತ ಇಂದು ಬ್ರಿಟಿಷ್ ವಸಾಹತಾಗಿರದೆ ಡಚ್ ವಸಾಹತಾಗಿರುತ್ತಿತ್ತು. ಹಾಗೂˌ ನಾವು ಭಾರತೀಯರೆಲ್ಲ ಇಂದು ಇಂಗ್ಲೀಷಿನ ಮೋಹಕ್ಕೆ ಮರುಳಾದಂತೆ ಬಹುಶಃ ಡಚ್ ಭಾಷೆಯ ಮೋಹದ ಗೀಳಿಗೆ ಸಿಕ್ಕುಹಾಕಿಕೊಂಡು ಮಾತು ಮಾತಿನ ನಡುವೆ ಇಂಗ್ಲಿಷ್ ಬಳಸುವಂತೆ ಡಚ್ ಬಳಸುವ ಎಲ್ಲಾ ಅಪಾಯಗಳೂ ಇದ್ದವು. 

೧೭೪೧ರ ಅಗೋಸ್ತು ತಿಂಗಳಿನ ಮುಂಗಾರು ಮಳೆಯ ಕಾಲದಲ್ಲಿ ಡಚ್ಚರ ಹೆಡೆಮುರಿ ಕಟ್ಟಿ ಮಾರ್ತಾಂಡ ವರ್ಮ ಅವರನ್ನ ಸಿಲೋನಿಗೆ ಅಟ್ಟಿದ್ದˌ ಅವನ ಬೆದರಿಕೆ ಹೇಗಿತ್ತೆಂದರೆ ಮತ್ತೆಂದೂ ಡಚ್ಚರು ಭಾರತದತ್ತ ತಿರುಗಿ ನೋಡಲಿಲ್ಲ.

( ಇನ್ನೂ ಇದೆ.)


https://youtu.be/zqDSHFG9Xm8

19 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೭.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೭.👊




ಆದರೂ ಬೆಳ್ಳಂಬೆಳಗ್ಯೆಯೆ ತನ್ನ ಮೇಲಾದ ಆ ಬಲವಂತದ ಔಷಧ ಪ್ರಾಶನದ ದೌರ್ಜನ್ಯದ ವಿರುದ್ಧ ಇನ್ನೂ ಪಿಸುರು ಕೂಡ ತೆಗೆಯದ ಒಂದೆ ಕಣ್ಣಿನಲ್ಲಿ ಕಣ್ಣೀರು ಹಾಕುತ್ತಿದ್ದಂತೆ ರೇಡಿಯೋದಲ್ಲಿ ಪ್ರಸಾರವಾಗುತ್ತಿದ್ದ "ಭೂಲೆ ಬಿಸರೆ ಗೀತ್" ಮಾಲಿಕೆಯಲ್ಲಿ "ಲಗ್ ಜಾ ಗಲೇ...." ಹರಿದು ಬಂತು ನೋಡಿ ಅವನಿಗೆ ಅರಿವಿಲ್ಲದಂತೆ ಅವನ ಭಾವದ ಕಟ್ಟೆ ಒಡೆದು ಹರಿಯಲು ತಯಾರಾಗಿ ಬಿಟ್ಟಂತಾಯಿತು. ಮಲಗುವ ಕೋಣೆಯಲ್ಲಿದ್ದ ರೇಡಿಯೋದಿಂದ ಸುಸ್ಪಷ್ಟವಾಗಿ ಕೇಳುತ್ತಿದ್ದ ಆ ಗಂಧರ್ವ ರಾಗವನ್ನ ಆಲಿಸುತ್ತಾ ಕಲ್ಲಾದವನಂತೆ ಕಡೆಯುವ ಕಲ್ಲಿನ ಪಕ್ಕದ ಮಣೆಯ ಮೇಲೆಯೆ ಗೋಡೆಗೊರಗಿ ಕುಕ್ಕರಿಸಿದ. 

ರೇಡಿಯೋದ ಸಕಲೆಂಟು ಗಲಭೆಗಳ ಮಧ್ಯೆ ಅಷ್ಟಿಷ್ಟು ಕೇಳುತ್ತಿದ್ದ ಹಾಡು ಅಷ್ಟು ಬೇಗ ಮುಗಿದಾಗ ಮೊದಲಬಾರಿಗೆ ಹಾಡೊಂದು ಬಹಳ ಬೇಗ ಮುಗಿದ ಕಾರಣಕ್ಕೆ ತೀವೃ ನಿರಾಸೆ ಅನುಭವಿಸಿದ. ಕಣ್ಣಿಂದ ಕಂಬನಿ ಹರಿಯುತ್ತಿತ್ತು. ಅದನ್ನ ನೋಡಿದ ಎಲ್ಲರೂ ಔಷಧಿ ಕುಡಿಸಿದ್ದಕ್ಕೆ ನಾಟಕ ಮಾಡ್ತಿದ್ದಾನೆ ಅನ್ನೋ ತೀರ್ಪು ಕೊಟ್ಟರು. ಆದರೆ ಗರ ಬಡಿದಂತೆ ಕೂತು ಕಣ್ಣೀರಿಡಲು ವಿವರಿಸಲಾಗದ ಕಾರಣವೂ ಒಂದಿರಬಹುದುˌ ಸಂಕಟಕ್ಕಷ್ಟೆ ಅಲ್ಲ ಸಂತಸ ಹೆಚ್ಚಾದಾಗಲೂ ಬರೋದು ಕೇವಲ ಕಣ್ಣೀರೆ ಅನ್ನುವ ಕಲ್ಪನೆ ಸ್ವತಃ ಅವನಿಗೇನೆ ಅರಿವಿದ್ದಿರದ ಪ್ರಾಯ ಅದು. ಆ ಮಾನಸಿಕ ಸ್ಥಿತಿಯನ್ನ ಸರಿಯಾದ ಪದಗಳಲ್ಲಿ ಹಿಡಿದು ಅರ್ಥಪೂರ್ಣ ವಾಕ್ಯವಾಗಿಸಿ ವಿವರಿಸಿ ಹೇಳುವಷ್ಟು ವ್ಯಾಕರಣ ಬದ್ಧ ಕನ್ನಡವೂ ಅವನಿಗಿನ್ನೂ ಬರುತ್ತಿರಲಿಲ್ಲ. 

ಒಂದು ವೇಳೆ ಆದ ಆ ದೈವೀಕ ಅನುಭವವನ್ನು ಬರಿಮಾತಿನಲ್ಲೇನಾದರೂ ಅವನು ವಿವರಿಸಲು ಶಕ್ತನಾಗಿದ್ದರೆˌ ತಾವು ಸರಿಯಾಗಿ ಕೇಳದೆ ಕಳೆದೆ ಹೋದ ಆ ಅಮೂಲ್ಯ ಹಾಡನ್ನ ಕೇಳದೆ ಹೋಗಿ ತಮಗಾದ ತುಂಬಲಾರದ ನಷ್ಟಕ್ಕೆ ಮನೆ-ಮಂದಿಯೆಲ್ಲಾ ಅಪಾರ ದುಃಖ ಪಡೋದು ಖಾತ್ರಿಯಿತ್ತು! ಅನ್ನುವಷ್ಟರ ಮಟ್ಟಿಗೆ ಅದರ ಆಲಾಪನೆಯ ಮೋಡಿಗೆ ಅವನು ಸಿಕ್ಕಿಹಾಕಿಕೊಂಡು ಬಿಟ್ಟಿದ್ದ. ಹಾಡಿನ ಮುಕ್ತಾಯದಲ್ಲಿ ಗದ್ದಲದ ಮಧ್ಯೆ ಮಧ್ಯೆ ಉದ್ಘೋಷಕಿ ಮಂಗೇಷ್ಕರ್... ಅಲಿ ಖಾನ್ˌ ಮದನ್ ಮೋಹನ್ ಅಂದದ್ದು ಮೊತ್ತಮೊದಲ ಸಲ ಕೇಳಿಸಿಕೊಂಡ. ಅಂದು ಆ ಹಾಡನ್ನ ಮೊತ್ತಮೊದಲ ಸಲ ಕೇಳಿಸಿಕೊಂಡು ಆದ ಅನುಭೂತಿಯನ್ನ ಇಂದು ಅಷ್ಟೆ ಜೀವಂತವಾಗಿ ವಿವರಿಸಲು ಅವನಲ್ಲಿ ಸೂಕ್ತ ಪದಗಳಿಲ್ಲ.

