ಬಂದಾಗ ನೀನು...

ಬಂದಾಗ ನೀನು ಬಾಗಿಲ ತಟ್ಟ ಬೇಕಿಲ್ಲ,
ನನ್ನ ಮನೆಗೆ ಬಾಗಿಲನ್ನೇ ನಾನಿಡಿಸಿಲ್ಲ/
ಸ್ವರ ತೆಗೆದು ನನ್ನ ಕೂಗ ಬೇಕಿಲ್ಲ,
ಅವೇಳೆಯಾದರೂ ಸರಿ ನಿನ್ನ ನಿರೀಕ್ಷೆಯಲೇ ಮನಸಿರುವುದಲ್ಲ//

ನೀ ಬಂದರೆ ಅಷ್ಟೇ ಸಾಕು...ಕರೆದು ಸದ್ದೆಬ್ಬಿಸಬೇಡ,
ಇಲ್ಲಿ ನನ್ನ ಕಣ್ರೆಪ್ಪೆಯಲ್ಲಿ ನಿನ್ನ ಕನಸು ಕನವರಿಸುತಿದೆ/
ಕೂಗಿ ಬೆಚ್ಚಿಬೀಳಿಸಬೇಡ,
ನಿದ್ದೆಯಲೇ ನೀನಿರೋ ಸುಂದರ ಕನಸ ತುಟಿ ಅದೇಕೋ ಮುಗುಳ್ನಗುತಿದೆ//

ನಿನ್ನ ಸುವಾಸನೆ ಹೊತ್ತುತರುವ ಗಾಳಿ ಹೇಳುವ ಚಾಡಿಯೇ ಸಾಕು/
ನಿನ್ನೆದೆ ಮಿಡಿತ ನನ್ನ ಕಿವಿಯಲಿ ಉಲಿಯುವ ಇಶಾರೆಯ ಮೋಡಿಯೇ ಸಾಕು//