ಅಗೋಚರ ಚಹರೆ ನಿನ್ನದು,
ಅಪೂರ್ಣ ಕನಸ ಹೊಸೆಯೋ ಕರ್ಮ ನನ್ನದು/
ಅರವಳಿಕೆಯೇ ನೀಡದೆ ಎದೆಯ ಬಗೆಯೋ ಶಸ್ತ್ರಕ್ರಿಯೆ,
ಈ ಒಲವೆನ್ನುವ ಒಗರು ಭಾವ//
ನಿನ್ನರಮನೆಯ ಬೀದಿಯಲಿ,
ಒಲವ ಯಾಚಿಸಿ ಅಲೆವಾಗ/
ನನ್ನ ಹಣೆಯಿಂದ ಸುರಿದ ಸ್ವೇದ ಬಿಂದು,
ನೋಡು ಹದವಾಗಿ ಚಿಗುರಿ...ಪ್ರತಿ ಹನಿಯೂ ಸುಂದರ ಸುಮಗಳಾಗಿವೆ//
ಕೇವಲ ನಿರೀಕ್ಷೆಯ ನೇಣಿಗೆ ಏರಿಸಿ,
ಕ್ಷಣ ಕ್ಷಣವೂ ಒಲವ ಮುಳ್ಳಿನ ಮೊನೆಯಿಂದ ಚುಚ್ಚಿ ಇಂಚಿಂಚಾಗಿ ನನ್ನನು ಕೊಲ್ಲುವ ಜೀವವೇ/
ನನ್ನೆದೆಯ ಬೇಗೆ ನಿನ್ನ ಮನೆಯ ಬೆಚ್ಚಗಾಗಿಸೋದಾದರೆ,
ನಗು ಚಿಮ್ಮಿಸುತಲೇ ತುಟಿಯಂಚಿನಲಿ ಸುಟ್ಟು ಬೂದಿಯಾಗಲು ನಾನು ತಯಾರು//
ಮೌನ ಕಲಕೋ ವೀಣೆಯ ಮಾರ್ದನಿ,
ಉಲಿವ ಕೊಳಲಿನ ಇಂಪಾದ ಇನಿದನಿ/
ನೆಲಕೆ ಬೆಚ್ಚನೆ ಚಾದರ,
ಹೊದಿಸಿ ತಬ್ಬುವ ಇಬ್ಬನಿ...ಮುಗಿಲ ದಾಟಿ ಜಾರುವ ಮಳೆ ಹನಿಯೂ ನೀನು//
ಯಾವಾಗಲೂ ನೀ ನನ್ನ ಸೋಕಲು,
ಈ ಜೀವನ ನನ್ನೊಳಗೆ ಕಚಗುಳಿಯನಿಟ್ಟಿತು/
ನೆನಪಿನ ನಾವೆಯ ನಿನ್ನ ಜೊತೆಯಲೇ ಏರಲು,
ಸಂಭ್ರಮದ ತಂತಿಯೂ ಮೀಟಿತು//
ಕಂಗಳಲೆ ಒಲವನು ಸೂಸಿ,
ಎದೆಯೊಳಗೆ ಪ್ರೀತಿಯ ರಾಶಿ...ಹಾಕಿರುವ ನಿನ್ನ ಹೊಗಳಲೇ?/
ನಸು ನಗುವೇ ಹೇಳಿದೆ ಎಲ್ಲ,
ಗುಟ್ಟೇನೂ ಉಳಿದೆ ಇಲ್ಲ...ತೆರೆದ ಮನವ ನಾನು ಓದಲೇ?//
ಜೇನಿನ ಕಂಗಳಲ್ಲಿ,
ಮನಸ ಸೆಳೆವ ಹಾಡಿನಲ್ಲಿ/
ಮತ್ತೆ ಸುಳಿವ ಗಾಳಿಯಲ್ಲಿ ಬೆರೆತು ನವಿರು ಕಂಪ ಚಲ್ಲಿ,
ಇಳಿದೆ ಕನಸ ಛಾಯೆಯಾಗಿ ನನ್ನೊಳಗೆ ನೀನು//
ಮುಗಿಲಿಗೆ ನೆಗೆಯೋ ಕನಸು,
ಕನಿಷ್ಠ ಬೆಟ್ಟವನ್ನಾದರೂ ಏರಿಸೀತು/
ನುಗ್ಗುವ ಛಲ ಮುಖ್ಯ
ಗೆಲುವಿನ ಛಾತಿ ಖಂಡಿತ ಕೈಸೇರೀತು//
ಸೋತ ಮುಗಿಲಿಗೆ ಹನಿ ಸಾಂತ್ವಾನ...