ಬೆಳೆಯುತ್ತಾ ಸಂಗೀತದಾಸಕ್ತಿಯೂ ಹೆಚ್ಚಿ ಒಂದು ಪಾಕೆಟ್ ರೇಡಿಯೋವನ್ನ ರಜೆಯ ಹೊತ್ತಲ್ಲಿ ಮನೆ ಮನೆಗೆ ಪೇಪರ್ ಹಾಕಿ ಸಂಪಾದಿಸಿದ್ದ ತನ್ನದೆ ದುಡಿಮೆಯಿಂದ ಖರೀದಿಸಿದ. ಪ್ರೌಢಶಾಲಾ ವಿದ್ಯಾರ್ಥಿಯಾಗಿದ್ದ ದಿನಗಳಲ್ಲಂತೂ ತಂಪಾದ ರಾತ್ರಿ ಹಾಗೂ ಬೆಳ್ಳಂಬೆಳಗ್ಯೆ ಮಾತ್ರ ಸುಸ್ಪಷ್ಟವಾಗಿ ಅದರಿಂದ ಪ್ರಸಾರವಾಗುತ್ತಿದ್ದ ಮುಂಬೈ ವಿವಿಧಭಾರತಿ ಹಾಗೂ ಸಿಲೋನು ಕೇಂದ್ರಗಳಿಂದ ಪ್ರಸಾರವಾಗುತ್ತಿದ್ದ ಹಳೆಯ ಹಿಂದಿ ಚಿತ್ರಗೀತೆಗಳನ್ನ ಅದಕ್ಕೊಂದು ಕಿವಿಗಾಪು ಸಿಕ್ಕಿಸಿಕೊಂಡು ಕೇಳುವ ಚಟ ಹತ್ತಿಸಿಕೊಂಡ.

ಆಗಿದ್ದ ಏಕೈಕ ದೆಹಲಿ ದೂರದರ್ಶನದ ಕಾರ್ಯಕ್ರಮಗಳನ್ನ ನೋಡಿಯೋ - ಹಿಂದಿ ಸಿನೆಮಾಗಳನ್ನ ವೀಕ್ಷಿಸಿಯೋ - ಇಲ್ಲಾ ಥರೇವಾರಿ ಹಿಂದಿ ಹಾಡುಗಳನ್ನ ಆಲಿಸಿಯೋ - ಅಥವಾ ಶಾಲೆಯಲ್ಲಿ ಹಿಂದಿಯೂ ಒಂದು ಭಾಷೆಯಾಗಿ ಕಲಿಸಲಾರಂಭಿಸಿದ್ದ ಕಾರಣದಿಂದಲೋ ಹರುಕು ಮುರುಕು ಹಿಂದಿ ಅರ್ಥವಾಗುತ್ತಿತ್ತು.  ಭಾವಪೂರ್ಣವಾಗಿರುವ ಸಾಹಿತ್ಯವಿರುವ - ಲಾಲಿತ್ಯಪೂರ್ಣವಾದ ಸರಳವೆನಿಸುವ ರಾಗ ಸಂಯೋಜಿಸಲಾಗಿರುವ ಹಾಗೂ ಸುಶ್ರಾವ್ಯವಾಗಿ ಗಾಯಕರು ಹಾಡಿ ಜೀವ ತುಂಬಿರುವ ಚಿತ್ರಗೀತೆಗಳಿಗೆ ಅವನಿಗೇನೆ ಅರಿವಾಗದಂತೆ ಅವನ ಮನ ಸೋಲಲಾರಂಭಿಸಿದ್ದ ಕಾಲ ಅದಾಗಿತ್ತು. ಚಿತ್ರಗೀತೆಗಳು ಪ್ರಸಾರವಾದ ನಂತರ ಯಾರ ಸಂಗೀತ? ಯಾರು ಬರೆದ ಹಾಡದು? ಹಾಡಿದ್ದವರ್ಯಾರು? ಅನ್ನುವ ಮಾಹಿತಿಯನ್ನ ಗಮನವಿಟ್ಟು ಆಲಿಸುವ ಪ್ರವೃತ್ತಿ ಬೆಳೆಸಿಕೊಂಡ. ಈಗಿನ ಏಳು ತಿಂಗಳಿಗೆ ಅಕಾಲಿಕವಾಗಿ ಹುಟ್ಟಿರೋ ಎಫ್ ಎಂ ವಾಹಿನಿಗಳ ಆರ್ ಜೆಗಳಂತಲ್ಲದೆˌ ಆಗಿನ ಕಾರ್ಯಕ್ರಮ ನಿರೂಪಕರೂ ಸಹ ಸ್ಪಷ್ಟವಾಗಿ ಇವೆಲ್ಲ ವಿವರಗಳ ಸಹಿತ ಕೆಲವೊಮ್ಮೆ ಆ ಚಿತ್ರ ತಯಾರಾದ ವರ್ಷˌ ನಿರ್ದೇಶಕರ ಹೆಸರು ಹಾಗೂ ಅದರಲ್ಲಿ ಅಭಿನಯಿಸಿದ್ದ ನಟ - ನಟಿಯರ ಹೆಸರನ್ನೂ ಉದ್ಘೋಷಿಸುವ ಕ್ರಮವಿತ್ತು. ಅವರ ಕೃಪೆಯಿಂದ ಇವನಿಗೆ ಮದನ ಮೋಹನ ಸಾಹೇಬರ ಹಾಡುಗಳು ಒಂದೊಂದಾಗಿ ಪರಿಚಯವಾಗುತ್ತಾ ಬಂದವು.

"ಆಪ್ ಕೇ ನಜ಼ರೋನೆ ಸಮಜಾ಼" 
"ನಾ ತುಮ್ ಬೇವಫಾ ಹೋ"
"ವಹಂ ಭೂಲೀ ದಾಸ್ತಾನ್"
"ತೇರೀ ಆಂಖೋನ್ ಕೇ ಸಿವಾ"
"ಹೈಂ ತೇರಾ ಸಾಥ್ ಮೇರೀ ವಫಾ"
"ತೂ ಜಹಾ ಜಹಾ ಚಲೇಗಾ ಮೇರಾ ಸಾಯಾ"
"ರುಖೇ ರುಖೇ ಸೇ ಕದಮ್"
"ನೈನಾ ಭರಸೇ ರಿಮಜಿಮ್ ರಿಮಜಿಮ್"
"ದಿಲ್ ಡೂಂಢ್ ಥಾ ಹೈಂ"
"ಭೈಯಾ ನಾ ಧರೋ"
"ದೋ ದಿಲ್ ಟೂಠೇ ದೋ ದಿಲ್ ಹಾರೇ"
"ಜಾನಾ ಥಾ ಹಮ್ ಸೇ ದೂರ್"
"ಮಿಲೋ ನಾ ತುಮ್ ಥೋ ಹಮ್ ಗಬರಾಏ"
"ಯೂಂ ಹಸರತೋಂಕೇ ಧಾಗ್"
"ತುಮ್ ಜೋ ಮಿಲಗಏ ಹೋ"
"ಅಗರ್ ಮುಝ್ ಸೇ ಮೊಹಬ್ಬತ್ ಹೈಂ"
"ಹೋಕೇ ಮಜಬೂರ್ ಮುಝೇ"
"ಫಿರ್ ವಹೀಂ ಶಾಮ್"
"ಕರ್ ಚಲೇಂ ಹಮ್ ಫಿದಾ" ಹೀಗೆ ಸಕಲ ಭಾವಾಭಿವ್ಯಕ್ತಿಗಳಿಗೂ ಹೊಂದಿಸಿ ಅವರು ಸಂಯೋಜಿಸಿದ ಗೀತೆಗಳನ್ನ ಆಗಾಗ ಆಲಿಸುವ ಸಂದರ್ಭ ದೊರೆತಾಗಲೆಲ್ಲ ಅದೇನೋ ಅರಿವಿಲ್ಲದ ಸುಖ ಮನಸಿನ ಮನೆಯ ಕದ ತಟ್ಟಿದಂತಾಗುವ ನೆಮ್ಮದಿಯನ್ನ ಅನುಭವಿಸಿದ್ದನವನು. ಹಾಡಿನ ಮೊದಲಿಗೋ ಇಲ್ಲಾ ಕೊನೆಗೋ ಅವರ ಹೆಸರನ್ನ ಉದ್ಘೋಷಿಸಿದಾಗ ಅದು ಅಲ್ಲಿ ಹೇಳುವ ಮೊದಲೆ ತಾನು ಊಹಿಸಿದ್ದಕ್ಕೆ ಒಂಥರಾ ಪುಳಕವಾಗುತ್ತಿತ್ತು.

