ಕನಸಿನ ಏಣಿ...

ಸವಾಲುಗಳಿರಲಿ ನನ್ನ ಬಾಳಲಿ,

ಆದರೆ ಬಾಳ್ವೆಯೆ ಒಂದು ಸವಾಲಾಗದಿರಲಿ/

ನಿನ್ನೆಡೆಗಿನ ಸೆಳೆತವೂ ಕೂಡ,

ಸೆಳೆತವಾಗಿಯೇ ಉಳಿಯದಿರಲಿ.....ಕೊನೆವರೆಗೂ//

ಇರುಳ ನಿದಿರೆಯಲಿ ಮಳೆ ಸುರಿದ ಕನಸುಗಳ,

ಮನದ ಬೊಗಸೆಯಲೆ ಹಿಡಿದು ಕುಡಿಯಲ?/

ಕನಿಷ್ಠ...ಅದರಲ್ಲಾದರೂ ಕಾಣುವ ಒಲವು ತುಂಬಿದ ನಿನ್ನ,

ಕೈ ಹಿಡಿದು ಮತ್ತದೇ ಮಳೆಯಲಿ ತೋಯ್ಯುತ....ಉನ್ಮತ್ತನಾಗಿ ಕುಣಿಯಲ?//

ಕಣ್ಣ ರೆಪ್ಪೆಯ ಕಪಾಟಿನ ಒಳಗೆ,

ನೀ ಬಚ್ಚಿಟ್ಟಿರುವ ಕೋಮಲ ಕನಸುಗಳ....

ಒಂದನ್ನೂ ಬಿಡದೆ ನಾ ದೋಚಲ?/

ಬೆಲೆಕಟ್ಟಲಾಗದ ಅವನ್ನೇ ಮಾಲೆಗಳಾಗಿ ಪೋಣಿಸಿ,

ನಿನಗೇ ಅದನ್ನು ತೊಡಿಸಿ ಸಂಭ್ರಮಿಸಲ?//