ಅಕ್ಕರೆಯ ಜೊತೆ ಬಿರಿದ ನೆಲದ ಆಸರ/
ಹನಿದ ಬೆವರ ಒರೆಸೋ ಒಲವು,
ಇನ್ನಷ್ಟು ಸುರಿವ ಹಂಬಲ...ತುಸು ಕಾತರ//
ನೀನು ಮುಗಿಲು-
ನಾನು ನೆಲ ಇದೆಲ್ಲ ಹಳೆ ಕಥೆ/
ಮುಗಿಲು ಕರಗಿ ಸೇರಿ ನೆಲದ ಜೊತೆ,
ಅರಳಲಿ ಹೊಸತೊಂದು ಲತೆ...ಇಷ್ಟವಾಯ್ತಾ ನನ್ನ ಈ ಹೊಸ ಕವಿತೆ//
ಬೀಸುವ ಗಾಳಿಯ ಒಳ ಗುಟ್ಟು,
ಕಂಪಿಸುವ ಚಿಗುರೆಲೆಗಳ ಪಾಲು/
ಮತ್ತೆ ಬಂದ ಉಗಾದಿ ಒಂದು ನೆಪವಷ್ಟೇ,
ಸಂಭ್ರಮ ಹಂಚಿಕೊಳ್ಳಲು ಈ ನಾಲ್ಕು ಸಾಲು//
ಚೂರಾದರೂ ಒಲವ ಹನಿ ಹನಿಸಿದ್ದರೆ ಮೋಡ,
ಬಾಯಾರಿದ ನೆಲವೂ ತುಸು ನಗುತ್ತಿತ್ತು/
ಸಂತೃಪ್ತಿಯ ತೋರ್ಪಡಿಕೆಗೆ,
ಒದ್ದೆ ಮಣ್ಣೂ ಘಮಗುಡುತ್ತಿತ್ತು//
ಖಾಲಿ ಬಾನ ವಿಷಾದದ ಚಿತ್ರ,
ಮಳೆಯ ಸುಳಿವಿರದೆ ಕಾದ ನೆಲದ ಅಪೂರ್ಣ ನಿರಾಸೆಯ ಪತ್ರ/
ನನಗಾಪ್ತ,
ಏಕೆಂದರೆ... ಒಲವಿನ ಬರದಲ್ಲಿ ನಾನೂ ತೃಸ್ತ//
ಬಾನಲಿ ತೇಲಾಡುವ ಮೋಡವೆ ಹೇಳು,
ನೆಲದೆಡೆಗಿನ ಮೋಹದ ಸಾಲು/
ನಿನ್ನೆದೆಯ ಪುಟದಲ್ಲಿ,
ಎಂದೂ ಮೂಡಲಿಲ್ಲವೇ?//
ಮುತ್ತು ಪೋಣಿಸಿದಂತೆ ಹಣೆಯ ಮೇಲೆ ಹನಿ ಬೆವರು,
ಕತ್ತೂ ಕಾಣಿಸದಂತ ಕರಿ ಕುರುಳ ತಂಬೆಲರು/
ನೀನು ಅಂದಾಗ ನನ್ನ ಮನಸಲ್ಲಿ,
ಮೂಡೋದು ಕೇವಲ ಇದೇ ಚಿತ್ರ//
ನೀ ಕನಸ ಕಾಡಿದಂತಿದೆ,
ನೀ ಮನಸ ಸೋಕಿದಂತಿದೆ/
ತನುವ ತಾಕಿದಂತಿದೆ,
ನನ್ನ....ಹೃದಯ ಮೀಟಿದಂತಿದೆ//
ಬಾನೊಡಲ ಮೇಘದ ಸಾಲು,
ಕಣ್ತುಂಬಿ ಕೆಳಗೆ ಸುರಿದ ಹಾಗೆ/
ಮನದೊಳಗೆ ಕಟ್ಟಿದ ಮನೆಗೆ,
ಸೋಕಿದೆ ಕಿಡಿ...ತಾಳೋದು ಹೇಗೆ?