ರೇಡಿಯೋದ ಕಾರ್ಯಕ್ರಮಗಳ ಕೃಪೆಯಿಂದಲೆ ಅವರು ಬಾಗ್ದಾದಲ್ಲಿ ಹುಟ್ಟಿದ್ದ ಭಾರತೀಯˌ ತಾನು ಹುಟ್ಟೋಕೆ ಏಳು ವರ್ಷಗಳ ಮೊದಲೆ ಇಲ್ಲವಾಗಿದ್ದಾರೆˌ ಅವರ ಸಂಯೋಜನೆಯ ಮನಮೋಹಕ ಶೈಲಿಗೆ ಹಾಗೂ ಅವರ ಹಾಡುಗಳಲ್ಲಿನ ಅರ್ಥಪೂರ್ಣ ಸಾಹಿತ್ಯಕ್ಕೆ ಅವರನ್ನ "ಗಜ಼ಲ್ ಕಾ ಬಾದಶಾಹ್" ಅನ್ನುತ್ತಾರೆ ಅನ್ನುವ ಹೊಸ ಹೊಸ ಮಾಹಿತಿಗಳು ಅವನಿಗೆ ಸಿಗುತ್ತಾ ಹೋದವು. ಜೀವನದಲ್ಲಿ ಒಂದೆ ಒಂದು ಸಲವಾದರೂ ಅವರನ್ನ ಭೇಟಿಯಾಗಿ ತನ್ನ ಅಭಿಮಾನವನ್ನ ಹೇಳಿಕೊಳ್ಳಬೇಕು ಅನ್ನುವ ಆಸೆ ಈಡೇರಲಾಗದ ನಿರಾಸೆಯಿಂದ ಹಳಹಳಿಸಿದ. ತಾನು ಅವರ ಅಭಿಮಾನಿ ಎಂದು ಎದೆತಟ್ಟಿ ಹೇಳಿಕೊಳ್ಳಲು ಅವನು ಹೆಮ್ಮೆ ಪಡುವಂತಹ ಕಾಲ ಕೂಡ ಇತ್ತೀಚೆಗಷ್ಟೆ ಬಂದಿತ್ತು.

ಅವನು ಶಾಶ್ವತವಾಗಿ ಈ ಮಹಾನಗರಿಯ ಮಡಿಲಲ್ಲಿ ಸೇರಿ ಹೋಗಿ ಅದಾಗಲೆ ಐದು ವರ್ಷಗಳು ಸರಿದಿದ್ದವು. ಆಗಿನ್ನೂ ಚುಮುಚುಮು ಚಳಿ ಬೆಂಗಳೂರಲ್ಲಿ ಆರಂಭವಾಗಿತ್ತಷ್ಟೆˌ ಆ ತಂಪು ಹೊತ್ತಿನಲ್ಲಿ ತೆರೆಕಂಡಿದ್ದ ಚಿತ್ರ "ವೀರ್ - ಝಾ಼ರಾ"ದಲ್ಲಿ ಅವರ ಸಂಗೀತ ಸಂಯೋಜನೆ ಇತ್ತು ಅನ್ನೋದಷ್ಟೆ ಸಾಕಿತ್ತು ಅವನ ಕುತೂಹಲಕ್ಕೆ ಕೊಂಬು ಮೂಡಿಸಲು. ಅದಾಗಲೆ ಬಿಡುಗಡೆಯಾಗಿದ್ದ ಧ್ವನಿಸುರುಳಿ ಕೇಳಿ ಅದೆಷ್ಟೋ ಸಲ ಹಾಡುಗಳನ್ನ ಮನದಣಿಯೆ ಕೇಳಿ ಖುಷಿ ಪಟ್ಟಿದ್ದ. 

ಮದನ ಮೋಹನ ಸಾಬರು ಕಾಲವಾದ ಮೂರು ದಶಕಗಳ ನಂತರ ಉಪಯೋಗಿಸಲಾದ ಅವರ ಆತನಕ ಕೇಳಿರದಿದ್ದ ಹಾಡುಗಳನ್ನ ಕೇಳಿಯೆ ನಿರ್ದೇಶಕ ಯಶ್ ಛೋಪ್ರಾ ಸಿನೆಮಾದ ಕಥಾಹಂದರ ಹೊಲೆದರು ಅನ್ನುವ ಮಾಹಿತಿ ಸಿನೆಮಾ ಪತ್ರಿಕೆಯೊಂದರಲ್ಲಿ ಓದಿ ಒಂಥರಾ ಆಸಕ್ತಿ ಹುಟ್ಟಿತ್ತು. ಸಿನೆಮಾ ನೋಡಿ ಸಂಭ್ರಮಿಸಿದನಾದರೂˌ ಧ್ವನಿಸುರುಳಿಯಲ್ಲಿದ್ದ ಎರಡು ಹಾಡುಗಳು ಚಿತ್ರದಲ್ಲಿ ಕಾಣೆಯಾಗಿದ್ದಕ್ಕೆ ಬಹಳ ಬೇಜಾರಾದ. ಮೂವತ್ತು ವರ್ಷ ಹಳೆಯ ರಾಗಸಂಯೋಜನೆಗಳೂ ಸಹ ಕೊಂಚವೂ ಹಳೆಯದೆನಿಸದಷ್ಟು ಸಕಾಲಿಕವಾಗಿದ್ದವು. ಆ ಸಾಲಿನ ಸಿನೆಮಾ ಸಂಗೀತಕ್ಕಾಗಿನ ಹಲವಾರು ಪ್ರಶಸ್ತಿಗಳನ್ನ "ವೀರ್ - ಝಾ಼ರಾ" ಗೆದ್ದುಕೊಂಡಿದ್ದು ಅವನಿಗೆ ಯಾವ ಅಚ್ಚರಿಯನ್ನೂ ಹುಟ್ಟಿಸಲಿಲ್ಲ. 


ಶ್ರದ್ಧೆಯಿಟ್ಟು ಹೃದಯಾಂತರಾಳದಿಂದ ಹುಟ್ಟುವ ರಾಗಗಳು ಯಾವತ್ತಿಗೂ ಅಮರ ಅನ್ನುವುದಕ್ಕೆ ಇದೆ ತಕ್ಕ ಉದಾಹರಣೆ. ಯಾವುದೆ ಕೆಲಸಕ್ಕೂ ಅನ್ವಯಿಸಿ ಹೇಳಬಹುದಾದ ಈ ಮಾತುಗಳುˌ ಸಂಗೀತಕ್ಕೆ ಹೆಚ್ಚು ಹೊಂದಿಕೊಳ್ಳುತ್ತದೆ.

( ಇನ್ನೂ ಇದೆ.)



https://youtu.be/VZiL9sPXA-Q

18 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೬.👊

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೬.👊


ಅಗವನಿಗೆ ಐದೋ ಆರೋ ವರ್ಷ ಮಾತ್ರ ಪ್ರಾಯವಾಗಿತ್ತು. ಮನೆಯ ಹಟ್ಟಿಯಲ್ಲಿ ದನ - ಎಮ್ಮೆ ಸಾಕಿ ಅವುಗಳ ಹಾಲು ಮಾರಿ ಅವರೆಲ್ಲಾ ಬದುಕು ನಡೆಸುತ್ತಿದ್ದ ಕಾಲ ಅದು. ಭಾನು ಅನ್ನೋ ದನ ಕರು ಹಾಕಿ ವಾರವೂ ಕಳೆದಿರಲಿಲ್ಲ. ಮುದ್ದಾದ ಹೆಣ್ಣು ಕರು ತಾಯಿಯ ಹಾಲು ಹೀರಿದ ನಂತರ ಲವಲವಿಕೆಯಿಂದ ಹಿತ್ತಲ ಅಂಗಳದಲ್ಲೆಲ್ಲಾ ಕುಣಿದಾಡುತ್ತಿತ್ತು. ಇವನಿಗವತ್ತು ಶಾಲೆಗೆ ರಜ. ಹೀಗಾಗಿ ಅಜ್ಜಿಯ ಜೊತೆ ಹಟ್ಟಿಯ ತೊಳೆಯುವ ದಿನ. ಮನೆಯ ಹಿಂಭಾಗದಲ್ಲಿದ್ದ ದೊಡ್ಡ ನೀರಿನ ತೊಟ್ಟಿಯಿಂದ ನೀರನ್ನ ಇವ ಗೋರಿ ಗೋರಿ ಕೊಟ್ಟರೆ ಅಜ್ಜಿ ಹಿಡಿಸೂಡಿಯಲ್ಲಿ ಕಲ್ಲು ಹಾಸಿನ ಕೊಟ್ಟಿಗೆಯ ನೆಲವನ್ನˌ ಅದರ ಸಂದಿಗೊಂದಿಗಳಲ್ಲಿ ಸಿಲುಕಿರೋ ಸಗಣಿಯ ಅವಶೇಷ ಸರಿಸಿ ಸರಿಸಿ ತಿಕ್ಕಿ ತಿಕ್ಕಿ ತೊಳೆಯುತ್ತಿದ್ದರು. ಜೊತೆಜೊತೆಗೆ ಮಾಡುತ್ತಿದ್ದ ಕೆಲಸಕ್ಕಿಂತ ಜಾಸ್ತಿ ನೀರಾಡುತ್ತಿದ್ದ ಇವನನ್ನೂˌ ಅತ್ತಿಂದಿತ್ತ ಇತ್ತಿಂದತ್ತ ಕಿವಿಗೆ ಗಾಳಿ ಹೊಕ್ಕಾಗ ಕಚಗುಳಿ ಇಟ್ಟಂತಾಗಿ ಕುಣಿದಾಡುತ್ತಿದ್ದ ಕರು ಲಕ್ಷ್ಮಿಯನ್ನೂ ಇಬ್ಬರ ಕೀಟಲೆಗೂ ರೋಸತ್ತವರಂತೆ ಹೀನಾಮಾನ ಬೈಯುತ್ತಿದ್ದರು. 