ಬಿರು ಬೆಂಕಿಯ ಬೇಗೆ//
ಸವಾಲುಗಳಿರಲಿ ನನ್ನ ಬಾಳಲಿ,
ಆದರೆ ಬಾಳ್ವೆಯೆ ಒಂದು ಸವಾಲಾಗದಿರಲಿ/
ನಿನ್ನೆಡೆಗಿನ ಸೆಳೆತವೂ ಕೂಡ,
ಸೆಳೆತವಾಗಿಯೇ ಉಳಿಯದಿರಲಿ.....ಕೊನೆವರೆಗೂ//
ಇರುಳ ನಿದಿರೆಯಲಿ ಮಳೆ ಸುರಿದ ಕನಸುಗಳ,
ಮನದ ಬೊಗಸೆಯಲೆ ಹಿಡಿದು ಕುಡಿಯಲ?/
ಕನಿಷ್ಠ...ಅದರಲ್ಲಾದರೂ ಕಾಣುವ ಒಲವು ತುಂಬಿದ ನಿನ್ನ,
ಕೈ ಹಿಡಿದು ಮತ್ತದೇ ಮಳೆಯಲಿ ತೋಯ್ಯುತ....ಉನ್ಮತ್ತನಾಗಿ ಕುಣಿಯಲ?//
ಕಣ್ಣ ರೆಪ್ಪೆಯ ಕಪಾಟಿನ ಒಳಗೆ,
ನೀ ಬಚ್ಚಿಟ್ಟಿರುವ ಕೋಮಲ ಕನಸುಗಳ....
ಒಂದನ್ನೂ ಬಿಡದೆ ನಾ ದೋಚಲ?/
ಬೆಲೆಕಟ್ಟಲಾಗದ ಅವನ್ನೇ ಮಾಲೆಗಳಾಗಿ ಪೋಣಿಸಿ,
ನಿನಗೇ ಅದನ್ನು ತೊಡಿಸಿ ಸಂಭ್ರಮಿಸಲ?//
ಹೆಪ್ಪುಗಟ್ಟಿದ ನೆನಪಿನ ಮಾರ್ದವ ಇಬ್ಬನಿಹನಿಗಳ,
ನಿನ್ನ ಬೆಚ್ಚನೆಯ ಉಸಿರ ಬಿಸಿಗೆ ಕರಗಿಸುವ ಹಂಬಲ/
ನನ್ನ ಹುಂಬ ಹೃದಯಕ್ಕೆ,
ಅದೇನೋ ವಿವರಿಸಲಾಗದ ಖುಷಿ ತಂದುಕೊಟ್ಟಿದೆ//
ಮುಸುಕಲಿ ಬಿಡು ಮಬ್ಬು ಮುಸುಕು,
ನಿನ್ನ ಮನಗೆಲ್ಲುವ ಕಲ್ಪನೆಯ ಬದುಕು/
ಅದೇನೇ ಆಕ್ಷೇಪ ನಿನ್ನೆದೆಯಲ್ಲಿ ಕಾವು ಕೂತಿದ್ದರೂ,
ಒಪ್ಪಿಗೆಯ ಹೂಮರಿಗಳು ಹುಟ್ಟಿಯಾವು ಎಂಬ ದೂರದ ನಿರೀಕ್ಷೆ ನನಗಿದೆ//
ಮುಗಿಲ ಚುಂಬಿಸೋ ಮೋಡ,
ನೀಲಿಬಾನಿಗೆಲ್ಲ ಪರದೆ ಹಾಕಿ/
ತನ್ನ-ಮುಗಿಲ ನಡುವಿನ ಸಂಬಂಧವ,
ಇನ್ನಷ್ಟು ಗಾಢ...ನಿಗೂಢವಾಗಿಸಿದೆ ನೋಡು//
ಸುರಗಿಗಿಂತ ಸುವಾಸನೆ,
ಪಾರಿಜಾತಕ್ಕಿಂತ
ಪರಮಾಪ್ತ/
ಮಲ್ಲಿಗೆಗಿಂತ ಮೋಹಕ,
ನಿನ್ನ ಬೆವರ ಘಮ//
ಹೊಸ ಹರೆಯ ಹಗಲಿಗೆ,
ರವಿ ರಂಗಾದ ಮೂಡು ಮುಗಿಲಿಗೆ/
ಸದ್ದು...ಇಲ್ಲಿ ಮೌನ ಮಾತಾಗುತ್ತಿದೆ,
ಪಿಸುದನಿಯೂ ದುಬಾರಿ ಮುತ್ತಾಗುತ್ತಿದೆ!//
ಬೆಳಕಿನ ಸ್ಪೂರ್ತಿಯಿಂದ ಅರಳಿರೋದೆ,
ಬೆಳದಿಂಗಳ ರಂಗವಲ್ಲಿ/
ಕನಸ ಕುಸುಮಕೆ ಅರಳೋ ಅಣತಿಯಿತ್ತು,
ನೀ ನನ್ನಿಂದ ದೂರ.....ಹೊರಟಿದ್ದಾದರೂ ಎಲ್ಲಿ//
ಉಸಿರಿರೋವರೆಗೂ,
ಎದೆ ತುಂಬ ಒಲವಿರೋದು ಖಾತ್ರಿ/
ನೆನಪಿನ ರಾಜಬೀದಿಯುದ್ದಕೂ,
ನಿನ್ನದೆ ವಿರಹದ ಜಾತ್ರಿ//
ಬದುಕ ಪುಸ್ತಕದ ಪುಟಗಳಲ್ಲಿ ನವಿರು ವಾಸನೆ,
ನಿನ್ನ ಬೆವರ ಘಮವನ್ನೇ ನೆನಪಿಸುವ ಮಧುರ ಯಾತನೆ/
ಅಚಾನಕ್ ಯಾವುದೋ ಹಾಳೆಯ ನಡುವೆ ಸಿಗುವ ನವಿಲುಗರಿ ಮರಿ ಮಾಡಿದೆ,
ಥೇಟ್ ನನ್ನೆದೆಯಲ್ಲಿ ನೀ ಮಾಡಿದಂತೆ....ವಿಷಾದದ ಕಾವಿಗೆ//
ಕಣ್ಣ ಚೂರಿಯಿಂದ ಇರಿದು.
ಮೌನದ ಮೊನೆಯಿಂದಾನೂ ತಿವಿದು/
ವೇದನೆಯನ್ನೇ ಕೊಡುತ ಹೀಗೆ...ನೀನೆಷ್ಟೇ ಗೋಳು ಕೊಟ್ಟರೂ,
ಎದೆಮೇಲೆ ಕಿಚ್ಚನಿಟ್ಟರೂ...ಆ ಬೆಂಕೀಲೆ ಮನೆಯ ಬೆಳಗುವೆನು//