ಆಗ ಬಿತ್ತು ನೋಡಿ ಆ ಮಾಂತ್ರಿಕ ಸ್ವರ ಅವನ ಕಿವಿಗೆ 
"ಗ..... ಮ..... ನಿ.....
ಗಮಗಸ
ಮಗಸ
ಗಸ ನಿ...ಸ... 
ನಿದಮಗ
ಗಮಗ ಮಗ
ಸರಿ...ಸನಿ... ಗಮಗ...ನಿ
ಗಮಗ ಮದಮ
ದನಿದ ನಿಸನಿರಿ" ಒಂದು ಕ್ಷಣ ರೋಮಾಂಚನಕ್ಕೂ ಮೀರಿದ ಭಾವವೊಂದರ ಮೋಡಿಗೆ ಸಿಲುಕಿದಂತಾಗಿ ಇಹಪರವೆ ಮರೆತು ಹೋದಂತೆ ಪುಂಡಾಟವನ್ನೆಲ್ಲ ನಿಲ್ಲಿಸಿ ಹಾಡನ್ನ ಹಾಕಿದ್ದ ಅಜ್ಜನ ಕೋಣೆಯತ್ತ ಓಟಕ್ಕಿತ್ತ. ಅವನನ್ನ ಅನುಸರಿಸಿಯೆ ಓಡಿ ಬಂದ ಲಕ್ಷ್ಮಿಯೂ ಕೀಟಲೆ ಮರೆತು ಕಿವಿ ನಿಗಿರಿಸಿಕೊಂಡುˌ ಕಣ್ಣನರಳಿಸಿಟ್ಟು ಗಮನಕೊಟ್ಟು ಆ ಹಾಡಿನ ನಾದವನ್ನಾಲಿಸಿ ಮಚ್ಚಿಕೊಂಡವಳಂತೆ ನಿಂತಳು. ಹಾಡು ಮುಗಿಯುವ ತನಕ ಅವರಿಬ್ಬರೂ ಅಲ್ಲಿಂದ ಕದಲಿದ್ದರೆ ಕೇಳಿ! 


ಹೀಗೆ ಅವನನ್ನ ಇಳಯರಾಜಾ ಮೊತ್ತಮೊದಲ ಬಾರಿಗೆ ಸೆರೆ ಹಿಡಿದಿದ್ದರು. ಅಜ್ಜ ಆ ಹೊಸ ಡಬಲ್ ಡೆಕ್ಕಿನ ಟೂ ಇನ್ ವನ್ನಿನಲ್ಲಿ ಹಾಕಿದ್ದ ಹಾಡು "ವೇದಂ ಅಣುಅಣುವುನ ನಾದಂ" ಅದಿದ್ದ ಸಿನೆಮಾದ ಹೆಸರು "ಸಾಗರ ಸಂಗಮಂ"ˌ ಚೂರೆ ಚೂರು ಭಾಷೆ ಅರ್ಥವಾಗದಿದ್ದರೂ ಅವನಿಗೆ "ನಾದ ವಿನೋದಮು" "ಓ ವೇಲಾ ಗೋಪೆಮ್ಮಾಲ" ಅದೆ ಕ್ಯಾಸೆಟ್ಟಿನ ಮತ್ತೊಂದು ಬದಿಯಲ್ಲಿದ್ದ "ಶಂಕರಾಭರಣಂ" ಸಿನೆಮಾದ "ಶಂಕರಾ ನಾದ ಶರೀರಾಪರ" ಅರಿಯದ ಇನ್ಯಾವುದೋ ಅದ್ಭುತ ಲೋಕದ ಪ್ರಯಾಣ ಮಾಡಿಸಿದವು. 

ಅವನ್ನ ಹಾಡಿದ ಎಸ್ಪಿಬಿ - ಶೈಲಜಾ ಅವತ್ತಿಂದಲೆ ಅವನ ನೆಚ್ಚಿನವರಾಗಿ ಬಿಟ್ಟರು. ಸಂಗೀತದ ಸಪಸ ಗೊತ್ತಿಲ್ಲದ ಪುಟ್ಟ ಪ್ರಾಯದ ಅವನನ್ನ ಇಳಯರಾಜರ ಮಠಕ್ಕೆ ಅಜನ್ಮ ಭಕ್ತಾದಿಯನ್ನಾಗಿಸಿದ್ದ ದಿನ ಅದು. ಇಂದಿಗೂ ಆ ಅದ್ಭುತ ಕ್ಷಣಕ್ಕವನು ಚಿರಋಣಿಯೆ.

ಅದಾದ ಮೇಲೆ ಅದೆಷ್ಟು ಸಲ ಆ ಹಾಡನ್ನ ಮರಳಿ ಮತ್ತೆ ಕೇಳಿದ್ದಾನೋ ಅವನಿಗೆ ಅರಿವಿಲ್ಲ. ಇಂದು ಕನಸಿನಲ್ಲಿ ಎಬ್ಬಿಸಿ ಕೇಳಿದರೂ ಕೂಡ ಅದರ ಒಂದೊಂದು ಏರಿಳಿತದ ಸಹಿತ ತಪ್ಪಿಲ್ಲದಂತೆ ಕೇವಲ ನೆನಪಿನ ಶಕ್ತಿಯಿಂದಲೆ ಅದನ್ನ ಹಾಡಬಲ್ಲ ಸಾಮರ್ಥ್ಯ ಅವನಿಗಿದೆ. ಸಂಗೀತದ ಮಾಂತ್ರಿಕತೆ ಎಂದರೆ ಮತ್ತಿನ್ನೇನು? ಹಾಡೊಂದು ಹೀಗೂ ಇರಬಹುದೆ ಅನ್ನುವ ಅಚ್ಚರಿ ಅವನೊಳಗೆ ಹುಟ್ಟು ಹಾಕಿದ್ದ ರೋಮಾಂಚಕಾರಿ ಕ್ಷಣ ಅದಾಗಿತ್ತು.

ಬರಿ ನರಮನುಷ್ಯನಾಗಿದ್ದ ಅವನನ್ನ ಆವರಿಸಿದ್ದು ಅತ್ತಲಾಗಿರಲಿ ಮೂಕಜೀವ ಆ ಪುಟ್ಟ ಕರು ಲಕ್ಷ್ಮಿಗೂ ಮೋಡಿ ಹಾಕಿದ್ದ ಹಾಡದು. ತನ್ನ ತುಂಟಾಟ ಮರೆತು ವಯೋಸಹಜ ತಂಟೆ ಬದಿಗಿಟ್ಟು ಅವಳು ಮೊದಲಿನಿಂದ ಕೊನೆಯವರೆಗೂ ಆಲಿಸಿದ್ದ ಹಾಡು ಬಹುಶಃ ಅದೊಂದೆ!


*****

ಸಂಗೀತದ ರಸಸ್ವಾದನೆ ಎಂದರೇನೆಂದೆ ಅರಿವಿದ್ದಿರದ ಆ ಪ್ರಾಯದಲ್ಲಿ "ಸಾಗರ ಸಂಗಮಂ"ನಲ್ಲಿದ್ದ ಸಕಲ ರಸಗಳ ಸಾರ ಹೊತ್ತ ಅಷ್ಟೂ ಹಾಡುಗಳೂ ಇಷ್ಟವಾಗಿದ್ದಷ್ಟೆˌ ಆತ್ಮೀಯತೆಯ ಸೊಗಡಿನ ಶೈಲಿಯಲ್ಲಿದ್ಧ "ಸ್ವಾತಿಮುತ್ಯಂ" ಹಾಡುಗಳೂ ಭಯಂಕರ ಇಷ್ಟವಾಗಿದ್ದವು. ಬಾರದ ತೆಲುಗಿನ ಸಾಹಿತ್ಯವನ್ನು ಮನಸಿಗೆ ತೋಚಿದಂತೆ ಬರಿಸಿಕೊಂಡು ಸಿಕ್ಕ ಸಿಕ್ಕ ಶೃತಿಯಲ್ಲೆಲ್ಲಾ ಲಯವೆ ಇಲ್ಲದೆ ತಾಳ ಬೇತಾಳವಾಗಿಸಿಕೊಂಡು ಮೂಗು ರಾಗದಲ್ಲಿ ಎಸ್ಪಿಬಿˌ ಎಸ್ ಜಾನಕಿˌ ಪಿ ಸುಶೀಲಾರನ್ನ ಅನುಕರಿಸಿ ಹೊತ್ತುಗೊತ್ತಿಲ್ಲದವನಂತೆ ಕಂಡಕಂಡಲ್ಲಿ ಹಾಡಿಯೆ ಹಾಡುತ್ತಿದ್ದ. ಹಾಗಿದ್ದಾಗಲೊಮ್ಮೆ, ಅದು ಆಟಿ ಅಮವಾಸ್ಯೆಯ ದಿನ ಅಂತ ಅವನಿಗೆ ಸರಿಯಾಗಿ ನೆನಪಿದೆˌ ಮತ್ತೊಂದು ಮಧುರಾಘಾತಕ್ಕೆ ಅವನು ಬಲಿಯಾಗಿಬಿಟ್ಟ.

ಮಲೆನಾಡಿನಲ್ಲಿ ಬದುಕುತ್ತಿದ್ದರೂ ತಮ್ಮ ಮೂಲವಿದ್ದ ದಕ್ಷಿಣ ಕನ್ನಡ ಜಿಲ್ಲೆಯ ಆಚರಣೆಗಳನ್ನ ಬಿಡಲೊಲ್ಲದ ಕುಟುಂಬಗಳಲ್ಲಿ ಅವರದ್ಧೂ ಒಂದು. ಆಟಿ ಅಮವಾಸ್ಯೆಯ ದಿನ ಬೆಳ್ಳಂಬೆಳಗ್ಯೆ ಎದ್ದದ್ದೆ ಪಾಲೆ ಮರದ ಕೆತ್ತೆ ಕುಟ್ಟಿ ತೆಗೆದ ಕಾರ್ಕೋಟಕ ಕಹಿ ರುಚಿಯ ಕಷಾಯ ಕುಡಿಯಬೇಕೆಂಬ ಕಟ್ಟಳೆಯಿದೆ. ಜ಼ಡಿಮಳೆಗಾಲದಲ್ಲಿ ಹಾಗೂ ಅದರ ಹಿಂದೆಹಿಂದೆಯೆ ಧಿಗಣ ಹಾಕುತ್ತಾ ಬರೀವ ಕಡು ಚಳಿಗಾಲದಲ್ಲಿ ಆ ಪರಿಸರದ ವಾತಾವರಣದಲ್ಲಿ ಕಾಡಬಹುದಾದ ಅನೇಕ ಸಂಭವನೀಯ ಸೀಕುಗಳಿಗೆ ಒಂದಿಡಿ ವರ್ಷ ನಾಟಿ ಔಷಧಿಯ ಮುಂಗಡ ಲಸಿಕೆಯಂತೆ ಅದಂತೆ. 

ಅಜ್ಜ ಹಿಂದಿನ ರಾತ್ರಿಯೆ ಶೆಟ್ಟರ ಗದ್ದೆಯ ನಾಗಬನದಾಚೆಗಿದ್ದ ಪಾಲೆಮರಕ್ಕೆ ಹೋಗಿ ನಮಗೂ ಸುತ್ತಮುತ್ತಲಿನ ಮನೆಯವರಿಗೂ ಸಾಕಾಗುವಷ್ಟು ಕೆತ್ತೆ ತರುತ್ತಿದ್ದರು. ಈ ಕೆತ್ತೆ ಕಿತ್ತು ತರಲೂ ಸಹ ಅದರದ್ದೆ ಆದ ನಿಯಮಗಳಿವೆ. ಒಂದು ಯಾವದೆ ಲೋಹದ ಆಯುಧದಿಂದ ಕೆತ್ತೆ ಕೀಳುವಂತಿಲ್ಲˌ ಚೂಪುಕಲ್ಲಲ್ಲೆ ಕೆತ್ತೆ ತೆಗೆಯಬೇಕು. ಇನ್ನು ಮುಖ್ಯವಾದ ನಿಯಮವೆಂದರೆ ಕೆತ್ತೆ ಕೀಳುವವ ಕೀಳುವ ಹೊತ್ತಲ್ಲಿ ಬರಿ ಬತ್ತಲೆಯಾಗಿರಬೇಕು! ಇಲ್ಲದಿದ್ದರೆ ಬಟ್ಟೆ ಹಾಕಿಕೊಂಡೆ ಅದೆಷ್ಟೆ ಕಿತ್ತು ತಂದಿದ್ದರೂ ಅದರಲ್ಲಿ ಔಷಧಿ ಅಂಶ ಇಂಗಿ ಮಾಯವಾಗುತ್ತಿತ್ತಂತೆ! ಹೀಗಾಗಿ ಮರದವರೆಗೂ ಭಯಂಕರ ಮಳೆ ರಾಚುತ್ತಿದ್ದರೂ ಕತ್ತಲಲ್ಲಿ ಕೇವಲ ಬನಿಯನ್ ಹಾಗೂ ಪಂಚೆಯಲ್ಲಿ ಹೋಗುತ್ತಿದ್ದ ಅಜ್ಜˌ ಮರದ ಮುಂದೆ ಮಾತ್ರ ನಿಯತ್ತಾಗಿ ನಿಯಮ ಪಾಲಿಸುತ್ತಾ ಮರಕ್ಕೆ ಕೈ ಮುಗಿದು ಕೆತ್ತೆ ಕೀಳುವ ಹೊತ್ತಿಗೆ ಉಟ್ಟ ಲಂಗೋಟಿಯನ್ನೂ ಕಿತ್ತೆಸೆದು ಕಾರ್ಲದ ಗೊಮ್ಮಟನವತಾರದಲ್ಲಿ ಕಿತ್ತು ಅನಂತರವೆ ಬಟ್ಟೆ ಉಟ್ಟು ಮರಳಿ ಬರುತ್ತಿದ್ದರಂತೆ!

ಅವತ್ತೂ ಸಹ ಅದೆ ರೀತಿ ಅವರು ತಂದಿಟ್ಟಿದ್ದ ಕೆತ್ತೆಯನ್ನ ಕಡೆಯುವ ಕಲ್ಲಿನಲ್ಲಿ ಹಾಕಿ ಚೆನ್ನಾಗಿ ಜೆಜ್ಜಿ ಅಜ್ಜಿ ಅದರ ರಸ ತೆಗೆದಿರಿಸಿದ್ದರು. ಸಾಮಾನ್ಯವಾಗಿ ಅವರ ಮನೆಯಲ್ಲಿ ಬೆಳಗಿನ ಪಾಳಿಯಲ್ಲಿ ರೇಡಿಯೋದ ಸವಾರಿ ಹೊರಡುತ್ತಿದ್ದುದು ಒಂದಾ ಧಾರವಾಡ ಸುತ್ತಲಿಕ್ಕೆˌ ಅದಿಲ್ಲದಿದ್ದರೆ ಮಂಗಳೂರು ಆಕಾಶವಾಣಿ ಕೇಂದ್ರದ ಸರ್ಕೀಟಿಗೆ. ಆದರೆ ಹಿಂದಿನ ಸಂಜೆ  ಮುಂಬೈ ವಿವಿಧ ಭಾರತಿ ಕೇಂದ್ರದಿಂದ ಪ್ರಸಾರವಾಗಿದ್ದ ಅದ್ಯಾವುದೋ ಹೊಸ ಕಾರ್ಯಕ್ರಮ ಕೇಳಲು ಎರಡನೆ ಬ್ಯಾಂಡಿನ ಶಾರ್ಟ್ ವೇವಿಗೆ ಅದನ್ನ ಟ್ಯೂನ್ ಮಾಡಿಟ್ಟಿದ್ದನ್ನ ಮರಳಿ ಮತ್ತೆ ಧಾರವಾಡ - ಮಂಗಳೂರು ಮೊಳಗುವ ಮೊದಲ ಬ್ಯಾಂಡಿನ ಮೀಡಿಯಂ ವೇವಿಗೆ ಹೊಂದಿಸಿಕೊಳ್ಳಲು ಅಜ್ಜಿಗೆ ಬರುತ್ತಿರಲಿಲ್ಲ. ಝಡಿಮಳೆಯ ಕಾರಣ ಚಿಕ್ಕಮ್ಮಂದಿರಿನ್ನೂ ಎದ್ದಿರಲೆ ಇಲ್ಲ. ಹೀಗಾಗಿ ಬರುತ್ತಿದ್ದದ್ದನ್ನೆ ಕೇಳಿಸಿಕೊಳ್ಳುವ ಅನಿವಾರ್ಯತೆ ಇತ್ತು.

ಕಿರಿಯರಲ್ಲಿ ಮೊದಲಿಗೆ ಎದ್ದವನಿಗೆ ಇವನ ಯಾವ ವಿರೋಧಗಳಿಗೂ ಇನಿತೂ ಸೊಪ್ಪು ಹಾಕದೆ ಮೂಗು ಹಿಡಿದು ಹಾಲಿನ ಬಣ್ಣದಲ್ಲಿದ್ದ ಆದರೆ ಹಾಲಾಹಲದ ರುಚಿಗೆ ಪೈಪೋಟಿ ಕೊಡುತ್ತಿದ್ದ ಪಾಲೆ ಮರದ ಕೆತ್ತೆಗೆ ಜೀರಿಗೆ ಕಾಳುಮೆಣಸನ್ನ ಜೊತೆಗೆ ಹಾಕಿ ಗುದ್ದಿ ತೆಗೆದ "ಆಟಿದ ಮರಂದು" ಕುಡಿಸಲಾಯಿತು. ಅದರ ಕರ್ಕಟೆ ಕಹಿಗೆ ಬೊಬ್ಬೆ ಹೊಡೆಯಲು ತಯ್ಯಾರಾಗಿ ದೊಂಡೆಗೆ ಶೃತಿ ಹಿಡಿಯಲು ಬಾಯಿ ತೆರೆದವನ ಬಾಯಿಗೆ ಬೆಲ್ಲದ ಚೂರೊಂದನ್ನ ಎಸೆದು ಬಾಯಿ ಮುಚ್ಚಿಸಲಾಯಿತು! ಬಲವಂತ ಮಾಡದಿದ್ದರೆ ಕುಡಿಯತ್ತಿದ್ದುದೆ ಸಂಶಯ.

( ಇನ್ನೂ ಇದೆ.)



https://youtu.be/nLKXPp1MwIM

17 December 2022

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೫.👊ೌ

"ಕಥೆಯೊಂದು ಶುರುವಾಗಿದೆ"❤️ ಸಂಜೆಗತ್ತಲ ಹಿನ್ನೋಟ - ೨೫.👊





ಅಲ್ಲಿಯವರೆಗೆ ಮೆಲ್ಲಗೆ ಎಲ್ಟನ್ ಜಾನ್ˌ ಸ್ಟೀವ್ ವೂಂಡರ್ˌ ಅರೆತ ಫ್ರಾಂಕ್ಲಿನ್ˌ ಲಿಯೋನಲ್ ರಿಚಿಯನ್ನ ಮಳ್ಳರಂತೆ ನಕಲು ಹೊಡೆದು ಭಾರತೀಯ ಸಿನೆಮಾಗಳ ಸಂಗೀತ ಸಿರಿ ಹೆಚ್ಚಿಸುತ್ತಿದ್ದ ಸಂಯೋಜಕರಿಗೆ ಮೆಡೋನ್ನˌ ಜಾನೆಟ್ ಜಾಕ್ಸನ್ˌ ಮೈಖೆಲ್ ಜಾಕ್ಸನ್ˌ ಪ್ರಿನ್ಸ್ˌ ವಿಟ್ಟಿ ಹ್ಯೂಸ್ಟನ್ˌ ಬ್ರಿಟ್ನಿ ಸ್ಪಿಯರ್ಸ್ ಹಾಗೂ ರಿಕಿ ಮಾರ್ಟನಿನಂತಹ ಪಾಶ್ಚಿಮಾತ್ಯ ಸಂಗೀತದ ತಾರೆಗಳಲ್ಲಿ ತಮ್ಮ ಭವಿಷ್ಯದ ಆಶಾಕಿರಣ ಗೋಚರಿಸಲಾರಂಭಿಸಿತು. 


ಕನ್ನಡ ಬಿಟ್ಟರೆ ಹಿಂದಿ ಹಾಡುಗಳೆ ಹೆಚ್ಚು ಕಿವಿಗೆ ಬೀಳುವ ವಾತಾವರಣದಲ್ಲಿದ್ದ ಅವನಿಗೆ ಅವರಲ್ಲಿ ಆನಂದ್ - ಮಿಲಂದ್ ಶೈಲಿ ಅದೇಕೋ ಬಹಳ ಇಷ್ಟವಾಗಲಾರಂಭಿಸಿತು. ಹೆಚ್ಚು-ಕಡಿಮೆ ಜೊತೆಜೊತೆಯಲ್ಲೆ ತೆರೆಕಂಡಿದ್ದ ಅವರ "ಖಯಾಮತ್ ಸೇ ಖಯಾಮತ್ ತಕ್" ಹಾಗೂ ರಾಮ್-ಲಕ್ಷ್ಮಣ್ ಜೋಡಿಯ "ಮೈನೇ ಪ್ಯಾರ್ ಕಿಆ" ಅಬ್ಬರದಿಂದ ಚಿತ್ರಪ್ರೇಮಿಗಳ ಮನೆಮಾತಾಗಿದ್ದ ಕಾಲ ಅದು. ಒಂದೆ ಬಗೆಯ ಕಥಾಹಂದರ ಹಾಗೂ ತಥಾಕಥಿತ ನಿರೂಪಣೆಯಿಂದ ದಶಕಗಳಿಂದ ನಿಂತ ನೀರಾಗಿ ಕೊಳೆತು ಮೆಲ್ಲಗೆ ದುರ್ವಾಸನೆ ಬೀರಲಾರಂಭಿಸಿದ್ದ ಸಿನೆಮಾಗಳ ಚಿತ್ರಕಥೆಗಳಲ್ಲೂ ಬದಲಾವಣೆಯ ಕಳೆ ಕ್ರಮೇಣ ಕಾಣಲಾರಂಭಿಸಿತು. 


ಅದೂವರೆಗೂ ಊಟಿ ಸೆಟ್ಟಿನಲ್ಲಿನ ಡ್ರೀಮ್ ಸಾಂಗ್ ಬಿಟ್ಟರೆ ಬಾಕಿ ಉಳಿದಂತೆ ಸಿನೆಮಾ ಪೂರ್ತಿ ಬದಲಾವಣೆಯನ್ನೆ ಕಾಣದ ಖಾಕಿ ಕಾಸ್ಟ್ಯೂಮು ಮಾತ್ರ ತೊಟ್ಟುˌ ಒಂದೆ ಒಂದು ದಿನ ಸಹ ಬೆವರು ಸುರಿಸಿ ದುಡಿಯದಿದ್ದರೂ ಸಹ ನಾಯಕಿಯನ್ನ ಮಾತ್ರ ನಿಯತ್ತಾಗಿ ಎದುರು ಹಾಕಿಕೊಂಡುˌ ಆಮೇಲೆ ಅವಳನ್ನೆ ಒಲಿಸಿಕೊಂಡು ಪ್ರೀತಿಸಿ ಕ್ಲೈಮಾಕ್ಸಿನ ಮಾರಾಮಾರಿಯಲ್ಲಿ ಅವಳನ್ನ ಅವಳ ಸಂಸಾರ ಸಮೇತ ಅಪಾಯಕಾರಿ ಪರಿಸ್ಥಿತಿಯಲ್ಲಿ ಕೈಗಳೆರಡನ್ನೂ ಮೇಲೆತ್ತಿ ತೂಗು ಹಾಕಲಾಗಿರುವ ಯಾವುದೋ ಹಳೆಯ ಕಾರ್ಖಾನೆಯ ರಟ್ಟಿನ ಡಬ್ಬಗಳು ಹಾಗೂ ಖಾಲಿ ಪೀಪಾಯಿಗಳನ್ನೆ ಜೋಡಿಸಿಟ್ಟಿರುವ ಗೊಡೌನಿನಲ್ಲೋˌ ಇಲ್ಲಾ ಬೆಟ್ಟದ ತುದಿಯಲ್ಲಿರೋ ಒಂಟಿ ಬಂಡೆಯ ಮೇಲೆಯೋ ಹಂಗೇನೆ ಕಟ್ಟಿ ಹಾಕಿ ಬೆದರಿಸುವ ಖಳ ನಾಯಕನ ಗ್ಯಾಂಗನ್ನೆಲ್ಲಾ ಬರಿ ಕೈಯಲ್ಲೆ "ಡಿಶುಂ ಡಿಶುಂ" ಶಬ್ದ ವೈಭವದಲ್ಲಿ ಮಟ್ಟ ಹಾಕುತ್ತಿದ್ದ ತೋಳ್ಬಲ ಶೂರ ಸದಾ ಅಂಗಿಯ ಮೇಲಿನೆರಡು ಗುಂಡಿಗಳನ್ನ ಬೇಕಂತಲೆ ತೆಗೆದಿಟ್ಟುಕೊಂಡು ತನ್ನೆದೆ ಮೇಲೆ ವಿಫುಲವಾಗಿ ಬೆಳೆದಿರೋ ಪೊದೆ ಸದೃಶ ರೋಮ ಬಂಢಾರವನ್ನು ಭಂಡತನದಿಂದ ಪ್ರದರ್ಶಿಸಿಕೊಂಡೆ ಇರುತ್ತಿದ್ದ ನಾಯಕನ ಜಾಗಕ್ಕೆ ಮೀಸೆ ಸಹಿತ ಮುಖವನ್ನ ನುಣ್ಣಗೆ ಬೋಳಿಸಿ ಮುಖಕ್ಕೆ ಪೌಡರುˌ ಹುಡುಗಿಯರಂತೆ ತೆಳುವಾಗಿ ತುಟಿಗೆ ಬಣ್ಣ ಲೇಪಿಸಿಕೊಂಡ ಇನ್ ಷರ್ಟ್ ಮಾಡಿ ಟಿಪ್ ಟಾಪಾಗಿ ಕಂಗೊಳಿಸುತ್ತಿದ್ದ ಬ್ಯಾಗಿ ಪ್ಯಾಂಟ್-ಕ್ಯಾನ್ವಾಸ್ ಶೂ ಧರಿಸಿದ್ದ "ಚಾಕಲೆಟ್ ಹೀರೋ" ಬ್ರಾಂಡಿನ ಹೀರೋ ಪ್ರವೇಶವಾಗಿತ್ತು. 



ಇನ್ನವನ ಅವನಿಗಿಂತ ತುಸುವೆ ಹೆಚ್ಚು ಮೇಕಪ್ ಬಳಿದುಕೊಂಡ ಕಾಲೇಜು ಕನ್ಯೆ ನಾಯಕಿಗಂತೂ ಆ ಕಾಲದಿಂದಲೆ ಅವನ ಮೇಲೆ "ಲೌ" ಆಗಿ ಅದನ್ನ ಇಬ್ಬರ ಮನೆಯವರೂ ಶರಂಪರ ವಿರೋಧಿಸಿˌ ಕಡೆಗೆ ವಿರಹ ವೇದನೆಯಲ್ಲಿ ನರಳಿ ಉಪವಾಸವಿದ್ದು ಮನೆಯ ಬೆಡ್ರೂಮಿನಿಂದಲೆ ಮಂಚಕ್ಕೆ ತಲೆ ಚೆಚ್ಚಿಕೊಂಡು ಹಾಡಿˌ ಪರಸ್ಪರರ ವಿಳಾಸ ಹಾಗೂ ದೂರವಾಣಿ ಸಂಖ್ಯೆ ಗೊತ್ತಿದ್ದರೂ ಎಂದೂ ಒಂದೆ ಒಂದೂ ಕಾಗದ ಬರೆಯದೆˌ ಅಡ್ರಾಸನ್ನೆ ಅರಿಯದ ನಿಶ್ಪಾಪಿ ಪಾರಿವಾಳ - ಗಿಳಿಗಳನ್ನೆ ಪೋಸ್ಟ್ ಮ್ಯಾನ್ ಆಗಿಸಿಕೊಂಡು ಪರಸ್ಪರರ ನೋವು ನಲಿವನ್ನ ಹಂಚಿಕೊಂಡುˌ ಕೊನೆಗೊಮ್ಮೆ "ಪ್ರೀತಿ ಮಾಡಬಾರದು ಮಾಡಿದರೆ ಜಗಕೆ ಹೆದರಬಾರದು!" ಅಂತಲೋ ಇಲ್ಲಾ "ಪ್ಯಾರ್ ಕರನೇವಾಲೇ ಕಭೀ ಢರತೇ ನಹೀಂˌ ಜೋ ಢರತೇ ಹೈಂ ವಹಂ ಪ್ಯಾರ್ ಕರತೇ ನಹೀಂ" ಅಂತ ಆಲಾಪಿಸುತ್ತಲೆ ತಮ್ಮ ಅಮರ ಪ್ರೇಮವನ್ನ ಮುರಿಯಲೆತ್ನಿಸಿದ ದುಷ್ಟ ಜಗತ್ತನ್ನ ಎದುರಿಸಿ ನಿಂತು ಒಂದಾಗುವ ಪ್ರೇಮಿಗಳ ಪವಿತ್ರ ಪ್ರೇಮವೆ ಜಯಿಸುವಲ್ಲಿ ಸುಖಾಂತ್ಯ ಅನ್ನುವಂತ ಸಾಲು ಸಾಲು ಸಿನೆಮಾಗಳು ತಯಾರಾಗಿದ್ದವು. ಮದುವೆಯಾದ ನಂತರ ಈ ಪ್ರೇಮದ ಪಾವಿತ್ರ್ಯ ಏನಾಗುತ್ತಿತ್ತೋ! ಅನ್ನೋ ಕುತೂಹಲದ ಸಂಶಯ ಯಾವಾಗಲೂ ಅವನಿಗೆ ಏಳುವಂತೆ ಬಹುತೇಕ ಸಿನೆಮಾಗಳು ಅಂತ್ಯವಾಗುತ್ತಿದ್ದವು. ಅವರಿಬ್ಬರ ಆಳವಾದ ಪ್ರೇಮವನ್ನ ಇನ್ನಷ್ಟು ಗಟ್ಟಿಗೊಳಿಸಲು ಆ ಕಾಲದ ಸಿನೆಮಾ ಸ್ವರ ಸಂಯೋಜಕರು ಅಬ್ಬರದ ಹಾದಿಯನ್ನ ಅರ್ಧದಲ್ಲೆ ಕೈಬಿಟ್ಟವರಂತೆ ಮೆಲುರಾಗದ ಪ್ರೇಮಗೀತೆಗಳನ್ನ ಸಂಯೋಜಿಸಿದ್ದೆ ಸಂಯೋಜಿಸಿದ್ದು.


ಹಿಂದಿಯಲ್ಲಿ ನದೀಂ - ಶ್ರವಣ್ˌ ಆನಂದ್ - ಮಿಲಿಂದ್ˌ ರಾಮ್ - ಲಕ್ಷ್ಮಣ್ˌ ಜತಿನ್ - ಲಲಿತ್ˌ ಸಾಜಿದ್ - ವಾಜಿದ್ˌ ನಿಖಿಲ್ - ವಿನಯ್ˌ ವಿಶಾಲ್ - ಶೇಖರ್ˌ ವಿಶಾಲ್ ಭಾರಧ್ವಜ್ˌ ಅನು ಮಲಿಕ್ˌ ಆದೇಶ್ ಶ್ರೀವಾಸ್ತವˌ ಭೂಷಣ್ ದುವಾˌ ಸಂದೇಶ್ ಶಾಂಡಿಲ್ಯˌ ಆನಂದರಾಜ್ ಆನಂದ್ˌ ಉತ್ತಮ್ ಸಿಂಗ್ˌ ಹಿಮೇಶ ರೇಷಮಿಯಾ ಹೀಗೆ ಒಬ್ಬೊಬ್ಬರಾಗಿ ಹೊಸ ಹೊಸ ಮುಖಗಳು ಬಂದು ಆವರಿಸಿಕೊಳ್ಳತೊಡಗಿದರು.


ಇದು ಹಿಂದಿಗೆ ಮಾತ್ರ ಸೀಮಿತವಾಗುಳಿಯದೆ ವಿವಿಧ ಭಾಷೆಗಳ ಮನೋರಂಜನೋದ್ಯಮಗಳಿಗೂ ಈ ಗಾಳಿ ಸಹಜವಾಗಿ ಬೀಸಿತು. ಕನ್ನಡದಲ್ಲಂತೂ ಆತನಕ ಅಧಿಪತ್ಯ ನಡೆಸುತ್ತಿದ್ದ ಎಂ ರಂಗರಾವ್ˌ ಎಲ್ ವೈದ್ಯನಾಥನ್ˌ ವಿಜಯಭಾಸ್ಕರ್ˌ ಜಿ ಕೆ ವೆಂಕಟೇಶ್ˌ ಉಪೇಂದ್ರಕುಮಾರ್ ಮುಂತಾದವರೆಲ್ಲ ನಿವೃತ್ತಿಯಂಚಿಗೆ ಸರಿದುˌ ಹಂಸಲೇಖˌ ವಿ ಮನೋಹರ್ˌ ಸಾಧು ಕೋಕಿಲˌ ಗುರುಕಿರಣ್ˌ ರಾಜೇಶ್ ರಾಮನಾಥ್ˌ ಎಲ್ ಎನ್ ಶಾಸ್ತ್ರಿˌ ಎಸ್ ಎ ರಾಜಕುಮಾರ್ˌ ರಾಜ್ - ಕೋಟಿ ಮುಂತಾದ ಹೊಸ ಪ್ರತಿಭೆಗಳ ರಾಜ್ಯಭಾರ ನಿಧಾನವಾಗಿ ಆರಂಭವಾಗುತ್ತಿತ್ತು. 


ಹಿಂದಿ ಹಾಗೂ ಕನ್ನಡ ಚಿತ್ರರಂಗದ ಈ ಬದಲಾವಣೆ ಪರ್ವದಲ್ಲಾದ ಮುಖ್ಯ ವ್ಯತ್ಯಾಸವೇನೆಂದರೆˌ ಅಲ್ಲಿ ಅದೂವರೆಗೂ ಅವರ ಮಟ್ಟುಗಳಿಗೆ ಹಾಡುಗಳನ್ನ ಹೊಸೆಯುತ್ತಿದ್ದ ಕವಿಗಳಲ್ಲಿ ರಾಜೇಂದ್ರಕೃಷ್ಣˌ ಶೈಲೇಂದ್ರˌ ಹಸ್ರತ್ ಜೈಪುರಿˌ ರಾಜಾ ಮೆಹ್ದಿ ಅಲಿಖಾನ್ˌ ಅಂಝಾನ್ˌ ಇಂದೀವರ್ ತರದವರ ಕಾಲ ಮುಗಿದು ಆ ಕಾಲದ ಅವಶೇಷಗಳಂತೆ ಉಳಿದಿದ್ದ ಯೋಗೀಶ ಗೌಡˌ ಆನಂದ ಬಕ್ಷಿˌ ಗುಲ್ಝಾರ್ˌ ಮಾಜ್ರೂಹ್ ಸುಲ್ತಾನಪುರಿಯವರಿಗೆ ಪೈಪೋಟಿ ಕೊಡಲು ನವಯುಗದ ಜಾವೇದ್ ಅಖ್ತರ್ˌ ಅನ್ವರ್ ಸಾಗರ್ˌ ರಾಣಿ ಮಲಿಕ್ˌ ಸಮೀರ್ˌ ದೇವ್ ಕೋಹ್ಲಿತರದವರು ತಿಣುಕಾಡುತ್ತಿದ್ದರೆˌ ಇತ್ತ ಇಲ್ಲಿ ಕನ್ನಡದ ವಿಜಯನಾರಸಿಂಹˌ ಆರ್ ಎನ್ ಜಯಗೋಪಾಲ್ˌ ಹುಣಸೂರು ಕೃಷ್ಣಮೂರ್ತಿˌ ಶ್ಯಾಮಸುಂದರ ಕುಲಕರ್ಣಿˌ ಚಿ ಉದಯಶಂಕರˌ ದೊಡ್ಡರಂಗೇ ಗೌಡರಂತಹ ಕವಿವರ್ಯರ ಜಾಗಕ್ಕೆ ಹಂಸಲೇಖˌ ವಿ ಮನೋಹರ್ˌ ಉಪೇಂದ್ರˌ ಪಾಟೀಲ್ˌ ಕೆ ಕಲ್ಯಾಣ್ˌ ಎಸ್ ನಾರಾಯಣ್ ಹಾಗೂ ವಿ ನಾಗೇಂದ್ರಪ್ರಸಾದರಂತಹ ನವಯುಗದ ಕವಿವರ್ಯರು ತಮ್ಮ ತಮ್ಮ ಟವಲು ಹಾಸಿ ಸ್ಥಾನ ಗಟ್ಟಿ ಮಾಡಿಕೊಂಡಾಗಿತ್ತು.


ಸಹಜವಾಗಿ ಅದೂವರೆಗೆ "ಇಂಕ್ವಿಲಾಬ್" "ಕೂಲಿ" "ನ್ಯಾಯವೆ ದೇವರು" "ನ್ಯಾಯಕ್ಕಾಗಿ ನಾನು" "ನ್ಯಾಯ ಎಲ್ಲಿದೆ?" "ಆಟೋ ರಾಜಾ" "ಅಂತ" "ಕಾರ್ಮಿಕ ಕಳ್ಳನಲ್ಲ" ಅನ್ನುತ್ತಿದ್ದ ಬಂಡಾಯ ಹೂಡಿದ್ದ ನಾಯಕರೆಲ್ಲಾ ಇದ್ದಕ್ಕಿದ್ದಂತೆ "ಲವ್" "ಮೈನೇ ಪ್ಯಾರ್ ಕಿಆ" "ಖಯಾಮತ್ ಸೇ ಖಯಾಮತ್" "ಪ್ರೇಮಲೋಕ" "ರಾಮಾಚಾರಿ" "ಮಿಡಿದ ಶೃತಿ" "ಕೃಷ್ಣ ನೀ ಕುಣಿದಾಗ" "ಗೌರಿ ಗಣೇಶ" "ಗಣೇಶನ ಮದುವೆ" "ಹಾಲುಂಡ ತವರು" "ಮುತ್ತಿನ ಹಾರ" "ಸ್ವಾತಿ" "ಶೃತಿ" "ಜೀವನದಿ" "ಕದನ" "ಮೈಸೂರು ಜಾಣ" "ಕರುಳಿನ ಕೂಗು" "ಜೈ ಕರ್ನಾಟಕ" ರೇಂಜಿಗೆ ಏಕಾಏಕಿ ಬದಲಾದ ಕಾರಣ ಅವರ ಅನುಕೂಲಕ್ಕೆ ತಕ್ಕಂತ ಯುಗಳಗೀತೆಗಳನ್ನೆ ರಚಿಸಿ ಈಗವರನ್ನ ಫಾರೆನನಿನಲ್ಲಿ ಫುಟಪಾತಿನ ಮೇಲೆ ಕುಣಿಯವ ಕನಸಿನಲ್ಲಷ್ಟೆ ಅಲ್ಲದೆ ನನಸಿನಲ್ಲೂ ಕುಣಿಸಬೇಕಾದ ಅನಿವಾರ್ಯತೆ ಹೊಸಯುಗದ ಸ್ವರ ಸಂಯೋಜಕರಿಗೂ ಅನಿವಾರ್ಯವಾಯಿತು.


ಅಂತಹ ಪರ್ವಕಾಲದಲ್ಲಿ ಅವನ ಕಿವಿಗೆ ಬಿದ್ದದ್ದೆ ಬೆಂಗಳೂರಿನಿಂದ ಮಾವ ತಂದಿದ್ದ "ಸಾಗರ ಸಂಗಮಂ" "ಸ್ವಾತಿ ಮುತ್ಯಂ" ಹಾಗೂ "ಶಂಕರಾಭರಣಂ"ಗೀತೆಗಳು. ಸಂಗೀತ ಅಂದರೆ ಹೀಗೆಯೂ ಇರಬಹುದು ಅನ್ನುವ ಅನುಭೂತಿ ಮೊದಲಬಾರಿ ಆಯಿತು.


( ಇನ್ನೂ ಇದೆ.)


https://youtu.be/s1CyP6EvQ3s